ABPGRK - I John

Chapter 1

1:1  ο ην απ΄ αρχής ο ακηκόαμεν ο εωράκαμεν τοις οφθαλμοίς ημών ο εθεασάμεθα και αι χείρες ημών εψηλάφησαν περί του λόγου της ζωής

1:2  και η ζωή εφανερώθη και εωράκαμεν και μαρτυρούμεν και καταγγέλλομεν υμίν την ζωήν την αιώνιον ήτις ην προς τον πατέρα και εφανερώθη ημίν

1:3  ο εωράκαμεν και ακηκόαμεν απαγγέλλομεν υμίν ίνα και υμείς κοινωνίαν έχητε μεθ΄ ημών και η κοινωνία δε η ημετέρα μετά του πατρός και μετά του υιού αυτού Ιησού χριστού

1:4  και ταύτα γράφομεν υμίν ίνα η χαρά ημών η πεπληρωμένη

1:5  και αύτη εστίν η επαγγελία ην ακηκόαμεν απ΄ αυτού και αναγγέλλομεν υμίν ότι ο θεός φως εστί και σκοτία εν αυτώ ουκ έστιν ουδεμία

1:6  εάν είπωμεν ότι κοινωνίαν έχομεν μετ΄ αυτού και εν τω σκότει περιπατώμεν ψευδόμεθα και ου ποιούμεν την αλήθειαν

1:7  εάν δε εν τω φωτί περιπατώμεν ως αυτός εστιν εν τω φωτί κοινωνίαν έχομεν μετ΄ αλλήλων και το αίμα Ιησού χριστού του υιού αυτού καθαρίζει ημάς από πάσης αμαρτίας

1:8  εάν είπωμεν ότι αμαρτίαν ουκ έχομεν εαυτούς πλανώμεν και η αλήθεια ουκ έστιν εν ημίν

1:9  εάν ομολογώμεν τας αμαρτίας ημών πιστός εστι και δίκαιος ίνα αφή ημίν τας αμαρτίας και καθαρίση ημάς από πάσης αδικίας

1:10  εάν είπωμεν ότι ουχ ημαρτήκαμεν ψεύστην ποιούμεν αυτόν και ο λόγος αυτού ουκ έστιν εν ημίν

Chapter 2

2:1  τεκνία μου ταύτα γράφω υμίν ίνα μη αμάρτητε και εάν τις αμάρτη παράκλητον έχομεν προς τον πατέρα Ιησούν χριστόν δίκαιον

2:2  και αυτός ιλασμός εστι περί των αμαρτιών ημών ου περί των ημετέρων δε μόνον αλλά και περί όλου του κόσμου

2:3  και εν τούτω γινώσκομεν ότι εγνώκαμεν αυτόν εάν τας εντολάς αυτού τηρώμεν

2:4  ο λέγων έγνωκα αυτόν και τας εντολάς αυτού μη τηρών ψεύστης εστί και εν τούτω η αλήθεια ουκ έστιν

2:5  ος δ΄ αν τηρή αυτού τον λόγον αληθώς εν τούτω η αγάπη του θεού τετελείωται εν τούτω γινώσκομεν ότι εν αυτώ εσμέν

2:6  ο λέγων εν αυτώ μένειν οφείλει καθώς εκείνος περιεπάτησε και αυτός ούτω περιπατείν

2:7  αδελφοί ουκ εντολήν καινήν γράφω υμίν αλλ΄ εντολήν παλαιάν ην είχετε απ΄ αρχής η εντολή η παλαιά εστιν ο λόγος ον ηκούσατε απ΄ αρχής

2:8  πάλιν εντολήν καινήν γράφω υμίν ο εστιν αληθές εν αυτώ και εν υμίν ότι η σκοτία παράγεται και το φως το αληθινόν ήδη φαίνει

2:9  ο λέγων εν τω φωτί είναι και τον αδελφόν αυτού μισών εν τη σκοτία εστίν έως άρτι

2:10  ο αγαπών τον αδελφόν αυτού εν τω φωτί μένει και σκάνδαλον εν αυτώ ουκ έστιν

2:11  ο δε μισών τον αδελφόν αυτού εν τη σκοτία εστί και εν τη σκοτία περιπατεί και ουκ οίδε που υπάγει ότι η σκοτία ετύφλωσε τους οφθαλμούς αυτού

2:12  γράφω υμίν τεκνία ότι αφέωνται υμίν αι αμαρτίαι διά το όνομα αυτού

2:13  γράφω υμίν πατέρες ότι εγνώκατε τον απ΄ αρχής γράφω υμίν νεανίσκοι ότι νενικήκατε τον πονηρόν γράφω υμίν παιδία ότι εγνώκατε τον πατέρα

2:14  έγραψα υμίν πατέρες ότι εγνώκατε τον απ΄ αρχής έγραψα υμίν νεανίσκοι ότι ισχυροί εστε και ο λόγος του θεού εν υμίν μένει και νενικήκατε τον πονηρόν

2:15  μη αγαπάτε τον κόσμον μηδέ τα εν τω κόσμω εάν τις αγαπά τον κόσμον ουκ έστιν η αγάπη του πατρός εν αυτώ

2:16  ότι παν το εν τω κόσμω η επιθυμία της σαρκός και η επιθυμία των οφθαλμών και η αλαζονεία του βίου ουκ έστιν εκ του πατρός αλλ΄ εκ του κόσμου εστί

2:17  και ο κόσμος παράγεται και η επιθυμία αυτού ο δε ποιών το θέλημα του θεού μένει εις τον αιώνα

2:18  παιδία εσχάτη ώρα εστί και καθώς ηκούσατε ότι ο αντίχριστος έρχεται και νυν αντίχριστοι πολλοί γεγόνασιν όθεν γινώσκομεν ότι εσχάτη ώρα εστίν

2:19  εξ ημών εξήλθον αλλ΄ ουκ ήσαν εξ ημών ει γαρ ήσαν εξ ημών μεμενήκεισαν αν μεθ΄ ημών αλλ΄ ίνα φανερωθώσιν ότι ουκ εισί πάντες εξ ημών

2:20  και υμείς χρίσμα έχετε από του αγίου και οίδατε πάντα

2:21  ουκ έγραψα υμίν ότι ουκ οίδατε την αλήθειαν αλλ΄ ότι οίδατε αυτήν και ότι παν ψεύδος εκ της αληθείας ουκ έστι

2:22  τις εστιν ο ψεύστης ει μη ο αρνούμενος ότι Ιησούς ουκ έστιν ο χριστός ούτός εστιν ο αντίχριστος ο αρνούμενος τον πατέρα και τον υιόν

2:23  πας ο αρνούμενος τον υιόν ουδέ τον πατέρα έχει

2:24  υμείς ούν ο ηκούσατε απ΄ αρχής εν υμίν μενέτω εάν εν υμίν μείνη ο απ΄ αρχής ηκούσατε και υμείς εν τω υιώ και εν τω πατρί μενείτε

2:25  και αύτη εστίν η επαγγελία ην αυτός επηγγείλατο ημίν την ζωήν την αιώνιον

2:26  ταύτα έγραψα υμίν περί των πλανώντων υμάς

2:27  και υμείς το χρίσμα ο ελάβετε απ΄ αυτού εν υμίν μένει και ου χρείαν έχετε ίνα τις διδάσκη υμάς αλλ΄ ως το αυτό χρίσμα διδάσκει υμάς περί πάντων και αληθές εστι και ουκ έστι ψεύδος και καθώς εδίδαξεν υμάς μενείτε εν αυτώ

2:28  και νυν τεκνία μένετε εν αυτώ ίνα όταν φανερωθή έχωμεν παρρησίαν και μη αισχυνθώμεν απ΄ αυτού εν τη παρουσία αυτού

2:29  εάν είδητε ότι δίκαιός εστι γινώσκετε ότι πας ο ποιών την δικαιοσύνην εξ αυτού γεγέννηται

Chapter 3

3:1  ίδετε ποταπήν αγάπην δέδωκεν ημίν ο πατήρ ίνα τέκνα θεού κληθώμεν διά τούτο ο κόσμος ου γινώσκει ημάς ότι ουκ έγνω αυτόν

3:2  αγαπητοί νυν τέκνα θεού εσμέν και ούπω εφανερώθη τι εσόμεθα οίδαμεν δε ότι εάν φανερωθή όμοιοι αυτώ εσόμεθα ότι οψόμεθα αυτόν καθώς εστι

3:3  και πας ο έχων την ελπίδα ταύτην επ΄ αυτώ αγνίζει εαυτόν καθώς εκείνος αγνός εστι

3:4  πας ο ποιών την αμαρτίαν και την ανομίαν ποιεί και η αμαρτία εστίν η ανομία

3:5  και οίδατε ότι εκείνος εφανερώθη ίνα τας αμαρτίας ημών άρη και αμαρτία εν αυτώ ουκ έστι

3:6  πας ο εν αυτώ μένων ουχ αμαρτάνει πας ο αμαρτάνων ουχ εώρακεν αυτόν ουδέ έγνωκεν αυτόν

3:7  τεκνία μηδείς πλανάτω υμάς ο ποιών την δικαιοσύνην δίκαιός εστι καθώς εκείνος δίκαιός εστιν

3:8  ο ποιών την αμαρτίαν εκ του διαβόλου εστίν ότι απ΄ αρχής ο διάβολος αμαρτάνει εις τούτο εφανερώθη ο υιός του θεού ίνα λύση τα έργα του διαβόλου

3:9  πας ο γεγεννημένος εκ του θεού αμαρτίαν ου ποιεί ότι σπέρμα αυτού εν αυτώ μένει και ου δύναται αμαρτάνειν ότι εκ του θεού γεγέννηται

3:10  εν τούτω φανερά εστι τα τέκνα του θεού και τα τέκνα του διαβόλου πας ο μη ποιών δικαιοσύνην ουκ έστι εκ του θεού και ο μη αγαπών τον αδελφόν αυτού

3:11  ότι αύτη εστίν η αγγελία ην ηκούσατε απ΄ αρχής ίνα αγαπώμεν αλλήλους

3:12  ου καθώς Καϊν εκ του πονηρού ην και έσφαξε τον αδελφόν αυτού και χάριν τίνος έσφαξεν αυτόν ότι τα έργα αυτού πονηρά ην τα δε του αδελφού αυτού δίκαια

3:13  μη θαυμάζετε αδελφοί μου ει μισεί υμάς ο κόσμος

3:14  ημείς οίδαμεν ότι μεταβεβήκαμεν εκ του θανάτου εις την ζωήν ότι αγαπώμεν τους αδελφούς ο μη αγαπών τον αδελφόν μένει εν τω θανάτω

3:15  πας ο μισών τον αδελφόν αυτού ανθρωποκτόνος εστί και οίδατε ότι πας ανθρωποκτόνος ουκ έχει ζωήν αιώνιον εν αυτώ μένουσαν

3:16  εν τούτω εγνώκαμεν την αγάπην του θεού ότι εκείνος υπέρ ημών την ψυχήν αυτού έθηκε και ημείς οφείλομεν υπέρ των αδελφών τας ψυχάς τιθέναι

3:17  ος δ΄ αν έχη τον βίον του κόσμου και θεωρή τον αδελφόν αυτού χρείαν έχοντα και κλείση τα σπλάγχνα αυτού απ΄ αυτού πως η αγάπη του θεού μένει εν αυτώ

3:18  τεκνία μου μη αγαπώμεν λόγω μηδέ γλώσση αλλ΄ έργω και αληθεία

3:19  και εν τούτω γινώσκομεν ότι εκ της αληθείας εσμέν και έμπροσθεν αυτού πείσομεν τας καρδίας ημών

3:20  ότι εάν καταγινώσκη ημών η καρδία ότι μείζων εστίν ο θεός της καρδίας ημών και γινώσκει πάντα

3:21  αγαπητοί εάν η καρδία ημών μη καταγινώσκη ημών παρρησίαν έχομεν προς τον θεόν

3:22  και ο εάν αιτώμεν λαμβάνομεν παρ΄ αυτού ότι τας εντολάς αυτού τηρούμεν και τα αρεστά ενώπιον αυτού ποιούμεν

3:23  και αύτη εστίν η εντολή αυτού ίνα πιστεύσωμεν τω ονόματι του υιού αυτού Ιησού χριστού και αγαπώμεν αλλήλους καθώς έδωκεν εντολήν

3:24  και ο τηρών τας εντολάς αυτού εν αυτώ μένει και αυτός εν αυτώ και εν τούτω γινώσκομεν ότι μένει εν ημίν εκ του πνεύματος ου ημίν έδωκεν

Chapter 4

4:1  αγαπητοί μη παντί πνεύματι πιστεύετε αλλά δοκιμάζετε τα πνεύματα ει εκ του θεού εστίν ότι πολλοί ψευδοπροφήται εξεληλύθασιν εις τον κόσμον

4:2  εν τούτω γινώσκετε το πνεύμα του θεού παν πνεύμα ο ομολογεί Ιησούν χριστόν εν σαρκί εληλυθότα εκ του θεού εστί

4:3  και παν πνεύμα ο μη ομολογεί τον Ιησούν χριστόν εν σαρκί εληλυθότα εκ του θεού ουκ έστι και τούτό εστι το του αντιχρίστου ο ακηκόατε ότι έρχεται και νυν εν τω κόσμω εστίν ήδη

4:4  υμείς εκ του θεού εστέ τεκνία και νενικήκατε αυτούς ότι μείζων εστίν ο εν υμίν η ο εν τω κόσμω

4:5  αυτοί εκ του κόσμου εισί διά τούτο εκ του κόσμου λαλούσι και ο κόσμος αυτών ακούει

4:6  ημείς εκ του θεού εσμέν ο γινώσκων τον θεόν ακούει ημών ος ουκ έστιν εκ του θεού ουκ ακούει ημών εκ τούτου γινώσκομεν το πνεύμα της αληθείας και το πνεύμα της πλάνης

4:7  αγαπητοί αγαπώμεν αλλήλους ότι η αγάπη εκ του θεού εστί και πας ο αγαπών εκ του θεού γεγέννηται και γινώσκει τον θεόν

4:8  ο μη αγαπών ουκ έγνω τον θεόν ότι ο θεός αγάπη εστίν

4:9  εν τούτω εφανερώθη η αγάπη του θεού εν ημίν ότι τον υιόν αυτού τον μονογενή απέσταλκεν ο θεος εις τον κόσμον ίνα ζήσωμεν δι΄ αυτού

4:10  εν τούτω εστίν η αγάπη ουχ ότι ημείς ηγάπησαμεν τον θεόν αλλ΄ ότι αυτός ηγάπησεν ημάς και απέστειλε τον υιόν αυτού ιλασμόν περί των αμαρτιών ημών

4:11  αγαπητοί ει ούτως ο θεός ηγάπησεν ημάς και ημείς οφείλομεν αλλήλους αγαπάν

4:12  θεόν ουδείς πώποτε τεθέαται εάν αγαπώμεν αλλήλους ο θεός εν ημίν μένει και η αγάπη αυτού τετελειωμένη εστίν εν ημίν

4:13  εν τούτω γινώσκομεν ότι εν αυτώ μένομεν και αυτός εν ημίν ότι εκ του πνεύματος αυτού δέδωκεν ημίν

4:14  και ημείς τεθεάμεθα και μαρτυρούμεν ότι ο πατήρ απέσταλκε τον υιόν σωτήρα του κόσμου

4:15  ος αν ομολογήση ότι Ιησούς εστίν ο υιός του θεού ο θεός εν αυτώ μένει και αυτός εν τω θεώ

4:16  και ημείς εγνώκαμεν και πεπιστεύκαμεν την αγάπην ην έχει ο θεός εν ημίν ο θεός αγάπη εστί και ο μένων εν τη αγάπη εν τω θεώ μένει και ο θεός εν αυτω

4:17  εν τούτω τετελείωται η αγάπη μεθ΄ ημών ίνα παρρησίαν έχωμεν εν τη ημέρα της κρίσεως ότι καθώς εκείνός εστι και ημείς εσμέν εν τω κόσμω τούτω

4:18  φόβος ουκ έστιν εν τη αγάπη αλλ΄ η τελεία αγάπη έξω βάλλει τον φόβον ότι ο φόβος κόλασιν έχει ο δε φοβούμενος ου τετελείωται εν αγάπη

4:19  ημείς αγαπώμεν αυτόν ότι αυτός πρώτος ηγάπησεν ημάς

4:20  εάν τις είπη ότι αγαπώ τον θεόν και τον αδελφόν αυτού μισή ψεύστης εστίν ο γαρ μη αγαπών τον αδελφόν αυτού ον εώρακε τον θεόν ον ουχ εώρακε πως δύναται αγαπάν

4:21  και ταύτην την εντολήν έχομεν απ΄ αυτού ίνα ο αγαπών τον θεόν αγαπά και τον αδελφόν αυτού

Chapter 5

5:1  πας ο πιστεύων ότι Ιησούς εστίν ο χριστός εκ του θεού γεγέννηται και πας ο αγαπών τον γεννήσαντα αγαπά και τον γεγεννημένον εξ αυτού

5:2  εν τούτω γινώσκομεν ότι αγαπώμεν τα τέκνα του θεού όταν τον θεόν αγαπώμεν και τας εντολάς αυτού τηρώμεν

5:3  αύτη γαρ εστιν η αγάπη του θεού ίνα τας εντολάς αυτού τηρώμεν και αι εντολαί αυτού βαρείαι ουκ εισίν

5:4  ότι παν το γεγεννημένον εκ του θεού νικά τον κόσμον και αύτη εστίν η νίκη η νικήσασα τον κόσμον η πίστις ημών

5:5  τις εστιν ο νικών τον κόσμον ει μη ο πιστεύων ότι Ιησούς εστίν ο υιός του θεού

5:6  ούτός εστιν ο ελθών δι΄ ύδατος και αίματος Ιησούς ο χριστός ουκ εν τω ύδατι μόνον αλλ΄ εν τω ύδατι και τω αίματι και το πνεύμά εστι το μαρτυρούν ότι το πνεύμά εστιν η αλήθεια

5:7  ότι τρεις εισίν οι μαρτυρούντες εν τω ουρανώ ο πατήρ και ο λόγος και το άγιον πνεύμα και οι τρεις εις εν εισι και τρεις εισίν οι μαρτυρούντες επί της γης

5:8  το πνεύμα και το ύδωρ και το αίμα και οι τρεις εις το εν εισιν

5:9  ει την μαρτυρίαν των ανθρώπων λαμβάνομεν η μαρτυρία του θεού μείζων εστίν ότι αύτη εστίν η μαρτυρία του θεού ην μεμαρτύρηκε περί του υιού αυτού

5:10  ο πιστεύων εις τον υιόν του θεού έχει την μαρτυρίαν εν εαυτώ ο μη πιστεύων τω θεώ ψεύστην πεποίηκεν αυτόν ότι ου πεπίστευκεν εις την μαρτυρίαν ην μεμαρτύρηκεν ο θεός περί του υιού αυτού

5:11  και αύτη εστίν η μαρτυρία ότι ζωήν αιώνιον έδωκεν ημίν ο θεός και αύτη η ζωή εν τω υιώ αυτού εστίν

5:12  ο έχων τον υιόν έχει την ζωήν ο μη έχων τον υιόν του θεού την ζωήν ουκ έχει

5:13  ταύτα έγραψα υμίν τοις πιστεύουσιν εις το όνομα του υιού του θεού ίνα ειδήτε ότι ζωήν αιώνιον έχετε και ίνα πιστεύητε εις το όνομα του υιού του θεού

5:14  και αύτη εστίν η παρρησία ην έχομεν προς αυτόν ότι εάν τι αιτώμεθα κατά το θέλημα αυτού ακούει ημών

5:15  και εάν οίδαμεν ότι ακούει ημών ο αν αιτώμεθα οίδαμεν ότι έχομεν τα αιτήματα α ητήκαμεν παρ΄ αυτού

5:16  εάν τις ίδη τον αδελφόν αυτού αμαρτάνοντα αμαρτίαν μη προς θάνατον αιτήσει και δώσει αυτώ ζωήν τοις αμαρτάνουσι μη προς θάνατον έστιν αμαρτία προς θάνατον ου περί εκείνης λέγω ίνα ερωτήση

5:17  πάσα αδικία αμαρτία εστί και έστιν αμαρτία ου προς θάνατον

5:18  οίδαμεν ότι πας ο γεγεννημένος εκ του θεού ουχ αμαρτάνει αλλ΄ ο γεννηθείς εκ του θεού τηρεί εαυτόν και ο πονηρός ουχ άπτεται αυτού

5:19  οίδαμεν ότι εκ του θεού εσμέν και ο κόσμος όλος εν τω πονηρώ κείται

5:20  οίδαμεν δε ότι ο υιός του θεού ήκει και δέδωκεν ημίν διάνοιαν ίνα γινώσκωμεν τον αληθινόν και εσμεν εν τω αληθινώ εν τω υιώ αυτού Ιησού χριστώ ούτός εστιν ο αληθινός θεός και η ζωή αιώνιος

5:21  τεκνία φυλάξατε εαυτούς από των ειδώλων αμήν