Azeri - I John

Chapter 1

1:1  حيات سؤزو حاقّيندا سئزه اعلان ادئرئک؛ ازلدن بري وار اولان حاقّيندا، اونو اشئتدئيئمئز، گؤزلرئمئزله گؤردويوموز، باخديغيميز و اَل​لرئمئزله حئسّ اتدئيئمئز حاقّيندا.

1:2  حيات ظاهئر اولوندو. اونو گؤردوک و اونا شهادت ورئرئک. سئزه ابدي حياتي اعلان ادئرئک کي، آتا ائله بئرلئکده ائدي و بئزه ظاهئر اولوندو.

1:3  بئز سئزه گؤردويوموز و اشئتدئيئمئزي اعلان ادئرئک کي، سئزئن ده بئزئمله رفاقتئنئز اولسون و بئزئم رفاقتئمئز آتا و اونون اوغلو عئسا مسئحله‌دئر.

1:4  بونلاري سئزه يازيريق کي، شادليغيميز کامئل اولسون.

1:5  مسئحدن اشئتدئيئمئز و سئزه اعلان اتدئيئمئز خبر بودور کي، تاري نوردور و اوندا قارانليق اصلا يوخدور.

1:6  اگر ديئرئک کي، "اونونلا رفاقتئمئز وار"، حال بو کي، قارانليقدا گزئرئک، يالان دانيشيريق و حقئقته عمل اتمئرئک.

1:7  آمّا اگر اونون نوردا اولدوغو کئمي، بئز ده نوردا گزئرئک، اوندا بئربئرئمئزله رفاقتئمئز وار و اونون اوغلو عئسا مسئحئن قاني بئزي هر گوناهدان تمئزله‌يئر.

1:8  اگر گوناهسيز اولدوغوموزو ائدّئعا ادئرئک، اؤزوموزو آلداديريق و بئزده دوغرولوق يوخدور.

1:9  اگر گوناهلاريميزا اعتئراف ادک، او صادئق و صالحدئر کي، بئزئم گوناهلاريميزي بئزه باغيشلاسين و بئزي هر يامانليقدان تمئزله‌سئن.

1:10  اگر ديئرئک کي، گوناه اتمه​مئشئک، اونو يالانچي گؤرسه‌دئرئک و اونون سؤزو بئزده يوخدور.

Chapter 2

2:1  اؤولادلاريم، بونلاري سئزه يازيرام کي، گوناه اتمه‌يه​سئنئز. اگر بئري گوناها باتسا بله، آتانين يانيندا شفاعت اده‌نئمئز وار، يعني صالح اولان عئسا مسئح.

2:2  او اؤزو، گوناهلاريميزي باغيشلادان قورباندير؛ آنجاق تک بئزئم گوناهلاريميزي يوخ، بوتون دونيانين گوناهلاريني باغيشلادان.

2:3  اونو تانيديغيميزي بوندان بئلئرئک کي، اونون امرلرئني يرئنه يتئرئرئک.

2:4  هرکس کي، "اونو تاني‌ييرام" ديئر، آمّا اونون امرلرئني يرئنه يتئرمئر، او يالانچيدير و اوندا دوغرولوق يوخدور.

2:5  لاکئن هرکس کي، اونون سؤزونو يرئنه يتئرئر، تاري محبّتي اوندا حقئقتن کامئل اولوب. بوندان بئلئرئک کي، اونداييق.

2:6  هرکس کي، اوندا ياشاديغيني ائدّئعا ادئر، او دا گرک عئسانين رفتار اتدئيي کئمي رفتار اتسئن.

2:7  عزئزلر، سئزه تزه بئر حؤکم يازميرام؛ قدئم حؤکمو يازيرام کي، باشلانيشدان بري اونا مالئک ائدئنئز. قدئم حؤکم باشلانيشدان بري او سؤزدور کي، اونو اشئتدئنئز.

2:8  گئنه ده، سئزه تزه بئر حؤکم يازيرام؛ بونون دوغرو اولدوغو هم مسئحده، هم ده سئزده گؤرونور، چونکي قارانليق کچئر و حقئقي نور ائندئدن پارلايير.

2:9  هرکس کي، نوردا اولدوغونو ديئر، لاکئن قارداشيندان نئفرت ادئر، ائندئيه کئمي قارانليقدادير.

2:10  قارداشيني سون نوردا ياشايير و اوندا بودره‌دن بئر شي يوخدور.

2:11  آمّا قارداشيندان نئفرت ادن قارانليقدادير و قارانليقدا گزئر؛ هارايا گتدئيئني بئلمئر، چونکي قارانليق اونون گؤزلرئني کور ادئب.

2:12  اي اؤولادلار، سئزه يازيرام، چونکي اونون آدينين خاطئرئنه گوناهلارينيز باغيشلانيب.

2:13  آتالار، سئزه يازيرام، چونکي باشلانيشدان بري وار اولاني تاني‌ييرسينيز. اي جاوان اوغلانلار، سئزه يازيرام، چونکي شرئره قالئب گلدئنئز، اوشاقلار، سئزه يازيرام، چونکي آتاني تاني‌ييرسينيز.

2:14  اي آتالار، سئزه يازديم، چونکي باشلانيشدان اولاني تاني‌ييرسينيز. جاوان اوغلانلار، سئزه يازديم، چونکي گوجلوسونوز و تارينين کلامي سئزده ياشايير. شرئره ده قالئب گلدئنئز.

2:15  دونياني و دونيادا اولان شيلري سومه‌‌يئن. دونياني سون آدامدا آتانين محبّتي يوخدور.

2:16  چونکي دونيادا اولان هر شي، ائنسانين جئسماني طبئعتئنئن هوسلري، گؤزلرئن هوسلري، و دونيانين تکبّورو آتادان يوخ، دونياداندير.

2:17  دونيا و اونون هوسلري کچئر، لاکئن تارينين ائسته‌يئني يرئنه يتئرن ابده کئمي قالار.

2:18  اي اوشاقلار، آخير زاماندير. و اشئتدئيئنئز کئمي، مسئحئن ضئدّئنه اولان گلئر. اله ائندي ده، بئر چوخلو مسئحه ضئدّ اولانلار گلئبلر. بوندان بئلئرئک کي، آخير زاماندير.

2:19  اونلار بئزئم آراميزدان چيخديلار، آمّا بئزدن ديئلدئلر. اگر بئزدن اولسايديلار، بئزئمله قالارديلار. آمّا اونلار چيخديلار کي، هچ بئرئنئن بئزدن اولماماسي بئلئنسئن.

2:20  آمّا سئز موقدّس اولان طرفئندن مسح اولونوبسونوز و هر شيي بئلئرسئنئز.

2:21  من سئزه اونا گؤره يازماديم کي، حقئقتي بئلمئرسئنئز. اونا گؤره يازديم کي، حقئقتي بئلئرسئنئز، هچ يالان دا حقئقتدن ديئل.

2:22  اگر عئسانين مسئح اولدوغونو ائنکار ادن يالانچي ديئل، بس يالانچي کئمدئر؟ مسئحه ضئدّ اولان اودور کي، آتا و اوغولو ائنکار ادئر.

2:23  اوغولو ائنکار ادن هرکس آتادان دا محرومدور. لاکئن هرکس کي، اوغولا اولان ائمانيني ائقرار اتسه، آتا دا اونوندور.

2:24  قوي باشلانيشدان بري اشئتدئيئنئز سئزده قالسين. اگر باشلانيشدان بري اشئتدئيئنئز سئزده قالسا، سئز ده اوغول و آتادا قالارسينيز.

2:25  و اونون بئزه وعده وردئيي بودور، يعني ابدي حيات.

2:26  بونلاري سئزي يولدان چيخاردانلار باره​سئنده سئزه يازديم.

2:27  سئزه گلئنجه، اوندان آلديغينيز مسح سئزده قالير و احتئياجينيز يوخدور کي، کئمسه سئزه تعلئم ورسئن. لاکئن نجه کي، همن او مسح هر شيئن حاقّيندا سئزه تعلئم ورئر و يالان يوخ، دوغرودور دا، نجه کي، او سئزه تعلئم ورئب، اوندا قالين.

2:28  ائندي اؤولادلار، اوندا ياشايين کي، او ظوهور ادنده يقئنئمئز اولسون و او گلنده اونون قاباغيندا اوتانماياق.

2:29  اگر اونون صالح اولدوغونو بئلئرسئنئز، بئلئن کي، دوغرو اولاني يرئنه يتئرن هرکس اوندان دوغولوب.

Chapter 3

3:1  گؤرون آتا بئزه نه بؤيوک بئر محبّت گؤرسه‌دئب کي، تارينين اؤولادلاري آدلاناق! و بئز اله​يئک ده. دونيا اونو تانيماديغي اوچون بئزي ده تانيمير.

3:2  سوگئلئلر، ائندي بئز تارينين اؤولادلاري‌ييق، آمّا نه اولاجاغيميز حله ظاهئر اولونماييب. آنجاق بئلئرئک کي، مسئح ظوهور ادنده بئز اونا بنزه‌يه‌جه‌يئک، چونکي اونو، اولدوغو کئمي گؤره​جه‌يئک.

3:3  اونا بله اومئد باغلايان هرکس اؤزونو پاک ادئر، نجه کي، او پاکدير.

3:4  گوناه ادن هرکس شرئعتي ده آياق آلتينا قويور و گوناه شرئعته ضئدّ دورماقدير.

3:5  و سئز بئلئرسئنئز کي، او، گوناهلاري آرادان گؤتورمک اوچون ظوهور اتدي و اوندا هچ گوناه يوخدور.

3:6  اوندا قالان هرکس گوناه اتمز. گوناه ادن آدام نه اونو گؤروب، نه ده اونو تاني‌يير.

3:7  اؤولادلار، هچ کس سئزي آلداتماسين؛ صالحلئيه عمل ادن صالحدئر، نجه کي، او، صالحدئر.

3:8  گوناه ادن ائبلئسدندئر، چونکي باشلانيشدان گوناه ادن ائبلئسدئر. تارينين اوغلو دا بونا گؤره ظوهور اتدي کي، ائبلئسئن عمل​لرئني محو اتسئن.

3:9  تاريدان دوغولان آدام گوناه اتمز، چونکي تارينين توخومو اوندا ياشايير. او گوناه اده بئلمز، چونکي تاريدان دوغولوب.

3:10  کئمئن تارينين اؤولادي اولدوغو، کئمئن ده ائبلئسئن اؤولادي اولدوغو بوندان بلّي اولور: صالحلئيه عمل اتمه‌ين تاريدان ديئلدئر، قارداشيني سومه‌ين ده اِله‌دئر.

3:11  باشلانيشدان بري اشئتدئيئنئز خبر بودور کي، بئربئرئمئزي سوک.

3:12  شرئردن اولوب، قارداشيني اؤلدورن قاين کئمي اولماياق. قارداشيني نه اوچون اؤلدوردو؟ اونا گؤره اؤلدوردو کي، اؤز عمل​لري شر، لاکئن قارداشينين عمل​لري صالح ائدي.

3:13  قارداشلار، اگر دونيا سئزدن نئفرت ادئر، بونا تعجّوب اتمه‌يئن.

3:14  بئز بئلئرئک کي، قارداشلاريميزي سودئيئمئز اوچون اؤلومدن حياتا کچمئشئک. قارداشيني سومه‌ين اؤلومده قالير.

3:15  قارداشيندان نئفرت ادن هرکس قاتئلدئر. و سئز بئلئرسئنئز کي، هچ بئر قاتئل ابدي حياتا صاحئب اولا بئلمز.

3:16  محبّتئن نه اولدوغونو بئز بوندان بئلئرئک کي، او، اؤز جانيني بئزئم اوچون فدا اتدي. بئز ده اؤز جانيميزي قارداشلاريميز اوچون فدا اِتمه‌لي‌يئک.

3:17  اگر بئر آدام دونيا مالينا صاحئب اولوب، قارداشيني احتئياج ائچئنده گؤرسه، لاکئن اونا رحمي گلمه‌سه، اوندا تارينين محبّتي نجه اولا بئلر؟

3:18  اؤولادلار، سؤز و دئل​له يوخ، عمل و حقئقتله سوک.

3:19  بوندان حقئقته عاييد اولدوغوموزو بئله‌جه‌يئک و نه خوصوصدا کي، اوره‌يئمئز بئزي محکوم اتسه، اونون حوضوروندا اوره‌يئمئزي آرخايين اده‌جه‌يئک.

3:20  چونکي تاري بئزئم اوره‌يئمئزدن داها بؤيوکدور و هر شيي بئلئر.

3:21  سوگئلئلر، اگر اوره‌يئمئز بئزي محکوم اتمئر، او زامان تارينين حوضوروندا آرخايينيق

3:22  و اوندان هر نه آرزو ادئرئک، آليريق، چونکي اونون امرلرئني يرئنه يتئرئرئک و اونا مقبول اولان ائشلري گؤروروک.

3:23  اونون امري بودور کي، بئز اونون اوغلو عئسا مسئحئن آدينا ائمان گتئرک و بئربئرئمئزي اونون بئزه امر اتدئيي کئمي سوک.

3:24  و اونون امرلرئني يرئنه يتئرن اوندا، او دا اونلاردا قالير. روحون وسئله​سئله بئز بئلئرئک کي، او، بئزده ياشايير.

Chapter 4

4:1  سوگئلئلر، هر روحا ائنانمايين، آمّا روحلاري ائمتاحان ادئن کي، اونلارين تاريدان اولوب اولماديغيني بئله​سئنئز. چونکي دونيادا چوخ يالانچي پيغمبر ياييليب.

4:2  تارينين روحونو بله تاني‌يين: عئسا مسئحئن جئسمده گلدئيئني ائقرار ادن هر روح تاريداندير.

4:3  عئسا مسئحئن جئسمده گلدئيئني ائقرار اتمه‌ين هچ بئر روح تاريدان ديئل. بو، مسئحه ضئدّ اولانين روحودور کي، اونون گله​جه‌يئني اشئدئبسئنئز و ائندي اله دونيادادير.

4:4  سئز، اي اؤولادلار، سئز تاريدانسينيز و يالانچي پيغمبرلره قالئب گلئبسئنئز. چونکي سئزده اولان روح، دونيادا اولاندان بؤيوکدور.

4:5  اونلار دونيه‌وي‌دئرلر، بونا گؤره دانيشديغي شيلر ده دونيوئدئر و دونيا اونلارا قولاق آسير.

4:6  بئز تاريدانيق. تاريني تانييان بئزه قولاق آسير. تاريدان اولمايان بئزي اشئتمز. حقئقت روحونو و يالان روحونو بئز بوندان بئلئرئک.

4:7  اي سوگئلئلر، بئربئرئمئزي سوک، چونکي محبّت تاريداندير و محبّت ادن هرکس تاريدان دوغولوب و تاريني تاني‌يير.

4:8  محبّت اتمه‌ين تاريني تانيماييب، چونکي تاري سوگئدئر.

4:9  تارينين بئزه اولان محبّتي بله ظاهئر اولوب: تاري اؤز يگانه اوغلونو دونيايا گؤنده‌ردي کي، بئز اونون واسئطه​سئله ياشاياق.

4:10  محبّت بودور: نه کي، بئز تاريني سودئک. بو کي، او بئزي سودي و اؤز اوغلونو بئزئم گوناهلاريميز اوچون کفّاره گؤنده‌ردي.

4:11  سوگئلئلر، اگر تاري بئزي بله سودي، بئز ده گرک بئربئرئمئزي سوک.

4:12  تاريني هچ کئم، هچ زامان گؤرمه‌يئبدئر. اگر بئز بئربئرئمئزي سِوسَک، تاري بئزده ياشايير و اونون محبّتي بئزده کامئل اولور.

4:13  بئزئم اوندا ياشاديغيميزي، اونون دا بئزده ياشاديغيني بوندان بئلئرئک کي، او بئزه اؤز روحوندان ورئب.

4:14  بئز گؤرموشوک و شهادت ورئرئک کي، آتا اوغلونو دونيا اوچون قورتاريجي گؤنده‌ردي.

4:15  کئم ائقرار اتسه کي، عئسا تارينين اوغلودور، تاري اوندا، او دا تاريدا ياشايير.

4:16  و بئز تارينين بئزه اولان محبّتئني درک ادئب اونا ائنانميشيق. تاري محبّتدئر و محبّتده ياشايان تاريدا ياشايير، تاري دا اوندا ياشايير.

4:17  محبّت اونا گؤره بئزده کامئل اولوب کي، قئيامت گونونده يقئنئمئز اولسون. چونکي مسئح نجه‌دئر، بئز ده بو دونيادا اِله​يئک.

4:18  محبّتده قورخو يوخدور؛ عکسئنه، کامئل محبّت قورخونو قووار. چونکي قورخودا عذاب وار، قورخان دا محبّتده کامئل اولماييب.

4:19  بئز سوئرئک، چونکي اوّل او بئزي سوئب.

4:20  کئم دسه کي، من تاريني سوئرم، لاکئن اؤز قارداشيندان نئفرت اتسه، او يالانچي‌دير. چونکي گؤردويو قارداشيني سومه‌ين، گؤرمه‌دئيي تاريني سوه بئلمز.

4:21  بئزئم اوندان آلديغيميز امر بودور کي، تاريني سون گرک اؤز قارداشيني دا سوسئن.

Chapter 5

5:1  عئسانين مسئح اولدوغونا ائنانان هر کس تاريدان دوغولوب و آتاني سون هر کس اوندان دوغولاني دا سوئر.

5:2  بئز تارينين اؤولادلاريني سودئيئمئزي بوندان بئلئرئک: تاريني سوئب اونون امرلرئني يرئنه يتئرمکله.

5:3  چونکي تاريني سومک، تارينين امرلرئني يرئنه يتئرمکدئر. و اونون امرلري آغير ديئل.

5:4  چونکي تاريدان دوغولان هر کس دونيايا قالئب گلئر. و دونيايا قالئب گلن ظفر ائمانيميزدير.

5:5  دونيايا قالئب گلن کئمدئر، مگر او ديئل کي، عئسانين تاري اوغلو اولدوغونا ائنانير؟!

5:6  بودور او کي، سو و قانلا گلدي، يعني عئسا مسئح. او، آنجاق سو ائله يوخ، سو و قانلا گلدي.

5:7  روح دا بونا شهادت ورئر، چونکي روح حاقدير. اونا گؤره کي، اوچ شاهئد وار:

5:8  روح، سو، و قان. بونلارين اوچو ده بئربئرئنه موطابئقدئر.

5:9  بئز ائنسانلارين شهادتئني قبول ادئرئک، لاکئن تارينين شهادتي بوندان بؤيوکدور، چونکي تارينين وردئيي شهادتدئر کي، اؤز اوغلو حاقّيندا ورئب.

5:10  تارينين اوغلونا ائمان گتئرن اؤز-اؤزونده بو شهادتي وار. لاکئن تارييا ائمان گتئرمه‌ين اونو يالانچي گؤرسدئب، چونکي تارينين اؤز اوغلو حاقّيندا وردئيي شهادته ائنانماييبدير.

5:11  و شهادت بودور کي، تاري بئزه ابدي حيات ورئب و بو حيات اونون اوغلوندادير.

5:12  تارينين اوغلونا مالئک اولانين حياتي وار، لاکئن تارينين اوغلونا مالئک اولمايانين حياتي يوخدور.

5:13  بونلاري سئزه، تارينين اوغلونون آدينا ائنانانلارا يازميشام کي، ابدي حياتا مالئک اولدوغونوزو بئله​سئنئز.

5:14  و اونون حوضوروندا مالئک اولدوغوموز يقئن بوندان عئبارتدئر کي، اگر اونون ائراده​سئنه گؤره بئر شي طلب ادئرئک، او، بئزي اشئدئر.

5:15  و اگر بئلئرئک کي، او، بئزئم هر طلب اتدئيئمئزي اشئدئر، بونو دا بئلئرئک کي، اوندان طلب اتدئکلرئمئزي آلميشيق.

5:16  اگر کئمسه قارداشيني گؤرسه کي، اؤلومه آپارمايان گوناه ادئر، گرک دوعا اتسئن. تاري دا اونا حيات وره​جک. بونو اونلار حاقّيندا ديئرم کي، گوناهلاري اؤلومه آپاران ديئل. گوناه وار کي، اؤلومه آپارير. دمئرم کي، بو گوناه اوچون دوعا اتسئن.

5:17  هر جور صالحسئزلئک گوناهدير. لاکئن گوناه دا وار کي، اؤلومه آپاران ديئل.

5:18  بئلئرئک کي، تاريدان دوغولان هر کس گوناه اتمز. عکسئنه، تاريدان دوغولان اؤزونو ساخلار و شرئر اونا توخونا بئلمز.

5:19  بئز بئلئرئک کي، تاريدانيق، لاکئن بوتون دونيا شرئرئن حاکئمئيّتي آلتيندادير.

5:20  بونو دا بئلئرئک کي، تارينين اوغلو گلئب و بئزه فهم ورئب کي، حاق اولاني تانيياق. بئز اونداييق کي، حاقدير؛ اوغلو عئسا مسئحده. حقئقي تاري و ابدي حيات اودور.

5:21  اؤولادلار، اؤزونوزو بوتلردن قورويون.