LinVB - Micah

Chapter 1

1:1  Yoka maloba Yawe alobaki na Mikea wa Moreset, o eleko Yotam, Akaz na Ezekia bazalaki bakonzi ba Yuda. Amonoki mamoni mayebisi ye makambo matali Samaria na Yeruzalem.

1:2  Bino bato ba mokili mobimba, boyoka ! Botia matoi, mokili na biloko bi­nso bizali wana ! Yawe akosakola makambo ma bokaneli bino, Yawe oyo azali o ndako ya ye esantu !

1:3  Yawe abimi o ndako ya ye esantu, akiti mpe atamboli o nsonge ya ngomba.

1:4  Esika ye anyati, ngomba inya­ngwi, mabwaku mapaswani, manyangwi lokola mafuta o móto, lokola mai masopani o mopanzi mwa ngomba.

1:5  Mana manso masalemi mpo ya mabe ma Yakob, mpo ya lisumu lya bato ba libota lya Israel. Mosumuki wa Yakob nani ? Bobele Samaria te ? Mosumuki wa Yuda nani ? Bobele Yeruzalem te ?

1:6  « Nakokomisa Samaria mobimba mopotu, ekotikala se mabelé mabongi na boloni nzete ya vino. Nakobwaka biliki bya ndako o libulu linene, nakokundola ata mabanga ma nse mabima libanda.

1:7  Nakobuka bikeko binso bya ba­nzambe bizali na ye, nakobwaka misolo mya bondu­mba bwa ye o móto ; nakobuka bikeko bya banzambe biteni biteni, bikeko bina bisalemi na mosolo mozwamaki na bondumba, bakobongola byango lisusu mosolo mwa kofuta bandumba. »

1:8  Na ntina ena nakobanda kokimela mpe kolela, kotambola makolo mpamba, elamba o nzoto te. Nakobanda komilela lokola mi­nsole mikokimelaka, boleli bwa mawa lokola boleli bwa maligbanga.

1:9  Mpota ya Samaria ikobela te, isili ikomi kin’o Yuda, kin’o lopango la bato ba ngai, kin’o Yeruzalem !

1:10  Boyebisa yango na Gat te, bolela mpe te ; o Bet-Leafra bobilingana o potopoto.

1:11  Bolelisa liseke, bino bato bofandi o Safir ! Bato ba Sanan babimi o mboka te ! Bet-Esel ebebi nye kin’o mabanga ma nse !

1:12  Bato bafandi o Marot bakomi kobele na bokanisi nkita ya bango, zambi Yawe akitisi malozi manene kin’o ezibeli ya Yeruzalem.

1:13  Bobongisa farasa na makalo, bino bato bofandi o Lakis, bolakisi bato ba Sion nzela ya masumu, mpe bokomisi ba-Israel motó makasi.

1:14  Botika bato ba Moreset-Gat. Bato ba Aksib bakotiela bakonzi ba Israel motambo.

1:15  Bato ba Maresa, bayibi bakozongela bino ! Lokumu la Israel lokokoma kin’o Adulam !

1:16  Kata nsuki ya yo, tambola motó kolokolo mpo ya bilenge babali bazalaki ko­yokisa yo esengo ! Zala na libandi lokola motó mwa engondo, zambi bakangemi o boombo, mosika na yo !

Chapter 2

2:1  Mawa na bato baluki kosala mabe, baye bakani mikano mibe o mbeto ya bango ! Etani ntongo bakokisi maye bakanaki kosala, zambi bazali na bokasi !

2:2  Oyo aluli elanga ya moninga akoyiba yango, oyo alingi ndako ya ye, akobotolo yango. Akokanga nkolo wa ndako mpe akozwa ndako ya ye ; akokanga nkolo wa biloko mpe bakozwa biloko bya ye.

2:3  Yango wana Yawe Nzambe alobi : Nakopesa bato baye etumbu enene, nzela ya komibikisa ekozala te ; moto moko akotombola motó lisusu te, zambi ekozala mikolo mya mpasi enene.

2:4  Mokolo mona bato bakotiola yo na minkanda, bakotia makambo ma yo o nze­mbo ya boleli, bakoloba : « Babotoli biso biloko binso ; bakaboli lisango lya biso na bauta. Moto moko te akozongisa lyango ; bayibi bakabelani mabelé ma biso. »

2:5  Okozala na moto moko te akoki kopesa yo lisango o boko­nzi bwa Yawe.

2:6  Basusu balobi na ngai : « Botika kobimisa nsoi ! Bakosakolaka bongo te ! Nsoni ekokwela biso te !

2:7  Batombeli nde bato ba Yakob bobe ? Yawe akoki kokanga motema lisusu te ? Ye akosalaka nde bongo ? Azali se na maloba ma boboto te ona bato ba bosembo ? »

2:8  Bomilakisi lokola banguna ba bato ba ngai : moto azali na likambo te, bokobotoloko ye molato ; oyo asengeli kobanga eloko te, bokoyokisaka ye mpasi ya etumba.

2:9  Bokobenganaka basi ba ekolo ya ngai o ndako ya bango, ndako eye balingi mpe basepeli kofanda ; bokobotoloko bana ba bango mabelé napesaki bango :

2:10  « Boteleme, bokende, bopema lisusu te ! » Mpo ya mbindo ya bino bakobebisa mboka nye.

2:11  Soko profeta wa lokuta alobaki na bato : « Bopesa ngai vino namele, bongo nakosakola na bino maka­mbo malamu », mbele bandimaki ye noki lokola profeta wa bango.

2:12  Solo, nalingi kosangisa libota mobimba lya Yakob, nalingi kosangisa bato banso ba Israel baye batikali ! Nakosangisa bango banso o lopa­ngo lokola mpata, lokola etonga ya bibwele o esobe, bato bakotonda wana !

2:13  Elombe akokamba bango, bakoleka o ezibeli, bakobima o lopango, mokonzi wa bango akoleka liboso mpe Yawe akokamba bango.

Chapter 3

3:1  Nalobi : Bino bakolo ba libota lya Yakob, elongo na bayangeli ba libota lya Israel, boyoka ! Bino mpenza bosengeli koyeba mibeko mya bosembo,

3:2  kasi boyini makambo malamu, bolingi se mabe. Bokolongolaka bato mposo o nzo­to lokola bakobabolaka nyama, bokolongolaka misuni minso o minkuwa mya bango !

3:3  Bakoliaka nsuni ya bato ba ngai, bakolongolaka bango mposo mpe bakobukaka minkuwa mya bango, lokola bakokataka misuni o lisasu, mpe bakotiaka biteni bya misuni o móto.

3:4  Mokolo bango bakobelela Yawe, akoyanola bango soki te ; kasi mpo ya masumu manso basalaki, akobomba elongi ya ye.

3:5  Yawe alobi boye ona baprofeta, baye bakobungisaka bato ba ngai nzela : Soko bapesi bango biloko bya bolei, bakosakola makambo ma boboto. Kasi na bato bapesi bango eloko te, bakosakolaka makambo ma bitu­mba bizali koya.

3:6  Na ntina ena bokomono mamoni lisusu te na butu ; bokofanda o molili, bokoyoka liloba lya Nzambe te. Mwese mokokita mpo ya baprofeta baye, bakomono moi lisusu te.

3:7  Bongo bamoni-makambo bakoyoka nsoni, balobi-makambo bakosambwa, banso bakozipa monoko, zambi Nzambe akopesa bango eyano te.

3:8  Nzokande nazali na nguya ya elimo ya Yawe, ngai nazali na bosembo, na mpiko, mpo ’te nalakisa Yakob mabe ma ye, mpe nakundolela Israel masumu asalaki.

3:9  Bongo bino, bakolo ba libota lya Yakob, na bino bayangeli ba ekolo ya Israel, boyoka, bino bato bokolingaka bosembo te, bokokomisaka makambo mazali semba mabunu mabunu.

3:10  Bozali kotonga Sion na makila ma bato mpe Yeruzalem na makambo mabe !

3:11  Bazuzi ba ye bakokataka maka­mbo mpo ya kozwa makabo, banganga Nzambe ba ye bakoteyaka bato mpo ya lifuta, baprofeta ba ye bakosakolaka mpo ya mosolo ; nzokande bakotiaka mitema na Yawe, bakolobaka : « Yawe azali o ntei ya biso te ? Mabe makoki kokwela biso te. »

3:12  Yango wana mpo ya mabe ma bino, Sion ekokoma mabelé ma kokata bilanga ; Yeruzalem ekokoma mopotu, mpe ngomba ya Tempelo ekoto­nda na nzete.

Chapter 4

4:1  Mokolo moko ngomba ya Tempelo ya Yawe ekoleka ngomba inso na bolai. Bato ba bikolo bisusu bakoya wana.

4:2  Bato ba bikolo ndenge na ndenge bakoya, bakoloba : « Yakani, tobuta ngomba ya Yawe, tokende o ndako ya Nzambe wa Yakob. Ye alakisa biso mitindo mya ye, tolanda bobele nzela ya ye. Solo, mibeko mikozwama o Sion, maloba ma Yawe makouta o Yeruzalem. »

4:3  Akosambisa bato ba bikolo biike, akotumbola bikolo binene, ata biye bizali mosika. Bato bakobuka mimpanga mya bango, bakotula nkongo, na makongo bakotula makwangola. Ekolo yoko ekobunda na ekolo esusu lisusu te ; bakoyekola lisusu kobunda bitu­mba te.

4:4  Kasi moto na moto akofanda na boboto, o nse ya nzete ya vino to ya figi. Moto moko akotungisa bango lisusu te, zambi Yawe, Nzambe wa bokasi bonso, asili alobi.

4:5  Ata bato basusu balandi nzambe wa bango, biso tokolanda se Yawe Nzambe wa biso, seko.

4:6  Yawe alobi boye : O mokolo mona nakobikisa bate­ngoli, nakosangisa bato bapanzani mpe baye nanyokoloki.

4:7  Batengoli bakokoma ndambo eye ekotikala, baye bazali mosika bakokoma eko­lo ya nguya. Yawe akoyangela bango o ngo­mba Sion, banda lelo mpe o bileko binso.

4:8  Sion, yo linongi lya bakengeli ba mpata, yo ngomba ya bato ba Yeruzalem, okozwa lisusu bokonzi lokola kala, Yeruzalem akozala na bokonzi.

4:9  Mpo nini okomi koganga na mawa ? Boni, ozali na mokonzi lisusu te ? Balaki ba yo babungi nde ? Mpasi ekangi yo lokola mwasi alingi abota ?

4:10  Engumba Sion, obilingana na mpasi, mpe lela lokola mwasi azali kobota, zambi bakobengana yo o engu­mba sikawa mpe okokende kofanda o esobe. Okokende kin’o Babel, kuna bakobikisa yo, Yawe akosikola yo kuna o maboko ma banguna ba yo.

4:11  Bato ebele bayokani ’te bakobu­ndisa yo, balobi : « Básantola Sion, tosepela na bomoni ’te ekomi mopotu ! »

4:12  Kasi bango bayebi makanisi ma Yawe te, mpe bayoki ntina ya mikano mya ye soki te. Akangi bango lokola maboke ma mbuma ya mampa.

4:13  Teleme, engumba Sion, yaka konyata mbuma ya mampa, nakolendisa yo na maseke ma bibende, na matambi ma mbengi okonyata bato ba bikolo biike. Mpo ya Yawe okotombela biloko babotoli bobe, okopesa Mokonzi wa nse mobi­mba nkita ya bango.

4:14  Sikawa, moto wa bitumba, omibete mpo ya mawa, zambi banguna bazingi biso ; babeti zuzi wa Israel na lingenda o litama.

Chapter 5

5:1  Mpe yo Beteleme o Efrata, ozali moke o ntei ya bituka binso bya Yuda, nzokande moto akobotama epai ya yo, oyo akoyangela ekolo ya Israel. Azali mwana wa libota libandá kala, o ntango ya bankoko.

5:2  Yango wana Yawe akotika bato ba ye mpamba tee mokolo mama oyo azali na zemi akobota. Mokolo mona bandeko baye ba­nso batikali bakozonga o ekolo ya Israel.

5:3  Akosala makasi, akoleisa etonga ya ye na nguya ya Yawe, na lokumu la nkombo ya Nzambe wa ye. Bato bakofanda na boboto, mpo akozala mokonzi kin’o nsuka ya mokili.

5:4  Yemei akozala moto wa boboto mpenza ! Soko Asur ayingeli o mokili mwa biso, soko anyati mabelé ma biso, tokobimisela ye bakengeli ba mpa­ta nsambo mpe bayangeli mwambe.

5:5  Bango bakoyangela mokili mwa Asur na mopanga mpe mokili mwa Nemrod na mbeli. Ye moto akobikisa biso o maboko ma Asur, soko Asur ameki kokoto o mokili mwa biso mpe konyata ekolo ya biso na makolo.

5:6  Ntango ena bato ba Yakob baye batikali bakozala o ntei ya bato ba bikolo ebele, lokola mamio ma ntongo Yawe atangisi, lokola matanga ma mbula o matiti makotiaka elikya na bato te, bato bakoki kopesa mango eloko te.

5:7  O ntango ena bato ba Yakob baye bakotikala bakozala o ntei ya bato ba bikolo ebele lokola nkosi o ntei ya nyama ya zamba, lokola mwana wa nkosi o kati ya etonga ya mpata. Esika ezali koleka, enyati mpe ekatikati nyama, moto moko te akoki kobotolo nkosi eloko.

5:8  Tombola loboko la yo likolo lya banguna mpe silisa bokasi bwa bango ba­nso !

5:9  Yawe alobi boye : Yoka maye makosalema mokolo mona : Nakobotolo yo farasa ya yo inso, nakolimwisa makalo ma yo ma­nso ;

5:10  nakoboma bingumba binso o eko­lo ya yo, nakobebisa bibombamelo bya yo binso ;

5:11  nakolongola bikelakela o maboko ma yo, okozala na bamoni-makambo lisusu te.

5:12  Nakoboma bikeko na makonzi o mboka yo, ekeko osali na maboko ma yo, okofukamela yango lisusu te ;

5:13  nakopikola bitemiseli bya ndako ya nzambe ya bino, mpe nakoboma bingumba bya bino.

5:14  Na nkanda mpe na nkele nakobekola mabe ma bikolo biye bitosaki ngai te.

Chapter 6

6:1  Boyoka maloba ma Yawe : « Teleme ! Samba likambo lya yo o boso bwa ngomba, bongo ngomba ike iyoka mongo­ngo mwa yo ! »

6:2  Bino ngomba, boyoka ndenge Yawe akosambisa, bino mabanga ma nse makumbi mokili, boyoka, zambi Yawe akofunda bato ba ye mpe akosambisa Israel.

6:3  « Bato ba ngai, nasali bino nini ? Nalembisi bino na nini ? Boyanola ngai !

6:4  Mpo nabimisaki bino o mokili mwa Ezipeti ? Mpo nasikolaki bino o mokili mwa boombo ? Mpo napesaki bino bakambi : Moze, Arone na Miriam ?

6:5  Bato ba ngai, bokundola o mitema : Balak, mokonzi wa Moab, akanaki kosala bino nini ? Balame, mwana wa Beor, ayanolaki ye nini ? Bokanisa makambo makwelaki bino ut’o Sitim kin’o Gilgal mpo ’te boyeba misala mya bosembo mya Yawe. »

6:6  « Nábonzela Yawe libonza nini ? Nákumbamela Nzambe Nta-Likolo ? Nábima o miso ma ye na mabo­nza ma kotumba, mabonza ma bana ba ngombe ya mbula yoko ?

6:7  Yawe akosepela nde na libonza lya mpata babali ata nkoto, to na mabonza ebele ma mafuta ? Nábonzela ye mwana wa ngai, náfuta bongo lisumu lya ngai ? »

6:8  « Kasi Yawe ayebisi yo moto, nini ezali malamu, nini osengeli kosala : alingi bobele ’te ozala na bose­mbo, ozala na bolingi bwa solo, mpe olanda nzela ya Nzambe na bosawa. »

6:9  Yoka lolaka la Yawe ! Agangi o engumba : Moto wa mayele akobanga nkombo ya ngai. boyoka ! libota mpe lisanga lya engumba.

6:10  Nakoki kondima ’te báteke biloko na emekeli ebe ? Báteke na emekeli ya lokuta biloko bikoki te ?

6:11  Nálimbisa bino likambo lya bimekeli bibe ? Nálimbisa bino likambo lya libe­nga likokosa ?

6:12  Bato ba yo ba nkita balingi makambo ma bowelani, mpe bayi mboka bazali bakosi ! Lolemo la bango se lokuta o monoko.

6:13  Yango wana nabeteki bino tee bokomi kobele, nabebisi biloko bya bino mpo ya masumu ma bino.

6:14  Ata bolei ndenge nini, bokotonda te, nzala ekasi ekongala o mboka bino. Biloko bokobomba bikotikala na bino te ; ata botikali na mwa eloko, nakobebisa yango na mopanga.

6:15  Bokolona mboto, kasi bokobuka mbuma te ; bokokamola mbuma ya oliva, kasi bokomipakola mafuta ma yango te ; bokokamola mbuma ya vino, kasi bokomele vino te.

6:16  Bokotosaka mibeko mya Omri, mpe mimeseno mya libota lya Akab ; bokolandaka bizalela bya bango ; yango wana nakokomisa bino elo­ko ya nsomo, bato banso bakoseke bino, bongo boyoka nsoni o miso ma bikolo binso.

Chapter 7

7:1  Mawa na ngai e, nakomi lokola mbuma babuki o elanga, lokola mbuma etikali nsima ya eleko ya bobuki ; ata mbuma yoko etikali te mpo ’te nalia, ata mbuma ya figi yoko te, eye eteli noki !

7:2  Bato ba boyambi basila o mokili, moto moko wa bosembo mpe te ! Banso bakolukaka koboma bani­nga, banso bakokanelaka baninga.

7:3  Mpo ya kosala mabe bazali na nto­ki o maboko, mosala mwa nkumu, kosenge biloko ; zuzi akokata likambo te soko a­zwi libonza te ; moto monene alingi maye makobongela ye.

7:4  O ntei ya bango ata moto malamu azali lokola nzube, mpe moto wa bosembo lokola li­kpanda. Bakengeli basili bayebisi yo ’te mokolo mwa etumbu moyei, mokolo bakobulungana mokoki.

7:5  Ondima maloba ma ndeko wa yo te, otia motema na moninga te ; okeba na mwasi apemi pene na yo, okeba na maye okoyebisa ye.

7:6  Mpamba te, mwana mobali akomi kokinola tata wa ye, mwana mwasi kotombokela mama wa ye, mwasi wa libala bokilo wa ye ; moko moko akozwa banguna se o ntei ya bandeko ba ye.

7:7  Nzokande ngai nakotalaka bobele Yawe, natii motema na Nzambe oyo akobikisa ngai, Nzambe wa ngai akoyoka ngai.

7:8  Monguna wa ngai, oseke mpasi ya ngai te ; soko nakwei, nakoteleme lisusu ; soko molili mokangi ngai Yawe azali mwinda mwa ngai.

7:9  Nasalaki mabe o miso ma ye, yango wana nasengeli koikikiza nkanda ya Yawe tee mokolo akosamba likambo lya ngai mpe akolongisa ngai. Akolakisa ngai lisusu mwinda mpe nakomono bikela bya ye bya bosembo.

7:10  Ntango monguna wa ngai akomono yango akoyoka nsoni, oyo alobaki na ngai : « Yawe Nza­mbe wa yo azali wapi ? » Miso ma ngai makomono monguna wa ngai, esika bakonyata ye lokola potopoto ya balabala.

7:11  Mokolo bakobongisa lopango la yo, ndelo ya mokili mwa yo ekopusana !

7:12  Bato bakoyela yo ut’o Asur kin’o Ezipeti, ut’o Tiro kin’o ebale, uta mbu yoko kin’o mbu esusu, uta ngomba yoko kin’o ngomba esusu.

7:13  Mokili mokokoma mopotu, mpo ya ezalela ebe ya bato bafa­ndi wana.

7:14  Kamba na montongo bato ba ekolo ya yo, etonga ya mpata ya yo, lisango lya yo, bafandi bobele bango moko o esobe, o kati ya bilanga bya nzete ya vino. Balia malamu o Basan mpe o Galaad, lokola o ntango ya kala !

7:15  Lokola ntango tobimaki o Ezipeti, lakisa biso lisusu makamwisi manene !

7:16  Bato basusu bakomono yango mpe bakoyoka nsoni, ata bazali makasi ndenge nini ; bakozipa monoko na loboko, mpe matoi ma bango makoyoka eloko te.

7:17  Bakolete mputulu lokola nyoka mpe lokola nyama iye ikolandaka o mabelé. Na bolengi bakobima o mibenga mya bango, bakoyoka nsomo mpe bakobanga yo.

7:18  Nzambe nani akokani na yo ? Yo okolimbisaka masumu mpe okobosanaka mabe ma bato ba yo batikali, okobombaka nkanda seko te, kasi osepeli soko okoki kolakisa bango bolamu.

7:19  Oyokela biso mawa lisusu, onyata mabe ma biso na makolo, obwaka masumu ma biso manso o mbu bozindo.

7:20  Olakisa libota lya Yakob lobokó la yo, mpe libota lya Abarama bolamu bwa yo, lokola olayelaka bankoko ba biso uta kala.