Kapingamarangi - I Timothy

Chapter 1

1:1  Mai baahi o Paul, tangada agoago-hagau a Jesus Christ i tegau a God go tadau Hagamouli, mo Jesus Christ go tadau hagadagadagagee,

1:2  ang-gi Timothy, dagu dama-daane donu mai di hagadonu. God tadau Damana mo Jesus Christ tadau Dagi, gi-dugu-adu gi-di-goe tumaalia, di aloho, mo-di noho i-di aumaalia.

1:3  Au e-hiihai bolo goe gii-noho-hua i Ephesus be agu helekai ala ne-hai-adu gi-di-goe i dogu hana gi Macedonia. Digau hai-agoago tilikai i gono, gei goe e-hai-loo gii-dugu digaula.

1:4  Helekai gi digaula gi-dugua nadau kai namua, mo-nia hihi nia ingoo e-logowaahee o nia maadua namua, ala e-hidi-ai nia lagalagamaaloo, ge deai ono dahidamee gi-di hagatau pilaan a God ai, dela gu-modongoohia-mai i-di hagadonu.

1:5  Deenei tadinga o-di hagatau deenei: e-haga-tomo-aga di aloho mai i-lodo di manawa madammaa, mo-di mamaanadu humalia, mo-di hagadonu dela e-donu.

1:6  Hunu gau guu-huli gi-daha mo nia mee aanei, gu-hagabooboo-hua balumee.

1:7  Digaula e-hiihai e-hai digau agoago o nnaganoho, gei e-de-iloo-ginaadou nia mee ala e-helekai-ai, mo nia mee ala e-maaloo di helekai-ai ginaadou.

1:8  Gidaadou e-iloo bolo nnaganoho la-koia e-humalia ma-ga-hai-hegau ginai gii-donu.

1:9  Gidaadou e-iloo bolo nia haganoho la-hagalee ne-hai ang-gi digau humalia, gei ne-hai ang-gi digau dagadagahi haganoho ge e-hai nia mee-huaidu, ge hagalee mmaadagu i God, digau o-di bouli, digau hagalee daumaha, digau ala e-daaligi nadau damana mo nadau dinana gii-mmade, digau daaligi-dangada,

1:10  mo ang-gi digau ala e-manawa-manu, di hiihai taane ang-gi taane, digau gaiaa-dangada, mo digau dilikai ge e-hai nadau hagamodu dilikai, ge e-hai-baahi gi-nia agoago ala e-donu.

1:11  Aanei nia agoago gu-kila-mai i-lodo di Longo-Humalia, dela ne-dugu-mai gi-di-au belee haga-iloo, di Longo-Humalia madamada o God dumaalia.

1:12  Au e-danggee ang-gi Jesus Christ tadau Dagi, dela ne-hagamaaloo au i-lodo agu hegau. Au e-danggee ang-gi Mee dela ne-hai bolo ma ko-au dela e-humalia gi-di gowaa, gei ne-hilihili au belee hai ana hegau.

1:13  Mee gu-haga-balumee-hua agu helekai huaidu nogo hai i Mee i-mua, nogo hagaduadua, nogo hagahuaidu a-Mee. Gei God gu-dumaalia-mai, idimaa, au nogo dogu hagadonu ai, gei e-de-iloo agu mee ala nogo hai.

1:14  Gei tadau Dagi gu-llingi-ia dono dumaalia dee-odi gi ogu nua, ga-dugu-mai di hagadonu mo-di aloho, dela e-hai-mee ginai gidaadou i tadau buni-anga gi Jesus Christ.

1:15  Aanei nnelekai e-donu belee hagadonu go gidaadou, bolo Jesus Christ la-ne-haneia gi henuailala belee haga-mouli digau huaidu. Ko-au dela koia e-huaidu i digaula huogodoo.

1:16  Gei God ne-dumaalia-mai gi-di-au belee hagi-aga di manawa-hagakono o Jesus i-di-au, gei au koia e-huaidu i digau huaidu huogodoo, bolo au e-hai tangada e-daudali go digau dogologo ala ga-hagadonu a Christ nomuli gaa-kae di mouli dee-odi.

1:17  God e-dahi-hua, di King dono hagaodi ai dela hagalee made, ge de-gidee. Nia madamada, mo-di aamua gi-heia ang-gi Mee, gaa-hana-hua beelaa dono hagaodi ai. Amen.

1:18  Timothy, dagu dama, au e-dugu-adu di agoago deenei e-tau ang-gi nia helekai kokohp ala guu-hai i doo gili i-mua. Nnelekai aanei la-heia nia goloo-dauwa ni-oou gi-heebagi maaloo.

1:19  Daahia do hagadonu mo do manawa madammaa, idimaa, hunu gau gu-hagalee hai nia mee aanei, guu-kili gi-daha nadau hagadonu.

1:20  Hymenaeus mo Alexander nia daangada i digaula ala guu-wanga ko-au gi-lala o nia mogobuna o Setan belee hagaduadua gi-de-helekai huaidu i God.

Chapter 2

2:1  I-mua nia mee huogodoo, au e-hagamaaloo-adu gi-di-goe bolo nia hiihai, nia dalodalo, nia dangidangi mo nia danggee la-gi-wanga-ina gi God i digau huogodoo,

2:2  i-nia king labelaa, mo digau aamua huogodoo, gii-mee di-mouli gidaadou i-di noho i-di aumaalia mo-di tenetene, i tadau daumaha ang-gi God mo-di mouli madammaa.

2:3  Di mee deenei la-di mee humalia e-haga-tenetene di manawa o God, go tadau Hagamouli,

2:4  dela e-hiihai bolo digau huogodoo gii-kae di mouli, ge gi-kabemee ginaadou gi-nia mee ala e-donu.

2:5  Idimaa, God le e-dahi-hua, ge tangada e-dahi labelaa i-golo e-haga-buni-mai a God mo nia daangada, deenei go Mee go Jesus Christ,

2:6  dela ne-tigidaumaha Ia gi God, e-haga-dagaloaha nia daangada huogodoo. Deenei di haga-modongoohia i-di madagoaa donu mai baahi o God bolo Ia e-hiihai bolo nia daangada huogodoo la-gi-mouli.

2:7  Deelaa-laa ne-hagau-mai au gadoo be tangada agoago-hagau, be go tangada agoago gi digau tuadimee e-hagadele ana helekai i-di gili di hagadonu mo-di tonu. Au hagalee helekai nia kai tilikai, au e-helekai i-di tonu.

2:8  Au e-hiihai bolo nia daane ala gu-hagadabu ang-gi God, gi-dahi-aga-ina nadau lima ga-dalodalo-laa i-nia gowaa huogodoo, ge hudee hagawelewele be e-lagamaaloo.

2:9  Au e-hiihai bolo nia ahina la-gi-ulu i-nia gahu e-duudanga ge humalia dono ulu-ai ginaadou, gi-hudee binia nia ngaahulu nadau libogo, ge hudee humu-ina ginaadou gi-nia goolo be nia hadu-lodo-baehua be nia gahu hui-ngadaa.

2:10  Gei gi-hai-hegau humalia gii-donu, be nia ahina ala e-hai bolo ginaadou e-daumaha ang-gi God.

2:11  Nia ahina gi-kaabee-ina di agoago i-di noho deemuu mo-di hila-gi-lala.

2:12  Au hagalee dugu-anga nia ahina gi-agoago, be e-dagi nia daane, digaula gii-noho dee-muu.

2:13  Idimaa, Adam dela ne-hai matagidagi, ga-nomuli go Eve.

2:14  Hagalee go Adam dela ne-halahalau, go di ahina dela ne-halahalau, ga-oho taganoho a God.

2:15  Gei nia ahina le e-hagamouli mai nadau haanau nadau dama, maa ginaadou ga-daahi hagamahi nadau hagadonu, aaloho, mo-di mouli dabu mo nia hangaahai humalia.

Chapter 3

3:1  Telekai e-donu deenei: Maa tangada e-hiihai e-dagi di nohongo-dabu, mee e-hiihai gi-di moomee humalia hai-donu huoloo.

3:2  Tagi di nohongo-dabu le e-hai gii-hai tangada e-donu, e-lodo-hua gi-di ahina e-dahi, e-modongoohia ana mee ala e-hai, e-mee di-dagi ia, mo ana hegau belee hai, e-benebene nia daangada mai i-daha gi-lodo dono hale, gei e-iloo di aago.

3:3  Geia hagalee hiigeina tagaao be e-noho llamu-dauwa, gei-ia gii-hai tangada manawa hila-gi-lala mo-di tenetene, hagalee e-aloho i-nia bahihadu.

3:4  Geia e-dagi hagahumalia digau dono hale, ge e-hai ana dama gi-hagalongo ang-gi deia, gi-hagalabagau ia.

3:5  Idimaa, taane i-golo e-de-iloo di-dagi digau dono hale, malaa dehee dana hai gaa-mee di-benebene di nohongo-dabu a God?

3:6  Mee e-hai gi-manawa madua i-di hagadonu, gi-de-hagamuamua-hua a mee, gaa-doo gi-lodo di halauwa gadoo be Setan.

3:7  Geia gii-hai tangada e-hagalabagau go digau ala i-daha mo taumaha, gi-dee doo-hua ia gi-lodo di hele a Setan ga-bagege.

3:8  Nia sounkowah labelaa la-gi-mouli madammaa, ge gi-hai-hegau donu, ge gi-hudee hiigeina tagaao, be e-hagagailaa gi-nia teenedi.

3:9  Digaula gi-hai-hegau gi-di tonu o nadau hagadonu mai i nadau manawa madammaa.

3:10  Digaula e-hai gi-haga-dina i-mua, digaula guu-kila, gei digaula gaa-mee di-kae-laa nnegau.

3:11  Nadau lodo hogi la-gi-mouli madammaa, ge hagalee hai-tamu, ge e-modongoohia nadau mee ala e-hai, ge gii-donu i-nia mee huogodoo.

3:12  Sounkowah le e-hai-hua dono lodo e-dahi, ge e-mee di-dagi ana dama mo digau o dono hale hagahumalia.

3:13  Nia sounkowah ala e-ngalua humalia, le e-hagalabagau go digau dogologo, gei digaula gaa-mee di-nadau agoago maaloo i nadau hagadonu a Jesus Christ.

3:14  Au e-hihi-hua di lede deenei, gei au e-hagadagadagagee bolo ma-gu-hoohoo-mai-hua dogu madagoaa e-heetugi-adu.

3:15  Gei-au ma-ga-duai, gei di lede deenei ga-hagamodongoohia tadau hegau dela belee hai i-mehanga nia dama a God, deenei go di nohongo-dabu a God Mouli, deelaa go tuludulu hagamau o-di tonu.

3:16  Dei tangada e-mee di-haga-deiloo di lahalaha o-di hagammuni o tadau hai-daumaha ai: Mee gu-gila-mai guu-hai tangada, gei di Hagataalunga gu-hagamodongoohia bolo Mee e-donu, gei guu-mmada ginai digau di-langi. Di longo o-Maa guu-dele gi-nia henua huogodoo, gu-hagadonu go digau henuailala, ge guu-lahi gi-nua i-nia madamada.

Chapter 4

4:1  Di Hagataalunga gu-helekai haga-madammaa, bolo hunu gau gaa-kili gi-daha nadau hagadonu i-nia laangi muliagina. Digaula ga-daudali nia mee o-nia hagataalunga dilikai, ga-daudali go nia agoago o-nia hagataalunga huaidu.

4:2  Nia agoago tilikai aanei ne-lloomoi i-baahi nia halahalau o digau hai kai-tilikai. Digau aanei digau hua e-noho gei lodo digaula la-guu-mmade, be nia mee ala ne-dudu gi-di baalanga wele.

4:3  Digau ala beenei e-agoago bolo tangada le e-hagalee hai dono lodo, ge hagalee gai hunu meegai. Gei nia meegai aalaa, la nia mee ala ne-hai go God belee gai go ginaadou i tanggee, ginaadou ala e-hagadonu ge e-iloo di tonu.

4:4  Nia mee huogodoo a God ne-hai, le e-humalia, deai dahi mee e-hudu gi-daha ai, maa di-maa ne-kae i talodalo o tanggee.

4:5  Idimaa, go nnelekai a God mo talodalo danggee, la-ne-hai nia maa gi-humalia gi God.

4:6  Maa goe ga-hagadae nia boloagi aanei gi o duaahina-daumaha, gei goe gaa-hai di hege humalia ni Jesus Christ, e-ala be goe e-bida haangai-hua goe gi-di hagadonu mo nia agoago hai-donu ala nogo daudali kooe.

4:7  Haga-ligaliga i-daha mo nia ala-kai ala e-hai-baahi gi God, ala hagalee humalia dono leelee ai. Heia-hua go do hagawouwou do mouli dama a Christ gi-humalia.

4:8  Di hagawouwou o tuaidina la ono dahidamee dulii i-golo, gei di hagawouwou gi-di baahi o-di hagataalunga, la-koia e-dahidamee huoloo ang-gi nia mee huogodoo, e-hai dana hagababa ang-gi tadau mouli dolomeenei mo-di madagoaa dela ga-hanimoi.

4:9  Telekai deenei le e-donu, e-hai gii-donu ginai gi-hagadonu.

4:10  Malaa, deelaa-laa e-hai-hegau hagamahi-ai gidaadou, idimaa, gidaadou gu-hagadagadagagee gi-di God Mouli, go di Hagamouli o-nia daangada huogodoo, gei e-donu go digau ala e-hagadonu.

4:11  Hagi-anga-ina gi digaula nia boloagi mo nia agoago aanei.

4:12  Hudee heia tangada e-dahi gi-haga-balumee-ina goe idimaa, goe e-damagiigi, gei goe heia di ada humalia gi digau hagadonu mai au helekai, do mouli, do aloho, do hagadonu mo i-lodo do mouli madammaa.

4:13  Haga-mahi daulia di Beebaa-Dabu gi digau dogologo, mo-di agoago, mo-di hagi-anga nia helekai a God, gaa-dae-loo gi dogu hanadu gi do baahi.

4:14  Hudee haga-balumee-ina di kisakis hagataalunga dela i oo lodo dela ne-gowadu gi-di goe i-di madagoaa nia soukohp ne-helekai mo digau mmaadua ne-daahi nadau lima gi oo nua.

4:15  Haga-madabouli mo-di hagamahi gi nnegau aanei, gi-gidee nia daangada huogodoo gi do menege-aga.

4:16  Gii-pula i-di-goe, au agoago heia labelaa gi-humalia. Heia hagamahi nia mee aanei, idimaa, ma-gaa-hai kooe beenei, goe gaa-bida haga-mouli-hua goe, mo digau ala e-hagalongo gi au agoago.

Chapter 5

5:1  Goe hudee helekai daamaha gi-nia daane mmaadua, leelee haga-balabala be do helehelekai gi do damana-donu. Duguina nia dama-daane be nia duaahina ni-oou.

5:2  Duguina nia ahina mmaadua be nia dinana ni-oou, ge nia dama-ahina be nia duaahina-ahina ni-oou gi-nia hangaahai madammaa.

5:3  Hagalabagau-ina nia ahina guu-mmade nadau lodo ala e-noho nadau dina.

5:4  Maa di ahina guu-made dono lodo, ana dama be nia dama o ana dama i-golo, digaula gi-kabee-ina i-mua di-nadau hai e-hagagila-aga nadau duhongo hegau daumaha ang-gi nadau beneinei, ma-gaa-hai beenei, digaula ne-hui gi-muli gi nadau maadua mo nadau maadua-mmaadua, idimaa deenei di-mee a God e-manawa tene ginai.

5:5  Di ahina guu-made dono lodo, e-noho dono dina, deai dana dama belee hagamaamaa ia ai, gei-ia gu-hagadagadagagee-hua gi God, gei e-hai dalodalo ang-gi God i-di hagamaamaa i-di boo mo-di aa.

5:6  Gei di ahina guu-made dono lodo gaa-hai-hua go dono tenetene huaidu, ma e-aha mee mouli, gei mee guu-lawa di-made.

5:7  Hagi-anga-ina nia agoago aanei gi digaula, gi-de-hagahuaidu-hua ginaadou go tangada.

5:8  Maa tangada ga-hagalee madamada humalia i-ono gau, gei e-donu go digau o dono hale donu, mee ne-haga-deiloo di hagadonu, gu koia ne-huaidu laa-hongo digau ala e-de-hagadonu.

5:9  Hudee hihia di ingoo o-di ahina dela guu-made dono lodo gi-lodo di beebaa o-nia ahina guu-mmade nadau lodo, maa mee digi modoono ono ngadau. Mee e-mee-hua di-hihi dono ingoo, maa mee ne-hai-hua dono lodo hagadahi,

5:10  be guu-dele humalia dono ingoo i ana hegau humalia beenei: mee ne-aago humalia ana dama, ge e-benebene digau mai i-daha gi-lodo dono hale, ge e-tono nia wae nia dama a God, mo-di hagamaamaa digau ala e-haingadaa, gei ana hegau ala e-hai la-go nia mee huogodoo ala e-humalia.

5:11  Hudee hihia nia ingoo nia dama-ahina ne-mmade nadau lodo; idimaa maa digaula ga-hiihai bolo ginaadou e-hai-lodo, digaula gaa-huli gi-daha mo Christ,

5:12  gaa-hai ginaadou gii-hala, gaa-oho nadau hagababa ala guu-lawa di-hai gi Mee i-mua.

5:13  Digaula guu-kabe di hagauwwou di madagoaa i-nadau hagadau i-nia hale, di mee mada-huaidu, digaula guu-kabe di hai-tamu, haga-deaadee-mee, ge hagabooboo i-nia mee hagalee humalia belee helehelekai ai.

5:14  Deelaa-laa, gei au e-hiihai gi-nia dama-ahina ala guu-mmade nadau lodo, bolo digaula gii-hai nadau lodo, gii-hai nadau dama, benebene nadau hale, gi-dee dugu-anga-hua di madagoaa humalia gi tadau hagadaumee e-helekai huaidu i gidaadou.

5:15  Idimaa, hunu ahina beelaa guu-kili nadau hagadonu gi-daha, gu-daudali a Setan.

5:16  Maa di ahina hagadonu ga-iai ana ahina guu-mmade nadau lodo i dono baahi, gei-ia gi-benabena-ina digaula, gi-de-haga-daadaamee hua di nohongo-dabu, e-madamada-humalia nia ahina ala e-noho nadau dina.

5:17  Digau mmaadua-daumaha ala e-hai nadau hegau humalia di-dagi di nohongo-dabu, e-hai-loo gii-kumi nia hui koia e-llauehe, gei e-donu la-go digau ala e-ngalua hagamahi di-nadau helehelekai ge e-agoago.

5:18  Idimaa, di Beebaa-Dabu e-helekai boloo, “Goe hudee noodia di ngudu o-di kau dela e-dagadagahi ana lii-‘wheat’.” gei e-helekai labelaa boloo, “Tangada hai-hegau e-hai-loo gii-kumi dono hui.”

5:19  Goe hudee hagalongo gi-nia hagahuaidu ala e-hai i-di gili tangada madua-daumaha, be go di-maa hua ne-hagamodongoohia go nia daangada hagadootonu dogolua be dogodolu.

5:20  Wou-hua haga-mmaa gi digau ala e-hai nia huaidu, gi-mmaadagu digau ala i-golo.

5:21  Au e-hagamahi e-haga-modongoohia-adu gi-di-goe i-mua nnadumada o God mo Jesus Christ, mo digau di-langi haga-madagu, bolo goe gi-hagalongo gi-nia agoago aanei, gei goe hudee hilihili-dangada i au hegau ala e-hai.

5:22  Goe hudee haga-lellele di hagadabu dau dangada gi-nia hegau o Tagi, hudee heia nia huaidu nia daangada ala e-hai. Gei goe gii-bida mouli madammaa.

5:23  Hudee inu hua nia wai, inu dulii nia waini labelaa, e-hagahumalia do huaidina, i-di-goe dela e-magimagi.

5:24  Nia huaidu hunu gau e-kila-mai, nadau huaidu e-hula i nadau mua, e-hagi-aga ginaadou. Nia huaidu hunu gau e-kila-aga maalia.

5:25  E-hai gadoo be nia hegau humalia ala koia e-kila-mai haga-mmaa, ge nia hegau humalia ala hagalee-loo e-modongoohia, la-deemee di-nngala.

Chapter 6

6:1  Nia hege huogodoo la-gi-hagalabagau-ina nadau dagi, gi-de-helekai huaidu tangada i-di ingoo o God mo tadau agoago.

6:2  Nia hege o-nia dagi dama Christ, le-hagalee haga-balumee nadau dagi, idimaa, digaula la nia duaahina-daumaha ni ginaadou. Malaa, digaula belee hai-hegau gi nadau dagi gi-humalia gi-nonua, idimaa, digau ala ma-ga-hagahumalia go nadau hegau, la digau hagadonu ala e-aloho-iei ginaadou. Goe hai-loo gi-aago mo-di agoago nia mee aanei.

6:3  Tangada dela gaa-hai ana huai agoago laa-daha mo nia helekai donu o tadau Dagi go Jesus Christ mo nia agoago o tadau daumaha,

6:4  la tangada hagamuamua, ge deai dana mee e-iloo-ia ai. Mee ono hiihai huaidu e-lagamaaloo i-nia helekai ala e-hidi-ai tubua, mo tee-buni, mo-di hagahuaidu mee, mo-di maanadu huaidu,

6:5  mo-di lagalagamaaloo i-nia madagoaa huogodoo i-baahi digau ala gu-deai nadau hagabaubau humalia ai, ge deai di tonu i nadau baahi ai. Digaula e-hagamaanadu bolo di hai-daumaha le e-haga-maluagina dangada.

6:6  Gei e-donu, di hai-daumaha le e-haga-maluagina gidaadou, maa gidaadou e-dohu-hua gi-nia mee ala gu-i-golo i tadau baahi.

6:7  Gidaadou tadau mee ne-gaamai gi henuailala ai, gei gidaadou tadau mee e-kae i henuailala ai!

6:8  Deelaa-laa, maa gidaadou gu-iai tadau meegai, goloo, aalaa-hua guu-dohu mai gi gidaadou.

6:9  Digau ala bolo ginaadou e-hai gii-logo nadau mee, le e-too gi-lodo nia hagamada mo nia boiboi huogodoo, mo nia haingadaa e-logo ala e-hagahuaidu ginaadou.

6:10  Idimaa, di aloho i-nia bahihadu, la-go taamada o-nia huaidu huogodoo. Digau i-golo e-hiihai huoloo bolo gii-logo nadau bahihadu, digau ala beenei le e-mmaanege gi-daha mo nadau hagadonu, ge e-haga-mmae nadau lodo i nadau manawa-gee logo.

6:11  Goe go taane a God, haga-ligaliga i-daha mo nia mee aanei. Hagamahi halahala-ina di tonu, mouli daumaha gi God, hagadonu, aloho, manawa-hagakono i-lodo nia haingadaa, mo manawa-balabala.

6:12  Lele giibeni i-di hoiaa di hagadonu, gii-mee dau kumi di mouli dee-odi, go di mouli a God ne-gahi-mai ginai goe i do haga-modongoohia humalia do hagadonu i-mua digau haga-modongoohia dogologo.

6:13  Au e-helekai adu gi-di-goe i-mua nnadumada o God, dela e-wanga di mouli gi nia mee huogodoo, mo i-mua nnadumada o Jesus Christ dela ne-haga-modongoohia humalia dono hagadonu i-mua o Pontus Pilate,

6:14  bolo goe gi-daudalia agu waalanga ala e-dugu-adu gi-di-goe, gei gi-daahia hua beelaa gii-mau gaa-dae-loo gi-di Laangi tadau Dagi go Jesus Christ ga-gila-aga.

6:15  God ga-hagau-mai a-Mee i-di madagoaa dela gu-haga-noho go Mee, di God maluagina, di Tagi hua e-dahi, ge di King o-nia king huogodoo, mo-di Tagi o-nia dagi huogodoo.

6:16  Go Mee-hua dela dono hagaodi ai, Mee e-noho i-lodo di maahina dela e-madamada huoloo, e-deemee di-hoohoo ginai tangada. Tangada ne-mmada gi Mee ai, gei e-deemee di-mmada ginai tangada. Di hagalaamua mo-di mogobuna dee-odi la nia mee ni Mee, gaa-hana-hua beelaa.

6:17  Aago-ina digau ala e-maluagina i-lodo di mouli deenei, bolo gi-hudee hagamuamua ginaadou, ge hudee gana gi-nia maluagina aanei ala hagalee mau. Digaula gii-gana-hua gi God dela e-dumaalia, e-gaamai dehuia nia mee huogodoo ala e-haga-tenetene-ai gidaadou.

6:18  Agoago-ina gi digaula gi-heia go nia mee ala e-humalia, gi-maluagina ginaadou i nadau hegau humalia, ge gii-wanga-dehuia mo-di tene gi-di hagamaamaa digau ala i-golo.

6:19  Deenei di-nadau hai dela e-hagatogomaalia go ginaadou ang-gi di-nadau maluagina hagalabagau dela e-hai di hagamau ang-gi di madagoaa dela ga-hanimoi, gii-mee-ai ginaadou di-hai-mee gi-di mouli donu.

6:20  Timothy, goe benebene-ina gi-humalia nia mee ala ne-dugu-adu gi di-goe. Haga-ligaliga i-daha mo nia helekai ala e-hai-baahi ang-gi God, mo nia lagalagamaaloo balumee ala e-helekai kai tilikai go hunu gau bolo ma di “kabemee”.

6:21  Gei hunu gau i-golo e-hai bolo di “kabemee” deenei la-i ginaadou, gei di hagaodi gi-muli, gei digaula gaa-hai digau guu-hula-gee mo-di ala o-di hagadonu. Tumaalia o God gi madalia goodou.