CSlElizabeth - Colossians

Chapter 1

1:1  Павел, Апостол Иисус Христов волею Божиею, и Тимофей брат,

1:2  сущым в Колоссаех святым и верным братиям о Христе Иисусе:

1:3  благодать вам и мир от Бога Отца нашего, и Господа Иисуса Христа. Благодарим Бога и Отца Господа нашего Иисуса Христа, всегда о вас молящеся,

1:4  слышавше веру вашу, яже о Христе Иисусе, и любовь, юже имате ко всем святым,

1:5  за упование отложенное вам на небесех, еже прежде слышасте в словеси истины благовествования,

1:6  сущаго в вас, якоже и во всем мире: и есть плодоносно и растимо, якоже и в вас, от негоже дне слышасте и разуместе благодать Божию во истине:

1:7  якоже и уведесте от Епафраса, возлюбленнаго соработника нашего, иже есть верен о вас служитель Христов,

1:8  иже и яви нам вашу любовь в дусе.

1:9  Сего ради и мы, от негоже дне слышахом, не престаем о вас молящеся и просяще, да исполнитеся в разуме воли Его, во всяцей премудрости и разуме духовнем,

1:10  яко ходити вам достоине Богу во всяцем угождении и всяком деле блазе, плодоносяще и возрастающе в разуме Божии,

1:11  всякою силою возмогающе по державе славы Его, во всяцем терпении и долготерпении с радостию.

1:12  Благодаряще Бога и Отца, призвавшаго вас в причастие наследия святых во свете.

1:13  Иже избави нас от власти темныя и престави в Царство Сына любве Своея,

1:14  о Немже имамы избавление Кровию Его и оставление грехов.

1:15  Иже есть образ Бога невидимаго, перворожден всея твари.

1:16  Яко Тем создана быша всяческая, яже на небеси и яже на земли, видимая и невидимая, аще престоли, аще господствия, аще начала, аще власти: всяческая Тем и о Нем создашася.

1:17  И Той есть прежде всех, и всяческая в Нем состоятся.

1:18  И Той есть глава телу Церкве, Иже есть начаток, перворожден из мертвых, яко да будет во всех Той первенствуя.

1:19  Яко в Нем благоизволи всему исполнению вселитися,

1:20  и Тем примирити всяческая к Себе, умиротворив Кровию креста Его, чрез Него, аще земная, аще ли небесная.

1:21  И вас, иногда сущих отчужденных и врагов помышленьми в делех лукавых,

1:22  ныне же примири в теле Плоти Его смертию Его, представити вас святых и непорочных и неповинных пред Собою,

1:23  аще убо пребываете в вере основани и тверди, и неподвижими от упования благовествования, еже слышасте, проповеданное всей твари поднебесней, емуже бых аз Павел служитель.

1:24  Ныне радуюся во страданиих моих о вас, яко исполняю лишение скорбей Христовых во плоти моей за Тело Его, еже есть Церковь.

1:25  Ейже бых аз служитель по смотрению Божию, данному мне в вас, исполнити слово Божие,

1:26  тайну сокровенную от век и от родов: ныне же явися святым Его,

1:27  Имже восхоте Бог сказати, кое богатство славы тайны сея во языцех, иже есть Христос в вас, упование славы,

1:28  Егоже мы проповедуем, наказующе всякаго человека и учаще всяцей премудрости, да представим всякаго человека совершенна о Христе Иисусе:

1:29  в немже и труждаюся и подвизаюся по действу Его действуемому во мне силою.

Chapter 2

2:1  Хощу убо вас ведети, колик подвиг имам о вас и о сущих в Лаодикии и во Иераполи, и елицы не видеша лица моего во плоти,

2:2  да утешатся сердца их, снемшихся в любви и во всяцем богатстве извещения разума, в познание тайны Бога и Отца и Христа,

2:3  в Немже суть вся сокровища премудрости и разума сокровенна.

2:4  Сие же глаголю, да никтоже вас прельстит в словопрении.

2:5  Аще бо и плотию отстою, но духом с вами есмь, радуяся и видя ваш чин и утверждение вашея веры, яже во Христа.

2:6  Якоже убо приясте Христа Иисуса Господа, такожде в Нем ходите,

2:7  укоренени и наздани в Нем и извествовани верою, якоже научистеся, избыточествующе в ней благодарением.

2:8  (Братие,) блюдитеся, да никтоже вас будет прельщая философиею и тщетною лестию, по преданию человеческому, по стихиам мира, а не по Христе.

2:9  Яко в Том живет всяко исполнение Божества телесне:

2:10  и да будете в Нем исполнени, Иже есть глава всякому началу и власти:

2:11  о Немже и обрезани бысте обрезанием нерукотворенным, в совлечении тела греховнаго плоти, во обрезании Христове,

2:12  спогребшеся Ему крещением: о Немже и совостасте верою действия Бога, Воскресившаго Его из мертвых.

2:13  И вас, мертвых сущих в прегрешениих и в необрезании плоти вашея, сооживил есть с Ним, даровав нам вся прегрешения,

2:14  истребив еже на нас рукописание ученьми, еже бе сопротивно нам, и то взят от среды, пригвоздив е на кресте:

2:15  совлек начала и власти, изведе в позор дерзновением, изобличив их в Себе.

2:16  Да никтоже убо вас осуждает о ядении, или о питии, или о части праздника, или о новомесячиих, или о субботах:

2:17  яже суть стень грядущих, тело же Христово.

2:18  Никтоже вас да прельщает изволенным ему смиреномудрием и службою Ангелов, яже не уведе учя, без ума дмяся от ума плоти своея,

2:19  а не держя главы, из неяже все тело, составы и соузы подаемо и снемлемо, растит возращение Божие.

2:20  Аще убо умросте со Христом от стихий мира, почто аки живуще в мире стязаетеся?

2:21  Не коснися, ниже вкуси, ниже осяжи:

2:22  яже суть вся во истление употреблением, по заповедем и учением человеческим:

2:23  яже суть слово убо имуща премудрости в самовольней службе и смиреномудрии и непощадении тела, не в чести коей к сытости плоти.

Chapter 3

3:1  Аще убо воскреснусте со Христом, вышних ищите, идеже есть Христос о десную Бога седя:

3:2  горняя мудрствуйте, (а) не земная.

3:3  Умросте бо, и живот ваш сокровен есть со Христом в Бозе:

3:4  егда же Христос явится, живот ваш, тогда и вы с Ним явитеся в славе.

3:5  Умертвите убо уды вашя, яже на земли: блуд, нечистоту, страсть, похоть злую и лихоимание, еже есть идолослужение,

3:6  ихже ради грядет гнев Божии на сыны противления.

3:7  В нихже и вы иногда ходисте, егда живясте в них.

3:8  Ныне же отложите и вы та вся: гнев, ярость, злобу, хуление, срамословие от уст ваших:

3:9  не лжите друг на друга, совлекшеся ветхаго человека с деяньми его

3:10  и облекшеся в новаго, обновляемаго в разум по образу Создавшаго его,

3:11  идеже несть Еллин, ни Иудей, обрезание и необрезание, варвар и Скиф, раб и свободь, но всяческая и во всех Христос.

3:12  Облецытеся убо якоже избраннии Божии, святи и возлюбленни, во утробы щедрот, благость, смиреномудрие, кротость и долготерпение,

3:13  приемлюще друг друга и прощающе себе, аще кто на кого имать поречение: якоже и Христос простил есть вам, тако и вы.

3:14  Над всеми же сими (стяжите) любовь, яже есть соуз совершенства:

3:15  и мир Божии да водворяется в сердцах ваших, в оньже и звани бысте во едином теле: и благодарни бывайте.

3:16  Слово Христово да вселяется в вас богатно, во всякой премудрости: учаще и вразумляюще себе самех во псалмех и пениих и песнех духовных, во благодати поюще в сердцах ваших Господеви.

3:17  И все, еже аще что творите словом или делом, вся во имя Господа Иисуса Христа, благодаряще Бога и Отца Тем.

3:18  Жены, повинуйтеся своим мужем, якоже подобает о Господе.

3:19  Мужие, любите жены вашя, и не огорчайтеся к ним.

3:20  Чада, послушайте родителей (своих) во всем: сие бо угодно есть Господеви.

3:21  Отцы, не раздражайте чад ваших, да не унывают.

3:22  Раби, послушайте по всему плотских господии (ваших), не пред очима точию работающе аки человекоугодницы, но в простоте сердца, боящеся Бога.

3:23  И всяко, еже аще что творите, от души делайте, якоже Господу, а не человеком,

3:24  ведяще, яко от Господа приимете воздаяние достояния: Господу бо Христу работаете.

3:25  А обидяй восприимет, еже обиде: и несть лица обиновения.

Chapter 4

4:1  Господие, правду и уравнение рабом подавайте, ведяще, яко и вы имате Господа на небесех.

4:2  В молитве терпите, бодрствующе в ней со благодарением:

4:3  молящеся и о нас вкупе, да Бог отверзет нам двери слова, проглаголати тайну Христову, еяже ради и связан есмь:

4:4  да явлю ю, якоже подобает ми глаголати.

4:5  В премудрости ходите ко внешним, время искупующе.

4:6  Слово ваше (да бывает) всегда во благодати, солию растворено, ведети, како подобает вам единому комуждо отвещавати.

4:7  Иже о мне, вся скажет вам Тихик, возлюбленный брат и верен служитель и соработник о Господе,

4:8  егоже послах к вам на се истое, да разумеет яже о вас и утешит сердца ваша,

4:9  со Онисимом, верным и возлюбленным братом нашим, иже есть от вас: вся вам скажут, яже зде.

4:10  Целует вы Аристарх спленник мой, и Марко анепсий Варнавин, о немже приясте заповеди: аще приидет к вам, приимите его:

4:11  и Иисус нареченный Иуст, сущий от обрезания: сии едини споспешницы во Царство Божие, иже быша ми утешение.

4:12  Целует вы Епафрас, иже от вас, раб Иисуса Христа, всегда подвизаяйся о вас в молитвах, да будете совершени и исполнени во всяцей воли Божией.

4:13  Свидетелствую бо о нем, яко имать ревность многу (и болезнь) о вас и о сущих в Лаодикии и во Иераполи.

4:14  Целует вы Лука врачь возлюбленный, и Димас.

4:15  Целуйте братию сущую в Лаодикии, и Нимфана, и домашнюю его церковь.

4:16  И егда прочтется послание сие у вас, сотворите, да и в Лаодикиистей церкви прочтено будет, и написаное от Лаодикии да и вы прочтете.

4:17  И рцыте Архиппу: блюди служение, еже приял еси о Господе, да довершиши е.

4:18  Целование моею рукою Павлею. Поминайте моя узы. Благодать со (всеми) вами. Аминь.