TpiKJPB - Song of Solomon

Chapter 1

1:1  ¶ Song bilong ol song, dispela i bilong Solomon.

1:2  ¶ Larim em givim mi kis wantaim ol kis bilong maus bilong em. Long wanem, laikim tru bilong yu i winim wain.

1:3  Bikos ol gutpela wel i gat marasin bilong yu i gat gutpela smel, nem bilong yu i olsem wel i gat marasin ol i kapsaitim i go ausait, olsem na ol meri i no bin slip wantaim man i laikim yu tru.

1:4  Pulim mi, mipela bai ran bihainim yu. King i bin bringim mi insait long ol rum bilong em. Mipela bai stap amamas na wokim amamas tru long yu, mipela bai holim tingting long laikim tru bilong yu moa long wain. Ol stretpela manmeri i laikim yu tru.

1:5  Mi stap blakpela, tasol fit tru, O yupela ol pikinini meri bilong Jerusalem, olsem ol haus sel bilong Kedar, olsem ol laplap bilong windo bilong Solomon.

1:6  No ken lukluk long mi, bilong wanem, mi stap blakpela, bilong wanem, san i bin lukluk long mi. Ol pikinini bilong mama bilong mi i belhat long mi. Ol i makim mi wasmeri bilong ol gaden wain. Tasol gaden wain bilong mi yet mi no bin lukautim.

1:7  ¶ Tokim mi, O yu husat tewel bilong mi i laikim tru, we yu givim kaikai, we yu mekim lain sipsip bilong yu long malolo long belo. Long wanem, bilong wanem mi mas stap olsem wanpela husat i tanim long sait klostu long ol lain sipsip bilong ol poroman bilong yu?

1:8  Sapos yu no save, O yu husat i naispela moa namel long ol meri, go ausait long rot bilong yu klostu long ol step bilong lek bilong lain sipsip, na givim kaikai long ol pikinini meme bilong yu klostu long ol haus sel bilong ol wasman bilong sipsip.

1:9  Mi bin skelim yu, O laikim tru bilong mi, wantaim wanpela lain bilong ol hos i stap long ol karis bilong Fero.

1:10  Tupela wasket bilong yu i fit tru wantaim ol lain bilong ol bilas i dia tru, na nek bilong yu wantaim ol sen bilong gol.

1:11  Yumi bai wokim bilong yu ol hap arere bilong gol wantaim ol pos bilong silva.

1:12  ¶ Taim king i sindaun long tebol bilong em, spaiknart bilong mi i salim i go ausait smel bilong en.

1:13  Man i stap klostu tru long bel bilong mi tru em i wanpela mekpas bilong mur long mi. Em bai slip olgeta hap long nait namel long tupela susu bilong mi.

1:14  Meri i stap klostu tru long bel bilong mi i stap long mi olsem wanpela lain bung bilong kamfair long ol gaden wain bilong En-gedi.

1:15  Lukim, yu stap naispela, laikim tru bilong mi. Lukim, yu stap naispela. Yu gat tupela ai bilong balus.

1:16  Lukim, yu stap naispela, meri i stap klostu tru long bel bilong mi, yes, gutpela. Na tu, bet bilong yumi i grinpela.

1:17  Ol rigal bilong haus bilong yumi i sida, na ol diwai bilong holim kapa bilong yumi i fir.

Chapter 2

2:1  ¶ Mi stap ros bilong Saron, na lili bilong ol ples daun.

2:2  Olsem lili namel long ol nil, olsem tasol laikim tru bilong mi i stap namel long ol pikinini meri.

2:3  ¶ Olsem diwai epel namel long ol diwai bilong ples diwai, olsem tasol man i stap klostu tru long bel bilong mi i stap namel long ol pikinini man. Mi sindaun aninit long tewel bilong san bilong em wantaim bikpela amamas, na prut bilong em i switpela long test bilong mi.

2:4  Em i bringim mi long haus bilong naispela bikpela kaikai bilong em, na plek bilong em antap long mi em i laikim tru.

2:5  Pasim mi wantaim ol sospen samting i gat liklik maus, givim bel isi long mi wantaim ol epel. Long wanem, mi sik wantaim laikim tru.

2:6  Han kais bilong em i stap aninit long het bilong mi, na han sut bilong em em i holimpas mi.

2:7  Mi givim tok long yupela, O yupela ol pikinini meri bilong Jerusalem, long ol ro, na long ol hain bilong ples kunai, long yupela i no ken kirapim, o kirapim long slip laikim tru bilong mi, inap long em i laik.

2:8  ¶ Nek bilong man i stap klostu tru long bel bilong mi! Lukim, em i kalap kalap i kam antap long ol maunten taim em i kalap kalap antap long ol liklik maunten.

2:9  Man i stap klostu tru long bel bilong mi em i olsem wanpela ro o wanpela yangpela hart. Lukim, em i sanap baksait long banis bilong mipela, em i sanap long ol windo na lukluk i go ausait, taim em i soim em yet namel long banis i luk olsem umben.

2:10  Man i stap klostu tru long bel bilong mi i toktok, na tokim mi, Kirap, laikim tru bilong mi, naispela bilong mi, na kam wantaim mi i go.

2:11  Long wanem, harim, taim bilong bikpela kol i pinis, na ren i pinis na i go pinis.

2:12  Ol plaua i kamap ples klia long dispela graun. Taim bilong singim song bilong ol pisin i kam pinis, na nek bilong balus turtel ol i harim long hap bilong mipela.

2:13  Diwai fik i karim ol grinpela fik bilong en, na ol rop wain wantaim pikinini wain i no strong i givim wanpela gutpela smel. Kirap, laikim tru bilong mi, naispela bilong mi, na kam wantaim mi i go.

2:14  ¶ O balus bilong mi, husat i stap long ol ples bruk bilong ston, long ol ples hait bilong ol lata, larim mi lukim pes bilong yu, larim mi harim nek bilong yu. Long wanem, nek bilong yu i switpela, na pes bilong yu i fit tru.

2:15  Yumi kisim ol foks, ol liklik foks, husat i bagarapim ol rop wain. Long wanem, ol rop wain bilong yumi i gat ol pikinini wain i no strong.

2:16  Man i stap klostu tru long bel bilong mi em i bilong mi, na mi bilong em. Em i kaikai namel long ol lili.

2:17  Inap long tulait i kamap, na ol tewel bilong san i ranawe, tanim, man i stap klostu tru long bel bilong mi, na yu stap olsem wanpela ro o wanpela yangpela hart antap long ol maunten bilong Betar.

Chapter 3

3:1  ¶ Long nait antap long bet bilong mi mi painim em husat tewel bilong mi i laikim tru. Mi painim em, tasol mi no lukim em.

3:2  Mi bai kirap nau, na go nabaut long ol biktaun long ol rot, na long ol rot i op bai mi painim em husat tewel bilong mi i laikim tru. Mi painim em, tasol mi no lukim em.

3:3  Ol wasman husat i go nabaut long biktaun i lukim mi, long husat mi tok, Yupela i lukim em husat tewel bilong mi i laikim tru?

3:4  Em i liklik taim tasol long mi lusim ol, tasol mi painim em pinis husat tewel bilong mi i laikim tru. Mi holim em, na mi no laik lusim em, inap long mi bin bringim em i go long haus bilong mama bilong mi, na i go insait long rum bilong meri husat i kisim bel bilong karim mi.

3:5  Mi givim tok long yupela, O yupela ol pikinini meri bilong Jerusalem, long ol ro, na long ol hain bilong ples kunai, long yupela no ken kirapim, o kirapim long slip laikim tru bilong mi, inap long em i laik.

3:6  ¶ Dispela em i husat, husat i kam ausait long ples i no gat man olsem ol bikpela pos bilong smok, na smel bilong em i bilas wantaim mur na frankinsens, wantaim olgeta paura bilong bisnisman?

3:7  ¶ Lukim bet bilong em, dispela i bilong Solomon. 60 strongpela man bilong pait i stap raun nabaut long en, bilong ol strongpela man bilong pait bilong Isrel.

3:8  Ol olgeta i holim ol bainat, taim ol i stap saveman tru bilong bikpela pait. Olgeta wan wan man i gat bainat bilong em antap long lek bilong em, bilong wanem, ol samting bilong pretim man long nait i stap.

3:9  King Solomon i wokim bilong em yet wanpela karis bilong diwai bilong Lebanon.

3:10  Em i wokim ol bikpela pos bilong en long silva, as bilong en long gol, samting i karamapim dispela long purpelpela, namel bilong en ol i simenim wantaim laikim tru, bilong ol pikinini meri bilong Jerusalem.

3:11  Go ausait, O yupela ol pikinini meri bilong Saion, na lukim king Solomon wantaim hat king bilong em we mama bilong em i putim hat king long em wantaim dispela long de em i marit long kontrak, na long de bilong bel bilong em em i amamas.

Chapter 4

4:1  ¶ Lukim, yu stap naispela, laikim tru bilong mi, lukim, yu stap naispela, yu gat tupela ai bilong balus namel long ol hap gras bilong yu. Gras bilong yu em i olsem wanpela lain meme, dispela i kamap ples klia long maunten Gileat.

4:2  Ol tit bilong yu i olsem wanpela lain sipsip husat gras bilong ol ol i katim stretpela, husat i kam antap bihain long ol i wasim ol, we olgeta wan wan bilong ol i karim twins, na i no gat wanpela i no karim pikinini namel long ol.

4:3  Tupela lip bilong yu i olsem wanpela skalet tret, na toktok bilong yu em i fit tru. Tupela tempel bilong yu i olsem wanpela hap pomigranet namel long ol hap gras bilong yu.

4:4  Nek bilong yu em i olsem taua Devit i wokim bilong putim ol samting bilong pait, we 1,000 plang bilong han i hangamap antap long en, olgeta i plang bilong ol strongpela man bilong pait.

4:5  Tupela susu bilong yu i olsem tupela yangpela ro husat i twins, husat i kaikai namel long ol lili.

4:6  Inap long tulait i kamap, na ol tewel bilong san i ranawe, mi bai kisim mi yet i go long maunten bilong mur, na long liklik maunten bilong frankinsens.

4:7  Yu stap naispela, laikim tru bilong mi, i no gat wanpela mak nogut i insait long yu.

4:8  ¶ Kam wantaim mi i lusim Lebanon, meri bilong mi, wantaim mi i lusim Lebanon. Lukluk i kam long antap bilong Amana, i kam long antap bilong Senir na Hermon, i kam long hul bilong laion, i go long kam maunten bilong ol lepat.

4:9  Yu bin kirapim bel bilong mi nogut tru, susa bilong mi, meri bilong mi, yu bin kirapim bel bilong mi nogut tru wantaim wanpela bilong tupela ai bilong yu, wantaim wanpela sen bilong nek bilong yu.

4:10  Laikim tru bilong yu, susa bilong mi, meri bilongmi, em i naispela moa! Laikim tru bilong yu i gutpela moa hamas long wain! Na smel bilong ol wel i gat marasin bilong yu i gutpela moa long olgeta spais!

4:11  Tupela lip bilong yu, O meri bilong mi, i go daun olsem kom bilong hani. Hani na susu i stap aninit long tang bilong yu. Na smel bilong ol klos bilong yu i olsem smel bilong Lebanon.

4:12  Wanpela gaden i gat banis em susa bilong mi, meri bilong mi, wanpela ai bilong wara i pas, wanpela ai bilong wara i sut ol i pasim.

4:13  Ol samting yu planim bilong yu i wanpela gaden diwai bilong ol pomigranet, wantaim ol gutpela prut, kamfair, wantaim spaiknart,

4:14  Spaiknart na safron, kalamus na sinamin, wantaim olgeta diwai bilong frankinsens, mur na ol alo, wantaim olgeta nambawan spais.

4:15  ¶ Ol i wanpela ai bilong wara i sut bilong ol gaden, wanpela hul wara bilong ol wara i gat laip, na ol liklik wara i kam long Lebanon.

4:16  Kirap long slip, O win bilong hap not, na kam, yu saut. Winim win antap long gaden bilong mi, inaplong ol spais bilong en i ken ran i go ausait. Larim man i stap klostu tru long bel bilong mi kam insait long gaden bilong em, na kaikai ol gutpela prut bilong em.

Chapter 5

5:1  ¶ Mi kam pinis insait long gaden bilong mi, susa bilong mi, meri bilong mi. Mi bin bungim mur bilong mi wantaim spais bilong mi. Mi bin kaikai kom hani bilong mi wantaim hani bilong mi. Mi bin dringim wain bilong mi wantaim susu bilong mi. Kaikai, O ol wantok, dringim, yes, dringim planti moa yet, O meri i stap klostu tru long bel bilong mi

5:2  ¶ Mi slip, tasol bel bilong mi i no slip. Em i nek bilong man i stap klostu tru long bel bilong mi husat i paitim dua, i spik, Opim long mi, susa bilong mi, laikim tru bilong mi, balus bilong mi, meri i no doti bilong mi. Long wanem, het bilong mi i pulap wantaim wara bilong nait, na ol hap gras bilong mi wantaim ol drop bilong nait.

5:3  Mi bin rausim saket bilong mi. Mi bai putim dispela olsem wanem? Mi bin wasim tupela lek bilong mi. Mi bai mekim ol doti olsem wanem?

5:4  Man i stap klostu tru long bel bilong mi i putim han bilong em klostu long hul bilong dua, na ol rop bilong bel bilong mi i kirap long tingim em.

5:5  Mi kirap bilong opim long man i stap klostu tru long bel bilong mi. Na mur i go daun i lusim tupela han bilong mi, na mur i gat switpela smel long ol pinga bilong mi, antap long ol handel bilong lok.

5:6  Mi opim long man i stap klostu tru long bel bilong mi, tasol laikim tru bilong mi i bin surikim em yet, na em i go pinis. Tewel bilong mi i fel taim em i toktok. Mi painim em, tasol mi no inap long painim em pinis. Mi singautim em, tasol em i no givim mi wanpela bekim.

5:7  Ol wasman husat i go nabaut long biktaun i lukim mi, ol i paitim mi, ol i bagarapim mi. Ol wasman bilong ol banis i bin tekewe laplap long pes bilong mi.

5:8  Mi givim tok long yupela, O ol pikinini meri bilong Jerusalem, sapos yupela painim pinis man i stap klostu tru long bel bilong mi, long yupela tokim em, long mi sik wantaim laikim tru.

5:9  ¶ Man i stap klostu tru long bel bilong yu em i wanem samting moa long narapela man i stap klostu tru long bel, O yu husat i naispela moa namel long ol meri? Man i stap klostu tru long bel bilong yu em i wanem samting moa long narapela man i stap klostu tru long bel, inap long yu givim tok long mipela olsem?

5:10  Man i stap klostu tru long bel bilong mi em i waitpela na retpela, nambawan namel long 10,000.

5:11  Het bilong em emi olsem gol i naispela moa, ol hap gras bilong em i stap olsem bus, na blakpela olsem kotkot.

5:12  Tupela ai bilong em i stap olsem tupela ai bilong ol balus klostu long ol riva bilong ol wara i waswas wantaim susu, na i sanap stretpela tru.

5:13  Tupela wasket bilong em i stap olsem wanpela bet bilong ol spais, olsem ol switpela plaua. Tupela lip bilong em i olsem ol lili, taim mur i gat switpela smel i lusim ol i go daun.

5:14  Tupela han bilong em i olsem ol ring gol i sanap wantaim beril. Bel bilong em em i olsem aivori i lait ol i karamapim wantaim ol sapaia.

5:15  Tupela lek bilong em i olsem ol bikpela pos bilong marbel i sanap antap insait long ol hul bilong naispela gol. Pes bilong em em i olsem Lebanon, nambawan tru olsem ol sida.

5:16  Maus bilong em em i switpela moa. Yes, em i naispela olgeta. Dispela em i man i stap klostu tru long bel bilong mi, na dispela em i pren bilong mi, O ol pikinini meri bilong Jerusalem.

Chapter 6

6:1  ¶ Man i stap klostu tru long bel bilong yu i go we, O yu husat i naispela moa namel long ol meri? Man i stap klostu tru long bel bilong yu i tanim i go long wanem sait, inap long mipela i ken painim em wantaim yu?

6:2  Man i stap klostu tru long bel bilong mi i go pinis daun long gaden bilong em, long ol bet bilong ol spais, bilong kaikai insait long ol gaden, na bilong bungim ol lili.

6:3  Mi bilong man i stap klostu tru long bel bilong mi, na man i stap klostu tru long bel bilong mi em i bilong mi. Em i save kaikai namel long ol lili.

6:4  ¶ Yu stap naispela tru, O laikim tru bilong mi, olsem Tirsa, fit tru olsem Jerusalem, samting bilong pretim man nogut tru olsem wanpela ami wantaim ol plek.

6:5  Tanim i go tupela ai bilong yu i lusim mi, long wanem, ol i bin winim mi. Gras bilong yu i olsem wanpela lain meme, dispela i kamap ples klia long Gileat.

6:6  Ol tit bilong yu i olsem wanpela lain sipsip, dispela i waswas pinis i go antap, we olgeta wan wan bilong ol i karim twins, na i no gat wanpela namel long ol i no karim pikinini.

6:7  Olsem wanpela hap pomigranet em ol tempel bilong yu namel long ol hap gras bilong yu.

6:8  I gat i stap 60 kwin, na 80 namba tu lain meri, na ol meri i no bin slip wantaim man i no gat namba bilong kaunim bilong ol.

6:9  Balus bilong mi, meri i no doti bilong mi em i wanpela tasol. Em i wanpela tasol bilong mama bilong em, em i nambawan bilong em husat i karim em. Ol pikinini meri i lukim em, na blesim em. Yes, ol kwin na ol namba tu lain meri, na ol i litimapim nem bilong em.

6:10  Em i husat, husat i save lukluk i go ausait olsem moningtaim, naispela olsem mun, klia olsem san, na samting bilong pretim man nogut tru olsem wanpela ami wantaim ol plek?

6:11  ¶ Mi go daun pinis long gaden bilong ol kain galip bilong lukim ol prut bilong ples daun, na bilong luksave long rop wain i go gutpela tru o nogat, na long ol pomigranet i putim kru o nogat,

6:12  O bipo mi klia long en, tewel bilong mi i mekim mi olsem ol karis bilong Aminadip.

6:13  Kam bek, kam bek, O Sulamait. Kam bek, kam bek, inap long mipela i ken lukluk long yu. Yupela bai lukim wanem samting long dispela Sulamait? Samting olsem lain bilong tupela ami.

Chapter 7

7:1  ¶ Tupela fut bilong yu wantaim ol su i naispela tru moa, O pikinini meri bilong hetman! Ol skru bilong ol antap bilong ol lek bilong yu i olsem ol bilas i dia tru, wok bilong tupela han bilong wanpela wokman i gat save stret.

7:2  Bitono bilong yu i olsem wanpela raunpela kap, dispela i no sot long strongpela wara. Bel bilong yu i olsem wanpela hip wit pas nabaut wantaim ol lili.

7:3  Tupela susu bilong yu i olsem tupela yangpela ro husat i twins.

7:4  Nek bilong yu i olsem wanpela taua aivori. Tupela ai bilong yu i olsem ol liklik wara bilong pis long Hesbon, klostu long dua bilong banis bilong Bat-rabim. Nus bilong yu i olsem taua bilong Lebanon, dispela i lukluk i go long Damaskas.

7:5  Het bilong yu antap long yu i olsem Karmel, na gras bilong het bilong yu olsem purpelpela. Ol i holim king long ol ples win.

7:6  Yu stap naispela na gutpela moa, O laikim tru, bilong bringim amamas!

7:7  Dispela longpela bilong yu i olsem wanpela diwai palmen, na tupela susu bilong yu i olsem ol lain bung bilong ol pikinini wain.

7:8  Mi tok, Mi bai go antap i go long diwai palmen, mi bai holimpas ol namel bilong en. Nau tu tupela susu bilong yu bai stap olsem ol lain bung bilong rop wain, na smel bilong nus bilong yu olsem ol epel.

7:9  Na antap bilong insait bilong maus bilong yu i olsem nambawan wain bilong em husat i stap klostu tru long bel bilong mi, dispela i go daun switpela, na mekim ol lip bilong ol dispela husat i slip olgeta bilong toktok.

7:10  ¶ Mi bilong man i stap klostu tru long bel bilong mi, na laik bilong em em i kam long mi.

7:11  Kam, man i stap klostu tru long bel bilong mi, larim yumi go ausait i go long ples kunai. Larim yumi stap long ol vilis.

7:12  Larim yumi kirap long moning tru i go long ol gaden wain. Larim yumi luksave long sapos rop wain i go gutpela tru, o long pikinini wain i no strong bai kamap ples klia o nogat, na ol pomigranet i putim kru ausait. Long dispela hap bai mi givim long yu ol laikim tru bilong mi.

7:13  Ol mandrek i givim smel na long ol dua bilong banis bilong yumi i gat olgeta kain kain gutpela prut, nupela na olpela, dispela mi bin bungim i stap bilong yu, O man i stap klostu tru long bel bilong mi.

Chapter 8

8:1  ¶ O em i gutpela sapos yu stap olsem brata bilong mi, husat i bin pulim susu long susu bilong mama bilong mi! Taim mi ken painim yu ausait, mi laik givim kis long yu. Yes, ol i no ken tingim mi olsem mi samting nating.

8:2  Mi laik stiaim yu, na bringim yu insait long haus bilong mama bilong mi, husat bai skulim mi. Mi laik mekim yu long dringim wain i gat ol spais bilong ol wara bilong pomigranet bilong mi.

8:3  Han kais bilong em i mas stap aninit long het bilong mi, na han sut bilong em i mas holimpas mi.

8:4  Mi givim tok long yupela, O ol pikinini meri bilong Jerusalem, long yupela no kirapim, o kirapim long slip laikim tru bilong mi, inap long em i laik.

8:5  ¶ Dispela em i husat, husat i lusim ples i no gat man i kam antap, taim em i lindaun long man i stap klostu tru long bel bilong em? Mi kirapim yu aninit long diwai epel. Long dispela hap mama bilong yu i karim yu. Long dispela hap em i bringim yu i kam ausait husat i karim yu.

8:6  Putim mi olsem wanpela mak antap long bel bilong yu, olsem wanpela mak antap long han bilong yu. Long wanem, laikim tru em i strongpela olsem dai. Pasin jeles i amamas long givim pen olsem matmat. Ol sakol bilong en i ol sakol bilong paia, dispela i gat wanpela paia i strong nogut tru moa.

8:7  Planti ol wara i no inap kilim i dai laikim tru, na tu ol tait i no inap daunim dispela olgeta. Sapos wanpela man i laik givim olgeta kago bilong haus bilong em bilong kisim ples bilong laikim tru, dispela bai kisim nem nogut olgeta.

8:8  ¶ Mipela i gat wanpela liklik susa, na tupela susu bilong em i no bikpela. Mipela bai mekim wanem samting bilong helpim susa bilong mipela long dispela de, taim em bai gat man i askim long kisim em?

8:9  Sapos em i wanpela banis, yumi bai wokim antap long em wanpela haus king bilong silva. Na sapos em i wanpela dua, yumi bai raunim bilong pasim em wantaim ol plang bilong sida.

8:10  Mi stap wanpela banis, na tupela susu bilong mi i olsem ol taua. Nau mi stap long tupela ai bilong em olsem wanpela husat i painim pinis gutpela amamas.

8:11  Solomon i gat wanpela gaden wain long Beal-hamon. Em i lusim dispela gaden wain i go long han bilong ol wasman bilong baim. Olgeta wan wan, bilong baim prut bilong en, i mas bringim 1,000 hap silva.

8:12  Gaden wain bilong mi, dispela i bilong mi, i stap long ai bilong mi. Yu, O Solomon, i mas kisim 1,000, na ol dispela husat i lukautim prut bilong en 200.

8:13  ¶ Yu husat i stap long ol gaden, ol poroman i harim long nek bilong yu. Mekim mi long harim dispela.

8:14  Hariap, man i stap klostu tru long bel bilong mi, na yu mas stap olsem long wanpela ro o long wanpela yangpela hart antap long ol maunten bilong ol spais.