CopSahBible2 - Amos

Chapter 1

Chapter 2

2:11  … ⲛⲉⲧⲛϣⲏⲣⲉ ⲉϩⲉⲛⲡⲣⲟⲫⲏⲧⲏⲥ ⲛⲁⲓ ⲁⲩⲱ ⲉⲃⲟⲗϩⲛ ⲛⲉⲧⲛϩⲣϣⲓⲣⲉ ⲉⲩⲟⲩⲏⲏⲃ ⲛⲁⲓ ⲙⲏ ⲛⲛⲁⲓ ϣⲟⲟⲡ ⲁⲛ ⲛϣⲏⲣⲉ ⲙⲡ ⲡⲉϫⲉ ⲡϫⲟⲉⲓⲥ

2:12  ⲁⲩⲱ ⲛⲉⲛⲧⲁⲩⲧⲃⲃⲟⲟⲩ ⲁⲧⲉⲧⲛⲧⲥⲟⲟⲩ ⲛⲟⲩⲏⲣⲡ ⲁⲩⲱ ⲛⲉⲛⲡⲣⲟⲫⲏⲧⲏⲥ ⲁⲧⲉⲧⲛϩⲱⲛ ⲉⲧⲟⲟⲧⲟⲩ ⲉⲧⲉⲧⲛϫⲱ ⲙⲙⲟⲥ ϫⲉ ⲙⲡⲣⲡⲣⲟⲫⲏⲧⲏⲥ ⲛⲁⲛ

2:13  ⲉⲧⲃⲉ ⲡⲁⲓ ⲉⲓⲥϩⲏⲏⲧⲉ ⲁⲛⲟⲕ ϯⲛⲁⲥⲕⲣⲕⲣⲧⲏⲩⲧⲛ ⲙⲡⲉⲥⲙⲟⲧ ⲉϣⲁⲣⲉ ⲟⲩⲁϭⲟⲗⲧⲉ ⲥⲕⲟⲣⲕⲣ ⲉⲥⲙⲉϩ ⲛⲣⲟⲟⲩⲉ

2:14  ⲁⲩⲱ ⲡⲉϥⲡⲱⲧ ⲛϥⲛⲁⲡⲱⲧ ⲁⲛ ⲁⲩⲱ ⲡϫⲱⲱⲣⲉ ⲛⲥⲛⲁⲧⲁϫⲣⲟϥ ⲁⲛ ⲛϭⲓ ⲧⲉϥⲛⲟⲙⲧⲉ ⲁⲩⲱ ⲡⲣⲉϥⲙⲓϣⲉ ⲛϥⲛⲁϣⲛⲟⲩϩⲙ ⲁⲛ ⲛⲧⲉϥⲯⲩⲭⲏ

2:15  ⲁⲩⲱ ⲡⲣⲉϥⲛⲉϫ ⲥⲟⲧⲉ ⲛϥⲛⲁϣⲧⲱⲕ ⲉϩⲟⲩⲛ ⲁⲛ ⲁⲩⲱ ⲡⲉⲧⲁⲥⲱⲟⲩ ϩⲛ ⲛⲉϥⲟⲩⲉⲣⲏⲧⲉ ⲛⲛⲉϥⲛⲁϩⲙⲉϥ ⲟⲩⲇⲉ ⲡⲉϩⲓⲡⲡⲉⲩⲥ ⲛⲛⲉϥⲛⲟⲩϩⲙ ⲛⲧⲉϥⲯⲩⲭⲏ

2:16  ⲁⲩⲱ ⲡϫⲁⲣϩⲏⲧ ϩⲛ ⲧⲉϥⲙⲛⲧϫⲱⲱⲣⲉ ϥⲛⲁⲡⲱⲧ ⲉⲃⲟⲗ ⲉϥⲃⲏϣ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲡⲉϫⲉ ⲡϫⲟⲉⲓⲥ

Chapter 3

3:1  ⲥⲱⲧⲙ ⲉⲡⲉⲓϣⲁϫⲉ ⲉⲛⲧⲁⲡϫⲟⲉⲓⲥ ϫⲟⲟϥ ⲉϫⲛ ⲧⲏⲩⲧⲛ ⲡⲏⲓ ⲙⲡ ⲁⲩⲱ ⲉϫⲛ ⲫⲩⲗⲏ ⲛⲓⲙ ⲧⲁⲓ ⲛⲧⲁⲓⲛⲧⲥ ⲉⲃⲟⲗ ϩⲙ ⲡⲕⲁϩ ⲛⲕⲏⲙⲉ ⲉⲓϫⲱ ⲙⲙⲟⲥ

3:2  ϫⲉ ⲡⲗⲏⲛ ⲛⲧⲱⲧⲛ ⲁⲓⲥⲟⲩⲛ ⲧⲏⲩⲧⲛ ⲟⲩⲧⲱⲟⲩ ⲛⲛⲉⲫⲩⲗⲟⲟⲩⲉ ⲧⲏⲣⲟⲩ ⲙⲡⲕⲁϩ ⲉⲧⲃⲉ ⲡⲁⲓ ϯⲛⲁϭⲙ ⲡϣⲓⲛⲉ ⲛⲛⲉⲧⲡϫⲓⲛϭⲟⲛⲥ ⲉϫⲛ ⲧⲏⲩⲧⲛ

3:3  ⲙⲏ ⲟⲩⲛ ⲥⲛⲁⲩ ⲛⲁⲙⲟⲟϣⲉ ϩⲓ ⲟⲩⲥⲟⲡ ⲛⲥⲉⲧⲙⲥⲟⲩⲛ ⲛⲉⲩⲉⲣⲏⲩ ⲉⲡⲧⲏⲣϥ

3:4  ⲏ ⲉϥⲛⲁⲱϣ ⲉⲃⲟⲗ ⲛϭⲓ ⲟⲩⲙⲟⲩⲓ ⲉⲃⲟⲗ ϩⲙ ⲡⲉϥⲙⲁ ⲛϣⲏⲛ ⲉⲙⲛⲧϥ ⲡⲁϩⲥ ⲙⲙⲁⲩ ⲙⲏ ⲟⲩⲛ ⲟⲩⲙⲁⲥ ⲙⲙⲟⲩⲓ ⲛⲁϯ ⲙⲡⲉϥϩⲣⲟⲟⲩ ⲉⲡⲧⲏⲣϥ ⲉⲃⲟⲗ ϩⲙ ⲡⲉϥⲃⲏⲃ ⲛϥⲧⲙϭⲉⲡ ⲟⲩⲗⲁⲁⲩ

3:5  ⲙⲏ ⲟⲩⲛ ⲟⲩϩⲁⲗⲏⲧ ⲛⲁϩⲉ ⲉϫⲙ ⲡⲕⲁϩ ⲁϫⲙ ⲡⲉⲧϭⲟⲣϭ ⲉⲣⲟϥ ⲙⲏ ⲟⲩⲛ ⲟⲩⲡⲁϣ ⲛⲁⲟⲩⲱⲛ ϩⲓϫⲙ ⲡⲕⲁϩ ⲁϫⲛ ϭⲉⲡ ⲟⲩⲗⲁⲁⲩ

3:6  ⲙⲏ ⲟⲩⲛ ⲟⲩⲥⲁⲗⲡⲓⲅⲝ ⲛⲁⲱϣ ⲉⲃⲟⲗ ϩⲛ ⲟⲩⲡⲟⲗⲓⲥ ⲛⲧⲉⲧⲙ ⲡⲙⲏⲏϣⲉ ϣⲧⲟⲣⲧⲣ ⲙⲏ ⲟⲩⲛ ⲟⲩⲕⲁⲕⲓⲁ ⲛⲁϣⲱⲡⲉ ϩⲛ ⲟⲩⲡⲟⲗⲓⲥ ⲉⲙⲡⲉ ⲡϫⲟⲉⲓⲥ ⲧⲣⲉⲥϣⲱⲡⲉ

3:7  ⲉⲧⲃⲉ ϫⲉ ⲙⲡϫⲟⲉⲓⲥ ⲛⲁⲉⲓⲣⲉ ⲁⲛ ⲛⲟⲩϩⲱⲃ ⲛϥⲧⲙϭⲱⲗⲡ ⲉⲃⲟⲗ ⲛⲧⲉϥⲥⲃⲱ ⲉⲛⲉϥϩⲙϩⲁⲗ ⲛⲉⲡⲣⲟⲫⲏⲧⲏⲥ

3:8  ⲟⲩⲛ ⲟⲩⲙⲟⲩⲓ ⲛⲁⲱϣ ⲉⲃⲟⲗ ⲁⲩⲱ ⲛⲓⲙ ⲡⲉⲧⲉⲛϥⲛⲁⲣ ϩⲟⲧⲉ ⲁⲛ ⲡϫⲟⲉⲓⲥ ⲡⲛⲟⲩⲧⲉ ⲁϥϣⲁϫⲉ ⲁⲩⲱ ⲛⲓⲙ ⲡⲉⲧⲉⲛϥⲛⲁⲡⲣⲟⲫⲏⲧⲉⲩⲉ ⲁⲛ

3:9  ⲧⲁⲟⲩⲟⲟⲩ ⲉⲛⲉⲭⲱⲣⲁ ⲉⲧ ϩⲛ ⲛⲁⲥⲥⲩⲣⲉⲓⲟⲥ ⲁⲩⲱ ⲉⲛⲉⲭⲱⲣⲁ ⲛⲕⲏⲙⲉ ⲛⲧⲉⲧⲛϫⲟⲟⲥ ϫⲉ ⲥⲉϩⲧⲏⲩⲧⲛ ⲉϩⲟⲩⲛ ⲉⲡⲧⲟⲟⲩ ⲛⲧⲥⲁⲙⲁⲣⲓⲁ ⲛⲧⲉⲧⲛⲛⲁⲩ ⲉϩⲉⲛϣⲡⲏⲣⲉ ⲉⲛⲁϣⲱⲟⲩ ϩⲛ ⲧⲥⲙⲏⲧⲉ ⲁⲩⲱ ⲧⲙⲛⲧⲣⲉϥϫⲓϫⲛⲁϩ ⲉⲧ ⲛϩⲏⲧⲥ ⲛⲉⲧⲟⲩϩⲓⲗⲁ ⲉⲣⲟⲟⲩ ⲥⲉϩ ⲛⲧⲉⲥⲙⲏⲧⲉ

3:10  ⲁⲩⲱ ⲛⲧⲟⲟⲩ ⲙⲡⲟⲩⲥⲟⲩⲛ ⲡⲥⲟⲟⲩⲛ ⲉⲁⲁϥ ⲡⲉϫⲉ ⲡϫⲟⲉⲓⲥ ⲛⲉⲧⲥⲱⲟⲩϩ ⲛⲁⲩ ⲉϩⲟⲩⲛ ⲛⲟⲩϫⲓⲛϭⲟⲛⲥ ⲙⲛ ⲟⲩⲧⲁⲗⲁⲓⲡⲱⲣⲓⲁ ϩⲛ ⲛⲉⲩⲭⲱⲣⲁ

3:11  ⲉⲧⲃⲉ ⲡⲁⲓ ⲛⲁⲓ ⲛⲉⲧⲉⲣⲉ ⲡϫⲟⲉⲓⲥ ϫⲱ ⲙⲙⲟⲟⲩ ϫⲉ ⲧⲩⲣⲟⲥ ⲛⲁⲣϫⲁⲓⲉ ϩⲙ ⲡⲕⲁϩ ⲉⲧ ϩⲙ ⲡⲉⲥⲕⲱⲧⲉ ⲁⲩⲱ ϥⲛⲁⲧⲁⲩⲟ ⲉⲡⲉⲥⲏⲧ ⲛⲧⲟⲩϭⲟⲙ ⲉⲃⲟⲗ ⲛϩⲏⲧⲉ ⲛⲥⲉⲧⲱⲣⲡ ⲛⲟⲩⲭⲱⲣⲁ

3:12  ⲉⲧⲃⲉ ⲡⲁⲓ ⲛⲁⲓ ⲛⲉⲧⲉⲣⲉ ⲡϫⲟⲉⲓⲥ ϫⲱ ⲙⲙⲟⲟⲩ ϫⲉ ⲙⲡⲉⲥⲙⲟⲧ ⲉϥϣⲁⲛⲧⲱⲕⲙ ⲛϭⲓ ⲡϣⲱⲥ ⲉⲃⲟⲗ ϩⲛ ⲧⲧⲁⲡⲣⲟ ⲙⲡⲙⲟⲩⲓ ⲛⲟⲩⲉⲣⲏⲧⲉ ⲥⲛⲧⲉ ⲏ ⲟⲩⲙⲉⲣⲟⲥ ⲙⲙⲁⲁϫⲉ ⲧⲁⲓ ⲧⲉ ⲑⲉ ⲉⲧⲟⲩⲛⲁⲧⲱⲕⲙ ⲛⲛϣⲏⲣⲉ ⲙⲡ ⲛⲉⲧⲟⲩⲏϩ ϩⲛ ⲧⲥⲁⲙⲁⲣⲓⲁ ⲙⲡⲙⲧⲟ ⲉⲃⲟⲗ ⲛⲟⲩⲫⲩⲗⲏ ϩⲛ ⲇⲁⲙⲁⲥⲕⲟⲥ ⲛⲟⲩⲏⲏⲃ

3:13  ⲥⲱⲧⲙ ⲛⲧⲉⲧⲛⲣ ⲙⲛⲧⲣⲉ ⲙⲡⲏⲓ ⲛⲓⲁⲕⲱⲃ ⲡⲉϫⲉ ⲡϫⲟⲉⲓⲥ ⲡⲛⲟⲩⲧⲉ ⲛⲛϭⲟⲙ

3:14  ⲉⲃⲟⲗ ϫⲉ ϩⲙ ⲡⲉϩⲟⲟⲩ ⲉϯⲛⲁϫⲓ ⲕⲃⲁ ⲛⲛⲉⲙⲛⲧϣⲁϥⲧⲉ ⲙⲡ ⲉϩⲣⲁⲓ ⲉϫⲱϥ ϯⲛⲁϫⲓⲕⲃⲁ ⲟⲛ ⲡⲉ ⲛⲛⲉⲑⲩⲥⲓⲁⲥⲧⲏⲣⲓⲟⲛ ⲛⲃⲁⲓⲑⲏⲗ ⲁⲩⲱ ⲛⲧⲁⲡ ⲙⲡⲉⲑⲩⲥⲓⲁⲥⲧⲏⲣⲓⲟⲛ ⲥⲉⲛⲁϣⲣϣⲱⲣⲟⲩ ⲛⲥⲉϩⲉ ⲉϫⲙ ⲡⲕⲁϩ

3:15  ⲁⲩⲱ ϯⲛⲁϣⲧⲟⲣⲧⲣ ⲙⲡⲓⲏ ⲉⲧϣⲟϫⲡ ⲛⲧⲁⲡⲁⲧⲁⲥⲥⲉ ⲙⲙⲟϥ ⲉϫⲙ ⲡⲏⲓ ⲉⲧϫⲓⲕⲃⲟ ⲙⲡϣⲱⲙ ⲁⲩⲱ ⲥⲉⲛⲁⲧⲁⲕⲟ ⲛϭⲓ ⲛⲏⲓ ⲛⲉⲗⲉⲫⲁⲛⲧⲓⲛⲟⲛ ⲛⲧⲉ ϩⲉⲛⲕⲉⲏⲓ ⲉⲛⲁϣⲱⲟⲩ ⲟⲩⲱϩ ⲉⲣⲟⲟⲩ ⲡⲉϫⲉ ⲡϫⲟⲉⲓⲥ ⲡⲛⲟⲩⲧⲉ

Chapter 4

4:1  ⲥⲱⲧⲙ ⲉⲡⲉⲓϣⲁϫⲉ ⲛⲃⲁϩⲥⲉ ⲛⲧⲃⲁⲥⲁⲛ ⲛⲉⲧⲟⲩⲏϩ ϩⲙ ⲡⲧⲟⲟⲩ ⲛⲧⲥⲁⲙⲁⲣⲓⲁ ⲛⲉⲩϫⲓⲛϫⲛⲁϩ ⲛⲛϩⲏⲕⲉ ⲁⲩⲱ ⲉⲧϩⲱⲙ ⲉϫⲛ ⲛⲉⲧⲙⲟⲕϩ ⲛⲉⲧϫⲱ ⲙⲙⲟⲥ ⲛⲛⲉⲩϫⲓⲥⲟⲟⲩⲉ ϫⲉ ⲙⲁ ⲛⲁⲛ ⲛⲟⲩⲏⲣⲡ ⲉⲧⲣⲉⲛⲥⲱ

4:2  ⲁ ⲡϫⲟⲉⲓⲥ ⲡⲛⲟⲩⲧⲉ ⲱⲣⲕ ⲙⲡⲉϥⲧⲟⲟⲩ ⲉⲧⲟⲩⲁⲁⲃ ϫⲉ ⲉⲓⲥ ϩⲉⲛϩⲟⲟⲩ ⲛⲏⲩ ⲉϫⲛⲧⲏⲩⲧⲛ ⲛⲥⲉϫⲓⲧⲏⲩⲧⲛ ϩⲛ ϩⲉⲛϩⲟⲡⲗⲟⲛ ⲁⲩⲱ ⲛⲉⲧ ⲛⲙⲙⲏⲧⲛ ⲥⲉⲛⲁⲛⲟϫⲟⲩ ⲉϩⲉⲛⲭⲁⲗⲕⲓⲟⲛ ⲉⲩⲥⲁϩⲧⲉ ϩⲁⲣⲟⲟⲩ ⲛϭⲓ ⲛⲉϣⲱⲧⲉ ⲛⲗⲟⲓⲙⲟⲥ

4:3  ⲁⲩⲱ ⲥⲉⲛⲁⲛⲧⲏⲩⲧⲛ ⲉⲃⲟⲗ ⲛϩⲟⲟⲩⲧ ⲙⲛ ⲛⲥϩⲓⲙⲉ ⲉⲧⲉⲧⲛⲃⲏϣ ⲙⲡϩⲟⲧⲉ ⲉⲃⲟⲗ ⲛⲛⲉⲧⲛⲉⲣⲏⲩ ⲁⲩⲱ ⲥⲉⲛⲁⲛⲉϫⲧⲏⲩⲧⲛ ⲉⲡⲧⲟⲟⲩ ⲛⲣⲉⲙⲙⲁ ⲡⲉϫⲉ ⲡϫⲟⲉⲓⲥ ⲡⲛⲟⲩⲧⲉ

4:4  ⲁⲧⲉⲧⲛⲃⲱⲕ ⲉϩⲟⲩⲛ ⲉⲃⲁⲓⲑⲏⲗ ⲁⲩⲱ ⲁⲧⲉⲧⲛⲣϣⲁϥⲧⲉ ⲁⲩⲱ ⲁⲧⲉⲧⲛⲃⲱⲕ ⲉϩⲟⲩⲛ ⲉⲅⲁⲗⲅⲁⲗⲁ ⲁⲧⲉⲧⲛⲧⲁϣⲉ ⲛⲉⲧⲛⲁⲛⲟⲙⲓⲁ ⲁⲩⲱ ⲧⲉⲧⲛⲉⲓⲛⲉ ⲙⲡⲛⲁⲩ ⲛϩⲧⲟⲟⲩⲉ ⲛⲛⲉⲧⲛⲑⲩⲥⲓⲁ ⲉⲡⲙⲉϩϣⲱⲙⲛⲧ ⲛϩⲟⲟⲩ ⲛⲛⲉⲧⲛⲣⲙⲏⲧ

4:5  ⲁⲩⲱ ⲁⲩⲱϣ ϩⲓ ⲃⲟⲗ ⲙⲡⲛⲟⲙⲟⲥ ⲁⲩⲧⲁⲩⲟ ⲛϩⲉⲛϩⲟⲙⲟⲗⲟⲅⲓⲁ ⲁϫⲓⲥ ϫⲉ ⲛⲁⲓ ⲁⲧⲉⲧⲛⲙⲉⲣⲓⲧⲟⲩ ⲛϣⲏⲣⲉ ⲙⲡ ⲡⲉϫⲉ ⲡϫⲟⲉⲓⲥ

4:6  ⲁⲩⲱ ⲁⲛⲟⲕ ϯⲛⲁϯ ⲛⲏⲧⲛ ⲛⲟⲩⲛⲟⲩⲙⲓⲥ ⲛⲟⲃϩⲉ ϩⲛ ⲛⲉⲧⲉⲛⲡⲟⲗⲓⲥ ⲧⲏⲣⲟⲩ ⲁⲩⲱ ⲟⲩⲣϭⲣⲱϩ ⲛⲟⲉⲓⲕ ϩⲛ ⲛⲏⲧⲛⲙⲁ ⲧⲏⲣⲟⲩ ⲁⲩⲱ ⲙⲡⲉⲧⲛⲕⲧⲉⲧⲏⲩⲧⲛ ⲉⲣⲟⲓ ⲡⲉϫⲉ ⲡϫⲟⲉⲓⲥ

4:7  ⲁⲩⲱ ⲁⲛⲟⲕ ⲁⲓⲁⲙⲁϩⲧⲉ ⲙⲡϩⲟⲙⲡⲉ ϩⲁ ⲑⲏ ⲛϣⲙⲛⲧ ⲛⲉⲃⲟⲧ ⲛⲧⲉ ⲡϫⲱⲱⲗⲉ ⲁⲩⲱ ϯⲛⲁϩⲱⲟⲩ ⲉϫⲛ ⲟⲩⲡⲟⲗⲓⲥ ⲛⲟⲩⲱⲧ ⲕⲉⲡⲟⲗⲓⲥ ⲇⲉ ⲛϯⲛⲁϩⲱⲟⲩ ⲁⲛ ⲉϫⲱⲥ ⲟⲩⲛ ⲟⲩⲙⲉⲣⲓⲥ ⲛⲁϫⲓ ⲙⲟⲟⲩ ⲁⲩⲱ ⲧⲙⲉⲣⲓⲥ ⲉⲧⲛϯⲛⲁϩⲱⲟⲩ ⲁⲛ ⲉϫⲱⲥ ⲥⲛⲁϣⲱϥ

4:8  ⲁⲩⲱ ⲥⲉⲛⲁⲥⲱⲟⲩϩ ⲉϩⲟⲩⲛ ⲛϭⲓ ⲥⲛⲧⲉ ⲙⲛ ϣⲟⲙⲛⲧⲉ ⲙⲡⲟⲗⲓⲥ ⲉⲩⲡⲟⲗⲓⲥ ⲛⲟⲩⲱⲧ ⲉⲥⲉⲙⲟⲟⲩ ⲁⲩⲱ ⲛⲥⲉⲧⲙⲥⲉⲓ ⲁⲩⲱ ⲙⲡⲉⲧⲛⲕⲧⲉⲧⲏⲩⲧⲛ ⲉⲣⲟⲓ ⲡⲉϫⲉ ⲡϫⲟⲉⲓⲥ

4:9  ⲉⲓⲡⲁⲧⲁⲥⲥⲉ ⲙⲙⲱⲧⲛ ϩⲛ ⲟⲩϩⲙⲟⲙ ⲙⲛ ⲟⲩϣⲱⲛⲉ ⲛⲛⲓⲕⲧⲉⲣⲟⲥ ⲁⲩⲱ ⲁⲧⲉⲧⲛⲧⲁϣⲉ ⲛ…

Chapter 5

Chapter 6

Chapter 7

7:14  … ⲁⲗⲗⲁ ⲁⲛⲅ ⲟⲩⲙⲁⲛⲉⲃⲁⲁⲙⲡⲉ ⲉⲓⲟⲩⲟⲩⲕⲉ ⲛϩⲉⲛⲕⲙⲡⲉ

7:15  ⲁⲩⲱ ⲁ ⲡϫⲟⲉⲓⲥ ϫⲓⲧ ⲉⲃⲟⲗϩⲛ ⲛⲁⲉⲥⲟⲟⲩ ⲡⲉϫⲉ ⲡϫⲟⲉⲓⲥ ⲛⲁⲓ ϫⲉ ⲃⲱⲕ ⲛⲅⲡⲣⲟⲫⲏⲧⲉⲩⲉ ⲉϫⲙ ⲡⲁⲗⲁⲟⲥ ⲡ

7:16  ⲁⲩⲱ ⲧⲉⲛⲟⲩ ⲥⲱⲧⲙ ⲉⲡϣⲁϫⲉ ⲙⲡϫⲟⲉⲓⲥ ⲛⲧⲟⲕ ⲕϫⲱ ⲙⲙⲟⲥ ϫⲉ ⲛⲛⲉⲕⲡⲣⲟⲫⲏⲧⲉⲩⲉ ⲙⲡ ⲁⲩⲱ ⲛⲛⲉⲕⲥⲉⲩϩ ⲙⲏⲏϣⲉ ⲉϩⲟⲩⲛ ⲉϫⲙ ⲡⲏⲓ ⲛⲓⲁⲕⲱⲃ

7:17  ⲉⲧⲃⲉ ⲡⲁⲓ ⲛⲁⲓ ⲛⲉⲧⲉⲣⲉ ⲡϫⲟⲉⲓⲥ ϫⲱ ⲙⲙⲟⲟⲩ ϫⲉ ⲧⲉⲕⲥϩⲓⲙⲉ ⲛⲁⲡⲟⲣⲛⲉⲩⲉ ϩⲛ ⲧⲡⲟⲗⲓⲥ ⲁⲩⲱ ⲛⲉⲕϣⲏⲣⲉ ⲙⲛ ⲛⲉⲕϣⲉⲉⲣⲉ ⲥⲉⲛⲁϩⲉ ϩⲛ ⲧⲥⲏϥⲉ ⲁⲩⲱ ⲡⲉⲕⲕⲁϩ ⲥⲉⲛⲁϣⲓⲧϥ ϩⲛ ⲟⲩⲛⲟⲩϩ ⲁⲩⲱ ⲛⲧⲟⲕ ⲕⲛⲁⲙⲟⲩ ϩⲛ ⲟⲩⲕⲁϩ ⲉϥϫⲁϩⲙ ⲡ ⲇⲉ ⲥⲉⲛⲁϥⲓⲧϥ ⲛⲁⲓⲭⲙⲁⲗⲱⲧⲟⲥ ⲉⲃⲟⲗϩⲙ ⲡⲉϥⲕⲁϩ ⲧⲁⲓ ⲧⲉ ⲑⲉ ⲛⲧⲁ ⲡϫⲟⲉⲓⲥ ⲧⲟⲩⲟⲓ

Chapter 8

8:1  ⲁⲩⲱ ⲉⲓⲥ ⲟⲩϩⲛⲁⲁⲩ ⲛϭⲉⲣⲏϭ ⲡⲉϫⲉ ⲡϫⲟⲉⲓⲥ ⲛⲁⲓ ϫⲉ ⲉⲕⲛⲁⲩ ⲛⲧⲟⲕ ⲉⲟⲩ ϩⲁⲙⲱⲥ ⲡⲉϫⲁⲓ ϫⲉ ⲉⲩϩⲛⲁⲁⲩ ⲛϭⲉⲣⲏϭ

8:2  ⲡⲉϫⲉ ⲡϫⲟⲉⲓⲥ ⲛⲁⲓ ϫⲉ ⲁ ⲑⲁⲏ ⲉⲓ ⲉϫⲉⲙ ⲡⲁⲗⲁⲟⲥ ⲡ ⲛⲛⲁⲟⲩⲱϩ ϭⲉ ⲉⲧⲟⲟⲧ ⲉⲥⲁⲁⲧϥ

8:3  ⲁⲩⲱ ⲥⲉⲛⲁⲱϣ ⲉⲃⲟⲗ ⲛϭⲓ ⲛⲙⲉϣϯⲃⲥ ⲙⲡⲣⲡⲉ ϩⲛ ⲙⲙⲉⲗⲁⲧⲉ ⲛⲕⲛϩⲉ ϩⲙ ⲡⲉϩⲣⲟⲟⲩ ⲉⲧⲙⲙⲁⲩ ⲡⲉϫⲉ ⲡϫⲟⲉⲓⲥ ⲛⲁϣⲉ ⲧⲣⲁϩⲧⲥ ⲛⲧⲁⲥϣⲱⲡⲉ ⲙⲛ ⲗⲁⲁⲩ ⲛⲁϯ ⲙⲡⲉϥϩⲣⲟⲟⲩ ϩⲛ ⲗⲁⲁⲩ ⲙⲙⲁ

8:4  ⲥⲱⲧⲙ ϭⲉ ⲉⲛⲁⲓ ⲛⲉⲧϩⲟϫϩϫ ⲙⲡⲣⲧⲙⲟⲕϩ ⲙⲡⲛⲁⲩ ⲛϩⲧⲟⲟⲩⲉ ⲁⲩⲱ ⲛⲉⲧⲑⲙⲕⲉ ⲉϫⲛ ⲛϩⲏⲕⲉ ϩⲓϫⲙ ⲡⲕⲁϩ

8:5  ⲛⲉⲧϫⲱ ⲙⲙⲟⲥ ϫⲉ ⲉⲣⲉ ⲡⲉⲃⲟⲧ ⲛⲁⲟⲩⲱ ⲧⲛⲁⲩ ⲛⲧⲛϯ ⲉⲃⲟⲗ ⲁⲩⲱ ⲛⲥⲁⲃⲃⲁⲧⲟⲛ ϫⲉ ⲉⲛⲉⲟⲩⲱⲛ ⲙⲡⲉⲛⲁϩⲟ ⲉⲧⲁⲙⲓⲉ ⲟⲩⲕⲟⲩⲓ ⲛⲟⲓⲡⲉ ⲁⲩⲱ ⲉϩⲉⲣϣ ⲡϣⲓ ⲁⲩⲱ ⲉⲧⲁⲙⲓⲉ ⲟⲩⲙⲁϣⲉ ⲛⲕⲣⲟϥ

8:6  ⲉⲧⲣⲛⲕⲱ ⲛⲁⲛ ⲛⲛⲉⲧⲙⲟⲕϩ ϩⲁ ⲟⲩϩⲁⲧ ⲁⲩⲱ ⲛϩⲏⲕⲉ ⲉⲡⲙⲁ ⲛϩⲉⲛⲧⲟⲟⲩⲉ ⲛⲧⲉⲛⲣ ⲉⲓⲉⲡϣⲱⲧ ⲉⲃⲟⲗϩⲛ ⲅⲉⲛⲏⲙⲁ ⲛⲓⲙ

8:7  ⲁ ⲡϫⲟⲉⲓⲥ ⲱⲣⲕ ⲉϫⲛ ⲧⲙⲛⲧϫⲁⲥⲓϩⲏⲧ ⲛⲓⲁⲕⲱⲃ ϫⲉ ⲉⲛⲉ ⲥⲉⲛⲁⲣ ⲡⲱⲃϣ ⲛⲛⲉⲧⲛϩⲃⲏⲩⲉ ⲧⲏⲣⲟⲩ ⲉⲩϫⲣⲟ

8:8  ⲙⲏ ⲉϫⲛ ⲛⲁⲓ ⲙⲡⲕⲁϩ ⲛⲁϣⲧⲟⲣⲧⲣ ⲁⲛ ⲛⲥⲉⲣϩⲏⲃⲉ ⲛϭⲓ ⲟⲩⲟⲛ ⲛⲓⲙ ⲉⲧⲟⲩⲏϩ ϩⲣⲁⲓ ⲛϩⲏⲧϥ ⲁⲩⲱ ⲧⲉⲩϩⲁⲏ ⲛⲁⲉⲓ ⲉϩⲣⲁⲓ ⲛⲑⲉ ⲛⲟⲩⲉⲓⲉⲣⲟ ⲁⲩⲱ ⲥⲉⲛⲁⲉⲓ ⲉⲡⲉⲥⲏⲧ ⲛⲑⲉ ⲙⲡⲉⲓⲉⲣⲟ ⲛⲕⲏⲙⲉ

8:9  ⲁⲩⲱ ⲥⲛⲁϣⲱⲡⲉ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲡⲉϫⲉ ⲡϫⲟⲉⲓⲥ ⲡⲣⲏ ⲛⲁϩⲱⲧⲡ ⲙⲡⲛⲟⲩ ⲙⲙⲉⲉⲣⲉ ⲁⲩⲱ ⲡⲟⲩⲟⲉⲓⲛ ϥⲛⲁⲣⲕⲁⲕⲉ ϩⲓϫⲙ ⲡⲕⲁϩ ϩⲙ ⲡⲉϩⲟⲟⲩ

8:10  ϯⲛⲁⲡⲱⲱⲛⲉ ⲛⲉⲧⲛϣⲁ ⲉⲩϩⲏⲃⲉ ⲁⲩⲱ ⲛⲉⲧⲛⲱⲇⲏ ⲧⲏⲣⲟⲩ ⲉⲩⲧⲟⲉⲓⲧ ⲛⲧⲁⲧⲣⲉ ⲟⲩⲟⲛ ⲛⲓⲙ ⲕⲁ ⲟⲩϭⲟⲟⲩⲛⲉ ϩⲓϫⲛ ⲧⲉⲩϯⲡⲉ ⲛⲧⲁⲧⲣⲉ ⲟⲩⲟⲛ ⲛⲓⲙ ϩⲉⲉⲕⲉ ϫⲱⲟⲩ ⲁⲩⲱ ϯⲛⲁⲕⲁⲁϥ ⲛⲑⲉ ⲙⲡϩⲉⲃⲉ ⲛⲟⲩⲙⲉⲣⲓⲧ ⲁⲩⲱ ⲛⲉⲧⲛⲙⲙⲁϥ ⲉⲩϩⲟⲟⲩ ⲛⲙⲕⲁϩ ⲛϩⲏⲧ

8:11  ⲉⲓⲥ ϩⲉⲛϩⲟⲟⲩ ⲛⲏⲩ ⲡⲉϫⲉ ⲡϫⲟⲉⲓⲥ ⲧⲁϫⲟⲟⲩ ⲛⲟⲩϩⲉⲃⲱⲱⲛ ⲉϫⲙ ⲡⲕⲁϩⲣ ⲛⲟⲩϩⲉⲃⲱⲱⲛ ⲁⲛ ⲛⲟⲉⲓⲕ ⲟⲩⲇⲉ ⲛⲟⲩⲉⲓⲃⲉ ⲁⲛ ⲙⲙⲟⲟⲩ ⲁⲗⲗⲁ ⲟⲩϩⲉⲃⲱⲱⲛ ⲛⲥⲱⲧⲙ ⲉⲡϣⲁϫⲉ ⲙⲡϫⲟⲉⲓⲥ

8:12  ⲁⲩⲱ ⲙⲙⲟⲟⲩ ⲥⲉⲛⲁⲛⲟⲉⲓⲛ ϫⲓⲛ ⲑⲁⲗⲁⲥⲥⲁ ϣⲁ ⲑⲁⲗⲁⲥⲥⲁ ⲁⲩⲱ ϫⲓⲛ ⲡⲙϩⲓⲧ ϣⲁ ⲙⲙⲁ ⲛϣⲁⲥⲉⲛⲁⲡⲱⲧ ⲉⲩϣⲓⲛⲉ ⲛⲥⲁ ⲡϣⲁϫⲉ ⲙⲡϫⲟⲉⲓⲥ ⲛⲥⲉⲧⲙϩⲉ ⲉⲣⲟϥ

8:13  ϩⲙ ⲡⲉϩⲟⲟⲩ ⲉⲧⲙⲙⲁⲩ ⲥⲉⲛⲁⲱϫⲛ ⲛϭⲓ ⲙⲡⲁⲣⲑⲉⲛⲟⲥ ⲉⲧⲛⲁⲛⲟⲩⲟⲩ ⲁⲩⲱ ⲛϩⲉⲣϣⲓⲣⲉ ϩⲛ ⲟⲩⲉⲓⲃⲉ

8:14  ⲛⲉⲧⲱⲣⲕ ⲉϫⲙ ⲡⲕⲱ ⲉⲃⲟⲗ ⲛⲧⲥⲁⲙⲁⲣⲓⲁ ⲉⲩϫⲱ ⲙⲙⲟⲥ ϫⲉ ⲇⲁⲛ ⲡⲟⲩⲛⲟⲩⲧⲉ ⲟⲛϩ ⲁⲩⲱ ⲡⲟⲩⲛⲟⲩⲧⲉ ⲟⲛϩ ⲃⲏⲣⲥⲁⲃⲉⲉ ⲁⲩⲱ ⲥⲉⲛⲁϩⲉ ⲛⲥⲉⲧⲙⲉϣⲧⲱⲟⲩⲛ ϭⲉ

Chapter 9

9:1  ⲁⲓⲛⲁⲩ ⲉⲡϫⲟⲉⲓⲥ ⲉϥⲁϩⲉⲣⲁⲧϥ ϩⲓϫⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲁⲩⲱ ⲡⲉϫⲁϥ ϫⲉ ϩⲓⲟⲩⲉ ⲉϫⲙ ⲡϩⲓⲗⲁⲥⲧⲏⲣⲓⲟⲛ ⲛⲧⲁⲣⲟⲩⲛⲟⲉⲓⲛ ⲛϭⲓ ⲡⲏⲗⲏ ⲉⲧϩⲓⲃⲟⲗ ⲛⲅϩⲓⲟⲩⲉ ⲉϫⲛ ⲧⲁⲡⲏ ⲛⲟⲩⲟⲛ ⲛⲓⲙ ⲁⲩⲱ ⲛⲉⲩⲕⲉⲥⲉⲉⲡⲉ ϯⲛⲁⲙⲟⲟⲩⲧⲟⲩ ϩⲛ ⲧⲥⲏϥⲉ ⲛⲧⲉⲧⲙ ⲗⲁⲁⲩ ⲣ ⲃⲟⲗ ⲛϩⲏⲧⲟⲩ ⲟⲩⲇⲉ ⲛⲧⲙ ⲗⲁⲁⲩ ⲟⲩϫⲁⲓ ⲛⲁⲩ

9:2  ⲉⲩϣⲁⲛⲃⲱⲕ ⲉϩⲣⲁⲓ ⲉⲧⲡⲉ ϯⲛⲁⲛⲧⲟⲩ ⲉⲡⲉⲥⲏⲧ ⲉⲃⲟⲗϩⲙ ⲡⲙⲁ ⲉⲧⲙⲙⲁⲩ ⲉⲩϣⲁⲛⲃⲱⲕ ⲉⲡⲉⲥⲏⲧ ⲉⲁⲙⲛⲧⲉ ⲧⲁϭⲓϫ ⲛⲁⲧⲟⲕⲙⲟⲩ ⲉϩⲣⲁⲓ ⲉⲃⲟⲗϩⲙ ⲡⲙⲁ ⲉⲧⲙⲙⲁⲩ

9:3  ⲉⲩϣⲁⲛϩⲟⲡⲟⲩ ϩⲙ ⲡϫⲱϥ ⲙⲡⲕⲁⲣⲙⲏⲗⲟⲥ ϯⲛⲁϯ ⲟⲩⲟⲓ ⲛⲥⲱⲟⲩ ϩⲙ ⲡⲙⲁ ⲉⲧⲙⲙⲁⲩ ⲧⲁⲛⲧⲟⲩ ⲉⲃⲟⲗ ⲉⲩϣⲁⲛϩⲱⲡⲟⲩ ⲙⲡⲙⲧⲟ ⲉⲃⲟ[ⲗ] ⲛⲛⲁⲃⲁⲗ ⲉϩⲣⲁⲓ ⲛⲛⲉⲧϣⲏⲕ ⲛ[ⲑⲁ]ⲗⲁⲥⲥⲁ ϯⲛⲁϩⲱⲛ ⲙⲡⲙⲁⲉ ⲉⲧⲙⲙⲁⲩ ⲉⲧⲟⲟⲧϥ ⲙⲡⲉⲇⲣⲁⲕⲱⲛ ⲛϥⲗⲟⲕⲥⲟⲩ

9:4  ⲁⲩⲱ ⲉⲩϣⲁⲛⲙⲟⲟϣⲉ ϩⲛ ⲟⲩⲁⲓⲭⲙⲁⲗⲱⲥⲓⲁ ϩⲓ ϩⲏ ⲛⲛⲉⲩϫⲓϫⲉⲉⲩ ϯⲛⲁϩⲱⲛ ⲙⲡⲙⲁ ⲉⲧⲙⲙⲁⲩ ⲉⲧⲟⲟⲧⲥ ⲛⲧⲥⲩϥⲉ ⲛⲥⲙⲟⲟⲩⲧⲟⲩ ⲁⲩⲱ ϯⲛⲁⲧⲁϫⲣⲉ ⲛⲁⲃⲁⲗ ⲉϩⲣⲁⲓ ⲉϫⲱⲟⲩ ⲉϩⲉⲛⲡⲉⲑⲟⲟⲩ ⲁⲩⲱ ⲉϩⲉⲛⲡⲉⲧⲛⲁⲛⲟⲩⲟⲩ ⲁⲛ

9:5  ⲁⲩⲱ ⲡⲉϫⲉ ⲡϫⲟⲉⲓⲥ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ ⲡⲉⲧϫⲱϩ ⲉⲡⲕⲁϩ ⲉⲧⲣⲉϥⲛⲟⲉⲓⲛ ϫⲉ ⲥⲉⲛⲁⲣϩⲏⲃⲉ ⲧⲏⲣⲟⲩ ⲛϭⲓ ⲛⲉⲩⲧⲟⲩⲏϩ ⲛϩⲏⲧϥ ⲁⲩⲱ ⲧⲉϥϩⲁⲏ ⲥⲛⲁⲉⲓ ⲉϩⲣⲁⲓ ⲛⲑⲉ ⲛⲟⲩⲉⲓⲉⲣⲟ ⲁⲩⲱ ⲥⲛⲁⲉⲓ ⲉⲡⲉⲥⲏⲧ ⲛⲑⲉ ⲙⲡⲓⲉⲣⲟ ⲛⲕⲏⲙⲉ

9:6  ⲡⲉⲧⲕⲱⲧ ϩⲛ ⲧⲡⲉ ⲙⲡⲉϥⲙⲁ ⲛⲃⲱⲕ ⲉϩⲣⲁⲓ ⲁⲩⲱ ⲡⲉϥⲉⲣⲏⲧ [ⲁϥⲥ]ⲙⲛⲥⲛⲧⲉ ⲙⲙⲟϥ ϩⲓϫⲙ ⲡⲕⲁϩ ⲡⲉⲧⲙⲟⲩⲧⲉ ⲉⲡⲙⲟⲟⲩ ⲛⲑⲁⲗⲁⲥⲥⲁ ⲁⲩⲱ ⲉϥⲡⲱϩⲧ ⲙⲙⲟϥ ⲉϫⲙ ⲡϩⲟ ⲙⲡⲕⲁϩ ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲡⲉ ⲡⲉϥⲣⲁⲛ

9:7  ⲛϣⲏⲣⲉ ⲙⲡ ⲙⲏ ⲛⲉⲧⲉⲧⲛϣⲟⲟⲡ ⲛⲁⲓ ⲁⲛ ⲛⲑⲉ ⲛⲛϣⲏⲣⲉ ⲛⲛⲉϭⲟⲟϣ ⲡⲉϫⲉ ⲡϫⲟⲉⲓⲥ ⲛⲡ ⲛⲧⲁⲓⲛⲧϥ ⲁⲛ ⲉⲃⲟⲗϩⲛ ⲕⲏⲙⲉ ⲁⲩⲱ ⲛⲁⲗⲗⲟⲫⲩⲗⲟⲥ ⲉⲃⲟⲗϩⲛ ⲧⲕⲁⲡⲡⲁⲇⲟⲕⲓⲁ ⲁⲩⲱ ⲛⲥⲩⲣⲟⲥ ⲉⲃⲟⲗϩⲛ ⲕⲉⲉⲓⲣⲁ

9:8  ⲉⲓⲥ ⲛⲃⲁⲗ ⲙⲡϫⲟⲉⲓⲥ ϭⲱϣⲧ ⲉϫⲛ ⲧⲙⲛⲧⲣⲟ ⲛⲛⲣϥⲣⲛⲟⲃⲉ ⲁⲩⲱ ϯⲛⲁϥⲓⲧⲟⲩ ⲉⲃⲟⲗ ϩⲓϫⲙ ⲡϩⲟ ⲙⲡⲕⲁϩ ⲡⲗⲏⲛ ⲛϯⲛⲁϥⲓ ⲁⲛ ⲙⲙⲁⲩ ⲉⲡⲧⲏⲣϥ ⲙⲡⲏⲓ ⲛⲓⲁⲕⲱⲃ ⲡⲉϫⲉ ⲡϫⲟⲉⲓⲥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲛⲁⲟⲩⲉϩⲥⲁϩⲛⲉ

9:9  ⲁⲩⲱ ϯⲛⲁⲧⲃⲃⲟ ⲛⲛϩⲉⲑⲛⲟⲥ ⲧⲏⲣⲟⲩ ⲙⲡ ⲙⲡⲉⲥⲙⲟⲧ ⲉϣⲁⲩⲧⲃⲃⲟ ⲙⲡϩⲁⲧ ⲛⲧⲉⲧⲙ ⲗⲁⲁⲩ ⲛϩⲏⲧⲟⲩ ⲧⲁⲕⲟ ϩⲓϫⲙ ⲡⲕⲁϩ

9:10  ⲥⲉⲛⲁⲙⲟⲩ ϩⲛ ⲟⲩⲥⲏϥⲉ ⲛϭⲓ ⲛⲣϥⲣⲛⲟⲃⲉ ⲧⲏⲣⲟⲩ ⲙⲡⲗⲁⲟⲥ ⲡⲉⲧϫⲱ ⲙⲙⲟⲥ ϫⲉ ⲛⲛⲉⲩϩⲱⲛ ⲉⲣⲟⲛ ⲛϭⲓ ⲙⲡⲉⲑⲟⲟⲩ ⲟⲩⲇⲉ ⲛⲛⲉⲩⲉⲓ ϩⲓⲱⲱⲛ

9:11  ϩⲙ ⲡⲉϩⲟⲟⲩ ⲉⲧⲙⲙⲁⲩ ϯⲛⲁⲧⲁϩⲟ ⲉⲣⲁⲧⲥ ⲛⲧⲉⲥⲕⲏⲛⲏ ⲛⲇⲁⲩⲉⲓⲇ ⲧⲉⲛⲧⲁⲥϩⲉ ⲉϩⲣⲁⲓ ⲁⲩⲱ ϯⲛⲁⲕⲱⲧ ⲛⲛⲉⲛⲧⲁⲩϩⲉ ⲉϩⲣⲁⲓ ⲛϩⲏⲧⲥ ⲁⲩⲱ ⲛⲉⲛⲧⲁⲩϣⲣϣⲱⲣⲟⲩ ⲛⲧⲁⲥ ϯⲛⲁⲧⲁϩⲟⲟⲩ ⲉⲣⲁⲧⲟⲩ ⲁⲩⲱ ϯⲛⲁⲕⲟⲧⲥ ⲛⲑⲉ ⲛⲉϩⲟⲟⲩ ⲙⲡⲁⲓⲱⲛ

9:12  ϫⲉⲕⲁⲥ ⲉⲩⲉϣⲓⲛⲉ ⲛϭⲓ ⲛϣⲱϫⲡ ⲛⲛⲣⲱⲙⲉ ⲙⲛ ⲛϩⲉⲑⲛⲟⲥ ⲧⲏⲣⲟⲩ ⲛⲧⲁⲩⲉⲡⲓⲕⲁⲗⲉⲓ ⲙⲡⲁⲣⲁⲛ ⲉϩⲣⲁⲓ ⲉϫⲱⲟⲩ ⲡⲉϫⲉ ⲡϫⲟⲉⲓⲥ ⲡⲉⲧⲉⲓⲣⲉ ⲛⲛⲁⲓ

9:13  ⲉⲓⲥ ϩⲉⲛϩⲟⲟⲩ ⲥⲉⲛⲏⲩ ⲡⲉϫⲉ ⲡϫⲟⲉⲓⲥ ⲛⲧⲉ ⲡⲱϩⲥ ⲧⲁϩⲉ ⲡϫⲱⲱⲗⲉ ⲁⲩⲱ ⲡⲉⲗⲟⲟⲗⲉ ⲛⲁⲡⲱϩ ⲙⲡⲥⲏⲩ ⲙⲡϫⲟ ⲁⲩⲱ ⲛⲧⲟⲩⲉⲓⲏ ⲥⲉⲛⲁϣⲟⲩⲟ ⲉⲃⲟⲗ ⲛⲟⲩϩⲗⲟϭ ⲛⲧⲉ ⲛⲃⲟⲩⲛⲟⲥ ⲧⲏⲣⲟⲩ ⲣⲱⲧ ⲛϣⲏⲛ

9:14  ⲁⲩⲱ ϯⲛⲁⲕⲧⲟ ⲛⲧⲁⲓⲭⲙⲁⲗⲱⲥⲓⲁ ⲙⲡⲁⲗⲁⲟⲥ ⲡ ⲛⲥⲉⲕⲱⲧ ⲛⲙⲡⲟⲗⲓⲥ ⲛⲧⲁⲩⲧⲁⲕⲟⲟⲩ ⲛⲥⲉⲟⲩⲱϩ ⲛϩⲏⲧⲟⲩ ⲛⲥⲉⲧⲱϭⲉ ⲛϩⲉⲛⲙⲁ ⲛⲉⲗⲟⲟⲗⲉ ⲛⲥⲉⲥⲉ ⲡⲉⲩⲏⲣⲡ ⲛⲥⲉϫⲟ ⲛϩⲉⲛϣⲛⲏ ⲛⲥⲉⲟⲩⲱⲙ ⲙⲡⲉⲩⲕⲁⲣⲡⲟⲥ

9:15  ⲁⲩⲱ ϯⲛⲁⲧⲟϭⲟⲩ ϩⲓϫⲙ ⲡⲉⲩⲕⲁϩ ⲛⲥⲉⲧⲙⲡⲟⲟⲛⲟⲩ ⲉⲃⲟⲗ ϫⲓⲛ ⲡⲉⲓⲛⲁⲩ ⲉⲃⲟⲗϩⲙ ⲡⲉⲩⲕⲁϩ ⲡⲁⲓ ⲛⲧⲁⲓⲧⲁⲁϥ ⲛⲁⲩ ⲡⲉϫⲉ ⲡϫⲟⲉⲓⲥ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ