UyCyr - Song of Solomon

Chapter 1

1:1  Бу нәзмә Сулайманға мәнсүптур, Дуниядики әң есил нәзмидур. Отлуқ ләвлириңдә сөйгин сән мени, Шараптин шерин билимән муһәббитиңни.

1:2  Әтириңдин чечилар хуш пурақлар, Шөһритиң пурақлиқ майдәк тарқилар, Шуңа сени сөйиду қизлар.

1:3  Җүр, қачайли, елип кәт мени, Еһ падишайим, елип киргин һоҗраңға мени. Ей падишайимиз, Шатлинимиз хошал болуп сениңдин, Сөйгүңни махтаймиз артуқ шараптин. Һәҗәплинәрлик әмәстур қизларниң сени сөйүши, Һәқлиқтур уларниң саңа ашиқ болуши.

1:4  Әй Йерусалим қизлири, гөзәлдурмән қара болсамму, Қедар хәлқиниң чедирлиридәк қара болсамму, Чирайлиқмән Сулайманниң пәрдилиридәк.

1:5  Һәйран болмаңлар өңүмгә қарап, Қарилиғимдин қаримайсиләр бәлким маңа, Чүнки терилирим көйгәндур аптапта. Аччиқлинип маңа акилирим, Ишләтти мени үзүмзарлиқта, Пурсәт бәрмәй қарашқа өз беғимға.

1:6  Әй сөйүмлүгүм, ейтқина маңа, Қойлириңни отлитисән қәйәрләрдә? Қәйәрдә дәм алдурисән чиңқи чүш мәзгилидә? Ейтмисаң издәймән сени уятсиз аяллардәк. Достлириңниң падилири отлиған йәрләрдә.

1:7  Әй гөзәлләрниң гөзили, Һәҗәва, билмәмсән у йәрни? Ундақта падамниң изидин меңип, Падичилар чедириниң йенида баққайсән өшкилириңни.

1:8  Еһ амриғим, Охшайсән Пиръәвнниң җәң атлири арисидики байталға.

1:9  Нәқәдәр гөзәл һалқилириң пақиришидин мәңизлириң, Нәқәдәр чирайлиқ үнчә-маҗан асқан боюнлириң.

1:10  Мән саңа күмүчтин көзләр қоюлған, Алтундин зебу-зенәт ясап беримән.

1:11  Падишайим ямпашлап ятқинида, Хушбой әтирлирим һидини чачатти әтрапида.

1:12  Сөйүмлүгүм мурмәккидәк гоя, Қонуп қалар көксилирим арисида.

1:13  Қәдирлигим хенә гүлидур гоя, Ечилған Енгәди үзүмзарлиғида.

1:14  Еһ амриғим, чирайлиқсән нәқәдәр, Гөзәлдур көзүң кәптәр кәби шу қәдәр.

1:15  Еһ ашиғим, сән нәқәдәр қамәтлик, Сән нәқәдәр сөйүмлүк, Көрпимиздур йешил чимәнлик.

1:16  Кедирдин ясалғандур өгүзимизниң лимлири, Арчидур униңға йепилған василири.

Chapter 2

2:1  Мән гоя бир явайи гүлмән ечилған далада, Аддийғинә бир чечәкмән өскән гоя җилғида.

2:2  Турар мениң амриғим қизлар ара, Чечәклигән қизилгүлдәк тикән ара.

2:3  Турар мениң ашиғим жигитләр арисида, Худди өскән алма дәриғидәк орман ара. Шерин тетийду униң мевиси маңа, Дилим яйрайду олтарсам сайисида.

2:4  У башлап мени меһманханисиға, Ләпилдәтти сөйгү туғини бешимда.

2:5  Кишмиш билән қувәт бәр маңа, Алма билән роһландур мени, Чүнки һалсиз болдум ишқи отуңда.

2:6  Бешим астида униң сол қоли, Оң қолида қучақлар мени.

2:7  Еһ Йерусалим қизлири, Өтүнәй силәрдин, Ойғатмаңлар даладики мараллар вә җәрәнләрни, Вақти кәлмигичә қозғатмаңлар муһәббәтни.

2:8  Аңлаватимән ашиғимниң авазини! Қара, у келиватиду ешип тағлардин, Ойнап өтүп идирлардин.

2:9  Ашиғим худди җәрән, кейиктәк Өйүмниң әтрапида жүриду. У деризиләрдин қарайду, Көзнәкләрдин марайду.

2:10  «Тур орнуңдин амриғим, җүр кәйнимдин гөзилим», Дәйду маңа ашиғим,

2:11  «Мана, қиш өтти, Ямғур пәслиму кәтти.

2:12  Далалар гүл-чечәккә пүркәнди, Нахшилар җараңлайдиған пәйт кәлди, Қушлар вичирлишип сайрашмақта.

2:13  Әнҗирләр пишмақта шахлирида, Ғол үзүмләр чечәкләп, пурақ чачмақта. Тур орнуңдин амриғим, җүр кәйнимдин гөзилим».

2:14  Йошурунувалдиң кәптирим қиядики далдиға, Мөкүвалдиң қорам ташниң йериқлириға. Көрсәткинә җамалиңни, аңлай сениң авазиңни, Чүнки шерин авазлириң, йеқимлиқтур чеһрилириң.

2:15  Тутувалғин чилбөриләрни, Бағни бузидиған чилбөриләрни, Чүнки чечәклиди үзүмлиримиз.

2:16  Ашиғим мәнсүптур маңа, мәнму униңға, У һөзүрлинәр қизилгүлләр арисида.

2:17  Түн кетип, таң атқичә, Еһ ашиғим кетивалғин! Худди җәрән, буғидәк тезлик билән Сәкрәп егиз тағлардин өтүвалғин.

Chapter 3

3:1  Орнумда йетип, кечичә Интизар болдум ашиғимға, Лекин у кәлмиди өйүмгә.

3:2  Орнумдин туруп, айлинай шәһәрни, Арилап һәммә коча, мәйданни, Издәй әнди ашиғимни. Шунчә издидим, лекин тапалмидим задила уни.

3:3  Җесәкчиләр мени көрүп тохтиди, Соридим мән улардин: — Көрдүңларму ашиғимни?

3:4  Улардин айрилипла таптим ашиғимни. Қоюп бәрмидим қучағлап уни, Таки әкирмигичә анамниң өйигә — Маңа һамилдар болған анамниң бөлмисигә.

3:5  Еһ Йерусалим қизлири, Өтүнәй силәрдин, Ойғатмаңлар даладики мараллар вә җәрәнләрни, Вақти кәлмигичә ойғатмаңлар муһәббәтни.

3:6  Ким у чөл тәрәптин келиватқан чаң тозутуп, Мурмәкки вә мәстикиниң һидини пуритип, Ипар-әнбәр карвининиң хуш һидини тарқитип?

3:7  Қараңлар, у Сулайманниң тәхтираванидур, Уни қоғдап келиватқан атмиш палван Исраилларниң әң мунәввәр батурлиридур.

3:8  Уларниң һәммиси янлириға қилич асқан, Қилич билән җәң қилишқа маһирлардур. Кечидики тәсадипи қорқутушларға Өткүр қиличи билән тәйярдур.

3:9  Сулайман ясатқан бу тәхтираван, Ливанниң кедиридин ясилипту.

3:10  Униң хадилири күмүчтин, Йөләнчүги алтундин ясилипту. Сөсүн рәхттин көрпә селинип, Ичи Йерусалим қизлири тәрипидин Муһәббәт билән безилипту.

3:11  Әй Йерусалим қизлири, Чиқип қарап беқиңлар Сулайман падишаға! Туриду у, тойи болған, көңли шатланған, Аниси униңға таҗини кийдүргән күнидики қияпәттә.

Chapter 4

4:1  Еһ гөзәл сөйүмлүгүм, Гөзәлдүрсән неманчә! Кәптәр кәби гөзәл көзлүгүм, көрдүм сениң Көзлириңни чүмбилиңниң кәйнидә. Гилад теғидин ойнақлап чүшүватқан өшкиләрдәк, Долқунлайду қара, бостан чачлириң шунчә.

4:2  Чишлириң бир топ қойдур йеңи қирқип, жуюлған, Кам-котисиз җүп-җүп болуп, қатириға тизилған.

4:3  Нәқәдәр гөзәл сениң еғизлириң, Ләвлириң гоя қип-қизил ипәк рәхттәк. Чүмбилиңдә йошурған мәңизлириң Қизарғандур худди анарниң данисидәк.

4:4  Бойнуң охшар Давутниң мунариға, Намайән қилғандур у шәривиңни. Сансиз қалқан есилғандур униңға, Батурларниң қуралидур һәммиси.

4:5  Икки көксүң охшар икки кейик балисиға, Отлап жүргән явайи гүлләр арисида.

4:6  Түн кетип, таң атқичә, Чиқип турай мурмәкки теғиға, Мәстики пуриғиға толған дөңләргә.

4:7  Әй амриғим, гөзәлдурсән нәқәдәр, Сәндә йоқтур һечбир нуқсан, хусур.

4:8  Әй мәһбубәм, биллә кетәйли Ливандин, Мән билән биллә кәткин бу йәрдин, Аманаһ, Синир, Хәрмон чоққилиридин, Шир вә илпизларниң угилиридин.

4:9  Жүригимни әсир қилдиң қериндишим, Ләп қилип маңа бир қаришиңда. Мәптун қилдиң көңлүмни мәһбубәм, Бойнуңдики марҗиниңниң данисида.

4:10  Әй қериндишим, нәқәдәр шерин муһәббитиң, Әй мәһбубәм, шараптинму шериндур шунчә. Һечбир әтир пуримас сән ишләткән әтирчә.

4:11  Ләвлириң һәсәлдур җеним, гоя һәрә угисидәк, Худди тилиңниң астиға қаймақ, һәсәл йошурғандәк. Кийимлириң пурақлиқтур худди Ливанниң хуш пуриғидәк,

4:12  Печәтләнгән бир бағдурсән қериндишим, Етиқ қудуқ, йепиқлиқ булақтурсән мениң җеним.

4:13  Бейиштәк бир бағдурсән анири болған, Есил мевә, хенә, сумбул,

4:14  Зәпәр, ипар, коламус, қовзақдарчин, Һәрхил исриқ дәрәқләр, Мурмәкки, муәттәрләр вә Әң есил дора-дәрмәкләргә лиқ толған.

4:15  Бағдики булақтурсән сулири сап, Ақисән Ливан тағлиридин шақирап.

4:16  Ойған, әй шимал шамили, Сәнму кәл, әй җәнуп шамили, Учуп өтсәң әгәр үстүмдин, Чечилар бағчамдин хуш пурақ. Ашиғим келип өз беғиға, Йесун есил мевилирини бағлап иштияқ.

Chapter 5

5:1  Кирдим өз беғимға, Әй мәһбубәм — җеним сиңлим, Жиғай әнди мурмәкки тетитқулиримни, Һәрә угиси билән йәй һәсилимни, Ичәй шарап вә сүтлиримни. Әй ашиқлар, йәңлар тойғичә, Муһәббәттин ичиңлар қанғичә.

5:2  Уйқида едим, лекин ойғақ еди көңлүм, Аңлидим сөйүмлүгүмниң авазини, Мана, у қақти ишикни! Ишикни ач сиңлим — амриғим, Еһ мениң пак кәптирим. Шәбнәм чүшүп бешимға, Кечидә һөл болди чечим.

5:3  Селивәткән едим кийимлиримни, Кийәй йәнә қандақму уни? Жуған едим путлиримни, Булғай йәнә қандақму уни?

5:4  Ашиғим ишикниң төшүгидин тиқти қолини, Өртиди бир от жүрәк-бағримни.

5:5  Ишикни ачмақ болдум ашиғимға. Тамди мурмәкки қоллиримдин, Ишикниң тутқучини тутқинимда.

5:6  Ишикни ачтим сөйүмлүгүмгә, Бирақ у йоқ еди ишик түвидә, Роһсизландим у кәткәчкә. Издидим уни, бирақ тапалмидим, Чақирдим, бирақ җавап алалмидим.

5:7  Шәһәрдики җесәкчиләр көрүп мени, Уруп яриландурди тенимни, Улар елип қачти ормилимни.

5:8  Әй Йерусалим қизлири, өтүнәй силәрдин, Ашиғимни көрсәңлар ейтип қоюңлар, Мени униң ишқи отида кавап дәңлар.

5:9  Ейтқина әй, гөзәлләрниң гөзили, Сән бизгә шәрт қойғудәк, Ашиғиң башқилардин артуқмикин, Униң башқилардин артуқ тәрипи бармикин?

5:10  Ашиғимниң икки мәңзи қип-қизил, пақирап турар, Түмән-миңлар арисида худди туғдәк алаһидә турар.

5:11  Сап алтундәк нурға толған башлири, Қап-қаридур қузғун кәби униң бөдүр чачлири.

5:12  Худди булақ бойидики кәптәрдәк, Сүткә чиланған гөһәрдәк чақнар униң көзлири.

5:13  Хушбой гия терилған гүлзар кәби мәңизлири, Қизилгүлгә охшар мурмәкки сүрүлгән ләвлири.

5:14  Кәһрива қоюлған алтундур униң биләклири, Көк яқутта безәлгән пил чишидур бойлири.

5:15  Йотилири худди мәрмәр түврүктур алтун үстигә тикләнгән, Қамити Ливан теғидур, кедир дәрәқлири көркәм, һәйвәт көрүнгән.

5:16  Униң еғизи бәкму шерин, Һәр җәһәттин мәптун қилар адәмни. Әй Йерусалим қизлири, Бу мениң қәдирлигим, билип қелиңлар һәмрайимни.

Chapter 6

6:1  Ейтқина, әй гөзәлләрниң гөзили, Ашиғиң кәтти қайси тәрәпкә? Саңа биз издишип берәйли биргә.

6:2  Ашиғим кәтти өзиниң гүлзариға, Дора өсүмлүк беғида һөзүрлинишкә, У йәрдин қизилгүлләрни жиғишқа.

6:3  Мәнсүптурмән ашиғимға, уму маңа, Һөзүрлинәр у қизил гүлләр арисида.

6:4  Әй сөйүмлүгүм, гөзәлдурсән Тирзаһ шәһиридәк, Йеқимлиқсән Йерусалимдәк, Һәйвәтликсән туғ көтәргән қошундәк.

6:5  Қаравәрмә, елип қачқин көзүңни, Мәптун болуп қалмақтимән сениң шәһла көзүңгә. Гилъад теғидин ойнақлап чүшүватқан өшкиләрдәк, Долқунлайду қара, бостан чачлириң шунчә.

6:6  Чишлириң бир топ қойдур йеңи қирқип, жуюлған, Кам-котисиз җүп-җүп болуп, қатириға тизилған.

6:7  Чүмбилиңдә йошурған мәңизлириң, Қизарғандур худди анарниң данисидәк.

6:8  Бардур шаһниң атмиш ханиш-аяли, Сансизлиған кенизәк, сәксән тоқили.

6:9  Лекин мениң көңлүмдә пәқәт сәнла. Мәшуғум мениң пак кәптиримдур, У анисиниң әркисидур, У анисиниң әң қәдирданидур. Һәммә қизлар уни көрсә даңлишар, Ханиш вә тоқалларму махтишар:

6:10  «Кимдур у Таң сәһәрдәк парлиған, Гөзәл айдәк чақниған, Иллиқ қуяштәк йоруған, Юлтузлардәк һәйвәт болуп көрүнгән?»

6:11  Киргән едим яңақлиққа, Көрәрмәнму дәп җилғидики чечәкләрни, Жумран үзүм бихлири, анарниң чечәклирини.

6:12  Һаяҗандин чөмдүм хошаллиқ дәриясиға Худди олтурғандәк хан җамаити һарвусиға.

Chapter 7

7:1  Әй шуламлиқ қиз, қайтип кәлгин аримизға, Йәнә бир қетим зәң селип бақайли саңа. Нә сәвәвидин зәң селип, қаримақчи боп қалдиңлар шуламлиқ қизға, Икки қатар қизлар арисида уссул ойнаватқан униңға.

7:2  Әй мәликәм, Нәқәдәр гөзәл-һә, кепиш кийгән путлириң, Гөһәрдур жумилақ ямпешиң, У бир гөзәл әсиридур уста сәнъәткарниң.

7:3  Киндигиң охшар гоя шарап җамиға, Хушбой мәйләр лиқму-лиқ толтурулған. Қосақлириң худди буғдай догисидәк, Пүтүнләй қизилгүлгә оралған.

7:4  Икки көксүң гоя икки кейик балиси.

7:5  Бойнуң гоя пил чиши мунаридур, Көзлириң худди Пат-Рәббим дәрвазиси йенидики Хәшбун көлчигидур. Қаңша бурнуң гоя Дәмәшққә қарап турған Ливан мунаридур.

7:6  Бешиң гоя қәд көтәргән Кармәл теғи, Долқунлиған қара чечиң ялтирақ дурдун кәби, Гөзәллигиң әсир қилар һәтта шаһниң қәлбини.

7:7  Нәқәдәр омақ, гөзәлсән җеним, Сөйүнүш тапимән сәндин амриғим.

7:8  Қамитиң охшар худди пальма дәриғигә, Көксүң охшар униң ғужмәк мевилиригә.

7:9  Чиқип пальма дәриғигә, Тутсам дәймән униң ғужмәк мевилирини. Билимән үзүм саплири дәп көксүңни, Пурисам ләззәтлик алма кәби нәписиңни.

7:10  Шериндур есил шарап кәби ләвлириң. Сөйүмлүгүм шарап ақсун ичимизгә, Шилдирлап левимиздин левимизгә.

7:11  Мәнсүптурмән ашиғимға, Униң иштияқи бардур маңа.

7:12  Әй ашиғим, кәл, Етизларға барайли, Хениликләрдә қонуп қалайли.

7:13  Сәһәр туруп, сәйлә қилайли үзүмзар ара, Көрүп келәйли үзүм ғоллири бихлаптиму, Гүлләр ечилиптиму, Анарлар чечәкләптиму, Мән шу йәрдә сөйгүмни берәй саңа.

7:14  Һиди келәр дора өсүмлүкләрниң, Ишигимиз үстигә тизип қойдуқ мевиләрни, Мевиләрниң бардур кона вә йеңилири, Әй ашиғим сақлидим саңа уларни.

Chapter 8

8:1  Еһ, қандақ яхши болар еди, емилдаш акамдәк болған болсаң, Уялмастин сөйсәм едим сени кочида учрап қалсаң, Һечкимму әйипләп жүрмәтти мени.

8:2  Башлап кирип сени анамниң өйигә, Анам мени тәрбийилигән шу йәргә, Ичкүзәттим саңа шараптин, Анар шәрбәтлиридин.

8:3  Бешим астида униң сол қоли, Оң қолида қучақлар мени.

8:4  Өтүнәй силәрдин, әй Йерусалим қизлири, Вақти кәлмигичә ойғатмаңлар муһәббәтни.

8:5  Ким у қиз, чөл тәрәптин келиватқан, Йөлинип яриға? Ойғаттим сени алма дәриғи астида, Анаң толғақ йәп шу йәрдә, Туққан еди сени шу җайда.

8:6  Қолуңдики мөһүр үзүктәк, Мөһүрләвал мени қәлбиңгә. Муһәббәт күчлүктур өлүмдәк, Ишқ мустәһкәмдур ләһәттәк. Сөйгүниң учқунлири Көйдүрәр оттәк, Қудрәтлик ялқундәк.

8:7  Сөйгүни өчүрәлмәс улуқ сулар, Чөктүрәлмәс уни топанлар. Әгәр бири уни сетивалимән десә байлиғиға, Ахир өзи мәсқиригә қалар.

8:8  Бар кичик бир сиңлимиз, Техи балағәткә йәтмигән. Сорап кирсә әлчиләр, Биз немә иш қилимиз?

8:9  Әгәр у бир сепил болса, Күмүч мунара тикләп уни қоғдайли, Әгәр болса у бир дәрваза, Кедир яғичи билән уни тосайли.

8:10  Әсли мән бир сепил едим, Мунаридәк еди көкрәклирим, Мәндин хурсән еди жигитим.

8:11  Баал-Хамунда бар еди Сулайманниң үзүмзарлиғи, Үзүмзарлиғини бәрди у иҗаригә, Улар һосулидин бәрмәкчи болушти миң тәңгә.

8:12  Миң тәңгә тәвә болсун Сулайманға, Икки йүз тәңгә баққучиға. Мениң үзүмзарим өзәмниңкидур.

8:13  Әй бағда олтарған қиз, Достлирим тәқәззадур авазиңни аңлашқа, Интизармән мәнму һәм авазиңни тиңшашқа.

8:14  Әй ашиғим, чапсан кәлгин йенимға, Худди җәрән, бөкән кәби қийғитип, Йетип кәлгин хуш пурақлиқ теғимға.