Kapingamarangi - James

Chapter 1

1:1  Mai James, tangada hai-hegau a God, mo Tagi go Jesus Christ. Taga-aloho ang-gi nia dama a God huogodoo ala gu-modoho i henuailala.

1:2  Ogu duaahina-nei, goodou gi-maanadua bolo goodou e-haadanga-lamalia gi-nia hagadilinga haingadaa huogodoo ala ma-ga-tale-adu gi goodou.

1:3  Idimaa, goodou e-iloo bolo godou hagadonu ma-ga-maaloo i-nia haingadaa aanei, le e-haga-llauehe-aga godou manawa-hagakono i-di madagoaa haingadaa.

1:4  Goodou la-gii-pula i godou manawa-hagakono i-nia madagoaa haingadaa gii-noho-hua beelaa, gei goodou gaa-dohu huoloo, ga-dogomaalia.

1:5  Maa tangada i goodou e-dee-dohu dono iloo mee, geia gi-dalodalo ang-gi God, ge God ga-dugu-anga, idimaa, God e-manawa-dumaalia gaa-hana-hua beelaa ang-gi nia daangada huogodoo.

1:6  Malaa, goodou e-hai-loo gi-dalodalo mo-di hagadonu, hagalee manawa-logo. Tangada dela e-manawa-logo le e-hai gadoo be-di beau o-di moana dela e-bagibagia i-di madangi.

1:7  Tagadilinga dangada beenei digi dogomaalia dono hilihili, digi hagatogomaalia ana mee e-hai, ia gi-hudee maanadu bolo ia e-mee di-kae ana mee mai baahi o Dimaadua.

1:8  Tagadilinga dangada beenei digi dogomaalia dono hilihili, digi hagatogomaalia ana mee e-hai, ia gi-hudee maanadu bolo ia e-mee di-kae ana mee mai baahi o Dimaadua.

1:9  Nia duaahina dama a Christ hagaloale e-hai-loo gi-tenetene i-di madagoaa digaula e-haga-menege-aga go God.

1:10  Nia duaahina dama a Christ maluagina gi-tenetene labelaa i-di madagoaa dela e-dugu-eia go God, idimaa, digau ala e-maluagina ga-hagalee, gadoo be-di akai o-di laagau geinga.

1:11  Gei di laa gaa-hobo, ga-welengina, gaa-dudu nia laagau, gei nia akai gaa-mae, ga-monnono. Nadau madamada ga-hagalee. Dela gadoo be tangada maluagina dela ma-ga-daaligi ga-hagalee i dono madagoaa e-hai dana moomee.

1:12  E-maluagina go tangada dela e-manawa-dahi i-lodo nia hagamada haingadaa. I-muli di aali i ono hagamada, geia e-kae di hui o-di mouli. Deenei go di mouli a God ne-hagababa ang-gi digau ala e-aloho i-de-Ia.

1:13  Maa tangada gaa-tale gi-nia hagamada haingadaa, geia gi-hudee helekai boloo, “Nia hagamada aanei ne-loomoi i-baahi o God.” Idimaa, di huaidu e-deemee di-hagamada a God, gei God hogi hagalee e-hagamada tangada.

1:14  Malaa, tangada le e-tale gi-nia hagamada mai i ono hiihai huaidu.

1:15  Gei ono hiihai huaidu ga-hagadili-aga nia huaidu, gei di huaidu ga-tomo-aga gaa-hidi-ai di made.

1:16  Ogu ihoo hagaaloho-nei, hudee heia goodou gi-halahalau-ina go tangada.

1:17  Nia wanga-dehuia humalia huogodoo, mono maluagina e-dohu huogodoo, le e-lloomoi i-di langi i-baahi o God dela ne-hai nia maahina o-di langi. God hagalee huli, ge hagalee hagabouli.

1:18  Mai dono hiihai oono, Mee ne-hai gidaadou mai ana helekai donu, bolo gii-hai gidaadou nia ulu-mmaadua o ana mee huogodoo.

1:19  Ogu duaahina hagaaloho-nei, goodou gi-langahia di mee deenei: Tangada-nei mo tangada-nei i goodou huogodoo, gi-limalima di hagalongo, malaa, hudee hagalellele di helekai, hudee limalima di hagawelewele.

1:20  Idimaa, di hagawelewele o tangada la-hagalee hagamaamaa di haga-gila-aga di manawa-donu a God.

1:21  Malaa, goodou haga-mogowaa-ina goodou gi-daha mo nia hangaahai milimilia, mo nia haihai-hala huogodoo. Goodou dugu-anga goodou gi God ge gi-kae-ina ana helekai ala e-dogi go Mee gi-lodo godou manawa, aanei nia helekai e-mee di-haga-mouli goodou.

1:22  Goodou haga-hai-hegau-ina nnelekai a God. Maa goodou ga-hagalongo-hua gi-nia maa, gei goodou e-bida halahalau-hua goodou.

1:23  Tangada dela ma-ga-hagalongo-hua gi-nia helekai a God, gei hagalee haga-gila-aga nia maa, ia e-hai gadoo be tangada dela ma-gaa-mmada gi-lodo di kalaadi, ia ne-mmada-hua gi dono ada.

1:24  Mee e-mmada gi humalia gi dono ada. Dono madagoaa ne-hana gi-daha mo-di kalaadi, geia gu-limalima-hua gu-de-langahia dono ada.

1:25  Tangada dela e-mmada gii-donu gi taganoho hai-donu dogomaalia dela e-haga-dagaloaha nia daangada, ga-hagalongo gii-donu, geia hagalee hagalongo-hua ga-de-langahia di-maa, gei mee e-daudali-ai, deenei tangada a God e-hagahumalia i ana mee huogodoo ala e-hai.

1:26  Maa tangada i-golo e-hagamaanadu bolo ia tangada daumaha humalia, geia e-deemee di-benebene dono holole, dono hai-daumaha le e-balumee-hua, ia e-bida halahalau-hua ia.

1:27  Di mee a God Tamana dela e-hai bolo taumaha dela e-madammaa gei e-donu, la-deenei: Madamada humalia nia damagiigi ala guu-mmade nadau maadua, mo nia ahina guu-mmade nadau lodo i nadau haingadaa, ge hudee hagahuaidu-ina ginaadou gi-nia hangaahai huaidu o henuailala.

Chapter 2

2:1  Ogu duaahina-nei, i-di godou hagadonu tadau Dagi madamada go Jesus Christ, goodou hudee dugudugu-gee nia daangada i-di gili nadau hangaahai.

2:2  Dolomaa taane maluagina dono buulei goolo, e-ulu ono gahu humalia, ga-ulu-mai gi godou baahi i-di miiting, gei taane hagaloale e-ulu i-nia gahu huaidu e-ulu-mai labelaa,

2:3  maa goodou ga-hagalabagau taane ono goloo humalia, ga-helekai gi mee, “Noho i-hongo di lohongo humalia deenei,” ga-helekai gi tangada ono goloo huaidu boloo, “Duu i-gono,” be, “Noho gi-hongo di baba i-baahi ogu wae,”

2:4  malaa, goodou gu-ihala i-di godou waewae godou mehanga, ga-hidi-mai dau hilihili nia maanadu huaidu!

2:5  Ogu duaahina hagaaloho-nei, goodou hagalongo! God e-hilihili digau hagaloale o henuailala bolo gii-honu i-di hagadonu, gi-hai-mee gi Tenua dela ne-hagababa ang-gi digau ala e-aloho i-de-Ia.

2:6  Gei goodou la-gu-haga-balumee digau ala e-hagaloale! Ma koai ala e-wanga goodou gi-di haingadaa, gi-di gowaa hai-gabunga? Go digau ala e-maluagina!

2:7  Aanei go digau ala e-helekai huaidu i-di ingoo humalia dela ne-gowadu gi goodou.

2:8  Goodou gaa-hai di mee dela e-donu maa goodou ga-hagalongo gi taganoho o tenua o God, dela guu-hihi gi-lodo di Beebaa-Dabu, “Aloho i tangada dela i do baahi, gii-hai be do aloho i-di-goe.”

2:9  Maa goodou ga-dugudugu-gee nia daangada mai i-nia hangaahai digaula, malaa, goodou guu-hai di huaidu, gei nnaganoho gaa-hai bolo goodou digau gu-dagadagahi nnaganoho.

2:10  Tangada dela ma-ga-dagahi dana haganoho e-dahi i-nia haganoho, geia gu-dagahi nia haganoho huogodoo.

2:11  Idimaa, go tangada lahua ne-helekai boloo, “Hudee hai be-di manu,” geia ne-helekai labelaa boloo, “Goe hudee daaligidia tangada gii-made.” Ma e-aha maa goe hagalee hai be-di manu, gei goe ne-daaligi tangada gii-made, malaa, goe tangada gu-dagadagahi nnaganoho.

2:12  Helekai gei gi-mouli be nia daangada ala ga-hagi-aga go taganoho e-haga-dagaloaha gidaadou.

2:13  Idimaa, God ga-hagalee dumaalia ang-gi tangada dela digi dumaalia gi dono ihoo, gei tumaalia le koia e-mahi i-di hagi-aga.

2:14  Ogu duaahina-nei, dehee tahidamee o tangada dela e-helekai bolo ia dono hagadonu i-golo, gei ono hegau ai? E-hai behee: tagadilinga hagadonu beenei e-mee di-haga-mouli ia?

2:15  Dolomaa tadau duaahina daane be ahina i-golo nadau gahu ai, mo nadau meegai hagalee dohu,

2:16  dehee tadinga o di-godou helekai gi mee boloo, “E-humalia. God ga-hagahumalia-laa goe! Gahu-ina goe gi-mahana, miami!” gei goodou digi wanga gi mee nia hagahumalia a-mee?

2:17  Di hagadonu dela deai ono hegau ai, e-modongoohia bolo di hagadonu-hua e-made.

2:18  Dolomaa tangada ga-helekai boloo, “Goe do hagadonu i-golo, gei au agu hegau i-golo.” Malaa, gei au ga-helekai boloo, “Haga-modongoohia-ina mai gi-di-au tangada e-hagadonu gei ono hegau ai, gei au ga-haga-modongoohia-adu gi-di-goe dogu hagadonu mai i agu hegau.”

2:19  E-hai behee go do hagadonu: Goe e-hagadonu bolo God le e-dahi-hua? E-humalia! Nia hagataalunga huaidu le e-hagadonu labelaa beenei, gei e-bolebole i nadau mmaadagu i God.

2:20  Goe tangada dadaulia! Goe e-hiihai bolo ma-gi-haga-modongoohia-ina adu gi-di-goe bolo di hagadonu dela ono hegau ai, la-dono hadinga ai?

2:21  Tadau damana go Abraham la-ne-aha gaa-donu i-baahi o God? Mee ne-donu i-baahi o God mai dana hai dela ne-tigidaumaha dana dama-daane go Isaac i-hongo di gowaa dudu-tigidaumaha.

2:22  Goe digi modongoohia? Dono hagadonu mo dono hai-hegau ne-ngalua ngaadahi, bolo gii-dohu-ai dono hagadonu mai i ana hegau.

2:23  Deelaa-laa, nia helekai di Beebaa-Dabu la-gu-kila-aga, ala e-helekai boloo, “Abraham la-gu-hagadonu a God. Idimaa go dono hagadonu, God guu-hila ang-gi mee gii-donu a-mee i dono baahi.” God gu-haga-ingoo Abraham bolo di hoo hagaaloho ni-oono.

2:24  Goodou gi-modongoohia bolo tangada le e-donu i-baahi o God mai i ana hegau, mo dono hagadonu, hagalee mai i dono hagadonu lahua.

2:25  E-hai labelaa be-di ahina huaidu go Rahab. Mee ne-donu i-baahi o God i dana hai dela ne-benebene digau hagadina o Israel, ge ne-hagau digaula hagammuni i tuai ala.

2:26  Tuaidina dela dono hagataalunga ai, tuaidina hua e-made, gei di hagadonu dela ono hegau ai, di hagadonu hua e-made labelaa.

Chapter 3

3:1  Ogu duaahina-nei, e-dogologo i goodou hagalee hai gii-hai digau agoago, idimaa, goodou gu-iloo bolo gimaadou digau agoago le e-kae di hagi-aga damana i digau ala i-golo.

3:2  Gidaadou huogodoo e-hai di hala i-nia madagoaa e-logo. Maa tangada hagalee hala ana helekai, ia e-donu, e-mee di-benebene dono huaidina hagatau.

3:3  Gidaadou e-wanga di baalanga gi-di ngudu di hoodo bolo gi-hagalongo a-mee gii-hana gi-di gowaa belee dagi ginai.

3:4  Goodou gi-maanadu-ina labelaa di hai o-di wagabaalii damana dela e-hahaangi go di madangi maaloo. Di wagabaalii deenei e-mee-hua di-ulungi go tamaa-hoe hua dulii, gei di-maa gaa-dele gi-di gowaa dela e-hiihai ginai di gaabinu.

3:5  E-hai gadoo be tolole tangada, tama dudaginga dulii-loo, gei e-mee di-helekai hagaamu-ia i-nia hagadilinga mee llauehe. Maanadua labelaa lodo henua hagatau e-mee di-dudu go di mada-gologolo dulii-loo.

3:6  Tadau holole le e-hai be di ulaula o-di ahi. E-honu nia hagadilinga huaidu huogodoo, e-haga-ihala tadau huaidina hagatau, gaa-hidi-ai tadau mouli, gaa-wele i-di ahi dela e-hanimoi i-di ahi dee-odi.

3:7  Tangada e-mee di haga-gaidala nia manu, gu-haga-gaidala nia hagadilinga manu huogodoo ala i henuailala: nia manu lodo-geinga, nia manu-mamaangi, nia manu dolodolo, mono iga.

3:8  Tangada ne-haga-gaidala dono holole ai. Tolole o tangada le e-huaidu huoloo, ge e-hagadau-dangada, ge e-honu i-nia mee haga-huaidu dangada.

3:9  Gidaadou e-hai-hegau gi tadau holole e-danggee gi tadau Dagi mo tadau Damana, gei e-hai-hegau labelaa i tadau haga-halauwa nia daangada ala ne-hai i-di ada o God.

3:10  Nnelekai danggee mo haga-halauwa, le e-loomoi-hua i di ngudu e-dahi. Ogu duaahina-nei, nia mee beenei hagalee belee hai.

3:11  Di monowai e-deemee di-hali-mai nia wai maangala mono wai mmala.

3:12  Ogu duaahina-nei, di laagau-‘fig’ e-deemee di-huwa ono huwa-olib, mo-di laagau-‘grape’ e-deemee labelaa di-huwa ono huwa-‘fig’, di monowai-mmala e-deemee di-uwa-aga nia wai maangala.

3:13  Koai e-kabemee, ge iloo i godou baahi? Tangada deelaa le e-mee di haga-modongoohia dono kabemee mai dono mouli, hegau humalia, mai di manawa hila gi-lala mo di iloo.

3:14  Maa tubua, hagadugina mo tumaanga la i godou lodo, malaa, goodou hudee heia di huaidu e-hai-baahi gi-di tonu i godou hagaamu godou kabemee.

3:15  Di kabemee beenei hagalee ne-haneia i-di langi. Di mee-hua ni henuailala, hagalee di mee ni-di Hagataalunga, di mee-hua ni Setan.

3:16  Di gowaa dela iai tubua mo tumaanga, deenei di gowaa e-noho di hinihini mo nia huaidu huogodoo.

3:17  Gei di kabemee mai nua, le e-madammaa i-mua nia mee huogodoo, e-noho i-di aumaalia, dumaalia ge hila-gi-lala, gei e-honu i tumaalia, gaa-hidi-ai nia hegau humalia e-logowaahee, hagalee dugu-gee nia daangada, ge hagalee hai-hegau ngudu golomada.

3:18  Di humalia deenei la-go nia huwa o-nia hegau humalia o digau ala e-hagahumalia mehanga daangada, ala e-dogi nadau lii i-di aumaalia.

Chapter 4

4:1  Nia hagadilinga heheebagi mono lagalagamaaloo huogodoo ala e-hai i godou mehanga, le e-daamada mai-i-hee? Ne-daamada mai i godou manawa hiihai huaidu ala e-hagadau heheebagi i godou lodo i-nia madagoaa huogodoo.

4:2  Goodou e-hiihai gi-nia mee, gei goodou e-deemee di-hai-mee ginai, gaa-hidi-ai goodou e-dadaaligi dangada. Goodou e-hiihai maaloo gi-nia mee, gei goodou e-deemee di hai-mee ginai, gei goodou ga-lagalagamaaloo ga-heheebagi. Gei goodou e-deemee di-hai-mee gi-di mee e-hiihai ginai, idimaa, goodou hagalee tangi ang-gi God.

4:3  Goodou ga-dangidangi gi God, gei goodou hagalee hai-mee ginai, idimaa, godou hagamaanadu la-hagalee donu, goodou e-tangi-hua i-nia mee e-haga-manawa lamalia-hua goodou.

4:4  Goodou digau e-de manawa-dahi. Goodou e-de-iloo bolo maa goodou gaa-hai nia hoo ni henuailala, dono hadinga bolo goodou nia hagadaumee ni God? Tangada dela e-hiihai e-hai di hoo hagaaloho ni henuailala, dela go mee gaa-hai di hagadaumee ni God.

4:5  Goodou hudee maanadu bolo ma di tonu i-lodo nia helekai di Beebaa-Dabu ai, dela e-helekai, “Di hagataalunga ne-dugu go God i tadau lodo, le e-honu i-nia maanadu dubua.”

4:6  Tumaalia o God dela e-gaamai dehuia gi gidaadou, la-koia e-damanaiee, gii-hai be nnelekai di Beebaa-Dabu, “God e-huli gi-daha mo digau hagamuamua, ge-Ia e-wanga dono dumaalia gi digau ala e-hila gi-lala.”

4:7  Dugu-anga goodou gi God. Hai baahi gi Setan, gei mee gaa-lele gi-daha mo goodou.

4:8  Lloomoi hagahoohoo-ina goodou gi-baahi o God, gei Mee ga-hagahoohoo-ia-adu gi godou baahi. Digau huaidu, haga-madammaa-ina godou lima. Digau hai-hegau ngudu-golomada, haga-madammaa-ina godou lodo.

4:9  Goodou gi-manawa-gee, tangitangi mo-di wawwawe. Huluhia godou gadagada gi-di tangi, di-godou tenetene gi-di manawa-gee.

4:10  Dugu-ina goodou gi-lala i-mua o God, gei Mee ga-haga-menege-aga goodou.

4:11  Ogu duaahina-nei, goodou hudee hagadau helekai huaidu i godou mehanga. Tangada dela e-hagahuaidu be e-hagi-aga dono duaahina, geia e-helekai huaidu mo-di hagi-aga nnaganoho. Maa goe e-hagi-aga nnaganoho, gei goe hagalee hagalongo gi-nia maa, e-hagi-aga-hua nia maa.

4:12  Ma go God hua dela e-hai nnaganoho ge e-hagi-aga tangada. Go Mee hua dela e-mee di-haga-mouli ge e-haga-halauwa. Goe koai dela bolo goe e-hagi-aga do duaahina dama a Christ?

4:13  Hagalongo-mai, goodou ala e-helekai, “Dangi-nei be daiaa gei gimaadou e-hula gi-di waahale deelaa, gaa-noho i-golo i-di ngadau e-dahi, malaa, gimaadou ga-huihui gi-daha madau mee, ga-gila-mai tagabae-bahihadu.”

4:14  Gei goodou e-de-iloo be godou mouli la-gaa-hai behee i-nia laangi ala e-lloomoi, idimaa, goodou e-hai gadoo be-di magalillili o lala di-langi, dela hua e-gila-aga tama-madagoaa dulii, ga-limalima-hua dono hagalee.

4:15  Deenei di-godou helekai belee hai, “Maa Dimaadua ga-dumaalia-mai, gei gidaadou ga-mouli, gaa-hai nia mee aanei be nia mee aalaa.”

4:16  Dolomeenei, gei goodou e-hagamuamua ge e-hagaamu goodou, di hai deenei le e-hai-gee.

4:17  Malaa, tangada dela e-iloo-ia di mee donu dela belee hai, geia hagalee hai di-maa, ia guu-hai di hala.

Chapter 5

5:1  Goodou ala e-maluagina, hagalongo-mai dolomeenei! Goodou gi-tangitangi ge gi-manawa-gee, i-di haadanga-balua la-ga-dae-adu gi goodou.

5:2  Godou maluagina la-ga-mooho, godou gahu la-gaa-gai go hiingodo.

5:3  Godou goolo mono silber la-gaa-tomo. Nia tomo aanei la di haga-modongoohia e-hai-baahi-adu gi goodou, gei e-gai godou huaidina gadoo be-di ahi. Goodou ne-benebene godou maluagina i-nia laangi hagaodi aanei.

5:4  Goodou digi huina nia daangada ala nogo ngalua i-lodo godou hadagee. Goodou gi-hagalongo gi nadau dee-donu. Nia lee o digau e-hagabudu godou huwa-laagau la-gu-hagalongo ginai a God, go Tagi Aamua.

5:5  Godou mouli i henuailala e-honu i-di mouli mo-di tene balumee. Goodou guu-hai goodou gii-pedi ang-gi di laangi o taaligi.

5:6  Goodou gu-hagahuaidu, gu-daaligi digau nadau ihala ai gii-mmade, gei digaula digi hai-baahi-adu gi goodou.

5:7  Ogu duaahina-nei, goodou gi-manawa hagakono gaa-dae-loo gi-di hanimoi o Tagi. Goodou mmada gi tangada hai-hadagee i dono manawa-hagakono i dono talitali nia huwa humalia o dana hadagee, gei e-manawa hagakono i dono talitali maalia di madagoaa e-doo di uwa.

5:8  Goodou gi-manawa hagakono gi-haga-damana-ina di-godou hagadagadagagee, idimaa, di laangi o Tagi la-gu-hoohoo-mai.

5:9  Ogu duaahina-nei, goodou hudee hagahuaidu-ina tangada-nei mo tangada-nei i godou mehanga, gi-de-hagi-aga-hua goodou go God. Goodou gi-iloo bolo Tangada hagi-aga gu-hoohoo-mai dono hanimoi.

5:10  Ogu duaahina-nei, goodou gi-langahia nia soukohp ala nogo hai nadau agoago i-di ingoo o Tagi. Goodou gii-kawe i nadau manawa-hagakono mo nadau hagamahi i-lodo nadau hagaduadua.

5:11  Gidaadou e-hai bolo digaula gu-maluagina i nadau manawa-hagakono i-lodo nadau hagaduadua. Goodou gu-longono di hai o Job i dono manawa-hagakono, gei gu-modongoohia di hai o Dimaadua dela gu-hagahumalia a-mee i-di hagaodi gi-muli, idimaa, Dimaadua e-honu i-di aloho mo tumaalia.

5:12  Ogu duaahina-nei, i-mua nia mee huogodoo, goodou hudee hai hagamodu ma-gaa-hai godou hagababa. Goodou hudee hai hagamodu gi-di langi be gi henuailala, be tei-aha e-de-hilihili. Goodou helekai-hua boloo, “Uaa” maa goodou gaa-donu, ge “Deeai” maa goodou ga-hagalee donu, gi-dee too-hua goodou gi-lodo di hagi-aga a God.

5:13  Maa tangada i godou baahi gu-manawa-gee, ia gi-dalodalo. Maa iai tangada e-tenetene, ia gi-daahili hagaamu.

5:14  Maa iai tangada i godou baahi e-magi, geia gi-gahia-mai nia daangada mmaadua-daumaha, e-dalodalo, ge e-hagatulu a-mee gi-di lolo hagalabagau i-di ingoo o Tagi.

5:15  Talodalo dela e-hai-aga i-lodo di hagadonu, gei tangada magi la-gaa-hili. Tagi ga-hagamaaloo-aga a-mee, ga-dumaalia gi ono hala.

5:16  Malaa, goodou gi-hagadau hagi-aga godou huaidu mo-di dalodalo i tangada-nei mo tangada-nei, gi-maaloo goodou. Talodalo o tangada humalia la-koia e-mogobuna.

5:17  Elijah tangada gadoo be gidaadou, mee ne-dalodalo hagamahi bolo di uwa gi-hudee doo. I-nia ngadau e-dolu mo-di baahi, gei di uwa digi doo.

5:18  Geia ga-dalodalo labelaa, gei di-langi gu-haga-doo dana uwa gi henuailala, gu-haga-tomo-aga nia hagadili.

5:19  Ogu duaahina-nei, maa tangada i godou baahi guu-hana-gee mo-di tonu, goodou heia a-mee gii-huli-hoou labelaa.

5:20  Goodou gi-langahia bolo tangada dela ma-gaa-huli tangada huaidu gi-daha mo ono hala, ia ne-daa di mouli o-maa gi-daha mo-di made, guu-gahu nia hala e-logo gi tumaalia o-nia hala logowaahee.