Azeri - I Timothy

Chapter 1

1:1  قورتاريجيميز تارينين و اومئدئمئز مسئح عئسانين امرئنه گؤره، مسئح عئسانين حوارئسي پولوسدان،

1:2  ائماندا حقئقي اوغلوم تئموتاعوسا: آتا تاري و ربّئمئز مسئح عئسادان فيض، رحمت، و باريش اولسون.

1:3  مقدونئيه​يه گتدئيئم واخت سندن خاهئش اتدئم کي، افسوسدا قالاسان و بعضئلره نصئحت وره​سن کي، اؤزگه تعلئملر اؤيرتمه‌سئنلر،

1:4  افسانه​لر و ساييسيز-حسابسيز نسئل‌نامه‌لره ده قولاق آسماسينلار کي، تارينين بئنا اتمه‌سئنئن ترقّئسئنه کي، ائمانداندير، سبب اولمورلار. اونلار آنجاق موباحئثه​لره سبب اولورلار.

1:5  آمّا بئزئم حؤکموموزون آماجي او محبّتدئر کي، پاک اورکدن، ياخشي وئجداندان و رئياسيز ائماندان گلئر.

1:6  چونکي بعضي آداملار بونلاردان آزيب، ثمره​سئز موباحئثه​لره اوز گتئرئبلر

1:7  و ائسته‌يئرلر کي، شرئعت موعلّئمي اولسونلار. حال بو کي، نه ددئکلرئني آنلاييرلار، نه ده يقئنلئکله ائدّئعا اتدئکلرئني!

1:8  لاکئن بئز بئلئرئک کي، شرئعت ياخشي‌دير اگر کئمسه اونو شرئعته موناسئب بئر شکئلده ائستئفاده اتسه،

1:9  بونو دا بئلسه کي، شرئعت صالح بئر آدام اوچون قويولماييب؛ شرئعتسئزلر، عاصئلر، دئنسئزلر، گوناهکارلار، موقدّس اولمايانلار، نجئسلر، آتا و يا آنالاريني اؤلدورنلر، قاتئل​لر،

1:10  زئناکارلار، همجئنسبازلار، آدام اوغورلايانلار، يالان دانيشانلار، آندي پوزانلار و صحئح تعلئمئن ضئدّئنه اولان اؤزگه هر شي اوچون قويولوب.

1:11  او تعلئم کي، موتبارک تارينين شؤوکتلي ائنجئلئنه گؤره منه تاپشيريليب.

1:12  ربّئمئز مسئح عئسايا شوکور ادئرم کي، منه قووّت ورئب. چونکي مني امئن بئلئب، خئدمته تعيئن اتدي؛

1:13  گرچي اوّل​لر کوفر دانيشان، عذاب ورن و ظولم اِده‌نئن بئري ائدئم. آمّا گئنه ده منه رحمت گؤرستدي، بو سببدن کي، ائمانسيزليقدا، آنلامازليقدان بونلاري اتدئم.

1:14  و مسئح عئسادا اولان ائمان و محبّتله ربّئمئزئن فيضي حددن داها دا چوخ ائدي.

1:15  بو سؤز اعتئمادا و هر وجه‌​له قبول اولونماغا لايئقدئر کي، مسئح عئسا گوناهکارلاري قورتارماق اوچون دونيايا گلدي کي، اونلارين آراسيندا لاپ ياماني منم.

1:16  لاکئن من محض بو سببه رحمت تاپديم کي، عئسا مسئح اؤز کامئل صبرئني ائلک اولاراق منده ظاهئر اتسئن. اِله کي، ابدي حيات اوچون سونرادا اونا ائنانانلارا نومونه اولوم.

1:17  ائندي ابدي پادشاها، قيري‌​فاني، گؤرونمه‌ين، واحئد اولان تارييا ابددن ابده​جک حؤرمت و شؤوکت اولسون. آمئن.

1:18  اؤولاديم تئموتاعوس، بونلاري، سنئن حاقّيندا اوّلجه ديئلن نبئلئک سؤزلرئنه گؤره، سنه تاپشيريرام کي، اونلارين واسئطه​‌سئله ياخشي بئر موبارئزه قاباغا آپاراسان

1:19  و ائمان و ياخشي وئجداني حئفظ اده​سن کي، بعضئلري ردّ ادئب، ائمانلاري حاقدا سينيق گمي کئمي باتيبلار.

1:20  بونلارين آراسيندا هئمنايوس و ائسکندردئر. اونلاري شيطانا تسلئم اتدئم کي، کوفر دمه​مه‌يي اؤيرنسئنلر.

Chapter 2

2:1  بلجه هر شيدن اوّل، تشوئق ادئرم کي، بوتون ائنسانلار اوچون نئيازلار، دوعالار، شفاعتلر و شوکورلر اولونسون؛

2:2  پادشاهلار و بوتون ائقتئدار صاحئبلري اوچون، اِله کي، بئز بوتون دئندارليق و ووقارلا آرام و آسوده بئر عؤمور کچئردک.

2:3  بو، قورتاريجيميز تارينين نظرئنده ياخشي و مقبولدور کي،

2:4  ائسته‌يئر بوتون ائنسانلار نئجات تاپسينلار و حقئقتئن معرئفتئنه يتئشسئنلر.

2:5  دوغرودان دا کي، بئر تاري وار و تاري‌ ائله ائنسانلار آراسيندا دا بئر واسئطه​چي وار، يعني ائنسان اولان مسئح عئسا

2:6  کي، اؤزونو هامي اوچون فئدئيه وردي؛ صحئح زامانيندا ورئلمئش بئر شهادت.

2:7  و من بونون اوچون بئر واعئظ و حواري (حقئقتي ديئرم، يالان دانيشميرام)، ائمان و حقئقتده قيري‌يهودئلره بئر موعلّئم تعيئن اولونموشام.

2:8  بونا گؤره، ائسته‌يئرم کي، کئشئلر هر يرده موقدّس اَللر قالديريب، قضبسئز و موباحئثه​سئز دوعا اتسئنلر.

2:9  اِله‌جه ده آروادلار صحئح پالتارا گيئنئب، اؤزلرئني هؤرولموش ساچلار و قيزيل يا دا مئرواري و باهالي پالتارلا يوخ، حيا و ادبله بزه​سئنلر.

2:10  داها چوخ ياخشي عمللرئن واسئطه‌سئله، نجه کي، دئندارليق ائدّئعاسيني ادن آروادلارا ياراشير.

2:11  قوي آرواد سس​سئزجه کامئل بئر تابعلئک ائچئنده تعلئم آلسين.

2:12  آروادا ائجازه ورمئرم کي، تعلئم ورسئن و يا کئشئنئن اوستونه ائقتئدار سورسون، آمّا سس​سئز قالسين.

2:13  چونکي اوّل آدم ياراندي و سونراسي حوّا.

2:14  آلدانان دا آدم ديئلدي، آرواد آلداندي و خاطايا باتدي.

2:15  آمّا اوشاق دوغماسي ائله نئجات تاپاجاق، اگر ائمان و محبّت و تقدئسده ووقارلا داوام وره​لر.

Chapter 3

3:1  بو کلام اعتئمادا لايئقدئر کي، اگر کئمسه ناظئرلئک منصبئني ائسته‌يئر، ياخشي بئر ائش آرزو ادئر.

3:2  اوندا گرک ناظئر قوصورسوز، بئر آروادين اَري، تمکئنلي، عاغيلّي، مؤحترم، قوناق‌سِون و تعلئم ورمه‌يه قابئل بئر آدام اولسون.

3:3  مي‌پرست يا دا داعواکار يوخ، مولايئم، داعوا اتمه‌ين و پول سوگئسئندن آزاد بئري اولسون.

3:4  گرک اؤز عايئله​سئني ياخشي ائداره اتسئن، اوشاقلاريني بوتون صداقتله اؤز ائطاعتئنده ساخلاسين.

3:5  لاکئن اگر بئري بئلمئر کي، اؤز عايئله​سئني نجه ائداره اتسئن، تارينين کئلئساسينين قيدئنه نجه قالاجاق؟

3:6  تزه ائمان گتئرمئش بئري ده اولماسين کي، مبادا کئبئرله‌نئب، ائبلئسئن محکومئيّتئنه دوشسون.

3:7  بو آداما گرکدئر کي، خارئجئلر يانيندا دا ياخشي بئر آدي اولسون، اِله کي، مذمّته و ائبلئسئن تورونا دوشمه‌سئن.

3:8  اِله‌جه ده شمّاسلار گرک صداقت صاحئبي اولسونلار. ائکي دئللي، مي‌پرست و يا حاقسيز قازانجا حرئص اولماسينلار.

3:9  آمّا ائمان سئرّئني تمئز وئجدانلا ساخلاسينلار.

3:10  قويون بونلار قاباقجادان ائمتاحان اولونسونلار و اگر قوصورلاري اولمازسا، اوندا شمّاسچيليق اتسئنلر.

3:11  اِله‌جه ده آروادلار صداقت صاحئبي اولسونلار. ياوا-ياوا قيبت ادن يوخ، مولايئم و هر شيده امئن اولسونلار.

3:12  شمّاسلار بئر آروادا اَر اولسونلار. اوشاقلاريني و اؤز اِو اهلئني ياخشي ائداره اتسئنلر.

3:13  چونکي شمّاس منصبئنده ياخشي خئدمت ادنلر اؤزلري اوچون ياخشي بئر مرتبه و مسئح عئسادا اولان ائماندا بؤيوک بئر يقئنلئک قازانيرلار.

3:14  بو شيلري سنه بو اومئدله يازيرام کي، ياخينليقدا سنئن يانينا گلئم.

3:15  لاکئن اگر يوبانسام، بئله​سن کي، تارينين عايئله​سئنده شخص نجه رفتار اتمه‌لي‌دئر، يعني دئري تارينين کئلئساسيندا کي، حقئقتئن سوتون و دئره‌يي‌دئر.

3:16  و هامينين ائقراري​ ائله دئندارليغين سئرّي بؤيوکدور: او تاري کي، جئسمده ظاهئر اولدو، موقدّس روح طرفئندن تصدئق اولوندو، ملکلره گؤروندو، مئلّتلر آراسيندا اعلان اولوندو، دونيادا اونا ائمان گتئرئلدي، شؤوکتده يوخاري قالديريلدي.

Chapter 4

4:1  آمّا موقدّس روح آيدين بئر شکئلده ديئر کي، آخير زامانلاردا بعضئلر آلداتان روحلارا، شرئرلرئن تعلئملرئنه چکئلئب ائماندان دوشه​جکلر؛

4:2  يالانچيلارين رئياکارليغي واسئطه‌سئله کي، وئجدانلاريندا دمئر داغلا داغلانميش کئمي داغلانيبلار.

4:3  بو آداملار اولنمه‌يي قدغن ادئب، يمکلردن پرهئز اتمه‌يه امر ادئرلر. حال بو کي، تاري بو يمکلري ياراديب کي، ائنانانلار و حقئقتي بئلنلر شوکورله اونلاري قبول اتسئنلر.

4:4  چونکي تارينين ياراتديغي هر شي ياخشيدير و اگر شوکورله قبول اولونسا، هچ بئرئسي ردّ اولونمالي ديئل.

4:5  چونکي تارينين کلامي و دوعا ائله تقدئس اولونور.

4:6  بو شيلري قارداشلارا خاطيرلاماقلا مسئح عئسانين ياخشي بئر قولو اولارسان و ائمانين کلامي ائله رئعايت اتدئيئن صحئح تعلئمده بؤيويرسن.

4:7  قاري آروادلارا ياراشان دونيه‌وي افسانه​لردن اؤزونو اوزاق ساخلا. اؤزونه دئندارليق اوچون مشق ور.

4:8  چونکي بدني مشقئن آنجاق بئرآز فايداسي وار، لاکئن دئندارليق هر شي اوچون فايدالي‌دير، چونکي اوندا ائندئکي و گله​جک حياتين وعده​سي وار.

4:9  بو کلام اعتئماد اتمه‌لي و کامئل قبول اولونماغا لايئقدئر.

4:10  چونکي بئز بونون اوچوندور کي، زحمت چکئب تحقئره دؤزوروک. بئز اومئدئمئزي دئري تارييا باغلاميشيق کي، بوتون ائنسانلارين قورتاريجيسي‌دير، خوصوصن ده ائمانلي​لارين.

4:11  بو شيلري تاپشير و اؤيرت.

4:12  قويما هچ کئم سنئن جاوانليغينا حقارتله باخسين. لاکئن سؤزده، رفتاردا، محبّتده، ائماندا و پاکليقدا اؤزونو ائمانلي​لاردان بئر نومونه ات.

4:13  من گلنه کئمي، موقدّس يازيلارين اوخونماسينا، تشوئق و تعلئمه هاواسين اولسون.

4:14  سنده اولان روحاني عطايا کي، نبئلئک سؤزو و آغساقّاللارين ال قويماقلاري ائله سنه ورئلئب، لاقيد اولما.

4:15  بو شيلرده زحمت چک؛ اونلاردا مشغول اول، اِله کي، سنئن ترقّئن هامييا آشکار اولسون.

4:16  اؤزونه و وردئيئن تعلئمه چوخ دئقّت ات؛ بو شيلرده داوام ور. چونکي بونو اتمکله، هم اؤزونو، هم ده سنه قولاق آسانلاري قورتارارسان.

Chapter 5

5:1  قوجا کئشئني شئدّتله توبئخ اتمه، لاکئن اونو آتايا اِدَن کئمي تشوئق ات، جاوانلارا قارداشلارا ادن کئمي،

5:2  قوجا آروادلارا آنالارا ادن کئمي، جاوان آروادلارا باجيلارا ادن کئمي، بوتون پاکليقدا.

5:3  دول آروادلارا اگر حقئقتن دول اولسالار، احتئرام ات.

5:4  آمّا اگر بئر دول آروادين اؤولادلاري يا دا نوه​لري وارسا، اونلار گرک هر شيدن اوّل اؤيره‌نسئنلر کي، اؤز قوحوملارينا اورک يانديرالار و آتا-آنالارينا کؤمک اده​لر. چونکي تارينين نظرئنده بو مقبولدور.

5:5  دوغرودان دول آرواد اولان و يالقوز بوراخيلان، اومئدئني تارييا باغلاييب، گجه-گوندوز نئيازلار و دوعالارا مشغولدور.

5:6  لاکئن عيّاشليقدا کچئنن آرواد، دئري ائکن اؤلودور.

5:7  بو شيلري ده اونلارا تعلئم ور، اِله کي، مذمّت آلتيندا قالماسينلار.

5:8  آمّا اؤزونونکولر اوچون، خوصوصن ده اؤز اِو اهلي اوچون تداروک گؤرمه‌ين آدام، ائماني ردّ ادئب و ائمانسيز بئرئندن داها دا پئسدئر.

5:9  دول آرواد آنجاق او زامان سئياهييا آلينسين، اگر ياشي آلتميشدان اسکئک ديئل، بئر کئشئيه آرواد ائمئش

5:10  و ياخشي ائشلرده آد آچيب. اگر اؤولادلار بؤيودوب، اگر قرئب‌نوازليق ادئب، اگر موقدّسلرئن آياقلاريني يويوب، اگر ذئلّت چکنلره کؤمک ادئب، اگر اؤزونو هر ياخشي ائشه وقف ادئبدئر.

5:11  لاکئن جاوان دوللاري ائمتئناع ات، چونکي مسئحله جور گلمه‌ين هاوا-هوسلره دوشدوکده، اَره گتمک ائسته‌يئرلر،

5:12  و محکومئيّت آلتينا گئرئرلر، چونکي اوّلکي ائمانلاريني بئر يانا آتيبلار.

5:13  همن حالدا اِولري دولانا-دولانا، بکارليغي دا اؤيره‌نئرلر. آنجاق بکارليغي يوخ، قيبت اِتمه‌يي، هر شيه بورونلاريني سوخماغي، و ناروا دانيشماغي.

5:14  بونا گؤره، ائسته‌يئرم جاوان دوللار اَره گتسئنلر، اؤولاد دوغسونلار، اِو دولانديرسينلار و دوشمنه مذمّت اوچون فورصت ورمه‌سئنلر.

5:15  چونکي اِله ائندي ده بعضئلري دؤنوبلر کي، شيطانين دالينجا گتسئنلر.

5:16  اگر ائمانلي بئر آروادين دول اولان ياخينلاري وارسا، او گرک اونا کؤمک اتسئن و کئلئسايا يوک قويولماسين. اِله کي، کئلئسا دوغرودان دول اولانلارا کؤمک اده بئلسئن.

5:17  ياخشي پئشواليق ادن آغساقّاللار ائکي قات احتئراما لايئقدئرلر، خوصوصن اونلار کي، وعظ اتمک و تعلئم ورمکده چوخ زحمت چکئرلر.

5:18  چونکي موقدّس يازي ديئر: "خرمن دؤين اؤکوزون آغزيني باغلاما." و "فحله موزدونه موستحقدئر."

5:19  آغساقّالين ضئدّئنه بئر بؤهتاني قبول اتمه، مگر ائکي و يا اوچ شاهئد شهادت ورسئنلر.

5:20  گوناهدا داوام ورنلري هامينين قاباغيندا توبئخ ات. اِله کي، او بئرئلر ده دهشت اتسئنلر.

5:21  سني تاري و مسئح عئسا و سچئلمئش ملکلرئن حوضوروندا آند ورئرم کي، بو اوصوللاري قَرَضسئز ساخلاياسان و طرفدارليق اوزوندن هچ بئر شي اتمه‌يه​سن.

5:22  هچ کسئن اوستونه چوخ عجله ائله اَل قويما و بلجه اؤزگه​لرئن گوناهيندا شرئک اولما. اؤزونو طاهئر ساخلا.

5:23  داها آنجاق سو ائچمه، لاکئن مِعدن و تز-تز ضعئفله‌دئيئن اوچون بئر آز شراب دا ائچ.

5:24  بعضي آداملارين گوناهلاري چوخ آيديندير و اونلارين قاباقلاريندا موحاکئمه​يه طرف گدئر. اؤزگه​لرئنکي اونلارين دالينجا گلئر.

5:25  اله‌جه ده، ياخشي عمللر بلّي‌دئر، و بلّي اولمايانلاري گئزلتمک اولماز.

Chapter 6

6:1  قوي قوللوق آلتيندا اولان بوتون قوللار، اؤز آغالاريني هر جور حؤرمته لايئق بئلسئنلر، اِله کي، تارينين آدينا و تعلئمئن ضئدّئنه کوفر ديئلمه‌سئن.

6:2  اونلار دا کي، ائمانلي آغالاري وار، اونلارا گرک حؤرمتسئزلئک اتمه‌سئنلر، چونکي اونلار قارداشديرلار. آمّا گرک اونلارا داها دا چوخ قوللوق اتسئنلر، چونکي فايدايا شرئک اولانلار ائمانلي و سوگئلئدئرلر. بو شيلري تعلئم ورئب، وعظ ات.

6:3  اگر کئمسه اؤزگه بئر تعلئم ورسه و ربّئمئز عئسا مسئحئن صحئح سؤزلري ائله و دئندارليغا دؤنده‌رن تعلئمله مووافئق اولماسا،

6:4  او، کئبئرله‌نئب و هچ بئر شي آنلامير. لاکئن داعوا سالان سوآللارا و سؤزلر باره​سئنده اولان موباحئثه​لره چوخ علاقه​لري وار کي، اونلاردان حسد، داعوا، سؤيوش، و پئس گومانلار قالخير

6:5  و فئکئرلري فاسئد اولان و حقئقتدن محروم اولان آداملارين آراسيندا کي، دئندارليغي قازانج اوچون بئر وسئله بئلئرلر، دائم چکئشمه قالديريرلار.

6:6  البتّه کي، دئندارليق بؤيوک بئر قازانج اوچون وسئله​دئر، اگر قَناعتله همراه اولسا.

6:7  چونکي بو دونيايا هچ بئر شي گتئرمه‌دئک، اونون اوچون ده اوندان هچ بئر شي گؤتوره​بئلمه‌رئک.

6:8  اگر يئيه​جه‌يئمئز و اؤرتونه​جه‌يئمئز وارسا، بونلارلا قناعت ادئرئک.

6:9  آمّا وارلي اولماق ائسته‌ينلر وسوسه​يه، تورا، آخماقليق و زئيان يتئرن چوخ هاوا-هوسلره دوشورلر کي، ائنسانلاري تباه و هلاکتده قرق ادئر.

6:10  چونکي پول سوگئسي هر جور شرّئن کؤکودور و اونون آرزوسوندا اولان بعضئلر ائماندان آزيبلار و اؤزلري اؤزلرئنه چوخ آجي چکدئرئبلر.

6:11  سن اي تاري آدامي، بونلاردان قاچ و صالحلئک، دئندارليق، ائمان، محبّت، صبر و حلم دالينجا اول.

6:12  ائمانين ياخشي ساواشيني ساواش و ابدي حياتي توت کي، اونون اوچون دعوت اولوندون و چوخ شاهئدلرئن حوضوروندا ياخشي اعتئراف اتدئن.

6:13  هر شيه حيات ورن تارينين حوضوروندا و او مسئح عئسانين حوضوروندا کي، پونطئيوس پئلاطين قاباغيندا ياخشي اعتئرافلا شهادت وردي، سنه امر ادئرم کي،

6:14  ربّئمئز عئسا مسئحئن ظوهورونا کئمي احکامي لکه​سئز و مذمّتسئز ساخلاياسان.

6:15  کي، اونو اؤز واختيندا يرئنه يتئره​جک؛ او کي، موتبارک و تک بئر سولطاندير، پادشاهلارين پادشاهي و ربلرئن ربّي.

6:16  کي، اؤلومسوزلويه محض او مالئکدئر و ياخينلاشا بئلمه​مه‌لي نوردا ساکئندئر کي، اونو نه بئر آدام گؤروب نه ده گؤره بئلر. اونا ابدي حؤرمت و قودرت اولسون. آمئن.

6:17  بو حاضير دونيادا وارلي اولانلارا نصئحت ور کي، کئبئرلنمه‌سئنلر، يا دا اَلدن گدن وار-دؤولته اومئد باغلاماسينلار. اومئدلرئني تارييا باغلاسينلار کي، بهره آلماق اوچون هر شيي بئزه بوللوقلا عطا ادئر.

6:18  نصئحت ور کي، ياخشيليق اتسئنلر، ياخشي ائشلرده وارلي اولسونلار، سخاوتلي اولوب پايلاشماغا حاضير اولسونلار.

6:19  و اؤزلري اوچون گله​جه‌يه ياخشي خزئنه​نئن بونؤوره​سئني قورسونلار، اِله کي، حقئقي حياتا مالئک اولسونلار.

6:20  اي تئموتاعوس، سنه امانت ورئله‌ني حئفظ ات. دونيه‌وي و باطئل دانيشماقلاردان و ضئدّ دوران موباحئثه​لردن کي، يالاندان اونا معرئفت ديئرلر، اؤزونو اوزاق ساخلا

6:21  کي، بعضئلري اونو اعتئراف ادئب بلجه ائماندان آزديلار. فيض سنئنله اولسون.