PohnOld - Philippians

Chapter 1

1:1  PAULUS o Timoteus ladun Iesus Kristus ong me saraui kan karos en Kristus Iesus o pisop o saunkoa kan nan Pilipi.

1:2  Mak o popol sang ren Kot Sam atail o Kaun Iesus Kristus en mi re omail!

1:3  I kin danke ai Kot ni ai tamatamanda komail.

1:4  I me i kin wiada ni ai kapakap kin komail ansau karos, o i kin kapakap ni pereperen.

1:5  Pweki omail dadaurata rongamau sang ni tapi o kokodo lel met.

1:6  O i kamelele me i, me tapiadar wiawia mau eu re omail, pil pan kanikiela lao lel ran en Iesus Kristus.

1:7  Me pung i en kamelele mepukat duen komail karos, pwe i kin kolekol komail nan mongiong i ni ai salidi wet, wasa i kin kaweweda o kadededa rongamau; a komail karos kin iang ia kapwaiada mak wet.

1:8  Pwe Kot ai saunkadede, duen i kin loleiteki komail pan kupur en Kristus Iesus.

1:9  O me i pil kapakapaki pwe omail limpok en lapalapala kakairida ni lolekong o lamalam akan.

1:10  Pwe komail en kasauiada, da me mau sang karos, pwe komail en melel o pung lao lel ran en Kristus.

1:11  O direki wan pung kan, me kin wiaui ren Iesus Kristus men kalinganada o kapinga Kot.

1:12  Ri ai kan, i men, komail en asa ir ai, me dialan kaindindar rongamau,

1:13  Nan i ai salidi kan pweki Kristus, me pwarapwaradar nan im en monsap o wasa karos.

1:14  O ri atail toto pan kupur en Kaun, me aingar kidar ai salidi kan, ap aima sang mas o, en padaki masan en Kot ap so masak.

1:15  A akai kin padaki duen Kristus akpeirin, o akamai, o akai sang nan ar inong mau.

1:16  A met akan ni limpok, pwe re asa, me ngai salidier, pwen kadede pan rongamau.

1:17  Irail kin padaki duen Kristus kapei lokaia o so melel, re kiki ong, me re pan kalaudela ai salidi kan;

1:18  A pil menda? Pwe Kristus kin lolok sili ni song karos, ma ni akamai de ni melel, i me i peren kida, ei i pan pereperen.

1:19  Pwe i asa, mepukat pan kare ong ia maur soutuk ki omail kapakap o sauas pan Ngen en Iesus Kristus.

1:20  Duen ai inong iong, o auiaui, o kaporoporeki, me i sota pan namenokala ni eu song. A duen mas o, iduen ansau wet Kristus en kapingan laud ni war ai, ma ni ai pan memaurata de mela.

1:21  Pwe Kristus, i maur i, o mela ai pai.

1:22  A ma i pan memaurata ni pali uduk, ai wiawia kan pan kadepa; ari i ap sasa, da me i en pilada.

1:23  Pwe i mauki ira karos: I inong iong mela, pwen mila ren Kristus, pwe i eta me mau.

1:24  A ai mimieta ni pali uduk me mau song pweki komail.

1:25  Ari, i ap asa, me i pan mimieta re omail karos, pwen sauasa omail peren o poson,

1:26  Pwe omail kaping en lapalapala ren Kristus Iesus ki ai pwaralang komail.

1:27  Ari, komail weweid duen me warong rongamau en Kristus, pwe ma i pwaralang komail, de ni ai doo, i en rong, me komail keleki ngen ta ieu, o komail lamalam ta pot, i iang kelail dodok ong rongamau ki poson.

1:28  O komail ender waponki, me kin palian komail akan, pwe i kasansale pan arail pan lokidokila, a omail pan maurela; a mepukat sang ren Kot.

1:29  Pwe a muei ong komail er pan kupur en Kristus, kaidin poson eta, pwen pil kalokolokeki i,

1:30  Pwe komail kin wia pei ota, me komail kilanger re i, o me komail kin rong duen ngai.

Chapter 2

2:1  MA panapanau eu ren Kristus mia, ma kamait en limpok, ma sau pena en Ngen, ma limpok melel, o kadek sang nan ngen omail,

2:2  Komail ap kaunsokela ai peren ni omail lamalam ta pot, o limpok ta ieu, o min ta ieu, o inong iong song ta ieu,

2:3  O der aklemai o der wia meakot ni aklapalap a ni karakarak, amen en kakaki amen mo a.

2:4  Amen amen ender apwali pein a dipisou kan, a amen amen en apwali en akai ar dipisou.

2:5  Pwe i tiak en mi re omail, me pil mi ren Iesus Kristus.

2:6  Me mom en Kot, ap sota men ale ong pein i en dueta Kot.

2:7  Ap akamaleki pein i o wiala ladu men o song en aramas akan.

2:8  O kotin sansaleda ni mom en aramas, o kasapwilidi pein i, o ni a kotin peiki ong lel mela, ei lel mela ni lopu.

2:9  Nan i me Kot kotin kasapwilada i wasa ileile, o kotiki ong i mar eu, sikida sang mar karos.

2:10  Pwe karos en kelepukidi ni mar en Iesus, me mi nanlang o nin sappa o pan sappa.

2:11  O lo karos en kadedeki, me Iesus Kristus me Kaun pwen kalinganada Kot Sam.

2:12  Ari kompoke pai kan, duen omail okoke kokodo, kaidin ni omail wokaren ia do, a me sikidar ansau wet ni ai doo, en pere ki, o lomwiniki kadokedoke kamaur pamail.

2:13  Pwe Kot me kotin wiada karos nan lol omail: Inong o kapwaiada duen kupur a.

2:14  Komail wiada meakaros so, lipanede o so peikasal.

2:15  Pwe komail en pung o melel o seri en Kot akan, me so lol riapot nan pung en di sued o sapung, me komail ser sansal nan pung arail, dueta ser en sappa kan.

2:16  Kasansaleda masan en maur, pwen kaping pa i ni ran en Kristus, pwe i ender tang mal de dodok mal.

2:17  A ma i dueta mairong urak eu wudoki ong mairong o dodok en omail poson, i kin peren kida, o i pan iang komail karos pereperen.

2:18  I me komail en pil perenki o komail en iang ia pereperen.

2:19  A i kaporoporeki Kaun Iesus, me i pan madang kadar wong komail Timoteus, pwe i en pil insenemau, i lao asa ir omail.

2:20  Pwe sota amen mi re i, me dueta i, me kin apwali komail melel.

2:21  Pwe karos kin rapaki me pein ar, a kaidin me sapwilim en Kristus.

2:22  A komail asa, me a tiak me pung, pwe a sauasa ia ni rongamau dueta seri men ong a papa.

2:23  I me i kaporoporeki, me i pan kadarala eden, i lao asa ir ai.

2:24  A i liki Kaun o, me pein ngai pil pan pwara wei madang.

2:25  A i lamedar, me mau en kadarlang komail ri ai Epaprotitus me ai warok ni ai dodok o ai peipei, iei omail men en kadar, o me papa ia ni ai samama.

2:26  Pwe komail asa, a ngong kin komail melel, o a patauki melel omail rongadar, me a somau.

2:27  Melel, a somau meid laud, koren iong mela. A Kot me kotin kupuredar i; a kaidin i eta, pwe pil ngai, pwe i de paiola pokon.

2:28  A i madang kadarala i, pwe komail en kilang i, ap peren kida, o ai insensued en pil tikitikela.

2:29  Komail ari kasamo i ni Kaun o popol, o wauneki me dueta i kan.

2:30  Pweki wiawia en Kristus a koren iong mela, ni a sota kasampwaleki pein maur i, pwen sauasa ia wiliandi komail.

Chapter 3

3:1  A PIL eu ri ai kan, komail en perenki Kaun o! I kin inting wong komail song ta ieu ansau karos, ari so, i me i sota insensuedeki, pwe a kin kakelaile kin komail.

3:2  Kalaka kidi kan! Kalaka toun dodok sued akan! Kalaka song en sirkomsais sued!

3:3  Pwe kitail, me kaudok ong Kot ki ngen o suaiki Kristus Iesus, o so kaporoporeki uduk, me sirkomsais.

3:4  Ari so, men suaiki uduk pil, mi re i. O ma amen kin lamelame, me a kak suaiki uduk, a ngai kak laud sang.

3:5  Pwe ngai sirkomsaiselar ni auel en ran, ngai kisan men Israel o kainok en Peniamin, o men Ipru amen me tapi sang men Ipru, a nin tiak en kapung Parisär amen.

3:6  A ngai nantiong mepukat lao lel ong kaloke momodisou kan, o ni ai kapwaiada tiak en kapung, ngai me pung melel.

3:7  A me pai ong ia, i mamaleki pweki Kristus.

3:8  Iei melel, i mamaleki meakaros pwe meid kasampwal en dedoki Kristus Iesus ai Kaun, i me i muei sang karos o wia pwel kilar, pwe i en anekila Kristus.

3:9  O i en kadiarokada re a, me sota pein ai pung, me pwili sang kapung, a me pwili sang poson Kristus, iei pung, me Kot kotin wadok ong poson.

3:10  Pwe i en dedeki i o manaman en a iasadar, o ai warok ki ong kalokolok pwe i en duela a matala.

3:11  Pwe i en konodi maureda sang ren me melar akan.

3:12  Kaidin likamata i konodier de ngai unsokelar; a i kin dadaurata, pwe i en konodi murin Kristus Iesus kotin kono ia dier.

3:13  Ri ai kan i sota lamelame, me i konodier,

3:14  A iet eu, me i kin wiada: I likidmaliela men likin sakeri, ap inong iong meakan, me mi moa, o i kilekilang ap tang wong kilel o, me mi moa, iei kating, me Kot kotin kileledi ong ia ren Kristus Iesus.

3:15  Ari karos me unsokelar, en lamelame due met. A ma komail wuki sang meakot ni lamalam, Kot pan kotin kadiarok ong komail.

3:16  A me kitail konotier, kitail en inenki wei eta ni lip ota.

3:17  Ri ai kan idauen ia do, o ale sang me kin kekeid wei duen me komail kilanger re at.

3:18  Pwe pan pak toto i indang komail er duen me toto, me kin kekeid wei, a met i indang komail ki sangesang, me irail imwintiti pan lopu en Kristus,

3:19  Me pan lokidokila ni imwi ’rail, me wia aniki kaped arail, me ar wau pan soredi, me kin paieki dipisou en sappa.

3:20  A deu atail mi nanlang, wasa me se kin auiaui Kaun Iesus Kristus atail Saunkamaur pan pwarado sang ia.

3:21  Me pan kotin kalinganada war atail pwel, pwen ras ong war a lingan ki manaman, me a pan kotin kaloe kidi meakan karos.

Chapter 4

4:1  ARI ri ai kompok kan, ai peren o ai lingan komail, katengetengdi ren Kaun o kompoke pa i kan!

4:2  I panaui Ewodia o i panaui Sintike, pwe ira en minimin pena ren Kaun o.

4:3  O i pil poeki re omui ai warok melel, sauasa ira, me iang ia er dodok ni rongamau, iangaki Klemens o ai warok tei kan, me arail mar akan mi nan puk en maur.

4:4  Komail peren ki Kaun o ansau karos! I pil pan indada: Komail pereperen!

4:5  Komail kadek ong aramas akan karos, Kaun o me kotin korendor.

4:6  Komail der patauki meakot, a komail kasale ong Kot meakaros me komail inong iong ni omail kapakap o ngidingid ki danke.

4:7  O popol en Kot, me lapa sang lolekong, pan apapwali mongiong omail o omail lamelam ren Kristus Iesus.

4:8  Pil eu ri ai kan, karos me melel, karos me kon ong, karos me pung, karos me min, karos me kaselel, karos me kalok mau, o ma pil eu tiak mau de men kaping, komail ap madamadaua due!

4:9  Meakan, me komail padakkier o aleer, o rongadar, o kilanger re i, i me komail wia, a Kot en popol ap pan kotikot re omail.

4:10  A ngai me perenki Kaun o kaualap, pweki ni ansau wet omail apwali ia me tapwendar; ari so, komail apwali ia ansau karos, a ansau kis komail sota kak ong.

4:11  I sota inda mepukat pweki ai samamalar, pwe i kin insenemau ni ai samama o ni ai kapwapwa.

4:12  I asada duen tiak en samama o duen tiak en kapwapwa. Ngai koiokki meakaros o song karos, i kak metier o men mangadar, o muei met o tutupok.

4:13  I kak ong meakaros, pweki i, me katin ia da.

4:14  Ari so, me mau omail apwali ia la ni ai paiolar akan.

4:15  A komail men Pilipi pil asaer, me sota momodisou apapwali ia ni meakaros dueta komail sang ni tapin rongamau, ni ai ko wei sang Masetonien.

4:16  Pwe komail kisakis dong ia pan riapak ni ai samamalar nan Tesalonik.

4:17  Kaidin kisakis, me i kin rapaki, a i kin rapaki wa, pwen kalaudela noumail kisin likau.

4:18  Pwe me mi re i itar ong ia, op il laud sang. Muei met mi re i, ni ai aleer omail kisakis ren Epaprotitus. Meakan ras ong pomau eu o mairong mau eu, me kon ong Kot.

4:19  A ai Kot pan kotin kaitar omail samama duen a kapwapwa ni lingan ren Kristus Iesus.

4:20  A lingan en ko ong Kot o Sam atail kokolata! Amen.

4:21  Ai ranamau ong saraui kan karos ren Kristus Iesus. Ri atail akan, me mi re i, kin ranamau wong komail.

4:22  Saraui kan karos kin ranamau wong komail, pil toun im en Sisa mon karos.

4:23  Mak en atail Kaun Iesus Kristus en mi ren ngen omail! Amen.