LinVB - I John

Chapter 1

1:1  Oyo azaláká út’o libandela, óyo toyókákí na matói, óyo tomónókí na míso, óyo totálákí malámu mpé tosímbákí na mabóko : Yě ndé Liloba lya Bomoi.

1:2  Ya sôló, Bomoi abimí o míso ma bato : bísó tomónókí yě, tozalí banzénénéké, mpé tokosangela bínó Bomoi bwa sékô, azalákí o mbóka Tatá mpé amíyébísí na bísó.

1:3  Maye toyókákí mpé tomónókí, tosangélí bínó mangó mpô ’te bínó lokóla bózala lisangá na bísó. Bísó tozalí lisangá na Tatá mpé na Mwána wa yě Yézu Krístu.

1:4  Tokomélí bínó mangó mpô ’te esengo ya bínó ékoka.

1:5  Nsango eye toyókákí o monoko mwa Krístu, eye tosangélí bínó, yangó eye : Nzámbe azalí Mwínda, molílí mozalí na yě sókí moké té.

1:6  Sókó tolobí ’te tozalí na Nzámbe lisangá, nzókandé tozalí kotámbola o molílí, tobúkí lokutá na maloba mpé na bikelá.

1:7  Kasi sókó totámbólí o nzelá ya mwínda, lokóla Nzámbe yě mŏ kó azalí o káti ya mwínda, bísó bánso tosangání lisangá sé lyŏ­kó, mpé makilá ma Yézu, Mwána wa yě, makopétola bísó, makolongola mabé ma bísó mánso.

1:8  Sókó tolobí : « Tozalí na lisúmu té », tozalí komíkósa, mpé tozalí na bosôló o motéma té.

1:9  Kasi sókó tondimí ’te tosálí masúmu, tokokí kotía mitéma na Nzámbe wa bosémbo, akolímbisa bísó masúmu ; akopétola bísó, akolongola mabé ma bísó mánso.

1:10  Kasi sókó tolobí : « Tosálí masúmu té », tozalí kotála yě lokóla moto wa lokutá, mpé maloba ma yě mazalí o mitéma mya bísó té.

Chapter 2

2:1  Bána ba ngáí, nakomélí bínó makambo maye mpô bósála masúmu té. Kasi atâ moto asálí lisúmu, tozalí na Molobeli epái ya Tatá, Yézu Krístu, yě moto wa bosémbo.

2:2  Yě ndé amípésákí bŏ libonza mpô ya masúmu ma bísó, bobélé mpô ya masúmu ma bísó mŏ­kó té, kasi mpô ya masúmu ma nsé mobimba.

2:3  Na botósi mibéko mya yě tolakísí ’te toyébí Nzámbe sôló.

2:4  Moto alobí ’te « Nayébí Nzámbe », kasi akotósaka mibéko mya yě té, azalí moto wa lokutá mpé bosôló bozalí na yě té.

2:5  Kasi moto akotósaka liloba lya Nzámbe, motéma mwa yě motóndí na bolingi Nzámbe. Yangó elakísí ’te tozalí na Nzámbe bondeko.

2:6  Moto alobí ’te azalí na Nzámbe bondeko ázala na ezalela eye ezalákí na Krístu.

2:7  Bandeko ba bolingo, nakomélí bínó mobéko mwa sika té, sé mobéko mwa kala, moye bosílí kozwa út’o ebandela. Mobéko moye mwa kala mozalí liloba liye bosílí boyókákí.

2:8  Nzókandé mobéko nazalí kokomela bínó mozalí mpé mobéko mwa sika ; ezalela ya Krístu mpé eye ya bínó elakísí ’te mobéko moye mozalí mwa sôló, mpô molílí molingí mósíla mpé mwínda mwa sôló mobandí kongenge.

2:9  Moto akolobaka ’te azalí kotámbola o mwínda, kasi ayiní ndeko wa yě, azalí naíno o káti ya molílí.

2:10  Moto óyo akolingaka ndeko wa yě, azalí na mwínda ntángo ínso, akotúta libakú lyŏ kó té.

2:11  Kasi óyo ayiní ndeko wa yě afándí o molílí, azalí kotámbola sé o molílí, ayébí té esíká azalí kokende, mpámba té, molílí mozipí yě míso.

2:12  Nazalí kokomela bínó, bána, zambí balímbísí bínó masúmu mpô ya nkómbó ya Krístu.

2:13  Nazalí kokomela bínó, batatá, zambí boyébí óyo azalí út’o libandela. Nazalí kokomela bínó, bilengé, zambí bolóngí etumba na Mobébisi.

2:14  Bána, nakomélí bínó zambí boyébí Tatá. Batatá, nakomélí bínó zambí boyébí óyo azalí út’o libandela. Nakomélí bínó bilengé, zambí bozalí makási, Liloba lya Nzámbe lipikámí o mitéma mya bínó mpé bolóngí etumba na Mobébisi.

2:15  Bólinga mokili moye té, bólinga mpé bilóko bya mokili té. Sókó moto alingí mokili, bolingi bwa Tatá bozalí na yě té.

2:16  Makambo mánso ma nsé, mpósá ebé ya motéma, malúli mabé ma míso mpé loléndo mpô ya bomengo bwa nsé bikoútaka na Tatá Nzámbe té, kasi na mokili.

2:17  Nzókandé mokili mozalí koleka elongó na mpósá ya makambo ma mokili, kasi moto akosálaka maye Nzámbe alingí, akoúmela na lobíko.

2:18  Bána ba ngáí, eleko ya nsúka esílí eyéí. Boyókákí ’te Mongúná wa Krís­tu asengélí koyâ ; bangúná ba Krístu basílí bakómí baíké sikáwa, na yangó toyébí ’te eleko ya nsúka esílí eyéí.

2:19  Bangúná baye baútí o ntéi ya bísó, kasi bazalákí bato ba bísó mpenzá té. Sókó bazalákí bato ba bísó, mbele batíkálákí o káti ya bísó. Kasi esengélákí komónono polélé ’te atâ mŏ kó wa bangó azalákí moto wa bísó té.

2:20  Kasi bínó bosílí bokúlí Elímo óyo aútí na Nzámbe, yangó wâná boyébí mánso.

2:21  Nakomélí bínó mpô boyébí mambí ma bosôló, bobúngí mangó té ; boyébí mpé ’te lokutá lokoútaka na bosôló té.

2:22  Náni moto wa lokutá ? Bobélé óyo akolobaka ’te Yézu azalí Mesíya té* ! Mongúná monéne wa Krístu, yě wâná ! Awángání ná Tatá ná Mwána.

2:23  Atâ náni awángání Mwána, akowángana mpé Tatá ; kasi óyo andimí Mwána, andimí mpé Tatá.

2:24  Bôngó bínó, bóbátela o mitéma maye boyókí út’o ebandela. Sókó bobátélí o mitéma maye boyókí út’o ebandela, bokotíkala na Tatá mpé na Mwána lisangá.

2:25  Bolámu boye Krístuméí alakélí bísó, bomoi bwa lobíko.

2:26  Nakomélí bínó yangó mpô ya baye balingí kokósa bínó.

2:27  Kasi bínó, na mafúta bapakólí bínó, Krístu akúlísí bínó Elímo : Elímo óyo atíkálí o mitéma mya bínó. Bosengélí na motéyi mosúsu té, zambí Elímo óyo bozwí na mafúta mâná akotéya bínó mánso : azalí na bosôló, na lokutá té. Awa atéyí bínó, bótíkala na yě lisangá.

2:28  Ya sôló, bána ba ngáí, bótíkala na yě lisangá, mpô ’te, mokolo Krístu akobimela bísó, tózala na elíkyá enéne. Bôngó, mokolo akoyâ, tóyóka nsóni té ya kozala mosíká na yě.

2:29  Awa boyébí ’te yě azalí ntá bosémbo, bosengélí koyéba ’te moto akosálaka mánso na bosémbo, azalí mwána wa Nzámbe. Tozalí bána ba Nzámbe

Chapter 3

3:1  Bótála bóníbóní Tatá akolingaka bísó : apésí bísó nkómbó ‘bána ba Nzá­mbe’, mpé tozalí sôló bána ba Nzámbe. Bato ba nsé bayébí bísó té, zambí bayébí Yě mpé té.

3:2  Bandeko ba bolingo, út’o sikáwa tozalí bána ba Nzámbe, kasi naíno emónóní té bóníbóní tokozala nsima. Toyébí ’te ntángo Mwána wa Nzámbe akomónono, tokoúlana na yě, mpô tokomóno yě lokóla azalí.

3:3  Moto akotía elíkyá boye na Nzá­mbe, akomíkómisa péto lokóla Krístu yě mŏ kó azalí péto.

3:4  Moto asálí lisúmu, abúkí mobéko, zambí lisúmu lizalí : kobúka mobéko.

3:5  Kasi boyébí ’te Krístu ayákí kobimela bísó mpô ’te álongola masúmu. Boyébí mpé ’te yě azalí na lisúmu lyŏ kó té.

3:6  Moto azalí na yě lisangá akosála lisúmu té. Moto asálí lisúmu, amóní yě naíno té, ayébí yě mpé té.

3:7  Bána ba ngáí, bákósa bínó té. Moto akosálaka makambo ma bosémbo azalí moto wa bosémbo, sé lokóla Krístu.

3:8  Kasi óyo akosálaka lisúmu, azalí moto wa zábolo, mpô zábolo azalí mosúmuki út’o libandela. Mwána wa Nzámbe ayákí o nsé mpô ’te áboma misálá mya zábolo.

3:9  Moto abótámí na Nzámbe akosálaka lisúmu té, zambí ngúyá ya bomoi bwa Nzá­mbe ezalí na yě. Akokí kosála lisúmu té, zambí abótámí na Nzámbe.

3:10  Tálá bóníbóní bokoyéba sókó bato bazalí bána ba Nzámbe tŏ bána ba zábolo : bato bánso bazalí na bosémbo té, ná mpé baye bakolingaka bandeko ba bangó té, baútí na Nzámbe té.

3:11  Eye ezalí nsango bosílí boyókí út’o ebandela : tosengélí kolingana.

3:12  Tózala lokóla Kain té : yě moto wa Mongúná, abomákí ndeko wa yě. Mpé ntína níni abomákí yě ? Mpô azalákí kosála mabé, mpé ndeko wa yě azalákí kosála malámu.

3:13  Bókámwa té, bandeko, sókó bato ba nsé bayiní bínó.

3:14  Bísó toyébí ’te tobíkí o liwá mpé tokómí na bomoi, zambí tokolingaka bandeko. Moto akolingaka bandeko té, akotíkala o káti ya liwá.

3:15  Moto ayiní ndeko wa yě azalí mobomi. Boyébí ’te mobomi azalí na bomoi bwa sékô o motéma té.

3:16  Mpô ya Krístu toyébí níni ezalí bolingi : áwa akabí bomoi bwa yě mpô ya bísó. Bísó lokóla tosengélí komíkaba mpô ya bandeko.

3:17  Ndéngé níni bolingi bwa Nzámbe bokokí kozala na moto azalí na bilóko bikokí na yě, nzókandé abóyí kosálisa ndeko wa yě akélélí ?

3:18  Bána ba ngáí, tólinga bobélé na maloba tŏ na monoko té, kasi na misálá mya bosôló.

3:19  Sókó tosálí bôngó, tokoyéba ’te tozalí bato ba bosôló, mpé o míso ma Nzámbe tokozala na bobóto o mitéma

3:20  mbala ínso motéma mwa bísó mozalí kopálela bísó, mpô Nzámbe alekí bísó na motéma ngolu, mpé ayébí mánso.

3:21  Bandeko ba bolingo, áwa tozalí motéma mpío, tozalí na elíkyá enéne o míso ma Nzámbe :

3:22  tokokí kosénge yě atâ níni, akopésa bísó yangó, zambí tokotósaka mibéko mya yě mpé tokosálaka maye mazalí kosepelisa yě.

3:23  Apésí bísó mobéko moye : tóyamba Mwána wa yě Yézu Krístu mpé tólingana lokóla atíndákí bísó.

3:24  Moto akotósa mibéko mya Nzá­mbe, akosangana na Nzámbe mpé Nzámbe akosangana na yě. Toyébí ’te Nzámbe asangání na bísó mpô ya Elímo apésí bísó.

Chapter 4

4:1  Bána ba bolingo, bóndimela atâ náni té, kasi bómeka bato libosó, bóyéba bôngó sókó bazalí na elímo eútí na Nzámbe. Mpámba té, baproféta ebelé ba lokutá basílí bakómí áwa o mokili.

4:2  Bótála bóníbóní bokoyéba ’te moto azalí na Elímo wa Nzámbe : moto nyónso asakólí ’te Yézu Krístu akómí moto aútí na Nzámbe.

4:3  Kasi óyo ayambí Yézu té, aútí na Nzámbe té ; azalí na elímo eútí na Mongúná wa Krístu. Boyókákí ’te Mongúná ôná ase­ngélákí koyâ, mpé sikáwa asílí akómí o nsé.

4:4  Bána ba ngáí, bínó boútí na Nzámbe mpé bosílí bolóngí baproféta ba lokutá, zambí Oyo azalí o mitéma mya bínó alekí óyo azalí mokonzi wa nsé.

4:5  Baproféta ba lokutá bazalí ba nsé, yangó wâná bakosakolaka makambo maútí o nsé, mpé bato ba nsé bakondima bangó.

4:6  Bísó toútí na Nzámbe. Moto ayébí Nzámbe akoyóka bísó ; moto aútí na Nzámbe té, akoyóka bísó té. Sé bôngó, tokoyéba ná elímo ya bosôló ná elímo ya lokutá.

4:7  Bandeko ba bolingo, tólingana, zambí bolingi boútí na Nzámbe. Moto nyónso azalí na bolingi azalí mwána wa Nzámbe mpé ayébí Nzámbe.

4:8  Moto azángí bolingi ayébí Nzámbe té, zambí Nzámbe azalí bolingi.

4:9  Tálá bóníbóní Nzámbe alakísí bísó bolingi bwa yě : atíndí Mwána sé mŏ kó wa yě áwa o nsé, mpô ’te, na lisálisi lya yě, tózala na bomoi.

4:10  Bolingi bozalí boye : bísó bato tolingákí Nzámbe té, kasi yě alingákí bísó mpé atíndélákí bísó Mwána wa yě mpô ’te, na libonza lya bomoi bwa yě, álongola masúmu ma bísó.

4:11  Bandeko ba bolingo, áwa Nzámbe alingí bísó míngi boye, bísó mpé tosengélí kolingana.

4:12  Moto mŏ kó naíno amóní Nzámbe té, kasi sókó tolingání, Nzámbe afándí o mitéma mya bísó mpé mitéma mya bísó mitóndí na bolingi bwa yě.

4:13  Tálá bóníbóní toyébí ’te tozalí na yě lisangá mpé yě na bísó : akabélí bísó Elímo wa yě.

4:14  Bísó bato tomóní na míso mpé tozalí kosakola ’te Tatá atíndí Mwána wa yě mpô ’te ázala Mobíkisi wa mokili.

4:15  Moto óyo andimí ’te Yézu azalí Mwána wa Nzámbe, azalí lisangá na Nzámbe, mpé Nzámbe azalí lisangá na yě.

4:16  Bísó bato tomónókí bolingi Nzámbe akolingaka bísó mpé toyambí bolingi bwa yě : Nzámbe azalí Bolingi. Moto azalí na bolingi o motéma, azalí na Nzámbe lisangá mpé Nzámbe azalí na yě lisangá.

4:17  Bolingi bwa bísó bokokoka sókó tokozila na elíkyá mokolo mwa likambo lya nsúka, mpô bomoi bwa bísó áwa o nsé boúlání na bomoi bwa Yézu.

4:18  Moto azalí na bolingi bwa sôló akokí kobánga té. Bolingi bwa sôló bokolongola bobángi, zambí moto abángí azalí kokanisa etúmbu, bôngó bolingi bwa yě bokokí naíno té.

4:19  Bísó tozalí na bolingi, mpô Nzámbe alingákí bísó libosó.

4:20  Sókó moto alobí ’te : « Nalingí Nzámbe », kasi akoyinaka móníngá wa yě, azalí moto wa lokutá, mpô akokí kolinga Nzámbe té, óyo azalí komóno na míso té, sókó alingí móníngá wa yě té, óyo azalí komóno na míso.

4:21  Nzámbe apésí bísó mobéko moye : Moto alingí Nzámbe, álinga mpé móníngá wa yě.

Chapter 5

5:1  Moto nyónso ayambí ’te Yézu azalí Krístu azalí moto abótámí na Nzámbe. Moto nyónso alingí mobóti, alingí mpé mwána yě abótí.

5:2  Tokoyéba ’te tokolingaka bána ba Nzámbe sókó tolingí Nzámbe mpé sókó tokotósaka mitíndo mya yě.

5:3  Moto alingí Nzámbe akotósaka mitíndo mya yě. Kotósa myangó ezalí mpási míngi té,

5:4  mpô moto nyónso abótámí na Nzámbe akolónga mabé ma mokili. Ngúyá eye tokolónga na yangó mabé ma mokili, ndé boyambi bwa bísó.

5:5  Náni akokí kolónga mabé ma mokili ? Bobélé óyo ayambí ’te Yézu azalí Mwána wa Nzámbe.

5:6  Yézu Krístu moto ayákí na mái mpé na makilá ; ayákí bobélé na mái té, kasi na mái mpé na makilá. Elímo moto asakólí bôngó, mpô Elímo azalí Bosôló.

5:7  Banzénénéké bazalí básáto :

5:8  Elímo, mái ná makilá, bangó básáto bakolobaka ndéngé sé yŏ kó.

5:9  Sókó tokondimaka maloba ma ba­nzénénéké, tóyéba ’te maloba ma Nzámbe malekí na ntína, mpô Nzámbe alobí mangó mpô ya Mwána wa yě.

5:10  Moto ayambí Mwána wa Nzámbe, abómbí maloba ma Nzámbe o motéma. Moto ayambí Nzámbe té, atálí Nzámbe lokóla moto wa lokutá, mpô abóyí koyamba maloba maye Nzámbe alobákí mpô ya Mwána wa yě.

5:11  Maloba ma yě mangó maye : Nzámbe akabélí bísó bomoi bwa lobíko, bomoi boye bozalí na Mwána wa yě.

5:12  Moto azalí na Mwána lisangá azwí bomoi ; óyo azalí na Mwána lisangá té azwí bomoi té.

5:13  Nakomélí bínó maloba maye, bínó baye boyambí nkómbó ya Mwána wa Nzámbe, mpô bóyéba ’te bozalí na bomoi bwa lobíko.

5:14  Bísó tokokí kotía elíkyá na Nzá­mbe, óyo akopésa bísó maye toséngí yě engébéné na maye yě alingí.

5:15  Toyébí ’te akondimela bísó, atâ toséngí yě elóko níni ; toyébí mpé ’te tokozwa mánso toséngékí yě libosó.

5:16  Sókó moto amóní ’te ndeko wa yě asálí lisúmu, liye likokamba kín’o liwá té, ásámbela, bôngó Nzámbe akopésa ndeko ôná bomoi. Tolobí bôngó mpô ya baye bakosála lisúmu likokamba bangó kín’o liwá té. Kasi lisúmu liye likokamba kín’o liwá lizalí ; nalobí té ’te bósámbela mpô ya baye bakosála lisúmu lyangó.

5:17  Mabé mánso mazalí masúmu, kasi masúmu masúsu makokamba kín’o liwá té.

5:18  Toyébí ’te moto abótámí na Nzá­mbe akosála lisúmu té ; Mwána wa Nzámbe akobátelaka yě mpé Mobébisi akokí kosála yě mabé té.

5:19  Toyébí ’te tozalí bato ba Nzámbe, kasi nsé mobimba ezalí o mabóko ma Mobébisi.

5:20  Toyébí mpé ’te Mwána wa Nzámbe ayéí, mpé apésí bísó mayéle mpô tóyéba Nzámbe wa sôló. Tozalí na bondeko bwa Nzámbe wa sôló, sókó tozalí na bondeko bwa Mwá­na wa yě, Yézu Krístu. Yě mpenzá azalí Nzámbe wa sôló, yě ndé Bomoi bwa lobíko.

5:21  Bána ba ngáí, bókéba na likambo lya bokúmisi bikeko !