PohnOld - Colossians

Chapter 1

1:1  PAULUS wanporon en Kristus Iesus amen pan kupur en Kot o ri atail Timoteus,

1:2  Ong ri at saraui o lelapok ren Krisus akan, me mi Kolose; mak o popol sang ren Kot Sam atail o Kaun Iesus Kristus!

1:3  Kit kin danke Kot o Sam en atail Kaun Iesus Kristus o kapakapa kin komail kaukaule.

1:4  Kit lao rongadar duen omail poson Kristus Iesus, o omail limpok ong saraui kan karos,

1:5  Pweki kaporopor eu, me nekineki ong komail nanlang, duen me komail rongadar mas o ni padak melel en rongamau,

1:6  Me lel wong komail o pil sap akan karos, o a kin wada o kakairida dueta re omail sang ni ran o, me komail rongadar o dedekier melel mak en Kot;

1:7  Duen omail padakki sang ren Epapras at warok kompok amen, me papa lelapok en Kristus ong komail amen,

1:8  Me pil kaireki dong kit duen omail limpok pena ni Ngen.

1:9  I me se sota kin dukedi sang at kapakapa kin komail o poekipoeki sang ni ran en at rongadar, pwe komail en direki erpit en kupur a, o komail en lolekong o koiok ngenin,

1:10  O kekeid wei duen me kon ong Kaun o, o kapareda wan wiawia mau karos, o kakairida ki asa Kot,

1:11  O keleki kel karos duen manaman en a lingan pwen dadaurata o kanongama ki peren,

1:12  Danke Sam o, me kotin kamau kitail lar, en iang pwaisaneki soso en me saraui kan nan marain.

1:13  Me kotin kapiti sang kitail manaman en rotorot, ap kotin kasau kitail dong nan wein Na kompokepa,

1:14  Me kotin dore kitail la iei lapwan dip atail,

1:15  I me kasale pan Kot, me so sansal, me meseni en audepa karos.

1:16  Pwe karos wiauiki i, karos me mi nanlang o sappa, me sansal o me so sansal, ma me poe kan, de saumas akan, de wei kan, de manaman akan, meakaros wiauiki i o ong i.

1:17  O i me kotikot mon meakaros o meakaros memaureki i.

1:18  O i tapwin war a, iei momodisou, o i me tapi o meseni en me iasadar sang ren me melar akan, pwe i en mon meakaros.

1:19  Pwe Kot kotin kileledier me mau kan karos en mi re a.

1:20  I ari kalolamau penang pein i meakan karos, ma ni sappa de nanlang, ni a kotin wiada muei mau ki ntan a lopu.

1:21  O komail, me doo wei sang o imwintiti mas o ni omail lamelame o wiawia sued akan,

1:22  A kotin kalolamau komail lar ki war a uduk ni a matala, pwen kapware kin komail da saraui o pung o so kadeik pa omail mo a.

1:23  Ma komail dadaurata poson o tengeteng o so mokid wei sang ni kaporopor ki rongamau, me komail rongadar, o me lolok ong audepa karos me mi pan lang, me ngai Paulus wialar papa men.

1:24  I ap perenki ai kalokolok ki komail o men kaimwisok kila uduk ai me luedi ni kamekam en Kristus, pweki war a, iei momodisou,

1:25  Me i wialar papa men duen koa dodok en Kot, me i aleer pweki komail pwen usela masan en Kot.

1:26  Iei me rir kot, me rir sang nin tapin kaua o men kaua, a met a kadiarok ong sapwilim a saraui kan,

1:27  Me Kot men kasansaleda kapwapwa en lingan en rir wet ong men liki kan, iei Kristus me kotikot lol omail, i kaporopor en lingan.

1:28  I me kit kin padaki o panepanaui aramas karos, o padapadaki aramas karos ni lolekong karos, pwe kit en kapwareda aramas karos ni unsoki ong Kristus.

1:29  I me i pil dodok kelail, duen wiawia en i me kin dodok kelail lol i.

Chapter 2

2:1  A I men, komail en asa iran ai pei laud pweki komail, o men Laodisäa, o irail karos, me sota kilang mas ai ni uduk o.

2:2  Pwe mongiong arail en kamaitala o irail en warok pena ni limpok o irail en kakairida ni ar dedeki melel duen me rir en Kot.

2:3  Pwe pai en erpit o dedeki, me okiok re a.

2:4  I me i inda mepukat, pwe aramas amen ede kotau ki komail lokaia widing kan.

2:5  A ni pali uduk o ngai me doo, a ni pali ngen i ngai mi re omail, i perenki o kilang omail sondi mau, o omail poson kelail Kristus.

2:6  A duen omail wuki ong Kristus Iesus Kaun o, iduen komail en weweideki i,

2:7  O podidi ong i, o kakau kida i, o komail kelail ni poson, duen me komail padak kidar, o nantiong danke.

2:8  Kalaka pwe amen ede sali kin komail padak mal o padok en kaua duen tiak en aramas akan en sappa, a kaidin tiak en Kristus.

2:9  Pwe aude pan me udan Kot karos kotikot re a, nan pein war a.

2:10  O komail me unsok kilar i, me tapwin wei karos o manaman karos.

2:11  Me komail pil sirkomsaiseki ong sirkomsais eu, me so mangin pa, a duen pwilikidi war en uduk ni sirkomsais eu, me ren Kristus.

2:12  Ni atail iang i serkidi paptais, o me komail pil maur kida poson manaman en Kot, me kaiasada i sang ren me melar akan.

2:13  O ni ansaun omail mela ni dip o sosirkomsais en uduk omail, a kotin kamaur komail da iangaki i, ni a kotin maki ong kitail sapung kan karos.

2:14  O a kotin iros wei sang inting o, me kapokon ong kitail, me audekier kusoned akan, ap palian kitail, i me a kotin kawelar ni a pasuredi ong i nin lopu.

2:15  A lau kaloedier wei kan o manaman akan, ap kasansanle irail ada o wia kin ir kilel en kaperen eu.

2:16  Sota amen en kadeik komail da pweki kisin manga, de pil nim, de ran a akai, de maram pul, de sapat akan.

2:17  Pwe mepukat mot en me pan pwarado, a war o iei Kristus.

2:18  Sota me pan kataue sang komail kating pamail; pwe iei i me kin wiawia pein insen a ni a karakarak o pongi ong tounlang kan, me a sota kilanger o me aklapalap o perenki pein i ni tiak en uduk a.

2:19  O a sota kin keleki tapwi, me war pon ale sang kisin manga ki kokon akan, iduen a pan kakairida ni kupur en Kot.

2:20  A ma komail iang Kristus melar sang tiak en sappa, menda komail pil lodi ong tiak kan likamata komail memaureta nin sappa.

2:21  Re kin inda: Koe der doke, koe der song, koe der sair!

2:22  A mepukat karos pan okila kadokepa; ari kisin kusoned mal akan, me aramas akan ta wiadar.

2:23  Me sansal en lolekong ni ar wiada pein ar kaudok o karakarak o ar kaloke pali war arail; a mepukat kin kapwaiada pali uduk eta.

Chapter 3

3:1  ARI, ma komail iang Kristus iasadar, en rapaki me pali poa kan, wasa Kristus kotikot ia ni pali maun en Kot.

3:2  Inong iong me mi pali poa a kaidin me mi nin sappa.

3:3  Pwe komail melar, o maur omail rirlong Kristus ren Kot.

3:4  Kristus, iei maur atail, lao pwarado, kitail pan pil iang i pwarado ni lingan o.

3:5  Komail ari kamela kokon omail, me mi sappa: Nenek, samin, tiak sued, inong sued, norok kapwa, pwe iei kaudok sued.

3:6  Pweki mepukan ongiong en Kot kin lel ong seri sopeik kan.

3:7  Me komail pil kekeideki mas o, ansaun omail akmemaurki.

3:8  A metet komail pwilikidier meakaros: Makar, lingarangar, katantat, lalaue, kasoi kasaut nan au omail;

3:9  Ender likam nan pung omail, pwe komail pwilikidier aramas maring iangaki a wiawia kan,

3:10  Ap aleer me kap, me wilikapadang lolekong duen mom en me kausedar i.

3:11  Wasan sota men Krik, sota Sus, sota sirkomsais, pil sota sosirkomsais, sota men liki, sota Site, sota ladu o sota me maioda men, a Kristus eta me kotikot ni karos.

3:12  Pwil po omail duen en Kot a pilidar akan, me saraui o kompok, limpok en nan mongiong, o kadek, o karakarak, o opampap, o kanongama,

3:13  Apwali amen amen, o mak pena, ma amen kainsensuedi amen, duen Kristus kotin mak ong komail er, iduen komail.

3:14  O moneki limpok, me ora pena kamau pokon.

3:15  O popol en Kristus en kaunda nan mongiong omail, me komail pil paeker pena ni war ta ieu, o komail danke.

3:16  Komail nantiong dodokiki masan en Kristus nan pung omail ni lolekong karos; padapadaki o panapanaui komail pena, ki psalm, o kaul en kaping, o kaul ngenin, o kakaul ong Kot nan mongiong omail ki mak.

3:17  O karos, me komail kin wia ni lokaia, o wiawia kan, en wiada ni mar en Kaun Iesus, o danke Kot o Sam pweki i.

3:18  Komail li akan udi ong omail warok kan ni Kaun o, duen me kon ong.

3:19  Komail ol akan, pok ong omail warok kan o der makar pa ’rail.

3:20  Komail seri kan, peiki ong me wia komail da ni meakaros, pwe i me kon ong Kaun o.

3:21  Komail sam akan, der kamakar mal noumail seri kan, pwe ren der sang komail la.

3:22  Komail ladu kan, peiki ong omail saumas ni uduk ni meakaros kaidin ni dodok mon aramas, pwen konekon ren aramas, a ni impimpai en mongiong o, o lan Kaun o.

3:23  O karos, me komail wiada en lolm ong wiada, dueta ong Kaun o a kaidin ong aramas akan.

3:24  Ap asa, me komail pan ale kating en soso ren Kaun o, pwe komail kin papa Kaun Kristus.

3:25  A me wia sapung, pan pein pukoki sapung me a wiadar pwe Kot sota kin lipilipil aramas amen.

Chapter 4

4:1  KOMAIL saumas akan, pwain ong omail ladu kan me pung o me mau, pwe komail asa, me pil omail Saumas kotikot nanlang.

4:2  Podidi ong kapakap o masamasan o danke.

4:3  O pil kapakapa kin kit, pwe Kot en kotin ritingidang kit wanim en masan eu, en kaweweda en Kristus a me rir kot, me ngai sali kidier,

4:4  Pwe i en kaparoki duen me pung.

4:5  Kekeid lelapok wei mon men liki kan, kadokedoke ansau mau.

4:6  Omail kasoi en wiaui ni mak o doleki sol ansau karos, pwe komail en asada, duen me komail pung sapengki amen amen.

4:7  Ri atail kompok Tikikus o papa lelapok o ladu en Kaun amen pan kaire kin komail ir ai karos.

4:8  Pwe i me i kadar wong komail er, pwen asa ir omail, o kamait mongiong omail,

4:9  Onesimus pil iang i, i ri atail lelapok kompok amen, me kis omail. Ira pan kaire kin komail karos, me wiauier met.

4:10  Aristarkus, me iang ia salidi, kin ranamau wong komail, o Markus nain ri en Parnapas pwe komail ale er kusoned akan duen i; a lao pwara wong komail, komail kasamo i;

4:11  O Iesus, me ad a Iust, me kisan sirkomsais. Irail eta ai warok en dodok ni wein Kot; ira me kamait pa i.

4:12  Epapras, me kis omail, o me ladun Kristus Iesus amen, kin ranamau wong komail, a ngidingide sauasa komail ni a kapakap akan kaukaule, pwe komail en dadaurata o unsokila o direki kupur en Kot.

4:13  Ngai me kadede i, me a porisok melel ni a apapwali komail o irail nan Laodisea o Irapolis.

4:14  En saunwini Lukas kompok o Demas ara ranamau wong komail.

4:15  Ranamau wong ri atail akan en Laodisea o Nimpas o momodisou nan im a.

4:16  A kisin likau kis et lao wadawader re omail, komail kanaiong, pwen pil wadawad ren momodisou en Laodisea, o komail pil pan wadok, me i kadaralang Laodisea.

4:17  Komail indai ong Arkipus: Kanekanai ong dodok, me koe aleer sang ren Kaun o, pwe koe en kapwaiada.

4:18  Iet ngai Paulus intingki pa i ai ranamau. Tamatamanda ai salidi. Mak en mimieta re omail!