Kekchi - I Timothy

Chapter 1

1:1  La̱in laj Pablo. Taklanbilin xban li Jesucristo chi cˈanjelac chiru xban nak joˈcan quiraj li Dios laj Colol ke. Ut joˈcan ajcuiˈ quiraj li Ka̱cuaˈ Jesucristo li kayoˈon.

1:2  At Timoteo, yo̱quin chi tzˈi̱bac a̱cuiqˈuin. Chanchanat li tzˈakal cualal nak cuancat xban nak chicuu xapa̱b li Cristo. Chicua̱nk taxak a̱cuiqˈuin li usilal, li uxta̱n ut li tuktu̱quilal li naxqˈue li Dios li kaYucuaˈ ut li naxqˈue li Ka̱cuaˈ Jesucristo.

1:3  Nacuaj nak tatcana̱k aran Efeso joˈ quintzˈa̱ma cha̱cuu nak co̱in Macedonia. Tatcana̱k aran re nak ta̱kˈuseb li yo̱queb chi balakˈi̱nc saˈ xya̱nkeb laj pa̱banel. Ta̱ye reheb nak teˈxcanab xcˈutbal li incˈaˈ ya̱l.

1:4  Ut ta̱ye ajcuiˈ reheb nak cheˈxcanabak xcuechˈinquil rix aniheb lix xeˈ xto̱naleb xban nak li naˈleb aˈan ma̱cˈaˈ rosoˈjic ut ma̱cˈaˈ na-oc cuiˈ. Ta̱ye reheb nak incˈaˈ chic teˈxpa̱b li xeˈto̱nil naˈleb. Li naˈleb aˈin junes yoˈoban cuechˈi̱nc ib naxba̱nu. Incˈaˈ nocoxtenkˈa xba̱nunquil li cˈanjel qˈuebil ke xban li Dios. Caˈaj cuiˈ li kapa̱ba̱l natenkˈan ke.

1:5  At Timoteo, lix ya̱lal li cˈaˈru yo̱quin chixyebal a̱cue, aˈan aˈin. Xcanabakeb li balakˈi̱nc. Cheˈxqˈue ban xchˈo̱l chixrabaleb li rech aj pa̱banelil. Ut teˈxraheb cui teˈcua̱nk saˈ ti̱quilal chi ma̱cˈaˈak li cˈaˈak re ru nachˈiˈchˈiˈin reheb saˈ xcˈaˈuxeb ut cui teˈpa̱ba̱nk chi anchaleb xchˈo̱l.

1:6  Eb aˈan incˈaˈ nequeˈxqˈue retal li xya̱lal aˈin. Aˈ chic li ma̱cˈaˈ na-oc cuiˈ nequeˈxqˈue xchˈo̱l chixcuechˈinquil rix.

1:7  Nequeˈraj raj xchˈolobanquil xya̱lal li chakˈrab. Aj cˈutul chakˈrab nak nequeˈxye rib. Abanan incˈaˈ ajcuiˈ nequeˈxtau ru li cˈaˈru nequeˈxcˈut usta chanchan nequeˈxtau ru chi tzˈakal li cˈaˈru yo̱queb chixyebal.

1:8  La̱o nakanau nak li chakˈrab cha̱bil cui nakatau ru cˈaˈru aj e nak qˈuebil xban li Dios.

1:9  Joˈcan nak nacuaj nak te̱qˈue retal nak li chakˈrab moco qˈuebil ta reheb li ti̱queb xchˈo̱l. Reheb ban li incˈaˈ nequeˈabin ut li nequeˈkˈetoc re li chakˈrab. Reheb ajcuiˈ li incˈaˈ useb xnaˈleb ut eb laj ma̱c. Reheb ajcuiˈ li incˈaˈ nequeˈpa̱ban re li Dios chi moco cuanqueb junak xpa̱ba̱leb. Ut reheb ajcuiˈ laj camsinel ut li nequeˈxcamsi xnaˈ xyucuaˈeb.

1:10  Li chakˈrab reheb laj coˈbe̱t laj yumbe̱t ut reheb li nequeˈma̱cob riqˈuin rech cui̱nkilal rech ixkilal. Reheb ajcuiˈ li nequeˈelkˈac cristian. Reheb ajcuiˈ li nequeˈticˈtiˈic ut li nequeˈxpatzˈ xcˈabaˈ li Dios riqˈuin yoˈobanbil a̱tin. Li chakˈrab reheb chixjunileb li nequeˈxba̱nu li cˈaˈak chic re ru chi ma̱usilal li napoˈoc ru li katijbal li tzˈakal ya̱l.

1:11  Li katijbal aˈan li quicˈuteˈ chiku xban li lokˈlaj colba-ib li naxqˈue ke li nimajcual Dios, li tenebanbil saˈ inbe̱n xyebal resilal yalak bar.

1:12  Ninbantioxi chiru li Ka̱cuaˈ Jesucristo xban nak aˈan xcˈojob xchˈo̱l saˈ inbe̱n ut xinixxakab chi cˈanjelac chiru. Ut aˈan naqˈuehoc incuanquil chixba̱nunquil.

1:13  Quixqˈue cue li cˈanjel aˈin usta ac xinmajecua li Jesucristo ut xinrahobtesi eb laj pa̱banel ut xinhobeb. Abanan li Jesucristo quiruxta̱na cuu xban nak toj ma̱jiˈ ninnau bar cuan li tzˈakal ya̱l ut toj ma̱jiˈ ninpa̱ban.

1:14  Ut li Ka̱cuaˈ Jesucristo numtajenak cuiˈchic li cuosobtesinquil quixqˈue. Quixqˈue inpa̱ba̱l ut quixqˈue cue li rahoc li nakatau nak junajo chic riqˈuin li Cristo.

1:15  Nakanau nak tzˈakal ya̱l ut xcˈulub nak takapa̱b chi anchal li kachˈo̱l nak li Cristo Jesús quicˈulun saˈ ruchichˈochˈ chixcolbaleb laj ma̱c. Ut la̱in li kˈaxal numtajenak inma̱c saˈ xya̱nkeb chixjunileb nak quincuan.

1:16  Usta la̱in kˈaxalin aj ma̱c nak quincuan, abanan li Jesucristo quiruxta̱na cuu re nak tixcˈutbesi nak kˈaxal nim lix cuyum re xcuybal xsachbal li ma̱c. Quixcˈut chiruheb lix nimal lix cuyum nak quixcuy inma̱c la̱in. Aˈan quiraj nak la̱in tincˈamok be chiruheb li ani teˈpa̱ba̱nk re li Jesucristo ut teˈxcˈul li junelic yuˈam.

1:17  Lokˈoninbil taxak li tzˈakal Rey li cuan chi junelic kˈe cutan, li incˈaˈ nacam ut incˈaˈ na-ilman ru, li junaj chi Dios li numtajenak xnaˈleb. Chikalokˈonihak taxak anakcuan ut chi junelic kˈe cutan. Joˈcan taxak.

1:18  At Timoteo, chanchanat li cualal chicuu nak nacatcuil. Tinqˈue a̱cue la̱ taklanquil joˈ queˈxye li profeta cha̱cuix junxil. Li a̱tin queˈxye, aˈan ta̱qˈuehok xcacuil a̱chˈo̱l chixba̱nunquil li cˈanjel qˈuebil a̱cue. Joˈcan ut nak yal a̱kˈe chi cˈanjelac chiru li Ka̱cuaˈ.

1:19  Cauhak taxak a̱chˈo̱l saˈ la̱ pa̱ba̱l ut ma̱cˈaˈ taxak li cˈaˈru ta̱chˈiˈchˈiˈi̱nk a̱cue saˈ la̱ chˈo̱l nak yo̱cat chi cˈanjelac chiru li Dios. Ninye a̱cue aˈin xban nak cuanqueb li xeˈxcanab xba̱nunquil li ti̱quil chˈo̱lej. Incˈaˈ queˈxqˈue retal li cˈaˈru yo̱ chi chˈiˈchˈiˈi̱nc reheb lix cˈaˈux. Ut riqˈuin aˈan yo̱queb chixtzˈekta̱nanquil lix pa̱ba̱leb.

1:20  Saˈ xya̱nkeb aˈan cuan laj Himeneo ut laj Alejandro. Ac xinkˈaxtesiheb saˈ rukˈ laj tza re xcˈajtesinquileb ru re nak incˈaˈ chic teˈxmajecua li Dios.

Chapter 2

2:1  Anakcuan aˈan aˈin li tinye e̱re: cheqˈuehak e̱chˈo̱l chi tijoc chirixeb chixjunileb le̱ ras e̱ri̱tzˈin. Chextzˈa̱ma̱nk ut chexbantioxi̱nk chiru li Ka̱cuaˈ nak textijok.

2:2  Chextijok chirixeb li rey ut chixjunileb li cuanqueb saˈ xcuanquil re nak cua̱nko saˈ xya̱lal ut tuktu̱k kachˈo̱l. Ut ma̱cˈaˈ taxak ta̱chˈiˈchˈiˈi̱nk ke saˈ li kapa̱ba̱l ut ti̱cak taxak li kachˈo̱l.

2:3  Chextijok chirixeb chixjunileb xban nak aˈan li us xba̱nunquil ut aˈan li nacuulac chiru li Dios laj Colol ke.

2:4  Li Dios naraj nak chixjunileb teˈcolekˈ ut teˈxtau ru chi tzˈakal cˈaˈru li ya̱l.

2:5  Ut li ya̱l, aˈan aˈin: nak jun ajcuiˈ li Dios cuan ut jun ajcuiˈ li na-oquen ut naa̱tinac chikix chiru li Dios. Aˈan li Ka̱cuaˈ Jesucristo li quitzˈejcualoˈ nak quicˈulun saˈ ruchichˈochˈ.

2:6  Ut aˈan ajcuiˈ li quixqˈue rib chi ca̱mc saˈ kacˈabaˈ la̱o re nak ta̱ru̱k tocolekˈ chikajunilo. Ut nak quicuulac xkˈehil, li Cristo quixcˈutbesi chiku li xya̱lal aˈin nak quicam chiru li cruz.

2:7  Ut la̱in li taklanbilin xban li Dios chixyebal resil li xya̱lal aˈin chiruheb li ma̱cuaˈeb aj judío. Taklanbilin chixyebal resil re nak teˈxnau cˈaˈru li ya̱l ut teˈpa̱ba̱nk. Moco ticˈtiˈ ta li yo̱quin chixyebal. Tzˈakal ya̱l nak xakabanbilin chixyebal li resilal reheb.

2:8  Yalak bar chˈutchˈu̱quex chixlokˈoninquil li Dios, nacuaj nak eb li cui̱nk teˈcˈamok be chi tijoc. Abanan, tento nak ti̱cak xchˈo̱leb li cui̱nk aˈin ut ma̱cˈaˈak xjoskˈil chi moco teˈcuechˈi̱nk.

2:9  Ut nacuaj ajcuiˈ nak eb li ixk cheˈxtikibak rib chi cha̱bil joˈ xcˈulub junak aj pa̱banel ut incˈaˈ teˈxnimobresi rib riqˈuin lix tikibanquil chi moco teˈxtikib rib yal re nak teˈrahekˈ ru. Joˈ ajcuiˈ riqˈuin xyi̱banquil li rismal xjolom. Joˈ li cˈaˈ re ru teˈxqˈue cuiˈ xsahob ru joˈ li oro ut li terto̱quil pec. Incˈaˈ teˈxqˈue xcuanquil li nequeˈxqˈue chokˈ xsahob ruheb.

2:10  Li ixk li napa̱ban re li Dios, moco riqˈuin ta xtikibanquil rib cuan xchˈinaˈusal. Riqˈuin ban lix ti̱quilal xchˈo̱l.

2:11  Nak te̱chˈutub e̱rib, eb li ixk incˈaˈ teˈserakˈik. Teˈxqˈue ban xchˈo̱l chi tzoloc ut cheˈpa̱ba̱nk chiruheb li cuanqueb xcuanquil.

2:12  La̱in incˈaˈ ninqˈueheb li ixk chixchˈolobanquil xya̱lal chiruheb li che̱quel cui̱nk, chi moco ninqˈueheb xcuanquil saˈ xbe̱neb li cui̱nk. Eb li ixk incˈaˈ teˈa̱tinak saˈ li chˈutubaj ib.

2:13  Ninye aˈin xban nak laj Adán quiyoˈobtesi̱c xbe̱n cua xban li Dios ut chirix aˈan quiyoˈobtesi̱c lix Eva.

2:14  Ut ma̱cuaˈ laj Adán li quibalakˈi̱c. Aˈ lix Eva, aˈan li quibalakˈi̱c toj retal nak quima̱cob nak quixkˈet ra̱tin li Dios.

2:15  Li Dios quixye nak li ixk riqˈuin raylal ta̱qˈuiresi̱nk. Abanan, cua̱nkeb xyuˈam chi junelic cui cauhakeb xchˈo̱l saˈ lix pa̱ba̱leb ut cui nequeˈrahoc ut cui cuanqueb saˈ ti̱quilal ut saˈ tuktu̱quilal.

Chapter 3

3:1  Ya̱l li nequeˈxye nak cui cuan junak na-ala saˈ xchˈo̱l oc chokˈ aj cˈamol be saˈ xya̱nkeb laj pa̱banel, cha̱bil li naxcˈoxla xba̱nunquil.

3:2  Abanan li ani naxcˈoxla oc chokˈ aj cˈamol be, tento nak cua̱nk saˈ xya̱lal re nak ma̱ ani ta̱a̱tinak chirix. Junak ajcuiˈ li rixakil. Ma̱cuaˈak aj calajenak. Tento nak se̱bak xchˈo̱l ut cha̱bilak xnaˈleb re nak qˈuebilak xlokˈal. Aˈanak aj qˈuehol ochochna̱l ut chixqˈuehak xchˈo̱l chixcˈutbal lix ya̱lal chi tzˈakal re ru.

3:3  Laj cˈamol be ma̱cuaˈak aj calajenak ut ma̱cuaˈak aj sicˈol ple̱t. Ma̱cuaˈak aj rahol ru tumin. Tu̱lanak ban ut cua̱nk saˈ xya̱lal.

3:4  Tento nak tixnau takla̱nc saˈ li rochoch re nak li ralal xcˈajol teˈx-oxlokˈi ut teˈabi̱nk chiru.

3:5  Cui junak li cui̱nk incˈaˈ naxnau takla̱nc saˈ li rochoch, ¿chan ta ru nak ta̱ru̱k ta̱cˈamok be saˈ xya̱nkeb li rech aj pa̱banelil?

3:6  Tento nak laj cˈamol be acak xqˈui saˈ lix pa̱ba̱l. Ma̱re anchal tixnimobresi rib ut ta̱tˈanekˈ saˈ li tojbal ma̱c quitˈaneˈ cuiˈ laj tza.

3:7  Ut tento ajcuiˈ nak cha̱bilak resil lix naˈleb yalak bar xbaneb li toj ma̱jiˈ nequeˈpa̱ban. Ma̱cˈaˈak xkˈusbal re nak incˈaˈ tixqˈue rib chi a̱le̱c xban laj tza.

3:8  Ut joˈcan ajcuiˈ li nequeˈcˈanjelac saˈ xya̱nkeb laj pa̱banel. Tento nak ti̱cakeb xchˈo̱l. Ut li cˈaˈru teˈxye teˈxba̱nu, cheˈxba̱nuhak ajcuiˈ. Ma̱cuaˈakeb aj calajenak. Ut incˈaˈ teˈxsicˈ xtumineb riqˈuin balakˈi̱nc.

3:9  Ma̱cˈaˈ ta̱chˈiˈchˈiˈi̱nk reheb saˈ lix cˈaˈuxeb ut teˈxqˈue xcuanquil li kalokˈlaj pa̱ba̱l li cˈutbesinbil chiku xban li Dios.

3:10  Joˈcan nak xbe̱n cua, ta̱tzˈilekˈ a̱tin chirixeb. Cui ma̱cˈaˈ nanauman chirixeb, teˈqˈuehekˈ chi cˈanjelac saˈ xya̱nkeb laj pa̱banel.

3:11  Joˈcan ajcuiˈ li rixakileb li nequeˈcˈanjelac saˈ xya̱nkeb laj pa̱banel. Cha̱bilakeb lix naˈleb. Ma̱cuaˈakeb aj molol a̱tin. Ma̱cuaˈakeb aj calajenak. Ti̱cakeb ban xchˈo̱l ut ti̱cakeb lix cˈaˈux riqˈuin chixjunil.

3:12  Eb laj cˈanjel saˈ xya̱nkeb laj pa̱banel, junak ajcuiˈ li rixakil ut teˈxnau takla̱nc saˈ xbe̱neb li ralal xcˈajol. Ut teˈxnau ajcuiˈ rilbal lix jun cablal.

3:13  Eb li teˈcˈanjelak chi cha̱bil, teˈoxlokˈi̱k ut teˈcacuu̱k xchˈo̱leb chixyebal resil li kapa̱ba̱l saˈ xcˈabaˈ li Jesucristo.

3:14  Usta yo̱quin chi tzˈi̱bac a̱cuiqˈuin chirix la̱ taklanquil, at Timoteo, cuan saˈ inchˈo̱l nak chi se̱b tincuulak a̱cuiqˈuin.

3:15  Abanan ma̱re tinba̱yk chi cuulac. Joˈcan nak yo̱quin chi tzˈi̱bac a̱cuiqˈuin re nak ta̱nau chanru teˈcˈanjelak li teˈxakaba̱k chi cˈanjelac saˈ xya̱nkeb li nequeˈpa̱ban re li yoˈyo̱quil Dios. Ut la̱o aj pa̱banel, la̱o li nakaqˈue xcuanquil ut nakacol rix li katijbal li tzˈakal ya̱l.

3:16  Relic chi ya̱l kˈaxal lokˈ li katijbal li quixcˈut chiku li Dios. Naxcˈut chiku li xya̱lal li kapa̱ba̱l saˈ xcˈabaˈ li Jesucristo. Li xya̱lal aˈan aˈin: Li Cristo quitzˈejcualoˈ nak quicˈulun saˈ ruchichˈochˈ. Xakabanbil xcuanquil xban li Santil Musikˈej. Qui-ileˈ ru xbaneb li ángel. Ut aˈan li chˈolobanbil resil saˈ chixjunil li ruchichˈochˈ. Ut nabaleb li queˈpa̱ban re saˈ ruchichˈochˈ. Ut quicˈameˈ saˈ choxa riqˈuin xnimal xlokˈal.

Chapter 4

4:1  Li Santil Musikˈej naxcˈut li xya̱lal chi tzˈakal nak saˈ eb li cutan cha̱lel cuan li teˈxcanab xpa̱banquil li tijleb li tzˈakal ya̱l. Ut teˈbalakˈi̱k xban li tijleb li incˈaˈ ya̱l li nequeˈxqˈue li ma̱us aj musikˈej.

4:2  Ticˈtiˈ li nequeˈxcˈut eb laj balakˈ. Incˈaˈ chic nequeˈrecˈa nak incˈaˈ us yo̱queb. Chanchan nak cˈatbil riqˈuin chˈi̱chˈ lix cˈaˈuxeb xban li ticˈtiˈ li nequeˈxye. Joˈcan nak incˈaˈ nequeˈxqˈue retal nak incˈaˈ us yo̱queb chixba̱nunquil.

4:3  Eb aˈan nequeˈxye nak incˈaˈ us li sumla̱c ut nequeˈxye ajcuiˈ nak cuan li tzacae̱mk incˈaˈ us xtzacanquil. Abanan moco ya̱l ta li nequeˈxye. Li Dios quiqˈuehoc re li tzacae̱mk aˈin re nak ta̱tzaca̱k. Ut la̱o aj pa̱banel li nakanau li xya̱lal, nakatzaca ut nakabantioxi chiru li Dios nak quixqˈue ke li katzacae̱mk.

4:4  Chixjunil li quixyoˈobtesi li Dios, aˈan cha̱bil. Ma̱cˈaˈ xtzˈekta̱nanquil. Nakabantioxi chiru li Dios ut nakatzaca.

4:5  Ma̱cˈaˈ xtzˈekta̱nanquil xban nak li Dios quixye nak us xtzacanquil ut xban nak nocotijoc saˈ xbe̱n. Joˈcan nak osobtesinbil chic xban.

4:6  At Timoteo, cui nacachˈolob xya̱lal li tijleb aˈin chiruheb laj pa̱banel, la̱akat jun cha̱bil aj cˈanjel chiru li Jesucristo. Ut la̱at yo̱kat chi qˈui̱c saˈ la̱ pa̱ba̱l riqˈuin li xya̱lal ut riqˈuin li cha̱bil tijleb li yo̱cat chixpa̱banquil.

4:7  Chatzˈekta̱na chi jun aj cua chixjunil li najter serakˈ li yal to̱ntil naˈleb naxye, li ma̱cˈaˈ na-oc cuiˈ. Ut qˈue a̱chˈo̱l chixba̱nunquil li cˈaˈru naraj li Dios.

4:8  Nayeman nak us nak takatzol kib chixchˈolaninquil kib re nak cauhako. Abanan li kˈaxal cuiˈchic lokˈ aˈan xtzolbal kib re nak cauhak kachˈo̱l saˈ li kapa̱ba̱l xban nak riqˈuin li kapa̱ba̱l cuan li rusilal li Dios kiqˈuin anakcuan arin saˈ ruchichˈochˈ ut cua̱nk ajcuiˈ li kayuˈam chi junelic.

4:9  Relic chi ya̱l nak aˈan li tzˈakal xya̱lal li yo̱quin chixyebal, ut chixjunileb taxak teˈpa̱ba̱nk re.

4:10  Xban nak li yoˈyo̱quil Dios, aˈan li kayoˈon, joˈcan nak yo̱co xyalbal kakˈe chi cˈanjelac chiru. Aˈan naxyechiˈi li colba-ib reheb chixjunileb. Abanan, caˈaj cuiˈ li ani teˈpa̱ba̱nk re, aˈaneb li teˈcolekˈ.

4:11  Aˈan aˈin li tijleb li ta̱cˈut chiruheb la̱ cuech aj pa̱banelil. Ta̱chˈolob lix ya̱lal chiruheb.

4:12  Ut la̱at, at Timoteo, chatcua̱nk saˈ xya̱lal ut chat-a̱tinak saˈ xya̱lal. Charaheb la̱ cuas a̱cui̱tzˈin. Cauhak taxak a̱chˈo̱l saˈ la̱ pa̱ba̱l ut ti̱cak taxak la̱ yuˈam. Joˈcan taxak ta̱ba̱nu re nak ma̱ ani chitzˈekta̱na̱nk a̱cue xban la̱ sa̱jilal. Cheˈxtzol ban ribeb a̱cuiqˈuin xban nak yo̱kat chixcˈambaleb xbe saˈ ti̱quilal.

4:13  Roybeninquil tincuulak e̱riqˈuin, qˈue a̱chˈo̱l chi rilbal xsaˈ li Santil Hu chiruheb laj pa̱banel. Qˈueheb xnaˈleb ut ta̱chˈolob xya̱lal chiruheb.

4:14  Chaqˈue taxak a̱chˈo̱l chi cˈanjelac joˈ quiqˈueheˈ a̱cue xban li Dios. Li cˈanjel aˈin qˈuebil a̱cue nak eb li profeta queˈa̱tinac cha̱cuix ut nak eb laj cˈamol be saˈ xya̱nkeb laj pa̱banel queˈxqˈue li rukˈeb saˈ a̱be̱n.

4:15  Qˈue a̱chˈo̱l chixba̱nunquil chixjunil li xinye a̱cue re nak chixjunileb teˈxqˈue retal nak ti̱c la̱ yuˈam ut teˈxqˈue ajcuiˈ retal nak us yo̱ chi e̱lc li cˈanjel yo̱cat chixba̱nunquil.

4:16  Qˈue retal chi us li cˈaˈru ta̱ba̱nu joˈ ajcuiˈ li cˈaˈru ta̱tzoleb cuiˈ. Cui ta̱ba̱nu chi joˈcan, tatcolekˈ la̱at ut teˈcolekˈ ajcuiˈ li ani teˈabi̱nk re li cˈaˈru ta̱ye.

Chapter 5

5:1  Ma̱kˈuseb li che̱quel cui̱nk saˈ joskˈil. Qˈueheb ban xnaˈleb joˈ la̱ yucuaˈ cha̱cuu nak ta̱cuileb. Ut chaqˈueheb ajcuiˈ xnaˈleb li sa̱j cui̱nk joˈqueb a̱cui̱tzˈin cha̱cuu nak ta̱cuileb.

5:2  Ut chaqˈueheb xnaˈleb li che̱quel ixk joˈ la̱ naˈ cha̱cuu nak ta̱cuileb. Ut chaqˈueheb ajcuiˈ xnaˈleb li sa̱j ixk joˈqueb la̱ cuanab cha̱cuu nak ta̱cuileb. Chaqˈueheb xnaˈleb riqˈuin xti̱quilal a̱chˈo̱l.

5:3  Cha-oxlokˈiheb li xma̱lcaˈan ut chatenkˈaheb cui ya̱l nak ma̱ ani chic nequeˈtenkˈan reheb.

5:4  Abanan cui cuan ralal xcˈajol, aˈan eb chic teˈtenkˈa̱nk reheb. Tento nak teˈxtzol rib chixba̱nunquil chi joˈcaˈin re nak teˈxnau rilbal lix jun cablaleb. Teˈxnau xkˈajca̱munquil lix naˈ xyucuaˈ joˈ nacuulac chiru li Dios.

5:5  Li xma̱lcaˈan li jun a̱tal, caˈaj chic riqˈuin li Dios nayoˈonin. Naxnumsi li cutan ut li kˈojyi̱n chi tijoc ut naxtzˈa̱ma chiru li Dios nak ta̱tenkˈa̱k.

5:6  Abanan li xma̱lcaˈan li naxsicˈ xsahil xchˈo̱l junes riqˈuin li naxrahi ru, li jun aˈan chanchan ac camenak xban lix ma̱c usta toj yoˈyo.

5:7  Ta̱chˈolob li xya̱lal aˈin chiruheb chixjunileb laj pa̱banel re nak ma̱cˈaˈak xkˈusbaleb.

5:8  Tento nak junak laj pa̱banel tixtenkˈaheb li rechˈalal. Ut kˈaxal cuiˈchic tento nak tixchˈolaniheb li cuanqueb saˈ li rochoch. Cui incˈaˈ naxba̱nu aˈan, li jun aˈan incˈaˈ naxqˈue xcuanquil lix pa̱ba̱l ut kˈaxal cuiˈchic nim lix ma̱c chiruheb li toj ma̱jiˈ nequeˈxpa̱b li Dios.

5:9  Ma̱ ani junak xma̱lcaˈan ta̱tzˈi̱ba̱k xcˈabaˈ saˈ xya̱nkeb li nequeˈtenkˈa̱c xbaneb laj pa̱banel cui toj ma̱jiˈ naxba̱nu oxcˈa̱l chihab. Ut ma̱cuaˈak aj muxul ru xsumlajic nak quicuan.

5:10  Tento ajcuiˈ nak li xma̱lcaˈan naˈno̱k ru riqˈuin li cha̱bilal ac xba̱nu. Ac xqˈuiresiheb lix cocˈal saˈ xya̱lal. Quixcˈul li rulaˈ saˈ xya̱lal nak queˈcuulac saˈ rochoch. Quixchˈaj li rokeb li rech aj pa̱banelil. Quixtenkˈaheb li yo̱queb chixcˈulbal li raylal. Cui cha̱bil li cˈanjel quixba̱nu, naru tixcˈul lix tenkˈanquil.

5:11  Abanan, li xma̱lcaˈan li toj sa̱jeb incˈaˈ ta̱tzˈi̱ba̱k xcˈabaˈeb saˈ xya̱nkeb li nequeˈxcˈul xtenkˈanquil xban nak ma̱re teˈxra cuiˈchic ru li sumla̱c ut ma̱re anchal incˈaˈ chic teˈxqˈue xchˈo̱l chi cˈanjelac chiru li Cristo.

5:12  Ut ma̱re anchal cheˈcuechˈi̱k rix xban nak incˈaˈ chic teˈcˈanjelak chiru li Cristo joˈ queˈxyechiˈi xba̱nunquil.

5:13  Ut joˈ cuiˈ anchal nequeˈxtzol ribeb chi subuc cutan nak nequeˈxic saˈ li junju̱nk chi cab. Ut ma̱cuaˈ caˈaj cuiˈ subuc cutan nequeˈxba̱nu. Nequeˈxtzol aj ban cuiˈ li moloc a̱tin ut li qˈuehoc etal ut nequeˈxye li moco yehecˈ ta naraj.

5:14  Joˈcan nak nacuaj nak li xma̱lcaˈan li toj sa̱jeb teˈsumla̱k cuiˈchic. Cheˈcua̱nk ralal xcˈajol ut cheˈxjolomi lix jun cablal re nak incˈaˈ tohobekˈ la̱o aj pa̱banel xbaneb li xicˈ nequeˈiloc ke.

5:15  Ninye aˈin xban nak cuanqueb li xma̱lcaˈan li ac queˈrisi ribeb saˈ kaya̱nk ut yo̱queb chixba̱nunquil li cˈaˈru naraj laj tza.

5:16  Cui junak aj pa̱banel usta ixk usta cui̱nk, cuan junak rechˈalal xma̱lcaˈan, tento nak tixtenkˈa. Incˈaˈ tixqˈue nabal li i̱k saˈ xbe̱neb li rech aj pa̱banelil li nequeˈtenkˈan reheb li xma̱lcaˈan li ma̱cˈaˈeb ralal xcˈajol.

5:17  Oxlokˈinbilakeb li nequeˈcˈamoc be chi cha̱bil saˈ xya̱nkeb laj pa̱banel. Ut xcˈulub ajcuiˈ nak teˈxcˈul xkˈajca̱munquil xban nak nequeˈxqˈue xchˈo̱l chixchˈolobanquil xya̱lal li ra̱tin li Dios ut chixtzolbaleb laj pa̱banel.

5:18  Joˈcaˈin tzˈi̱banbil saˈ li Santil Hu: Ma̱bacˈ xtzˈu̱mal re li bo̱yx nak yo̱ chixyekˈinquil ru li trigo re risinquil saˈ rix. Canab ban chixcuaˈbal caˈchˈinak re, nak yo̱ chi cˈanjelac. (Dt. 25:4) Joˈcan ajcuiˈ laj cˈanjel. Tzˈi̱banbil ajcuiˈ retalil nak tento ajcuiˈ nak tixcˈul lix tojbal.

5:19  Ma̱pa̱b li ani ta̱jitok re junak aj cˈamol be saˈ xya̱nkeb laj pa̱banel cui yal jun ajcuiˈ li najitoc re. Cua̱nk ban cuib oxibak li teˈjitok re, re nak ta̱pa̱ba̱k nak ya̱l lix ma̱c.

5:20  Ut li ani cuan xma̱c, us xkˈusbal chiru chixjunileb laj pa̱banel re nak li jun chˈol chic aj cˈamol be teˈxucuak ut teˈxcˈoxla chi us li cˈaˈru teˈxba̱nu.

5:21  Joˈ chiru li Dios, joˈ chiru li Ka̱cuaˈ Jesucristo, joˈ ajcuiˈ chiruheb li santil ángel, la̱in nintzˈa̱ma cha̱cuu nak ta̱ba̱nu la̱ taklanquil yo̱quin chixyebal a̱cue. Ut incˈaˈ ta̱sicˈ ru junak. Juntakˈe̱takeb ban chixjunileb nak ta̱cuileb. Jun xxiquic nak ta̱kˈuseb li ani cuanqueb xma̱c.

5:22  Ma̱qˈue junak chi cˈamoc be saˈ junpa̱t saˈ xya̱nkeb laj pa̱banel. Xbe̱n cua ta̱cuil chanru lix yuˈam xban nak cui la̱at ta̱xakab chi cˈanjelac chi junpa̱t ut na-oc chi ma̱cobc, cuan ajcuiˈ ma̱c saˈ a̱be̱n la̱at. Chatcua̱nk ban chi ti̱c la̱ chˈo̱l.

5:23  Xban nak cuan xyajel la̱ saˈ, ma̱cuucˈ junes haˈ. Naru ta̱cuucˈ caˈchˈinak li vino re xbanbal.

5:24  Ma̱xakab junak aj cˈamol be chi junpa̱t chi cˈanjelac xban nak cuanqueb li cui̱nk nacˈutun cˈaˈru lix ma̱queb ut cuan li rakba a̱tin saˈ xbe̱neb. Ut cuanqueb cuiˈchic toj mokon nacˈutun cˈaˈru lix ma̱queb.

5:25  Ut cuan ajcuiˈ li nequeˈba̱nun re li cha̱bilal. Cuan nak nacˈutun li cha̱bilal nequeˈxba̱nu ut cuan nak incˈaˈ nacˈutun. Abanan, toj mokon chic ta̱cˈutu̱nk li us nequeˈxba̱nu.

Chapter 6

6:1  Eb li mo̱s aj pa̱baneleb teˈx-oxlokˈi lix patroneb re nak ma̱ ani ta̱majecua̱nk re lix cˈabaˈ li Dios chi moco teˈxtzˈekta̱na li katijbal.

6:2  Moco xban ta nak rech aj pa̱baneleb lix patrón nak incˈaˈ teˈxqˈue saˈ xnakˈeb ru. Tento aj ban cuiˈ nak teˈxqˈue xchˈo̱l chi trabajic xban nak rech aj pa̱banelil li nequeˈcˈuluc re li cha̱bil cˈanjel nequeˈxba̱nu ut xban nak raro̱queb ajcuiˈ xban li Dios. At Timoteo, aˈan aˈin li ta̱chˈolob xya̱lal chiruheb laj pa̱banel.

6:3  Cuan li nequeˈcˈutuc re jalan tijleb li moco ya̱l ta. Moco nequeˈxpa̱b ta li ya̱l li quixcˈut chiku li Ka̱cuaˈ Jesucristo. Jalan cuiˈ lix pa̱ba̱leb.

6:4  Eb li cui̱nk aˈan ma̱cˈaˈ nequeˈxnau. Junes xnimobresinquil rib nequeˈxba̱nu. Caˈaj cuiˈ xcuechˈinquil ribeb chirix a̱tin nacuulac chiruheb. Ut riqˈuin aˈan nachal li cakali̱nc, li hoboc, li kˈaba̱nc ut li cuiba̱nc chˈo̱lej.

6:5  Eb li cui̱nk aˈin, junes cuechˈi̱nc nequeˈxba̱nu. Moco tuktu ta xcˈaˈuxeb ut moco ya̱l ta li nequeˈxye. Nequeˈxcˈoxla nak riqˈuin lix pa̱ba̱leb teˈxtau xtumineb. Ma̱junaji a̱cuib riqˈuineb aˈan.

6:6  Ya̱l nak kˈaxal lokˈ li pa̱ba̱l chokˈ reheb li nequeˈxcˈojob xchˈo̱l riqˈuin li joˈ nimal joˈ chˈinal cuan reheb.

6:7  Ma̱cˈaˈ cuan ke nak coyoˈla saˈ ruchichˈochˈ ut ma̱cˈaˈ ajcuiˈ takacˈam nak toca̱mk.

6:8  Joˈcan nak cui cuan katzacae̱mk ut cui cuan katˈicr re xtzˈapbal kib, cˈojcˈo̱k kachˈo̱l riqˈuin aˈan.

6:9  Abanan eb li nequeˈrahoc ru li biomal, nequeˈxqˈue rib chi a̱le̱c ut nequeˈxba̱nu li yibru aj naˈleb. Aˈan napoˈoc ru lix cˈaˈuxeb ut riqˈuin chixjunil li incˈaˈ us nequeˈxba̱nu, nequeˈxsach lix pa̱ba̱leb.

6:10  Li xrahinquil ru li tumin, aˈan xxeˈ xto̱nal chixjunil li ma̱usilal. Cuanqueb li queˈxtzˈekta̱na lix pa̱ba̱l xban xrahinquil ru li tumin. Ut qˈuila raylal queˈxbok saˈ xbe̱neb. Ut nequeˈyotˈotˈnac saˈ xchˈo̱leb riqˈuin li incˈaˈ us nequeˈxba̱nu.

6:11  Ut la̱at, at Timoteo, la̱at aj cˈanjel chiru li Dios. Ma̱ba̱nu li ma̱usilal li nequeˈxba̱nu eb aˈan. Qˈue ban a̱chˈo̱l chi cua̱nc saˈ ti̱quilal. Chara li Dios ut chatpa̱ba̱nk chiru. Charaheb la̱ cuas a̱cui̱tzˈin. Chacuy li raylal ut chatcua̱nk saˈ tu̱lanil.

6:12  Yal a̱kˈe chi qˈui̱c saˈ la̱ pa̱ba̱l ut qˈue a̱chˈo̱l chire̱chaninquil li junelic yuˈam, li bokbilat cuiˈ xban li Dios. La̱at xaye ut xacˈutbesi chi tzˈakal la̱ pa̱ba̱l chiruheb nabal.

6:13  Saˈ xcˈabaˈ li Dios li naqˈuehoc yuˈam, la̱in nintzˈa̱ma cha̱cuu nak ta̱ba̱nu la̱ taklanquil. Ut nintzˈa̱ma ajcuiˈ cha̱cuu saˈ xcˈabaˈ li Jesucristo li quichˈoloban xya̱lal chi ma̱cˈaˈ xxiu chiru laj Poncio Pilato.

6:14  Ut la̱ taklanquil, aˈan aˈin: chaba̱nu chixjunil li taklanbilat cuiˈ xban li Ka̱cuaˈ. Ti̱cak la̱ chˈo̱l ut ma̱cˈaˈak a̱kˈusbal toj retal ta̱cˈulu̱nk cuiˈchic li Ka̱cuaˈ Jesucristo.

6:15  Nak tixtau xkˈehil li Dios tixcˈutbesi cuiˈchic chiku li Jesucristo. Li Dios, aˈan kˈaxal lokˈ ut junaj ajcuiˈ. Aˈan li Rey li kˈaxal nim xcuanquil saˈ xbe̱neb chixjunileb li rey li cuanqueb saˈ ruchichˈochˈ. Ut aˈan ajcuiˈ li Ka̱cuaˈ li kˈaxal nim xcuanquil saˈ xbe̱neb chixjunileb li cuanqueb xcuanquil.

6:16  Li Dios yoˈyo chi junelic. Ma̱cˈaˈ xticlajic ut ma̱cˈaˈ rosoˈjic. Aˈan cutan saken chi junelic ut ma̱ ani naru na-oc riqˈuin xban nak kˈaxal lokˈ. Incˈaˈ ilbil ru chi moco na-ileˈ ru saˈ ruchichˈochˈ. Chikaqˈuehak taxak xlokˈal ut chikalokˈonihak taxak xban nak kˈaxal nim lix cuanquilal anakcuan ut chi junelic. Joˈcan taxak.

6:17  Ta̱chˈolob xya̱lal chiruheb li biom nak incˈaˈ teˈxkˈetkˈeti ribeb chi moco teˈxcˈojob xchˈo̱l saˈ xbe̱n li biomal li na-osoˈ. Cheˈxqˈue ban xchˈo̱l chixyoˈoninquil li yoˈyo̱quil Dios. Aˈan naqˈuehoc ke chi nabal chixjunil li cˈaˈak re ru.

6:18  Chaye reheb nak cheˈxba̱nu li us. Chinumta̱k lix cha̱bilaleb. Cheˈxnauhak sihi̱nc chi nabal ut chi anchaleb xchˈo̱l.

6:19  Cui nequeˈxba̱nu chi joˈcan yo̱queb chixcˈu̱lanquil lix ra̱baleb saˈ choxa ut riqˈuin aˈan cˈojcˈo̱k xchˈo̱leb. Cheˈxba̱nuhak chi joˈcan re nak ta̱cua̱nk lix yuˈameb chi tzˈakal re ru ut chi numtajenak xsahil xchˈo̱leb.

6:20  At Timoteo, cua̱nk saˈ a̱chˈo̱l li tijleb qˈuebil a̱cue xban li Dios. Ma̱qˈue xcuanquil li joˈ ma̱joˈil serakˈ ut li cuechˈij ib xban nak ma̱cˈaˈ na-oc cuiˈ. Cuan li nequeˈyehoc re nak cha̱bil naˈleb, abanan moco ya̱l ta.

6:21  Ninye aˈin xban nak cuan li queˈpa̱ban re li naˈleb aˈin ut xban aˈan, queˈxcanab xpa̱banquil li tzˈakal ya̱l. Aˈ taxak li rusilal li Dios chicua̱nk e̱riqˈuin.