CSlElizabeth - Philippians

Chapter 1

1:1  Павел и Тимофей, раби Иисус Христовы, всем святым о Христе Иисусе сущым в Филиппех, с епископы и диаконы:

1:2  благодать вам и мир от Бога Отца нашего и Господа Иисуса Христа.

1:3  Благодарю Бога моего о всей памяти вашей,

1:4  всегда во всяцей молитве моей за всех вас с радостию молитву мою творя,

1:5  о общении вашем в благовествование от перваго дне даже и доныне,

1:6  надеявся на сие истое, яко начный дело благо в вас совершит е даже до дне Иисус Христова:

1:7  якоже есть праведно мне сие мудрствовати о всех вас, за еже имети ми в сердцы вас, во узах моих и во ответе и извещении благовестия, сообщников мне благодати всех вас сущих.

1:8  Свидетель бо ми есть Бог, яко люблю всех вас по милости Иисус Христове:

1:9  и о сем молюся, да любовь ваша еще паче и паче избыточествует в разуме и во всяцем чувствии,

1:10  во еже искушати вам лучшая, да будете чисти и непреткновенни в день Христов,

1:11  исполнени плодов правды Иисус Христом, в славу и похвалу Божию.

1:12  Разумети же хощу вам, братие, яко яже о мне паче во успех благовествования приидоша,

1:13  яко узы моя явленны о Христе быша во всем судищи и в прочих всех,

1:14  и множайшии братия о Господе, надеявшиися о узах моих, паче дерзают без страха слово Божие глаголати.

1:15  Нецыи убо по зависти и ревности, друзии же и за благоволение Христа проповедают:

1:16  ови убо от рвения Христа возвещают нечисте, мняще печаль нанести узам моим:

1:17  ови же от любве, ведяще, яко во ответе благовествования лежу.

1:18  Что убо? Обаче всяцем образом, аще виною, аще истиною Христос проповедаемь есть, и о сем радуюся, но и возрадуюся:

1:19  вем бо, яко сие сбудется ми во спасение вашею молитвою и подаянием Духа Иисус Христова,

1:20  по чаянию и упованию моему, яко ни о единем же постыжуся, но во всяцем дерзновении, якоже всегда, и ныне возвеличится Христос в теле моем, аще животом, аще ли смертию.

1:21  Мне бо еже жити, Христос, и еже умрети, приобретение (есть).

1:22  Аще же, еже жити (ми) телом, сие мне плод дела: и что изволю, не вем.

1:23  Обдержимь же есмь от обою, желание имый разрешитися и со Христом быти, много паче лучше:

1:24  а еже пребывати во плоти, нужнейше (есть) вас ради.

1:25  И сие известне вем, яко буду и спребуду вам всем в ваш успех и радость веры,

1:26  яко да похвала ваша избыточествует о Христе Иисусе во мне, моим пришествием паки к вам.

1:27  Точию достойне благовествованию Христову жителствуйте, да аще пришед и видев вас, аще и не сый у вас, услышу яже о вас, яко (истиною) стоите во единем дусе, и единодушне сподвизающеся по вере Благовествования (волею),

1:28  и не колеблющеся ни о единем же от сопротивных: еже тем убо есть явление погибели, вам же спасения. И сие от Бога:

1:29  яко вам даровася, еже о Христе, не токмо еже в Него веровати, но и еже по Нем страдати,

1:30  тойже подвиг имуще, яков же во мне видесте и ныне слышите о мне.

Chapter 2

2:1  Аще убо кое утешение о Христе, (или) аще кая утеха любве, аще кое общение духа, аще кое милосердие и щедроты,

2:2  исполните мою радость, да тожде мудрствуете, ту же любовь имуще, единодушни, единомудренни:

2:3  ничтоже по рвению или тщеславию, но смиреномудрием друг друга честию болша себе творяще.

2:4  Не своих си кийждо, но и дружних кийждо смотряйте.

2:5  Сие бо да мудрствуется в вас, еже и во Христе Иисусе:

2:6  Иже, во образе Божии сый, не восхищением непщева быти равен Богу:

2:7  но Себе умалил, зрак раба приим, в подобии человечестем быв, и образом обретеся якоже человек:

2:8  смирил Себе, послушлив быв даже до смерти, смерти же крестныя.

2:9  Темже и Бог Его превознесе и дарова Ему имя, еже паче всякаго имене,

2:10  да о имени Иисусове всяко колено поклонится небесных и земных и преисподних,

2:11  и всяк язык исповесть, яко Господь Иисус Христос в славу Бога Отца.

2:12  Темже, возлюбленнии мои, якоже всегда послушасте мене, не якоже в пришествии моем точию, но ныне много паче во отшествии моем, со страхом и трепетом свое спасение содевайте:

2:13  Бог бо есть действуяй в вас и еже хотети и еже деяти о благоволении.

2:14  Вся творите без роптания и размышления,

2:15  да будете неповинни и цели, чада Божия непорочна посреде рода строптива и развращена, в нихже являетеся якоже светила в мире,

2:16  слово животно придержаще, в похвалу мне в день Христов, яко не вотще текох, ни вотще трудихся.

2:17  Но аще и жрен бываю о жертве и службе веры вашея, радуюся и сорадуюся всем вам:

2:18  такожде и вы радуйтеся и сорадуйтеся мне.

2:19  Уповаю же о Господе Иисусе Тимофеа вскоре послати к вам, да и аз благодушствую, уведев яже о вас.

2:20  Ни единаго бо имам равнодушна, иже приснее о вас попечется:

2:21  вси бо своих си ищут, (а) не яже Христа Иисуса.

2:22  Искусство же его знаете, зане якоже отцу чадо, со мною поработал в благовестии.

2:23  Сего же убо уповаю послати абие, повнегда увем яже о мне.

2:24  Надеюся же о Господе, яко и сам скоро прииду к вам.

2:25  Потребнее же возмнех Епафродита брата и споспешника и своинника моего, вашего же посланника и служителя потребе моей, послати к вам,

2:26  понеже желанием желаше видети всех вас, и тужаше, зане слышасте, яко боле.

2:27  Ибо боле близ смерти: но Бог помилова его, не его же токмо, но и мене, да не скорбь на скорбь прииму.

2:28  Скорее убо послах его, да видевше его паки, возрадуетеся, и аз безпечален пребуду.

2:29  Приимите убо его о Господе со всякою радостию, и таковыя честны имейте,

2:30  зане за дело Христово даже до смерти приближися, понудив себе вседушно, да исполнит ваше лишение службы яже ко мне.

Chapter 3

3:1  Прочее же, братие моя, радуйтеся о Господе. Таяжде (бо) писати вам, мне убо неленостно, вам же твердо.

3:2  Блюдитеся от псов, блюдитеся от злых делателей, блюдитеся от сечения:

3:3  мы бо есмы обрезание, иже духом Богу служим и хвалимся о Христе Иисусе, а не в плоти надеемся:

3:4  ибо и аз имею надеяние такожде во плоти. Аще кто ин мнит надеятися во плоти, аз паче,

3:5  обрезан осмодневно, от рода Израилева, колена Вениаминова, Евреин от Еврей, по закону фарисей,

3:6  по ревности гоних Церковь Божию, по правде законней быв непорочен.

3:7  Но яже ми бяху приобретения, сия вмених Христа ради тщету.

3:8  Но убо вменяю вся тщету быти за превосходящее разумение Христа Иисуса Господа моего, Егоже ради всех отщетихся, и вменяю вся уметы быти, да Христа приобрящу

3:9  и обрящуся в Нем, не имый моея правды, яже от закона, но яже верою (Иисус) Христовою, сущую от Бога правду в вере:

3:10  яко разумети Его, и силу воскресения Его, и союбщение страстей Его, сообразуяся смерти Его,

3:11  аще како достигну в воскресение мертвых.

3:12  Не зане уже достигох, или уже совершихся: гоню же, аще и постигну, о немже и постижен бых от Христа Иисуса.

3:13  Братие, аз себе не у помышляю достигша: едино же, задняя убо забывая, в предняя же простираяся,

3:14  со усердием гоню, к почести вышняго звания Божия о Христе Иисусе.

3:15  Елицы убо совершенни, сие да мудрствуим: и еже аще ино что мыслите, и сие Бог вам открыет.

3:16  Обаче в неже достигохом, тоже да мудрствуем и темже правилом жителтвуем.

3:17  Подобни ми бывайте, братие, и смотряйте тако ходящыя, якоже имате образ нас.

3:18  Мнози бо ходят, ихже многажды глаголах вам, ныне же и плачя глаголю, враги креста Христова:

3:19  имже кончина погибель, имже бог чрево, и слава в студе их, иже земная мудрствуют.

3:20  Наше бо житие на небесех есть, отюнудуже и Спасителя ждем, Господа (нашего) Иисуса Христа,

3:21  Иже преобразит тело смирения нашего, яко быти сему сообразну телу славы Его, по действу еже возмогати Ему и покорити Себе всяческая.

Chapter 4

4:1  Темже, братие моя возлюбленная и вожделенная, радосте и венче мой, тако стойте о Господе, возлюбленнии.

4:2  Еводию молю и Синтихию молю тожде мудрствовати о Господе:

4:3  ей, молю и тебе, супружниче присный, споспешествуй им, яже во благовествовании сподвизашася со мною и с Климентом и с прочими споспешники моими, ихже имена в книгах животных.

4:4  Радуйтеся всегда о Господе: и паки реку: радуйтеся.

4:5  Кротость ваша разумна да будет всем человеком. Господь близ.

4:6  Ни о чемже пецытеся, но во всем молитвою и молением со благодарением прошения ваша да сказуются к Богу:

4:7  и мир Божий, превосходяй всяк ум, да соблюдет сердца ваша и разумения ваша о Христе Иисусе.

4:8  Прочее же, братие (моя), елика суть истинна, елика честна, елика праведна, елика пречиста, елика прелюбезна, елика доброхвальна, аще кая добродетель и аще кая похвала, сия помышляйте.

4:9  Умже и научистеся, и приясте, и слышасте, и видесте во мне, сия творите: и Бог мира будет с вами.

4:10  Возрадовахся же о Господе вельми, яко уже когда воспомянусте пещися о мне: понеже и печастеся, но непогодным временем обдержастеся.

4:11  Не яко по скудости глаголю: аз бо навыкох, в нихже есмь, доволен быти:

4:12  вем и смиритися, вем и избыточествовати: во всем и во всех навыкох, и насыщатися и алкати, и избыточествовати и лишатися.

4:13  Вся могу о укрепляющем мя (Иисусе) Христе.

4:14  Обаче добре сотвористе, сприобщившеся печали моей.

4:15  Весте же и вы, Филипписиане, яко в начале благовествования, егда изыдох от Македонии, ни едина ми церковь общевася в слово даяния и приятия, точию вы едини:

4:16  яко и в Солунь и единою и дващи в требование (мое) посласте ми.

4:17  Не яко ищу даяния, но ищу плода множащагося в слово ваше.

4:18  Приях же вся и избыточествую: исполнихся, приемь от Епафродита посланная от вас, воню благоухания, жертву приятну, благоугодну Богу.

4:19  Бог же мой да исполнит всякое требование ваше по богатству Своему в славе, о Христе Иисусе.

4:20  Богу же и Отцу нашему слава во веки веков. Аминь.

4:21  Целуйте всякаго свята о Христе Иисусе. Целуют вы сущая со мною братия.

4:22  Целуют вы святии вси, паче же иже от кесарева дому.

4:23  Благодать Господа нашего Иисуса Христа со всеми вами. Аминь.