LinVB - Esther

Chapter 1

1:1  A O mobu mwa mibale mwa bokonzi bwa Asuero monene, o sa­nza Nisan, o mokolo mwa yambo, Mardokai aloti ndoto. Ye azalaki mwana wa Yair, nkoko wa Simei, mwana wa Kis, moto wa libota lya Benyamin. B Mardokai azalaki mo-Yuda mpe afandi o engumba Suza ; azalaki moto wa lokumu mpe asalelaki mokonzi monene wa ekolo. C Azalaki moko wa bato baye Nabukodonozor, mokonzi wa Babilon, akangaki o Yeruzalem mpe akendeki na bango o boombo ; Yekonia, mokonzi wa Yudea, azalaki mpe na ba­ngo. D Mardokai aloti boye : Bato baga­ngi mpe basali makeléle ; nkake ebeti mpe mokili moningani ; nse mobimba ekomi mobulu. E Ebimi wana bibuki bibale bya nyama, bitamboli liboso, bimilengeli mpo ya kobunda etumba. F Awa bizalaki koganga makasi, bikolo binso bibandi komilengele na etu­mba mpo ’te bato ba bango babundisa ekolo ya bato ba bosembo. G Ekomi mokolo mwa molili mpe mwa butu boindo : Mpasi na nsomo, minyoko na mobulu ikweli nse mobimba. H Bato banso ba bosembo babulungani, bayoki nsomo mpo ya mpasi izali koya. Bazalaki kozila liwa, I mpe kobelela Nzambe. Nzokande, o ntango bazalaki kobelela bongo, ebimi wana mwa moluka, mokomi noki ebale enene na mai makotambolaka makasi. J Mwi­nda moko mobimi wana, mouti o mwese. Bato ba motema bobola ba­zwi lokumu, mpe balei bato banene. K Mardokai amoni ndoto eye mpe maye Nzambe akani kosala. Ntango alamuki, amanyoli makambo mana o motema, mpe tee butu ameki koyeba ntina ya mango. L Na nsima Mardokai akei kopema o ndako ya mokonzi elongo na Gabata mpe na Tara, ba-eniki babale bazalaki bakengeli ba ndako ya mokonzi. M Ayoki lisolo lya bango mpe maye bakani kosala. Awa ayoki ’te balingi koboma mokonzi Asuero, akei koyebisa ye. NMokonzi atuni ba-eniki baye babale ; mpe awa bandimi, akangisi bango o boloko. O Mokonzi atindi ’te bakoma likambo lyango o buku ya Bikela bya mokonzi. Mardokai mpe akomi yango o monkanda mwa ye. P Na nsima mokonzi atindi ’te Mardokai atikala o mosala o ndako ya mokonzi. Akabeli ye mabonza mpo ya malamu maye asalaki. Q Ezalaki wana mpe Aman, mwana wa Amdata, moto wa Agag, alingamaki na mokonzi. Kasi mpo ya lika­mbo lya ba-eniki babale, akaneli Mardokai na bato ba ekolo ya ye. O ntango Asuero azalaki mokonzi, azalaki koyangela mikili monkama na ntuku ibale na nsa- mbo, banda ekolo India tee Etiópia.

1:2  O mikolo mina, o ntango afandi o ngwende ya ye o engumba Suza,

1:3  o mobu mwa misato mwa bokonzi bwa ye, alambi limpati linene : abengi baninga ba ye ba motema, bakonzi ba bikolo bisusu, bankumu ba Persi mpe ba Medi, mpe bayangeli ba mikili mya­ngo.

1:4  Mikolo monkama na ntuku mwambe mobimba, alingi kolakisa bango bomengo bwa ye, mpe nde­nge azalaki kosepela na lipombo o bokonzi bwa ye.

1:5  Nsima ya mikolo mina, mokonzi alambeli bato banso ba Suza limpati ; abengi ná bato ba nkita ná babola ; limpati o lopango la mokonzi liumeli mikolo nsambo.

1:6  Bakembisi lopango mobimba na bilamba bya malekani kitoko mpe bya kiusa ya longondo ; bilamba bina bikangemi na nsinga ya longondo mpe ya motane. Bilamba bikangemi na mpete ya palata, bita-nda­ni o makonzi ma marbre mpe­mbe. O mabanga ma nse manso mbeto ya wolo mpe ya palata izalaki ; mabanga mana masalemi na mabanga ma motuya monene, na marbre mpembe, na nakre mpe na mabanga make ndenge na ndenge.

1:7  Mpo ya komele ezalaki wana kopo ya wolo ndenge na nde­nge. Vino mpe ezalaki ebele mpenza, lokola mokonzi akopesaka.

1:8  Bamelisi moto moko na makasi te : mokonzi atindi bakapita ba balambi ’te basalela moto moko moko lokola ye moko alingi.

1:9  Mokonzi mwasi Vasti, mwana wa mokonzi, alambeli mpe basi limpati linene o ndako ya mokonzi Asuero.

1:10  O mokolo mwa nsambo mokonzi akomi kosepela mpo ya vino ameli ; atindi Mekuman, Bizeta, Arbona, Bigta, Abagta, Zetar na Karkas, ba-eniki nsambo ba lopango la mokonzi Asuero,

1:11  ’te babyanga mokonzi mwa­si Vasti, alata enkoti ya bokonzi ; bo­ngo bato banso na mpe bayangeli ba ekolo ya ye bamono kitoko ya ye. Solo, azalaki mwasi bonzenga.

1:12  Kasi mokonzi mwasi Vasti aboyi koya elongo na ba-eniki. Bongo mokonzi asiliki mpe ayoki nkanda mpenza.

1:13  Atuni balaki ba bwanya, baye bayebi mibeko, mpo bameseni kotuna baye bayebi mibeko mpe bazuzi maka­mbo manene ma mokonzi.

1:14  Bongo abengi Karsena, Setar, Admata, Tarsis, Meres, Marsena na Memukan, bankumu ba bikolo bya Persi na Medi, baye bakoki kokutana na moko­nzi, mpe bazalaki o boso bwa bato banso o bokonzi.

1:15  Atuni bango : « Engebene na mibeko, tosala nini na mokonzi mwasi Vasti, awa aboyi kotosa etinda ya mokonzi, eye ba-eniki bayebisaki ye. »

1:16  Na nsima Memukan alobi o miso ma mokonzi mpe ma bankumu ba ye : « Mokonzi mwasi Vasti asali bobele mokonzi mabe te, kasi asali mpe mabe na bayangeli mpe na bato banso bafandi o ekolo ya mokonzi Asuero.

1:17  Likambo mokonzi mwasi asalaki likoyebana na basi banso ; baye bakoki kobanda kokinola babali ba bango o kati ya motema. Bakoki komilobela : ‘Mokonzi Asuero, atindi ’te bayela ye mokonzi mwasi Vasti, kasi aboyaki koya !’

1:18  Lelomei basi ba bayangeli ba Persi mpe ba Medi ndebayebisi bayangeli banso ba mokonzi likambo mokonzi mwasi asali. Bokinoli bwa bango bokoyokisa babali nkanda.

1:19  Soko mokonzi alingi, malamu abimisa mobeko, bakoma mwango o monkanda mwa mibeko mya Persi na Medi. Bakata likambo se bongo. Mokonzi mwasi akoma lisusu penepene na mo­konzi te. Mokonzi apesa mwasi mosusu nkombo ya lokumu, oyo aleki ye na bolamu.

1:20  Ntango bakosakola mobeko moye mwa mokonzi o ekolo mobimba, basi banso, ná bato banene ná bato bake, bakomemya babali ba bango. »

1:21  Maloba mana masepelisi mokonzi na bayangeli. Yango wana mokonzi asali lokola Mukaios alobi.

1:22  Atindi minkanda bipai binso o ekolo mobimba, mokili na mokili, lokota na lokota mpo ’te mobali azala mokonzi o ndako ya ye.

Chapter 2

2:1  Nsima ya makambo mana, nkanda ya mokonzi ebandi kosila, kasi azalaki se kokanisa Vasti, lika­mbo asalaki mpe boniboni bakataki likambo lya ye.

2:2  Bato bazalaki kosalela mokonzi balobi na ye : « Balukela mokonzi bilenge basi, bangondo kitoko.

2:3  Mokonzi atia bakambi o mikili minso mya bokonzi bwa ye mpo ’te bapono bilenge basi, bangondo ki­toko ; baya na bango o engumba Suza mpe bakotisa bango o lopango la basi ba mokonzi. Bapesa bango o maboko ma Egeo, kapita wa ba-eniki, mokengeli wa lopango la basi. Bapesa bango mafuta ma malasi mpo ’te bapakola nzoto, na mpe binso bisengeli na bango.

2:4  Mwasi oyo apusi kosepelisa mokonzi azala mwasi wa mokonzi o esika ya Vasti. » Mokonzi andimi maloba ma bango mpe asali bobele bo­ngo.

2:5  O engumba Suza ezalaki mo-Yuda moko, nkombo ’te Mardokai, mwana wa Yair, nkoko wa Simei, mwana wa Kis, moto wa libota lya Benyamin.

2:6  Ye azalaki moto wa Yeruzalem, moko wa bato Nabukodonozor, moko­nzi wa Babilon, akangaki mpe amemeki elongo na Yekonia, mokonzi wa ba-Yuda.

2:7  Azalaki kobokolo ele­nge mwasi etike Adasa ; bazalaki mpe kotanga, mwana wa noko oyo wa ye na nkombo Ester ; elenge mwasi ona azalaki kitoko. Ut’o liwa lya baboti akamati ye lokola mwana wa ye mpenza.

2:8  Awa etinda ya mokonzi ebimi, basangisi bilenge basi ebele o engumba Suza, esika Egeo azalaki mokengeli wa lopango la mokonzi. Bakei mpe na Ester o ndako ya mokonzi. Bapesi ye o maboko ma Egeo, mokengeli wa basi ba mokonzi.

2:9  Elenge mwasi asepelisi ye. Egeo alakisi ye bolamu, mpe akabeli ye noki binso bisengeli na ye mpo ya kobongisa nzoto, na mpe biloko bya kolia. Apesi ye bile­nge basi nsambo baponomi o kati ya baombo basi ba ndako ya mokonzi. Apesi bango banso esika eleki bolamu o lopango la basi ba mokonzi.

2:10  Ester ayebisi moto moko ekolo mpe libota lya ye te, mpo Mardokai apekisi ye yango.

2:11  Mokolo na mokolo Mardokai azalaki kotambola penepene na lopango la basi mpo ’te atala boniboni Ester azalaki.

2:12  Nsima ya sanza zomi na ibale, ntango ekoki mpo ’te elenge mwasi moko moko akende epai ya moko­nzi. Eleko ya komilengele ezalaki boye : Sanza motoba mobimba, base­ngeli komipakola mafuta ma mira, na nsima sanza motoba basengeli lisusu kopakola nzoto mafuta mpe malasi ndenge na ndenge lokola basi bakosalaka mpo ya kobongisa nzoto.

2:13  Ele­nge mwasi moko moko, mpo akoma epai ya mokonzi, akoki kose­nge ata eloko nini, bakopesa ye ya­ngo, mpe akoki komeme yango ut’o lopango la basi kin’o ndako ya mokonzi.

2:14  Azalaki kokende bongo na mpokwa, mpe na ntongo akei kofa­nda o lopango la mibale la basi, esika eniki Sasgas azalaki mokengeli. Azalaki kozonga epai ya mokonzi te, bobele soko abengi ye.

2:15  Kasi Ester, mwana wa Abigail, noko wa Mardokai, oyo abokoloki ye lokola mwana wa ye moko ntango akokisi mikolo ’te abeleme na moko­nzi, asengeki bobele eye Egeo, mokengeli wa lopango la basi, ayebisaki ye. Solo, bato banso bazalaki komono ye, bandimi ye.

2:16  Ester akei epai ya mokonzi Asuero ; ezalaki o sanza ya zomi na ibale, sanza Adar, o mobu mwa nsambo mwa bokonzi bwa ye.

2:17  Mokonzi apusi kolinga Ester liboso lya basi basusu ; leka bilenge basi ba­nso, ye moto azwi motema mwa mokonzi. Yango wana mokonzi alatisi ye enkoti ya bokonzi eye ezalaki ya mwasi wa ye.

2:18  Na nsima alambeli bakomanda mpe bayangeli banso limpati linene, mpo ya kosepelisa Ester. Alingisi bato banso ba bokonzi bwa ye bapema mokolo moko.

2:19  Awa aleki o lopango la ibale la basi, lokola bilenge basusu,

2:20  Ester ayebisi moto moko libota to ekolo ya ye te, engebene na mibeko Mardokai apesaki ye, se lokola o ntango azalaki epai ya ye.

2:21  Ntango Mardokai azalaki kosalela mokonzi, ba-eniki babale ba mokonzi, baye bazalaki bakapita ba bakengeli ba mokonzi, baluki nzela ya koboma mokonzi Asuero.

2:22  Kasi Mardokai ayebi likambo lyango ; ayebisi Ester, mpe Ester alobi na mokonzi manso Mardokai ayebisi ye.

2:23  Mokonzi amoni ’te makambo mana mazalaki ma solo. Batingisi bango o nzete, nsinga o nkingo. Mokonzi ati­ndi ’te bakoma likambo lyango o buku ya Mikóló mya Bakonzi.

Chapter 3

3:1  Nsima ya mwa mikolo, mokonzi Asuero akumisi Aman, mwana wa Amdata, wa mokili mwa Agag ; atomboli ye, akomisi ye moto wa ya­mbo wa bankumu ba ekolo.

3:2  Moko­nzi apesi mobeko ’te basaleli ba ye ba­nso, baye bakokengeleke lopango la mokonzi, bafukamela Aman, mpe bakumbamela ye. Mardokai aboyi kofukamela ye.

3:3  Basaleli ba mokonzi, baye bakokengeleke lopango la ye, batuni Mardokai : « Mpo nini obuki mobeko mwa mokonzi ? »

3:4  Mikolo minso batuni ye, se mpamba ; alingi koyoka bango te. Yango wana bafu-ndi ye epai ya Aman ; balingi koyeba soko na nsima Mardokai akosala bobele bongo, mpo ayebisi bango ’te aza­laki mo-Yuda.

3:5  Aman amoni ’te ya solo Mardokai alingi kokumbamela ye te, kofukamela ye mpe te, asiliki mingi mpenza.

3:6  Eyoki ye ’te Mardokai azalaki mo-Yuda, aluki koboma ye, akani kosilisa mpe ba-Yuda banso bazalaki o mokili mwa mokonzi Asuero.

3:7  O mobu mwa zomi na mibale mwa bokonzi bwa Asuero, Aman abimisi mobeko moko, abeti zeke mpo ayeba mokolo na sanza. Zeke elakisi mokolo mwa zomi na minei mwa sanza Adar.

3:8  Aman alobi na mo­konzi Asuero : « O kati ya bikolo bi­nso bya mokili mwa yo, ekolo yoko ekeseni na bikolo bisusu binso. Mibeko mya bango mikokani na mibeko mya ekolo yoko te. Bakotalaka mpe mibeko mya mokonzi se mpa­mba mpenza. Soko olingi kozala malamu, okoki kotika bango bongo te.

3:9  Soko yo mokonzi ondimi, ebongi babimisa mobeko mpo tosilisa bango banso. Nakotia talenta ya palata nkoto zomi o sanduku ya mosolo ya mokonzi. »

3:10  Mokonzi alongoli mpete ya ye o mosapi, mpe apesi yango na Aman, mwana wa Amdata, monyokoli wa ba-Yuda, atii elembo o mo­nkanda mwa bobomi ba-Yuda.

3:11  Mokonzi ayanoli Aman : « Bomba mosolo mwa yo mpe sala na ekolo ena lokola olingi. »

3:12  Babengi bakomi minkanda ba mo­konzi o mokolo mwa zomi na misato mwa sanza ya yambo mpo bakoma minkanda lokola Aman atindi. Batindi myango ona bantoma ba mokonzi monene, bayangeli ba mokili moko moko, mpe bakonzi ba basoda ba ekolo yoko. Bakomi myango na nkoma mpe o lokota la ekolo yoko yoko. Monkanda moye mozalaki na nkombo ya mokonzi Asuero mpe na elembo ya ye.

3:13  Na nsima batindi bato bakende kotika minkanda mina o ekolo mobimba ya Asuero mpo ’te baboma ba-Yuda banso se o mokolo moko, o mokolo mwa zomi na misato mwa sanza ya zomi na ibale, sanza Adar ; babotolo bango mpe biloko bi­nso. 13A Tala awa maloba ma monka nda mona : « Mokonzi monene Asuero atindeli bayangeli ba mikili monkama na ntuku ibale na nsambo, mpe bakonzi ba bikolo binso, banda India tee Etiópia, monkanda moye : 13B Ngai nazali mokonzi monene wa bikolo ebele, mpe nazali na bokasi o nse mobimba. Naluki lokumu te la koyangela bato na lolendo, nalingi bobele koyangela na boboto mpe na bokebi. Nalingi bobele ’te bato ba ngai bafanda nye, mobulu te. Naluki se kobongisa ekolo ya ngai mpe kosalisa bato mpo ’te bakoka kotambola o bisika binso bya mokili, naluki mpe kotia boboto boye bato banso balingi. 13C Natuni balaki ba ngai mpo ’te nayeba boniboni nakoki kokokisa mikano mina. Moto moko amilakisi moto wa bwanya bonene, amipesaki ntango inso na motema moko mpo ’te asalisa ngai, mpe akomi moto wa babale o bokonzi bwa ngai ; moto oyo nkombo ya ye Aman. 13D Ayebisi biso ’te o kati ya bikolo binso bipalangani o nse, ekolo yoko ezali na mayele mabe, ekolo ezali na mibeko mikeseni na mibeko mya bato basusu banso, ekolo ya bato bakokinolaka ntango inso bitinda bya mokonzi. Bakoki kotiela biso libaku te o boyangeli ekolo, boye bokosepelisaka bato banso. 13E Tomoni ’te bobele bato ba ekolo ena bakolukaka bato banso na mi-ndondo, bakomitiaka mpembeni mpo ya kolanda mibeko mya bango moko. Bato ba ekolo ena balingi kolanda makambo ma biso te ; yango wana bakosalaka mabe ndenge na ndenge mpo ’te ekolo ya biso ezwa kimia te. 13F Yango wana natindi etinda eye : Baye banso balakisami o monkanda mwa Aman, oyo totii moyangeli wa makambo ma ekolo, mpe akomi lokola tata wa biso, baye banso, ezala basi to bana, bakufa na mopanga mwa banguna ba bango, mawa te ; baboma bango o mokolo mwa zomi na minei mwa sanza ya zomi na ibale, sanza Adar, ya mobu moye. 13G Bobele bongo, soko banyokoli ba biso bakiti lelo o mboka ya bawa mokolo moko, biso tokozala kimia o mikolo mikoya nsima mpe tokomono lisusu mobulu te o makambo ma boyangeli bato. »

3:14  Batindi maloba ma minkanda mi­na o bikolo binso, bongo bato banso bayeba mobeko moye mpo ’te bamilengele malamu mpo ya mokolo moye.

3:15  Lokola mokonzi atindi, ba­ntoma bakei mbangu. Mobeko moye mokomi koyebana liboso o ebombamelo ya Suza. Mpe o ntango moko­nzi na mpe Aman bazalaki kolangwa, engumba Suza ebulungani.

Chapter 4

4:1  Eyoki Mardokai likambo lina apasoli bilamba, alati ngoto mpe atii mputulu o motó. Akatisi engu­mba mobimba, aleli na bogangi na mawa manene.

4:2  Akei tee o ezibeli ya ndako ya mokonzi, atelemi wana, za­mbi moto oyo alati ngoto akoki kokoto o ndako ya mokonzi te.

4:3  O bikolo binso etinda ekomi koyebana, ba-Yuda bazalaki kosala lilaka, kolala nzala, kolela mpe kokimela. Bato mi­ngi bakomi kolata ngoto mpe kofa­nda o mputulu.

4:4  Ntango baninga basi ba Ester na ba-eniki bakei koyebisa ye, ayoki nso­mo mpenza. Atindi ’te bayela Mardokai bilamba, alata byango mpe alongola ngoto. Kasi ye aboyi.

4:5  Na nsima Ester abengi eniki Atak, oyo azalaki kosalela ye ; atindi ye akende kotuna Mardokai ntina mpenza ya likambo liye.

4:6  Atak abimi o ndako mpe akei koyebisa Mardokai azalaki o lingongo liboso lya ezibeli ya ndako ya mokonzi.

4:7  Bongo Mardokai ayebisi ye makambo makweli bango ; ayebisi ye mpe mbongo boni Aman andimi kotia o sanduku ya mosolo mpo ’te asilisa ba-Yuda banso.

4:8  Atikeli ye mpe maloba ma monkanda mwa maka­mbo basakolaki o Suza, na likambo lya koboma ba-Yuda banso, apesa Ester monkanda mona. Atindi mpe Ester akende epai ya mokonzi, abo-ndela ye ’te ayokela bato ba ekolo ya ye mawa : 8A (C) « Okundolaka o motema mikolo ozalaki mobola, ntango nazalaki koleisa yo, zambi Aman, oyo azali moto wa babale o ekolo, asengi mokonzi ’te baboma biso. 8A Bondela Mokonzi Nzambe, lobela biso epai ya mokonzi ! Bikisa biso o liwa ! »

4:9  Atak akei koyebisa Ester makambo mana manso.

4:10  Na nsima Ester alobi na Atak : « Kende koyebisa Mardokai :

4:11  Bato ba mikili minso mya ekolo ya mokonzi bayebi malamu ’te moto ata nani, azala mobali to mwasi, soko akei epai ya mokonzi mpe abyangemi te, akobika soki te, bobele soko mokonzi atandeli ye monto­ngo mwa ye mwa wolo ; se moto oyo akoki kobika. Tala, ekomi mikolo ntuku isato ’te babengi ngai lisusu te mpo nakoma penepene na mokonzi. »

4:12  Atak akei koyebisa Mardokai maloba maye ma Ester.

4:13  Mardokai ayanoli Atak boye : « Ke­nde koyebisa Ester : Okanisa te ’te yo moko okobika o kati ya ba-Yuda banso, mpo ofandi o ndako ya mokonzi.

4:14  Ezali bongo te ! Soko okolobela biso sikawa te, libiki lya biso liko­uta epai esusu, mpe moto mosusu akobikisa biso ba-Yuda, kasi yo na bandeko ba yo bokokufa. Nani ayebi ? Mbele okomi mwasi wa mokonzi mpo ’te obikisa biso o likama liye ? »

4:15  Ester atindeli Mardokai maloba maye :

4:16  « Kende kosangisa ba-Yuda banso ba Suza : balala nzala elongo na ngai ; balia mpe bamele eloko te, mikolo misato mobimba, butu moi. Ngai na baninga basi, tokolia eloko te. Na nsima, ata mobeko mopekisi, nakokoto epai ya mokonzi ; soko ese-ngeli ’te nakufa, nakokufa. »

4:17  Mardokai akei kosala manso Ester atindaki ye. 17A Mardokai akundoli o motema misala minene minso Nza­mbe asalaki, abondeli ye na maloba maye : 17B « E Mokonzi Nzambe, yo Nkolo wa mokili mobimba, binso bizali o maboko ma yo ; moto moko te akoki kopekisa yo soko olingi kobikisa Israel. 17C Ya solo, yo moto okelaki likolo na nse na makamwa manso mazali o nse. 17D Mokonzi, ozali Nkolo wa molongo, mpe moto moko aleki yo na bokasi te. 17E Mokonzi, oyebi makambo manso ! Naboyaki kokumbamela Aman, moto wa lolendo ; oyebi ’te naboyaki mpo ya lolendo te, nasalaki bongo mpo ya koluka lokumu te. 17F Mbele nandimaki kozinga makolo ma ye, soko nakokaki kobikisa Israel bongo. 17G Kasi nasali bongo mpo nakoki kotia lokumu la moto liboso lya lokumu la Nzambe te. Ngai nakokumbamela moto moko te, nakofukamela se yo, Mokonzi ; soko nasali bongo, ezali mpo ya lolendo te ! 17H Kasi sikawa, Mokonzi Nzambe, Yo Nkumu, Nzambe wa Abarama, yokela bato ba ekolo ya yo mawa ! Mpamba te, bazali koluka koboma biso, balingi kosilisa biso bato ba yo uta kala. 17I Tozali ekolo ya yo, otika biso te, yomei obikisaki biso o mokili mwa Ezipeti. 17J Ondima losambo la ngai, oyokela bato ba ekolo ya yo ngolu ; mawa ma biso mabongwana esengo. Tozala makasi mpe tokumisa nko­mbo ya yo seko. Ondima te ’te bato baboma biso, mpo biso tokokumisaka yo. » 17K Bato banso ba Israel bagangi na makasi ma bango manso, mpo bamoni ’te etikali moke bakufa.

Chapter 5

5:1  (Nsima ya mikolo misato Ester alati bilamba bya mokonzi mwasi, mpe akei o lopango, esika atelemi o boso bwa ndako ya mokonzi. Mokonzi afandi o ngwende ya ye o ndako ya bokonzi.1a Esilisi ye kosambela mikolo misato, Ester alongoli bilamba bya bosoto mpe alati lisusu bilamba bya monzele.1b Solo, bonzenga bwa ye bomononi. Asambeli Nzambe oyo akobatelaka mpe akobikisaka bato ba­nso. Akei na basaleli basi babale,1c asimbi moko na loboko lokola moto alembi nzoto ;1d mosusu alandi ye mpe atomboli elamba ya ye elai.1e Aleki kitoko mingi mpe elongi ya ye ekomi kongenge, azalaki koseke lokola mwa­si akei kotala mobali ; kasi o kati ya motema azalaki kobanga mingi.1f Asili koleka bizibeli bya ndako bi­nso mpe abimi o miso ma mokonzi. Akuti ye afandi o ngwende ya ye, alati bilamba bya monzele, bilamba bike-mbami na mabanga ma motuya mpe na wolo ; solo, monzele mwa ye mozalaki kobangisa.2a Atomboli elongi mpe na nkele o motema atali Ester. Ester asenzwi, bokasi bwa nzoto bosili, mitoki mibimeli ye ; bongo alalisi motó o lipeke lya mosaleli wa ye.2b Nzokande Nzambe abongoli motema mwa mokonzi, akomi boboto mpenza. Alongwi noki o ngwende ya ye, ayambi Ester o maboko tee akomi koyoka malamu. Alendisi ye motema na maloba ma boboto, atuni ye :2c « Boni Ester, nazali ndeko wa yo, kitisa motema !2d Okokufa te, mobeko natindaki motali se bato basusu. Yaka pene. »2e Na nsima atomboli montongo mwa wolo, atii mwango o nkingo ya Ester mpe azingi ye ekopi, alobi : « Yebisa ngai makambo ma yo. »2f Ye azongisi : « Namoni yo mokonzi lokola anzelu wa Nzambe, mpe motema mwa ngai moyoki nsomo, awa namoni bonzenga bwa elo­ngi ya yo,2g zambi oleki kitoko, e mokonzi, mpe elongi ya yo elakisi ’te ozali moto malamu. »2h Ntango azalaki koloba bongo, Ester asenzwi lisusu.2i Mokonzi abangi, mpe bato ba ye banso balendisi Ester.

5:2  Emoni ye ’te Ester atelemi o lopango o boso bwa ndako ya ye, asepeli boyei bwa ye, mpe ata­ndeli ye montongo mwa wolo, moye amemi o loboko. Ester abelemi mpe asimbi nsonge ya montongo).

5:3  Mokonzi atuni ye : « Olingi nini, mo­ko­nzi mwasi Ester ? Olingi napesa yo nini ? Ata osengi ngai ndambo ya bokonzi bwa ngai, nakopesa yo ya­ngo. »

5:4  Ester ayanoli : « Malamu mokonzi andima koya lelo elongo na Aman o limpati nalingi kolambelela bango. »

5:5  Mokonzi alobi : « Bayebisa Aman ’te aya noki mpo tokende esika Ester abe­ngi biso. » Mokonzi na Aman bayei o limpati liye Ester alambeleli bango.

5:6  Ntango ya limpati, mokonzi alobi na Ester : « Olingi nini, mokonzi mwasi Ester ? Manso okosenge ngai, nakopesa yo mango, ata ndambo ya bokonzi bwa ngai ! »

5:7  Ye ayanoli : « Likambo nase-ngi… eloko nalingi… ?

5:8  Soko ya solo nazwi bolamu o miso ma mokonzi, mpe soko esepelisi mokonzi kopesa maye nakosenge ye, malamu boya lisusu lobi bino na Aman o limpati nakolambelela bino mpe lobi nakosala lokola mokonzi akotinda. »

5:9  O mokolo mona Aman abimi o ndako ya mokonzi na motema ese­ngo, asepeli mingi, kasi awa akomi penepene na ezibeli ya ndako ya mokonzi, amoni ’te Mardokai atelemi te, ayoki nkanda mpenza.

5:10  Kasi akangi motema. Ekomi ye o ndako abengi baninga ba ye ba motema na mwasi wa ye Zeres.

5:11  Atangeli bango nkita ya ye inso, motango mwa bana ba ye, manso mokonzi apesaki ye mpo ya kotombola mpe kokumisa ye o boso bwa bayangeli mpe basaleli banso.

5:12  Abakisi : « Esili naino te. Mokonzi mwasi abengi se biso na mokonzi o limpati. Abyangi biso lisusu lobi.

5:13  Kasi mana manso makosepelisa ngai te soko namoni mo-Yuda Mardokai afandi o ezibeli ya ndako ya moko­nzi ! »

5:14  Mwasi wa ye Zeres na bani­nga ba ye ba motema balobi na ye : « Bakata mobimbi mwa nzete, bolai maboko ntuku itano ; mpe lobi na ntongo se­nge mokonzi ’te atingisa Mardokai, nsinga o nkingo, o nzete ena, bongo yo okende o limpati elongo na mokonzi, mpe osepela kuna. » Aman amo­ni ’te likambo lina libongi, mpe akatisi nzete mpo ya kotingisa Mardokai.

Chapter 6

6:1  O butu bona Nzambe asali ’te mpongi ekima mokonzi. Yango wana mokonzi atindi ’te bayela ye buku ya Mikóló mya Bakonzi mpo batangela ye yango.

6:2  Ayoki mpe maloba malakisi ’te Mardokai afundaki ba-eniki babale ba mokonzi, Bigtan na Teres, o ntango bazalaki kokengele lopango, balukaki koboma Asuero.

6:3  Mokonzi atuni bato ba ye : « Likabo nini to lokumu nini topesaki Mardokai ? » Bato ba ye bazongisi : « Topesaki ye eloko te. »

6:4  O ntango moko­nzi atuni bango « Nani azali o libanda ? », Aman akoti o lopango la mokonzi mpo ’te asenge mokonzi ’te atingisa Mardokai o nzete eye atindaki ’te balengele mpo ’te baboma ye.

6:5  Basaleli ba mokonzi balobi : « Aman moto akoti o lopango. » Mokonzi alobi : « Akoto ! »

6:6  Na nsima mokonzi atuni Aman : « Nasala nini na moto nalingi kokumisa ? » Aman amilobeli o motema : « Mokonzi akoki kokumisa moto mosusu te, se ngai. »

6:7  Yango wana azongiseli mokonzi : « Mokonzi alingi nde kokumisa moto moko ?

6:8  Bakamata bilamba kitoko, biye mokonzi ye moko akolataka, baya na farasa, eye mokonzi akobutelaka.

6:9  Bapesa yango na nkumu moko, moninga wa motema wa mokonzi, bongo ye alatisa moto oyo mokonzi apusi kolinga. Babutisa ye o farasa mpe batambwisa ye o zando ya engumba mpe baganga o boso bwa ye : Bakosalaka bongo na moto oyo mokonzi alingi kokumisa ! »

6:10  Mokonzi alobi na Aman : « Ozila te, kamata bilamba, farasa mpe binso otangi sikasikawa, mpe sala bongo na Mardokai, mo-Yuda oyo azali o lopango la mokonzi. Batika eloko yoko te ya maloba olobaki ! »

6:11  Aman akamati elamba na farasa, alatisi Mardokai yango mpe abutisi ye o farasa. Na nsima atamboli o zando ya engu­mba mpe agangi o boso bwa ye : « Bakosalaka bongo na moto oyo moko­nzi alingi kokumisa ! »

6:12  Aman azo­ngi noki o ndako ya mokonzi, Aman azongi o ndako, na nsoni o motema, akitisi motó.

6:13  Aman asololi na mwasi wa ye Zeres mpe na baninga ba ye ba motema makambo makwelaki ye. Baninga ba ye na mwasi wa ye balobi : « Tala boniboni Mardokai akitisi yo mbala eye ; soko azali moto wa ekolo ya ba-Yuda, okokoka ye te, akokweisa yo o miso ma ye. »

6:14  Ezalaki bango naino koloba, ba-eniki babengi Aman aya noki o limpati liye Ester alambeli bango.

Chapter 7

7:1  Mokonzi na Aman bakei kolia limpati epai ya mokonzi mwasi Ester.

7:2  O mokolo mwa mibale, o nsuka ya limpati, mokonzi atuni Ester : « Mokonzi mwasi, olingi kosenge nini ? Manso okosenge ngai, nakopesa yo mango, ata ndambo ya boko­nzi bwa ngai ! »

7:3  Ester ayanoli ye : « Soko nazwi bolamu o miso ma mokonzi, mpe esepelisi mokonzi kopesa maye nakosenge ye, nakosenge yo bomoi bwa ngai moko ; eloko nasengi yo bobele yango, ná mpe bomoi bwa bato ba ekolo ya ngai.

7:4  Mpamba te, etikali moke banyata, basilisa mpe baboma ngai na ekolo ya ngai mobimba. Soko balingaki bobele kokomisa biso baombo to basaleli, nabimisaki lika­mbo liye te ; mobebisi oyo akoki kozala na mosala o lopango la mokonzi te. »

7:5  Asuero atuni Ester : « Nani moto alingi kosala bongo ? »

7:6  Ester ayanoli : « Monguna moto, monyokoli asali bo­ngo ! Nkombo ya ye Aman, moto mabe solo ! » Aman ayoki motema nsomo o miso ma mokonzi mpe ma mwasi wa ye.

7:7  Mokonzi alongwi o meza na nkanda enene, abimi mpe akei o lopango. Aman abandi kobo-ndela mokonzi mwasi, zambi amoni ’te ekosukela ye mabe.

7:8  Ezongi mokonzi o ndako, akuti Aman afandi penepene na kiti enene esika mokonzi mwasi alali. Mokonzi agangi : « Olingi mpe kobebisa mokonzi mwasi epai ya ngai o ndako ya mokonzi ? » Esilisi mokonzi koloba bongo, bazipi elongi ya Aman na elamba.

7:9  Arbona, moko wa ba-eniki, alobi na mokonzi : « Batelemisi nzete mpo ya koboma Mardokai, oyo afu-ndaki bato na likambo lya mokonzi ; ezali nzete ya maboko ntuku itano, kuna o lopango la Aman. » Mokonzi alobi : « Batingisa Aman o nzete ena ! »

7:10  Bakangi Aman nsinga o nkingo mpe batingisi ye o nzete ye moko alengeleki mpo ya Mardokai. Bobele o ntango ena mokonzi akitisi motema.

Chapter 8

8:1  Bobele o mokolo monamei, mokonzi Asuero akabeli Ester biloko binso bya Aman, moto anyokoloki ba-Yuda. Abengi mpe Mardokai, mpo Ester ayebisaki ye ’te bazalaki na ye libota lyoko.

8:2  Akamati mpete eye alongolaki o mosapi mwa Aman mpe apesi Mardokai. Ester atii Mardokai moyangeli wa biloko binso bya Aman.

8:3  Ester akei lisusu koloba na moko­nzi, akwei o boso bwa ye ; aleli, abo­ndeli ye ’te alongola mpasi eye Aman, moto wa Agage, alingaki koyokisa ba-Yuda.

8:4  Mokonzi atandeli Ester montongo mwa wolo. Ester atelemi mpe akei kofanda o boso bwa mokonzi, alobi :

8:5  « Soko nakoki kozwa bolamu o miso ma yo, mpe soko mokonzi andimi, batinda bato bapasola minkanda mikomami na Aman, mwa­na wa Amdata, moto wa Agage, mpo ya kosilisa ba-Yuda o bokonzi bwa yo.

8:6  Boniboni nakoki komono mpasi elingi ekwela bato ba ekolo ya ngai ? Boniboni nakoki kotala na miso ’te bakoboma bandeko ba ekolo ya ngai banso ? »

8:7  Mokonzi ayanoli Ester na mo-Yuda Mardokai : « Napesi Ester biloko binso bya Aman, mpe natingisi Aman o nzete, mpo alingaki koboma ba-Yuda.

8:8  Yo sikawa, koma monkanda o nkombo ya ngai, koma maye manso omoni ’te mazali malamu mpe bakisa elembo ya mpete ya ngai, mpo bakoki kotia ntembe te na mitindo minso mikomami na mokonzi mpe mizwi elembo ya mpete ya ye. »

8:9  Babengi bakomi minkanda o mokolo mwa ntuku ibale na isato ya sanza ya ya­mbo, sanza Nisan. Bayebisi ba-Yuda bitinda bapesaki bayangeli ba mikili monkama na ntuku ibale na nsambo, banda India tee Etiópia. Moto na mo­to azwi monkanda mokomami na nkoma mpe o lokota la ye.

8:10  Bakomi monkanda o nkombo ya mokonzi Asuero, mpe babakisi elembo ya mpe­te ya ye ; na nsima batindi bata­mbwisi farasa bakende kotika mi­nka­nda mina.

8:11  Mokonzi alingisi ba-Yuda ’te bakoki kosangana mpe komibatela o mboka inso bafandi. Soko bato bayei kobundisa bango, bakoki kobo­ma bango, ná basi ná bana ba bango, bakoki mpe kobotolo bango biloko.

8:12  Esalema bongo o mokolo moko o bikolo binso bya bokonzi bwa Asuero, mokolo mwa zomi na misato mwa sanza ya zomi na ibale, sanza Adar. 12a Tala awa maloba ma monkanda mona : « Mokonzi monene Asuero ona bayangeli ba bikolo mo­nkama na ntuku ibale na nsambo, banda India tee Etiópia, mpe ona bato banso bakondimaka ngai, losako ! 12b Bato baike, soko bakonzi balakisi bango bolamu boleki ndelo, bakomi kofunda na yango. 12c Bazali koluka kosala bato ba biso mabe. Awa basepeli te na nkita bazwi, bakolukaka bato basali bango malamu na maka­mbo. 12d Bakobebisaka mitema mya bato balamu, mpe soko bato bazangi mayele babeteli bango maboko, bayoki esengo mpe bakanisi ’te bakoki kokima etumbu ya Nzambe wa bosembo, oyo akoyinaka bobe mpe akomonoko makambo manso. 12e Mbala mingi tomoni likambo liye : Soko bakonzi bapesi bato mosala mwa kotala makambo ma leta, bato baye baba-ndi kondima maloba ma baninga ba bango. Awa batii mitema na bango mpo ’te babongisa se makambo ma ba­ngo, bakomi koboma bato basali mabe te. Bamikotisi bongo o ma­ka­mbo ma nsomo, maye bakoki ko­bo-ngisa lisusu nsima te. 12f Ekosalema bo­ngo, mpo bilobaloba ndenge na ndenge bya baninga ba bango bibuli-nginyi mayele malamu ma bayangeli. 12g Nzokande, lelo tomoni polele ; toke­nde mosika te, tokundola maka­mbo ma kala te, totala bobele maka­mbo ma lelo, makambo mabe bato ba mobulu bakosalaka ; bayangeli baye bakosalaka mosala mwa bango bo ebongi soki te. 12h Banda lelo tokomeka kotia boboto o mokili mobimba mpo ’te bato banso bafanda nye. 12i Tokobongola makambo bobele soko ese­ngeli, mpe tokotala makambo manso bakolakisa biso na bosembo mpe na bolamu. 12j Bobele bongo Aman, mwana wa Amdata, moto wa Masedonia, ata aza­laki na biso ba-Persi makila moko te, mpe afandaki mosika na mboka ya biso, toyambaki ye epai ya biso lokola ndeko. 12k Biso tolakisaki ye bo­ndeko lokola tokosalaka na bato ba bikolo binso ; topesi ye mpe nkombo ‘tata wa biso’, akomi moto wa babale o bokonzi bwa biso mpe bato ba­nso bakumbameli ye. 12l Kasi akokaki na mosala moye mwa lokumu te mpe alukaki kolongola biso o bokonzi mpe koboma biso. 12m Akosaki biso na makambo ma lokuta ndenge na nde­nge mpo alukaki koboma Mardokai, oyo azali mobikisi wa biso mpe akosalisaka biso ntango inso. Alukaki mpe kolongola Ester, mwasi wa mokonzi, oyo asalaki mabe mokolo moko te ; ya solo, alingaki koboma ekolo ya ba-Yuda mobimba. 12n Na mayele mabe mana akanisaki ’te tokotikala se biso moko, mpe mosika te bokonzi bwa Persi bokokoma o maboko ma ba-Masedonia. 12o Kasi sikawa tomoni ’te ba-Yuda, baye elombe mobomi alingaki kosilisa, bazali bato babe te, kasi bakola-ndaka mibeko mya bosembo ; 12p bazali bana ba Nzambe wa nta likolo, oyo akobatelaka boyangeli bwa biso, ba­nda ntango ya bankoko ba biso, na bolamu mpenza. 12q Yango wana botala bobele mpamba minkanda miye Aman, mwana wa Amdata, atindaki. 12r Moto akomaki minkanda mina, totingisaki ye o nzete penepene na ezibeli ya engumba Suza, ye na libota lya ye mobimba. Nzambe, Mokonzi monene wa makambo manso, apesaki ye etumbu ekoki na ye. 12s Bobaka monkanda moye o libaya bipai binso ; botika ba-Yuda balanda mibeko mya bango moko, 12t bopesa bango maboko o mokolo bato bakoya kobundisa bango, mokolo mwa zomi na misato mwa sanza ya zomi na ibale, sanza Adar, lokola balobaki. 12u Mpamba te, Nzambe oyo azali Mokonzi monene wa mokili mobimba, abongoleli bato baye aponi mokolo mona mwa liwa mokomi mokolo mwa bosepeli nsuka te. 12v Bino mpe bobakisa mokolo mona monene na biyenga bya bino ; bosepela mokolo moye monene bo ebongi. 12w Mokolo mona mozala sikawa seko, eyenga ya libiki lya biso mpe lya ba­nso bakondima bokonzi bwa ba-Persi ; mpe baye bakoluka biso na mindondo lisusu, bayeba ’te bakoki kosila banso. 12x Soko o bingumba to o ekolo bato batosi mobeko moye te, tokoboma bango na likongo mpe na móto, mawa te. Mboka ena ekozala bobele ekila ya bato te, ata nyama ya zamba na mpe ndeke ikokima mboka ena seko. »

8:13  Basengelaki kobaka monkanda moye o libaya mpo ’te bato ba­nso bakoka kotanga mwango malamu, mpo ’te o mokolo motindami ba-Yuda banso bakoka komilengele mpo ya etumba, soko banguna bali­ngi kosala bango mabe.

8:14  Bato ba farasa bakei mbangu, lokola mokonzi atindi bango. Bayebisi mpe bato ba Suza mobeko mona.

8:15  Mardokai abimi o libanda, alati molato mwa bokonzi mwa longondo mpe mwa mpe­mbe, alati enkoti ya wolo o motó, na mpe elamba elai mpembe mpe etane ngola. Bato ba Suza banso bayoki esengo enene.

8:16  Mokolo mona mozalelaki ba-Yuda mokolo mwa mwi­nda, nsai, bosepeli mpe mwa lilonga.

8:17  O bingumba mpe o bikolo binso, esika bayebisi mobeko mwa moko­nzi, esika mpe babaki monkanda o libaya, ba-Yuda bayoki se esengo na nsai enene, bameli, balei mpe bazalaki na esengo. Bampaya baike basengi ’te bakata bango nzoto, bamikomisi bongo ba-Yuda mpo ya bobangi.

Chapter 9

9:1  O sanza ya zomi na ibale, sanza Adar, o mokolo mwa zomi na misato mwa sanza, minkanda mya mokonzi misili kopalangana o mboka inso.

9:2  O mokolo monamei ba-Yuda babomi banguna. Moto moko akokaki bango te, zambi babangaki bango.

9:3  Bayangeli, bankumu na bakomi minkanda ba mokonzi bazalaki kondimela ba-Yuda, mpo babangaki Mardokai.

9:4  Mardokai azalaki nkumu o ndako ya mokonzi ; lokumu la ye lopalangani o ekolo mobimba ; Mardokai abandi kokoma moto monene.

9:5  Ba-Yuda babomi banguna banso na mopanga. Banyati bango, basilisi ba­ngo, basali na banguna lokola motema molingi.

9:6  Bobele o ebombamelo Suza ba-Yuda babomi bato nkama itano,

9:7  babomi Parsandata, Dalfon, Aspata,

9:8  Porata, Adalia, Aridata,

9:9  Parmasta, Arisai, Aridai na Yezata,

9:10  bana zomi ba Aman, mwana wa Amdata, monyokoli wa ba-Yuda. Kasi bayibi biloko bya bango te.

9:11  O mokolo monamei bayebisi mokonzi bato boni babomami o Suza.

9:12  Mokonzi alobi na Ester : « Bobele o Suza ba-Yuda babomi bato nkama itano na mpe bana zomi ba Aman. Bongo basalaki nini o bikolo bisusu ? Yebisa ngai sikawa nini olingi kose-nge, nakopesa yo yango. Senge mpe nakopesa yo. »

9:13  Ester ayanoli : « Soko mokonzi andimi, balingisa ba-Yuda ’te basala naino bongo lobi mpe batingisa bibembe bya bana babali zomi ba Aman o nzete, nsinga o nkingo. »

9:14  Mokonzi alingisi ’te basala bobele bongo, mpe atindi ’te batingisa bibe­mbe bya bana babali zomi ba Aman o nzete.

9:15  Bongo ba-Yuda ba Suza basangani mpe o mokolo mwa zomi na minei mwa sanza Adar ; babomi naino bato nkama isato, kasi bayibi biloko bya bango te.

9:16  O bisika bisusu bya ekolo, ba-Yuda basangani mpe bapesani maboko. Banguna ba bango batiki bango nye, mpo ba-Yuda babomaki banguna nkoto ntuku nsambo na itano o mokolo mwa zomi na misato o sanza Adar, kasi bayibi eloko te.

9:17  Ekomi mokolo mwa zomi na minei bapemi, ezalaki mokolo mwa esengo mpe mwa mabina.

9:18  Ba-Yuda ba Suza basanganaki o mokolo mwa zomi na misato mpe o mokolo mwa zomi na minei, kasi bapemi te, bapemi bobele o mokolo mwa zomi na mitano, se na esengo mpe na mabina.

9:19  Na ntina ena ba-Yuda baye bafandi o mboka ike, o libanda lya bingumba, bakosepelaka mokolo mwa zomi na minei mwa sanza Adar na esengo enene mpe bakotindelanaka biloko bya kolia. Kasi baye bafandi o bingumba binene bakosepelaka mpe mokolo mwa zomi na mitano mwa sanza Adar na esengo enene ; bakotindelanaka mpe biloko bya kolia.

9:20  Mardokai akomi makambo maye o buku, mpe atindi minkanda epai ya ba-Yuda banso bafandi o mokili mwa Asuero, bazala mosika to penepene,

9:21  mpo ’te mobu na mobu basepela mikolo mya zomi na minei mpe mya zomi na mitano mya sanza Adar lokola biyenga binene.

9:22  O mikolo mina banguna ba ba-Yuda batikaki ba­ngo nye, ezalaki sanza Adar ntango mawa ma bango mabongwani ese­ngo, minyoko mibongwani mabina. O mikolo mina basepela mpe basala limpati linene, batindelana biloko bya kolia, mpe bakabela babola biloko.

9:23  Ba-Yuda bandimi likambo lina bo momeseno, engebene na maloba ma Mardokai :

9:24  « Aman, mwana wa Amdata, moto wa Masedonia, monyokoli wa ba-Yuda banso, alukaki koboma bango ; na ntina ena abeteki zeke.

9:25  Kasi ntango azongaki epai ya mokonzi mpo ya kosenge ye ’te atingisa Mardokai o nzete, mpasi inso alingaki koyokisa ba-Yuda, ikweli ye moko, bongo babomi ye na bana ba ye lokola.

9:26  Yango wana batangi mikolo mina ‘Purim’ mpo ya zeke babeteki o mokolo mona (o lokota la bango, Pur lokola zeke). » Engebene na maloba ma monkanda mwa Mardokai, mpe mpo ya makambo manso ma­kwe­laki bango,

9:27  ba-Yuda bandimi, bango moko, bankoko ba bango na mpe baye banso bakosangana na ba­ngo, kosepela mobu na mobu mikolo mibale, lokola mobeko motindi mpe o eleko etindami.

9:28  Awa bakosepela mikolo mya Purim o libota lyoko lyo­ko, o ekolo yoko yoko, mpe o e­ngumba yoko yoko, ba-Yuda bakobosana myango te, mpe likambo lina likobungama te o kati ya bango o mibu mikoya nsima.

9:29  Mokonzi mwasi Ester, mwana wa Abigayil, akomi mpe monkanda mpo ya kondima mobeko mwa eyenga ya Purim.

9:30  Batindi mwango epai ya ba-Yuda banso o bikolo monkama na ntuku ibale na nsambo bya bokonzi bwa Asuero, bo nsango ya boboto mpe ya bondeko.

9:31  O monkanda moye batindi ’te ba-Yuda banso basepela mikolo mya Purim o eleko etindami, lokola Mardokai atindaki, mpe na botosi mibeko mya bolali nzala mpe mya boleli.

9:32  Mobeko mwa Ester mokomi bongo mobeko mwa seko, bakomi mwango mpe o monkanda.

Chapter 10

10:1  Mokonzi Asuero azalaki kofutisa bato banso mpako, o mokili mpe o bisanga bya mbu.

10:2  Makambo manso ma nguya ya ye, mpiko, nkita na lokumu la bokonzi bwa ye, bakomi manso o buku ya Mikóló mya bakonzi ba Persi mpe ba Medi.

10:3  Mo-Yuda Mardokai azalaki moto wa babale o bokonzi bwa Asuero. Ba-Yuda bazalaki kokumisa ye, bato ba ekolo ya ye balingaki ye mingi, azalaki koluka bolamu bwa bango mpe kopangana na makambo ma ba­ngo manso. 3a Mardokai alobi : « Nzambe abongiseli biso makambo ma­na manso ! 3b Nakokundola naino ndoto nalotoki mpo ya makambo mana ; mpe manso masalemi solo : 3c Mwa moluka moke mokomi ebale enene, mwinda, mwese na mai maike. Ebale ezali Ester, oyo mokonzi abalaki mpe akomisaki mwasi mokonzi. 3d Bibuki bibale bya nyama bizali : Aman na ngai. 3e Bikolo bina bizali bikolo biye binso bisanganaki mpo ya kosilisa nkombo ya ba-Yuda. 3f Ekolo ya ngai ezali Israel, baye babelelaki Nzambe mpe babiki. Solo, Mokonzi abikisi bato ba ekolo ya ye, alongoli biso o mpasi ina inso, asali bilembo mpe makamwisi manene, maye mamononi epai ya bapagano te. 3g Yango wana Nzambe aponi nzela ibale, yoko ya ekolo ya bato ba Nzambe, esusu ya bikolo bisusu. 3h Nzela ina ibale imononi polele, bobele o ngonga, o nta­ngo mpe o mokolo Nzambe akanaki mpo ya bikolo binso. 3i Nzambe akanisi bato ba ekolo ya ye, mpe alongisi bango. 3j Bongo mikolo mina, mya zomi na minei mpe mya zomi na mitano, mya sanza Adar mizala o Israel mikolo mya kosangana likita, mya kolakisa esengo mpe nsai o miso ma Nzambe ; ezala bongo o bileko binso seko o ekolo ya ye Israel. » 3k O mobu mwa minei mwa boko­nzi bwa Tolemeo na Kleopatra, Doziteo, oyo azalaki komitanga nganga Nzambe mpe mo-Levi, elongo na mwana wa ye Tolemeo, bayei na monkanda moye motali eyenga ya Purim. Balobi ’te ezalaki solo monkanda mwango : Lizimake, mwana wa Tolemeo, moto wa lisanga lya Yeruzalem, abongoli mwango o lokota la ba-Greki.