CSlElizabeth - I Timothy

Chapter 1

1:1  Павел, посланник Иисус Христов по повелению Бога Спаса нашего и Господа Иисуса Христа упования нашего,

1:2  Тимофею присному чаду в вере: благодать, милость, мир от Бога Отца нашего и Христа Иисуса Господа нашего.

1:3  Якоже умолих тя пребыти во Ефесе, идый в Македонию, да завещаеши неким не инако учити,

1:4  ниже внимати баснем и родословием безконечным, яже стязания творят паче, нежели Божие строение, еже в вере.

1:5  Конец же завещания есть любы от чиста сердца и совести благия и веры нелицемерныя,

1:6  в нихже нецыи погрешивше, уклонишася в суесловия,

1:7  хотяще быти законоучителе, не разумеюще ни яже глаголют, ни о нихже утверждают.

1:8  Вемы же, яко добр закон (есть), аще кто его законне творит,

1:9  ведый сие, яко праведнику закон не лежит, но беззаконным и непокоривым, нечестивым (же) и грешником, неправедным и скверным, отца и матере досадителем, мужеубийцам,

1:10  блудником, мужеложником, разбойником, (клеветником, скотоложником,) лживым, клятвопреступником, и аще что ино здравому учению противится,

1:11  по благовестию славы блаженнаго Бога, еже мне уверено бысть.

1:12  И благодарю укрепляющаго мя Христа Иисуса Господа нашего, яко верна мя непщева, положив (мя) в службу,

1:13  бывша мя иногда хульника и гонителя и досадителя: но помилован бых, яко неведый сотворих в неверствии:

1:14  упреумножися же благодать Господа нашего (Иисуса Христа) с верою и любовию яже о Христе Иисусе.

1:15  Верно слово и всякаго приятия достойно, яко Христос Иисус прииде в мир грешники спасти, от нихже первый есмь аз.

1:16  Но сего ради помилован бых, да во мне первем покажет Иисус Христос все долготерпение, за образ хотящих веровати Ему в жизнь вечную.

1:17  Царю же веков нетленному, невидимому, единому премудрому Богу, честь и слава во веки веков. Аминь.

1:18  Сие же завещание предаю ти, чадо Тимофее, по бывших на тя прежде пророчествиих, да воинствуеши в них доброе воинство,

1:19  имея веру и благую совесть, юже нецыи отринувше, от веры отпадоша:

1:20  от нихже есть Именей и Александр, ихже предах сатане, да накажутся не хулити.

Chapter 2

2:1  Молю убо прежде всех творити молитвы, моления, прошения, благодарения за вся человеки,

2:2  за царя и за всех, иже во власти суть, да тихое и безмолвное житие поживем во всяцем благочестии и чистоте:

2:3  сие бо добро и приятно пред Спасителем нашим Богом,

2:4  Иже всем человеком хощет спастися и в разум истины приити.

2:5  Един бо есть Бог, и един ходатай Бога и человеков, человек Христос Иисус,

2:6  давый Себе избавление за всех: свидетелство времены своими,

2:7  в неже поставлен бых аз проповедник и Апостол, истину глаголю о Христе, не лгу, учитель языков в вере и истине.

2:8  Хощу убо, да молитвы творят мужие на всяцем месте, воздеюще преподобныя руки без гнева и размышления:

2:9  такожде и жены во украшении лепотнем, со стыдением и целомудрием да украшают себе не в плетениих, ни златом, или бисерми, или ризами многоценными,

2:10  но, еже подобает женам обещавающымся благочестию, делы благими.

2:11  Жена в безмолвии да учится со всяким покорением:

2:12  жене же учити не повелеваю, ниже владети мужем, но быти в безмолвии.

2:13  Адам бо прежде создан бысть, потом же Ева:

2:14  и Адам не прельстися, жена же прельстившися, в преступлении бысть:

2:15  спасется же чадородия ради, аще пребудет в вере и любви и во святыни с целомудрием.

Chapter 3

3:1  Верно слово: аще кто епископства хощет, добра дела желает.

3:2  Подобает убо епископу быти непорочну, единыя жены мужу, трезвену, целомудру, (благоговейну,) честну, страннолюбиву, учителну,

3:3  не пиянице, не бийце, не сварливу, не мшелоимцу, но кротку, (не завистливу,) не сребролюбцу,

3:4  свой дом добре правящу, чада имущу в послушании со всякою чистотою:

3:5  аще же кто своего дому не умеет правити, како о Церкви Божией прилежати возможет?

3:6  Не новокрещенну, да не разгордевся в суд впадет диаволь.

3:7  Подобает же ему и свидетелство добро имети от внешних, да не в поношение впадет и в сеть неприязнену.

3:8  Диаконом такожде чистым, не двоязычным, не вину многу внимающым, не скверностяжателным,

3:9  имущым таинство веры в чистей совести.

3:10  И сии убо да искушаются прежде, потом же да служат, непорочни суще.

3:11  Женам такожде чистым, не клеветивым, (не навадницам,) трезвенным, верным во всем.

3:12  Диакони да бывают единыя жены мужие, чада добре правяще и своя домы:

3:13  ибо служившии добре степень себе добр снискают и многое дерзновение в вере, яже о Христе Иисусе.

3:14  Сия пишу тебе, уповая приити к тебе скоро:

3:15  аще же замедлю, да увеси, како подобает в дому Божии жити, яже есть Церковь Бога жива, столп и утверждение истины.

3:16  И исповедуемо велия есть благочестия тайна: Бог явися во плоти, оправдася в Дусе, показася Ангелом, проповедан бысть во языцех, веровася в мире, вознесеся во славе.

Chapter 4

4:1  Дух же явственне глаголет, яко в последняя времена отступят нецыи от веры, внемлюще духовом лестчым и учением бесовским,

4:2  в лицемерии лжесловесник, сожженных своею совестию,

4:3  возбраняющих женитися, удалятися от брашен, яже Бог сотвори в снедение со благодарением верным и познавшым истину.

4:4  Зане всякое создание Божие добро, и ничтоже отметно, со благодарением приемлемо,

4:5  освящается бо словом Божиим и молитвою.

4:6  Сия вся сказуя братии, добр будеши служитель Иисуса Христа, питаемь словесы веры и добрым учением, емуже последовал еси.

4:7  Скверных же и бабиих басней отрицайся, обучай же себе ко благочестию:

4:8  телесное бо обучение вмале есть полезно, а благочестие на все полезно есть, обетование имеющее живота нынешняго и грядущаго.

4:9  Верно слово и всякаго приятия достойно.

4:10  На сие бо и труждаемся и поношаеми есмы, яко уповахом на Бога жива, Иже есть Спаситель всем человеком, паче же верным.

4:11  Завещавай сия и учи.

4:12  Никтоже о юности твоей да нерадит: но образ буди верным словом, житием, любовию, духом, верою, чистотою.

4:13  Дондеже прииду, внемли чтению, утешению, учению.

4:14  Не неради о своем даровании живущем в тебе, еже дано тебе бысть пророчеством с возложением рук священничества.

4:15  В сих поучайся, в сих пребывай, (в сих разумевай,) да преспеяние твое явлено будет во всех.

4:16  Внимай себе и учению и пребывай в них: сия бо творя, и сам спасешися и послушающии тебе.

Chapter 5

5:1  Старцу не твори пакости, но утешай якоже отца: юношы, якоже братию:

5:2  старицы, якоже матери: юныя, якоже сестры, со всякою чистотою.

5:3  Вдовицы чти сущыя истинныя вдовицы.

5:4  Аще же кая вдовица чада или внучата имать, да учатся прежде свой дом благочестиво устроити и взаем воздаяти родителем: сие бо есть благоугодно пред Богом.

5:5  А сущая истинная вдовица и уединена, уповает на Бога и пребывает в молитвах и молениих день и нощь:

5:6  питающаяся же пространно, жива умерла.

5:7  И сия завещавай, да непорочни будут.

5:8  Аще же кто о своих, паче же о присных не промышляет, веры отверглся есть и невернаго горший есть.

5:9  Вдовица же да причитается не менши лет шестидесятих, бывши единому мужу жена,

5:10  в делех добрых свидетелствуема, аще чада воспитала есть, аще святых нозе умы, аще странныя прият, аще скорбным утешение бысть, аще всякому делу благу последовала есть.

5:11  Юных же вдовиц отрицайся: егда бо разсвирепеют о Христе, посягати хотят,

5:12  имущыя грех, яко первыя веры отвергошася:

5:13  купно же и праздны учатся обходити домы, не точию же праздны, но и блядивы и оплазивы, глаголющыя, яже не подобает.

5:14  Хощу убо юным вдовицам посягати, чада раждати, дом строити, ни едины же вины даяти противному хулы ради:

5:15  се бо некия развратишася вслед сатаны.

5:16  Аще кто верен или верна имать вдовицы, да довлит их, и да не тяготится Церковь, да сущих истинных вдовиц удоволит.

5:17  Прилежащии же добре пресвитери сугубыя чести да сподобляются: паче же труждающиися в слове и учении.

5:18  Глаголет бо Писание: вола молотяща не обротиши: и: достоин делатель мзды своея.

5:19  На пресвитера хулы не приемли, разве при двою или триех свидетелех.

5:20  Согрешающих же пред всеми обличай, да и прочии страх имут.

5:21  Засвидетелствую пред Богом, и Господем Иисус Христом, и избранными (его) Ангелы, да сия сохраниши без лицемерия, ничесоже творя по уклонению.

5:22  Руки скоро не возлагай ни на когоже, ниже приобщайся чужым грехом: себе чиста соблюдай.

5:23  Ктому не пий воды, но мало вина приемли, стомаха ради твоего и частых твоих недугов.

5:24  Неких (же) человек греси предявлени суть, предваряюще на суд: неким же и последствуют.

5:25  Такожде и добрая дела предявлена суть: и сущая инако, утаитися не могут.

Chapter 6

6:1  Елицы суть под игом раби, своих господий всякия чести да сподобляют, да имя Божие не хулится и учение.

6:2  Имущии же верных господий да не нерадят о них, понеже братия суть: но паче да работают, зане верни суть и возлюблени, иже благодать восприемлющии. Сия учи и моли.

6:3  Аще ли кто инако учит и не приступает к здравым словесем Господа нашего Иисуса Христа и учению, еже по благоверию,

6:4  разгордеся, ничтоже ведый, но недугуяй о стязаниих и словопрениих, от нихже бывает зависть, рвение, хулы, непщевания лукава,

6:5  беседы злыя растленных человеков умом и лишенных истины, непщующих приобретение быти благочестие. Отступай от таковых.

6:6  Есть же снискание велие благочестие с доволством.

6:7  Ничтоже бо внесохом в мир сей: яве, яко ниже изнести что можем.

6:8  Имеюще же пищу и одеяние, сими доволни будем.

6:9  А хотящии богатитися впадают в напасти и сеть, и в похоти многи несмысленны и вреждающыя, яже погружают человеки во всегубителство и погибель:

6:10  корень бо всем злым сребролюбие есть, егоже нецыи желающе заблудиша от веры, и себе пригвоздиша болезнем многим.

6:11  Ты же, о, человече Божий, сих бегай: гони же правду, благочестие, веру, любовь, терпение, кротость:

6:12  подвизайся добрым подвигом веры, емлися за вечную жизнь, в нюже и зван был еси, и исповедал еси доброе исповедание пред многими свидетели.

6:13  Завещаваю ти пред Богом оживляющим всяческая, и Христом Иисусом свидетелствовавшим при Понтийстем Пилате доброе исповедание:

6:14  соблюсти тебе заповедь нескверну и незазорну, даже до явления Господа нашего Иисуса Христа,

6:15  еже во своя времена явит блаженный и един сильный, Царь царствующих и Господь господствующих,

6:16  един имеяй безсмертие и во свете живый неприступнем, Егоже никтоже видел есть от человек, ниже видети может: емуже честь и держава вечная. Аминь.

6:17  Богатым в нынешнем веце запрещай не высокомудрствовати, ниже уповати на богатство погибающее, но на Бога жива, дающаго нам вся обилно в наслаждение:

6:18  благое делати, богатитися в делех добрых, благоподатливым быти, общителным,

6:19  сокровищующе себе основание добро в будущее, да приимут вечную жизнь.

6:20  О, Тимофее, предание сохрани, уклоняяся скверных суесловий и прекословий лжеименнаго разума:

6:21  о немже нецыи хвалящеся, о вере погрешиша. Благодать с тобою. Аминь.