UrduGeoRoman - I Timothy

Chapter 1

1:1  Yih ḳhat Paulus kī taraf se hai jo hamāre Najātdahindā Allāh aur hamārī ummīd Masīh Īsā ke hukm par Masīh Īsā kā rasūl hai.

1:2  Maiṅ Tīmuthiyus ko likh rahā hūṅ jo īmān meṅ merā sachchā beṭā hai. Ḳhudā Bāp aur hamārā Ḳhudāwand Masīh Īsā āp ko fazl, rahm aur salāmatī atā kareṅ.

1:3  Maiṅ ne āp ko Makiduniyā jāte waqt nasīhat kī thī ki Ifisus meṅ raheṅ tāki āp wahāṅ ke kuchh logoṅ ko ġhalat tālīm dene se rokeṅ.

1:4  Unheṅ farzī kahāniyoṅ aur ḳhatm na hone wāle nasabnāme ke pīchhe na lagne deṅ. In se mahz bahs-mubāhasā paidā hotā hai aur Allāh kā najātbaḳhsh mansūbā pūrā nahīṅ hotā. Kyoṅki yih mansūbā sirf īmān se takmīl tak pahuṅchtā hai.

1:5  Merī is hidāyat kā maqsad yih hai ki muhabbat ubhar āe, aisī muhabbat jo ḳhālis dil, sāf zamīr aur Beriyā īmān se paidā hotī hai.

1:6  Kuchh log in chīzoṅ se bhaṭak kar bemānī bātoṅ meṅ gum ho gae haiṅ.

1:7  Yih sharīat ke ustād bananā chāhte haiṅ, lekin unheṅ un bātoṅ kī samajh nahīṅ ātī jo wuh kar rahe haiṅ aur jin par wuh itne etamād se isrār kar rahe haiṅ.

1:8  Lekin ham to jānte haiṅ ki sharīat achchhī hai basharteki ise sahīh taur par istemāl kiyā jāe.

1:9  Aur yād rahe ki yih rāstbāzoṅ ke lie nahīṅ dī gaī. Kyoṅki yih un ke lie hai jo baġhair sharīat ke aur sarkash zindagī guzārte haiṅ, jo bedīn aur gunāhgār haiṅ, jo muqaddas aur ruhānī bātoṅ se ḳhālī haiṅ, jo apne māṅ-bāp ke qātil haiṅ, jo ḳhūnī,

1:10  zinākār, hamjinsparast aur ġhulāmoṅ ke tājir haiṅ, jo jhūṭ bolte, jhūṭī qasam khāte aur mazīd bahut kuchh karte haiṅ jo sehhatbaḳhsh tālīm ke ḳhilāf hai.

1:11  Aur sehhatbaḳhsh tālīm kyā hai? Wuh jo mubārak Ḳhudā kī us jalālī ḳhushḳhabrī meṅ pāī jātī hai jo mere sapurd kī gaī hai.

1:12  Maiṅ apne Ḳhudāwand Masīh Īsā kā shukr kartā hūṅ jis ne merī taqwiyat kī hai. Maiṅ us kā shukr kartā hūṅ ki us ne mujhe wafādār samajh kar ḳhidmat ke lie muqarrar kiyā.

1:13  Go maiṅ pahle kufr bakne wālā aur gustāḳh ādmī thā, jo logoṅ ko īzā detā thā, lekin Allāh ne mujh par rahm kiyā. Kyoṅki us waqt maiṅ īmān nahīṅ lāyā thā aur is lie nahīṅ jāntā thā ki kyā kar rahā hūṅ.

1:14  Hāṅ, hamāre Ḳhudāwand ne mujh par apnā fazl kasrat se unḍel diyā aur mujhe wuh īmān aur muhabbat atā kī jo hameṅ Masīh Īsā meṅ hote hue miltī hai.

1:15  Ham is qābil-e-qabūl bāt par pūrā bharosā rakh sakte haiṅ ki Masīh Īsā gunāhgāroṅ ko najāt dene ke lie is duniyā meṅ āyā. Un meṅ se maiṅ sab se baṛā gunāhgār hūṅ,

1:16  lekin yihī wajah hai ki Allāh ne mujh par rahm kiyā. Kyoṅki wuh chāhtā thā ki Masīh Īsā mujh meṅ jo awwal gunāhgār hūṅ apnā wasī sabar zāhir kare aur maiṅ yoṅ un ke lie namūnā ban jāūṅ jo us par īmān lā kar abadī zindagī pāne wāle haiṅ.

1:17  Hāṅ, hamāre azlī-o-abadī Shahanshāh kī hameshā tak izzat-o-jalāl ho! Wuhī lāfānī, andekhā aur wāhid Ḳhudā hai. Āmīn.

1:18  Tīmuthiyus mere beṭe, maiṅ āp ko yih hidāyat un peshgoiyoṅ ke mutābiq detā hūṅ jo pahle āp ke bāre meṅ kī gaī thīṅ. Kyoṅki maiṅ chāhtā hūṅ ki āp in kī pairawī karke achchhī tarah laṛ sakeṅ

1:19  aur īmān aur sāf zamīr ke sāth zindagī guzār sakeṅ. Kyoṅki bāz ne yih bāteṅ radd kar dī haiṅ aur natīje meṅ un ke īmān kā beṛā ġharq ho gayā.

1:20  Huminyus aur Sikandar bhī in meṅ shāmil haiṅ. Ab maiṅ ne inheṅ Iblīs ke hawāle kar diyā hai tāki wuh kufr bakne se bāz ānā sīkheṅ.

Chapter 2

2:1  Pahle maiṅ is par zor denā chāhtā hūṅ ki āp sab ke lie darḳhāsteṅ, duāeṅ, siphārisheṅ aur shukrguzāriyāṅ pesh kareṅ,

2:2  bādshāhoṅ aur iḳhtiyār wāloṅ ke lie bhī tāki ham ārām aur sukūn se ḳhudātars aur sharīf zindagī guzār sakeṅ.

2:3  Yih achchhā aur hamāre Najātdahindā Allāh ko pasandīdā hai.

2:4  Hāṅ, wuh chāhtā hai ki tamām insān najāt pā kar sachchāī ko jān leṅ.

2:5  Kyoṅki ek hī Ḳhudā hai aur Allāh aur insān ke bīch meṅ ek hī darmiyānī hai yānī Masīh Īsā, wuh insān

2:6  jis ne apne āp ko fidyā ke taur par sab ke lie de diyā tāki wuh maḳhlasī pāeṅ. Yoṅ us ne muqarrarā waqt par gawāhī dī

2:7  aur yih gawāhī sunāne ke lie mujhe munād, rasūl aur Ġhairyahūdiyoṅ kā ustād muqarrar kiyā tāki unheṅ īmān aur sachchāī kā paiġhām sunāūṅ. Maiṅ jhūṭ nahīṅ bol rahā balki sach kah rahā hūṅ.

2:8  Ab maiṅ chāhtā hūṅ ki har maqāmī jamāt ke mard muqaddas hāth uṭhā kar duā kareṅ. Wuh ġhusse yā bahs-mubāhasā kī hālat meṅ aisā na kareṅ.

2:9  Isī tarah maiṅ chāhtā hūṅ ki ḳhawātīn munāsib kapṛe pahan kar sharāfat aur shāystagī se apne āp ko ārāstā kareṅ. Wuh gundhe hue bāl, sonā, motī yā had se zyādā mahange kapṛoṅ se apne āp ko ārāstā na kareṅ

2:10  balki nek kāmoṅ se. Kyoṅki yihī aisī ḳhawātīn ke lie munāsib hai jo ḳhudātars hone kā dāwā kartī haiṅ.

2:11  Ḳhātūn ḳhāmoshī se aur pūrī farmāṅbardārī ke sāth sīkhe.

2:12  Maiṅ ḳhawātīn ko tālīm dene yā ādmiyoṅ par hukūmat karne kī ijāzat nahīṅ detā. Wuh ḳhāmosh raheṅ.

2:13  Kyoṅki pahle Ādam ko tashkīl diyā gayā, phir Hawwā ko.

2:14  Aur Ādam ne Iblīs se dhokā na khāyā balki Hawwā ne, jis kā natījā gunāh thā.

2:15  Lekin ḳhawātīn bachche janm dene se najāt pāeṅgī. Shart yih hai ki wuh samajh ke sāth īmān, muhabbat aur muqaddas hālat meṅ zindagī guzārtī raheṅ.

Chapter 3

3:1  Yih bāt yaqīnī hai ki jo jamāt kā nigarān bananā chāhtā hai wuh ek achchhī zimmedārī kī ārzū rakhtā hai.

3:2  Lāzim hai ki nigarān be'ilzām ho. Us kī ek hī bīwī ho. Wuh hoshmand, samajhdār, sharīf, mehmān-nawāz aur tālīm dene ke qābil ho.

3:3  Wuh sharābī na ho, na laṛākā balki narmdil aur amnpasand. Wuh paisoṅ kā lālach karne wālā na ho.

3:4  Lāzim hai ki wuh apne ḳhāndān ko achchhī tarah saṅbhāl sake aur ki us ke bachche sharāfat ke sāth us kī bāt māneṅ.

3:5  Kyoṅki agar wuh apnā ḳhāndān na saṅbhāl sake to wuh kis tarah Allāh kī jamāt kī dekh-bhāl kar sakegā?

3:6  Wuh naumurīd na ho warnā ḳhatrā hai ki wuh phūl kar Iblīs ke jāl meṅ ulajh jāe aur yoṅ us kī adālat kī jāe.

3:7  Lāzim hai ki jamāt se bāhar ke log us kī achchhī gawāhī de sakeṅ, aisā na ho ki wuh badnām ho kar Iblīs ke phande meṅ phaṅs jāe.

3:8  Isī tarah jamāt ke madadgār bhī sharīf hoṅ. Wuh riyākār na hoṅ, na had se zyādā mai pieṅ. Wuh lālchī bhī na hoṅ.

3:9  Lāzim hai ki wuh sāf zamīr rakh kar īmān kī purasrār sachchāiyāṅ mahfūz rakheṅ.

3:10  Yih bhī zarūrī hai ki unheṅ pahle parkhā jāe. Agar wuh is ke bād be'ilzām nikleṅ to phir wuh ḳhidmat kareṅ.

3:11  Un kī bīwiyāṅ bhī sharīf hoṅ. Wuh buhtān lagāne wālī na hoṅ balki hoshmand aur har bāt meṅ wafādār.

3:12  Madadgār kī ek hī bīwī ho. Lāzim hai ki wuh apne bachchoṅ aur ḳhāndān ko achchhī tarah saṅbhāl sake.

3:13  Jo madadgār achchhī tarah apnī ḳhidmat saṅbhālte haiṅ un kī haisiyat baṛh jāegī aur Masīh Īsā par un kā īmān itnā puḳhtā ho jāegā ki wuh baṛe etamād ke sāth zindagī guzār sakeṅge.

3:14  Agarche maiṅ jald āp ke pās āne kī ummīd rakhtā hūṅ to bhī āp ko yih ḳhat likh rahā hūṅ.

3:15  Lekin agar der bhī lage to yih paṛh kar āp ko mālūm hogā ki Allāh ke gharāne meṅ hamārā bartāw kaisā honā chāhie. Allāh kā gharānā kyā hai? Zindā Ḳhudā kī jamāt, jo sachchāī kā satūn aur buniyād hai.

3:16  Yaqīnan hamāre īmān kā bhed azīm hai. Wuh jism meṅ zāhir huā, Rūh meṅ rāstbāz ṭhahrā aur farishtoṅ ko dikhāī diyā. Us kī Ġhairyahūdiyoṅ meṅ munādī kī gaī, us par duniyā meṅ īmān lāyā gayā aur use āsmān ke jalāl meṅ uṭhā liyā gayā.

Chapter 4

4:1  Rūhul-quds sāf farmātā hai ki āḳhirī dinoṅ meṅ kuchh īmān se haṭ kar farebdeh rūhoṅ aur shaitānī tālīmāt kī pairawī kareṅge.

4:2  Aisī tālīmāt jhūṭ bolne wāloṅ kī riyākār bātoṅ se ātī haiṅ, jin ke zamīr par Iblīs ne apnā nishān lagā kar zāhir kar diyā hai ki yih us ke apne haiṅ.

4:3  Yih shādī karne kī ijāzat nahīṅ dete aur logoṅ ko kahte haiṅ ki wuh muḳhtalif khāne kī chīzoṅ se parhez kareṅ. Lekin Allāh ne yih chīzeṅ is lie banāī haiṅ ki jo īmān rakhte haiṅ aur sachchāī se wāqif haiṅ inheṅ shukrguzārī ke sāth khāeṅ.

4:4  Jo kuchh bhī Allāh ne ḳhalaq kiyā hai wuh achchhā hai, aur hameṅ use radd nahīṅ karnā chāhie balki Ḳhudā kā shukr karke use khā lenā chāhie.

4:5  Kyoṅki use Allāh ke kalām aur duā se maḳhsūs-o-muqaddas kiyā gayā hai.

4:6  Agar āp bhāiyoṅ ko yih tālīm deṅ to āp Masīh Īsā ke achchhe ḳhādim hoṅge. Phir yih sābit ho jāegā ki āp ko īmān aur us achchhī tālīm kī sachchāiyoṅ meṅ tarbiyat dī gaī hai jis kī pairawī āp karte rahe haiṅ.

4:7  Lekin dādī-ammāṅ kī in bemānī farzī kahāniyoṅ se bāz raheṅ. In kī bajāe aisī tarbiyat hāsil kareṅ jis se āp kī ruhānī zindagī mazbūt ho jāe.

4:8  Kyoṅki jism kī tarbiyat kā thoṛā hī fāydā hai, lekin ruhānī tarbiyat har lihāz se mufīd hai, is lie ki agar ham is qism kī tarbiyat hāsil kareṅ to ham se hāl aur mustaqbil meṅ zindagī pāne kā wādā kiyā gayā hai.

4:9  Yih bāt qābil-e-etamād hai aur ise pūre taur par qabūl karnā chāhie.

4:10  Yihī wajah hai ki ham mehnat-mashaqqat aur jāṅfishānī karte rahte haiṅ, kyoṅki ham ne apnī ummīd zindā Ḳhudā par rakhī hai jo tamām insānoṅ kā Najātdahindā hai, ḳhāskar īmān rakhne wāloṅ kā.

4:11  Logoṅ ko yih hidāyāt deṅ aur sikhāeṅ.

4:12  Koī bhī āp ko is lie haqīr na jāne ki āp jawān haiṅ. Lekin zarūrī hai ki āp kalām meṅ, chāl-chalan meṅ, muhabbat meṅ, īmān meṅ aur pākīzagī meṅ īmāndāroṅ ke lie namūnā ban jāeṅ.

4:13  Jab tak maiṅ nahīṅ ātā is par ḳhās dhyān deṅ ki jamāt meṅ bāqāydagī se kalām kī tilāwat kī jāe, logoṅ ko nasīhat kī jāe aur unheṅ tālīm dī jāe.

4:14  Apnī us nemat ko nazarandāz na kareṅ jo āp ko us waqt peshgoī ke zariye milī jab buzurgoṅ ne āp par apne hāth rakhe.

4:15  In bātoṅ ko faroġh deṅ aur in ke pīchhe lage raheṅ tāki āp kī taraqqī sab ko nazar āe.

4:16  Apnā aur tālīm kā ḳhās ḳhayāl rakheṅ. In meṅ sābitqadam raheṅ, kyoṅki aisā karne se āp apne āp ko aur apne sunane wāloṅ ko bachā leṅge.

Chapter 5

5:1  Buzurg bhāiyoṅ ko saḳhtī se na ḍānṭnā balki unheṅ yoṅ samjhānā jis tarah ki wuh āp ke bāp hoṅ. Isī tarah jawān ādmiyoṅ ko yoṅ samjhānā jaise wuh āp ke bhāī hoṅ,

5:2  buzurg bahnoṅ ko yoṅ jaise wuh āp kī māeṅ hoṅ aur jawān ḳhawātīn ko tamām pākīzagī ke sāth yoṅ jaise wuh āp kī bahneṅ hoṅ.

5:3  Un bewāoṅ kī madad karke un kī izzat kareṅ jo wāqaī zarūratmand haiṅ.

5:4  Agar kisī bewā ke bachche yā pote-nawāse hoṅ to us kī madad karnā unhīṅ kā farz hai. Hāṅ, wuh sīkheṅ ki ḳhudātars hone kā pahlā farz yih hai ki ham apne ghar wāloṅ kī fikr kareṅ aur yoṅ apne māṅ-bāp, dādā-dādī aur nānā-nānī ko wuh kuchh wāpas kareṅ jo hameṅ un se milā hai, kyoṅki aisā amal Allāh ko pasand hai.

5:5  Jo aurat wāqaī zarūratmand bewā aur tanhā rah gaī hai wuh apnī ummīd Allāh par rakh kar din rāt apnī iltijāoṅ aur duāoṅ meṅ lagī rahtī hai.

5:6  Lekin jo bewā aish-o-ishrat meṅ zindagī guzārtī hai wuh zindā hālat meṅ hī murdā hai.

5:7  Yih hidāyāt logoṅ tak pahuṅchāeṅ tāki un par ilzām na lagāyā jā sake.

5:8  Kyoṅki agar koī apnoṅ aur ḳhāskar apne ghar wāloṅ kī fikr na kare to us ne apne īmān kā inkār kar diyā. Aisā shaḳhs ġhairīmāndāroṅ se badtar hai.

5:9  Jis bewā kī umr 60 sāl se kam hai use bewāoṅ kī fahrist meṅ darj na kiyā jāe. Shart yih bhī hai ki jab us kā shauhar zindā thā to wuh us kī wafādār rahī ho

5:10  aur ki log us ke nek kāmoṅ kī achchhī gawāhī de sakeṅ, masalan kyā us ne apne bachchoṅ ko achchhī tarah pālā hai? Kyā us ne mehmān-nawāzī kī aur muqaddasīn ke pāṅw dho kar un kī ḳhidmat kī hai? Kyā wuh musībat meṅ phaṅse huoṅ kī madad kartī rahī hai? Kyā wuh har nek kām ke lie koshāṅ rahī hai?

5:11  Lekin jawān bewāeṅ is fahrist meṅ shāmil mat karnā, kyoṅki jab un kī jismānī ḳhāhishāt un par ġhālib ātī haiṅ to wuh Masīh se dūr ho kar shādī karnā chāhtī haiṅ.

5:12  Yoṅ wuh apnā pahlā īmān chhoṛ kar mujrim ṭhahartī haiṅ.

5:13  Is ke alāwā wuh sust hone aur idhar-udhar gharoṅ meṅ phirne kī ādī ban jātī haiṅ. Na sirf yih balki wuh bātūnī bhī ban jātī haiṅ aur dūsroṅ ke muāmalāt meṅ daḳhl de kar nāmunāsib bāteṅ kartī haiṅ.

5:14  Is lie maiṅ chāhtā hūṅ ki jawān bewāeṅ dubārā shādī karke bachchoṅ ko janm deṅ aur apne gharoṅ ko saṅbhāleṅ. Phir wuh dushman ko badgoī karne kā mauqā nahīṅ deṅgī.

5:15  Kyoṅki bāz to sahīh rāh se haṭ kar Iblīs ke pīchhe lag chukī haiṅ.

5:16  Lekin jis īmāndār aurat ke ḳhāndān meṅ bewāeṅ haiṅ us kā farz hai ki wuh un kī madad kare tāki wuh Ḳhudā kī jamāt ke lie bojh na baneṅ. Warnā jamāt un bewāoṅ kī sahīh madad nahīṅ kar sakegī jo wāqaī zarūratmand haiṅ.

5:17  Jo buzurg jamāt ko achchhī tarah saṅbhālte haiṅ unheṅ dugnī izzat ke lāyq samjhā jāe. Maiṅ ḳhāskar un kī bāt kar rahā hūṅ jo pāk kalām sunāne aur tālīm dene meṅ mehnat-mashaqqat karte haiṅ.

5:18  Kyoṅki kalām-e-muqaddas farmātā hai, “Jab tū fasal gāhne ke lie us par bail chalne detā hai to us kā muṅh bāndh kar na rakhnā.” Yih bhī likhā hai, “Mazdūr apnī mazdūrī kā haqdār hai.”

5:19  Jab kisī buzurg par ilzām lagāyā jāe to yih bāt sirf is sūrat meṅ māneṅ ki do yā is se zyādā gawāh is kī tasdīq kareṅ.

5:20  Lekin jinhoṅ ne wāqaī gunāh kiyā ho unheṅ pūrī jamāt ke sāmne samjhāeṅ tāki dūsre aisī harkateṅ karne se ḍar jāeṅ.

5:21  Allāh aur Masīh Īsā aur us ke chunīdā farishtoṅ ke sāmne maiṅ sanjīdagī se tākīd kartā hūṅ ki in hidāyāt kī yoṅ pairawī kareṅ ki āp kisī muāmale se sahīh taur par wāqif hone se peshtar faislā na kareṅ, na jānibdārī kā shikār ho jāeṅ.

5:22  Jaldī se kisī par hāth rakh kar use kisī ḳhidmat ke lie maḳhsūs mat karnā, na dūsroṅ ke gunāhoṅ meṅ sharīk honā. Apne āp ko pāk rakheṅ.

5:23  Chūṅki āp aksar bīmār rahte haiṅ is lie apne mede kā lihāz karke na sirf pānī hī piyā kareṅ balki sāth sāth kuchh mai bhī istemāl kareṅ.

5:24  Kuchh logoṅ ke gunāh sāf sāf nazar āte haiṅ, aur wuh un se pahle hī adālat ke taḳht ke sāmne ā pahuṅchte haiṅ. Lekin kuchh aise bhī haiṅ jin ke gunāh goyā un ke pīchhe chal kar bād meṅ zāhir hote haiṅ.

5:25  Isī tarah kuchh logoṅ ke achchhe kām sāf nazar āte haiṅ jabki bāz ke achchhe kām abhī nazar nahīṅ āte. Lekin yih bhī poshīdā nahīṅ raheṅge balki kisī waqt zāhir ho jāeṅge.

Chapter 6

6:1  Jo bhī ġhulāmī ke jue meṅ haiṅ wuh apne mālikoṅ ko pūrī izzat ke lāyq samjheṅ tāki log Allāh ke nām aur hamārī tālīm par kufr na bakeṅ.

6:2  Jab mālik īmān lāte haiṅ to ġhulāmoṅ ko un kī is lie kam izzat nahīṅ karnā chāhie ki wuh ab Masīh meṅ bhāī haiṅ. Balki wuh un kī aur zyādā ḳhidmat kareṅ, kyoṅki ab jo un kī achchhī ḳhidmat se fāydā uṭhā rahe haiṅ wuh īmāndār aur azīz haiṅ. Lāzim hai ki āp logoṅ ko in bātoṅ kī tālīm deṅ aur is meṅ un kī hauslā-afzāī kareṅ.

6:3  Jo bhī is se farq tālīm de kar hamāre Ḳhudāwand Īsā Masīh ke sehhatbaḳhsh alfāz aur is ḳhudātars zindagī kī tālīm se wābastā nahīṅ rahtā

6:4  wuh ḳhudpasandī se phūlā huā hai aur kuchh nahīṅ samajhtā. Aisā shaḳhs bahs-mubāhasā karne aur ḳhālī bātoṅ par jhagaṛne meṅ ġhairsehhatmand dilchaspī letā hai. Natīje meṅ hasad, jhagaṛe, kufr aur badgumānī paidā hotī hai.

6:5  Yih log āpas meṅ jhagaṛne kī wajah se hameshā kuṛhte rahte haiṅ. Un ke zahan bigaṛ gae haiṅ aur sachchāī un se chhīn lī gaī hai. Hāṅ, yih samajhte haiṅ ki ḳhudātars zindagī guzārne se mālī nafā hāsil kiyā jā saktā hai.

6:6  Ḳhudātars zindagī wāqaī bahut nafā kā bāis hai, lekin shart yih hai ki insān ko jo kuchh bhī mil jāe wuh us par iktifā kare.

6:7  Ham duniyā meṅ apne sāth kyā lāe? Kuchh nahīṅ! To ham duniyā se nikalte waqt kyā kuchh sāth le jā sakeṅge? Kuchh bhī nahīṅ!

6:8  Chunāṅche agar hamāre pās ḳhurāk aur libās ho to yih hamāre lie kāfī honā chāhie.

6:9  Jo amīr banane ke ḳhāhāṅ rahte haiṅ wuh kaī tarah kī āzmāishoṅ aur phandoṅ meṅ phaṅs jāte haiṅ. Bahut-sī nāsamajh aur nuqsāndeh ḳhāhishāt unheṅ halākat aur tabāhī meṅ ġharq ho jāne detī haiṅ.

6:10  Kyoṅki paisoṅ kā lālach har ġhalat kām kā sarchashmā hai. Kaī logoṅ ne isī lālach ke bāis īmān se bhaṭak kar apne āp ko bahut aziyat pahuṅchāī hai.

6:11  Lekin āp jo Allāh ke bande haiṅ in chīzoṅ se bhāgte raheṅ. In kī bajāe rāstbāzī, ḳhudātarsī, īmān, muhabbat, sābitqadmī aur narmdilī ke pīchhe lage raheṅ.

6:12  Īmān kī achchhī kushtī laṛeṅ. Abadī zindagī se ḳhūb lipaṭ jāeṅ, kyoṅki Allāh ne āp ko yihī zindagī pāne ke lie bulāyā, aur āp ne apnī taraf se bahut-se gawāhoṅ ke sāmne is bāt kā iqrār bhī kiyā.

6:13  Mere do gawāh haiṅ, Allāh jo sab kuchh zindā rakhtā hai aur Masīh Īsā jis ne Puntiyus Pīlātus ke sāmne apne īmān kī achchhī gawāhī dī. Inhīṅ ke sāmne maiṅ āp ko kahtā hūṅ ki

6:14  yih hukm yoṅ pūrā kareṅ ki āp par na dāġh lage, na ilzām. Aur is hukm par us din tak amal karte raheṅ jab tak hamārā Ḳhudāwand Īsā Masīh zāhir nahīṅ ho jātā.

6:15  Kyoṅki Allāh Masīh ko muqarrarā waqt par zāhir karegā. Hāṅ, jo mubārak aur wāhid Hukmrān, bādshāhoṅ kā Bādshāh aur mālikoṅ kā Mālik hai wuh use muqarrarā waqt par zāhir karegā.

6:16  Sirf wuhī lāfānī hai, wuhī aisī raushnī meṅ rahtā hai jis ke qarīb koī nahīṅ ā saktā. Na kisī insān ne use kabhī dekhā, na wuh use dekh saktā hai. Us kī izzat aur qudrat abad tak rahe. Āmīn.

6:17  Jo maujūdā duniyā meṅ amīr haiṅ unheṅ samjhāeṅ ki wuh maġhrūr na hoṅ, na daulat jaisī ġhairyaqīnī chīz par ummīd rakheṅ. Is kī bajāe wuh Allāh par ummīd rakheṅ jo hameṅ faiyāzī se sab kuchh muhaiyā kartā hai tāki ham us se lutfandoz ho jāeṅ.

6:18  Yih pesh-e-nazar rakh kar amīr nek kām kareṅ aur bhalāī karne meṅ hī amīr hoṅ. Wuh ḳhushī se dūsroṅ ko dene aur apnī daulat meṅ sharīk karne ke lie taiyār hoṅ.

6:19  Yoṅ wuh apne lie ek achchhā ḳhazānā jamā kareṅge yānī āne wāle jahān ke lie ek ṭhos buniyād jis par khaṛe ho kar wuh haqīqī zindagī pā sakeṅge.

6:20  Tīmuthiyus beṭe, jo kuchh āp ke hawāle kiyā gayā hai use mahfūz rakheṅ. Dunyāwī bakwās aur un mutazād ḳhayālāt se katrāte raheṅ jinheṅ ġhaltī se ilm kā nām diyā gayā hai.

6:21  Kuchh to is ilm ke māhir hone kā dāwā karke īmān kī sahīh rāh se haṭ gae haiṅ. Allāh kā fazl āp sab ke sāth rahe.