Kapingamarangi - Colossians

Chapter 1

1:1  Mai baahi o Paul, ne-hili go God belee hai tangada agoago-hagau ni Jesus Christ, mo mai baahi o tadau duaahina Timothy,

1:2  ang-gi nia dama a God ala i Colosse, ala go madau duaahina manawa-dahi i-lodo tadau hagadaubuni ang-gi Christ. God tadau Damana gi-dugu-adu gi goodou tumaalia mo-di noho i-di aumaalia.

1:3  I-nia laangi huogodoo, gimaadou e-danggee ang-gi God, Tamana o tadau Dagi go Jesus Christ, i madau madagoaa ma-ga-dalodalo i goodou.

1:4  Idimaa, gimaadou gu-longono di-godou hagadonu a Jesus Christ, mo di-godou aaloho i-nia dama a God huogodoo.

1:5  Di madagoaa o-di Longo-Humalia dela e-donu, ne-dae-adu gi goodou, goodou gu-longono di hai o-di hagadagadagagee. Malaa, godou hagadonu mo godou aaloho gu-hagamau goodou gi godou mee ala e-hagadagadagagee ginai, ala guu-lawa di-benebene adu gi goodou i-di langi.

1:6  Di Longo-Humalia e-gaamai nia maluagina ge e-dele gi nia madagoaa huogodoo i henuailala, dela hogi di-hai di-maa nogo gila i godou baahi, i taamada di-godou longono matagidagi tumaalia dehuia o God, gei goodou guu-donu humalia ginai.

1:7  Goodou guu-lawa di-iloo di hai o tumaalia o God mai baahi o Epaphras, di hoo hagaaloho ni gidaadou, tangada hai-hegau manawa-dahi dela ne-hagamaamaa goodou i-nia hegau a Christ.

1:8  Ma go mee dela ne-hagi-mai gi gimaadou di aloho dela ne-dugu-adu go di Hagataalunga-Dabu.

1:9  Deenei-laa gaa-hidi-ai gimaadou gaa-hai dalodalo i goodou i-nia laangi huogodoo, mai taamada di-madau longono i goodou. Gimaadou e-hai dangidangi ang-gi God gi-haga-honu-ina goodou gi ono hiihai mo ono kabemee huogodoo ala e-gaamai i-baahi dono Hagataalunga.

1:10  Gei goodou gaa-mee di-mouli be-di hiihai o Tagi, ge e-hai nia mee ala e-haga-tenetene dono manawa. Gei nia hagadilinga hegau humalia huogodoo ga-kila-aga i godou baahi, gei di-godou iloo a God ga-tomo-aga.

1:11  Gimaadou e-dangidangi bolo goodou gi-hai-mee gi-nia hagadilinga maaloo huogodoo, ala e-loomoi i ono mahi madamada, gii-mee-ai goodou di-hai-hegau hagamahi i-lodo nia haingadaa huogodoo i-di hagakono o-di manawa mo-di tenetene. Danggee gi Tamana i-di manawa-tene, i Mee dela ne-haga-honu goodou bolo gii-mee di-hai-mee gi ana mee ala gu-dugu-anga gi ana dama i-lodo tenua maalama.

1:12  Gimaadou e-dangidangi bolo goodou gi-hai-mee gi-nia hagadilinga maaloo huogodoo, ala e-loomoi i ono mahi madamada, gii-mee-ai goodou di-hai-hegau hagamahi i-lodo nia haingadaa huogodoo i-di hagakono o-di manawa mo-di tenetene. Danggee gi Tamana i-di manawa-tene, i Mee dela ne-haga-honu goodou bolo gii-mee di-hai-mee gi ana mee ala gu-dugu-anga gi ana dama i-lodo tenua maalama.

1:13  Mee ne-haga-dagaloaha gidaadou gi-daha mo-di mogobuna o-di bouli, gu-dagi-mai gidaadou gi-lodo tenua o dana Dama dela e-aloho-ai.

1:14  Deenei go Mee ne-haga-dagaloaha gidaadou, dono hadinga bolo ne-wwede tadau huaidu huogodoo.

1:15  Christ la-go di ada o God dela e-de-gidee. Gei Mee la-go Tama-madua dela e-aamua i-nia mee huogodoo ala ne-hai.

1:16  Idimaa, God ne-hai nia mee huogodoo mai i Mee, nia mee ala i-di langi mo i henuailala, nia mee ala e-gidee mo e-de-gidee, digau di-langi mogobuna, mo nia dagi di-langi, mo digau aamua di-langi mo henuailala. God ne-hai nia mee huogodoo mai i Christ, ge ne-hai ang-gi Mee.

1:17  Christ guu-i-golo i-mua nia mee huogodoo ne-hai. I-di buni gi Mee, nia mee huogodoo la-gu-haga-noho hagahumalia gi nadau lohongo.

1:18  Mee go di libogo o dono huaidina, go di nohongo-dabu. Di mouli o tuaidina le e-hanimoi i dono baahi. Mee go di ulumadua dela ne-hagamouli-aga mai i-di made, bolo gi i-mua a-Mee i-nia mee huogodoo.

1:19  Idimaa, ma di manawa-donu ni God bolo dana Dama-daane la-gi-hai-hua be Ia i-nia mee huogodoo.

1:20  God ne-hagamaanadu bolo Ia gaa-hai nia mee huogodoo gi-buni-anga gi de-Ia mai i dana Dama, nia mee i-di langi mo i henuailala. Mai i-nia dodo o dana Dama i-hongo di loobuu, God guu-hai gidaadou gii-noho i-di aumaalia.

1:21  I-mua, gei goodou nogo mogowaa i-daha mo God, gei goodou nogo hai nia hagadaumee ni Mee, idimaa goodou nogo maanadu huaidu mo-di haihai nia mee huaidu.

1:22  Malaa dolomeenei, God guu-hai goodou nia hoo hagaaloho ni-oono mai i-di made o dana Dama-daane, belee hai goodou gii-dabu, gi-madammaa, gii-donu i ono mua.

1:23  Goodou gi-haga-mau-dangihi-ina godou hagadonu gi-muli, hudee kilia gi-daha godou hagadagadagagee mai di Longo-Humalia. Deenei di Longo-Humalia dela gu-agoago gi-nia daangada huogodoo i henuailala. Gei au go Paul, tangada hai-hegau ni-di Longo-Humalia deenei.

1:24  Dolomeenei, gei au e-tenetene huoloo i dogu hagaduadua i goodou, idimaa, mai dogu duadua deenei, au e-hagamaamaa e-hagangudu tuadua o Christ ang-gi di nohongo-dabu dela go dono huaidina.

1:25  God ne-hai au tangada hai-hegau ni-di nohongo-dabu, ne-gaamai tegau deenei belee hai ko-au e-hagahumalia-ai goodou. Tegau deenei le e-hagadele ana helekai huogodoo.

1:26  Nnelekai aanei nogo de-iloo nia daangada huogodoo, nogo hagammuni-hua go Mee mai namua, malaa, dolomeenei, gu-haga-modongoohia gi ana dama.

1:27  God dana hagamaanadu bolo ana daangada le e-hai gi-iloo-ginaadou di mee dela nogo de-iloo. Di mee hagammuni deenei le e-honu i-nia maluagina, gei e-madamada huoloo dela ne-hagatogomaalia go Mee gi-nia daangada huogodoo. Di mee hagammuni deenei le e-hai boloo, “Christ e-noho i godou lodo,” dono hadinga e-hai bolo goodou digau tuadimee e-hai-mee labelaa gi-nia madamada o God.

1:28  Malaa, gimaadou e-hagadele di Longo-Humalia o Christ gi-nia daangada huogodoo. Gimaadou e-hagi-anga ge agoago gi digaula i madau kabemee huogodoo ala e-mee, gi-iloo-ginaadou di buni-anga gi Christ, mo-di lloomoi gi-mua o God.

1:29  Au e-hai-hegau gi ogu mahi hagatau gii-gila di mee deenei. Au e-mee di-hai nia mee aanei, idimaa, Christ ne-dugu-mai ono mahi e-hai-hegau-iei au.

Chapter 2

2:1  Au e-hiihai bolo goodou gi-iloo dogu hai-hegau hagamahi adu gi goodou mo nia daangada o Laodicea, mo huogodoo ala e-de-iloo ginaadou au.

2:2  Au e-hai-hegau beenei belee hagamaaloo-aga nia manawa digaula, gii-buni digaula gi-di hagadau-aaloho, gi-modongoohia nia mee huogodoo mai di iloo dela e-donu. Maa gaa-hai beenei, gei digaula ga-iloo di mee hagammuni i-baahi o God, deelaa go Mee go Christ.

2:3  Go Mee go di gii dela e-huge nia maluagina nngala huogodoo o-di kabemee mo-di iloo-mee a God.

2:4  Malaa, au e-helekai-adu gi goodou, bolo gii-pula i goodou gi-de-halahalau-hua go nia daangada i nadau lagalagamaaloo dilikai, ma e-aha maa nadau helekai le e-hai bolo ginaadou le e-humalia.

2:5  Ma e-aha maa au e-de-igolo i godou baahi, gei au e-madalia goodou i-di hagataalunga, gei au e-tenetene huoloo i dogu longono bolo goodou e-manawa-maaloo i-lodo godou hagadaubuni hagadonu a Christ.

2:6  Idimaa goodou guu-kae Jesus Christ di Tagi ni goodou, goodou gi-mouli buni-anga gi Mee.

2:7  Haga-mau-ina goodou gi Mee, gi-tomo-aga i-di ala o dono mouli. Haga-maaloo-aga-ina godou hagadonu, gii-hai be-di hai dela ne-aago adu gi goodou. Gi-haga-honu-ina goodou gi tanggee.

2:8  Gii-pula i goodou gi-de-haga-hai-hege-hua go digau ala e-halahalau goodou gi nadau iloo balumee, ala nogo hagadau mai baahi nia adu-daangada mai-i-mua, mo i-nia hagataalunga o-di ahiaalangi ala e-dagi henuailala, ge hagalee mai baahi o Christ.

2:9  Di mouli hagatau o God le e-noho i-lodo o Christ i dono madagoaa ne-hai-tangada.

2:10  Di mouli hagatau la-guu-lawa di-gowadu gi goodou i-di godou buni-anga gi Mee. Go Mee e-aamua i-nia dagi o digau di-langi mo nia mogobuna huogodoo.

2:11  Goodou guu-lawa di-sirkumsais mai i-di godou buni-anga gi Christ, hagalee ne-sirkumsais mai baahi o-nia daangada, gei ne-sirkumsais mai baahi o Christ, di sirkumsais dela e-haga-maahede-ai goodou gi-daha mo-di mogobuna o godou haihai huaidu.

2:12  Idimaa, goodou ala gu-babdais, guu-danu madalia a Christ. Malaa, goodou ala gu-babdais, gu-mouli-aga labelaa madalia a Christ mai di-godou hagadonu di mogobuna o God dela ne-haga-mouli-aga a-Mee gi-daha mo-di made.

2:13  I-mua gei goodou digau guu-mmade, idimaa, goodou nogo hai digau tuadimee, nogo haihai nia mee hala, godou haganoho ai. Malaa dolomeenei, gei God guu-hai goodou gi-mouli madalia a Christ. God gu-dumaalia-mai gi gidaadou i tadau huaidu huogodoo.

2:14  Mee guu-tono gi-daha tadau boibana mo nia haganoho ala nogo lawalawa gidaadou. Mee guu-kili nia maa huogodoo gi-daha i-di daudau o Christ i-di loobuu.

2:15  I-hongo di loobuu deelaa, Christ gu-hagamehede Ia gi-daha mo nia mogobuna o-nia dagi hagataalunga mono dagi aamua, gei Mee gu-hagammada digaula i-mua digau dogologo, i-dana hai ne-dagi digaula be digau lawalawa i-lodo dono aali mai di loobuu.

2:16  Malaa, hudee dugu-anga gi tangada e-dahi gi-heia ana haganoho be nia maa nia-aha ala e-gai be e-inu, be nia laangi llauehe behee ala e-budu, be nia daumaha o-di Malama Hoou, be di Laangi-Sabad.

2:17  Nia haganoho huogodoo beenei, la nia ada-mee hua o-nia mee ala e-kila-mai maalia. Di mee dela e-donu, la-go Christ.

2:18  Goodou gii-pula i goodou gi-de-halahalau hua go tangada, dela bolo ia e-aamua mai i ana moe, gei e-hila-gi-lala tilikai, ge e-daumaha ang-gi digau di-langi. Tagadilinga dangada beenei, le e-bida hagalaamua ia mai i ana hagamaanadu oono.

2:19  Gei mee gu-hagalee dogi ang-gi Christ, dela go di libogo o tuaidina. I-lala nia mogobuna o Christ, tuaidina hagatau le e-mouli gei e-daahi go nia dudaginga mo nia galawa gi-di gowaa e-dahi, ge tuaidina le e-tomo-aga be-di hiihai a God.

2:20  Goodou guu-mmade dalia a Christ, gu-maahede gi-daha mo nia hagataalunga ala e-dagi henuailala. Gei goodou e-aha ala e-mouli hua igolo be digau henuailala? Goodou e-aha ala e-daudali hua igolo nia haganoho beenei:

2:21  “Hudee heia di mee deenei, hudee momia, be hudee bili gi-di mee dela i-golo”?

2:22  Huogodoo la nia mee hua balumee ma-ga-hai-hegau-ai; nia maa la nia haganoho mo nia agoago mai baahi nia daangada.

2:23  Nia haganoho beenei le-hai be nia haganoho ala ne-hau go nadau iloo kabemee i-lodo nadau hagamaaloo-aga nia daumaha ang-gi digau di-langi ne-bida hai go ginaadou, nadau hagahuaidu tilikai, mo nadau hagammaemmae nadau huaidina. Malaa, nia haganoho beenei e-deemee di-duuli tangada gi-daha mo di hiihai huaidu.

Chapter 3

3:1  Goodou gu-mouli-aga dalia a Christ, malaa, goodou gi-haa-manawa i-nia mee o-di langi i-nua, di gowaa dela e-noho-ai a Christ i-hongo dono lohongo-king i-baahi gau-donu o God.

3:2  Goodou gi-hagamaanadu-ina-hua nia mee o-di langi, hagalee go nia mee o henuailala.

3:3  Idimaa, goodou guu-mmade gi-di mouli dolomeenei, gei godou mouli la-guu-dugu hagammuni dalia a Christ i-baahi o God.

3:4  Di-godou mouli-donu la-go Christ. Dono madagoaa ma-ga-hanimoi, goodou ga madalia a-Mee labelaa, e-hai-mee gi ono madamada.

3:5  Haga-mmaa-ina gi-daha nia hiihai o henuailala ala i godou lodo: di mouli hai be-di manu, hangaahai gulugulua, hiihai huaidu, hagamaanadu huaidu mo hagagailaa, idimaa di hagagailaa la-di hai-daumaha ang-gi nia balu-god.

3:6  Idimaa go nia mee beenei, di hagawelewele a God gaa-tale ang-gi digau ala e-de-hagalongo.

3:7  I-mua, gei goodou nogo hai-hegau gi-nia hiihai beenei, i-di madagoaa nogo mouli-ai goodou i-lodo nia huaidu beenei.

3:8  Gei dolomeenei, goodou e-hai gii-kili gi-daha nia mee huogodoo aanei: Di hagawelewele, ahi ibu, mo-di mouli hai-baahi. Tamu tangada mo nnelekai huaidu gi-de-lloomoi i godou ngudu.

3:9  Hudee hai-kai-tilikai i godou mehanga, idimaa, goodou guu-kili gi-daha di mouli namua mo ono hangahaihai huaidu,

3:10  gu-hai tangada hoou. Deenei tangada hoou dela ne-hai go God e-haga-hohoou go Mee i-nia madagoaa huogodoo gii-hai be Ia, gi-iloo humalia goodou Ia.

3:11  Deelaa-laa, dei di hai-geegee i-mehanga digau tuadimee mo digau o Jew ai, be i-mehanga nia daane gu-sirkumsais mo digi sirkumsais, mouli llamu dauwa de-iloo namua mo mouli iloo madammaa dolomeenei, digau hege mo digau moholo, gei Christ la-hua go nia mee huogodoo. Christ la i-lodo nia mee huogodoo.

3:12  Goodou nia daangada ni God. Mee ne-aloho i goodou ge ne-hili belee hai ana dama-donu. Malaa, gi-gahu-ina goodou gi-di aloho, tumaalia, hila-gi-lala, manawa balabala, mo manawa hagakono.

3:13  Goodou gi-hagadau dumaalia i godou mehanga, gi-dumaalia ang-gi tangada dela ma-ga-helekai hagahuaidu i tangada. Gi-dumaalia ang-gi tangada be di hai a Tagi dela ne-dumaalia-adu gi goodou.

3:14  Goodou gi-haga-punia nia mee aanei gi-di aloho, dela e-daabui nia mee huogodoo gi-di gowaa e-dahi gii-dahi-hua.

3:15  Di noho i-di aumaalia mai Christ gi-dagia godou hai-maanadu, idimaa, God ne-gahigahi goodou gi-di noho i-di aumaalia deenei, gii-hai tuaidina e-dahi. Gi-danggee ang-gi Mee.

3:16  Di maluagina o-nia helekai a Christ gii-noho i godou lodo. Gi-hagadau agoago-ina goodou gi-nia iloo-mee huogodoo. Dadaahili ang-gi God i-nia daahili Pisalem, nia daahili hagaamu mo nia daahili mai di Hagataalunga i-lodo godou manawa-danggee.

3:17  Nia mee huogodoo ala e-hai go goodou be e-helekai-ai, gi-heia i-di ingoo o Tagi go Jesus, gi-hagaamuina God Tamana mai i Jesus.

3:18  Nia ahina, dugu-anga goodou gi godou lodo, idimaa, deelaa di mee e-tau-anga e-hai go nia dama a Christ.

3:19  Nia daane, aaloho i godou lodo, gi-manawa-balabala ang-gi digaula.

3:20  Nia damagiigi, goodou gi-hagalongo gi godou maadua i-nia madagoaa huogodoo, idimaa, deenei di hiihai a God.

3:21  Nia maadua, goodou hudee heia godou damagiigi gi-hagawelewele, gi-de-duugia-hua nadau manawa.

3:22  Nia hege, goodou gi-hagalongo gi godou dagi henuailala i-nia mee huogodoo, hagalee go di madagoaa hua digaula e-daumada goodou, bolo gi humalia goodou i-baahi digaula, malaa, ngalua-hua i-lodo godou manawa-donu, mai i godou hagalaamua Tagi.

3:23  Nia mee ma-gaa-hai go goodou, ngalua ginai aga i-lodo godou manawa hagatau, be goodou e-ngalua ang-gi Tagi, hagalee ang-gi tangada.

3:24  Gi-langahia goodou bolo Tagi la-ga-gowadu dana hui dela ne-hagatogomaalia ang-gi ana dama, idimaa Christ la-go Tagi donu dela e-hai-hegau ginai goodou.

3:25  Tangada dela e-haihai nia mee huaidu e-kae dono hui i ana huaidu ala nogo hai, idimaa, God e-hagi-aga nia daangada huogodoo i-di ala hua e-dahi.

Chapter 4

4:1  Nia dagi, haga-hai-hegau-ina godou hege gi-di mee dela e-donu ge humalia. Gi-langahia labelaa di-godou Dagi i-di langi.

4:2  Gii-noho mau di hai-dalodalo, gii-noho kanakana mo-di hagaamu a God i-lodo godou dalodalo.

4:3  Di madagoaa-hua deelaa, dalodalo labelaa i gimaadou, bolo God gi-dugu-mai di madagoaa humalia e-agoago-ai ana helekai, i-nia mee ala e-de-iloo nia daangada i-baahi o Christ, deelaa di mee ne-lawalawa-iei au.

4:4  Gi-dalodalo i-di-au, gii-mee au di-helekai madammaa i-di ala dela belee helekai-ai.

4:5  Gii-pula i godou hangaahai i-mua digau de-hagadonu. Hagamahi hai-hegau gi godou madagoaa humalia.

4:6  Godou helekai gi-heia nnelekai dahidamee ge e-haga-tenetene. Heia gi-iloo di-helekai gii-donu gi-nia heeu o-nia daangada.

4:7  Tadau duaahina go Tychicus, e-hai-hegau manawa-dahi, e-hai-hegau madalia gimaadou ang-gi Tagi, ga-hagadae-adu-laa ogu longo.

4:8  Deelaa dagu mee e-hagau-adu a-mee, belee haga-tenetene godou lodo mai i-di godou longono bolo gimaadou huogodoo le e-humalia-hua.

4:9  Onesimus, tadau tuaahina hagaaloho ge e-hai-hegau manawa-dahi, tangada ni goodou dela ga-lloo-adu ginaua, ga-hagi-adu-laa nia mee huogodoo ala e-hai i-ginei.

4:10  Aristarchus, e-lawalawa dalia au, mo Mark tangada ni Barnabas, e-hai di-nau hagaaloho adu gi goodou. (Goodou guu-kae di haga-iloo bolo gi-benebene-ina Mark i dono madagoaa ma-gaa-dau-adu).

4:11  Joshua, e-haga-ingoo labelaa bolo Justus, e-hai dana hagaaloho labelaa. Digau hagadonu o Jew dogodolu aanei e-hai-hegau madalia au gi Teenua King o God, gu-hagamaamaa au huoloo.

4:12  Tagaaloho mai baahi o Epaphras adu gi goodou. Mee tangada labelaa ni godou buini, tangada hai-hegau ni Jesus Christ, e-hagamahi e-dalodalo i goodou i-nia madagoaa huogodoo bolo God gi-heia goodou gii-tuu maaloo gii-dohu godou hagadonu, i-lodo di-godou daudali hagatau di manawa o God.

4:13  Au e-mee di-hagi-adu dono hai-hegau hagamahi adu gi goodou mo nia daangada o Laodicea mo Hierapolis.

4:14  Luke tadau ihoo dogidaa hagaaloho, mo Demas e-hai di-nau hagaaloho adu gi goodou.

4:15  Hagadae-ina madau hagaaloho gi tadau duaahina ala i Laodicea. Madau hagaaloho labelaa gi Nympha mo-di nohongo-dabu dela e-dagadagabuli i-lodo dono hale.

4:16  I-muli-hua di-godou dau di lede deenei, goodou hagau-ina di lede deenei gii-dau labelaa go digau di nohongo-dabu o Laodicea. I-di madagoaa hua deelaa, goodou gaa-dau labelaa di lede mai i-di nohongo-dabu o Laodicea dela ga-hagau-adu.

4:17  Hagadae-ina gi Archippus bolo gi-haga-lawa-ina dana hegau ne-kae koia i-lodo nnegau o Tagi.

4:18  Au e-hihi nia helekai aanei gi ogu lima-donu: Taga-aloho mai Paul. Gi-langahia ogu siini. Tumaalia a God gii-noho madalia goodou.