Azeri - Philippians

Chapter 1

1:1  مسئح عئسايا اؤزلرئني قول اتمئش پولوس و تئموتاعوسدان، فئلئپئده مسئح عئسايا عاييد اولان بوتون موقدّسلره، ناظئرلر و شمّاسلاري​ ائله:

1:2  آتاميز تاري و ربّئمئز عئسا مسئحدن سئزه فيض و باريش اولسون.

1:3  سئزي هر زامان خاطيرلاياندا تاريما شوکور ادئرم.

1:4  و همئشه هر دوعامدا سئزئن هامينيز اوچون شادليقلا دوعا اِدئرم.

1:5  چونکي ائلک گوندن ائندئيه کئمي ائنجئلئن ائشئنده شئرکت ادئبسئنئز.

1:6  آرخايينام او کي، ياخشي ائشي سئزده باشلاييب، مسئح عئسانين گونونه کئمي، اونو کامئلله‌شدئره​جک.

1:7  حاقلي‌يام کي، سئزئن هامينيز حاقّيندا بله دوشونم، چونکي سئز منئم اوره‌يئمده​سئنئز. حبسده ده اولسام، ائنجئلئن مودافئعه​سئنده و تصدئق اتمه‌يئنده ده اولسام، هامينيز منئمله برابر تارينين فيضئنه شرئکسئنئز.

1:8  تاري شاهئدئمدئر کي، مسئح عئسانين شفقتئنده نجه سئزئن هامينيزينين حسرتئني چکئرم.

1:9  و دوعا ادئرم کي، محبّتئنئز حقئقي معرئفت و هر جور ائدراکدا آرتيق و داها آرتيق چوخالسين.

1:10  اِله کي، افضل اولان شيلري تصدئق ادئب، مسئحئن گونونه کئمي خالئص و مذمّتسئز اولاسينيز،

1:11  و تارينين شؤوکت و مدحي اوچون صالحلئک ثمره‌سي ائله دولاسينيز کي، عئسا مسئحئنئن واسئطه‌سئله‌‌دئر.

1:12  ائندي قارداشلار، ائسته‌يئرم بئله​سئنئز کي، منئم باشيما گلنلر، داها چوخ ائنجئلئن ترقّئسئنه باعئث اولدو.

1:13  بله کي، بوتون ساراي موحافئظلرئنه و اؤزگه هر کسه معلوم اولوب کي، منئم حبسئم مسئح اوچوندور.

1:14  و قارداشلاردان چوخو، حبسئمدن اؤتري ربّه اعتئماد ادئب، داها چوخ جورعت تاپيبلار کي، ربّئن کلاميني قورخوسوز دانيشسينلار.

1:15  دوغروسو، بعضئلري حتّا پاخيلّيق اوزوندن مسئحي وعظ ادئرلر، لاکئن بعضئلري ده ياخشي نئيّتله.

1:16  آخيرکي‌لار بونو محبّت اوزوندن ادئرلر و بئلئرلر کي، من ائنجئلئن مودافئعه​سي اوچون تعيئن اولونموشام.

1:17  اوّلکئلر مسئحي ائخلاصلا يوخ، اؤز منئيّت‌لرئنئن داليندا اولدوقلاري اوزوندن اعلان ادئرلر و دوشونورلر کي، بو حبسئمده منئم اذئيّت چکمه‌يئمه باعئث اولسونلار.

1:18  نه اولور؟ آنجاق بو کي، هر حالدا، ائستر يالان نئيّتده، ائستر دوغرو نئيّتده، مسئح اعلان اولونور و من بوندا سوئنئرم، بلي، سوئنه​جه‌يم ده.

1:19  چونکي بئلئرم کي، بو، سئزئن دوعالارينيزلا و عئسا مسئحئن روحونون کؤمه‌يي ائله منئم خئلاصيمي يتئره​جک.

1:20  خالئص ائنتئظار و اومئدئم بودور کي، هچ بئر شيده اوتانماييم و همئشه‌کي کئمي ائندي ده، ياشاسام دا، اؤلسَم ده، بوتون جسارتله مسئحي بدنئمده اوجالديم.

1:21  چونکي منئم اوچون ياشاماق مسئحدئر، اؤلمک ده قازانج.

1:22  لاکئن اگر بدنده عؤمور سورمه‌لي اولسام، بو منه ثمره​لي بئر زحمت اولاجاق. آمّا بئلمئرم هانسيني سچئم.

1:23  من ائکي طرفدن سيخيشديريليرام؛ آيريلماق و مسئحله اولماق حسرتئنده​يم، چونکي بو داها ياخشي‌دير.

1:24  لاکئن سئزئن خاطئرئنئز اوچون بدنده قالماق داها چوخ لازيمدير.

1:25  بوندان يقئنئم وار و بئلئرم کي، قالاجاغام و سئزئن ائماندا اولان شادليق و ترقّئنئز اوچون سئزئنله داوام وره​جه‌يم.

1:26  بله کي، گئنه يانينيزا گلنده، مسئح عئسادا منئم حاقّيمدا اولان فخرئنئز آرتسين.

1:27  آنجاق مسئحئن ائنجئلئنه لايئق طرزده ياشايين کي، من، ائستر گلئب سئزي گؤره‌نده، ائستر قايئب، سئزئن باره​ده اشئدئم کي، سئز بئر روحدا ثابئت دورورسونوز و همن فئکئرده ائنجئلئن ائماني اوچون بئرلئکده جهد ادئرسئنئز.

1:28  و سئزه ضئدّ دورانلاردان اصلا قورخمورسونوز کي، بو، اونلارا هلاکت علامتي‌دئر، لاکئن سئزه نئجات علامتي، بو دا تاريداندير.

1:29  چونکي مسئحئن خاطئري اوچون سئزه عطا اولوب کي، اونا آنجاق ائمان گتئرمه‌يه​سئنئز، اونون خاطئري اوچون عذاب دا چکه​سئنئز

1:30  و اِله همن موبارئزه​ني تجروبه اده​سئنئز کي، منده گؤردونوز و ائندي منده اولدوغونو اشئدئرسئنئز.

Chapter 2

2:1  بلجه اگر مسئحده بئر تشوئق، محبّتئن بئر تسلّئسي، اگر موقدّس روحون بئر رفاقتي، اگر شفقت و مرحمت وار،

2:2  هم فئکئر اولماقلا، همن محبّتي ساخلاماقلا، روحدا بئرلشمکله و بئر مقصد نئيّتئنده اولماقلا منئم شادليغيمي کامئل ادئن.

2:3  هچ بئر شيي خودپرستلئک اوزوندن و يا شؤهرتپرستلئکدن اتمه‌يئن. لاکئن تواضؤعله بئربئرئنئزي اؤزونوزدن اوستون سايين.

2:4  آنجاق اؤز شخصي منفعتئنئزي آختارمايين، اؤزگه​لرئن ده منفعتئني نظرده آلين.

2:5  مسئح عئسادا اولان دوشونجه سئزده ده اولسون کي،

2:6  تارينين صورتئنده اولدوغو حالدا، تاري​ ائله برابرلئيي بئر قنئمت سايمادي.

2:7  لاکئن هر شيدن ال چکدي و بئر قول صورتئني آليب، ائنسانلارين اوخشارينا دؤندو.

2:8  و ائنسان شباهتئني آلميش اولاراق، اؤلومه موطئع اولماقلا، حتّا چارميخ اوستونده اؤلمکله اؤزونو آلچالتدي.

2:9  بونا گؤره ده تاري اونو چوخ اوجالتدي و اونا بوتون آدلاردان افضل اولان آدي وردي

2:10  اله کي، گؤيده، ير اوزونده و يرئن آلتيندا اولانلارين هاميسي عئسانين آديندا دئز چؤکسونلر.

2:11  و آتا تارينين شؤوکتي اوچون هر دئل ائقرار اتسئن کي، عئسا مسئح ربدئر.

2:12  بلجه سوگئلئلرئم، نجه کي، همئشه ائطاعت ادئبسئنئز-نه آنجاق من يانينيزدا اولاندا، لاکئن ائندي کي، قايئبم داها چوخ-نئجاتينيزي قورخو و تئتره‌مکله انجامينا يتئرئن.

2:13  چونکي تاري‌دير کي، اؤز ائلتئفاتينا مووافئق، هم ائستمه‌يئنئز، هم ده عمله گتئرمه‌يئنئز اوچون سئزده ائشله‌يئر.

2:14  هر شيي شئکايتسئز و موناقئشه​سئز يرئنه يتئرئن کي،

2:15  سئز، فاسئد و ترسه بئر نسلئن آراسيندا، مذمّتسئز و معصوم، تارينين قوصورسوز اؤولادلاري اولاسينيز. سئز اونلارين آراسيندا دونيانين نورلاري کئمي ظاهئر اولوب،

2:16  حياتين کلاميني برک توتورسونوز کي، مسئحئن گونونده من ده عبث اللشمه‌دئيئم و عبث زحمت چکمه‌دئيئم اوچون فخر ادئم.

2:17  لاکئن اگر من بئر ائچکي تقدئمه​سي کئمي سئزئن ائمانينيزين قوربان و خئدمتي اوستونه تؤکولورم، گئنه ده سوئنئرم و شادليغيمي سئزئن هامينيزلا پايلاشيرام.

2:18  سئز ده اله بو جور سوئنئن و شادليغينيزي منئمله پايلاشين.

2:19  رب عئسادا اومئد ادئرم کي، بو ياخينليقدا تئموتاعوسو سئزئن يانينيزا گؤنده‌رئم کي، من ده سئزئن احوالاتينيزدان خبردار اولوب، تشوئق اولام.

2:20  چونکي فئکئرده منه ياخين اولان هچ کس قالماييب کي، ائخلاصلا سئزئن قيدئنئزده اولسون.

2:21  اونا گؤره کي، هر کس مسئح عئسانين منفعتئني يوخ، اؤز منفعتئني آختارير.

2:22  آمّا سئز اونون ثوبوت اتمئش دَيَرئني بئلئرسئنئز کي، نجه ائنجئلئن خوش خبرئني يايماقدا، آتاسيني خئدمت ادن بئر اوشاق کئمي منه خئدمت اتدي.

2:23  بونا گؤره اؤز ائشلرئمئن نجه قاباغا گتدئيئني بئلدئکده، اومئد ادئرم کي، تزلئکله اونو سئزئن يانينيزا گؤنده‌رئم.

2:24  و ربده اعتئماديم بودور کي، اؤزوم ده تزلئکله يانينيزا گلئم.

2:25  آمّا لازيم گؤردوم کي، قارداشيم، همکاريم و سئلاحداشيم اِپافرِودئتوسو سئزئن يانينيزا گؤنده‌رئم کي، مؤحتاج اولاندا منه کؤمکچي اولان گؤنده‌ردئيئنئز الچي و خئدمتچئدئر.

2:26  چونکي او، سئزئن هامينيز اوچون حسرت چکئردي و اونون ناخوش اولدوغونو اشئتدئيئنئزه گؤره چوخ ناراحات ائدي.

2:27  حقئقتن ده کي، او، اؤلوم درجه​سئنه قدر ناخوش ائدي، لاکئن تاري اونا، نه ائنکي آنجاق اونا، منه ده مرحمت گؤرستدي کي، مبادا قوصّه‌مئن اوستونه قوصّه آرتسين.

2:28  بو سببدن اونو بوتون ائشتئياقلا سئزئن يانينيزا گؤنده‌رمئشم کي، اونو گؤرنده تکرار سوئنه​سئنئز و منئم ده قوصّم آزالسين.

2:29  بلجه اونو ربده بوتون شادليقلا قبول ادئن و بله ائنسانلارا بؤيوک حؤرمت گؤرسه‌دئن.

2:30  چونکي او، مسئحئن ائشي يولوندا جانيني خطره ساليب اؤلومه بله ياخين گلدي کي، سئزئن منئم حاقّيمدا اولان خئدمتئنئزئن نه اسکئک اولدوغونو، او تکمئل اتسئن.

Chapter 3

3:1  نهايت، قارداشلاريم، ربده شادليق ادئن. سئزه همن شيلري موکرّر يازماق منئم اوچون اصلا زحمت ديئل، لاکئن سئزئن اوچون موحافئظدئر.

3:2  او ائتلردن آييق اولون، او پئسلئک اِدَنلردن آييق اولون، يالان ختنه​دن آييق اولون.

3:3  چونکي حقئقي ختنه بئزئک کي، تارينين موقدّس روحوندا پرستئش ادئرئک و مسئح عئسادا باشيميز اوجادير و جئسمه اعتئماد اتمئرئک.

3:4  گرچي من اؤزوم حتّا جئسمه ده اعتئماد اده بئله‌رم. اگر اؤزگه بئر آدام جئسمه اعتئماد اتمه‌يي دوشونسه، من داها آرتيق:

3:5  سکّئز گونلوک ائکن ختنه اولوندوم، ائسرايئل خالقيندان، بنيامئن قبئله​سئندن، عئبرانئلردن بئر عئبراني، شرئعته گؤره بئر فرئسي،

3:6  قيرت باخيميندان کئلئسايا عذاب وره‌نئن بئري، شرئعتدن گلن صالحلئک باخيميندان مذمّتسئز بئر آدام!

3:7  لاکئن مسئحئن خاطئري اوچون، منه قازانج اولان هر شيي ضرر سايديم.

3:8  بوندان دا چوخ، ربّئم مسئح عئسانين معرئفتئنئن افضل​لئيي قاباغيندا هر شيي ضرر ساييرام کي، اونون اوچون هر شيئن ضررئني چکمئشم و اونلاري زئبئل سايميشام. اِله کي، مسئحي قازانيم

3:9  و اوندا تاپيليم؛ شرئعت اساسينا اولان بئر صالحلئکله يوخ، عئسايا اولان ائمان واسئطه‌سئله گلن صالحلئکله، او صالحلئکله کي، ائمان اساسينا گؤره تاريدان گلئر.

3:10  و اؤلولردن دئرئلدئيئنئن قودرتئني و چکدئيي عذابلارينين رفاقتئني تاني‌ييم و اونون اؤلومونده اونا بنزه‌يئم.

3:11  اِله کي، اؤلومدن دئرئلمه‌يه نايئل اولوم.

3:12  بو، او دمک ديئل کي، اونا نايئل اولموشام و يا کامئلله‌شمئشم. لاکئن جهدله چاليشيرام، اله کي، اونو توتوب اله گتئرئم؛ اونو کي، مسئح عئسا دا مني اونون اوچون توتوب اَله گتئردي.

3:13  قارداشلار، من اِله حساب اتمئرم کي، اونو اَله گتئرمئشم. لاکئن بئر شي ادئرم: آرخادا قالان شيي اونودوب، جان آتيرام کي، قاباغيمدا اولانا چاتيم.

3:14  مسئح عئسادا تارينين افضل دعوتئنئن جايئزه​سي اوچون جهدله مقصده طرف تلاش ادئرم.

3:15  بلجه آراميزدا کامئل اولانلارين بله مَنئشلري اولسون و اگر بئر مؤوضوعدا آيري بئر جور مَنئشلرئنئز وار، تاري اونو دا سئزه آيدين اده​جک.

3:16  لاکئن نه‌يه چاتميشيق، او عيارا گؤره ده ياشاياق.

3:17  قارداشلار، مندن نومونه گؤتورون و دئقّتله او آداملارا باخين کي، بئزده گؤردويونوز نومونه‌يه گؤره رفتار ادئرلر.

3:18  چونکي بئر چوخلاري مسئحئن چارميخينين دوشمنلري کئمي رفتار ادئرلر کي، اونلارين حاقّيندا سئزئنله تز-تز دانيشيرديم و حتّا ائندي ده گؤزو‌ياشلي ديئرم.

3:19  اونلارين آخيري هلاکت، اونلارين تاريسي قارين و اونلارين ائفتئخاري روسوايچيليقلاريندادير کي، فئکئرلرئني دونيه‌وي شيلرئن اوستونه قويوبلار.

3:20  چونکي بئزئم وطنداشليغيميز گؤيده​دئر کي، قورتاريجيميز ربّ عئسا مسئحي ائشتئياقلا اورادان گؤزله‌يئرئک.

3:21  او، بئزئم بو ذلئل بدنئمئزئن وضعئيتئني ديئشدئره​جک، اِله کي، اؤز شؤوکتلي بدنئنه اوخشار اولسون. او بو ائشي او قودرتئن واسئطه‌سئله اده​جک کي، اونونلا هر شيي اؤزونه موطئع اتمه‌يه قادئردئر.

Chapter 4

4:1  بلجه، سوگئلئلرئم، حسرتئني چکدئيئم قارداشلار، سوئنجئم و باشيمين تاجي، ربده بو جور ثابئت دورون، سوگئلئلرئم.

4:2  يودئيا و سئنتئخئيه يالواريرام کي، ربده همفئکئر اولسونلار.

4:3  سندن ده، اي حقئقي يولداشيم، خاهئش ادئرم کي، ائنجئلئن خئدمتئنده منئمله چاليشان بو خانيملارا کؤمک اِده​سن؛ هم ده کلِمِنته و اؤزگه همکارلاريما دا کي، آدلاري حيات دفترئنده​دئر.

4:4  همئشه ربده شادليق ادئن. بئر ده دئيه​جه‌يم: شادليق ادئن!

4:5  قويون سئزئن حلئملئيئنئز بوتون ائنسانلارا معلوم اولسون. رب ياخيندير.

4:6  هچ بئر شي اوچون نئگاران اولمايين، آمّا هر شيده خاهئشلرئنئزي دوعا، ائستئغاثه و شوکورله تارييا بئلدئرئن.

4:7  و تارينين هر فهمدن افضل اولان باريشي، مسئح عئسادا، اورکلرئنئزي و فئکئرلرئنئزي موحافئظت اده​جک.

4:8  نهايت، قارداشلار، هر نه کي، دوغرو، حؤرمتلي، دوز، پاک، سِومه‌لي و اعتئبارلي‌دير، اگر فضئلتلي، اگر تعرئفه لايئق بئر شي وار، فئکرئنئزي بونلارين اوستونه قويون.

4:9  و منده اؤيره‌ندئيئنئز، قبول اتدئيئنئز، اشئتدئيئنئز و گؤردويونوز شيلري يرئنه يتئرئن و باريش تاريسي سئزئنله اولاجاقدير.

4:10  ربده چوخ سوئنئرم کي، ائندي نهايت منئم حاقّيمدا چکدئيئنئز قيدي تزه​له‌دئنئز؛ دوغرودان دا منئم قيدئمه چوخ قالميشدينيز، لاکئن فورصت سئزه ال ورمئردي.

4:11  بونلاري احتئياج اوزوندن دمئرم، چونکي اؤيرنمئشم کي، هر حالدا اولسام، نجه قَناعت ادم.

4:12  اسکئکلئکده ياشاماغي بئلئرم، آرتيقليقدا ياشاماغي دا بئلئرم. هر شيده و هر حالدا توخ قالماق و آج قالماق، آرتيقليقدا ياشاماق و احتئياج ائچئنده عذاب چکمه‌يئن سئرّئني اؤيره‌نمئشم.

4:13  منه قووّت ورن مسئحله هر شيه قادئرم.

4:14  آمّا ياخشي ائش گؤردونوز کي، منئم ذئلّتئمده منئمله شرئک اولدونوز.

4:15  سئز اؤزونوز فئلئپئلي‌لر بئلئرسئنئز کي، ائنجئلئن خوش خبري ائلک وعظ اولوناندا، مقدونئيه‌دن چيخديغيم زامان، سئزدن باشقا هچ بئر کئلئسا، ورمک و آلماق خئدمتئنده منئمله شرئک اولمادي.

4:16  حتّا تسالونئکده اولدوغوم زامان دا، سئز بئر-ائکي دفه منئم احتئياجيم اوچون گؤنده‌ردئنئز.

4:17  بو او دمک ديئل کي، من هدئيه آختاريرام. من آنجاق سئزئن حسابينيزا چوخالان ثمره​ني آختاريرام.

4:18  هر شي کامئل اَلئمه گلئب چاتيب و بول-بول واريم. اِپافرودئتوس اَلي ائله گؤنده‌ردئيئنئز شيلر اَلئمه يتئشئب کي، تاريني خوشنود ادن، خوش بئر رايئحه و مقبول بئر قورباندير.

4:19  و منئم تاريم، مسئح عئسادا اؤز شؤوکتئنئن وارليليغينا موطابئق، سئزئن بوتون احتئياجلارينيزي فراهم اده​جک.

4:20  ائندي تاري و آتاميزا ابددن ابده​جک شؤوکت اولسون. آمئن.

4:21  مسئح عئسادا اولان هر موقدّسه سالام يتئرئن. منئمله اولان قارداشلار دا سئزه سالام گؤنده‌رئرلر.

4:22  بوتون موقدّسلر، خوصوصن ده قيصرئن اِوئندن اولانلار سئزه سالام گؤنده‌رئرلر.

4:23  رب عئسا مسئحئن فيضي سئزئن روحونوزلا اولسون.