LinVB - James

Chapter 1

1:1  Ngáí Yakóbo, mosáleli wa Nzámbe mpé wa Mokonzi wa bísó Yézu Krístu, natíndí monkandá moye ôná mabótá zómi na mábalé mapalángání o mokili : mbóte na bínó.

1:2  Bandeko, áwa mpási ndéngé na ndéngé ikokwêlaka bínó, bótála yangó lokóla ntína ya esengo ya bínó,

1:3  mpô boyébí yangó : sókó bakomeka boyambi bwa bínó, bokoyéba kokanga mitéma.

1:4  Sókó boyébí kokanga mitéma, bokobimisa mosálá mobongí mpenzá, mpô ’te bózala bato babongí nyé mpé bótíkala na mbéba yǒ kó té.

1:5  Sókó bwányá bwa mǒkó wa bínó bokokí té, ásénge Nzámbe bwányá bosúsu, mpé Nzámbe akopésa yě bwangó, mpô Nzámbe akopésaka bato bánso makabo ma yě na motéma molámu, azalí moyími té.

1:6  Kasi ásé­nge Nzámbe bwa­ngó na boyambi bónso ; átía ntembe té, mpô moto akobéteke ntembe aúlání na mbóngé ya mbú : mompepe mozalí kotómbola mpé koningisa yangó.

1:7  Moto wa mitéma míbalé, óyo akobóngola ezalela ya yě ntángo ínso,

1:8  ákanisa té ’te Mokonzi akopésa yě atâ mwâ elóko.

1:9  Ndeko mobóla ásepela, zambí azalí moto wa lokúmu.

1:10  Moto wa nkita ásepela na bompámba bwa yě, zambí akoleka o mokili moye lokóla fuléle ya matíti ekobébaka.

1:11  Sókó mói makási mobimí, matíti makaúkí mpé fuléle ekwéí, kitóko ya fuléle isílí. Sé bôngó moto wa nkita akobéba, misálá mya yě mikobéba lokóla !

1:12  Esengo na moto akopika mpé­ndé o ntángo bakomeka yě ! Sókó aló­ngí, akozwa bomoi, lokóla Mokonzi alakélákí baye bakolingaka yě.

1:13  O ntángo ya masénginyá, moto mǒkó áloba té ’te « Nzámbe moto azalí komeka ngáí. » Nzámbe akosé­nginyaka moto mǒkó té, sé lokóla mabé makokí kosénginya Nzámbe té.

1:14  Kasi moto akoyókaka masénginyá mpô ya mpósá ebé ya motéma, eye ekobénda mpé ekokósa yě.

1:15  Sókó moto andimí mpósá ebé ya motéma, mpósá êná ekotínda yě ásála lisúmu ; mpé lisúmu, áwa likólí, likoboma yě.

1:16  Bandeko ba ngáí ba bolingo, bómíkósa té !

1:17  Bolámu bónso na makabo malámu mánso maútí o likoló, o mbóka Tatá ; yě moto akelí mwésé, sánzá na minzóto, o mbóka yě mwínda mokobóngwanaka té, mokozímaka mpé té.

1:18  Lokóla yě mǒkó alingákí, apésí bísó bomoi na Liloba lya bosôló mpô tózala lokóla bána ba yambo o káti ya bikelámo bínso.

1:19  Bandeko ba ngáí ba bolingo, bóyéba malámu : moto na moto ándi­ma koyóka libosó, áloba bobélé nsima, ásilika mpé nokí té,

1:20  zambí moto wa nkándá akokokisa makambo ma bosémbo o míso ma Nzámbe té.

1:21  Bô­ngó bóbwáka bosoto ná makambo mabé mánso mosíká ; bóyamba na motéma bobóto Liloba liye Nzámbe alóní o mitéma mya bínó, lizalí na ngúyá ya kobíkisa bínó.

1:22  Bókokisa maye Liloba lizalí kotínda. Bóyóka lyangó bobélé na matói té, sókí té bokomíkósa.

1:23  Moto azalí sé koyóka Liloba, kasi akokokisa lyangó té, azalí lokóla moto azalí komítála o talatálá mpé amóní elongi ya yě :

1:24  áwa asílísí komítála, akeí mpé abósání ndéngé elongi ya yě ezalí.

1:25  Kasi esengo na moto alukí koyéba Mobéko mopusí bolámu, moye mokopésa bo­nsómí, mpé atósí mwa­ngó ; ayókí mwangó té lokóla moto abósání mwangó nokí, kasi akokokisa mwa­ngó na misálá mya yě. Moto akosála bôngó, akoyóka esengo sôló.

1:26  Sókó moto akanísí ’te azalí moto wa losámbo, nzókandé ayébí kokanga monoko té, azalí komíkósa : losámbo la yě lozángí ntína.

1:27  O míso ma Nzámbe Tatá wa bísó losámbo la sôló, loye lozalí na mbéba té, lozalí boye : kosálisa bána bitíké na básí bazé­ngé ntángo bazalí koyóka mpási, mpé kotíkala motéma péto o makambo ma mokili.

Chapter 2

2:1  Bandeko, bínó bato bokoyambaka Yézu Krístu, Mokonzi wa bísó wa nkémbo, bótálaka bilongi bya bato té.

2:2  Bókanisa : sókó moto akótí o likita lya bínó, óyo alátí mpété ya wólo o mosapi mpé elambá ya motúya ; mobóla mpé akótí, óyo alátí bilambá bya bosoto.

2:3  Bôngó bokotála bobélé moto óyo alátí malámu, mpé bokoloba na yě : « Yáká kofánda o esíká ya lokúmu » ; mpé bokoloba na mobóla : « Yǒ, télémé kúná », tǒ « Fándá áwa o nsé, pene na ebóngá ya ngáí. »

2:4  Sókó bosálí bôngó, botálí bilongi bya bato mpé bosámbísí bato lokóla bazúzi ba mayéle mabé, lokutá ?

2:5  Bandeko ba ngáí ba bolingo, bóyóka : Nzámbe aponí baye bazalí babóla o míso ma bato bǒ bato ba nkita o mambí ma boyambi ; bangó bakozwa makabo ma Bokonzi bwa likoló, maye alakélákí bato balingí yě.

2:6  Kasi bínó bokokínolaka mobóla ! Nzókandé baye bakonyókoloko mpé bakosámbisaka bínó, ezalí bato ba nkita té ?

2:7  Bangó ndé bato bakotúkaka Nkómbó kitóko eye Nzámbe apésákí bínó, ezalí bôngó té ?

2:8  Bokosála malámu sókó bokokísí Mobéko mwa Mokonzi, lokóla ekomámí o Minkandá Misántu : « Olinga móníngá mwa yǒ lokóla okomílingaka. »

2:9  Kasi sókó botálí bilongi bya bato, bosálí lisúmu mpé Mobéko mokokitisa bínó lokóla bato babúkí mobéko.

2:10  Sókó moto atósí Mobéko mobimba, kasi abúkí atâ motíndo mǒ­kó, akosámba mpô ya mobéko mobimba.

2:11  Mpámba té, Oyo alobí : « Okela bokáli té », alobí mpé : « Obo­ma moto té. » Bôngó, atâ okelí bokáli té, kasi obomí moto, obúkí Mobéko.

2:12  Bókéba na maye bokolobaka mpé bokosálaka, mpô Nzámbe akosámbisa bato engébéné na mobéko mwa bonsómí.

2:13  Mo­to ayókélí móníngá ngolu té, bakoyókela yě mpé ngolu té o mokolo mwa likambo. Kasi moto akoyókelaka móníngá ngolu, akolónga o mokolo môná.

2:14  Bandeko, sókó moto alobí : « Nazalí na boyambi », kasi misálá miye eyamba ekotíndaka, akosála myangó té, boyambi bwa yě bokobíkisa yě, sôló ?

2:15  Ndakisa : Sókó ndeko mobáli tǒ mwásí azalí na elambá té, bilóko bya kolía mpé té,

2:16  mpé moto mǒkó wa bínó alobí na yě : « Kendé malámu, kendé koyóto móto mpé líá malámu », kasi akabélí yě bilóko té biye bisengélí na nzóto ya yě, maloba ma moto ôná mazángí ntína té ?

2:17  Sé bô­ngó sókó boyambi bwa moto bomónóní na misálá té, boyambi bwa yě bosílí bokúfí.

2:18  Moto mǒkó akokí koloba : « Yǒ ozalí moto wa boyambi, ngáí moto wa misálá. » Bôngó nakoloba na yě : « Lakísá ngáí ndéngé níni okokí kozala na boyambi sókó okokí kolakisa ngáí misálá té. Ngáí nakolakisa yǒ ’te nazalí moto wa boyambi mpô ya misálá nakosálaka. »

2:19  Yǒ oyambí ’te Nzámbe azalí sé mǒkó ? Malámu, kasi bazábolo bakoya­mbaka sé bôngó, bazalí kolénge !

2:20  Yǒ moto ozángí mayéle, olingí nálakisa yǒ ’te boyambi bokobimisaka misálá té, bozalí sé mpámba ?

2:21  Ntángo Abaráma, nkóko wa bísó, abonzélí Nzámbe mwána wa yě Izáka o altáre, akómí moto wa bosémbo o míso ma Nzámbe té mpô ya misálá mya yě ?

2:22  Omóní ’te boyambi bwa yě bomónóní na misálá, mpé misálá mya yě mikokísákí boyambi bwa yě.

2:23  Akokísákí bôngó maye makomámí o Minkandá Mi­sá­ntu : Abaráma ayambí Nzámbe, bôngó Nzámbe andimí yě lokó­la moto wa bosémbo mpô ya boyambi bwa yě. Yangó wâná babéngí yě ‘móníngá wa Nzámbe’.

2:24  Bôngó bomóní ’te moto akómí na bosémbo o míso ma Nzámbe bobélé mpô ya boyambi bwa yě té, kasi mpô ya misálá mya yě.

2:25  Sé bôngó mwásí ndúmbá Rakab akómákí moto wa bosémbo o míso ma Nzámbe ntángo ayambákí bantóma o ndáko ya yě, mpé asálísákí bangó na bolakisi nzelá esúsu ya kozó­nga.

2:26  Nzóto ezángí molímo, esílí ekúfí ; sé bôngó, boyambi bokobimisaka misálá té bozalí na bomoi lisúsu té.

Chapter 3

3:1  Bandeko ba ngáí, baye bakolukaka kokóma batéyi bázala míngi té, mpô boyébí ’te bakosá­mbisa bísó makási, leká bato basúsu.

3:2  Mpá­mba té, bísó bánso tokosálaka mabé mbala míngi. Moto akosálaka mabé na maloba té, alongóbání sôló, akokí kokonza nzóto ya yě mobimba.

3:3  Tokotíaka farása ebendé o monoko mpô ’te étósa bísó ; tokokí bôngó koyángela farása mobimba.

3:4  Bótála mpé masúwa : atâ masúwa mazalí manéne, atâ matíndísámí na mompepe makási, bobélé mwâ yenda ekotí­ndaka mangó epái moto wa yenda alingí.

3:5  Lolému la moto sé bôngó : atâ lozalí sé eténi eké ya nzóto, lokokí kosála makambo manéne. Bókanisa mpé bóníbóní móto moké mokokí kozíkisa zámba linéne.

3:6  Lo­lému lozalí lokóla móto ; o ntéi ya binama bya nzóto ya bísó lolému lotóndí na makambo mazángí bosémbo, lokokí kobébisa nzóto mobimba ; lozalí na móto mwa lí­mfelo, lokokí kobébisa bomoi bwa bísó mobimba.

3:7  Moto akokí kolakisa botósi na nyama ya zámba, ná ndeke, ná nyama ikolandaka o mabelé, mpé ná mbísi ndéngé na ndéngé izalí o mái.

3:8  Kasi moto mǒkó té akokí kolakisa lolému la yě mǒkó botósi. Lolému lozalí elóko ebé ekolembeke té, mpé lotóndí na ngenge ekokí koboma.

3:9  Na lolému tokokúmisaka Mokonzi mpé Tatá wa bísó ; na lolému tokobételeke bato mobondo, baye bakelámí bǒ bilílí bya Nzámbe.

3:10  O monoko sé mǒ­kó ekobimaka maloba ma bobenisi ná mpé maloba ma kotómbela bato bobé. Yangó ebongí té, bandeko.

3:11  Líziba sé lyǒ kó likokí ndé kobimisa mái malámu ná mái bololo ?

3:12  Bandeko, nzeté ya fígi ekokí ndé kobóta mbuma ya olíva, tǒ nzeté ya víno mbuma ya fígi ? Mbú ezalí na móngwa ekokí kopésa mái ma komele té.

3:13  Sókó o ntéi ya bínó moto wa bwányá mpé wa mayéle azalí, álakisa yangó na ezalela elámu, ásála misálá na bwányá mpé na motéma bobóto.

3:14  Kasi sókó mitéma ma bínó motóndí na zúwa mpé bozalí na mayéle ma bowélani, bómíkúmisa té na bofúndi na makambo mazá­ngí bosémbo.

3:15  Mayéle mâná maútí o likoló té, mazalí sé mayéle ma nsé, mayéle ma bato mpámba, maútí na zábolo.

3:16  Mpámba té, esíká bazalí koyókelana zúwa mpé kowélana, mobúlú na makambo mabé ndéngé na ndéngé makozánga té.

3:17  Kasi moto azalí na bwányá boútí o likoló, azalí libosó moto wa bopéto, azalí mpé moto wa bobóto ; akolímbisaka nokí, akolukaka bolámu bwa báníngá, azalí motéma ngolu ; akosálaka sé malámu, akotálaka bilongi bya bato té, akokósaka bangó mpé té.

3:18  Bato ba bobóto bakobúkaka sé mbuma iye balónákí : yangó ndé bosémbo.

Chapter 4

4:1  Koswâna mpé kobunda epái ya bínó eútí wápi ? Eútí bobélé na mpósá iye bokoyókaka o mitéma mya bínó. Ezalí bôngó té ?

4:2  Botóndí na mpósá ya kozwa bilóko, mpé bokozwa byangó té, yangó wâná bokómí koboma bato. Bokolulaka bilóko mpé bokozwa bya­ngó té, yangó wâná bokómí koswâna mpé kobunda. Bokozwa elóko té, mpô bokosámbelaka té.

4:3  Mpé atâ boséngí bilóko, bokozwa bya­ngó té ; mpámba té, bozalí kosénge byangó té bǒ ebongí, áwa bolingí byangó mpô ya bisengo bya bínó mǒkó.

4:4  Bozalí lokóla mwásí abóyí mobáli ! Boyébí té ’te moto alingí makambo ma nsé azalí mongúná wa Nzámbe ? Oyo alingí kozala móníngá wa mokili moye akomíkómisa mongúná wa Nzámbe.

4:5  O Minkandá Misántu ekomámí ndé mpámba ’te elímo Nzámbe atíí o mitéma mya bísó azalí na zúwa linéne ?

4:6  Nzókandé Nzá­mbe akopésaka bísó ngrásya elekí enéne ; ekomámí bôngó o Minkandá Misántu : Nzámbe abóyí bato ba loléndo, kasi akolingaka bato ba motéma bosáwa.

4:7  Yangó wâná bótósa Nzá­mbe mpé bóbóya zábolo, bôngó zábolo akokíma bínó mosíká.

4:8  Bóbeleme na Nzámbe, bôngó yě mpé akobeleme na bínó. Bínó basúmuki, bósukola mabóko ; bínó bato ba mitéma míbalé, bópétola mitéma mya bínó.

4:9  Bóyéba ’te bozalí bato ba mawa, bóláta mpíli mpé bólela. Bótíka koseke, kasi bólela ; bótíka kosepela, kasi bóyóka mawa.

4:10  Bómíkitisa o míso ma Mokonzi, bôngó yě akotómbola bínó.

4:11  Bandeko, bótóngono té. Moto atóngí móníngá tǒ asámbísí yě, ató­ngí mpé asámbísí Mobéko. Moto asámbísí Mobéko, abóyí kotósa mwangó, mpô amíkómísí zúzi wa mwangó.

4:12  Nzókandé bobélé Nzá­mbe óyo akopésaka mibéko azalí zúzi, yě moto akokí kobíkisa tǒ kokitisa bato. Bôngó yǒ ndé náni ’te ókitisa móníngá ?

4:13  Bínó bato bokolobaka : « Leló tǒ lóbí tokokende o mbóka êná, tokofánda kúná mbúla mobimba, tokosála mombóngo, tokozwa mosolo », bóyóka ngáí sikáwa :

4:14  Bínó boyébí té bóníbóní bokozala lóbí. Bozalí bobélé lokóla mólinga momónóní mwâ moké mpé molímwí nokí.

4:15  Malámu bóloba boye : « Sókó Mokonzi alingí, tokozala na bomoi mpé tokosála mosálá moye tǒ mosálá mosúsu. »

4:16  Kasi bokomíkúmisaka na loléndo ! Maloba ma lofúndo mánso mazalí mabé.

4:17  Moto ayébí malámu maye asengélí kosála, kasi asálí mangó té, asálí lisúmu.

Chapter 5

5:1  Bínó, bato ba nkita, bólela mpé bókímela mpô ya mpási iko­kwêla bínó !

5:2  Nkita ya bínó esílí epolí, nkusú isílí kolía bilambá bya bínó.

5:3  Wólo na paláta ya bínó isílí igugí ; bogugi bwa yangó bokokitisa bínó, mpé bokolía nsuni ya bínó lokóla móto mokozíkisaka. Bosangísí mosolo míngi, nzókandé tokómí o mikolo mya nsúka.

5:4  Bofútí basáli té, baye babúkí mbuma o bilanga bya bínó. Sikáwa bazalí kolela lifúta lya bangó. Mokonzi wa ngúyá ínso asílí ayókí boleli bwa bangó.

5:5  O nsé eye bosepélákí nkita na lipombó ; bolíákí mí­ngi, bôngó bokómí mafúta lokóla nyama iye balingí bákende koboma.

5:6  Bokitísákí bato ba bosémbo o makambo, mpé bobomákí bangó, mpô bazángákí makási ma komíbíkisa.

5:7  Bandeko, bókanga mitéma kín’o Mokolo Mokonzi akoyâ. Bótála bóníbóní mosáli wa bilanga ayébí kokanga motéma mpé kozila út’o ntángo ya mbúla ya libosó kín’o mbúla ya nsúka mpô ’te ázwa mbuma ilámu ya elanga ya yě.

5:8  Bínó mpé bókanga mitéma, bóléndisa mitéma, zambí Boyéi bwa Mokonzi bobelémí.

5:9  Bandeko, bófúndana té mpô ’te bákitisa bínó o likambo té, zambí zúzi akoyâ nokí.

5:10  Bótálaka ndakisa ya baproféta, baye bazalákí kosakola o nkómbó ya Mokonzi : bazalákí kokanga mitéma o ntángo ya mpási.

5:11  Tokolobaka ’te bazalí bato ba esengo mpô bapikákí mpéndé. Bosílí boyókí ndéngé Yob atíákí moléndé : Nzámbe asúkísí makambo ma yě sé ma­lá­mu, zambí Mokonzi azalí motéma ngolu, akoyókelaka bato ma­wa.

5:12  Kasi, bandeko ba ngáí, libosó lya makambo mánso, bólaya ndaí té, na nkómbó ya likoló tǒ na nkómbó ya nsé, tǒ na nkómbó atâ níni. Bóloba bobélé « Ezalí bôngó » tǒ « Ezalí bô­ngó té » mpô ’te bókita o likambo té.

5:13  Moto óyo wa bínó azalí na mpási, ásámbela ; óyo ayókí esengo, áyémbela Nzámbe nzémbo.

5:14  Sókó mǒkó wa bínó azalí kobéle, ábênga bakóló ba Eklézya, básámbelela yě, bápakola yě mafúta o nkómbó ya Mokonzi.

5:15  Losámbo bakosámbela na boyambi lokobíkisa moto wa bokono ; Mokonzi akopésa yě makási lisúsu, mpé sókó asálákí masúmu, Mokonzi akolímbisa yě mangó.

5:16  Yangó wâná bósakola masúmu ma bínó o míso ma báníngá ; bósámbelelana mpô ’te bóbíka. Losámbo moto wa bosémbo ako­sámbela na mpíkó mpenzá lozalí na ngúyá enéne.

5:17  Elía azalákí sé moto lokóla bísó ; asámbélí na mpíkó ’te mbúla énóko té, mpé mbúla enókí té mibú mísáto na sánzá motóbá.

5:18  Na nsima asámbélí lisúsu : mbúla enókí mpé mabelé mabótí mbuma ya mangó.

5:19  Bandeko ba ngáí, sókó mǒkó wa bínó abúngámí mpé atíkí nzelá ya sôló, mpé sókó móníngá azóngísí yě o nzelá elámu,

5:20  bóyéba ’te óyo alongólí mosúmuki o nzelá ebé mpé azóngísí yě o nzelá elámu, akobíkisa molímo mwa yě o liwá, mpé Nzámbe akolímbisa yě masúmu ebelé.