ABPGRK - I Timothy

Chapter 1

1:1  Παύλος απόστολος Ιησού χριστού κατ΄ επιταγήν θεού πατρός και σώτηρος ημών Ιησού χριστού της ελπίδος ημών

1:2  Τιμοθέω γνησίω τέκνω εν πίστει χάρις έλεος ειρήνη από θεού πατρός ημών και Ιησού χριστού του κυρίου ημών

1:3  καθώς παρεκάλεσά σε προσμείναι εν Εφέσω πορευόμενος εις Μακεδονίαν ίνα παραγγείλης τισί μη ετεροδιδασκαλείν

1:4  μηδέ προσέχειν μύθοις και γενεαλογίαις απεράντοις αίτινες ζητήσεις παρέχουσι μάλλον η οικονομίαν θεού την εν πίστει

1:5  το δε τέλος της παραγγελίας εστίν αγάπη εκ καθαράς καρδίας και συνειδήσεως αγαθής και πίστεως ανυποκρίτου

1:6  ων τινές αστοχήσαντες εξετράπησαν εις ματαιολογίαν

1:7  θέλοντες είναι νομοδιδάσκαλοι μη νοούντες α λέγουσι μήτε περί τίνων διαβεβαιούνται

1:8  οίδαμεν δε ότι καλός ο νόμος εάν τις αυτώ νομίμως χρήται

1:9  ειδώς τούτο ότι δικαίω νόμος ου κείται ανόμοις δε και ανυποτάκτοις ασεβέσι και αμαρτωλοίς ανοσίοις και βεβήλοις πατραλώαις και μητραλώαις ανδροφόνοις

1:10  πόρνοις αρσενοκοίταις ανδραποδισταίς ψεύσταις επιόρκοις και ει τι έτερον τη υγιαινούση διδασκαλία αντίκειται

1:11  κατά το ευαγγέλιον της δόξης του μακαρίου θεού ο επιστεύθην εγώ

1:12  και χάριν έχω τω ενδυναμώσαντί με χριστώ Ιησού τω κυρίω ημών ότι πιστόν με ηγήσατο θέμενος εις διακονίαν

1:13  τον πρότερον όντα βλάσφημον και διώκτην και υβριστήν αλλά ηλεήθην ότι αγνοών εποίησα εν απιστία

1:14  υπερεπλεόνασε δε η χάρις του κυρίου ημών μετά πίστεως και αγάπης της εν χριστώ Ιησού

1:15  πιστός ο λόγος και πάσης αποδοχής άξιος ότι χριστός Ιησούς ήλθεν εις τον κόσμον αμαρτωλούς σώσαι ων πρώτός ειμι εγώ

1:16  αλλά διά τούτο ηλεήθην ίνα εν εμοί πρώτω ενδείξηται Ιησούς χριστός την πάσαν μακροθυμίαν προς υποτύπωσιν των μελλόντων πιστεύειν επ΄ αυτώ εις ζωήν αιώνιον

1:17  τω δε βασιλεί των αιώνων αφθάρτω αοράτω μόνω σοφώ θεώ τιμή και δόξα εις τους αιώνας των αιώνων αμήν

1:18  ταύτην την παραγγελίαν παρατίθεμαί σοι τέκνον Τιμόθεε κατά τας προαγούσας επί σε προφητείας ίνα στρατεύη εν αυταίς την καλήν στρατείαν

1:19  έχων πίστιν και αγαθήν συνείδησιν ην τινες απωσάμενοι περί την πίστιν εναυάγησαν

1:20  ων εστιν Υμέναιος και Αλέξανδρος ους παρέδωκα τω σατανά ίνα παιδευθώσι μη βλασφημείν

Chapter 2

2:1  παρακαλώ ούν πρώτον πάντων ποιείσθαι δεήσεις προσευχάς εντεύξεις ευχαριστίας υπέρ πάντων ανθρώπων

2:2  υπέρ βασιλέων και πάντων των εν υπεροχή όντων ίνα ήρεμον και ησύχιον βίον διάγωμεν εν πάση ευσεβεία και σεμνότητι

2:3  τούτο γαρ καλόν και απόδεκτον ενώπιον του σωτήρος ημών θεού

2:4  ος πάντας ανθρώπους θέλει σωθήναι και εις επίγνωσιν αληθείας ελθείν

2:5  εις γαρ θεός εις και μεσίτης θεού και ανθρώπων άνθρωπος χριστός Ιησούς

2:6  ο δους εαυτόν αντίλυτρον υπέρ πάντων το μαρτύριον καιροίς ιδίοις

2:7  εις ο ετέθην εγώ κήρυξ και απόστολος αλήθειαν λέγω εν χριστώ ου ψεύδομαι διδάσκαλος εθνών εν πίστει και αληθεία

2:8  βούλομαι ούν προσεύχεσθαι τους άνδρας εν παντί τόπω επαίροντας οσίους χείρας χωρίς οργής και διαλογισμού

2:9  ωσαύτως και τας γυναίκας εν καταστολή κοσμίω μετά αιδούς και σωφροσύνης κοσμείν εαυτάς μη εν πλέγμασιν η χρυσώ η μαργαρίταις η ιματισμώ πολυτελεί

2:10  αλλ΄ ο πρέπει γυναιξίν επαγγελλομέναις θεοσέβειαν δι΄ έργων αγαθών

2:11  γυνή εν ησυχία μανθανέτω εν πάση υποταγή

2:12  γυναικί δε διδάσκειν ουκ επιτρέπω ουδέ αυθεντείν ανδρός αλλ΄ είναι εν ησυχία

2:13  Αδάμ γαρ πρώτος επλάσθη είτα Εύα

2:14  και Αδάμ ουκ ηπατήθη η δε γυνή απατηθείσα εν παραβάσει γέγονε

2:15  σωθήσεται δε διά της τεκνογονίας εάν μείνωσιν εν πίστει και αγάπη και αγιασμώ μετά σωφροσύνης

Chapter 3

3:1  πιστός ο λόγος ει τις επισκοπής ορέγεται καλού έργου επιθυμεί

3:2  δει ούν τον επίσκοπον ανεπίληπτον είναι μιάς γυναικός άνδρα νηφάλιον σώφρονα κόσμιον φιλόξενον διδακτικόν

3:3  μη πάροινον μη πλήκτην μη αισχροκερδή αλλ΄ επιεική άμαχον αφιλάργυρον

3:4  του ιδίου οίκου καλώς προϊστάμενον τέκνα έχοντα εν υποταγή μετά πάσης σεμνότητος

3:5  ει δε τις του ιδίου οίκου προστήναι ουκ οίδε πως εκκλησίας θεού επιμελήσεται

3:6  μη νεόφυτον ίνα μη τυφωθείς εις κρίμα εμπέση του διαβόλου

3:7  δει δε αυτόν και μαρτυρίαν καλήν έχειν από των έξωθεν ίνα μη εις ονειδισμόν εμπέση και παγίδα του διαβόλου

3:8  διακόνους ωσαύτως σεμνούς μη διλόγους μη οίνω πολλώ προσέχοντας μη αισχροκερδείς

3:9  έχοντας το μυστήριον της πίστεως εν καθαρά συνειδήσει

3:10  και ούτοι δε δοκιμαζέσθωσαν πρώτον είτα διακονείτωσαν ανέγκλητοι όντες

3:11  γυναίκας ωσαύτως σεμνάς μη διαβόλους νηφαλίους πιστάς εν πάσι

3:12  διάκονοι έστωσαν μιάς γυναικός άνδρες τέκνων καλώς προϊστάμενοι και των ιδίων οίκων

3:13  οι γαρ καλώς διακονήσαντες βαθμόν εαυτοίς καλόν περιποιούνται και πολλήν παρρησίαν εν πίστει τη εν χριστώ Ιησού

3:14  ταύτά σοι γράφω ελπίζων ελθείν προς σε τάχιον

3:15  εαν δε βραδύνω ίνα ειδής πως δει εν οίκω θεού αναστρέφεσθαι ήτις εστίν εκκλησία θεού ζώντος στύλος και εδραίωμα της αληθείας

3:16  και ομολογουμένως μέγα εστί το της ευσεβείας μυστήριον θεός εφανερώθη εν σαρκί εδικαιώθη εν πνεύματι ώφθη αγγέλοις εκηρύχθη εν έθνεσιν επιστεύθη εν κόσμω ανελήφθη εν δόξη

Chapter 4

4:1  το δε πνεύμα ρητώς λέγει ότι εν υστέροις καιροίς αποστήσονταί τινες της πίστεως προσέχοντες πνεύμασι πλάνης και διδασκαλίαις δαιμονίων

4:2  εν υποκρίσει ψευδολόγων κεκαυτηριασμένων την ιδίαν συνείδησιν

4:3  κωλυόντων γαμείν απέχεσθαι βρωμάτων α ο θεός έκτισεν εις μετάληψιν μετά ευχαριστίας τοις πιστοίς και επεγνωκόσι την αλήθειαν

4:4  ότι παν κτίσμα θεού καλόν και ουδέν απόβλητον μετά ευχαριστίας λαμβανόμενον

4:5  αγιάζεται γαρ διά λόγου θεού και εντεύξεως

4:6  ταύτα υποτιθέμενος τοις αδελφοίς καλός έση διάκονος Ιησού χριστού εντρεφόμενος τοις λόγοις της πίστεως και της καλής διδασκαλίας η παρηκολούθηκας

4:7  τους δε βεβήλους και γραώδεις μύθους παραιτού γύμναζε δε σεαυτόν προς ευσέβειαν

4:8  η γαρ σωματική γυμνασία προς ολίγον εστίν ωφέλιμος η δε ευσέβεια προς πάντα ωφέλιμός εστιν επαγγελίαν έχουσα ζωής της νυν και της μελλούσης

4:9  πιστός ο λόγος και πάσης αποδοχής άξιος

4:10  εις τούτο γαρ και κοπιώμεν και ονειδιζόμεθα ότι ηλπίκαμεν επί θεώ ζώντι ος εστι σωτήρ πάντων ανθρώπων μάλιστα πιστών

4:11  παράγγελλε ταύτα και δίδασκε

4:12  μηδείς σου της νεότητος καταφρονείτω αλλά τύπος γίνου των πιστών εν λόγω εν αναστροφή εν αγάπη εν πνεύματι εν πίστει εν αγνεία

4:13  έως έρχομαι πρόσεχε τη αναγνώσει τη παρακλήσει τη διδασκαλία

4:14  μη αμέλει του εν σοι χαρίσματος ο εδόθη σοι διά προφητείας μετά επιθέσεως των χειρών του πρεσβυτερίου

4:15  ταύτα μελέτα εν τούτοις ίσθι ίνα σου η προκοπή φανερά η εν πάσιν

4:16  επέχε σεαυτώ και τη διδασκαλία επίμενε αυτοίς τούτο γαρ ποιών και σεαυτόν σώσεις και τους ακούοντάς σου

Chapter 5

5:1  πρεσβυτέρω μη επιπλήξης αλλά παρακάλει ως πατέρα νεωτέρους ως αδελφούς

5:2  πρεσβυτέρας ως μητέρας νεωτέρας ως αδελφάς εν πάση αγνεία

5:3  χήρας τίμα τας όντως χήρας

5:4  ει δε τις χήρα τέκνα η έκγονα έχει μανθανέτωσαν πρώτον τον ίδιον οίκον ευσεβείν και αμοιβάς αποδιδόναι τοις προγόνοις τούτο γαρ εστι καλόν και απόδεκτον ενώπιον του θεού

5:5  η δε όντως χήρα και μεμονωμένη ήλπικεν επί τον θεόν και προσμένει ταις δεήσεσι και ταις προσευχαίς νυκτός και ημέρας

5:6  η δε σπαταλώσα ζώσα τέθνηκε

5:7  και ταύτα παράγγελλε ίνα ανεπίληπτοι ώσιν

5:8  ει δε τις των ιδίων και μάλιστα των οικείων ου προνοεί την πίστιν ήρνηται και έστιν απίστου χείρων

5:9  χήρα καταλεγέσθω μη έλαττον ετών εξήκοντα γεγονυία ενός ανδρός γυνή

5:10  εν έργοις καλοίς μαρτυρουμένη ει ετεκνοτρόφησεν ει εξενοδόχησεν ει αγίων πόδας ένιψεν ει θλιβομένοις επήρκεσεν ει παντί έργω αγαθώ επηκολούθησε

5:11  νεωτέρας δε χήρας παραιτού όταν γαρ καταστρηνιάσωσι του χριστού γαμείν θέλουσιν

5:12  έχουσαι κρίμα ότι την πρώτην πίστιν ηθέτησαν

5:13  άμα δε και αργαί μανθάνουσι περιερχόμεναι τας οικιάς ου μόνον δε αργαί αλλά και φλύαροι και περίεργοι λαλούσαι τα μη δέοντα

5:14  βούλομαι ούν νεωτέρας γαμείν τεκνογονείν οικοδεσποτείν μηδεμίαν αφορμήν διδόναι τω αντικειμένω λοιδορίας χάριν

5:15  ήδη γαρ τινες εξετράπησαν οπίσω του σατανά

5:16  ει τις πίστος η πιστή έχει χήρας επαρκείτω αυταίς και μη βαρείσθω η εκκλησία ίνα ταις όντως χήραις επαρκέση

5:17  οι καλώς προεστώτες πρεσβύτεροι διπλής τιμής αξιούσθωσαν μάλιστα οι κοπιώντες εν λόγω και διδασκαλία

5:18  λέγει γαρ η γραφή βουν αλοώντα ου φιμώσεις και άξιος ο εργάτης του μισθού αυτού

5:19  κατά πρεσβυτέρου κατηγορίαν μη παραδέχου εκτός ει μη επί δύο η τριών μαρτύρων

5:20  τους αμαρτάνοντας ενώπιον πάντων έλεγχε ίνα και οι λοιποί φόβον έχωσι

5:21  διαμαρτύρομαι ενώπιον του θεού και κυρίου Ιησού χριστού και των εκλεκτών αγγέλων ίνα ταύτα φυλάξης χωρίς προκρίματος μηδέν ποιών κατά πρόσκλισιν

5:22  χείρας ταχέως μηδενί επιτίθει μηδέ κοινώνει αμαρτίαις αλλοτρίαις σεαυτόν αγνόν τήρει

5:23  μηκέτι υδροπότει αλλ΄ οίνω ολίγω χρώ διά τον στόμαχόν σου και τας πυκνάς σου ασθενείας

5:24  τινών ανθρώπων αι αμαρτίαι πρόδηλοί εισι προάγουσαι εις κρίσιν τισί δε και επακολουθούσιν

5:25  ωσαύτως και τα καλά έργα πρόδηλά εστι και τα άλλως έχοντα κρυβήναι ου δύναται

Chapter 6

6:1  όσοι εισίν υπό ζυγόν δούλοι τους ιδίους δεσπότας πάσης τιμής αξίους ηγείσθωσαν ίνα μη το όνομα του θεού και η διδασκαλία βλασφημήται

6:2  οι δε πιστούς έχοντες δεσπότας μη καταφρονείτωσαν ότι αδελφοί εισιν αλλά μάλλον δουλευέτωσαν ότι πιστοί εισι και αγαπητοί οι της ευεργεσίας αντιλαμβανόμενοι ταύτα δίδασκε και παρακάλει

6:3  ει τις ετεροδιδασκαλεί και μη προσέρχεται υγιαίνουσι λόγοις τοις του κυρίου ημών Ιησού χριστού και τη κατ΄ ευσέβειαν διδασκαλία

6:4  τετύφωται μηδέν επιστάμενος αλλά νοσών περί ζητήσεις και λογομαχίας εξ ων γίνεται φθόνος έρις βλασφημίαι υπόνοιαι πονηραί

6:5  διαπαρατριβαί διεφθαρμένων ανθρώπων τον νουν και απεστερημένων της αληθείας νομιζόντων πορισμόν είναι την ευσέβειαν αφίστασο από των τοιούτων

6:6  έστι δε πορισμός μέγας η ευσεβέια μετά αυταρκείας

6:7  ουδέν γαρ εισηνέγκαμεν εις τον κόσμον δήλον ότι ουδέ εξενεγκείν τι δυνάμεθα

6:8  έχοντες δε διατροφάς και σκεπάσματα τούτοις αρκεσθησόμεθα

6:9  οι δε βουλόμενοι πλουτείν εμπίπτουσιν εις πειρασμόν και παγίδα και επιθυμίας πολλάς ανοήτους και βλαβεράς αίτινες βυθίζουσι τους ανθρώπους εις όλεθρον και απώλειαν

6:10  ρίζα γαρ πάντων των κακών εστίν η φιλαργυρία ης τινές ορεγόμενοι απεπλανήθησαν από της πίστεως και εαυτούς περιέπειραν οδύναις πολλαίς

6:11  συ δε ω άνθρωπε του θεού ταύτα φεύγε δίωκε δε δικαιοσύνην ευσέβειαν πίστιν αγάπην υπομονήν πραότητα

6:12  αγωνίζου τον καλόν αγώνα της πίστεως επιλαβού της αιωνίου ζωής εις ην και εκλήθης και ωμολόγησας την καλήν ομολογίαν ενώπιον πολλών μαρτύρων

6:13  παραγγέλλω σοι ενώπιον του θεού του ζωοποιούντος τα πάντα και χριστού Ιησού του μαρτυρήσαντος επί Ποντίου Πιλάτου την καλήν ομολογίαν

6:14  τηρήσαί σε την εντολήν άσπιλον ανεπίληπτον μέχρι της επιφανείας του κυρίου ημών Ιησού χριστού

6:15  ην καιροίς ιδίοις δείξει ο μακάριος και μόνος δυνάστης ο βασιλεύς των βασιλευόντων και κύριος των κυριευόντων

6:16  ο μόνος έχων αθανασίαν φως οικών απρόσιτον ον είδεν ουδείς ανθρώπων ουδέ ιδείν δύναται ω τιμή και κράτος αιώνιον αμήν

6:17  τοις πλουσίοις εν τω νυν αιώνι παράγγελλε μη υψηλοφρονείν μηδέ ηλπικέναι επί πλούτου αδηλότητι αλλ΄ εν τω θεώ τω ζώντι τω παρέχοντι ημίν πάντα πλουσίως εις απόλαυσιν

6:18  αγαθοεργείν πλουτείν εν έργοις καλοίς ευμεταδότους είναι κοινωνικούς

6:19  αποθησαυρίζοντας εαυτοίς θεμέλιον καλόν εις το μέλλον ίνα επιλάβωνται της αιωνίου ζωής

6:20  ω Τιμόθεε την παρακαταθήκην φύλαξον εκτρεπόμενος τας βεβήλους κενοφωνίας και αντιθέσεις της ψευδωνύμου γνώσεως

6:21  ην τινες επαγγελλόμενοι περί την πίστιν ηστόχησαν η χάρις μετά σου αμήν