Kekchi - I John

Chapter 1

1:1  Nintzˈi̱bac e̱riqˈuin chirix li Dios Cˈajolbej li cuan chalen chak saˈ xticlajic li ruchichˈochˈ. La̱o quikil riqˈuin xnakˈ ku ut coa̱tinac riqˈuin. Quikil ru aˈan chi tzˈakal ut xkachˈeˈ riqˈuin kukˈ. Aˈan aˈin li A̱tin naqˈuehoc yuˈam.

1:2  Quicˈutbesi̱c chiku li naqˈuehoc yuˈam. Quikil ru aˈan. Joˈcan nak nakachˈolob xya̱lal che̱ru chirix aˈan, li naqˈuehoc yuˈam chi junelic. Aˈan li cuan chak riqˈuin li Acuabej Dios. Aˈan quixcˈutbesi rib chiku.

1:3  Nakachˈolob xya̱lal che̱ru chirix li cˈaˈru quikil ut li cˈaˈru quikabi re nak tocua̱nk chi sum a̱tin chi kibil kib. Ut tocua̱nk ajcuiˈ chi sum a̱tin riqˈuin li Acuabej Dios ut riqˈuin li Jesucristo, li Ralal.

1:4  Saˈ li hu aˈin nakatakla xyebal e̱re re nak chitzˈaklok ru lix sahil e̱chˈo̱l che̱junilex, joˈ ajcuiˈ lix sahil kachˈo̱l la̱o.

1:5  Aˈan aˈin li a̱tin quikabi riqˈuin li Jesucristo. Ut aˈan li nakachˈolob xya̱lal che̱ru. Li Dios, aˈan li cutan saken. Riqˈuin li Dios ma̱cˈaˈ kˈojyi̱n. Ti̱c ban xchˈo̱l li Dios. Relic chi ya̱l nak ma̱cˈaˈ ma̱usilal riqˈuin.

1:6  Cui nakaye nak cuanco chi sum a̱tin riqˈuin li Dios ut cui toj nakaba̱nu li incˈaˈ us, yo̱co chi ticˈtiˈic. Ut incˈaˈ nakatzol kib chixba̱nunquil li ya̱l.

1:7  Ut cui nakaba̱nu li cˈaˈru naraj li Dios, joˈ naxcˈutbesi chiku li Cristo, cuanco chic chi sum a̱tin chi kibil kib. Ut lix quiqˈuel li Jesucristo li Ralal li Dios naxchˈajobresi li ka̱m ut narisi chixjunil li kama̱c.

1:8  Cui nakaye nak ma̱cˈaˈ kama̱c, nakabalakˈi kib ut moco ya̱l ta li yo̱co chixyebal.

1:9  Cui nakaxo̱to li kama̱c chiru li Dios, relic chi ya̱l nak aˈan ti̱c xchˈo̱l chixcuybal chixsachbal li kama̱c, ut ta̱risi chixjunil li kama̱usilal.

1:10  Cui ut nakaye nak incˈaˈ xoma̱cob nakaqˈue li Dios chokˈ aj ticˈtiˈ. Ut incˈaˈ nakapa̱b li ra̱tin.

Chapter 2

2:1  Ex inherma̱n, chanchanex li cualal incˈajol. Aˈ cˈaˈak re ru aˈin nintzˈi̱ba e̱re re nak incˈaˈ texma̱cobk. Cui ut cuan junak ta̱ma̱cobk, cuan jun aj jalol a̱tin chikix chiru li Acuabej Dios, aˈan li Jesucristo li ti̱c xchˈo̱l.

2:2  Li Jesucristo quicam re xtojbal rix li kama̱c. Moco caˈaj ta cuiˈ xban li kama̱c la̱o. Quicam aj ban cuiˈ re xtojbal rix xma̱queb chixjunileb li cuanqueb saˈ ruchichˈochˈ.

2:3  Cui la̱o nakaba̱nu li cˈaˈru naraj li Dios, relic chi ya̱l nak la̱o reho chic li Dios.

2:4  Li ani naxye, “La̱in rehin li Dios”, ut cui incˈaˈ naxba̱nu li cˈaˈru naraj li Dios, aˈan aj ticˈtiˈ. Moco ya̱l ta ru li yo̱ chixba̱nunquil.

2:5  Li ani napa̱ban re li ra̱tin li Dios, relic chi ya̱l nak naxra li Dios chi tzˈakal. Riqˈuin aˈan nakanau nak la̱o reho chic li Dios.

2:6  Li ani naxye nak re chic li Dios, tento nak junelic cha̱bilak lix yuˈam joˈ xyuˈam li Jesucristo.

2:7  Ex inherma̱n, moco toj acˈ ta li chakˈrab yo̱quin chixtzˈi̱banquil e̱riqˈuin. Aˈin aˈan ajcuiˈ li chakˈrab li quiqˈueheˈ chak e̱re junxil. Ac e̱rabiom chak chalen nak xepa̱b li Cristo.

2:8  Abanan chanchan acˈ ajcuiˈ li chakˈrab xban nak kˈaxal nim xcuanquil. Ut li chakˈrab aˈan, aˈin nak te̱ra e̱rib che̱ribil e̱rib. Joˈ quixba̱nu li Jesucristo, joˈcan ajcuiˈ takaba̱nu la̱o. Li ra̱tin li Jesucristo naxcutanobresi kanaˈleb. Nak nakacanab li ma̱cobc, chanchan nak yo̱ chi numecˈ li kˈojyi̱n. Ut nak nakapa̱b li ra̱tin li Jesucristo, chanchan nak yo̱ chi cha̱lc li cutan.

2:9  Li ani naxye nak xcutanobresi̱c lix naˈleb xban li Cristo, ut xicˈ naril lix herma̱n aˈan toj cuan ajcuiˈ saˈ xkˈojyi̱nal ru li ma̱c.

2:10  Li ani naxra lix herma̱n, aˈan cutanobresinbil lix naˈleb xban li Cristo. Ut ma̱ ani nachˈinan xchˈo̱l xban.

2:11  Li ani xicˈ naril lix herma̱n, aˈan toj yo̱ ajcuiˈ chi be̱c saˈ xkˈojyi̱nal ru li ma̱c. Ut incˈaˈ naxnau bar yo̱ chi xic xban nak li ma̱c naramoc re li xya̱lal chiru.

2:12  Nintzˈi̱bac e̱riqˈuin, ex herma̱n, xban nak cuybil sachbil chic le̱ ma̱c xban li Dios saˈ xcˈabaˈ li Jesucristo.

2:13  Nintzˈi̱bac ajcuiˈ e̱riqˈuin, la̱ex yucuaˈbej, xban nak ac xepa̱b li Dios Cˈajolbej li cuan chalen chak najter nak toj ma̱jiˈ naxyoˈobtesi chak li ruchichˈochˈ. Nintzˈi̱bac e̱riqˈuin la̱ex li toj sa̱jex xban nak xecuy xnumsinquil li a̱le̱c li naxqˈue laj tza. Ut nintzˈi̱bac ajcuiˈ e̱riqˈuin la̱ex cocˈal xban nak ac xepa̱b li Acuabej Dios.

2:14  Xintzˈi̱bac e̱riqˈuin la̱ex yucuaˈbej, xban nak ac xepa̱b li Dios Cˈajolbej li cuan chalen chak najter nak toj ma̱jiˈ naxyoˈobtesi chak li ruchichˈochˈ. Xintzˈi̱bac e̱riqˈuin la̱ex li toj sa̱jex, xban nak cau e̱rib ut li ra̱tin li Dios nacana chi junelic e̱riqˈuin ut xecuy xnumsinquil li a̱le̱c li naxqˈue laj tza.

2:15  Ex inherma̱n, me̱ra chic ru lix ma̱usilal li ruchichˈochˈ chi moco li cˈaˈak re ru cuan saˈ ruchichˈochˈ. Cui cuan junak naxra ru li cˈaˈak re ru aˈin, moco naxra ta li Acuabej Dios.

2:16  Chixjunil li ma̱usilal cuan saˈ ruchichˈochˈ moco riqˈuin ta li Dios nachal. Li ma̱c li naxrahi ru li tzˈejcualej ut li xrahinquil ru li cˈaˈak re ru nakil riqˈuin xnakˈ ku moco riqˈuin ta li Dios nachal. Joˈcan ajcuiˈ li kˈetkˈetil. Chixjunil aˈin moco riqˈuin ta li Dios nachal; xnaˈleb ban li ruchichˈochˈ.

2:17  Li ruchichˈochˈ ta̱osokˈ joˈ ajcuiˈ li ma̱usilal. Abanan li ani naba̱nun re li naraj li Dios, aˈan cua̱nk chi junelic.

2:18  Ex inherma̱n, yo̱ chak chi nachˈoc rosoˈjiqueb li cutan. Ac xerabi resil nak ta̱cha̱lk jun li xicˈ na-iloc re li Cristo. Aˈan li anticristo nayeman re. Ut anakcuan ac cuanqueb nabal li xicˈ nequeˈiloc re li Cristo. Joˈcan nak nakanau nak yo̱ chi cuulac xkˈehil rosoˈjiqueb li cutan.

2:19  Saˈ kaya̱nk xeˈel li xicˈ nequeˈiloc re li Cristo, abanan moco kech aj pa̱baneleb ta nak xeˈcuan. Cui ta eb aˈan kech aj pa̱banelil, cuanqueb raj chi junelic saˈ kaya̱nk. Abanan xeˈel saˈ kaya̱nk re nak ta̱nauma̱nk nak ma̱cuaˈeb kech aj pa̱banelil.

2:20  Ut la̱ex ac santobresinbilex xban li Santil Musikˈej li qˈuebil e̱re xban li Jesucristo, ut nequenau chic li xya̱lal.

2:21  Moco xban ta nak incˈaˈ nequenau li xya̱lal nak nintzˈi̱bac e̱riqˈuin. La̱ex nequenau li xya̱lal ut nequenau ajcuiˈ nak ma̱ jun ticˈtiˈ na-el saˈ li tzˈakal ya̱l.

2:22  ¿Ani laj ticˈtiˈ nak nequecˈoxla la̱ex? Aˈan li nayehoc re nak li Jesucristo, ma̱cuaˈ aˈan laj Colonel li yechiˈinbil xban li Dios. Li nayehoc re chi joˈcan, aˈan li anticristo li xicˈ na-iloc re li Cristo. Aˈan li natzˈekta̱nan re li Acuabej Dios ut li Cˈajolbej.

2:23  Li ani naxye nak li Jesucristo ma̱cuaˈ Ralal li Dios, li nayehoc re aˈan ma̱cˈaˈ li Acuabej Dios riqˈuin. Ut li ani naxye nak li Cristo, aˈan li tzˈakal Ralal li Dios, aˈan cuan li Acuabej Dios riqˈuin.

2:24  Li cˈaˈru xetzol chak chalen saˈ xticlajic le̱ pa̱ba̱l chicua̱nk saˈ le̱ chˈo̱l. Cui te̱cˈu̱la saˈ le̱ chˈo̱l li cˈaˈru xerabi chak chalen saˈ xticlajic le̱ pa̱ba̱l, cua̱nkex riqˈuin li Cˈajolbej ut riqˈuin li Acuabej Dios.

2:25  Li yuˈam ma̱cˈaˈ rosoˈjic, aˈan li naxyechiˈi ke li Jesucristo.

2:26  Nintzˈi̱ba aˈin e̱riqˈuin chirixeb li xicˈ nequeˈiloc re li Cristo xban nak eb aˈan teˈraj e̱balakˈinquil.

2:27  Abanan incˈaˈ tento ta̱cua̱nk junak aj tzolol e̱re re xcˈutbal che̱ru cˈaˈru li ya̱l ut cˈaˈru li incˈaˈ ya̱l xban nak qˈuebil e̱re li Santil Musikˈej xban li Jesucristo. Li Santil Musikˈej cuan e̱riqˈuin ut aˈan li naqˈuehoc e̱naˈleb. Li cˈaˈru naxcˈut che̱ru li Santil Musikˈej tzˈakal ya̱l. Moco ticˈtiˈ ta. Joˈcan nak chexcua̱nk chi sum a̱tin riqˈuin li Jesucristo joˈ naxcˈut che̱ru li Santil Musikˈej.

2:28  Ut anakcuan, ex herma̱n, ninye cuiˈchic e̱re nak chexcua̱nk chi sum a̱tin riqˈuin li Jesucristo re nak ma̱cˈaˈak le̱ xiu nak tol-e̱lk cuiˈchic li Ka̱cuaˈ Jesucristo. Sahak ban saˈ kachˈo̱l chixcˈulbal chi ma̱cˈaˈak kaxuta̱n.

2:29  La̱ex nequenau nak li Cristo ti̱c xchˈo̱l. Ut chenauhak ajcuiˈ nak chixjunileb li nequeˈba̱nun re li ti̱quilal, aˈan tzˈakal ralal xcˈajol li Dios.

Chapter 3

3:1  Cheqˈuehak retal nak li Acuabej Dios cˈajoˈ nocoxra. Nocoxqˈue chokˈ ralal xcˈajol. Relic chi ya̱l nak la̱o ralal xcˈajol. Joˈcan nak li ma̱jiˈ nequeˈpa̱ban incˈaˈ nequeˈxtau ru li kanaˈleb xban nak ma̱jiˈ nequeˈxnau xya̱lal xpa̱banquil li Dios.

3:2  Ex inherma̱n, anakcuan la̱o ralal xcˈajol li Dios. Abanan ma̱jiˈ nakanau joˈ qˈuial chic li usilal takacˈul mokon. Caˈaj cuiˈ nakanau nak tol-e̱lk li Jesucristo, chanchanako chic aˈan xban nak takil ru chi tzˈakal.

3:3  Li ani yo̱ chiroybeninquil lix cˈulunic li Cristo, aˈan naxsakobresi li ra̱m saˈ ti̱quilal joˈ li Ka̱cuaˈ Jesucristo ti̱c xchˈo̱l.

3:4  Li ani nama̱cob naxkˈet lix chakˈrab li Dios xban nak li ma̱cobc aˈan xkˈetbal li chakˈrab.

3:5  La̱ex nequenau nak li Ka̱cuaˈ Jesucristo quicˈulun re xcuybal ut xsachbal li kama̱c. Relic chi ya̱l nak aˈan ma̱cuaˈ aj ma̱c.

3:6  Joˈcan nak li ani cau xchˈo̱l chixta̱kenquil li Cristo, incˈaˈ chic yo̱k chi ma̱cobc. Abanan li ani toj yo̱ chi ma̱cobc incˈaˈ naxnau li rusilal li Cristo ut incˈaˈ napa̱ban.

3:7  Ex herma̱n, ma̱ ani chibalakˈi̱nk e̱re. Li ani naba̱nun re li ti̱quilal, aˈan ti̱c xchˈo̱l joˈ li Cristo ti̱c xchˈo̱l.

3:8  Li ani yo̱ chi ma̱cobc, aˈan re laj tza xban nak laj tza aˈan aj ma̱c chalen chak saˈ xticlajic li ruchichˈochˈ. Aˈan aj e nak col-e̱lk li Ralal li Dios re xsachbal xcˈanjel laj tza.

3:9  Ma̱ jun ralal xcˈajol li Dios yo̱k chi ma̱cobc xban nak li Dios cuan riqˈuin. Ut incˈaˈ naru nak yo̱k chi ma̱cobc xban nak aˈan tzˈakal ralal xcˈajol li Dios.

3:10  Riqˈuin aˈin naˈno̱queb ru li ralal xcˈajol li Dios ut naˈno̱queb ajcuiˈ ruheb li ralal xcˈajol laj tza: li ani incˈaˈ naxba̱nu li ti̱quilal, ut li ani incˈaˈ naxra li ras ri̱tzˈin, aˈan ma̱cuaˈeb ralal xcˈajol li Dios.

3:11  Chalen chak saˈ xticlajic le̱ pa̱ba̱l xerabi li chakˈrab nak chikarahak kib chi kibil kib.

3:12  Mikata̱ke xnaˈleb laj Caín xban nak aˈan re laj tza. Aˈan quixcamsi li ri̱tzˈin. ¿Cˈaˈut nak quixcamsi li ri̱tzˈin? Xban nak ti̱c xchˈo̱l li ri̱tzˈin chiru li Dios ut laj Caín junes ma̱usilal naxba̱nu.

3:13  Joˈcan ut ex inherma̱n, misach e̱chˈo̱l xbaneb li xicˈ nequeˈiloc e̱re saˈ ruchichˈochˈ.

3:14  Cui nakara li kaherma̱n, aˈan retalil nak cua̱nk kacolbal chiru xcuanquil li ca̱mc ut qˈuebil kayuˈam chi junelic. Li ani incˈaˈ naxra lix herma̱n, aˈan toj cuan rubel xcuanquil li ca̱mc.

3:15  Li ani xicˈ naril lix herma̱n, aˈan chanchan aj camsinel ras ri̱tzˈin. La̱ex nequenau nak junak aj camsinel ras ri̱tzˈin ma̱cˈaˈ xyuˈam chi junelic.

3:16  Li Jesucristo quixcˈut chiku chanru li rahoc nak quixkˈaxtesi rib chi ca̱mc saˈ kacˈabaˈ la̱o. Joˈcan ajcuiˈ nak tento takaraheb li kaherma̱n usta tocamsi̱k saˈ xcˈabaˈeb.

3:17  Jun chic ninye e̱re. Cui la̱o cuan nabal li cˈaˈru ke ut incˈaˈ nakatokˈoba ru li nebaˈ li ma̱cˈaˈ cuan re, ¿ma ya̱l ta biˈ nak nakara li Dios chi joˈcanan?

3:18  Ex inherma̱n, morahoc yal chi a̱tin. Chorahok ban chi tzˈakal ya̱l ut chicˈutu̱nk li karahom riqˈuin li usilal nakaba̱nu.

3:19  Cui nakara li kaherma̱n, nakanau nak la̱o tzˈakal ralal xcˈajol li Dios, ut cau kachˈo̱l chixpa̱banquil li Dios.

3:20  Cui la̱o nakecˈa nak xoma̱cob, ac cutan saken chiru li Ka̱cuaˈ Dios li nakaba̱nu xban nak aˈan chixjunil naxnau.

3:21  Cui incˈaˈ nakecˈa saˈ kachˈo̱l nak incˈaˈ us yo̱co, incˈaˈ nocoxucuac chiru li Dios.

3:22  Ut yalak cˈaˈru takatzˈa̱ma chiru, tixqˈue ke xban nak yo̱co chixpa̱banquil lix chakˈrab ut nakaba̱nu li cˈaˈru nacuulac chiru li Dios.

3:23  Ut aˈan aˈin lix chakˈrab quixqˈue ke li Dios, nak chopa̱ba̱nk saˈ xcˈabaˈ li Jesucristo li Ralal li Dios ut takara kib chi kibil kib, joˈ coxchakˈrabi cuiˈ.

3:24  Cui nakapa̱b lix chakˈrab, la̱o cuanco riqˈuin li Dios ut li Dios cuan kiqˈuin. Nakanau nak li Dios cuan kiqˈuin chi junelic xban li Santil Musikˈej li qˈuebil ke.

Chapter 4

4:1  Ex herma̱n, qˈuehomak retal nak moco chixjunil ta aj iqˈuin cuan li Santil Musikˈej. Nabaleb laj tzolonel aj balakˈ cuanqueb saˈ ruchichˈochˈ. Me̱pa̱b chixjunil li cˈaˈak re ru nequerabi riqˈuineb, usta ta̱yehekˈ e̱re nak riqˈuin li Dios xchal. Tento nak te̱tzˈil rix li te̱rabi re xnaubal ma riqˈuin li Dios xchal li nequeˈxye malaj incˈaˈ.

4:2  Chi joˈcaˈin naru te̱nau cui li Santil Musikˈej xqˈuehoc re li naˈleb malaj incˈaˈ. Li ani ta̱yehok re nak li Jesucristo quitzˈejcualoˈ ut tzˈakal cui̱nk nak quicˈulun saˈ ruchichˈochˈ, aˈan li cuan li Santil Musikˈej riqˈuin.

4:3  Ut li ani ta̱yehok re nak li Jesucristo incˈaˈ quitzˈejcualoˈ nak quicˈulun saˈ ruchichˈochˈ, aˈan ma̱cˈaˈ li Santil Musikˈej riqˈuin. Li naˈleb aˈan nachal riqˈuin li xicˈ na-iloc re li Cristo. Abanan ac e̱rabiom resil chirix nak tol-e̱lk li xicˈ na-iloc re li Cristo. Ut anakcuan li naˈleb aˈan ac yo̱ chi cˈulu̱nc saˈ ruchichˈochˈ.

4:4  Ex inherma̱n, la̱ex rehex chic li Dios. La̱ex xecuy ut xenau xcolbal e̱rib chiruheb laj balakˈ. Xecuy xban nak li Santil Musikˈej cuan e̱riqˈuin ut kˈaxal nim xcuanquil aˈan chiru laj tza li cuan riqˈuineb laj balakˈ.

4:5  Li naˈleb li cuan riqˈuineb laj balakˈ, aˈan yal re ruchichˈochˈ ut junes chirix aˈan nequeˈa̱tinac. Ut eb li incˈaˈ nequeˈxnau xya̱lal nequeˈrabi li incˈaˈ ya̱l li nequeˈxye ut nequeˈxpa̱b.

4:6  Abanan la̱o ralal xcˈajol li Dios. Ut eb li nequeˈpa̱ban re li Dios nocoeˈrabi. Ut eb li incˈaˈ nequeˈpa̱ban re li Dios incˈaˈ nequeˈraj kabinquil. Riqˈuin aˈan nacˈutun ani cuan li Santil Musikˈej riqˈuin ut ani cuan xmusikˈ laj balakˈ riqˈuin.

4:7  Ex inherma̱n, chikara kib chi kibil kib xban nak li rahoc riqˈuin li Dios nachal. Li ani narahoc, aˈan ralal li Dios ut naxba̱nu li naraj li Dios.

4:8  Ut li incˈaˈ narahoc ma̱cuaˈ ralal li Dios xban nak li rahoc riqˈuin li Dios nachal.

4:9  Li Dios quixcˈut chiku chanru nak nocoxra nak quixtakla chak lix junaj chi Alal saˈ ruchichˈochˈ chi ca̱mc saˈ kacˈabaˈ la̱o. Li Dios quixtakla chak li Ralal re nak ta̱cua̱nk kayuˈam chi junelic.

4:10  Li tzˈakal rahoc, aˈan aˈin: ma̱cuaˈo la̱o xorahoc re li Dios. Aˈan ban quirahoc ke la̱o xban nak quixtakla chak li Ralal chi ca̱mc re xtojbal rix li kama̱c.

4:11  Ex herma̱n, xban nak kˈaxal nocoxra li Dios, tento ajcuiˈ nak takara kib chi kibil kib la̱o.

4:12  Ma̱ jun qui-iloc ru li Dios. Abanan cui nakara kib chi kibil kib, li Dios cuan kiqˈuin chi junelic. Ut lix rahom li Dios tzˈaklojenak ru kiqˈuin.

4:13  Nakanau nak cuanco riqˈuin li Dios ut li Dios cuan kiqˈuin xban nak li Dios quixqˈue ke li Santil Musikˈej.

4:14  La̱o lix apóstol li Jesucristo. Quikil ru li Jesucristo. Ut nakachˈolob xya̱lal nak li Acuabej Dios quixtakla chak li Ralal chixcolbaleb li cuanqueb saˈ ruchichˈochˈ.

4:15  Li ani nachˈoloban re nak li Jesús, aˈan li Ralal li Dios, aˈan cuan riqˈuin li Dios, ut li Dios cuan riqˈuin aˈan.

4:16  La̱o nakapa̱b nak li Dios, aˈan aj rahonel ut nakanau nak ya̱l aˈan. Li rahoc nachal riqˈuin li Dios. Li ani narahoc, aˈan cuan riqˈuin li Dios ut li Dios cuan riqˈuin aˈan.

4:17  Riqˈuin aˈin ta̱tzˈaklok ru li rahoc kiqˈuin la̱o re nak cauhak kachˈo̱l saˈ xcutanquil li rakba a̱tin. Chanru xnaˈleb li Ka̱cuaˈ Jesucristo, joˈcanak ajcuiˈ li kanaˈleb la̱o nak cua̱nko arin saˈ ruchichˈochˈ.

4:18  Ma̱cˈaˈ kaxiu cui nakara li Dios chi tzˈakal. Li tzˈakal rahoc narisi li xiu. Li ani naxucuac, naxxucua lix tojbal rix lix ma̱c, ut li naxucuac toj ma̱jiˈ natzˈakloc ru li rahoc riqˈuin.

4:19  La̱o nakara li Dios xban nak aˈan xrahoc ke xbe̱n cua.

4:20  Cui junak naxye nak naxra li Dios ut xicˈ naril lix herma̱n, aˈan aj ticˈtiˈ. Li ani incˈaˈ naxra lix herma̱n li naril ru, ¿chan ta cuiˈ ru nak tixra li Dios li moco naril ta ru?

4:21  Aˈin li chakˈrab quixqˈue ke li Jesucristo: Li ani naxra li Dios, tento ajcuiˈ nak tixra lix herma̱n.

Chapter 5

5:1  Chixjunileb li nequeˈpa̱ban re nak li Jesús aˈan li Cristo, aˈaneb li ralal xcˈajol li Dios. Ut cui la̱o nakara li Acuabej Dios, takaraheb ajcuiˈ li ralal xcˈajol.

5:2  Cui nakara li Dios, nakapa̱b lix chakˈrab. Riqˈuin aˈan nakanau nak nakara li Dios joˈ ajcuiˈ eb li ralal xcˈajol.

5:3  Aˈan aˈin lix ra̱bal li Dios: nak takapa̱b lix chakˈrab. Moco chˈaˈaj ta xpa̱banquil lix chakˈrab.

5:4  Li yoˈlajenak saˈ musikˈej riqˈuin li Dios cuan xcuanquil re xcuybal xnumsinquil li ma̱usilal li cuan saˈ ruchichˈochˈ. Cuan kacuanquilal chixnumsinquil xban nak nakapa̱b saˈ xcˈabaˈ li Jesucristo.

5:5  ¿Ani li tzˈakal cuan xcuanquil re xcuybal xnumsinquil li ma̱usilal li cuan saˈ ruchichˈochˈ? La̱o li nocopa̱ban re nak li Jesús aˈan li Ralal li Dios. Caˈaj cuiˈ la̱o cuan kacuanquil re xcuybal xnumsinquil li ma̱usilal.

5:6  Li Jesucristo quicˈulun saˈ ruchichˈochˈ. Quixcˈul li cubi haˈ ut quihoyeˈ ajcuiˈ lix quiqˈuel chiru li cruz. Ma̱cuaˈ caˈaj cuiˈ li cubi haˈ quixcˈul. Quihoyeˈ aj ban cuiˈ lix quiqˈuel. Li Santil Musikˈej naxchˈolob xya̱lal chiku chirix li Cristo. Ut ya̱l chixjunil li naxcˈut chiku li Santil Musikˈej.

5:7  Saˈ choxa cuanqueb li oxibeb li nequeˈchˈoloban lix ya̱lal. Aˈaneb aˈin: li Dios Acuabej, li Dios Cˈajolbej ut li Dios Santil Musikˈej. Li oxib aˈin junajeb chi ribil.

5:8  Ut oxib li cˈaˈru qui-uxman saˈ ruchichˈochˈ li naxcˈut chiku lix ya̱lal chirix li Jesucristo. Li xbe̱n, aˈan nak li Santil Musikˈej naxcˈut chiku lix ya̱lal. Li xcab, aˈan li cˈaˈru qui-uxman nak li Jesús quixcˈul li cubi haˈ. Ut li rox, aˈan nak quihoyeˈ lix quiqˈuel li Jesús chiru cruz. Eb li oxib aˈin juntakˈe̱t lix ya̱laleb.

5:9  La̱o nakapa̱b li ya̱l chˈolobanbil xbaneb li cui̱nk. Abanan li chˈolobanbil xban li Dios kˈaxal cuiˈchic nim xcuanquil chiru aˈan. Ut li Dios quixchˈolob xya̱lal nak li Jesús aˈan li Ralal.

5:10  Li ani napa̱ban re li Ralal li Dios, aˈan naxnau tzˈakal lix ya̱lal. Aˈut li incˈaˈ napa̱ban re li Dios, naxqˈue li Dios chokˈ aj ticˈtiˈ xban nak incˈaˈ naxpa̱b li xya̱lal li quixchˈolob li Dios nak quixye re li Jesús: La̱at li cualal, chan.

5:11  Ut aˈan aˈin li naxchˈolob xya̱lal nak li Dios quixqˈue ke li yuˈam chi junelic. Ut li yuˈam aˈin natauman riqˈuin li Ralal.

5:12  Yalak ani napa̱ban re li Ralal li Dios, aˈan cuan xyuˈam chi junelic. Ut li ani incˈaˈ napa̱ban re li Ralal li Dios, ma̱cˈaˈ lix yuˈam chi junelic.

5:13  Xintzˈi̱ba aˈin chokˈ e̱re la̱ex li nequexpa̱ban re li Ralal li Dios re nak la̱ex te̱nau nak cuan e̱yuˈam chi junelic.

5:14  Ut aˈin li cau cuiˈ kachˈo̱l chirix li Dios. Nakanau nak li cˈaˈak re ru nakatzˈa̱ma re, cui nakatzˈa̱ma joˈ naraj li Dios, aˈan nocorabi.

5:15  Nakanau nak li Dios nocorabi nak nocotijoc. Riqˈuin aˈin nakanau nak naxqˈue ke li cˈaˈru nakatzˈa̱ma chiru.

5:16  Cui la̱o takil junak li kaherma̱n chi ma̱cobc ut naru xcuybal lix ma̱c, chotijok chirix re nak ta̱cuyekˈ xma̱c xban li Dios ut ta̱cua̱nk riqˈuin li Dios toj chirix lix camic. Abanan cuan li ma̱c incˈaˈ naxcuy li Dios. Ma̱cˈaˈ rajbal li tijoc chirix li ani yo̱ chi ba̱nu̱nc re li ma̱c li ma̱cˈaˈ xcuybal.

5:17  Ya̱l nak li ma̱usilal, aˈan ma̱c. Abanan li Dios naxnau bar cuan li ma̱c naru xcuybal ut bar cuan li incˈaˈ.

5:18  Nakanau nak li ani napa̱ban re li Dios incˈaˈ chic yo̱k chi ma̱cobc xban nak li Ralal li Dios na-iloc re. Ut laj tza ma̱cˈaˈ chic xcuanquil saˈ xbe̱n laj pa̱banel.

5:19  Ut nakanau nak la̱o ralal xcˈajol li Dios. Abanan li jun chˈo̱l chic li ma̱jiˈ nequeˈpa̱ban re li Dios, eb aˈan cuanqueb rubel xcuanquil laj tza.

5:20  Ut la̱o nakanau nak li Ralal li Dios quicˈulun saˈ ruchichˈochˈ. Quixqˈue kanaˈleb re xnaubal bar cuan li tzˈakal Dios. Ut junajo chic riqˈuin li tzˈakal Dios xban nak xkapa̱b li Jesucristo li Ralal li Dios. Aˈan li naqˈuehoc ke li yuˈam chi junelic.

5:21  Ex inherma̱n, me̱lokˈoni chic li jalanil dios yi̱banbil riqˈuin ukˈej. Joˈcan taxak.