Azeri - James

Chapter 1

1:1  اؤزونو تاري و رب عئسا مسئحه قول اتمئش من يعقوبدان، قرئب اؤلکه​لره داغيلميش اولان اون​‌​ائکي قبئله​يه: سالام.

1:2  قارداشلاريم، جوربه​جور ائمتاحانلارلا راستلاشديغينيز زامان، اونو بؤيوک شادليق حساب ادئن،

1:3  چونکي بئلئرسئنئز کي، ائمانينيزين ائمتاحاني تحمّول حاصئل گتئرئر.

1:4  قويون تحمّول ده اؤز کامئل نتئجه​سئنه چاتسين، اِله کي، سئز، هچ بئر شيئنئز اسکئک اولمادان، کامالا چاتيب کامئل اولاسينيز.

1:5  آمّا اگر سئزلردن بئرئنئن حئکمتي اَسکئکدئر، قويون تاريدان ائسته‌سئن کي، هر کسه سخاوتله مذمّتسئز عطا ادئر. و اونا عطا اولوناجاق.

1:6  لاکئن بونو گرک ائمانلا ائسته‌سئن و هچ شوبهه اتمه‌سئن. چونکي شوبهه ادن آدام، دهنزئن شپه​لرئنه بنزه‌يئر کي، کولک اونو قالديريب تلاطومه سالير.

1:7  بله آدام گومان آپارماسين کي، ربدن بئر شي آلاجاق.

1:8  موتَرَدّئد آدام هچ بئر يولوندا ثابئت ديئل.

1:9  آمّا وضعئيّتي حقئر اولان قارداش اؤز افضل منصبي ائله،

1:10  وارلي اولان دا اؤز حقئرلئيي ائله فخر اتسئن. چونکي وارلي آدام اوتون چئچه‌يي کئمي سولوب گده​جک.

1:11  دوغرودان دا گون، يانديران حرارتله چيخير، اوت قورويور، چئچه‌يي تؤکولور و اوزونون گؤزلّئيي محو اولور. وارلي آدام دا گؤردويو ائشلرده اِله سولاجاق.

1:12  خوش او آدامين حالينا کي، ائمتاحان آلتيندا تاب گتئرئر. چونکي تصدئق اولوناندان سونرا، او حيات تاجيني آلاجاق کي، رب اونو سِونلره وعده ورئب.

1:13  هچ کس وسوسه​يه دوشن زامان دمه‌سئن: "من تاري طرفئندن وسوسه اولونورام." چونکي تاري پئسلئکله وسوسه اولونا بئلمز. او اؤزو ده هچ کسي وسوسه اتمئر.

1:14  لاکئن هر کس او زامان وسوسه​يه دوشور کي، اؤز شهوتي طرفئنه چکئلئب اونا آلدانير.

1:15  او زامان شهوت بويلو اولوب گوناهي دوغور، گوناه دا عمله گلدئکده اؤلوم گتئرئر.

1:16  سوگئلي قارداشلاريم، آلدانمايين.

1:17  هر بئر ياخشي شي و هر کامئل عطا يوخاريدان، نورلارين آتاسيندان نازئل اولور کي، اوندا نه ديئشئلمک وار نه ده دؤنمکلئک کؤلگه​سي.

1:18  او، اؤز ائراده​سئني عمله گتئره‌نده، بئزي حقئقتئن کلامي ائله تؤولئد اتدي، اِله کي، بئز اونون مخلوقلاري آراسيندا بئر جور نوباراليق ميوه​سي کئمي اولاق.

1:19  بونو سئز بئلئرسئنئز، سوگئلي قارداشلاريم. لاکئن هر کس گرک اشئتمکده ائتي، دانيشماقدا تمکئنلي و حئرصده گج اولسون.

1:20  چونکي ائنسانين حئرصي تارينين صالحلئيئنه نايئل اولمور.

1:21  بونا گؤره ده، بوتون کثئفلئيي و شرارتدن نه قالاني ترک اِدئب، اَکئلمئش کلامي حلئملئکله قبول ادئن کي، جانلارينيزي قورتارماغا قادئردئر.

1:22  آمّا ثابئت ادئن کي، آنجاق کلامي اشئدئب اؤزلرئني آلداتان ديئلسئنئز، کلاما عمل ادنلرسئنئز.

1:23  چونکي اگر بئري کلاما عمل ادن يوخ، کلامي آنجاق اشئدندئر، او آداما بنزه‌يئر کي، اؤز طبئعي اوزونه گوزگوده باخير.

1:24  چونکي او، اؤزونه بئر باخيب گدئر و آنَن نجه بئر آدام اولدوغونو ياددان چيخاردير.

1:25  لاکئن کئم کامئل شرئعته، آزادليق شرئعتئنه دئقّتله باخير و اوندا داوام ادئر و ياددان چيخاردان بئر اشئدن يوخ، اونا عمل اِدَندئر، بو آدام اتدئيي هر ائشده موبارک اولاجاق.

1:26  اگر کئمسه وار کي، اؤزونو دئندار گومان ادئر، لاکئن اوره‌يئني آلداديب حله ده دئلئنه جئلوو باغلامير، بو آدامين دئندارليغي دَيَرسئزدئر.

1:27  آتا تارينين نظرئنده تمئز و لکه​سئز دئندارليق بودور: يتئملرئن و دوللارين سيخينتي زامانلاريندا اونلارين گؤروشوکلرئنه گتمک، و اؤزونو دونيادان لکه​سئز ساخلاماق.

Chapter 2

2:1  قارداشلاريم، شؤوکتلي ربّئمئز عئسا مسئحه ائمان گتئرنلر اولاراق، ائنسانلار آراسيندا فرق قويمايين.

2:2  چونکي اگر سئزئن کنئسه​يه قيزيل اوزوک تاخميش، فاخئر پالتار گيئنمئش بئر آدام گئرسه و يوخسول بئر آدام دا چئرکلي پالتار گيئنمئش گئرسه،

2:3  سئز فاخئر پالتاري اولانين قيدئنه قاليب ديئرسئنئز: "بويورون، سئز بورادا اَيله‌شئن." و يوخسول آداما ديئرسئنئز: "سن اورادا دور." و يا "کتئلئمئن يانيندا اوتور."

2:4  آيا بئربئرئنئزئن آراسيندا فرق قويماييبسينيز، پئس نئيّتلي قاضي‌لارا دؤنمه‌يئبسئنئز؟

2:5  قولاق آسين، سوگئلي قارداشلاريم، مگر تاري بو دونيانين يوخسوللاريني سچمه‌دي کي، ائماندا دؤولتلي اولوب، اونو سونلره وعده وردئيي پادشاهليغين وارئثلري اولسونلار؟!

2:6  آمّا سئز يوخسول آدامي حؤرمتسئز اِدئبسئنئز. مگر دؤولتلي ديئل کي، سئزه ظولم ادئب سئزي محکمه​يه چکئر؟!

2:7  مگر اونلار ديئللر کي، سئزه ورئلن موکرّم آدا کوفر ديئرلر؟!

2:8  آمّا اگر سئز موقدّس يازييا موطابئق او شاهانه شرئعتي يرئنه يتئرئرسئنئز کي، "قونشونو گرک اؤزون کئمي سِوه​سن"، ياخشي ائش گؤرورسونوز.

2:9  لاکئن اگر ائنسانلار آراسيندا فرق قويورسونوز، گوناه ادئرسئنئز و تقصئرکارلار کئمي شرئعت طرفئندن محکوم اولورسونوز.

2:10  چونکي هر کس بوتون شرئعتي رئعايت اِدئب لاکئن بئرئنده قوصور اتسه، اونلارين هاميسي اوچون خاطاکار اولوب.

2:11  چونکي "زئنا اتمه" دئين، "آدام اؤلدورمه" ده ددي. ائندي سن اگر زئنا اتمئرسن، آمّا آدام اؤلدورورسن، شرئعتي آياق آلتينا قويان اولوبسان.

2:12  بونا گؤره، او آداملار کئمي دانيشيب رفتار ادئن کي، اِله بئل، آزادليق شرئعتي ائله موحاکئمه اولوناجاقلار.

2:13  چونکي رحم اتمه‌ينه رحمسئزلئکله حؤکم اولوناجاق. رحم حؤکمه قالئب گلئر.

2:14  قارداشلاريم، اگر بئر آدام عملي يوخ ائکن، ائماني اولدوغونو دِسه، بونون اونا نه فايداسي وار؟ مگر او ائمان اونو نئجات وِره بئلر؟!

2:15  اگر بئر قارداش يا دا باجي لوتدور و گونده​لئک يمه‌يئنه مؤحتاج.

2:16  و سئزلردن بئرئنئز اونلارا دسه کي: "سالامات گدئن، قيزيشين و دويون"، لاکئن اونلارين بدني اوچون ضروري اولان شيلري ورمه‌يه​سئنئز، نه فايداسي وار؟!

2:17  ائمان دا بوجوردور: اگر عمل​لري اولماسا، اؤزو‌-اؤزونده اؤلودور.

2:18  لاکئن کئمسه دئيه بئلر کي، "سنئن ائمانين وار، منئم ده عمل​لرئم. سن ائمانيني منه عملسئز گؤرسد و من ائمانيمي عمل​لرئمله سنه گؤرسده‌رم."

2:19  سن ائنانيرسان کي، تاري بئردئر؛ ياخشي ادئرسن. ائبلئسلر ده بونا ائنانيب تئتره‌يئرلر.

2:20  آمّا سن عاغيلسيز آدام، آيا ائسته‌يئرسن درک اده​سن کي، عملسئز ائمانين فايداسي يوخدور؟

2:21  مگر آتاميز ائبراهئم، اوغلو ائسحاقي قوربانگاهين اوستونده قوربان تقدئم اِدَنده، عمللري ائله صالح ساييلمادي؟

2:22  گؤرورسن کي، ائمان اونون عمللري ائله ائشله‌يئردي و عمللري نتئجه​سئنده ائمان کامئللَشدي.

2:23  موقدّس يازي دا يرئنه يتشدي کي، ديئر: "و ائبراهئم تارييا ائناندي و بو اونا صالحلئک ساييلدي." و او، تارينين دوستو چاغيريلدي.

2:24  گؤرورسونوز کي، ائنسان آنجاق ائمانلا يوخ، عمللري ائله صالح ساييلير.

2:25  مگر فاحئشه راحاب دا همن جور اؤز عمللرئنه گؤره صالح ساييلمادي، او زامان کي، جاسوسلاري قبول ادئب آيري بئر يوللا يولا سالدي؟!

2:26  چونکي نجه کي، روحسوز بدن اؤلودور، عملسئز ده ائمان اؤلودور.

Chapter 3

3:1  قارداشلاريم، مبادا سئزلردن چوخونوز موعلّئم اولماق اوچون جان آتاسينيز، چونکي بئلئرسئنئز کي، بئز داها شئدّتلي موحاکئمه اولوناجاغيق.

3:2  چونکي هاميميز بئر چوخ شيلرده خاطا ادئرئک. سؤزونده خاطا اتمه‌ين آدام، کامئل بئر ائنساندير، بدنئن قاباغيني آلماغا دا قادئردئر.

3:3  بئز آتلارين آغزينا جئلوو تاخيريق کي، بئزدن ائطاعت اتسئنلر و اونلارين بوتون بدنئني ائداره ده ادئرئک.

3:4  گمئلره ده بئر باخين. بؤيوک اولدوقلاري و گوجلو يللر​له آپاريلديقلاري حالدا، سوکانچينين گؤيلو هارايا ائسته‌سه، کئچئک بئر سوکانلا او طرفه دؤنور.

3:5  اِله ده دئل، بدنئن کئچئک بئر عوضوودور، آمّا بؤيوک زادلار دانيشير. گؤر کئچئک بئر آلوو نه بؤيوک مشه​ني يانديرير!

3:6  دئل بئر اوددور. حاقسيزليق عالمي‌دئر. دئل عوضولرئمئزئن آراسيندا اله ير آليب کي، بوتون بدني نجئس ادئر، حياتين دؤورانيني اودا چکئر، جهنّم طرفئندن ده آلوولانديريلير.

3:7  چونکي حيوانلار و قوشلارين هر جئنسي، سورونَنلر و دهنز مخلوقلارينين هر جئنسي ائنسان عئرقي طرفئندن رام اولونور و رام اولونوب.

3:8  آمّا دئلي هچ کس رام اِده بئلمز. آرام توتمايان شردئر، اؤلوملو زهردن دولودور.

3:9  اونونلا بئز رب و آتاني موبارک چاغيريريق و اونونلا تارينين صورتئنده يارانان ائنسانلاري لعنت ادئرئک.

3:10  همن آغيزدان هم برکت چيخير، هم ده لعنت! قارداشلاريم، بو بله اولمامالي‌دير.

3:11  مگر بئر بولاقدان هم شئرئن سو، هم ده آجي سو چيخار؟!

3:12  قارداشلاريم، مگر انجئر آغاجي زيتون گتئرر و يا اوزوم آغاجي انجئر بار ورر؟! دوزلو بولاق دا شئرئن سو وره بئلمز.

3:13  آرانيزدا حئکمتلي و فراستلي اولان کئمدئر؟ قوي او، عمللرئني حئکمتئن حلئملئيئنده ياخشي رفتاري ائله گؤرسدسئن.

3:14  آمّا اگر اوره‌يئنئزده آجي پاخيلّيق و اؤز منفعتئنئز اوچون منصبطلبلئک وار، کئبئرلنمه‌يئن و بلجه حقئقتئن ضئدّئنه يالان دانيشمايين.

3:15  بو يوخاريدان نازئل اولان حئکمت ديئل، دونيه‌وي‌دئر، نفساني و ائبلئسدندئر.

3:16  چونکي پاخيلّيق و منصبطلبلئک هر يرده اولسا، قاريشيقليق و هر جور پئس شي ده اورادير.

3:17  لاکئن يوخاريدان نازئل اولان حئکمت اوّلن پاکدير، سونرا باريشان، مولايئم، منطئقلي، مرحمت و ياخشي ثمره​لردن دولو، قَرَضسئز، رئياسيز.

3:18  صالحلئيئن ميوه​سئني بار ورن توخوم، باريشانلارين واسئطه​سئله باريشدا اَکئلئر.

Chapter 4

4:1  آرانيزدا اولان داعوالار و ائختئلافلار هارادان باش آلير؟ مگر او هاوا-هوسلرئنئزدن ديئل کي، عوضولرئنئزده داعوا ادئر؟

4:2  آرزو ادئرسئنئز، لاکئن يوخونوزدور. بونون اوچون آدام اؤلدورورسونوز. پاخيلّيق ادئرسئنئز، آمّا اَله گتئره بئلمئرسئنئز. بونا گؤره ده ساواشيب، داعوا ادئرسئنئز. يوخونوزدور، چونکي طلب اتمئرسئنئز.

4:3  طلب ادئرسئنئز، لاکئن آلميرسينيز. چونکي سهو نئيّتلر​له طلب ادئرسئنئز، اِله کي، اونو اؤز هاوا-هوسلرئنئز اوچون صرف اده​سئنئز.

4:4  سئز، زئناکارلار! مگر بئلمئرسئنئز کي، دونيا ائله دوستلوق اتمک، تارينين ضئدّئنه دوشمنچئلئکدئر؟! بونون اوچون کئم دونيانين دوستو اولماق ائسته‌سه، اؤزونو تارينين دوشمني ادئر.

4:5  يوخسا موقدّس يازينين بوش يره بونو يازديغيني دوشونورسونوز کي، "تاري، ائچئمئزده ساکئن اولمالي موقدّس روحو، قيرتله آرزو ادئر"؟

4:6  لاکئن تاري داها بؤيوک فيض عطا ادئر. بو سببدن ديئر: "تاري مغرور آداملارا ضئدّ دورور، لاکئن باشي‌آشاغي آداملارا فيض عطا ادئر."

4:7  پس، تارييا موطئع اولون. شيطانين قاباغيندا موقاوئمت ادئن و او سئزدن قاچار.

4:8  تارييا ياخينلاشين، او دا سئزه ياخينلاشار. سئز گوناهکارلار، اللرئنئزي تمئزله‌يئن؛ سئز موتردّئدلر، اورکلرئنئزي طاهئر ادئن.

4:9  قوصّه ييئن، ياس توتون، آغلايين. قويون گولوشونوز ياسا، شادليغينيز دا قمه دؤنسون.

4:10  ربّئن حوضوروندا اؤزونوزو آلچالدين و او سئزي اوجالدار.

4:11  قارداشلار، بئربئرئنئزي پئسلمه‌يئن. قارداشينين ضئدّئنه دانيشان يا دا قارداشيني موحاکئمه اِدن، شرئعتئن ضئدّئنه دانيشير و شرئعتي موحاکئمه ادئر. آمّا اگر شرئعتي موحاکئمه اده​سئنئز، شرئعته عمل ادن يوخ، اونو موحاکئمه​يه چکنسئنئز.

4:12  آنجاق بئر شرئعت ورن و بئر قاضي وار. هم نئجات ورمه‌يه، هم ده هلاک اتمه‌يه قادئر اولان اودور. آمّا سن کئمسن کي، اؤز قونشونو موحاکئمه اده​سن؟!

4:13  ائندي باخين، سئزلر کي، ديئرسئنئز "بو گون يا دا صاباح فئلان و بهمان شهره گده‌رئک و اورادا بئر ائل تئجارته مشغول اولوب، قازانج ييغاريق."

4:14  حال بو کي، حياتينين صاباح نه جور اولدوغونو بئلمئرسئنئز. سئز بوخار کئمئسئنئز کي، آز بئر مودّت گؤرونور و سونرا ائتئب​ ​گدئر.

4:15  بونون عوضئنه سئز گرک دئيه​سئنئز: "اگر رب ائسته‌سه، ياشاياريق، بونو و اونو دا اِده​رئک."

4:16  آمّا نجه کي، وار، سئز تکبّورونوزه فخر ادئرسئنئز؛ بوتون بله فخرلر پئسدئر.

4:17  بونا گؤره، هر کس کي، دوروست ائشي بئلئر، لاکئن اونو يرئنه يتئرمئر، گوناه ادئر.

Chapter 5

5:1  باخين ائندي، اي وارلي‌لار! باشينيزا گله​جک موصئبتلردن اؤتري آغلايين و شئون ادئن.

5:2  مال-دؤولتئنئز چورويوب، پالتارينيزي دا گووه ييئب.

5:3  قيزئل و گوموشونوز پاسلانيب و اونلارين پاسي ضئدّئنئزه بئر شاهئد اولاجاق و اود کئمي جئسمئنئزي يئيه​جک. سئز آخير گونلرئنئزده ثروت ييغيبسينيز!

5:4  باخين، زمئلرئنئزي بئچن ائشچئلردن ساخلاديغينيز موزد، سئزئن ضئدّئنئزه قيشقيرير. بئچئنچئلرئن قيشقيرتيسي فوجلار ربّئنئن قولاقلارينا چاتيب.

5:5  سئز ير اوزونده کفله ياشاييبسينيز و لذّت دولو بئر حيات کچئردئبسئنئز. قحطي گونده اورکلرئنئزي کؤکَلدئبسئنئز!

5:6  صالح آدامي محکوم ادئب، اؤلومه ورئبسئنئز؛ او سئزئن قاباغينيزدا موقاوئمت اتمئر.

5:7  بونا گؤره، قارداشلار، ربّئن گلئشئنه کئمي صبئرلي اولون. اکئنچي تورپاغين ديرلي حاصئلي اوچون ائنتئظار چکئر و ائلک و آخير ياغيشي آلاناجاق صبئرلي اولور.

5:8  سئز ده صبئرلي اولون. اورکلرئنئزي قووّتلندئرئن. چونکي ربّئن گلئشي ياخيندير.

5:9  بئربئرئنئزئن ضئدّئنه شئکايت اتمه‌يئن، قارداشلار! اِله کي، سئز اؤزونوز ده موحاکئمه اولونماياسينيز. باخين، موحاکئمه ادن، قاپي آغزيندا دايانيب.

5:10  قارداشلار، عذاب چکمکده و صبئرلي اولماقدا ربّئن آديندا دانيشان نَبئلردن نومونه آلين.

5:11  بئز تحمّول ادنلري بختور ساييريق. سئز اَيّوبون تحمّولونو اشئدئبسئنئز و ربّئن اتدئيئنئن نتئجه​سئني ده گؤروبسونوز کي، رب چوخ شفقتلي و مرحمتلي‌دئر.

5:12  لاکئن، قارداشلاريم، هاميدان اوّل، نه گؤيه، نه يره، نه ده باشقا بئر شيه آند ائچئن؛ لاکئن سئزده قوي "بلي"، بلي اولسون و "خير"، خير اولسون اِله کي، موحاکئمه​يه چکئلمه‌يه‌سئنئز.

5:13  آيا آرانيزدا عذاب آلتيندا اولان بئري وار؟ او، گرک دوعا اتسئن. آيا شاد اولان بئري وار؟ او، حمدلر اوخومالي‌دير.

5:14  آيا آرانيزدا ناخوش بئري وار؟ او گرک کئلئسانين آغساقّاللاريني چاغيرسين. اونلار دا گرک اونون اوچون دوعا ادئب، ربّئن آديندا اونو ياغلا مسح اتسئنلر.

5:15  و ائماندا ادئلن دوعا ناخوش آدامي صاغالدار و ربّ اونو قالديرار. گوناهلار اتمئش اولسا دا، اونا باغيشلانار.

5:16  بونون اوچون، گوناهلارينيزي بئربئرئنئزه اعتئراف ادئن و بئربئرئنئز اوچون دوعا ادئن، اِله کي، شفا تاپاسينيز. صالح بئر آدامين تأثئرلي دوعاسي چوخ شي اتمه‌يه قادئردئر.

5:17  ائليا دا همن بئزئم کئمي بئر آدام ائدي و صداقتله دوعا اتدي کي، ياغيش ياغماسين و اوچ ائل آلتي آي ير اوزونه ياغيش ياغمادي.

5:18  سونرا گئنه دوعا اتدي و گؤي ياغيش ياغديريب، ير اوزو ميوه​لرئني گتئردي.

5:19  قارداشلاريم، اگر سئزلردن بئرئنئز حقئقتدن آزسا، و اؤزگه بئري اونو قايتارسا،

5:20  قوي او آدام بئلسئن کي، گوناهکاري سهو يولوندان دؤنده‌رَن، اونون جانيني اؤلومدن قورتارار و چوخ گوناهلارين اوستونو اؤرتر.