ABPGRK - Amos

Chapter 1

1:1  λόγοι Αμώς οι εγένοντο εν Καριαθιαρείμ εκ Θεκουέ ους είδεν υπέρ Ιερουσαλήμ εν ημέραις Οζίου βασιλέως Ιούδα και εν ημέραις Ιεροβοάμ υιού Ιωάς βασιλέως του Ισραήλ προ δύο ετών του σεισμού

1:2  και είπε κύριος εκ Σιών εφθέγξατο και εξ Ιερουσαλήμ έδωκε φωνήν αυτού και επένθησαν αι νομαί των ποιμένων και εξηράνθη η κορυφή του Καρμήλου

1:3  και είπε κύριος επί ταις τρισίν ασεβείαις Δαμασκού και επί ταις τέσσαρσιν ουκ αποστραφήσομαι αυτόν ανθ΄ ων έπριζον πρίοσι σιδηροίς τας εν γαστρί εχούσας εν Γαλαάδ

1:4  και αποστελώ πυρ εις τον οίκον Αζαήλ και καταφάγεται τα θεμέλια υιόυ Άδερ

1:5  και συντρίψω μοχλούς Δαμασκού και εξολοθρεύσω κατοικούντας εκ πεδίου Ων και κατακόψω φυλήν εξ ανδρών Αδάν και αιχμαλωτευθήσεται λαός Συρίας επίκλητος λέγει κύριος

1:6  τάδε λέγει κύριος επί ταις τρισίν ασεβείαις Γάζης και επί ταις τέσσαρσιν ουκ αποστραφήσομαι αυτούς ένεκεν του αιχμαλωτεύσαι αυτούς αιχμαλωσίαν του Σολομών του συγκλείσαι εις την Ιδουμαίαν

1:7  και εξαποστελώ πυρ επί τα τείχη Γάζης και καταφάγεται τα θεμέλια αυτής

1:8  και εξολοθρεύσω κατοικούντας εξ Αζώτου και εξαρθήσεται φυλή εξ Ασκαλώνος και επάξω την χείρά μου επί Ακκαρών και απολούνται οι κατάλοιποι των αλλοφύλων λέγει κύριος

1:9  τάδε λέγει κύριος επί ταις τρισίν ασεβείαις Τύρου και επί ταις τέσσαρσιν ουκ αποστραφήσομαι αυτήν ανθ΄ ων συνέκλεισαν την αιχμαλωσίαν Σολομών εις την Ιδουμαίαν και ουκ εμνήσθησαν διαθήκης αδελφών

1:10  και εξαποστελώ πυρ επί τα τείχη Τύρου και καταφάγεται τα θεμέλια αυτής

1:11  τάδε λέγει κύριος επί ταις τρισίν ασεβείαις της Ιδουμαίας και επί ταις τέσσαρσιν ουκ αποστραφήσομαι αυτούς ένεκα του διώξαι αυτούς εν ρομφαία τον αδελφόν αυτόν και ελυμήνατο μητέρα επί της γης και ήρπασεν εις μαρτύριον φρίκην αυτού και όρμημα αυτού εφύλαξεν εις νίκος

1:12  και εξαποστελώ πυρ εις Θαιμάν και καταφάγεται τα θεμέλια αυτής

1:13  τάδε λέγει κύριος επί ταις τρισίν ασεβείαις των υιών Αμμών και επί ταις τέσσαρσιν ουκ αποστραφήσομαι αυτούς ανθ΄ ων ανέσχιζον τας εν γαστρί εχούσας των Γαλααδιτών όπως εμπλατύνωσι τα όρια αυτών

1:14  και ανάψω πυρ και επί τα τείχη Ραββάθ και καταφάγεται τα θεμέλια αυτής μετά κραυγής εν ημέρα πολέμου και σεισθήσεται εν ημέραις συντελείας αυτής

1:15  και πορεύσεται ο βασιλεύς αυτών εν αιχμαλωσία οι ιερείς και οι άρχοντες αυτών επιτοαυτό λέγει κύριος

Chapter 2

2:1  τάδε λέγει κύριος επί ταις τρισίν ασεβείαις Μωάβ και επί τέσσαρσιν ουκ αποστραφήσομαι αυτόν ανθ΄ ων κατέκαυσαν τα οστά βασιλέως Ιδουμαίας εις κονίαν

2:2  και εξαποστελώ πυρ επί Μωάβ και καταφάγεται τα θεμέλια των πόλεων και αποθανείται εν αδυναμία Μωάβ μετά φωνής και μετά κραυγής σάλπιγγος

2:3  και εξολοθρεύσω κριτήν εξ αυτής και πάντας τους άρχοντας αυτής αποκτενώ μετ΄ αυτού λέγει κύριος

2:4  τάδε λέγει κύριος επί ταις τρισίν ασεβείαις των υιών Ιούδα και επί ταις τέσσαρσιν ουκ αποστραφήσομαι αυτόν ένεκεν του απώσασθαι αυτούς τον νόμον κυρίου και τα προστάγματα αυτού ουκ εφυλάξαντο και επλάνησαν αυτούς τα μάταια αυτών α εποίησαν οις εξηκολούθησαν οι πατέρες αυτών οπίσω αυτών

2:5  και εξαποστελώ πυρ επί Ιούδαν και καταφάγεται τα θεμέλια Ιερουσαλήμ

2:6  τάδε λέγει κύριος επί ταις τρισίν ασεβείαις Ισραήλ και επί ταις τέσσαρσιν ουκ αποστραφήσομαι ανθ΄ ων απέδοντο αργυρίου δίκαιον και πένητα αντί υποδημάτων

2:7  καταπατούντα επί τον χουν της γης και εκονδύλιζον εις κεφαλήν πτωχόν και οδόν ταπεινών εξέκλιναν και υιός και πατήρ αυτού εισεπορεύοντο προς την αυτήν παιδίσκην όπως βεβηλώσωσι το όνομα του θεού αυτών

2:8  και τα ιμάτια αυτών δεσμεύοντες σχοινίοις παραπετάσματα εποίουν εχόμενα του θυσιαστηρίου και οίνον εκ συκοφαντιών έπινον εν τω οίκω του θεού αυτών

2:9  εγώ δε ήρα τον Αμορραίον εκ προσώπου αυτών καθώς ύψος κέδρου το ύψος αυτού και ισχυρός ην ως δρυς και εξήρα τον καρπόν αυτού επάνωθεν και τας ρίζας αυτού υποκάτωθεν

2:10  και εγώ ανήγαγον υμάς εκ γης Αιγύπτου και περιήγαγον υμάς εν τη ερήμω τεσσαράκοντα έτη του κατακληρονομήσαι την γην των Αμορραίων

2:11  και έλαβον εκ των υιών υμών εις προφήτας και εκ των νεανίσκων υμών εις αγιασμόν μη ουκ έστι ταύτα υιοί Ισραήλ λέγει κύριος

2:12  υμείς δε εποτίζετε τους ηγιασμένους οίνον και τοις προφήταις ενετέλλεσθε λέγοντες ου μη προφητεύσητε

2:13  διά τούτο ιδού εγώ κυλίω υποκάτω υμών ον τρόπον κυλίεται η άμαξα η γέμουσα καλάμης

2:14  και απολείται φυγή εκ δρομέως και ο κραταιός ου μη κρατήση της ισχύος αυτού και ο μαχήτης ου μη σώση την ψυχήν αυτού

2:15  και ο τοξότης ου μη υποστή και ο οξύς τοις ποσίν αυτού ου μη διασωθή και ο ιππεύς ου μη σώση την ψυχήν αυτού

2:16  και ο κραταιός ου μη ευρήσει η καρδία αυτού εν δυναστείαις ο γυμνός διώξεται εν εκείνη τη ημέρα λέγει κύριος

Chapter 3

3:1  ακούσατε τον λόγον τούτον ον ελάλησε κύριος εφ΄ υμάς οίκος του Ισραήλ και κατά πάσης φυλής ης ανήγαγον εκ γης Αιγύπτου λέγων

3:2  πλην υμάς έγνων εκ πασών των φυλών της γης διά τούτο εκδικήσω εφ΄ υμάς πάσας τας αμαρτίας υμών

3:3  ει πορεύσονται δύο επιτοαυτό καθόλου εάν μη γνωρίσωσιν εαυτούς

3:4  ει ερεύξεται λέων εκ του δρυμού αυτού θηραν ουκ εχων ει δώσει σκύμνος φωνήν αυτού εκ της μάνδρας αυτού καθόλου εάν μη αρπάση τι

3:5  ει πεσείται όρνεον επί την γην άνευ ιξευτού ει σχασθήσεται παγίς επί της γης άνευ του συλλαβείν τι

3:6  ει φωνήσει σάλπιγξ εν πόλει και λαός ου πτοηθήσεται ει έσται κακία εν πόλει ην κύριος ουκ εποίησε

3:7  διότι ου μη ποιήση κύριος ο θεός πράγμα εάν μη αποκαλύψη παιδείαν προς τους δούλους αυτού τους προφήτας

3:8  λέων ερεύξεται και τις ου φοβηθήσεται κύριος ο θεός ελάλησε και τις ου προφητεύσει

3:9  αναγγείλατε χώραις εν Ασσυρίοις και επί τας χώρας εν γη Αιγύπτου και είπατε συνάχθητε επί το όρος Σαμαρείας και ίδετε θαυμαστά πολλά εν μέσω αυτής και καταδυναστείαν εν αυτή

3:10  και ουκ έγνω α έσται εναντίον αυτής λέγει κύριος οι θησαυρίζοντες αδικίαν και ταλαιπωρίαν εν ταις χώραις αυτών

3:11  διά τούτο τάδε λέγει κύριος ο θεός Τύρος και κυκλόθεν η γη σου ερημωθήσεται και κατάξει εκ σου την ισχύν σου και διαρπαγήσονται αι χώραί σου

3:12  τάδε λέγει κύριος ον τρόπον εκσπάση ο ποιμήν εκ του στόματος του λέοντος δύο σκέλη η λοβόν ωτίου ούτως εκσπασθήσονται οι υιοί Ισραήλ οι κατοικούντες εν Σαμαρεία κατέναντι φυλής και εν Δαμασκώ

3:13  ιερείς ακούσατε και επιμαρτύρασθε τω οίκω Ιακώβ λέγει κύριος ο θεός ο παντοκράτωρ

3:14  διότι εν τη ημέρα όταν εκδικήσω ασεβείας του Ισραήλ επ΄ αυτόν και εκδικήσω επί τα θυσιαστήρια Βαιθήλ και κατασκαφήσεται τα κέρατα του θυσιαστηρίου και πεσούνται επί την γην

3:15  συγχεώ και πατάξω τον οίκον τον περίπτερον επί τον οίκον τον θερινόν και απολούνται οίκοι ελεφάντινοι και προστεθήσονται οίκοι έτεροι πολλοί λέγει κύριος

Chapter 4

4:1  ακούσατε τον λόγον τούτον δαμάλεις της Βασάν αι εν τω όρει Σαμαρείας αι καταδυναστεύουσαι πτωχούς και καταπατούσαι πένητας αι λέγουσαι τοις κυρίοις αυτών επίδοτε ημίν όπως πίωμεν

4:2  ομνύει κύριος κατά των αγίων αυτού διότι ιδού ημέραι έρχονται εφ΄ υμάς και λήψονται υμάς εν όπλοις και τους μεθ΄ υμών εις λέβητας υποκαιομένους εμβαλούσιν έμπυροι λοιμοί

4:3  και εξενεχθήσεσθε γυμνοί κατέναντι αλλήλων και απορριφήσεσθε εις το όρος το Ρενμάν λέγει κύριος

4:4  εισήλθετε εις Βαιθήλ και ησεβήσατε και εις Γαλγαλά επληθύνατε του ασεβήσαι και ηνέγκατε εις τοπρωϊ θυσίας υμών εις την τριημερίαν τα επιδέκατα υμών

4:5  και ανέγνωσαν έξω νόμον και επεκαλέσαντο ομολογίας αναγγείλατε ότι ταύτα ηγάπησαν οι υιοί Ισραήλ λέγει κύριος

4:6  και εγώ δώσω υμίν γομφιασμόν οδόντων εν πάσαις ταις πόλεσιν υμών και ένδειαν άρτων εν πάσι τοις τόποις υμών και ουκ επεστρέψατε προς με λέγει κύριος

4:7  και ανέσχον εξ υμών τον υετόν προ τριών μηνών του τρυγητού και βρέξω επί πόλιν μίαν επί δε πόλιν μίαν ου βρέξω μερίς μία βραχήσεται και μερίς εφ΄ ην ου βρέξω ξηρανθήσεται

4:8  και συναθροισθήσονται δύο και τρεις πόλεις εις πόλιν μίαν του πιείν ύδωρ και ου μη εμπλησθώσι και ουκ επεστρέψατε προς με λέγει κύριος

4:9  επάταξα υμάς εν πυρώσει και εν ικτέρω επληθύνατε κήπους υμών αμπελώνας υμών και συκώνας υμών και ελαιώνας υμών κατέφαγεν η κάμπη και ουδ΄ ούτως επεστρέψατε προς με λέγει κύριος

4:10  εξαπέστειλα εις υμάς θάνατον εν οδώ Αιγύπτου απέκτεινα εν ρομφαία τους νεανίσκους υμών μετά αιχμαλωσίας ίππων υμών και ανήγαγον εν πυρί τας παρεμβολάς υμών εν τη οργή υμών και ουδ΄ ούτως επεστρέψατε προς με λέγει κύριος

4:11  κατέστρεψα υμάς καθώς κατέστρεψεν ο θεός Σόδομα και Γόμορρα και εγένεσθε ως δαλός εξεσπασμένος από καύσεως και ουδ΄ ούτως επεστρέψατε προς με λέγει κύριος

4:12  διά τούτο ούτως ποιήσω σοι Ισραήλ πλην ότι ούτως ποιήσω σοι ετοιμάζου του επικαλείσθαι τον θεόν σου Ισραήλ

4:13  διότι ιδού στερεών βροντήν και κτίζων πνεύμα και απαγγέλλων εις ανθρώπους τον χρηστόν αυτού ποιών όρθρον και ομίχλην και επιβαίνων επί τα ύψη της γης κύριος ο θεός ο παντοκράτωρ όνομα αυτώ

Chapter 5

5:1  ακούσατε τον λόγον κυρίου ον εγώ λαμβάνω εφ΄ υμάς θρήνον οίκος του Ισραήλ έπεσεν ουκέτι μη προσθήσει του αναστήναι

5:2  παρθένος Ισραήλ έσφαλεν επί της γης αυτού ουκ έστιν ο ανιστών αυτήν

5:3  διότι τάδε λέγει κύριος ο θεός η πόλις εξ ης εξεπορεύοντο χίλιοι υπολειφθήσονται εκατόν και εξ ης εξεπορεύοντο εκατόν υπολειφθήσονται δέκα τω οίκω Ισραήλ

5:4  διότι τάδε λέγει κύριος προς τον οίκον του Ισραήλ εκζητήσατε με και ζήσεσθε

5:5  και μη εκζητείτε Βαιθήλ και εις Γαλγαλά μη εισπορεύεσθε και επί το φρεαρ του όρκου μη διαβαίνετε ότι Γαλγαλά αιχμαλωτευομένη αιχμαλωτευθήσεται και Βαιθήλ έσται ως ουχ υπάρχουσα

5:6  εκζητήσατε τον κύριον και ζήσατε όπως μη αναλάμψη ως πυρ ο οίκος Ιωσήφ και καταφάγη αυτόν και ουκ έσται ο σβέσων τω οίκω Ισραήλ

5:7  ο ποιών εις ύψος κρίμα και δικαιοσύνην εις γην έθηκεν

5:8  ο ποιών πάντα και μετασκευάζων και εκτρέπων εις τοπρωϊ σκιάν και ημέραν εις νύκτα συσκοτάζων ο προσκαλούμενος το ύδωρ της θαλάσσης και εκχέων αυτό επί πρόσωπον της γης κύριος ο θεός παντοκράτωρ όνομα αυτώ

5:9  ο διαιρών συντριμμόν επί ισχύν και ταλαιπωρίαν επί οχύρωμα επάγων

5:10  εμίσησαν εν πύλαις ελέγχοντα και λόγον όσιον εβδελύξαντο

5:11  διά τούτο ανθ΄ ων κατεκονδύλιζεν πτωχούς και δώρα εκλεκτά εδέξασθε παρ΄ αυτών οίκους ξυστούς ωκοδομήσατε και ου μη κατοικήσητε εν αυτοίς αμπελώνας επιθυμητούς εφυτεύσατε και ου μη πίητε τον οίνον αυτών

5:12  ότι έγνων πολλάς ασεβείας υμών και ισχυραί αι αμαρτίαι υμών καταπατούντες δίκαιον λαμβάνοντες αλλάγματα και πένητας εν πύλαις εκκλίνοντες

5:13  διά τούτο ο συνιών εν καιρώ εκείνω σιωπήσεται ότι καιρός πονηρός εστιν

5:14  εκζητήσατε το καλόν και μη το πονηρόν όπως ζήσητε και έσται ούτως κύριος ο θεός ο παντοκράτωρ μεθ΄ υμών ον τρόπον είπατε

5:15  μεμισήκαμεν τα πονηρά και ηγαπήσαμεν τα καλά και αποκαταστήσατε εν πύλαις κρίμα όπως ελεήση κύριος ο θεός ο παντοκράτωρ τους περιλοίπους Ιωσήφ

5:16  διά τούτο τάδε λέγει κύριος ο θεός ο παντοκράτωρ εν πάσαις πλατείαις κοπετός και εν πάσαις οδοίς ρηθήσεται ουαί ουαί κληθήσεται γεωργός εις πένθος και εις κοπετόν και εις ειδότας θρήνον

5:17  και εν πάσαις οδοίς κοπετός διότι ελεύσομαι διά μέσου σου είπε κύριος

5:18  ουαί οι επιθυμούντες την ημέραν κυρίου ινατί αύτη ημίν η ημέρα του κυρίου και αυτή εστί σκότος και ου φως

5:19  ον τρόπον εάν φυγη άνθρωπος εκ προσώπου λέοντος και εμπέση αυτώ άρκος και εισπηδήση εις τον οίκον και απερείσηται τας χείρας αυτού επί τον τοίχον και δάκη αυτόν όφις

5:20  ουχί σκότος η ημέρα του κυρίου και ου φως και γνόφος ουκ έχων φέγγος αύτη

5:21  μεμίσηκα απώσμαι εορτάς υμών και ου μη οσφρανθώ εν ταις πανηγύρεσιν υμών

5:22  διότι εάν ενέγκητέ μοι ολοκαυτώματα και θυσίας υμών ου προσδέξομαι και σωτηρίου επιφανείας υμών ουκ επιβλέψομαι

5:23  μετάστησον απ΄ εμού ήχον ωδών σου και ψαλμόν οργάνων σου ουκ ακούσομαι

5:24  και κυλισθήσεται ως ύδωρ κρίμα και δικαιοσύνη ως χειμάρρους άβατος

5:25  μη σφάγια και θυσίας προσηνέγκατέ μοι οίκος Ισραήλ τεσσαράκοντα έτη εν τη ερήμω

5:26  και ανελάβετε την σκηνήν του Μολόχ και το άστρον του θεού υμών Ραιφάν τους τύπους αυτών ους εποιήσατε εαυτοίς

5:27  και μετοικιώ υμάς επέκεινα Δαμασκού λέγει κύριος ο θεός παντοκράτωρ όνομα αυτώ

Chapter 6

6:1  ουαί τοις εξουθενούσι Σιών και τοις πεποιθόσιν επί το όρος Σαμαρείας απετρύγησαν αρχάς εθνών και εισήλθον εαυτοίς οίκος του Ισραήλ

6:2  διάβητε πάντες και ίδετε και διέλθατε εκείθεν εις Αμμάθ Ραβά και κατάβητε εις Γεθ αλλοφύλων τας κρατίστας εκ των βασιλειών τούτων ει πλείονα τα όρια αυτών εστι των υμετερων ορίων

6:3  οι ερχόμενοι εις ημέραν κακήν οι εγγίζοντες και εφαπτόμενοι σαββάτων ψευδών

6:4  οι καθεύδοντες επί κλινών ελεφαντίνων και κατασπαταλώντες επί ταις στρωμναίς αυτών και έσθοντες ερίφους εκ ποιμνίων και μοσχάρια εκ μέσου βουκολίων γαλαθηνά

6:5  οι επικροτούντες προς την φωνήν των οργάνων ως εστηκότα ελογίσαντο και ουχ ως φεύγοντα

6:6  οι πίνοντες τον διυλισμένον οίνον και τα πρώτα μύρα χριόμενοι και ουκ έπασχον ουδέν επί την συντριβήν του Ιωσήφ

6:7  διά τούτο νυν αιχμάλωτοι έσονται απ΄ αρχής δυναστών και εξαρθήσεται χρεμετισμός ίππων εξ Εφραϊμ

6:8  ότι ώμοσε κύριος καθ΄ εαυτού διότι βδελύσσομαι εγώ πάσαν την ύβριν Ιακώβ και τας χώρας αυτού μεμίσηκα και εξαρώ πόλιν συν πάσι τοις εν αυτή

6:9  και έσται εάν υπολειφθώσι δέκα άνδρες εν οικία μία και αποθανούνται

6:10  και υπολειφθήσονται οι οικείοι αυτών και παραβιώνται του εξενέγκαι τα οστά αυτών εκ του οίκου και ερεί τοις προεστηκόσι της οικίας ει έτι υπάρχει παρά σοι και ερεί ουκ έτι και ερεί σίγα ένεκα του μη ονομάσαι το όνομα κυρίου

6:11  ότι ιδού κύριος εντέλλεται και πατάξει τον οίκον τον μέγαν θλάσμασι και τον οίκον τον μικρόν ρήγμασιν

6:12  ει διώξονται εν πέτραις ίπποι ει παρασιωπήσονται εν θηλείαις ότι εξεστρέψατε εις θυμόν κρίμα και καρπόν δικαιοσύνης εις πικρίαν

6:13  οι ευφραινόμενοι επ΄ ουδενί λόγω αγαθώ οι λέγοντες ουκ εν τη ισχύϊ ημών έσχομεν κέρατα

6:14  διότι ιδού εγώ επεγερώ εφ΄ υμάς οίκος του Ισραήλ έθνος και εκθλίψουσιν υμάς του μη εισελθείν εις Αιμάθ και έως του χειμάρρου των δυσμών

Chapter 7

7:1  ούτως έδειξέ μοι κύριος ο θεός και ιδού επιγονή ακρίδων ερχομένη εωθινή και ιδού βρούχος εις Γωγ ο βασιλεύς

7:2  και έσται εάν συντελέση του καταφαγείν τον χόρτον της γης και είπα κύριε ίλεως γενού τις αναστήσει τον Ιακώβ ότι ολιγοστός εστι

7:3  μετανόησον κύριε επί τούτω και τούτο ουκ έσται λέγει κύριος

7:4  ούτως έδειξέ μοι κύριος και ιδού εκάλεσε την δίκην εν πυρί κύριος και κατέφαγε την άβυσσον την πολλήν και κατέφαγε την μερίδα

7:5  και είπα κύριε ο θεός κόπασον δη τις αναστήσει τον Ιακώβ ότι ολιγοστός εστι μετανόησον κύριε επί τούτω

7:6  και τούτο ου μη γένηται λέγει κύριος

7:7  ούτως έδειξέ μοι κύριος και ιδού κυριός εστηκώς επί τείχους αδαμαντίνου και εν τη χειρί αυτού αδάμας

7:8  και είπε κύριος προς με τι συ οράς Αμώς και είπα αδάμαντα και είπε κύριος προς με ιδού εγώ εντάσσω αδάμαντα εν μέσω λαού μου Ισραήλ ουκ έτι μη προσθώ του παρελθείν αυτόν

7:9  και αφανισθήσονται βωμοί του γέλωτος και αι τελεταί του Ισραήλ ερημωθήσονται και αναστήσομαι επί τον οίκον Ιεροβοάμ εν ρομφαία

7:10  και εξαπέστειλεν Αμασίας ο ιερεύς Βαιθήλ προς Ιεροβοάμ βασιλέα Ισραήλ λέγων συστροφάς ποιείται κατά σου Αμώς εν μέσω του οίκου Ισραήλ ου μη δύνηται η γη υπενέγκαι πάντας τους λόγους αυτού

7:11  διότι τάδε λέγει Αμώς εν ρομφαία τελευτήσει Ιεροβοάμ ο δε Ισραήλ αιχμάλωτος αχθήσεται από της γης αυτού

7:12  και είπεν Αμασίας προς Αμώς ο ορών βάδιζε εκχώρησον συ εις γην Ιούδα και εκεί καταβίου και εκεί προφητεύσεις

7:13  εις δε Βαιθήλ ουκ έτι προσθήσεις του προφητεύσαι ότι αγίασμα βασιλέως εστί και οίκος βασιλείας εστί

7:14  και απεκρίθη Αμώς και είπε προς Αμασίαν ουκ ήμην προφήτης ουδέ υιός προφήτου αλλά αιπόλος ήμην κνίζων συκάμινα

7:15  και ανέλαβέ με κύριος εκ των προβάτων και είπε κύριος προς με βάδιζε και προφήτευσον επί τον λαόν μου Ισραήλ

7:16  και νυν άκουε λόγον κυρίου συ λέγεις μη προφήτευε επί τον Ισραήλ και ου μη οχλαγωγήσης επί τον οίκον Ιακώβ

7:17  διά τούτο τάδε λέγει κύριος η γυνή σου εν τη πόλει πορνεύσει και υιοί σου και αι θυγατέρες σου εν ρομφαία πεσούνται και η γη σου εν σχοινίω καταμετρηθήσεται και συ εν γη ακαθάρτω τελευτήσεις ο δε Ισραήλ αιχμάλωτος αχθήσεται από της γης αυτού

Chapter 8

8:1  ούτως έδειξέ μοι κύριος και ιδού άγγος ιξευτού

8:2  και είπεν κύριος τι συ βλέπεις Αμώς και είπα άγγος ιξευτού και είπεν κύριος προς με ήκει το πέρας επί τον λαόν μου τον Ισραήλ ου προσθήσω ουκέτι του παρελθείν αυτόν

8:3  και ολολύξει τα φατνώματα του ναού εν εκείνη τη ημέρα λέγει κύριος πολύς ο πεπτωκώς εν παντί τόπω επιρρίψω σιωπήν

8:4  ακούσατε δη ταύτα οι εκτρίβοντες πένητα και καταδυναστεύοντες πτωχούς από της γης

8:5  λέγοντες πότε διελεύσεται ο μην και εμπολήσομεν και τα σάββατα και ανοίξομεν θησαυρόν του ποιήσαι μέτρον μικρόν και του μεγαλύναι σταθμόν και ποιήσαι ζυγόν άδικον

8:6  του κτάσθαι εν αργυρίω πτωχούς και πένητα ανθ΄ υποδημάτων και από πάσης πράσεως εμπορευσόμεθα

8:7  ομνύει κύριος καθ΄ υπερηφανίαν Ιακώβ ει επιλησθήσεται εις νίκος πάντα τα έργα αυτών

8:8  και επί τούτοις ου ταραχθήσεται η γη και πενθήσει πας ο κατοικών εν αυτή και αναβήσεται ως ποταμός η συντέλεια και καταβήσεται ως ποταμός Αιγύπτου

8:9  και έσται εν τη ημέρα εκείνη λέγει κύριος δύσεται ο ήλιος μεσημβρίας και συσκοτάσει επί της γης εν ημέρα το φως

8:10  και μεταστρέψω τας εορτάς υμών εις πένθος και πάσας ωδάς υμών εις θρήνον και αναβιβάσω επί πάσαν οσφύν σάκκον και επί πάσαν κεφαλήν φαλάκρωμα και θήσομαι αυτόν ως πένθος αγαπητού και τους μετ΄ αυτού ως ημέραν οδύνης

8:11  ιδού ημέραι έρχονται λέγει κύριος και εξαποστελώ λιμόν επί την γην ου λιμόν άρτων ουδέ λιμόν ύδατος αλλά λιμόν του ακούσαι τον λόγον κυρίου

8:12  και σαλευθήσονται ύδατα από της θαλάσσης έως θαλάσσης και από βορρά έως ανατολών περιδραμούνται ζητούντες τον λόγον του κυρίου και ου μη εύρωσιν

8:13  εν τη ημέρα εκείνη εκλείψουσιν αι παρθένοι αι καλαί και οι νεανίσκοι εν δίψει

8:14  οι ομνύοντες κατά του ιλασμού Σαμαρείας και λέγοντες ζη ο θεός σου Δαν και ο θεός σου Βηρσαβεέ και πεσούνται και ου μη αναστώσιν έτι

Chapter 9

9:1  είδον τον κύριον εφεστώτα επί του θυσιαστηρίου και είπε πάταξον επί το ιλαστήριον και σεισθήσεται τα πρόπυλα και διάκοψον εις κεφαλάς πάντων και τους καταλοίπους αυτών εν ρομφαία αποκτενώ ου μη διαφύγη εξ αυτών φεύγων και ου μη διασωθή εξ αυτών ανασωζόμενος

9:2  εάν κατορυγώσιν εις άδου εκείθεν η χειρ μου ανασπάσει αυτούς και εάν αναβώσιν εις τον ουρανόν εκείθεν κατάξω αυτούς

9:3  εάν κατακρυβώσιν εις την κορυφήν του Καρμήλου εκείθεν εξερευνήσω και λήψομαι αυτούς και εάν καταδύσωσιν εξ οφθαλμών μου εις τα βάθη της θαλάσσης εκεί εντελούμαι τω δράκοντι και δήξεται αυτούς

9:4  και εάν πορευθώσιν εν αιχμαλωσία προ προσώπου των εχθρών αυτών εκεί εντελούμαι τη ρομφαία και αποκτενεί αυτούς και στηριώ τους οφθαλμούς μου επ΄ αυτούς εις κακά και ουκ εις αγαθά

9:5  και κύριος ο θεός ο παντοκράτωρ ο εφαπτόμενος της γης και σαλεύων αυτήν και πενθήσουσι πάντες οι κατοικούντες αυτήν και αναβήσεται ως ποταμός Αιγύπτου

9:6  ο οικοδομών εις τον ουρανόν ανάβασιν αυτού και την επαγγελίαν αυτού επί της γης θεμελιών ο προσκαλούμενος το ύδωρ της θαλάσσης και εκχέων αυτό επί πρόσωπον της γης κύριος όνομα αυτώ

9:7  ουχ ως υιοί Αιθιόπων υμείς εστέ εμοί υιοί Ισραήλ λέγει κύριος ου τον Ισραήλ ανήγαγον εξ γης Αιγύπτου και τους αλλοφύλους εκ Καππαδοκίας και τους Σύρους εκ βόθρου

9:8  ιδού οι οφθαλμοί κυρίου του θεού επί την βασιλείαν των αμαρτωλών και εξαρώ αυτήν από προσώπου της γης πλην ότι ουκ εις τέλος εξαρώ τον οίκον Ιακώβ λέγει κύριος

9:9  διότι ιδού εγώ εντέλλομαι και λικμήσω εν πάσι τοις έθνεσι τον οίκον Ισραήλ ον τρόπον λικμάται εν τω λικμώ και ου μη πέση σύντριμμα επί την γην

9:10  εν ρομφαία τελευτήσουσι πάντες οι αμαρτωλοί του λαού μου οι λέγοντες ου μη εγγίση ουδέ μη έλθη εφ΄ ημάς τα κακά

9:11  εν τη ημέρα εκείνη αναστήσω την σκηνήν Δαυίδ την πεπτωκυίαν και ανοικοδομήσω τα πεπτωκότα αυτής και τα κατεσκαμμένα αυτής αναστήσω και ανοικοδομήσω αυτήν καθώς αι ημέραι του αιώνος

9:12  όπως εκζητήσωσιν οι κατάλοιποι των ανθρώπων και πάντα τα έθνη εφ ους επικέκληται το όνομά μου επ΄ αυτούς λέγει κύριος ο ποιών ταύτα

9:13  ιδού ημέραι έρχονται λέγει κύριος και καταλήψεται ο αλοητός τον τρυγητόν και περκάσει η σταφυλή εν τω σπόρω και αποσταλάξει τα όρη γλυκασμόν και πάντες οι βουνοί σύμφυτοι έσονται

9:14  και επιστρέψω την αιχμαλωσίαν του λαού μου Ισραήλ και οικοδομήσουσι πόλεις τας ηφανισμένας και κατοικήσουσι και φυτεύσουσιν αμπελώνας και πίονται τον οίνον αυτών και ποιήσουσι κήπους και φάγονται τον καρπόν αυτών

9:15  και καταφυτεύσω αυτούς επί της γης αυτών και ου μη εκσπασθώσιν ουκέτι από της γης αυτών ης έδωκα αυτοίς λέγει κύριος ο θεός