Kapingamarangi - Micah

Chapter 1

1:1  I-lodo di madagoaa o Jotham, Ahaz, mo Hezekiah nogo king i Judah, Dimaadua gaa-wanga ana haga-iloo aanei gi Micah tangada mai i-di waahale go Moresheth. Dimaadua ga-haga-modongoohia nia mee huogodoo aanei gi mee i-di hai o Samaria mo Jerusalem.

1:2  Goodou go nia daangada o-nia henua huogodoo, goodou hagalongo. Digau o henuailala huogodoo, goodou hagalongo gi humalia. Di Tagi go Yihowah ga-helekai hai-baahi adu gi goodou. Goodou hagalongo! Mee e-helehelekai-mai i dono hale-daumaha i-di langi.

1:3  Dimaadua le e-hanimoi i dono lohongo dabu. Mee ga-haneia ga-heehee i-nia ulu o-nia gonduu o henuailala.

1:4  Nia gonduu ga-waiwai i-lala ono babaawae, gadoo be nia kiliidi i-lodo di ahi, gaa-hali gi-lala gi mehanga gonduu, gadoo be nia wai ala ma-gaa-llingi gi-lala i taalinga tama gonduu.

1:5  Nia mee aanei la-gaa-kila idimaa nia huaidu o digau Israel, mo nadau hai-baahi ang-gi God. Nia huaidu digau Israel le e-dau gi-di-ai? Go Samaria, go di guongo dagi o Israel la-hua! Gei di-ma koai dela e-daumaha ang-gi nia balu-ieidu i Judah? Go Jerusalem la-hua!

1:6  Deelaa di mee a Dimaadua e-helekai-ai boloo, “Au gaa-hai Samaria gii-hai di hagabae-geinga e-dugu i-lodo di anggowaa maalama, e-hai di gowaa e-dogi nia laagau-‘grape’. Au gaa-hono nia hadu o-di waahale deelaa gi-lodo di gowaa i-mehanga gonduu, ga-diiagi di hagamau o-di waahale labelaa,

1:7  gaa-oho nia ada balu-god huogodoo gi-daha. Nia mee huogodoo ala ne-wanga gi-nia ahina huihui nadau huaidina i-lodo nia hale-daumaha i-di waahale deelaa, la-ga-tuu huogodoo gi-di ahi. Gei nia hagadilinga ada-mee huogodoo gaa-hai di hagabae-geinga. Samaria ne-kae nia mee aanei mai i dana hai-daumaha o-di hagadili ni nia daangada gi-dogologo. Malaa, dolomeenei gei ono hagadaumee gaa-kae nia mee aanei gi-nia ahina ala e-huihui nadau huaidina i-lodo nia hale-daumaha i-nia gowaa ala i-golo.”

1:8  Malaa, gei Micah ga-helekai, “Deenei dagu mee dela e-dangidangi-iei au. Au e-hiihai e-haga-modongoohia dogu manawa-gee, gei au ga-heehee deai ogu goloo ai, mo deai ogu suudi ai. Au ga-heehee mo-di wolowolo gadoo be-di paana lodo-geinga-‘jackal’, mo-di dangidangi gadoo be-di manu lodo-geinga-‘ostrich’.

1:9  Nia magibala o Samaria le e-deemee di-hili, gei Judah le e-hagaduadua labelaa beelaa. Di mooho guu-dau i-di ngudu di abaaba o Jerusalem, di gowaa dela e-noho-ai agu dama.”

1:10  Goodou hudee heia tadau hagadaumee ala i Gath gi-iloo bolo gidaadou gu-magedaa. Hudee heia digaula gi-gidee bolo goodou e-tangitangi. Goodou go digau o Beth=Ophrah, goodou gi-haga-dagadaga i-lodo nia gelegele dogolia e-haga-modongoohia-ai godou lodo-huaidu.

1:11  Goodou go digau Shaphir, goodou ga-lahi gi-daha mo di-godou guongo deenaa, deai godou goloo i godou gili ai, gei goodou gi-langaadia. Gei goodou go digau ala e-noho i Zaanan, goodou hudee hula gi-daha mo di-godou guongo. Di-godou madagoaa ma-ga-longono-goodou a Beth=Ezel e-dangidangi, gei goodou gu-iloo-hua bolo ma di gowaa e-pala ginai i-golo ai.

1:12  Digau Maroth le e-tali di haga-dagaloaha o di-nadau haga-mmaemmae, idimaa, Dimaadua la-gu-haga-hoohoo-mai nia haingadaa la gi Jerusalem.

1:13  Goodou ala e-noho i Lachish, goodou hagatogomaalia-ina nia hoodo la-gi-di gili o-nia waga-dauwa hongo-henua. Goodou guu-kabe nia huaidu digau Israel, guu-hai Jerusalem gii-doo gi-lodo di hala.

1:14  Goodou go digau Judah, goodou gi haga-aloho haga-maewae ang-gi di guongo go Moresheth=Gath. Nia king o Israel gu-deai nadau hagamaamaa mai baahi di guongo go Achzib ai.

1:15  Goodou go digau Mareshah, Dimaadua gaa-wanga goodou gi-lodo nia lima o godou hagadaumee ala gaa-kumi di-godou guongo. Nia dagi o Israel gaa-llele gaa-pala hagammuni i-lodo di luwa i Adullam.

1:16  Goodou go digau Judah, godou libogo la-gi-dahia e-hai-ai di mee e-haga-manawa-gee-ai goodou gi godou dama ala e-aloho ai. Holee godou libogo la-gi-maalali gadoo be nia ngogo, idimaa, godou dama la-gaa-lahi gi-daha mo goodou.

Chapter 2

2:1  E-haingadaa huoloo ang-gi digau ala e-dee-kii i-di nadau hagabaubau nadau mee huaidu ala ma-gaa-hai! Hooaga luada, digaula ga-hagalimalima gaa-hai nadau maanadu huaidu ala belee hai.

2:2  Ma go nia gowaa ala e-hiihai ginai digaula, gei digaula gaa-kae nia maa. Ma go nia hale ala e-hiihai ginai digaula, gei digaula gaa-kae nia maa. Deai di madahaanau be nia goloo e-mee di-dugu i-di aumaalia ai.

2:3  Deenei-laa Dimaadua e-helekai, “Au e-hagatogomaalia e-gowadu gi goodou di hagahuaidu, gei goodou e-deemee di haga-paa ai. Goodou gaa-mmada di haingadaa, ga-deemee di-heehee i-di aumaalia be di-godou hai mai i-mua.

2:4  Di madagoaa deelaa ma-ga-dau-mai, gei nia daangada ga-hai-hegau i-di godou kai e-hagatau ang-gi di haingadaa, gei digaula ga-dadaahili taahili lodo-huaidu beenei: Gimaadou guu-hai hagahuaidu! Dimaadua guu-kae madau gowaa gi-daha, guu-wanga gi digau ala ne-lahi gimaadou galabudi.”

2:5  Goodou ga-deai godou duhongo ai i-di madagoaa nia gowaa ma-gaa-wanga gi-muli gi-nia dama a Dimaadua.

2:6  Nia daangada e-aago-mai au boloo, “Hudee aago-ina gimaadou. Hudee aago-ina nia maa, idimaa God la-hagalee hagahuaidu gimaadou.

2:7  Goe e-hai bolo digau Israel le e-noho i-lodo di halauwa? Dimaadua la-gu-aha, gu-deemee di tali maalia? Mee e-mee di-hai nia mee huaidu beelaa? Ma hagalee go mee dela e-helekai hagahumalia ang-gi digau ala e-hai di tonu?”

2:8  Dimaadua ga-helekai, “Goodou e-hagahuaidu agu dama be nia hagadaumee. Nia daane dauwa e-loomoi i tauwa mo nadau hagadagadagagee bolo ginaadou gaa-noho i-di aumaalia i nadau hale, gei goodou aanaa gu-togomaalia belee gaiaa nadau goloo.

2:9  Goodou e-hagabagi nia ahina o agu daangada Israel gi-daha mo nadau hale ala e-aloho-ai. Goodou e-gaiaa nia maluagina ala ne-wanga ko-Au gi nadau dama gaa-hana-hua beelaa.

2:10  Tuu gi-nua, hula, ma di noho i-di aumaalia adu gi goodou i ginei ai. Godou huaidu la-guu-hai di gowaa deenei gi-mooho.

2:11  “Digau aanei e-hiihai gi-di hagadilinga soukohp hai-kai-tilikai dela e-hai dana halahalau dangada boloo, ‘Au e-kokohp bolo nia waini mono dagaao gaa-haba i godou baahi.’

2:12  “Au ga-gahi-mai digau Israel huogodoo ala e-dubu gi-di gowaa e-dahi. Au ga-laha-mai goodou gi-di gowaa e-dahi gadoo be nia siibi ma-ga-dagabuli-mai gi di-nadau gowaa noho. Godou gowaa ga-dogologo ono daangada, gadoo be-di gowaa honu siibi.”

2:13  Dimaadua gaa-huge ang-gi digaula di-nadau ala, gaa-dagi digaula gi-daha mo di-nadau hagaduadua i tenua o nadau hagadaumee. Digaula gaa-hula gi-daha mo nia bontai o-di waahale, ga-mahuge. Di-nadau King, dela go Dimaadua, gaa-dagi digaula gi-daha.

Chapter 3

3:1  Hagalongo, goodou go nia dagi o Israel! Goodou belee honu i-di hagamamaanadu o-di tonu.

3:2  Gei goodou ala e-ginagina i-di humalia, e-aloho i-di huaidu. Goodou e-hole gi-daha nia gili o agu daangada, ge e-hahaahi nadau goneiga gi-daha mo nadau iwi.

3:3  Goodou e-gai agu daangada. Goodou e-hole gi-daha nadau gili, e-oho nadau iwi, ge e-duuduu digaula gadoo be nia mee e-hagatogomaalia e-dunu.

3:4  Di madagoaa gu-hoohoo-mai, gei goodou ga-tangi gi Dimaadua, gei Mee ga-hagalee hila-adu gi goodou. Mee ga-hagalee longono-Ia godou dalodalo, idimaa goodou gu-haihai nia mee huaidu.

3:5  Agu daangada la-gu-halahalau go nia soukohp ala e-hagababa di aumaalia ang-gi digau ala e-hui digaula, ge e-dauwa ang-gi digau ala hagalee hui. Dimaadua e-helekai gi-nia soukohp aanei boloo,

3:6  “Soukohp, di-godou laangi e-hai godou moomee gu-hoohoo gaa-lawa, gei di-godou laa la-gu-hoohoo ga-ulu. I di-godou halahalau agu daangada, goodou gaa-noho bouli, ga-deemee di-iloo nia mee ala ga-kila-mai maalia.”

3:7  Digau ala e-helekai nia mee ala gaa-dae-mai maalia ga-langaadia i-nia maa ala hagalee donu. Digaula ga-langaadia huoloo, idimaa God hagalee hila ang-gi digaula.

3:8  Gei mai gi-di-au, Dimaadua e-haga-honu ogu lodo gi dono Hagataalunga mono mahi, e-gaamai di modongoohia di tonu mo-di manawa-maaloo e-helekai-iei au gi digau Israel i nadau ihala.

3:9  Goodou go nia dagi o Israel, hagalongo-mai gi-di-au, go goodou ala e-ginagina i-di tonu, e-huli di humalia la gi-di huaidu.

3:10  Goodou e-hau di waahale o God, go Jerusalem, i-hongo di hagamau o taaligi dangada mo-di ngalua hala.

3:11  Nia dagi o-di waahale e-dagi gi-nia hui halahalau. Digau hai-mee-dabu e-haga-donudonu nia haganoho la-gi-humalia ang-gi nadau hui. Nia soukohp e-haga-modongoohia nia mee ala ma-ga-kila-aga maalia gi-humalia ang-gi nia bahihadu ala e-hui ginaadou. Digaula huogodoo e-helekai bolo Dimaadua le e-madalia ginaadou, e-hai boloo, “Deai di haadanga-balua ga-tale-mai gi gimaadou ai, idimaa, Dimaadua i madau baahi.”

3:12  Deenei-laa, mai i-di godou haihai huaidu, Zion ga-haga-maluu be-di gowaa hai hadagee, Jerusalem gaa-hai di gowaa gu-mooho, gei-ogo di gonduu dela iai di Hale Daumaha gaa-hai tenua geinga.

Chapter 4

4:1  Nia laangi ala ga-lloomoi, gei di gonduu dela e-duu di Hale Daumaha a Dimaadua, gaa-hai di gonduu e-kaedahi e-duuduu i-nua i-hongo nia gonduu huogodoo. Nia henua e-logo ga-dagabuli-mai gi-di-maa.

4:2  Nadau daangada ga-helekai boloo, “Gidaadou gaa-hula gi-di gonduu a Dimaadua go-di Hale Daumaha o-di God o Israel. Gei Mee ga-hagi-mai gi gidaadou ana mee ala e-hiihai ginai bolo gidaadou gi-heia. Gidaadou ga-heehee i-hongo ono ala. Idimaa, nia agoago a Dimaadua le e-loomoi i Jerusalem. Mee e-helehelekai gi ana daangada mai i Zion.”

4:3  Go Mee dela ga-haga-donu mehanga nia henua llauehe ala e-hoohoo-mai mo nnenua ala e-mogowaa. Digaula gaa-tugi nadau hulumanu-dauwa, gaa-hai nia mee hagamaluu gelegele, gaa-tugi nadau daalo, gaa-hai nia hulumanu hai-hadagee. Nia henua llauehe ga-hagalee heheebagi labelaa, be e-hagatogomaalia ang-gi tauwa.

4:4  Nia daangada huogodoo gaa-noho i-di aumaalia, i-lodo nadau hadagee-waini mo i-lala nadau laagau-‘fig’, tangada e-haga-madagudagu digaula ai. Deenei di hagababa mai baahi o Dimaadua Koia e-Aamua.

4:5  Nia henua huogodoo e-daumaha mo-di hagalongo gi nadau god donu, gei gidaadou ga-hagalongo mo-di daumaha ang-gi Dimaadua go tadau God, gaa-hana hua beelaa.

4:6  Dimaadua e-helekai, “Di madagoaa gu-hoohoo-mai, gei Au ga-hagabudu-mai agu daangada gi-di gowaa e-dahi, go digau ala gu-duadua i-lodo di-nadau lahi gi-daha.

4:7  Digaula gu-deloaa gei gu-mogowaa i nadau guongo, gei Au ga-daamada hoou digau ala ne-dubu, gei digaula gaa-hai tenua aamua. Gei Au gaa-dagi digaula i-hongo di Gonduu Zion i-di madagoaa deelaa, gaa-hana hua beelaa.”

4:8  Gei goe, go Jerusalem, go di gowaa a God e-hagaloohi ana daangada gadoo be tangada hagaloohi-siibi mai i-di angulaa hagaloohi, goe gaa-hai labelaa di guongo e-dagi tenua dela nogo hai tenua ni-aau.

4:9  Goe e-dangi gi-nua eiaha? Goe e-aha dela e-manawa-gee be-di ahina ma-gaa-mmae haanau? Goe e-dangi i-di-goe gu doo king ai, gei oo gau hagamaamaa la-guu-mmade?

4:10  Goodou go digau Jerusalem, goodou hagapiga-ina goodou, gadoo be-di ahina dela ma-ga-haanau. Idimaa goodou gaa-hula gi-daha mo-di waahale deelaa, gaa-hula gaa-noho i-lodo tenua maalama. Goodou gaa-lahi gi Babylon, gei Dimaadua ga-daa-mai goodou gi-daha mo godou hagadaumee i-di gowaa deelaa.

4:11  Nia henua llauehe e-logo gu-dagabuli, e-heebagi-adu gi-di-goe. Digaula e-helekai, “Jerusalem le e-hai gi-mooho! Gidaadou e-hai loo gii-mmada gi-di waahale deenei e-mooho!”

4:12  Nia henua llauehe aanei le e-de-iloo-ginaadou di maanadu a Dimaadua. Digaula e-de-iloo-ginaadou bolo ginaadou la-ne-laha-mai gi-di gowaa e-dahi belee hagahuaidu, gadoo be nia lii ala ma-ga-hagabudu e-hole ono gili.

4:13  Dimaadua e-helekai, “Goodou go digau Jerusalem, hula hagaduadua-ina godou hagadaumee! Au gaa-hai goodou gi-maaloo, gadoo be-di kau-daane dela ono madaagoo baalanga mo ono wae baalanga-mmee. Goodou ga-daaligi godou henua llauehe e-logo, gei nia maluagina ala ne-kumi go digaula i nadau heheebagi, e-gaamai go goodou gi-di-Au, di Tagi o henuailala hagatau.”

Chapter 5

5:1  Digau Jerusalem, goodou haga-dagabuli-ina-mai godou gau-dauwa. Tadau hagadaumee gu-duuli di waahale! Digaula ga-heebagi gi-di tagi o Israel!

5:2  Dimaadua ga-helekai, “Goe go Bethlehem Ephrathah, kooe dela e-kaedahi e-dulii-loo i-lodo nia waahale o Judah. Au ga-dahi-aga dahi Dangada mai i doo baahi e-dagi Israel. Tangada deelaa dono hagadili ne-daamada-mai i namua-loo.”

5:3  Malaa, Dimaadua ga-diiagi ana dama i-baahi o nadau hagadaumee gaa-dae-loo gi-di ahina dela belee haanau dana dama ga-haanau-mai dana dama-daane deelaa. Deenei di madagoaa o digau Israel ala ne-lahi galabudi la-ga-loomoi labelaa gi-muli gi-baahi nadau daangada donu.

5:4  Mee ga-hanimoi gaa-dagi ana daangada gi-nia mahi mo nia mogobuna o Dimaadua. Mee gaa-dagi digaula gi-nia madamada o Dimaadua, dela go dono God. Digaula gaa-noho i-di aumaalia, idimaa nia daangada o henuailala hagatau ga-modongoohia bolo ma go Mee dela e-aamua,

5:5  e-wanga gi digaula di noho-baba. I-di madagoaa digau Assyria ala ma-ga-ulu-mai gi-lodo tadau guongo mo-di hunahuna tadau abaaba, gei gidaadou ga-hagau tadau daane ala koia e-maaloo e-heebagi gi digaula.

5:6  Digaula ga-haga-magedaa Assyria, di guongo o Nimrod, ga-haga-dagaloaha gidaadou gi-daha mo digau Assyria ala ma-ga-loomoi gi-lodo tadau guongo ga-hagahuaidu tadau guongo.

5:7  Digau Israel ala ma-ga-mouli le e-hai gadoo be nia madaua haga-magalillili o-di luada ala e-hagau-iha go Dimaadua gi-nia henua e-logo, le e-hai gadoo be nia uwa i-hongo nia laagau tomo. Digaula ga-hagadagadagagee-hua ang-gi Dimaadua, hagalee hagadagadagagee ang-gi nia daangada.

5:8  Digau Israel ala ma-gaa-dubu i-lodo nia henua llauehe la-gaa-hai gadoo be-di laion dela ma-gaa-hana e-halahala ana meegai i-lodo-henua mo i-hongo di gowaa maalama, gaa-hula gi-mehanga nia siibi, ga-dadaaligi nia siibi, gei nia siibi gu di-nadau haga-dagaloaha ginaadou ai.

5:9  Digau Israel ga-heebagi gi nadau hagadaumee, ga-daaligi digaula huogodoo.

5:10  Dimaadua ga-helekai, “Di madagoaa-hua deelaa, gei Au gaa-kae godou hoodo gi-daha mo goodou, gaa-oho godou waga-dauwa hongo-henua.

5:11  Au gaa-oho nia waahale o di-godou henua, gaa-oho gi-lala godou duuli.

5:12  Au gaa-oho godou goloo hai-buubuu, gaa-hai goodou gi-deai godou gau hai-buubuu ai.

5:13  Au gaa-oho godou ada-god mo nia duludulu hadu haga-madagu ala e-daumaha ginai goodou, gei goodou ga-hagalee dadaumaha labelaa gi-nia mee ala ne-hai go goodou gi godou lima.

5:14  Au ga-hudi-iha gi-lala nia ada o-di god-ahina go Asherah i godou baahi, gaa-oho godou waahale.

5:15  I-lodo dogu hagawelewele huoloo, Au gaa-tala di hui ang-gi nia henua llauehe huogodoo ala nogo hagalee hagalongo-mai gi-di-Au.”

Chapter 6

6:1  Hagalongo gi-di hai o Dimaadua dela ga-haga-donu a Israel. Meenei Dimaadua, duu gi-nua, haga-modongoohia-ina dau hai dela ga-haga-donu a Israel. Nia gonduu llauehe mo nia gonduu lligi la-gi-hagalongo gi au mee ala ga-helekai ai.

6:2  Goodou go nia gonduu, go di hagamau dee-odi o henuailala, hagalongo gi-di haga-donu a Dimaadua! Dimaadua e-hai-baahi ang-gi ana dama. Mee gaa-hai dana hagahuaidu gi digau Israel.

6:3  Dimaadua e-helekai, “Agu dama, Au guu-hai dagu-aha adu gi goodou? Dehee dagu hai ne-haga-uda gi goodou di hagaduadua? Helekai-malaa gi agu heeu!

6:4  Au ne-laha-mai goodou gi-daha mo Egypt. Au ne-daa-mai goodou gi-daha mo-di hai-hege. Au ne-hagau a Moses, Aaron mo Miriam gi-dagia-mai goodou.

6:5  Agu dama-nei, maanadu-ina di hai a king Balak o Moab dela ne-hagamaanadu bolo e-hai-adu gi goodou, mo-di hai a Balaam go tama-daane a Beor, dela ne-helekai gi mee. Maanadu-ina labelaa nia mee ala ne-kila i-di godou taele mai i Acacia gi Gilgal. Haga-maanadu-ina-malaa nia mee aanei, gei goodou ga-langahia agu mee ala ne-hai belee benebene goodou.”

6:6  Agu maa ni-aha ala belee gaamai gi Dimaadua, go di God o-di langi, i dogu madagoaa ma-ga-hanimoi, e-daumaha ang-gi Mee? Au bolo au e-gaamai agu damaa-kau ala e-kaedahi e-humalia, e-tigidaumaha-iei au gi Mee?

6:7  Dimaadua la-ga-tenetene-mai gi-di-au ma-ga-gaamai agu siibi e-mana, be nia monowai lolo-olib ala hagalee odi? Be au ga-tigidaumaha gi Mee dagu dama-daane madua e-hui-ai ogu huaidu?

6:8  Deeai! Idimaa, Dimaadua guu-lawa di-hagi-mai gi gidaadou di mee dela e-humalia. Deenei di mee a-Mee dela e-hiihai bolo gidaadou gi-heia: Gidaadou gi-heia di tonu, gi-hai-hegau gi-di aloho donu, mo-di haga-puni-anga gi tadau God i-lodo di manawa hila-gi-lala.

6:9  Ma di kabemee dela e-madagu i Dimaadua. Mee gaa-wolo gi-di waahale, “Hagalongo go goodou ala e-dagabuli i-lodo di waahale!

6:10  I-lodo nia hale o digau huaidu la nia goloo hagalabagau ala ne-kae go digaula i-di hai hagalee donu. Digaula ne-hai-hegau i-di mee hagatau-mee hai-gee, di mee e-de-hiihai ginai Au.

6:11  Au e-dumaalia behee gi digau ala ne-hai-hegau gi-nia mee hagatau-mee mono mee pauna-mee dilikai?

6:12  Goodou go digau maluagina e-haga-haingadaa digau hagaloale gei goodou huogodoo la digau hai-kai tilikai.

6:13  Malaa, Au gu-daamada e-haga-huaidu ge e-oho goodou i godou ihala.

6:14  Goodou ga-miami ge hagalee dohu-adu gi goodou, goodou ga-hiigai hua igolo. Goodou gaa-kae gi-daha godou mee, gei e-deemee di-benebene hagahumalia nia maa. Di-ingoo-hua di mee ma-ga-benebene go goodou e-oho ko-Au i-lodo tauwa.

6:15  Goodou ga-haga-nonnono godou golee-laagau, gei e-deemee di-hadi nia maa. Goodou gaa-hai godou lolo mai nia golee-laagau olib, gei e-deemee di-hai-hegau i-nia maa. Goodou gaa-hai godou waini, ge hagalee inu nia maa.

6:16  Di hui deenei la-gaa-hai beenei, idimaa goodou gu-daudali nia haihai huaidu o-di king Omri mo nia hai o dana dama-daane go King Ahab. Goodou gu-hai-hegau-hua beelaa i nadau haganoho, gei Au gaa-hai goodou gi-huaidu, gei nia daangada i-nia gowaa huogodoo ga-haga-balumee goodou.”

Chapter 7

7:1  Au gu dogu hagadagadagagee ai! Au e-hai gadoo be tangada hiigai dela hagalee gida ana golee-laagau e-dubu i-nia laagau, gei nia golee-waini i-nia laagau-‘grape’ ai. Nia laagau-‘grape’ mo nia laagau-‘fig’ la-guu-hagi huogodoo.

7:2  Tangada hai-mee donu ne-dubu i-hongo tenua ai, tangada e-manawa-dahi gi God ai. Nia daangada huogodoo e-talitali nadau madagoaa humalia e-daaligi-ai nadau daangada gii-mmade. Nia daangada huogodoo e-halahala nadau daangada donu belee haga-huaidu.

7:3  Digaula huogodoo e-iloo-ginaadou di hai nia mee huaidu. Digau aamua mo digau hai-gabunga e-kumi nadau hui halahalau i-di nadau haga-huaidu nia daangada. Tangada dela ono mogobuna i-golo e-hagi-anga gi digaula ana mee ala e-hiihai ginai, gei digaula gaa-buni ginai.

7:4  Tangada hogi dela e-kaedahi e-donu i digaula la-hagalee dono dahidamee ai, e-hai-hua be nia geinga. Di laangi gu-dau-mai ge God ga-daaligi nia daangada be dana hai dela gu-hagi-anga gi ana gau hagaloohi go nia soukohp. Dolomeenei gei digaula gu-hinihini.

7:5  Hudee hagadonu-ina tangada i doo baahi be e-hagadagadagagee gi do ehoo hagaaloho. Madamada humalia hogi gi dau hai e-helekai gi doo lodo.

7:6  Nia madagoaa aanei nia dama-daane e-hai bolo nadau damana la digau dadaulia, nia dama-ahina e-hai-baahi gi nadau dinana, ge nia ahina lligi e-lagamaaloo gi nadau dinana dauaga. Godou hagadaumee la-go nia daangada o godou madahaanau.

7:7  Gei au e-huli ang-gi Dimaadua, au e-tali i-di manawa hagadonu gi God dela ga-benebene au gi-daha mo nia haingadaa. Dogu God la-ga-longono-Ia au.

7:8  Tadau hagadaumee nadau hadinga ai bolo e-haganneennee gidaadou. Gidaadou guu-tinga gi-lala, gei gidaadou ga-tuu-aga gi-nua labelaa. Gidaadou i-lodo di bouli dolomeenei, gei Dimaadua ga-gaamai di maalama.

7:9  Gidaadou guu-hai tadau ihala gi Dimaadua, gei dolomeenei gidaadou e-hai gii-tuu maaloo i-lodo dono hagawelewele i-di madagoaa bodobodo. Gei di hagaodi gi-muli gei Mee ga-abaaba gidaadou gaa-hai gii-donu nia mee haigee ala ne-hai-mai gi gidaadou. Mee ga-laha-mai gidaadou gi-lodo di maalama. Gidaadou ga-mouli ga-gidee dana hagamouli gidaadou.

7:10  Gei tadau hagadaumee gaa-mmada gi-di hai deenei ga-haga-langaadia, go nia hagadaumee la-hua ala nogo haganneennee gidaadou boloo, “Dehee Yihowah di-godou God?” Gidaadou ga-gidee digaula e-magedaa gaa-llele gi-lala be nia gelegele pigi i-hongo nia ala.

7:11  Goodou go nia daangada o Jerusalem, di madagoaa e-hau-ai haga-hoou nia abaaba di waahale ga-dau-mai. Di madagoaa deelaa, godou gowaa la-ga-haga-damana.

7:12  Godou daangada ga-loomoi gi-muli gi goodou mai nia gowaa huogodoo, mai Assyria i bahi-i-dua, mai Egypt i bahi-i-ngaaga, mo mai di monowai Euphrates. Digaula ga-loomoi nia moana mogowaa mo nia gonduu mogowaa.

7:13  Gei henuailala la-gaa-hai di anggowaa mai i-nia huaidu o digau ala e-noho i-hongo di-maa.

7:14  Meenei Dimaadua, Goe gi-hai tangada benebene siibi ni au daangada ala ne-hilihili Kooe. Ma e-aha maa digaula e-noho mogowaa nadau mehanga i-lodo-henua, ma iai tenua tomo i nadau baahi. Heia digaula gii-hula e-miami i-lodo nia gowaa maluagina o Bashan mo Gilead be di-nadau hai i-mua-loo.

7:15  Meenei Dimaadua, heia au mogobuna mai gi gimaadou be dau hai ne-hai i-nia laangi ala ne-laha-mai gimaadou Kooe gi-daha mo Egypt.

7:16  Nia henua llauehe ga-gidee nia mee aanei ga-deai nadau mahi ai, eimaha hogi ma digaula e-maaloo. Digaula ga-lodo huaidu gaa-tai nadau ngudu mo-di pono nadau dalinga.

7:17  Digaula gaa-tolo i-lodo nia dogolia be nia gihaa. Digaula ga-loomoi i nadau gowaa e-noho-ai, e-polepole ge mmaadagu. Digaula gaa-huli i nadau mmaadagu gi Dimaadua go di-madau God.

7:18  Meenei Dimaadua, ma hagalee di god be Goe i-golo ai, Goe e-dumaalia ang-gi nia huaidu o au dama ala e-mouli hua igolo. Goe hagalee daahi-hua beelaa do hagawelewele, gei goe e-manawa-tenetene, e-haga-modongoohia do aloho i gimaadou.

7:19  Goe ga-dumaalia-mai labelaa gi gimaadou, gei Goe ga-dagadagahi madau huaidu gi-lala o babaawae, gaa-lawa ga-hagau nia maa gi tua di moana!

7:20  Goe ga-haga-modongoohia do manawa-dahi mo do aloho donu ang-gi au dama aalaa go di hagadili o Abraham, mo Jacob, gii-hai be dau hagababa dela ne-hai ang-gi madau damana-mmaadua i-mua-loo.