Azeri - Micah

Chapter 1

1:1  يهودا پادشاهلاري يوتام، آحاز و خئزقئيانين دؤورونده، سامئره و اورشَلئم باره‌سئنده، مورِشِتلي مئکايا رؤيا واسئطه‌سئله ربّئن بو سؤزو نازئل اولدو.

1:2  اِشئدئن، سئز، ای بوتون خالقلار، قولاق آسين، ای ير اوزو و اورادا ياشايانلار! قوي پروردئگار رب سئزئن ضئدّئنئزه شهادت ورسئن؛ پروردئگار موقدّس معبدئندن.

1:3  چونکي باخ، رب يِرئندن چيخيب گلئر، او يِر اوزونه اِنه‌جک، داغلارين زئروه‌لرئنده يِرئيه‌جک.

1:4  داغلار اونون آياقلاري آلتيندا اود يانيندا اَرئيَن موم کئمي اَرئيه‌جکلر، دره‌لر، تپه‌لردن آشاغي آخان سِللر کئمي، ياريلاجاق.

1:5  بوتون بونلار يعقوب اؤولادلارينين عاصئلئيئنه، ائسرايئل خالقينين گوناهلارينا گؤره‌دئر. يعقوب اؤولادلارينين عاصئلئيي نه‌دئر؟ مگر سامئره ديئل؟! يهودانين بوت پرستئشگاهي نه‌دئر؟ مگر اورشَلئم ديئل؟!

1:6  "بونا گؤره من سامئره‌ني يِرله بئر اده‌جيم، يِرئنده اوزوملوک ساليناجاق. داشلاريني دره‌يه تؤکه‌جيم، بونؤوره‌لرئني آچيق قوياجاغام.

1:7  سامئره‌نئن بوتون بوتلري پارچا-پارچا قيريلاجاق، معبدئنه ورئلَن هدئيّه‌لر يانديريلاجاق، بوتون تئمثال‌لاريني داغيداجاغام. بو هدئيّه‌لر فاحئشه‌لئک موزدو ائله ييغيلديغينا گؤره، گئنه ده فاحئشه‌لر اوچون ائشله‌دئله‌جک."

1:8  بونا گؤره ده من مئکا، گرک آغلاييب گؤزياشي تؤکوم، آياق‌يالين، لوت-عوريان گَزئم، چاقّال کئمي اولاييم، بايقوش کئمي شئون چکئم.

1:9  چونکي سامئره‌نئن يارالاري صاغالان ديئل، يهوداياجاق ياييليب، خالقيمين دروازالاريناجاق، حتّا اورشَلئمه‌جک چاتيب.

1:10  بونو گَتده بئلدئرمه‌يئن، اصلا آغلامايين. بِيت‌عوفرادا توز-تورپاقدا يووارلانين.

1:11  سئز ای شافئر ساکئنلري، لوت-عوريان، خجالت ائچئنده کِچئب گدئن! صَعَناندا ياشايانلار اورادان قاچا بئلميه‌جکلر. بِيت‌اِصِل اَهلي ياس توتاجاق؛ او، کؤمه‌يئني سئزدن کَسه‌جک.

1:12  ماروت اهالئسي ياخشيليق آرزولاياراق، ضعئف اولورلار، چونکي رب اورشَلئمئن دروازاسينا بلا ساليب.

1:13  ای لاکئش ساکئنلري، آتلارينيزي دؤيوش عاربا‌لارينا قوشون. صحيون قيزيني سئز گوناها باتيردينيز، چونکي سئزده ائسرايئلئن عاصئلئيي تاپيلدي!

1:14  بونا گؤره مورِشِت‌گَته آيريلماق هدئيّه‌‌لري وره‌جکسئنئز، اَکزئب شهري ائسرايئل پادشاهلاريني آلداداجاق.

1:15  ای مارِشا ساکئنلري، رب اوستونوزه گئنه ائستئلاچي گتئره‌جک، عَدولّام ماغاراسينا ائسرايئلئن آدلي-سانلي آداملاري سيغيناجاق.

1:16  ای يهودا، عَزئز بالالاريندان اؤتري ساچيني قيرخ، قوي باشين کَرکس باشي کئمي کِچَل اولسون، چونکي اؤولادلارين اسئرلئيه آپاريلاجاق!

Chapter 2

2:1  واي او آداملارين حالينا کي، ياتاقلاريندا شر نئيّت قورولار، و سحر آچيلديقدا اونا عمل ادئرلر! چونکي گوجلري بونا چاتير.

2:2  زَمئلره طاماح ساليب زورلا آليرلار، اِولره گؤز دئکئب اونلارا صاحئب دورورلار. اِو صاحئبي ائله عايئله‌سئنه ظولم ادئرلر، آداملاري مئراثيندان محروم ادئرلر!

2:3  بونا گؤره ده رب بله ديئر: "باخ، بو خالقا بلا گتئرميه حاضيرلاشيرام، اوندان بويون قاچيردا بئلميه‌جکسئنئز. سئز بئر داها دئکباش گَزميه‌جکسئنئز، چونکي پئس زامان گلئر.

2:4  او گون سئزي مئثال چکئب، بله يانيقلي مرثئيه اوخوياجاقلار: «بئز تامام محو اولدوق! خالقيمين پاييني باشقاسينا ورئر! گؤر نجه اونو مندن آلير! زَمئلرئمئزي نجه بؤلوب خائنلره پايلايير!»

2:5  بونا گؤره ربّئن جاماعاتي آراسيندا هچ کس تاپيلماياجاق کي، سنئن اوچون پوشکله اؤلچو چکئب يِر بؤلوشدورسون."

2:6  اونلار بله وعظ ادئرلر: "وعظ اتمه. بله شيلردن هچ کس دانيشماسين؛ روسوايچيليق بئزه چاتماياجاق."

2:7  ای يعقوب نسلي، مگر گرک بو ديئلسئن: "ربّئن روحو مگر صبئرسئز اولوب؟ مگر بونلار اونون ائشلري‌دئر؟" منئم سؤزلرئم مگر دوزگون يوللا گدنلرئن خيرئنه ديئل؟

2:8  اِله بو ياخين زامانلاردا، خالقيم منئم ضئدّئمه قالخيب دوشمن اولوبلار. موحارئبه‌دن قاييدانلارين، يولدان اَمئن-آمانليقدا کِچَنلرئن اَينئندن، پالتارلاريني آليب اونلاري سويورسونوز.

2:9  خالقيمين آروادلاريني راحات اِولرئندن قووورسونوز، اوشاقلاريندان منئم وردئيئم شؤوکتي همئشه‌لئک گؤتورورسونوز.

2:10  قالخين و گدئن، چونکي بورا ائستئراحت اتمک يري ديئل. بو يِر نجئسلَندئيئنه گؤره دهشتلي صورتده دارماداغين اولاجاق.

2:11  اگر يالانچي بئر آدام، حئيله‌گر بئر آدام گلئب يالاندان دِسه: "سنه شراب و کِفلَندئرن ائچکئلر باره‌ده وعظ اده‌جيم." البتّه، بله خالقين بله واعئظي اولار!

2:12  ای يعقوب اؤولادلاري، من قطعن سئزئن هامينيزي بئر يِره ييغاجاغام، ائسرايئلئن صاغ قالانلاريني بئر يِره ييغاجاغام. اونلاري آغيلداکي سورو کئمي بئر يِره ييغاجاغام. اوتلاقداکي سورو کئمي اؤلکه آداملارلا دولاجاق.

2:13  آزاد ادن اونلارين قاباقلاريندا گدئر؛ دروازاني قيريرلار، اوندان اِشئيه چيخيرلار. اونلارين پادشاهي اونلارين قاباغيندا گدئر، رب اونلارين باشچيسي‌دير.

Chapter 3

3:1  او واخت من ددئم: "قولاق آسين، ای يعقوب رهبرلري، ای ائسرايئل خالقينين باشچيلاري! مگر عدالتئن نه اولماسيني بئلمک سئزه گرکلي ديئل؟!

3:2  سئز کي، ياخشيدان نئفرت ادئرسئنئز، پئسلئيي سِوئرسئنئز، خالقيمين دَرئسئني سويورسونوز، اَتئني سوموکلرئندن قوپارديرسينيز،

3:3  سئز کي، خالقيمين اَتئني يِيئرسئنئز، دَرئسئني سويورسونوز، سومويونو قيريرسينيز. خالقيمي قازاندا، تاوادا پئشئرئلَن اَت کئمي دوغراييرسينيز.

3:4  او واخت اونلار ربّه فرياد اده‌جکلر، لاکئن رب اونلارا جاواب ورميه‌جک. او زامان رب اوزونو اونلاردان گئزلَده‌جک، چونکي پئس ائشلره عمل ادئبلر."

3:5  خالقيني آزديران پيغمبرلرئن ضئدّئنه، رب بله ديئر: "يِمه‌يه بئر شيلري اولاندا «صولح» باغيريرلار. آمّا آغيزلارينا بئر شي ورميه‌نئن ضئدّئنه موقدّس موحارئبه اعلان ادئرلر."

3:6  بونا گؤره سئزه رؤياسيز گجه گله‌جک، فالچيليق ادئله بئلمه‌ين قارانليق گله‌جک، پيغمبرلر اوچون گونش باتاجاق، گوندوز اونلار اوچون ظولمت اولاجاق.

3:7  گؤروجولر روسواي اولاجاقلار، فالچيلار بي‌آبير اولاجاقلار، دوغرودان دا اونلارين هاميسي بوندان اوتانيب آغيزلاريني باغلاياجاقلار، چونکي تاريدان جاواب اولماياجاق.

3:8  آمّا من قووّتله، ربّئن روحو ائله، عدالت و جسارتله دولويام کي، يعقوب اؤولادلارينا اونلارين عاصئلئيئني، ائسرايئله ده اونون گوناهيني بئلدئرئم.

3:9  بونو اِشئدئن، ای يعقوب اؤولادلارينين رهبرلري، ای ائسرايئل خالقينين باشچيلاري! سئز عدالتدن نئفرت ادئرسئنئز، هر جور دوزلويو اَيِرئيه چِوئرئرسئنئز.

3:10  صحيونو قان باهاسينا بئنا ادئرسئنئز، اورشَلئمي حاقسيزليق اوستونده تئکئرسئنئز.

3:11  رهبرلري روشوتله حؤکم ادئرلر، کاهئنلري اوجرتله تعلئم ورئرلر، پيغمبرلري فالچيليق ادئب پول آليرلار، لاکئن حله ده ربّه بِل باغلاييب ديئرلر: "مگر رب بئزئم آراميزدا ديئل؟ اوستوموزه بلا گلمَز."

3:12  بونا گؤره ده سئزئن اوزونوزدن، صحيون زَمي کئمي شوخوملاناجاق، اورشَلئم داش قالاغينا، معبدئن تئکئلدئيي داغ دا مِشه‌لي تپه‌لره چِورئله‌جک.

Chapter 4

4:1  آخير گونلرده ربّئن اِوي اولان داغ داغلارين لاپ اوجاسي، تپه‌لرئن لاپ اوجاسي اوجالاجاق. خالقلار اونا ساري گله‌جکلر.

4:2  چوخ مئلّتلر گلئب دئيه‌جکلر: "گلئن، ربّئن داغينا، يعقوبون تاريسينين اِوئنه قالخاق، قوي رب بئزه اؤز يوللاريني اؤيرَتسئن، و بئز اونون طَرئقلري ائله گِدَک." چونکي شرئعت صَحيوندان، ربّئن سؤزو اورشَلئمدن ياييلاجاق.

4:3  رب چوخ خالقلار آراسيندا حؤکم اده‌جک، گوجلو اوزاق مئلّتلر حاقّيندا قرار چيخارداجاق. اونلار قيلينجلاري کَچوجلارلا دؤيوب اونلاردان کوتان، نئزه‌لردن ده حَرَس اَره‌سي دوزه‌لده‌جکلر. مئلّت، مئلّتئن ضئدّئنه قيلينج قالديرماياجاق، آرتيق موحارئبه اتمه‌يي اؤيرَنميه‌جک.

4:4  هر کس اؤز اوزوم آغاجينين، اؤز انجئر آغاجينين آلتيندا اَيلَشه‌جک، اونلاري قورخودان اولماياجاق. چونکي قوشونلار ربّئنئن آغزي بله ديئب.

4:5  بوتون خالقلار، اؤز آللاهلارينين آدي ائله ياشاسالار بِله، بئز، ابددن ابده‌جک تاريميز ربّئن آدي ائله ياشاياجاغيق.

4:6  رب بويورور: "او گون من شئکَستلري ييغاجاغام، قوودوغوم، ذلئل اتدئيئم خالقي بئر يِره ييغاجاغام.

4:7  شئکَستلري صاغ قالان خالق اده‌جيم، قووولانلاري گوجلو مئلّته چِوئره‌جيم. رب اونلارا صحيون داغيندان، ائندئدن ابده‌ کئمي حؤکم اده‌جک."

4:8  سنه گلئنجه، ای سورويه نظارت ادن بورج، ای صحيون قيزينين قالاسي، اوّلکي حاکئمئيّت سنه تزه‌دن ورئله‌جک، اورشَلئم قيزينين سلطنتي گله‌جک.

4:9  ائندي نه اوچون اوجا سَسله باغيريرسان؟ نئيه دوغان آرواد کئمي آغري چکئرسن؟ مگر سنئن يانيندا پادشاه يوخدور؟ مصلحت وره‌نئن مگر هلاک اولوب؟

4:10  ای صحيون قيزي، آغريدان قوورول، دوغان آرواد کئمي بَرکدن قيشقير، چونکي ائندي شهري ترک ادئب، چؤلده قالاجاقسان، بابئله قدر گده‌جکسن. اورادا قورتولوش تاپاجاقسان؛ اورادا رب سني دوشمنلرئنئن اَلئندن ساتين آلاجاق.

4:11  آمّا ائندي چوخ مئلّتلر سنئن ضئدّئنه بئرله‌شئب ديئرلر: "قوي صحيون روسواي اولوب نجئسلَنسئن! بونو اؤز گؤزوموزله گؤرَک!"

4:12  لاکئن اونلار ربّئن دوشونجه‌لرئني بئلمئرلر، اونون مقصدئني آنلاميرلار؛ چونکي رب اونلاري، خرمنده ييغيلان دَرزلر کئمي بئر يِره ييغيب.

4:13  رب بله ديئر: "ای صحيون قيزي، قالخ، خرمنده‌کي تاخيليني دؤي! چونکي سنئن بوينوزونو دمئر کئمي، ديرناقلاريني بورونج کئمي اده‌جيم. اِله کي، چوخ خالقلاري اَزه‌سن، اونلارين حاقسيزليقلا آلان قنئمتئني، مال-دؤولتئني بوتون يِر اوزونون پروردئگارينا وقف اده‌سن.

Chapter 5

5:1  ای قوشونلار قيزي، ائندي قوشونلاريني بئر يِره ييغ! بئزي دؤوره‌يه آليبلار، ائسرايئل حؤکمدارينين اوزونه دَيَنَکله ووراجاقلار.

5:2  آمّا سن ای بِيت‌لِخِم اِفراتا، يهودا نسئل‌لرئنئن کئچئيي اولاسان دا، منئم اوچون ائسرايئل اوستونده حؤکمدار سندن چيخاجاق. اونون نسلی چوخ قدئملردن، ازلي گونلردندئر.

5:3  دوغوم آغريسيني چکن آرواد دوغانا قدر، رب اؤز خالقيني تسلئم اده‌جک. ائسرايئل اؤولادلارينين يانينا، قالان قارداشلاري قاييداجاق.

5:4  بو حؤکمدار قالخاجاق و تارينين قووّتئنده، تاريسي ربّئن عظمتلي آديندا سوروسونه چوبانليق اده‌جک. خالق اَمئن-آمانليق ائچئنده ياشاياجاق، چونکي بوتون ير اوزو اوستونه بؤيوک، او اولاجاق.

5:5  بو بئزئم صولحوموز اولاجاق. آشورلولار اؤلکه‌مئزه گلدئيي واخت، قالالاريميزا آياق آچديغي واخت، اونلارين ضئدّئنه يدّي چوبان و سکّئز رهبر قالديراريق.

5:6  اونلار آشور تورپاقلارينا، نَمرود اؤلکه‌سئنئن گئرئشلرئنه، قيلينجلا چوبانليق اده‌جکلر؛ آشورلولار تورپاغيميزا گلنده، سرحدئمئزي کِچَنده، او بئزي قورتاراجاق.

5:7  يعقوب نسلئنئن صاغ قالانلاري چوخلو خالقلارين آراسيندا اولاجاقلار. ربّئن گؤنده‌ردئيي شح کئمي، اوت اوستونه تؤکولَن ياغيش کئمي کي، کئمسه‌ني گؤزله‌مَز. کئمسه‌نئن گلمه‌سئنه ده مونتظئر اولماز.

5:8  يعقوب نسلئنئن صاغ قالانلاري چوخلو خالقلارين، چوخلو مئلّتلرئن آراسيندا اِله بئل کي، مِشه حيوانلاري آراسينداکي شئر، قويون سوروسو آراسينداکي جاوان آصلاندير. سورونون ائچئنه گئرسه، اَزئب دئدَر، هچ کس اوندان قورتولا بئلمز.

5:9  اَلئن خَصملرئنئن اوستونه قالخاجاق، ای ائسرايئل، سنئن دوشمنلرئن کَسئله‌جک!

5:10  رب بويورور: "او گونده آتلارينيزي قيراجاغام، دؤيوش عارابالارينيزي يوخ اده‌جيم.

5:11  اؤلکه‌نئزده‌کي شهرلري ده دارماداغين اده‌جيم، بوتون قالالارينيزي يِره ييخاجاغام.

5:12  جادوگَرلئيي سئزئن اؤلکه‌نئزدن محو اده‌جيم، سئزه بئر داها طالِعه باخان اولماياجاق.

5:13  سئزئن بوتلرئنئزي، سئزئن موقدّس سوتونلارينيزي سئزئن آرانيزدان قيريب آتاجاغام. بلجه اَل‌لرئنئزله دوزه‌لتدئيئنئز شيلره آرتيق سجده اتميه‌جکسئنئز.

5:14  سئزئن اَشِرا بوتلرئنئزي آرانيزدان چيخارديب آتاجاغام. شهرلرئنئزي وئران قوياجاغام.

5:15  ائطاعتسئز مئلّتلردن قضبله، حئدّتله قئصاص آلاجاغام."

Chapter 6

6:1  ربّئن نه ددئيئني ائندي اِشئدئن: "قالخين، داغلار قاباغيندا داعوانيزي دئله گتئرئن، قوي تپه‌لر سَسئنئزي اشئتسئنلر.

6:2  ای داغلار، ای يِرئن مؤحکم بونؤوره‌لري، ربّئن ائتّئهاميني اِشئدئن! چونکي رب اؤز خالقينين ضئدّئنه داعوا آچيب؛ حتّا ائسرايئلله بله داعوا اده‌جک.

6:3  ای خالقيم، سنه نه اتمئشم؟ سني نه ائله يورموشام؟ منه جاواب ور!

6:4  دوغرودان دا، من ائدئم کي، سني مئصئر اؤلکه‌سئندن چيخارتديم، نؤکرچئلئک دئياريندان سني ساتين آلديم، موساني، هارونو، مريمي سنئن قاباغيندا گؤنده‌ردئم.

6:5  ای خالقيم، سنئن ضئدّئنه موآب پادشاهي بالاقين نئيّتلرئني، بِعور اوغلو بَلعامين اونا نه جاواب وردئيئني خاطيرلا، شئطّئمدن گئلگالا گِدنده، يولدا نه باش وردئيئني خاطيرلا کي، ربّئن صالح عمل‌لرئني بئله‌سن."

6:6  ربّئن حوضورونا نه ائله گدئم؟ اوجا تارينين حوضوروندا نجه سجده ادئم؟ اونون حوضورونا يانديرما قوربانلاري ائله- بئر ائلّئک دانالارلا مگر چيخيم؟

6:7  ربّه مئن-مئن قوچ قوربانلاري، زيتون ياغينين اون مئنلرجه سِل‌لري مگر خوش گلر؟ عاصئلئيئمه گؤره ائلک اوغلومو، گوناهيم اوچون اؤز اؤولاديمي مگر ورئم؟

6:8  ای ائنسانلار، تاري سئزه ياخشي اولاني بئلدئرئب. رب سئزدن عادئل اولماقدان باشقا، محبّت گؤرسدمه‌يي سِومَکدن باشقا، تارينيزين حوضوروندا باشي‌آشاغي ياشاماقدان باشقا نه ائسته‌يئر کي؟

6:9  ربّئن سَسي شهره نئدا ادئر، سنئن آديندان قورخماق حئکمتدئر. "تنبه آغاجينا، اونو تعيئن اده‌نه دئقّت ادئن.

6:10  مگر پئسلرئن اِوئنده‌کي حارام مال-دؤولت، نجئس اولان اَسکئک اؤلچو حله ده يوخدور؟

6:11  پئسلئک تَره‌زئسئندن و آلداديجي چکي داشلاريندان ائستئفاده اده‌ني مگر حاقلي سايارام؟

6:12  شهرئن وارلي‌لاري قدّارليق ادئرلر، ساکئنلري يالان دانيشيرلار، دئل‌لري آغيزلاريندا حئيله ائشله‌دئر.

6:13  بونا گؤره، گوناهلارينيزدان اؤتري، من سئزي ووراجاغام، سئزي ييخاجاغام، سئزي وئران قوياجاغام.

6:14  يئيه‌جکسئنئز، آمّا دويماياجاقسينيز، قارينلارينيز بوش قالاجاق. ثروت ييغاجاقسينيز، آمّا ساخلاماياجاقسينيز، هر نه ساخلاديغينيزي دا، من قيلينج آغزينا وره‌جيم.

6:15  سئز اَکه‌جکسئنئز، آمّا بئچميه‌جکسئنئز، زيتون سيخاجاقسينيز، لاکئن اؤزونوزه ياغ سورتميه‌جکسئنئز؛ اوزوم سيخاجاقسينيز، آمّا شراب ائچميه‌جکسئنئز.

6:16  پادشاه عومرئنئن قايدالاري رئعايت اولونور، اَخاب سولاله‌سئنئن بوتون ائشلري يرئنه يتئرئلئر، اونلارين مصلحتئنه موطابئق ياشاييرسينيز، بونا گؤره ده سئزي هلاکته تسلئم اده‌جيم، ساکئنلرئنئزي رئشخند هدفئنه چِوئره‌جيم، بلجه منئم خالقيمين روسوايچيليغيني داشيياجاقسينيز."

Chapter 7

7:1  واي منئم حاليما! من بئر آداما بَنزه‌يئرم کي، ياي مؤوسوموندن سونرا ميوه‌سي تامام ييغيلميش، تَنَکلري ده تمئزلَنمئشدئر؛ اوندا يمک اوچون نه اوزوم سالخيمي قاليب، نه ده نوبارليق بئر انجئر کي، اونا هوس اِدئم.

7:2  اؤلکه‌ده تاريني تانييان آدام قالماييب، ائنسانلار آراسيندان صادئق آدام محو اولوب. هامي قان تؤکمک اوچون کمئنده دورور، قارداش قارداشا تله قورور.

7:3  پئس ائشلره اَللرئنئن ائکئسي ده زئرَکدئر، هم ريئسلر، هم ده حاکئملر روشوت طلب ادئرلر، گوجلو آدام جانينين ائسته‌دئيئني اعلان ادئر، هاميسي نئيّتلر قورورلار.

7:4  بونلارين لاپ ياخشيسي تئکاندان دَيَرسئزدئر، اَن صالح آدامي دا خاشاکدان پئسدئر. اونون گؤزَتچئلرئنئن ائخطار اتدئيي گون، سنئن جزا گونون گلئب. ائندي اونلار چاشباش قاليبلار.

7:5  قونشونوزا ائنانمايين، دوستونوزا بِل باغلامايين، حتّا قوينونوزدا ياتان آروادينيزدان بِله، آغزينيزي مؤحکم ساخلايين.

7:6  چونکي اوغول آتاسينا خور باخير، قيز آناسينين، گلئن ده قايين‌آناسينين ضئدّئنه قالخير. آدامين دوشمنی اؤزونون اِو اهلي اولوب.

7:7  آمّا منه گلئنجه، من ربّه باخاجاغام، منی خئلاص ادن تاريني گؤزلَيه‌جيم. تاريم منئم سَسئمي اشئده‌جک،

7:8  حاليما سِوئنمه، ای دوشمنئم! من ييخيلسام دا، قالخاجاغام. قارانليقدا ساکئن اولسام دا، رب منئم نوروم اولاجاق!

7:9  ربّئن قضبئنه دؤزه‌جيم، چونکي من اونا گوناه اتمئشم، او زاماناجاق کي، او منئم داعواما يِتئشسئن، و عدالت يرئنه يِتئشسئن. او منی ائشيغا چيخارداجاق، اونون صالحلئيئني گؤره‌جيم.

7:10  دوشمنئم بونو گؤره‌جک، خجالت ائچئنده بوغولاجاق. او منه دمئشدي: "تارين رب هارادادير؟" گؤزلرئم بو دوشمنه باخاجاق، و او واخت او، کوچه‌لرده تاپدالانان پالچيق کئمي اولاجاق.

7:11  ای اورشَلئم، او گون سنئن دووارلارينين برپا گونو اولاجاق، او گون سرحدلرئن گِنئشلَنه‌جک.

7:12  او گون خالقين آشوردان، مئصئر شهرلرئندن، مئصئردن فرات چايينا قدر اوزانان تورپاقلاردان، دهنزدن دهنزه‌جک، داغدان داغاجاق، سنئن يانينا قاييداجاق.

7:13  ير اوزو ساکئنلرئنئن عمل‌لرئنه گؤره وئران اولاجاق.

7:14  اؤز خالقينا، مئراثين اولان سورونه، اَلئنده اولان عصا ائله چوبانليق ات. او، مِشه‌لئکده ائندي تَک باشينا ساکئندئر؛ محصول‌لو بئر زَمئنئن آراسيندا. قوي کِچمئش گونلرده‌کي کئمي باشان و گئلعاددا اوتلاسينلار.

7:15  "مئصئردن چيخديغين گونلرده‌کي کئمي سنه مؤجوزه‌لر گؤرسده‌جيم."

7:16  مئلّتلر بونو گؤره‌جکلر، بوتون قووّتلرئندن اوتاناجاقلار. اَل‌لري ائله آغيزلاريني يوماجاقلار، قولاقلاري کار اولاجاق.

7:17  ائلان کئمي تورپاغي يالاياجاقلار، يِر اوزونون سوروننلري کئمي، يووالاريندان اَسه-اَسه چيخاجاقلار. دهشت ائچئنده رب تاريميزين حوضورونا گله‌جکلر، سندن قورخاجاقلار.

7:18  سنئن کئمي بئر تاري کئمدئر، سن کي، خاطاني باغيشلاييرسان، مئراثيندان صاغ قالانلارين عاصئلئيئني عَفو ادئرسن؟! او کي، قضبئني ابده‌جک ساخلامير، چونکي محبّت گؤرسدمَيي خوشلايير.

7:19  گئنه بئزه شَفقَت گؤرسده‌جک؛ بوتون خاطالاريميزي آياق آلتينا آتاجاق. بلی، سن بئزئم بوتون گوناهلاريميزي دهنزئن درئنلئکلرئنه آتاجاقسان.

7:20  قدئم زاماندا آتالاريميزا آند ائچدئيئن کئمي يعقوب نسلئنه حقئقتي، ائبراهئم اؤولادلارينا دَيئشئلمَز محبّتئني گؤرسده‌جکسن.