Kapingamarangi - Philippians

Chapter 1

1:1  Mai baahi o Paul mo Timothy, nia daangada hai-hegau a Jesus Christ, ang-gi nia daangada huogodoo a God ala e-noho i Philippi, ala gu-buni-anga gi Jesus Christ mo nia dagi di nohongo-dabu mono gau hai-hegau.

1:2  Tadau Damana go God, tadau Dagi go Jesus Christ gi-gowadu gi goodou tumaalia mo-di aumaalia.

1:3  Au e-danggee ang-gi dogu God i goodou i-nia madagoaa huogodoo ma-ga-maanadu goodou.

1:4  Nia madagoaa huogodoo ala nogo dalodalo-iei au i goodou, gei au e-dalodalo i-di tenetene,

1:5  idimaa, goodou nogo hagamaamaa au i-lodo di moomee di Longo-Humalia, mai i-mua gaa-dae-mai gi dangi-nei.

1:6  Au e-hagadagadagagee huoloo, bolo God ne-daamada-aga nnegau humalia aanei i godou lodo, gi-daahia-hua beelaa, gaa-dae-loo gi-di haga-lawa i-di Laangi o Jesus Christ.

1:7  Au e-manawa i goodou i-nia madagoaa huogodoo! Malaa, e-humalia bolo au gi-longono-ia i-di-au i goodou. Idimaa, goodou huogodoo gu-hai-mee madalia au gi tumaalia dela ne-dugu-mai go God, i dogu noho i-lodo di hale-galabudi, mo i dogu madagoaa nogo mehede-mai gi-di-au nogo hagamaamaa di Longo-Humalia, ge haga-maaloo-aga.

1:8  God go dogu haga-modongoohia bolo agu helekai le e-donu, ala e-helekai bolo dogu hidihidi i goodou le e-hidi-mai i-di manawa o Jesus Christ.

1:9  Au e-dalodalo bolo godou aaloho la-gi-tomo-aga, gi-maalama goodou gi-nia mee ala e-donu mo-di hagi-aga dela e-donu,

1:10  gii-mee goodou di-hilihili nia mee ala e-kaedahi e-humalia. Gei goodou ga-maahede mai gi-daha mo nia hagadilinga mee gulugulua mono mee hai-hala huogodoo i-di laangi o Christ.

1:11  Gei godou mouli gaa-honu i-nia mee humalia huogodoo mai baahi o Jesus Christ, ang-gi di haga-madamada mo-di hagaamu a God.

1:12  Ogu duaahina-nei, au e-hiihai bolo goodou gi-iloo humalia bolo nia hagadilinga mee ala ne-hai-mai gi-di-au, la-gu-hagamaamaa huoloo di Longo-Humalia gii-gila.

1:13  Di hai deenei ne-hidi-ai digau hagaloohi di hale deenei, mo digau labelaa ala i-ginei, ne-iloo bolo au gu-lawalawa, idimaa au tangada hai-hegau ni Christ.

1:14  Dogu noho i-lodo di hale-galabudi deenei, la-guu-hai di baahi damana o tadau duaahina gi-llauehe-aga nadau hagadagadagagee gi Tagi. Digaula huogodoo gu-hagalee mmaadagu di-agoago maaloo nia helekai a God.

1:15  E-donu bolo hunu daangada e-agoago di hai o Christ mai i-lodo nadau dubua mo nadau lagamaaloo, gei hunu daangada e-agoago mai i-lodo nadau manawa humalia.

1:16  Digau aanei le e-agoago mai i-di aloho, idimaa, digaula e-iloo bolo God gu-gaamai dogu duhongo-hegau gi-hagamaamaa-ina di Longo-Humalia.

1:17  Gei digau ala i-golo la-hagalee hiihai e-hagadele Christ mai i nadau manawa-donu, e-bida hai go nadau mee ala e-hiihai ginai. Digaula e-hagamamaanadu belee hai au gi-haingadaa i-lodo di hale-galabudi.

1:18  Eimaha hogi! Au e-tenetene-hua, ma go nia agoago a Christ bolo gi-hagadele. Ma e-aha maa e-hai-mai i-lodo di manawa huaidu be humalia, gei au e-tenetene-hua.

1:19  Idimaa, au e-iloo bolo au ga-mehede mai i godou dalodalo mo nia hagamaamaa mai baahi di Hagataalunga o Jesus Christ.

1:20  Deenei dogu hiihai mo dogu hagadagadagagee: Au e-hagamahi gi dogu duhongo-hegau gi-gila-humalia, gei au e-hai gi-manawa-maaloo i-lodo dogu mouli hagatau e-haga-modongoohia-aga di aamua o Christ i-nia madagoaa huogodoo gei e-donu go di madagoaa deenei, ma e-aha maa au e-mouli be gaa-made.

1:21  Di mouli la-di-aha? Mai gi-di-au, di mouli la go Christ! Dogu made le e-hidi-ai di mee koia e-humalia.

1:22  Maa au ga-mouli gi-muli, gei au e-mee di-hai agu hegau hagalabagau, gei au e-de-iloo dagu mee e-hilihili.

1:23  Au gu-hilihili-ngadaa i-nia mee e-lua aanei. Au e-hiihai huoloo bolo au gii-made gi-daha mo-di mouli-nei, gii-noho au madalia a Christ, deelaa di mee koia e-humalia.

1:24  Gei deeai, ma go goodou ala e-hagalabagau ginai dogu mouli.

1:25  Idimaa au guu-donu gi-di mee deenei, gu-iloo bolo au e-mouli hua igolo. Au gaa-noho i godou baahi huogodoo, e-haga-damana-ai di-godou tomo-aga mo-di tene i-lodo godou hagadonu.

1:26  Au ma-ga-hanadu labelaa gi goodou, gei goodou koia ga-haga-hagaamu au mai i-di godou mouli hagadaubuni ang-gi Jesus Christ.

1:27  Deenei di mee e-kaedahi e-hagalabagau: Godou mouli belee hai gi-mouli be-di Longo-Humalia a Christ. Ma e-aha maa au e-mee be e-deemee di-haga-heetugi-adu gi goodou, au ga-longono-laa bolo goodou e-tuu mau-dangihi gi-di hadinga hua e-dahi mo-di hiihai hua-e-dahi, gei goodou e-buni hagamahi e-heebagi gii-donu di tonu o-di Longo-Humalia.

1:28  Hudee mmaadagu i godou hagadaumee. Goodou gi-manawa-maaloo i-nia madagoaa huogodoo. Di hai beenei le e-haga-modongoohia gi digaula bolo ginaadou ga-paagege, gei goodou ga-aali, idimaa go God dela e-hai goodou gi-aali.

1:29  God gu-dumaalia-adu gi-hai-hege ang-gi Christ, hagalee mai-hua i-di godou hagadonu a-Mee, ge mai labelaa i-di godou duadua i Mee.

1:30  Dolomeenei gei goodou guu-mee di-heebagi dalia au, deenei go tagadilinga heebagi dela ne-gidee goodou nogo heebagi-iei au i-mua, goodou gu-longono teebagi deenei le e-hai ko-au dolomeenei.

Chapter 2

2:1  Godou mouli ang-gi Christ le e-hagamaaloo-aga goodou, gei dono aloho le e-haga-manawa lamalia goodou. Goodou gu-hagadaubuni ang-gi di Hagataalunga-Dabu, gei goodou gu-manawa humalia mo-di hagadau-aaloho i godou mehanga.

2:2  Deenei-laa, au e-hagamahi-adu bolo goodou gi-haga-dohu-ina dogu tene gii-tugi, mai godou hagamaanadu hua-e-dahi, mo di aloho hua-e-dahi, di hagadaubuni hua-e-dahi, di mouli mo-di hagamaanadu hua-e-dahi.

2:3  Goodou hudee heia godou mee mai i godou maanadu bida hagahumalia hua goodou, be mai godou hiihai bolo goodou e-hagaamu goodou, gei goodou gi-hagadau hila-gi-lala, duguina digau ala i-golo bolo e-humalia i goodou.

2:4  Goodou gii-mmada gi-nia hiihai o digau ala i-golo, hagalee go godou hiihai la-hua.

2:5  Goodou e-hai-loo gi-hai-mee gi nnagadilinga haihai ala gu-hai-mee ginai a Jesus Christ:

2:6  Mee e-hai-mee gi-nia mahi o God i-nia madagoaa huogodoo, ge hagalee haga-tungaadahi-Ia gi God.

2:7  Mee gu-manawa hila-gi-lala, gu-haga-angaa-mee ana mee huogodoo, guu-hai di hege. Mee gu-haneia gi henuailala guu-hai tangada.

2:8  Mee guu-hai tangada hagalongo, gu-daudali nia mee humalia gaa-dae-loo gi dono made i-hongo di loobuu.

2:9  Malaa, deelaa di mee a God ne-haga-menege-aga-ai a-Mee gi-di gowaa dela mugi-nua-loo, gaa-wanga dono ingoo dela koia e-aamua i-nia ingoo huogodoo.

2:10  Nia mee huogodoo ala e-mouli i-di langi, mo henuailala, mo i-bahi-i-lala o henuailala, ga-dogoduli, e-hagalaamua di ingoo o Jesus.

2:11  Nia daangada huogodoo ga-hagamodongoohia-aga bolo Jesus Christ la-go Tagi, ang-gi di madamada o God Tamana.

2:12  Ogu ihoo hagaaloho-nei, goodou nogo hagalongo-mai gi-di-au i-nia madagoaa huogodoo ala nogo noho-iei au i godou baahi. Ma koia e-humalia maa goodou ga-hagalongo-mai gi-di-au dolomeenei i dogu madagoaa dela e-mogowaa-loo i goodou. Goodou ngalua hagamahi i-lodo godou mmaadagu mo-di bolebole, e-haga-dohu-ai godou haga-mouli.

2:13  Idimaa, God le e-ngalua i godou lodo i-nia madagoaa huogodoo belee hai goodou gi-hiihai ge daudali dono manawa.

2:14  Goodou hudee hai-tamu be e-lagamaaloo i godou mee huogodoo ala ma-gaa-hai,

2:15  gei goodou gaa-hai digau e-madammaa gadoo be nia dama a God ala koia e-humalia, ala e-noho i-baahi digau huaidu mo digau hai-mee-hala i henuailala. Goodou gi-maahina i-baahi digaula, gadoo be nia heduu ala e-hagamaahina i-di langi

2:16  i-di godou madagoaa ma-gaa-wanga gi digaula nia helekai haga-mouli. Maa goodou gaa-hai beenei, gei au ga-hagaamu goodou i-di laangi o Christ, idimaa, di-mee deenei e-haga-modongoohia bolo dogu hagamahi mo agu hegau huogodoo la-digi balumee.

2:17  Maa ogu dodo ne-belee hali gadoo be nia wai tigidaumaha i-hongo di gowaa hai-tigidaumaha dela e-hai godou tigidaumaha mai godou hagadonu ang-gi God, ma-gaa-hai beenei, gei au e-tenetene madalia goodou huogodoo.

2:18  Goodou gi-heia labelaa beelaa, goodou e-hai gi-tenetene madalia au.

2:19  Maa di manawa ni God deenei, gei au e-hagadagadagagee bolo au e-mee di-hagau-adu a Timothy hagalimalima, gi-maaloo ogu lodo i godou longo.

2:20  Ma go mee hua dela e-hai gadoo be au, dela e-haga-dahidamee goodou.

2:21  Digau huogodoo ala i-golo le e-bida haga-dahidamee-hua go nadau mee ala e-hai, ge hagalee go nnegau a Jesus Christ.

2:22  Goodou e-iloo be ana hegau le e-dahidamee behee, idimaa, gimaua e-hai-hegau ngaadahi i-di gili di Longo-Humalia gadoo be tamana mo dana dama.

2:23  Au e-hagadagadagagee bolo au ga-hagau-adu a-mee hagalimalima gi goodou i dogu madagoaa ma-ga-iloo be dehee di mee gaa-hai-mai.

2:24  Au e-hagadagadagagee labelaa gi Tagi, bolo au e-mee labelaa di-hanadu gi godou baahi hoohoo mai.

2:25  Au gu-hagamaanadu bolo ma e-humalia e-hagau-adu tadau duaahina go Epaphroditus gi godou baahi. Go mee dela nogo ngalua, ge heebagi i dagu baahi ge nogo madalia au, ge dela hogi go di-godou dangada kae-hegau dela ne-hanimoi belee hagamaamaa au.

2:26  Mee e-hidihidi huoloo bolo ia e-mmada-adu gi goodou huogodoo, gei mee gu-manawa-gee i dono longono bolo goodou gu-longo bolo ia e-magi.

2:27  E-donu bolo mee nogo magi, gu-hoohoo gaa-made, gei God gu-aloho i-mee, mo au labelaa, dela ne-haga-dagaloaha au gi-daha mo tagadilinga manawa-gee damana.

2:28  Gei-au gu-hiihai huoloo bolo au e-hagau-adu a-mee, gii-mmada goodou gi mee, gi-tenetene labelaa goodou, gei dogu manawa-gee hogi gaa-ngala.

2:29  Goodou gi-benebene-ina a-mee i-di manawa-tene, gii-hai be tuaahina ni goodou i-di hagadaubuni ang-gi Tagi. Goodou hagalabagau-ina digau ala e-hai be mee,

2:30  idimaa, mee e-de-hagahuodia dono mouli, mee gu-hoohoo gaa-made, i-di gili nnegau a Christ, belee hagamaamaa au i godou mee ala ne-deemee di-hai.

Chapter 3

3:1  Ogu duaahina-nei, di hagaodi gi-muli agu helekai: goodou gi-tenetene i-di godou hagadaubuni ang-gi Tagi. Ma hagalee haingadaa mai gi-di-au go dagu tataanga agu mee ala ne-hihi i-mua, idimaa, ma e-hai goodou gi-mouli.

3:2  Pula i digau ala e-hai nia mee huaidu, ala e-hai be nia paana. Digaula e-maaloo-dangihi gi-di mee dela bolo e-tuu di gili tuaidina.

3:3  Ma go gidaadou ala ne-kae di sirkumsais dela e-donu, hagalee go digaula. Idimaa, gidaadou e-daumaha ang-gi God mai i dono Hagataalunga, gei gidaadou e-tenetene i-lodo tadau mouli buni-anga gi Jesus Christ. Gidaadou hagalee hagadagadagagee gi-nia haihai o-di tuu gi-daha di gili tuaidina.

3:4  Gei-au ogu hadinga i-golo e-hagadagadagagee gi-nia mee aanei. Maa tangada i-golo e-hagadagadagagee gi-nia hangahaihai beenei, gei au ogu hadinga gi-nonua i-golo i dogu hagadagadagagee gi-nia mee aanei.

3:5  Au ne-sirkumsais gei au gu-madua guu-walu ogu laangi. Au tangada donu o Israel mai i dogu haanau, tangada mai i-di madawaawa o Benjamin, gei au tangada donu o Hebrew. I dogu haga-gila-aga nia haganoho o digau o Jew, au di Pharisee.

3:6  Gei-au nogo hegeege huoloo nia haganoho aalaa, gaa-hidi-iei au ga-hagahuaidu nia nohongo-dabu. Gei-au hagalee hala i-lodo dogu daudali nnaganoho gii-donu.

3:7  Nia hagadilinga mee beelaa huogodoo ala nogo haga-dahidamee ko-au, dolomeenei, gei au guu-dugu bolo ma nia balumee, idimaa, go Christ.

3:8  Hagalee bolo go nia hagadilinga mee hua ala beenei. Au guu-dugu hua nia mee huogodoo bolo nia balumee, di-mee hua-e-dahi dela koia e-dahidamee, ge hagalabagau, dela go di iloo a Jesus Christ, go dogu Dagi. Nia mee huogodoo guu-kili ko-au gi-daha, idimaa, go Christ. Au guu-dugu nia mee aanei bolo ma nia balumee, bolo gii-mee au di-kae a Christ,

3:9  mo-di buni gi Mee i-nia mee huogodoo. Au ogu donu ai, tagadilinga donu dela e-hai tangada gii-donu i-baahi nia haganoho. Malaa, dolomeenei, gei au gu-hai-mee gi-di tonu dela ne-gaamai go God i-dogu hagadonu a Christ, di tonu dela e-hanimoi i-baahi o God idimaa go di hagadonu.

3:10  Dagu mee dela e-hiihai ginai, la-ko-au belee hai gi-iloo-eau a Christ, ge gi-longono-mai gi ogu lodo nia mogobuna o dono hagamouli-aga, mo-di buni gi dono hagaduadua, gei au gii-made gadoo be Mee,

3:11  mo-di hagadagadagagee bolo au e-mouli-aga mai di made.

3:12  Au hagalee hai bolo au guu-gila be guu-dohu. Au e-hagamahi gii-kumi di kisakis deelaa, idimaa, Jesus Christ guu-hai au di-mee ni-aana gii-mee au di-kae di kisakis deelaa.

3:13  E-donu, ogu duaahina-nei, au hagalee-loo e-maanadu bolo au guu-kumi di kisakis deelaa. Ma di mee hua-e-dahi dela e-hai ko-au, au e-haga-de-langahia nia mee ala i ogu muli, e-hai go agu mee ala e-mee, gii-mee au di-dae gi-nia mee ala i ogu mua.

3:14  Malaa, au e-lele gii-dae gi tagageinga, gii-kumi di kisakis deelaa, dela go di gahigahi a God mai baahi o Jesus Christ ang-gi di mouli dela i-nua.

3:15  Malaa, gidaadou huogodoo ala guu-mau i-di hagataalunga, la-gi-hagamaanadu beenei. Maa iai digau i godou lodo e-hagamaanadu hai-gee mo-di mee deenei, God ga-haga-modongoohia adu gi goodou di-mee deelaa.

3:16  Malaa, gidaadou gi-hagamahi-hua gi-mua e-daudali nnangahaihai ala gu-daudali mai i-mua gaa-tugi-loo gi dolomeenei.

3:17  Goodou huogodoo go ogu duaahina, goodou gi-kawe i agu hangaahai. Gimaadou guu-hai di ada humalia belee daudali go goodou. Goodou la-gii-mmada gi digau ala e-daudali nia mee ala e-donu.

3:18  Nia mee aanei la-guu-lawa i dagu agoago haga-logowaahee adu gi goodou mai i-mua, gei dolomeenei, gei au e-taanga labelaa nia maa mo ogu dangi. Digau dogologo guu-dagi go nadau mouli gii-hai ginaadou nia hagadaumee ni-di made o Christ i-hongo di loobuu.

3:19  Di hagaodi gi-muli o nadau mouli, la-go nadau hagaduadua idimaa, di god digaula la-go nia hiihai o nadau huaidina. Digaula e-haga-hagaamu nia mee ala belee langaadia-ai ginaadou. Digaula e-manawa-hua gi-nia mee o henuailala.

3:20  Gei gidaadou digau donu o-di langi, gidaadou e-talitali di hanimoi o tadau Dangada Hagamouli, go Tagi go Jesus Christ.

3:21  I ono mogobuna-dagi nia mee huogodoo, Mee gaa-huli tadau huaidina ala e-paagege ge e-mee-hua di-mmade, gii-hai be dono huaidina madamada.

Chapter 4

4:1  Malaa, ogu duaahina-nei, au e-hagalabagau huoloo goodou, gei au gu-hidihidi huoloo i goodou! Goodou guu-hai au gi-tenetene, gei au e-hagaamu huoloo goodou. Ogu ihoo hagaaloho, deelaa di-godou hai e-hagamau-ai godou mouli i-di godou buni-anga gi Tagi.

4:2  Euodia mo Syntyche, goolua dumaalia, au e-dangidangi-adu gi-hagadaubuni i gulu mehanga, gii-hai be tagahaanau ni Tagi.

4:3  Mo goe labelaa, go dogu ihoo hai-hegau manawa-dahi, au e-hiihai bolo goe gi-hagamaamaa-ina nia ahina dogolua aanei, idimaa, meemaa nogo ngalua hagamahi madalia au, nogo hagadele di Longo-Humalia, ginaadou mo Clement mo ogu ihoo gau-ngalua huogodoo, aalaa nadau ingoo gu-i-lodo di beebaa a God, dela e-hihi ginai nia ingoo o digau ala e-hagamouli.

4:4  Goodou gi-tenetene i-nia madagoaa huogodoo i-lodo di-godou hagadaubuni ang-gi Tagi. Au e-helekai labelaa: goodou gi-tenetene!

4:5  Goodou manawa-dumaalia ang-gi digau huogodoo. Tagi la-hoohoo ga-hanimoi.

4:6  Goodou hudee de-nnoomaalia i dahi mee, tangi ang-gi God i godou mee ala e-hiihai ginai mo di danggee aga i-lodo godou manawa,

4:7  gei di aumaalia o God, dela koia e-damanaiee e-de-modongoohia nia daangada, ga-benebene-humalia-laa godou manawa mo godou maanadu i-di godou buni-anga gi Jesus Christ.

4:8  Ogu duaahina-nei, deenei di hagaodi o agu helekai. Haga-honu-ina godou lodo gi-nia mee ala e-humalia ge iai ono hagaamu i-golo, aalaa go nia mee ala e-hai donu, hagalabagau, donu, madammaa, madamada, ge aamua.

4:9  Goodou hai-hegau gi godou mee ala ne-kabe, gei ne-kae i dogu baahi, mai i agu helekai mo agu mee ala e-hai. Gei di God dela e-gaamai gi gidaadou di aumaalia, ga-madalia goodou.

4:10  Lodo dogu mouli hagadaubuni ang-gi Tagi, gei au gu-tenetene huoloo i goodou i dogu iloo bolo goodou gu-iai di madagoaa humalia i-muli di madagoaa looloo e-haga-modongoohia bolo goodou e-hiihai e-benebene au. Au hagalee helekai bolo goodou gu-diiagi au, gei au e-helekai bolo goodou nogo dei di-godou madagoaa e-mee di-hagamaamaa au ai.

4:11  Au hagalee helekai beenei bolo au gu-diiagi go goodou, idimaa, au e-dohu-hua gi-nia mee ala i dogu baahi.

4:12  Au gu-modongoohia di mouli dela e-dee-dohu, mo-di madagoaa e-logo agu mee. Au guu-kabe di hagamaanadu hagammuni deenei, bolo au guu-dohu i-nia gowaa huogodoo, i-nia madagoaa huogodoo, ma e-aha maa au e-maaluu be e-hiigai, ma e-aha maa au e-hai-mee gi-nia mee e-logo be e-hogoohi.

4:13  Au e-maaloo di-duuli au gi-dee tale gi-nia haingadaa huogodoo, mai di mogobuna a Christ dela ne-gaamai gi-di-au.

4:14  Malaa, e-humalia huoloo go goodou ne-hagamaamaa au i-lodo ogu haingadaa.

4:15  Goodou digau Philippi gu-iloo bolo godou nohongo-dabu hua nogo hagamaamaa au i dogu hagatanga i Macedonia, i taamada di hagadele di Longo-Humalia. Goodou-hua nogo hagamaamaa au, gu-hai-mee ngaadahi gi-di haadanga-lamalia mo-di haadanga-balua.

4:16  Hunu madagoaa, au nogo i Thessalonica, gei goodou gu-hagamaamaa mai au i agu mee nogo hiihai ginai.

4:17  Hagalee go dogu hiihai-hua gi godou wanga-dehuia, au e-hiihai e-mmada gi godou maluagina gi-tomo-aga.

4:18  Malaa, deenei di beebaa hagadootonu o godou mee huogodoo nogo hagamaamaa au, guu-dohu huoloo di-godou hagamaamaa, ma gu-i-golo huogodoo go agu mee ala e-hiihai ginai au, i-muli Epaphroditus ne-gaamai godou wanga-dehuia huogodoo. Di wanga-dehuia deenei e-hai be tigidaumaha dela e-kala ang-gi God, e-hiihai ge tenetene ginai.

4:19  Malaa, dogu God ga-gowadu godou mee huogodoo ala e-hiihai ginai, mai nia maluagina madamada dee-odi o Jesus Christ.

4:20  Di madamada ang-gi tadau God, go tadau Damana, dolomeenei gaa-hana-hua beelaa. Amen.

4:21  Di-madau hagaaloho ang-gi nia daangada a God huogodoo, aalaa go nia dama a Jesus Christ. Tadau duaahina aanei e-madalia au i-ginei, e-gowadu labelaa nadau hagaaloho gi goodou.

4:22  Nia dama a God huogodoo aanei i-ginei, gei e-donu go digau di hale o Caesar, e-gowadu labelaa nadau hagaaloho.

4:23  Tumaalia o tadau Dagi go Jesus Christ gi-madalia goodou.