Kapingamarangi - Song of Solomon

Chapter 1

1:1  Nia daahili koia e-humalia i-nia daahili a Solomon.

1:2  O malaungudu e-hongihongi au hagatau, do aloho le e-mada-kala i-nia waini.

1:3  Goe e-haga-langahia-mai gi-di-au do hauiha kala, e-haga-langahia go do ingoo. Di ahina e-mee di-tuu dono aloho i-di-goe ai.

1:4  Lahia au madalia goe, gidaua gaa-llele gi-daha. Goe gaa-hai di king ni-oogu, gaa-lahi au gi-lodo doo ruum. Gidaua ga-tenetene ngaadahi, ga-inu tau waini mo-di dagadaga-tene i tau aloho. Deelaa di mee nia ahina huogodoo e-aloho-ai i-di-goe!

1:5  Nia ahina o Jerusalem, au e-luuli gei au e-madanga, au e-luuli gadoo be nia hale-laa i-di anggowaa o Kedar, gei e-madamada gadoo be nia mee dau-hale ala i-lodo di hale-king o Solomon.

1:6  Hudee hagahuaidu-ina au i tadunga o dogu gili, idimaa dogu gili ne-haga-luuli go di laa. Ogu duaahina-daane ne-hagawelewele-mai gi-di-au, guu-hai au gi-ngalua i-lodo di hadagee-waini. Au dogu madagoaa e-benebene dogu huaidina ai.

1:7  Dogu aloho, hagia-mai be dehee di gowaa dela e-lahi ginai au siibi? Dehee di gowaa dela e-hagamalu-ai digaula gi-daha mo-di laa o-di oodee? Au e-hai gi-halahala goe i-lodo nia siibi o digau hagaloohi siibi ala i-golo eiaha?

1:8  Di ahina kaedahi humalia, goe e-de-iloo di gowaa? Daudalia-adu nia lohongo wae o-nia siibi gi-gidee-goe di gowaa dela e-humalia gi au kuudi, i-baahi nia hale-laa o digau hagaloohi siibi.

1:9  Goe go dogu aloho, nia daane e-hidigaagaa huoloo nadau lodo adu gi-di-goe gadoo be nia hoodo-daane ala e-hidigaagaa ang-gi nia hoodo-ahina ala e-dagidagi nia waga-dauwa hongo-henua di king o Egypt.

1:10  Nia ngaahulu o do libogo e-mmaadanga i-di gili o gauwae, gei e-daudau-eia i-di gili doo uwa gadoo be nia hadu hagalabagau.

1:11  Gimaadou gaa-hai doo hau gi-nia goolo, gaa-humu gi-nia silber.

1:12  Dogu king guu-moe i-hongo dono lohongo maluu. Di ahiaalangi guu-kala i-di hauiha o dagu lolokala.

1:13  Dogu aloho e-hauiha kala gadoo be-di ‘myrrh’ i dono madagoaa e-moe gi-hongo ogu uu.

1:14  Dogu aloho le e-hauiha gadoo be nia akai lodo-henua ala ma-ga-moholoholo i-lodo nia hadagee-waini o Engedi.

1:15  Dogu aloho, goe e-madanga huoloo, o golomada e-maahina mo do aloho.

1:16  Dogu aloho hagalabagau, goe e-madanga huoloo, gei gu-hai au gi-tenetene huoloo! Tau moenge la-go nia geinga tolo aanei.

1:17  Nia tanga o tau hale la-go nia laagau-‘cedar’, gei di haaligi i-nua la-go nia laagau-‘cypress’.

Chapter 2

2:1  Au di akai lodo-henua o Sharon, di akai o lodo di gowaa mehanga gonduu.

2:2  Dogu aloho ma-ga i-baahi nia ahina, le e-hai gadoo be taladala i-baahi nia laagau duduia.

2:3  Dogu aloho i-mehanga nia daane ala i-golo le e-hai gadoo be-di laagau aabele i-mehanga nia laagau lodo-geinga. Au e-hiihai e-nohonoho i-lala dono malu, gei ono huwa e-maangala i-lodo dogu ngudu.

2:4  Mee guu-lahi au gi dono ruum hai-hagamiami, gaa-hudi tagallebe o-di aloho gi ogu nua.

2:5  Haga-maaloo-aga au gi-nia golee-‘raisin’, ga-haangai au gi-nia aabele bolo gii-hai ogu mahi, i-di au gu-bagege i-lodo dogu aloho.

2:6  Di lima dau-ihala o-maa i-lala dogu libogo, di lima dau-donu o-maa e-haga-daledale au.

2:7  Nia ahina o Jerusalem, heia di-godou hagababa mai gi-di-au, doange-mai gi-di-au i-di ingoo o-nia ee ala e-llele huoloo mo nia manu-‘gazelle’ bolo goodou hagalee hagadeaadee di-mau aloho.

2:8  Au e-longono di lee o dogu aloho. Mee e-lele-mai i tomo nia gonduu e-hoiaa-mai gi-di-au.

2:9  Dogu aloho le e-hai gadoo be-di manu-‘gazelle’, gadoo be-di ee-daane digi madua. Mee e-duu i-baahi di abaaba e-haganuunuu laa-lodo di bontai dulii, e-daumada laa-lodo di ‘screen’ gi-lodo di ruum.

2:10  Dogu aloho e-leelee-mai gi-di-au. Hanimoi-laa, dogu aloho, hanimoi i ogu muli.

2:11  Di madagoaa magalillili la-gu-doo gi-daha. Nia uwa gu-hagalee doo.

2:12  Nia akai gu-moholoholo i-lodo henua. Guu-dae-mai di madagoaa dadaahili: taahili o-nia mwuroi la-gu-longono-mai i-nia gowaa maalama.

2:13  Nia huwa-‘fig’ gu-daamada gaa-lleu. Di ahiaalangi guu-kala i-di hauiha akai o-nia laagau waini. Hanimoi-laa gi-di-au, dogu aloho, hanimoi i ogu muli.

2:14  Goe e-hai gadoo be-di mwuroi dela e-balabala hagammuni i-lodo nia bongoo hadugalaa. Au e-hiihai e-mmada gi o hadumada humalia, ge e-hagalongo gi doo lee humalia.

2:15  Gumidia nia manu ‘fox’ lodo-geinga ala lligi gi-dee lloomoi e-hunahuna tau hadagee-waini dela e-tomo.

2:16  Dogu aloho la di mee ni-aagu, gei au di mee ni mee. Mee e-haangai ana siibi i-mehanga nia daladala,

2:17  gaa-dae-loo gi-di angiangi magalillili o-di luada ga-iliili mai, gei di bouli ga-ngudu-mai ga-hagalee. Hanimoi gi-muli go dogu aloho gadoo be-di manu-‘gazelle’, gadoo be tama ee-daane i-hongo nia gonduu Bether.

Chapter 3

3:1  Di madagoaa au guu-moe i-hongo dogu moenge hagadau nia boo, gei au e-midi i dagu dangada dela e-aloho ai. Au nogo halahala a-mee, gei digi gida.

3:2  Au gu-hoologi laa-lodo di waahale, i-hongo nia ala mo mehanga nia hale, au gu-halahala dagu dangada dela e-aloho-ai, gei au gu-deemee di-gida a-mee.

3:3  Digau hagaloohi o-di waahale gu-gidee-ginaadou au. Au ga-heeu gi-digaula, “Goodou gu-gidee dogu aloho?”

3:4  Dogu hagatanga-hua gi-daha mo digaula, gei au gu-gidee a-mee. Au gaa-kumi a-mee, digi diiagi-loo, gaa-lahi a-mee gi-di ruum dela ne-haanau-iei au i-di hale dogu dinana.

3:5  Nia ahina o Jerusalem, hagababa-mai gi-di-au, doange-mai gi-di-au i-di ingoo o-nia ee ala e-llele huoloo mo nia manu-‘gazelle’ bolo goodou hagalee haga-deaadee di-mau aloho.

3:6  Ma di-aha dela e-hanimoi i-lodo di anggowaa gadoo be tuludulu huiahi, dela e-hauiha lolokala gi-nia ‘incense’ mo nia ‘myrrh’, nia ‘incense’ ala e-huihui go digau kokoodai mee?

3:7  Solomon e-hanimoi, e-laha-mai i-hongo dono lohongo-king. Digau dauwa e-modoono e-madaloohi a-mee, ala go digau e-kaedahi i Israel.

3:8  Digaula huogodoo koia e-iloo di hai-hegau gi tulumanu-dauwa, ala go digaula ala e-aali i-di hai-dauwa. Tangada-nei mo tangada-nei i digaula guu-hau ginai tulumanu-dauwa ga-madaloohi-laa i-di boo.

3:9  Solomon e-dagidagi i-hongo dono lohongo-king ne-hau gi-nia laagau koia e-humalia.

3:10  Nia waduu o di-maa le e-hii ono gili gi-nia silber. Hongo di-maa e-gahu gi-di gahu guu-lili ginai nia goolo. Laa-lodo e-hii gi-nia gahu mmee-uli gu-llanga go nia ahina o Jerusalem haga-humalia huoloo.

3:11  Nia ahina o Zion, lloomoi e-mmada gi King Solomon. Mee e-ulu dono goobai king dela ne-hagauda go dono dinana gi-hongo di libogo o-maa i-di laangi o mee ne-hai dono lodo, go di laangi hagatenetene mo-di manawa lamalia o-maa.

Chapter 4

4:1  Goe e-madamada huoloo, go dogu aloho! O golomada e-mmada-mai haga-humalia i-lodo dau mee gahu-golomada. Nia ngaahulu o do libogo e-dehedehee gadoo be-di hagabuulinga kuudi ma-ga-llele-ia gi-lala i-di gili nia dama gonduu o Gilead.

4:2  Oo niha e-kene hila-mmaa gadoo be nia siibi ala hua dogo dahi nadau gili, gaa-lawa ga-gaugau. Deai di niha ne-doo ai, huogodoo e-madatau hagahumalia.

4:3  O malaungudu e-hai gadoo be taula gahu mmee, koia e-madanga i do madagoaa ma-ga-leelee. O gauwae e-maahina mai i-lodo dau mee gahu-golomada.

4:4  Doo uwa e-labubudu ge malallali gadoo be-di angulaa a David, mo dono hau-uwa e-hai gadoo be nia mee duuli e-mana.

4:5  Oo uu e-hai gadoo be nia manu-‘gazelle’, nia hagahaanau ee e-lua e-miami i-lodo di waa daladala.

4:6  Au gaa-noho i-hongo di gonduu ‘myrrh’, di gonduu lolokala, gaa-dae-loo gi-di angiangi magalillili o-di luada ma-ga-iliili-mai mo dono bouli e-maa gi-daha.

4:7  Dogu aloho, goe e-madanga huoloo, nia mee huogodoo i doo gili guu-hai donu!

4:8  Dagu ahina hai-lodo, hanimoi gi-daha mo nia gonduu Lebanon, gidaua gaa-hula gi-daha mo Lebanon. Gidaua ga-kaga-ia gi-daha mo-nia ulu di Gonduu Amana, mo di Gonduu Senir, mo-di Gonduu Hermon ala e-noho-ai nia laion mono ‘leopard’.

4:9  Dogu aloho mo dagu ahina hai-lodo, o golomada mo do hau-uwa dela e-hau-iei goe gu-haga-ngalungalua dogu manawa.

4:10  Dogu aloho mo dagu ahina hai-lodo, do aloho e-hagatenetene au, do aloho e-koia e-kala i-nia waini. Dau lolokala koia e-kala i-nia lolokala ala i-golo.

4:11  Di kala o-nia mee-maangala laagau la-gu i-di gili o malaungudu, dogu aloho, do holole e-hai gadoo be nia milugu mono mee-maangala laagau i-lodo dogu ngudu. O goloo gahu e-llamu i-di hauiha kala o Lebanon.

4:12  Dogu aloho mo dagu ahina hai-lodo, goe la di hadagee mo dono dama monowai gu-abaaba, gu-duuli hagammuni gi-daha mo nia daangada,

4:13  deelaa di gowaa e-tomo humalia-ai nia laagau lligi. E-tomo humalia gadoo be-di waa laagau-‘pomegranate’ e-huwa ono huwa humalia huoloo, gadoo be nia laagau hauiha ‘henna’ mono ‘nard’,

4:14  nia laagau lolokala ‘saffron’, mo ‘calamus’, mo nia ‘cinnamon’, mono hagadilinga mee hagakala guu-logo i-di gowaa deelaa. Nia laagau ‘myrrh’ mono ‘aloe’ e-tomo i-golo mono hagadilinga lolo-kala ala i-golo.

4:15  Nia monowai e-haga-magalillili tadagee deelaa, nia dama monowai mmidi, mono dama aloalo e-hali-ia i-nia Gonduu Lebanon.

4:16  Di madangi o ngeia, ala-aga! Di madangi o ngaaga, ilihia-mai dagu hadagee, heia di ahiaalangi gii-kala. Dogu aloho gi-hanimoi gi dana hadagee gi-miami-mai i-nia huwa-laagau ala koia e-humalia.

Chapter 5

5:1  Dogu aloho mo dagu ahina hai-lodo, au gu-ulu gi-lodo dagu hadagee. Au e-hagabudu agu mee hagakala mono ‘myrrh’. Au e-gai agu mee-maangala laagau mo-di inu agu waini mono milugu. Miami mo-di inuinu, goolua ala e-hagadau aaloho, gaa-dae-loo gi-di-gulu madagoaa gu-libaliba i di-gulu aloho!

5:2  Dogu madagoaa nogo kii, dogu manawa la-nogo ala-hua. Au guu-midi bolo dogu aloho e-dugidugi dogu bontai. Haga-ulu-ina-adu au, go dogu aloho, go dagu mwuroi. Dogu libogo la-guu-tiu i-nia magalillili, gei nia ngaahulu dogu libogo la-gu-huungina i-nia madaua honihoni.

5:3  Au gu-liagi ogu goloo gi-daha, gei au belee hai labelaa ogu goloo eiaha? Ogu wae la-guu-tono, gei au belee haga-dogolia labelaa nia maa eimaha?

5:4  Dogu aloho ne-kumi di bontai, gei au gu-malali-huli bolo mee gu-hoohoo-mai-loo.

5:5  Au gu-togomaalia ga-haga-ulu-mai a-mee gi-lodo. Ogu lima la-guu-hunu gi-nia ‘myrrh’, ogu madaalima la-guu-hunu gi-nia wai ‘myrrh’ i dogu madagoaa dela e-kumi di bontai.

5:6  Au ga-huge-adu di bontai gi dogu aloho, gei mee guu-hana. Au gu-hiihai huoloo bolo au ga-hagalongo gi-di lee o-maa! Au gu-halahala a-mee, gei digi gida. Au gu-gahigahi a-mee gei dono hui ai.

5:7  Digau hagaloohi di waahale gu-gidee-ginaadou au, digaula gu-hagamamaawa au gu-hagahuaidu au. Digau hagaloohi di ngudu di abaaba gu-hahaahi dagu mee gahu golomada.

5:8  Goodou go nia ahina o Jerusalem, hagababa-mai gi-di-au bolo di madagoaa ma-ga-gidee-goodou dogu aloho, gei goodou ga-hagi-anga gi mee bolo au gu-bagege huoloo i dogu aloho.

5:9  Kooe go di ahina dela e-kaedahi e-humalia, e-hai behee, do aloho le e-hai-gee mo digau ala i-golo? Ma di-aha dela e-humalia-iei mee gii-hai di-madau hagababa adu gi-di-goe?

5:10  Dogu aloho le e-madanga ge maaloo. Go mee-hua e-kaedahi i-lodo digau e-madangaholu mana.

5:11  Ono hadumada e-maahina be nia baalanga-mmee, gei guu-mmili gi-malali. Nia ngaahulu o-maa e-beabeau ge luuli gadoo be-di manu mamaangi-‘raven’.

5:12  Nia golomada o-maa e-mmaadanga gadoo be nia mwuroi i-baahi tama-monowai mmidi, e-mmaadanga gadoo be nia mwuroi gu-gaugau gi-nia milugu gaa-noho-laa i-baahi tama-monowai.

5:13  Nia gauwae o-maa e-mmaadanga gadoo be dahi hadagee gu-deeoo akai mono laagau hagakala-mee. Di gili ono malaungudu le e-hai gadoo be nia madaladala gu-hagatiu gi-nia wai ‘myrrh’.

5:14  Nia lima o-maa gu-haganoho haga-humalia. Nia madaalima o-maa e-ulu nia buulei guu-wanga ginai nia hadu hagalabagau dono gili. Tuaidina o-maa e-malallali gadoo be-di ‘ivory’ guu-wanga ginai nia ‘sapphire’.

5:15  Nia gadawae o-maa e-hai gadoo be nia duludulu ‘alabaster’ ne-hagatau gi-hongo di hagamau ne-hai gi-nia goolo. Tuaidina o-maa e-maaloo gadoo be nia Gonduu Lebanon ala e-tomo-ai nia laagau-‘cedar’ lloo-ehaa nonua.

5:16  Di ngudu o-maa e-kala ma-gaa-hongi. Nia mee huogodoo i-di gili o-maa e-haga-manawa-tenetene au. Goodou go nia ahina o Jerusalem, deenei di hagadilinga o-maa, go dogu aloho.

Chapter 6

6:1  Di ahina kaedahi humalia, do aloho la-guu-hana gi-hee? Hagia-mai be mee ne-hana laa-hee, gei gimaadou ga-hagamaamaa goe e-halahala a-mee.

6:2  Dogu aloho la-guu-hana gi dana hadagee i-di gowaa e-tomo-ai nia laagau-‘balsam’. Mee e-haangai ana siibi mo-di hadihadi ana akai.

6:3  Dogu aloho la ni-aagu, gei au ni mee. Mee e-haangai ana siibi i-mehanga daladala.

6:4  Dogu aloho, do madanga e-hai gadoo be Jerusalem, e-humalia gadoo be-di waahale Tirzah, mo do hagadilinga le e-humalia gadoo be nia waahale llauehe aanei.

6:5  Huluhia o golomada gi-daha mo au, o golomada le e-hai au gi-magedaa. Nia ngaahulu do libogo le e-gagaalege gadoo be-di buini kuudi ala ma-ga-llele-ia i-di gili nia gonduu o Gilead.

6:6  Oo niha e-kene gadoo be-di buini siibi ala dogo lawa di-gaugau. E-dahi niha ne-doo ai, huogodoo e-madatau hagahumalia.

6:7  O gauwae e-maahina-mai i-tua doo mee gahu-golomada.

6:8  Di king gi-heia ono lodo e-modoono, ge huwowalu lodo-hege, mo ana dama-ahina dogologowaahee dono hulu ai!

6:9  Gei au dagu dangada hua e-dahi dela e-aloho-iei au, dela e-madanga gadoo be-di mwuroi. Mee tama-ahina hua e-dahi o dono dinana, tama-ahina dela e-mohoni ginai dono dinana. Nia ahina huogodoo e-mmada gi mee, e-hagaamu a-mee. Nia lodo donu mo nia lodo-hege o-di king e-dadaahili hagahagaamu a-mee.

6:10  Tangada la-koai deenei, dela e-daba-mai ono golomada gadoo be-di heniheni? Mee e-madanga ge maahina gadoo be-di laa be-di malama.

6:11  Au ne-haneia gi-lala i-mehanga nia laagau-‘almond’ belee mmada nia laagau lligi ala e-tomo i-mehanga gonduu, gi-gidee labelaa nia lau-laagau hoou ala e-matilitili-mai i-di gili nia laagau-‘grape’ mo nia akai laagau-‘pomegranate’ ala gu-moholoholo.

6:12  Au gu-bolebole mo-di tenetene. Goe guu-hai au gi-hagamahidi ogu lodo ang-gi di aloho, gadoo be tangada deledele waga-dauwa hongo-henua ma-ga-hagamahidi gi tauwa.

6:13  Gaalege, gaalege, go tama-ahina o Shulam, gi-mmada-adu gimaadou gi-di-goe dela e-gaalege. Goodou e-aha ala e-hiihai e-daumada au e-gaalege i-mehanga nia goolongo dangada ala e-mmada?

Chapter 7

7:1  Tama-ahina goe e-madanga hualaa behee! Oo wae e-humalia huoloo ma-ga-ulu nia hiiwae. Nia mogogo o gadawae e-hai gadoo be-di moomee ni tangada hihi-ada ne-hai.

7:2  Di boolo i-golo dela e-deemee di-odi ono waini gu-hagakala. Di uu-‘wheat’ i-golo dela e-haganiga dono gili gi-nia akai daladala.

7:3  Oo uu le e-hai be tagahaanau ee, e-hai labelaa be nia manu-‘gazelle’ e-lua.

7:4  Doo uwa e-hai gadoo be-di angulaa ne-hai gi-nia ‘ivory’. O golomada e-hai gadoo be nia monowai bungubungu o Heshbon, ala e-hoohoo gi-di ngudu di bontai di waahale damana deelaa. Doo uhi e-madanga gadoo be-di angulaa o Lebanon dela e-hagaloohi Damascus.

7:5  Do libogo gu-daahi gi-nua guu-hai be-di Gonduu Carmel. Nia ngaahulu do libogo ne-bini, e-dabadaba be-di gahu tilig dela koia e-humalia. Di madanga o-nia maa e-mee-hua di-lawalawa di king gi-dee-hana.

7:6  Goe e-madanga hualaa behee! Goe gu-dohu-anga i-di hagatenetene o-di aloho.

7:7  Di ngalungalua o do huaidina e-hai gadoo be-di niu, gei oo uu la-go nia golooloo o-di niu.

7:8  Au gaa-gaga di niu, gaa-hagi nia huwa o di-maa. Mai gi-di-au, oo uu le e-hai gadoo be nia golooloo ‘grape’, nia madangi o doo dogi e-hauiha o-di kala o-nia aabele,

7:9  ge doo ngudu e-kala gadoo be nia waini ala koia e-kala. Heia-laa nia waini gii-mmidi haga-huudonu gi dogu aloho, gii-hali gi-hongo ono malaungudu mo ono niha.

7:10  Au di mee ni dogu aloho, gei mee e-hiihai-mai gi-di-au.

7:11  Hanimoi, go dogu aloho, gidaua gaa-hula gi-lodo henua, gaa-noho boo i-lodo nia waahale lligi ala i-golo.

7:12  Gidaua gaa-aala hagaluada-loo ga-madamada gi-nia laagau-‘grape’ be nia maa gu-daamada di-tomo, be gu-daamada di-mahanga gi-daha, be nia laagau-‘pomegranate’ la-gu-mahangahanga. Deelaa di gowaa e-dugu-adu-ai dogu aloho gi-di-goe.

7:13  Goe ga-hagadungu-iha di hauiha kala o-nia laagau-‘mandrake’, mo nia hagadilinga huwa-laagau ala e-hoohoo-mai gi tau bontai. Dogu aloho, au gu-benebene ogu hagatenetene pobo mo ogu hagatenetene hoou adu gi-di-goe.

Chapter 8

8:1  Au bolo goe gii-hai hualaa tuaahina-daane donu ni-oogu, dela ne-haga-uu go dogu dinana gi ono uu. Maa nei bolo guu-hai beelaa, dogu madagoaa ga-heetugi-adu gi-di-goe i-hongo di ala gaa-hongi goe, gei deai tangada ga-haga-balumee au gi-di hai deenei ai.

8:2  Au gaa-lahi goe gi-di hale o dogu dinana, gei goe ga-aago au gi-di hai o-di aloho. Au ga-gowadu gi-di-goe nia waini ala gu-haga-kala, mo nia waini o-di laagau-‘pomegranate’ gi-inumia.

8:3  Doo lima dau-ihala i-lala dogu libogo, gei doo lima dau-donu e-haga-daledale au.

8:4  Nia ahina o Jerusalem, heia-mai di-godou hagababa bolo goodou hagalee haga-deaadee di-mau aloho.

8:5  Ma goai dela e-hanimoi mai di anggowaa, e-kumi nau lima mo dono aloho ga-loomoi-laa? Au ne-hangahanga goe i-lala di laagau aabele, i-di gowaa dela ne-haanau-iei goe.

8:6  Hai-dia do manawa gi-daha mo digau ala i-golo, haga-mahuge-ina-hua mai gi-di-au. Goe hudee kumi dangada gee gi-lodo oo lima i-daha mo au. Di aloho le e-maaloo-dangihi gadoo be-di made. Di haingadaa o-di aloho le e-maaloo-dangihi gadoo be-di made. Ma e-mee-hua di daba e-ulaula gaa-wele gadoo be-di ahi ga-meheuheu.

8:7  Nia wai e-deemee di-diinai di-maa. Di labagee hogi e-deemee di-hagaholi di-maa gii-made. Gei di-maa tangada gaa-hai bolo ia e-hui di aloho gi ono maluagina, go dono haga-balumee go nia daangada la-hua deelaa gaa-kae koia.

8:8  Gimaadou di-madau duaahina-ahina dulii i-golo, nia uu o-maa e-lligi-hua. Dehee di-madau hai e-hai gi mee maa tama-daane ga-hanimoi e-dangi gi-mee e-lodo ginai?

8:9  Dolomaa mee e-hai be-di abaaba, gei gimaadou gaa-hau di angulaa silber ang-gi mee. Ge dolomaa mee e-hai be-di bontai o-di waahale, gei gimaadou ga-duuli a-mee gi-nia laubaba laagau-‘cedar’.

8:10  Au go di abaaba, gei ogu uu go nia angulaa o di-maa. Dogu aloho le e-iloo-ia bolo di gowaa dela e-gidee-au dogu noho-baba mo-di aumaalia la dela i dono baahi.

8:11  Solomon dana hadagee-waini i-lodo di gowaa dela e-hagaingoo bolo Baal=Hamon. Digau hai hadagee i-golo e-hai-hegau i-di maa, malaa tangada e-dahi e-hui gii-mee nia bahihadu silber e-mana.

8:12  Solomon la-gi-benebene ana bahihadu silber e-mana, gei digau hai hadagee la-gi-benebene nadau silber e-lua-lau, deelaa di-nadau duhongo. Gei au dagu hadagee waini donu i-golo!

8:13  Dogu aloho, au e-hiihai e-hagalongo gi doo lee e-hanimoi i-lodo di hadagee. Ogu ihoo e-hiihai e-hagalongo gi doo lee e-leelee.

8:14  Dogu aloho, hanimoi gi-di-au gadoo be-di manu-‘gazelle’, gadoo be-di manu-ee daane ma-ga-hanimoi i-hongo nia gonduu ala guu-dogi gi-nia laagau hagakala-mee nonua.