Kapingamarangi - Amos

Chapter 1

1:1  Aanei go nnelekai Amos, tangada hagaloohi-siibi mai tama-waahale go Tekoa. Nia ngadau e-lua i-mua tenua deelaa ne-ngalungalua i-di madagoaa Uzziah nogo king i Judah, gei Jeroboam, tama-daane Joash, nogo king i Israel, gei God gu-haga-honu Amos gi nnelekai aanei mai di gili digau Israel.

1:2  Amos ga-helekai, “Dimaadua e-ngoloolo gi-nua mai i-di Gonduu Zion, gei dono lee e-haluihalulu mai Jerusalem. Nia gowaa haangai-siibi guu-mae, gei nia geinga-tolo ala i-hongo di Gonduu Carmel guu-pobo.”

1:3  Dimaadua e-helekai, “Digau Damascus gu-haihai nadau huaidu e-logowaahee, gei Au ga-hagaduadua digaula. Digaula gu-dadaaligi hagahuaidu digau Gilead,

1:4  deelaa di mee gaa-hidi-iei Au ga-hagau-ia dagu ahi gi-hongo di hale damana o King Hazael dela ne-haga-duu-aga, gaa-dudu gi-lala nia abaaba mau-dangihi hai-dauwa di King Benhadad.

1:5  Gei Au gaa-oho nia bontai di abaaba o-di waahale Damascus, gaa-lahi gi-daha digau ala i-di Gowaa-Baba o Aven mo-di tagi o Beth=Eden. Gei digau Syria gaa-lahi gi-daha be digau galabudi gaa-dugu i tenua go Kir.”

1:6  Dimaadua e-helekai, “Nia daangada o Gaza gu-haihai nadau huaidu e-logowaahee, gei Au ga-hagaduadua digaula. Digaula guu-lahi nia daangada huogodoo o-nia guongo, gaa-hui gi digau Edom gii-hai nadau hege.

1:7  Deelaa di mee ne-hidi-iei Au, ga-hagau-ia dagu ahi gi-hongo nia abaaba o-di waahale Gaza, gaa-dudu nia abaaba mau-dangihi hai-dauwa ala e-duuli di waahale deelaa.

1:8  Au gaa-lahi gi-daha nia dagi o-nia waahale Ashdod mo Ashkelon. Au ga-hagaduadua digau o-di waahale go Ekron, gei-ogo digau Philistia huogodoo ala gaa-dubu la-gaa-mmade.”

1:9  Dimaadua e-helekai, “Nia daangada o Tyre gu-haihai nadau huaidu e-logowaahee, gei Au ga-hagaduadua digaula. Digaula guu-lahi digau huogodoo o-nia guongo, gaa-dugu i tenua go Edom. Digaula hagalee haga-gila-aga di hagababa o-di hagadaubuni dela ne-hai go ginaadou.

1:10  Deelaa dagu mee ga-hagau-ia dagu ahi gi-hongo nia abaaba o-di waahale Tyre, gaa-dudu nadau abaaba mau-dangihi hai-dauwa.”

1:11  Dimaadua e-helekai, “Nia daangada o Edom gu-haihai nadau huaidu e-logowaahee, gei Au ga-hagaduadua digaula. Digaula gu-daaligi nadau duaahina o Israel gi nnulumanu dauwa, ge deai di-nadau dumaalia gi digaula ai. E-dadaahi-hua beelaa nadau hagawelewele, dono haga-odi ai.

1:12  Malaa, Au ga-hagau-ia dagu ahi gi-hongo di waahale go Teman, gaa-dudu nia abaaba mau-dangihi maaloo hai-dauwa o Bozrah.”

1:13  Dimaadua e-helekai, “Nia daangada o Ammon gu-haihai nadau huaidu e-logowaahee, gei Au ga-hagaduadua digaula. Digaula gu-dauwa bolo gi-damana di-nadau henua, gei gu-duuduu gi-mahaahaa labelaa nia ahina hai-dama o Gilead.

1:14  Deelaa di mee ne-hidi-iei Au, ga-hagau-ia dagu ahi gi-hongo nia abaaba o-di waahale go Rabbah, gaa-dudu ono abaaba mau-dangihi hai-dauwa. Di laangi dela ma-ga-hai-tauwa, digaula koia ga-hagalongoaa, gei-ogo di-nadau dauwa ga-huaidu huoloo gadoo be-di madangi maaloo.

1:15  Di-nadau king mo ana gau aamua gaa-lahi galabudi, gaa-dugu i tuai guongo.”

Chapter 2

2:1  Dimaadua e-helekai, “Nia daangada o Moab gu-haihai nadau huaidu e-logowaahee, gei Au ga-hagaduadua digaula. Digaula gu-hagalee hagalaamua nia iwi o-di king o Edom, guu-dudu nia maa gii-hai nia lehu.

2:2  Deelaa di mee ne-hidi-iei Au, ga-hagau-ia dagu ahi gi-hongo tenua go Moab, gaa-dudu nia abaaba mau-dangihi hai-dauwa o Kerioth. Digau Moab gaa-mmade i-di madagoaa digau-dauwa ma-ga-wwolowwolo mo-di iliili nadau labaa.

2:3  Au ga-daaligi di tagi o Moab mo nia gau aamua o tenua deelaa.”

2:4  Dimaadua e-helekai, “Nia daangada o Judah gu-haihai nadau huaidu e-logowaahee, gei Au ga-hagaduadua digaula. Digaula gu-haga-balumee agu agoago gu-hagalee haga-gila-aga agu haganoho. Nia balu-god o nadau maadua-mmaadua ala nogo daumaha ginai i-mua, la-gu-dagi-gee digaula gi-mogowaa-loo.

2:5  Deelaa di hai ne-hidi-iei Au, ga-hagau-ia dagu ahi gi-hongo Judah gaa-dudu nia abaaba mau-dangihi hai-dauwa o Jerusalem.”

2:6  Dimaadua e-helekai, “Nia daangada Israel gu-haihai nadau huaidu e-logowaahee, gei Au ga-hagaduadua digaula. Digaula e-hui gi-daha digau hai mee-donu ala e-deemee di-hui nadau boibana, mo digau hagaloale ala e-dee-dohu di hui nadau hiiwae.

2:7  Digaula e-dagadagahi gi-lala digau paagege mo digau deai nadau hagamaamaa ai. Digaula e-hono digau hagaloale gi-daha mo nadau ala. Tama-daane mo dono damana e-hai nnangaahai o taga-hai-lodo ang-gi di hege-ahina e-dahi, mo-di haga-milimilia dogu ingoo dabu i nau haihai beelaa.

2:8  Digaula e-noho i nadau gowaa hai-daumaha i-lodo nadau gahu ala ne-kae boibana i-baahi digau hagaloale. I-lodo di Hale Daumaha o di-nadau God, gei digaula e-inu nia waini ala ne-gaamai i digau hagaloale ala gu-boibana ang-gi ginaadou.

2:9  “Agu daangada-nei, ma go goodou dela ne-hidi-iei Au ne-daaligi digau Amor huogodoo ala e-lloowehaa gadoo be nia laagau-‘cedar’ gei e-maaloo-dangihi gadoo be nia laagau-‘oak’.

2:10  Au gu-daa-mai goodou gi-daha mo Egypt, gu-dagi-mai goodou i-lodo di anggowaa i-nia ngadau e-madahaa, gu-dugu-adu gi goodou tenua o digau Amor bolo gi-hai-mee ginai goodou.

2:11  Au gu-hili-aga hunu dama-daane i godou dama bolo e-hai nia soukohp, mo hunu dama-daane belee hai nia Nasarait. “Goodou, go nia daangada Israel, ma hagalee donu dagu hai beenei? Ko-Au go Dimaadua deenei e-helehelekai.

2:12  Gei goodou guu-hai nia Nasarait gi-inumia nia waini, gei gu-hai-anga gi nia soukohp bolo gi-hudee haga-dele-ina agu helekai.

2:13  Malaa, Au gaa-beehi goodou gi-lodo di gelegele o godou guongo, gei goodou gaa-dogi gi-nua gadoo be-di kulumaa dela ma-gaa-honu i-nia lii-palaawaa.

2:14  Digau ala e-maamaa di-llele la-ga-deemee labelaa di-llele hagammuni, gei digau maaloo ga-paagege, digau-dauwa ga-deemee di-benebene nadau mouli.

2:15  Digau ala e-hai-hegau gi-nia maalei ga-deemee di-tuu gii-mau, digau ala e-llele ga-deemee di-llele gi-daha, gei-ogo digau ala e-llele i-hongo nia hoodo ga-deemee di-llele hagammuni bolo gi-mouli ginaadou.

2:16  I-di laangi deelaa, digau-dauwa ala koia e-maaloo gaa-kili gi-daha nadau goloo-dauwa, gaa-hula gaa-llele.” Aanei go nnelekai Dimaadua ala ne-hai.

Chapter 3

3:1  Goodou go digau Israel, goodou hagalongo-malaa gi nnelekai Dimaadua ala ne-helekai i goodou huogodoo, ala ne-laha-mai go Mee gi-daha mo Egypt:

3:2  “Mai i-nia henua huogodoo o henuailala, ma go goodou ala ne-hilihili-aga ko-Au, ga-madamada humalia ai. Malaa, mai i godou hangahaihai huaidu ala gu-llauehaa, dela ne-hidi-iei Au ga-hagahuaidu goodou.”

3:3  Maa iai nia daangada dogolua ga-hagatanga i-di gowaa e-dahi gaa-hula, gei digi haga-modongoohia-aga di-nau gowaa dela e-heetugi-ai?

3:4  Maa iai di laion e-wolowolo i-lodo-henua, gei digi gidee-ia dana mee dela belee kumi? Maa iai di laion dulii e-nnguunnguu i dono gowaa dela e-duu-ai, gei digi kumi dana mee?

3:5  Di manu-maangi le e-mee di-kumi go di hele, maa di hele la ga deai ono mounu ai? Di hele le e-mee di badu gi-nua, maa di mee ne-tale gi-di-maa ai?

3:6  Di lee o-di labaa gau-dauwa ma-ga-ili i-lodo di waahale, gei-ogo nia daangada la-hagalee ga-mmaadagu? Maa iai di haingadaa e-tale ang-gi di waahale, gei di-maa hagalee di mee ne-hai mai baahi o Dimaadua?

3:7  Di Tagi go Yihowah la-hagalee hai dahi mee maa Mee digi haga-modongoohia dono manawa ang-gi ana hege, ala go nia soukohp.

3:8  Ma koai dela e-hagalee madagu i-di madagoaa o-di laion ma-ga-wolowolo? Maa Dimaadua ma-ga-helekai, ma koai dela e-mee di-hagalee hagadele nia helekai a-Maa?

3:9  Heia di haga-iloo deenei ang-gi digau ala e-noho i-lodo nia hale humalia huoloo o Ashdod mo Egypt, “Goodou dagabuli-mai gi-hongo nia dama-gonduu ala i-di gili o Samaria, gi-gidee-goodou di hinihini damana mo nnangahaihai huaidu ala e-kila-aga i-lodo di waahale deelaa.”

3:10  Dimaadua ga-helekai, “Nia daangada aanei gu-haga-honu lodo nadau hale gi-nia goloo mai di lagalagamaaloo mo-di hai-baahi. Digaula e-de-iloo di mee dela e-donu i-baahi nia daangada.

3:11  Deelaa di mee gaa-hidi-ai nadau hagadaumee ga-lloomoi, ga-haganiga di-nadau guongo, gaa-oho nadau abaaba, gaa-kae nadau goloo.”

3:12  Dimaadua ga-helekai, “E-hai gadoo be tangada hagaloohi-siibi dela ma-ga-daa gi-daha nia wae e-lua be di baahi talinga o-di siibi i-lodo di ngudu di laion, deenei gadoo di hai o digau hogoohi o Samaria, ala e-noho tenetene dolomeenei i-hongo nadau lohongo humalia huoloo.”

3:13  Gei di Tagi go Yihowah go di God Koia e-Aamua ga-helekai labelaa, “Goodou hagalongo, gei gi agoago-ina gi-nia madawaawa Jacob boloo:

3:14  ‘I-di laangi dela Au ga-hagaduadua digau Israel i nadau hangaahai huaidu, gei Au gaa-oho nadau gowaa dudu-tigidaumaha ala i Bethel. Nia madaagoo o-nia gowaa dudu-tigidaumaha la-ga-mooho ga-monnono gi-hongo di gelegele.

3:15  Au gaa-oho gi-daha nia hale ala ne-hau ang-gi nia madagoaa magalillili mo nia hale ala ne-hai ang-gi nia madagoaa welengina. Gei nia hale ala e-humu gi-nia hadu-‘ivory’ ga-monnono ga-mooho, gei nia hale llauehe huogodoo ga-haga-mooho.’ ”

Chapter 4

4:1  Hagalongo-malaa gi-di mee deenei, goodou go nia ahina o Samaria, ala guu-pedi gadoo be nia kau moomono o Bashan, ala e-hagahuaidu digau paagege, ge e-haga-haingadaa digau ala e-hagaloale, ge e-haihai gi godou lodo bolo gi-gowadu nia dagaao maaloo gi goodou!

4:2  Idimaa di Tagi go Yihowah dela e-dabu, Mee guu-lawa di-hagababa boloo, “Nia laangi ga-loomoi, gei digaula gaa-dada goodou gi-nia daula-baalanga. Goodou huogodoo gaa-hai gadoo be-di iga dela e-hagalau gi-di maadau.

4:3  Gei goodou gaa-dada gi-di bongoo i-di abaaba dela e-hoohoo-mai, gaa-kili gi-daha mo-di gowaa deelaa.”

4:4  Tagi go Yihowah ga-helekai, “Goodou go nia daangada Israel, goodou hula gi-di gowaa dabu i Bethel, gaa-hai godou huaidu i-golo. Goodou hula gi Gilgal, e-haga-llauehe godou huaidu i godou mee ala e-mee! Goodou kae-ina godou manu e-hai godou mee tigidaumaha i-nia luada huogodoo, gei goodou kae labelaa godou tigidaumaha dahi baahi e-madangaholu i-nia laangi dagi-dolu.

4:5  Goodou heia godou tigidaumaha palaawaa e-hai-ai di hagaamu-tumaalia ang-gi Dimaadua, mo-di hagapuu gi-nia hai-tigidaumaha labelaa i-daha ala mai-hua i godou hiihai! Idimaa, aalaa nia hagadilinga mee beenei ala e-hiihai ginai goodou e-hai.

4:6  “Ma ko-Au dela ne-dugu-adu tau-magamaga gi-lodo godou waahale huogodoo, gei goodou digi huli bolo ga-loomoi gi-di-Au.

4:7  Ma ko-Au dela ne-dugu di uwa i-di madagoaa dela belee humalia ang-gi nia huwa-laagau. Au ne-haga-doo dagu uwa gi-hongo dahi waahale, gei di waahale dela i-golo hagalee. Au gu-haga-doo dagu uwa gi-hongo dahi gowaa dogi-mee, gei di gowaa dogi-mee dela i-golo hagalee gu-maangoo.

4:8  Hunu daangada mai i-nia waahale ala i-golo ga-loomoi gi-lodo dahi waahale dela gu-hagadagadagagee ginai bolo iei nia wai i-golo, idimaa, digaula gu-paagege huoloo i nadau hieinu, gei nia wai i-di waahale deelaa le e-dee-dohu ang-gi digaula. Gei goodou digi huli hoou belee loomoi gi-di-Au.

4:9  “Au gu-hagau-adu dagu madangi welengina belee haga-mae godou huwa-laagau. Nia ‘locust’ guu-gai godou hadagee mo godou gowaa dogi-waini mo nia huwa o godou laagau-‘fig’ mono laagau-olib. Gei goodou digi huli hoou belee loomoi gi-di-Au.

4:10  “Au gu-hagau-adu dagu magi huaidu gi goodou be-di mee dela ne-hai-anga gi digau Egypt. Au gu-daaligi godou dama-daane i-lodo tauwa ne-hai, mo-di kae gi-daha godou hoodo. Gei Au guu-haa gi-lodo godou uhi di bilau dangada made i-lodo godou waa-hale-laa, gei goodou digi huli hoou belee loomoi gi-di-Au.

4:11  “Au gu-daaligi hunu gau i goodou gadoo be dagu hai dela ne-daaligi digau Sodom mo Gomorrah. Gei goodou ala guu-llele gi-daha, guu-hai gadoo be tama bida laagau ulaula dela ne-daa gi-daha mo-di ahi. Gei goodou digi huli hoou belee loomoi gi-di-Au.” Aanei la nnelekai mai baahi o Dimaadua.

4:12  “Malaa deenei-laa, goodou go digau Israel, goodou gi-iloo bolo Au ga-hagaduadua goodou. Idimaa Au gaa-hai dagu hai deenei, gei goodou gi-hagatogomaalia-ina goodou gii-tuu i-mua dagu hagi-aga!”

4:13  Dimaadua go Mee dela ne-hai nia gonduu, gei ne-hai dana madangi. Gei Mee e-haga-modongoohia ang-gi nia daangada gi-iloo-ginaadou dono manawa. Ma go Mee dela e-huli di aa gii-hai di boo. Ma go Mee dela e-heehee i-hongo nia gonduu o henuailala. Dono ingoo dela boloo: Yihowah go di God Koia e-Aamua!

Chapter 5

5:1  Goodou go digau Israel, goodou hagalongo-malaa gi taahili manawa-gee dela gaa-huwa ko-au i godou gili:

5:2  Israel la di tama-ahina madammaa guu-doo, gu-deemee di-duu-aga labelaa! Mee gu-diiagi, guu-moe i-lodo nia gelegele, deai tangada e-hagamaamaa a-mee bolo gi-duu-aga ai.

5:3  Di Tagi go Yihowah ga-helekai, “Dahi waahale o Israel ga-hagau ana gau-dauwa e-mana, digau hua e-lau ala ne-loomoi labelaa. Dahi waahale ga-hagau ana gau-dauwa e-lau, digau hua e-madangaholu ala ne-loomoi labelaa.”

5:4  Dimaadua ga-helekai gi digau Israel, “Goodou lloomoi gi-di-Au, gei goodou ga-mouli.

5:5  Goodou hudee hula e-daumaha i Beersheba. Goodou hudee halahala-ina Au i Bethel, idimaa Bethel la-ga-hagalee. Goodou hudee hula gi Gilgal, idimaa digau Gilgal la-gaa-lahi gi-daha.”

5:6  Goodou hula gi Dimaadua, gei goodou ga-mouli. Maa goodou ga-hagalee hula, gei Mee ga-haneia gadoo be-di ahi gi-hongo digau Israel. Di ahi deelaa gaa-dudu digau o Bethel, deai tangada e-mee di-diinai di-maa ai.

5:7  E-huaidu-adu gi goodou ala e-huli nia haganoho, ga-haga-hala nia donu o-nia daangada!

5:8  Ma go Dimaadua dela ne-hai nia heduu, nia heduu ala e-haga-ingoo bolo Madaligi mo Waga-dogodolu. Ma go Mee dela e-huli di bouli gi-di maalama mo-di aa gi-di boo. Ma go Mee dela e-gahigahi-mai nia wai o-di moana, ga-haga-doo gi-hongo henuailala. Dono ingoo dela go Yihowah.

5:9  Mee e-daaligi digau ala e-maaloo, gei e-oho nadau abaaba ala e-mau-dangihi.

5:10  Goodou go digau Israel, goodou e-de-hiihai gi tangada dela e-haga-gila-aga di tonu ge e-helekai i-di tonu i-lodo di gowaa hai-gabunga.

5:11  Goodou gu-haga-haingadaa digau ala e-hagaloale, guu-kae nia meegai digaula. Malaa, dela ga-hidi-ai goodou ga-hagalee noho i-lodo godou hale humalia ala ne-hau go goodou gi-nia hadu, be e-inu nia waini mai i-lodo godou hadagee-waini humalia ala nogo ngalua ginai goodou.

5:12  Au gu-iloo-eau di hai o godou huaidu ala ne-hai mo-di logowaahee o godou mee hala ala ne-hai. Goodou e-hagahuaidu nia daangada humalia, goodou e-kae nia hui halahalau o godou gau hagadootonu tilikai, gei goodou e-dugu nia donu o digau hagaloale i-lodo di gowaa hai-gabunga.

5:13  Deenei-laa, gii-noho dee-muu i-lodo di madagoaa huaidu beenei, deenei di mee dela e-kaedahi e-humalia belee hai go tangada kabemee!

5:14  Goodou gi-hagamahi heia nia mee humalia, hagalee go nia mee huaidu, bolo gi-mouli-ai goodou. Deenei-laa, Yihowah go di God Koia e-Aamua ga-madalia goodou i-di tonu, be di-godou hagamaanadu.

5:15  Ginagina i-nia mee ala e-huaidu, aloho i-nia mee ala e-humalia. Goodou gi-daudali-hua di tonu i-lodo nia gowaa hai-gabunga. Holongo, gei Dimaadua ga-dumaalia-anga gi digau o-di guongo deenei ala e-mouli hua igolo.

5:16  Tagi go Yihowah go di God Koia e-Aamua ga-helekai, “Tangitangi wawwawe mo tangitangi manawa-gee gaa-hai i-hongo nia ala huogodoo o-di waahale deenei. Digau dogi-hadagee ga gahi-mai labelaa bolo gii-dau dalia tangihangi gi digau mmade, madalia hogi digau ala e-kumi nadau hui i nadau tangi.

5:17  Tangi wawwawe ga-gila-aga i-lodo nia hadagee waini huogodoo. Nia mee huogodoo aanei ga-kila-aga, idimaa, Au ga-hanimoi ga-daaligi goodou.” Aanei la nia helekai a Dimaadua.

5:18  E-haga-manawa-gee huoloo adu gi goodou ala e-talitali di Laangi o Dimaadua! Di humalia-aha dela e-gaamai go di laangi deelaa adu gi goodou? Di laangi deelaa la di laangi hua e-bouli dongoeho adu gi goodou, hagalee di laangi maahina.

5:19  E-hai gadoo be tangada dela ma-gaa-lele gi-daha mo-di laion, ga-heetugi gi-di ‘bear’! Be e-hai gadoo be tangada dela ma-ga-haneia gi-lodo dono hale, gaa-bili-adu gi-di abaaba dono hale, gei di gihaa lodo-geinga gaa-kadi a-mee!

5:20  Di Laangi o Dimaadua la di laangi hua bouli dongoeho, hagalee maahina, di laangi hua haga-manawa-gee, deai di manawa lamalia i-golo ai.

5:21  Dimaadua ga-helekai, “Au e-ginagina huoloo i godou hagamiami dabu: Au e-deemee di-hagakono ogu lodo!

5:22  Godou madagoaa ma-ga-gaamai gi-di-Au godou tigidaumaha-dudu, mo godou tigidaumaha huwa-laagau, e-hagalee tene ginai Au. Gei Au hogi hagalee tenetene gi-nia manu ala ma-ga-haangai go goodou gii-pedi belee hai-ai di-godou tigidaumaha mai gi-di-Au.

5:23  Goodou dugua godou huwa daahili hagalongoaa balumee aanaa, Au hagalee hiihai e-hagalongo gi godou kasangi.

5:24  Gei di tonu gi-hanadu-hua beelaa, gadoo be tama-monowai mmidi, gei nia donu gii-hai gadoo be-di monowai damana dela e-deemee di-odi.

5:25  “Nia daangada Israel, Au digi helekai-adu gi goodou bolo gi-heia godou tigidaumaha mo godou kisakis i-lodo nia ngadau e-mada-haa ala nogo dagidagi goodou ko-Au i-lodo di anggowaa.

5:26  Gei dolomeenei, idimaa dela goodou gu-daumaha gi-di ada-mee o Sakkuth bolo deelaa di-godou god-king, mo Kaiwan dela di-godou god-heduu, goodou gi-aamo-ina godou ada-god aalaa

5:27  i-di godou madagoaa dela ma-gaa-lahi goodou ko-Au gi tenua dela i baahi adu o Damascus.” Aanei nia helekai a Dimaadua dela dono ingoo go God Koia e-Aamua.

Chapter 6

6:1  E-koia e-huaidu adu gi goodou ala e-mouli manawa lamalia i-lodo Zion, mo goodou hogi ala e-noho i-di aumaalia i-lodo Samaria, goodou ala go digau aamua o tenua aamua go Israel, go goodou ala e-lloomoi ginai nia daangada belee kae nadau hagamaamaa!

6:2  Goodou hula, mmada gi-di waahale Calneh, lloo-adu gi-di waahale aamua go Hamath. Nomuli, gei goodou ga-lloo-adu gi-bahi-i-ngaaga gi Gath, dela go di waahale digau Philistia. Nia waahale aanei e-hai behee, e-koia e-humalia i-nia waahale o Judah mo Israel? Nadau henua le e-damana i godou henua?

6:3  Goodou e-hai bolo di laangi haga-manawa-gee le e-mogowaa-loo, gei godou hangahaihai, aalaa nia mee e-haga-limalima-mai di laangi deelaa.

6:4  E-koia e-huaidu adu gi goodou ala e-noho i-hongo nia lohongo maluu, e-haihai godou hagamiami gi-nia goneiga siibi mo nia goneiga tamaa-kau.

6:5  Goodou e-hiihai e-huwa godou daahili, gadoo be-di hai o David dela nogo hai, mo-di daahili nia maa gi godou mee hai-daahili-‘harp’.

6:6  Goodou e-inuinu godou waini i-lodo nia ibu llauehe, gei e-hagatulu goodou gi-nia lolo ala koia e-kala, gei goodou hagalee manawa-gee i-di mooho o Israel dela gu-hoohoo-mai.

6:7  Malaa, ma go goodou ala gaa-lahi galabudi matagidagi. Godou hagamiami mo godou daga-dagabuli hagalongoaa la-ga-hagalee.

6:8  Tagi go Yihowah go di God Koia e-Aamua guu-hai dana hagamodu i dono ingoo boloo: “Au e-hagadugina huoloo i-di hagamuamua o digau Israel. Au e-de-hiihai huoloo i nadau hale humalia. Au gaa-wanga di-nadau waahale aamua mono goloo huogodoo no-lodo gi nadau hagadaumee.”

6:9  Maa nia daane dilongoholu gaa-dubu i-golo i-di madahaanau e-dahi, gei digaula gaa-mmade labelaa.

6:10  Ma tangada i-nia gau o taane dela ne-made ga-hanimoi belee lahi tangada made e-kae e-danu, gei mee ga-heeu gi tangada dela ne-dubu i-lodo di hale deelaa, “Ma tangada labelaa i doo baahi?” Gei tangada deelaa ga-helekai, “Hagalee!” Gei taane deelaa ga-helekai, “Hudee leelee-loo, gidaadou hudee helehelekai i-di ingoo Dimaadua.”

6:11  Di madagoaa hua Dimaadua dela ma-ga-hagadaba, gei nia hale llauehe mo lligi ga-mooho gi-lala.

6:12  E hai behee, nia hoodo e-mee di-llele i-hongo nia gowaa haduhadu? Nia daangada e-mee di-haga-maluu di moana gi-nia kau? Gei goodou gu-hulihuli di tonu gi-nia poisin, mo-di huli nia donu gi-hai-gee.

6:13  Goodou e-hagamuamua i-di godou haga-magedaa di waahale go Lo=Debar. Goodou e-hagapuu e-helekai boloo, “Gimaadou ne-kumi Karnaim idimaa gimaadou e-maaloo.”

6:14  Yihowah go di God Koia e-Aamua ga-helekai, “Goodou go digau Israel, Au ga-hagau-adu dagu buini-dauwa mai i tenua i-daha gaa-noho i-di-godou henua, gaa-dagi goodou hagahuaidu mai i-di ala nnoonua go Hamath dela i-bahi-i-ngeia, gaa-hana-loo gaa-tugi i tama monowai i Arabah dela i-bahi-i-ngaaga.”

Chapter 7

7:1  Au guu-hai dagu moe mai baahi o Tagi go Yihowah. I-lodo hua di moe deenei, gei au guu-mmada gi Mee dela e-haga-noho dana hagabuulinga ‘locust’ damana i-muli-hua di king ne-haala gi-daha dana duhongo o-nia geinga-tolo, gei nia geinga hoou ga-matili-aga labelaa.

7:2  I-lodo hua dagu moe, gei au ga-mmada-hua gi-nia ‘locust’ guu-gai nia geinga hoou huogodoo ala i-lodo tenua deelaa. Gei au ga-helekai, “Meenei Tagi go Yihowah, Goe gi-dumaalia-anga gi au daangada aanei! Digaula ga-mouli gi nia-aha? Digaula e-lligi-loo gei e-paagege!”

7:3  Dimaadua gaa-huli dana hagamaanadu, ga-helekai, “Malaa, nia mee ala guu-mmada ginai goe, la hagalee gila.”

7:4  Au guu-hai labelaa dagu moe mai baahi o Tagi go Yihowah. I-lodo-hua dagu moe deenei, gei au guu-mmada gi Mee dela e-hagatogomaalia belee daaligi ana daangada gi-di ahi. Di ahi deelaa guu-dudu di moana damana dela i-lala henuailala, ga-daamada ga-wele-aga gi tenua i-uda.

7:5  Gei au ga-helekai-anga, “Meenei Tagi go Yihowah, guu-lawa! Au daangada aanei ga-mouli behee? Digaula e-lligi-loo gei e-paagege!”

7:6  Dimaadua gaa-huli dana hagamaanadu labelaa, ga-helekai, “Di mee deenei la-hagalee gila labelaa.”

7:7  Au guu-hai labelaa dagu moe mai baahi o Dimaadua. I-lodo dagu moe deenei, gei au guu-mmada gi Mee e-duu i-baahi di abaaba hadu dela ne-bae, ge e-hagatau gi-di uga hagatau-mee, gei Mee e-daahi dana uga hagatau-mee i dono lima, di mee e-haga-huudonu-mee.

7:8  Gei Mee ga-heeu-mai, “Amos, ma di-aha dela e-daumada kooe?” Gei au ga-helekai-anga, “Di uga hagatau-mee gi-huudonu.” Gei Mee ga-helekai, “Mmada, Au e-hai-hegau gi-di uga hagatau-mee deenei, belee haga-modongoohia-aga nia huaidu o agu dama ala guu-hai gadoo be-di abaaba dela guu-biga. Au ga-hagalee huli labelaa dogu manawa gi dagu hai dela belee daaligi digaula.

7:9  Nia gowaa ala e-daumaha-ai di hagadili o Isaac la-gaa-oho gi-daha. Nia gowaa haga-madagu o digau Israel ga-mooho gi-daha. Au ga-heebagi gi-di madawaawa di king go Jeroboam, ga-haga-mmaa digaula gi-daha.”

7:10  Amaziah, tangada hai-mee-dabu o Bethel, gaa-hai dana haga-iloo gi Jeroboam di king o Israel, boloo, “Amos e-haganohonoho dana hai-huaidu adu gi-di-goe i-baahi nia daangada. Ana agoago ga-hagahuaidu digau tenua deenei.

7:11  Malaa, aanei ana helekai, ‘Jeroboam gaa-made i lodo tauwa, gei digau Israel gaa-lahi gi-daha mo di-nadau henua.’ ”

7:12  Amaziah ga-helekai gi Amos, “Guu-lawa, soukohp! Hana gi-daha mo-di gowaa deenei. Hana gi tenua go Judah, gaa-hai-laa au agoago i-golo, gei digaula gaa-hui goe.

7:13  Goe hudee hai au agoago i ginei, i-lodo Bethel, idimaa ma di gowaa hai-daumaha ni-di king, di hale-daumaha ni digau huogodoo.”

7:14  Amos ga-helekai gi mee, “Au hagalee hai be nia soukohp ala e-hai nadau agoago bolo gii-kae nadau hui. Au tangada hagaloohi-siibi, ge e-madamada humalia labelaa nia laagau-‘fig’.

7:15  Gei Dimaadua gaa-daa au gi-daha mo dagu moomee dela nogo hagaloohi agu siibi, gaa-dugu au bolo au gi-hanimoi gi-hagadele ana helekai gi ana dama, aalaa go digau Israel.

7:16  Malaa, dolomeenei, gei goe ga-hagalongo gi nnelekai Dimaadua ala e-hai. Goe dela gu-helekai-mai gi-di-au bolo au gii-lawa dagu hai agoago, bolo gii-lawa labelaa i dagu hagahuaidu digau Israel.

7:17  Meenei Amaziah, idimaa goe dela gu-helekai beenei, malaa, Dimaadua ga-helekai-adu gi-di-goe boloo, ‘Doo lodo gaa-hai di ahina huaidu i-lodo di waahale deenei, gei au dama gaa-mmade i-lodo tauwa. Dau gowaa ga-duwweduwwe gi digau ala i-golo, gei goe gaa-made i-lodo tenua i-daha, gei digau Israel gaa-lahi gi-daha mo di-nadau henua, gaa-lahi gi tenua i-daha.’ ”

Chapter 8

8:1  Au guu-hai dagu moe labelaa mai baahi o Tagi go Yihowah. I-lodo hua di moe deenei, gei au guu-mmada gi-di gada golee-laagau.

8:2  Dimaadua ga-heeu, “Amos, ma di-aha dela e-daumada kooe?” Gei au ga-helekai, “Di gada golee-laagau, Meenei.” Dimaadua ga-helekai, “Di hagaodi gi-muli o agu daangada Israel la-gu-dau-mai. Au hagalee huli dogu manawa labelaa gi dagu hai dela belee daaligi digaula.

8:3  I-di laangi deelaa, gei nia lee daahili ala i-lodo di hale di king gaa-huli gaa-hai nia lee tangitangi. Nnuaidina gau mmade e-malae-hua i-nia gowaa huogodoo, digaula ga-kili-hua gi-daha deemuu!”

8:4  Goodou hagalongo gi-di mee deenei, goodou ala e-dagadagahi digau ala gu-huaidu ang-gi ginaadou, ge e-hagamada labelaa bolo e-hagahuaidu digau hagaloale o tenua deenei.

8:5  Goodou e-helehelekai boloo, “Gimaadou gu-dogono di talitali di lawa o-nia laangi dabu, bolo gi-huihui madau golee-laagau gi-daha. Di Laangi-Sabad le e-lawa ma-gaa-hee, gii-mee di-dahi-aga madau golee-laagau, e-huihui gi-daha? Gei gimaadou ga-haga-menege-aga nia hui gi nonua, e-hai-hegau gi-di mee hagatau-mee hala, mo-di halahalau nia daangada gi-di mee pauna-mee huaidu.

8:6  Gimaadou gaa-hui nia golee-laagau huaidu gi-nia daangada i-di hui damana. Gimaadou e-halahala labelaa tangada hagaloale dela e-deemee di-hui dono boibana, gei e-deemee di-hui hogi ono hiiwae. Gimaadou gaa-hui a-mee e-hai di-madau hege.”

8:7  Dimaadua, go di God o digau Israel, guu-hai dana hagamodu, “Au hagalee-loo e-de-langahia-e-Au nadau hangahaihai huaidu.

8:8  Malaa, henuailala ga-ngalungalua, gei digau huogodoo o tenua deelaa ga-uli nadau gai. Tenua hagatau ga-ngalungalua, ga-nnoo-aga gi-nua ga-nnoo-ia gi-lala e-hai gadoo be-di monowai Nile.

8:9  Di madagoaa ma-ga-dau-mai, gei Au gaa-hai di laa la-gi-ulu gi-lala i-di oodee, gei-ogo henuailala ga-bouli i-di aa. Au go di Tagi go Yihowah deenei e-helehelekai.

8:10  Au gaa-huli godou hagamiami haga-tenetene gi-nia tangitangi o-di mmade, gaa-huli hogi godou daahili tenetene gi-nia dangi manawa-gee. Au ga-haga-ulu goodou gi-nia goloo o-di manawa-gee, gaa-dahi gi-daha nia ngaahulu o godou libogo. Goodou gaa-hai gadoo be tamana mo tinana ala e-tangitangi gi-di-nau dama hua e-dahi dela guu-made. Di laangi deelaa la-gaa-hai di laangi koia e-haga-manawa-gee huoloo, gaa-dae-loo gi dono hagaodi.

8:11  “Di madagoaa ma-ga-dau-mai, gei Au ga-haga-doo-iha dagu tau-magamaga damana gi-hongo tenua deenei. Nia daangada ga-hiigai, hagalee hiigai bolo ginaadou e-miami nia meegai. Digaula ga-hieinu, hagalee hieinu bolo ginaadou e-inu nia wai. Digaula ga-hiigai ge hieinu bolo ginaadou e-gai ge e-inu nia helekai mai baahi Dimaadua. Au go Tagi go Yihowah deenei e-helehelekai.

8:12  Nia daangada gaa-hula ga-heehee, ga-lloomoi i Tai-Mmade gaa-hula gaa-tugi i Tai go Mediterranean, ga-lloo-adu la ngeia gaa-dau-loo i-bahi-i-dua. Digaula ga-halahala nia helekai mai baahi Dimaadua i-lodo nia gowaa huogodoo, gei digaula digi gidee-ginaadou.

8:13  I-di laangi deelaa, gei godou dama-ahina mmaadanga mo godou dama-daane maaloo ga-hingahinga i-di nadau hieinu huoloo.

8:14  Digau ala gu-hagamodu ang-gi nia balu-ieidu o digau Samaria e-helehelekai boloo, ‘I-di ingoo di god o Dan’ be, ‘I-di ingoo o-di god o Beersheba,’ aanei digau gaa-tinga gi-lala, ga-deemee di-nnoo i-nua labelaa.”

Chapter 9

9:1  Au guu-mmada gi Tagi e-duu i-baahi di gowaa dudu-tigidaumaha. Gei Mee ga-hagadaba au, ga-helekai, “Haga-mamaawadia nia ulu o-nia duludulu o-di Hale Dabu deenei gi-ngalua di hagamau o di-maa. Haga-mooho-ina nia maa gi-lala, gii-doo-iha gi-hongo nia libogo o nia daangada. Au ga-daaligi digau huogodoo ala ne-dubu i tauwa. Tangada e-hai gi-mouli ai, tangada e-lele gi-daha ai.

9:2  Ma e-aha maa digaula gaa-geli di-nadau ala e-hula-ai ginaadou gi-lala henuailala gi-di gowaa o-di made, gei Au gaa-kumi digaula. Ma e-aha maa digaula gaa-kaga gi-nua gi-di langi, gei Au ga-laha-iha digaula gi-lala.

9:3  Ma e-aha maa digaula ga-palapala hagammuni i-tomo di Gonduu Carmel, gei Au ga-halahala digaula, gaa-kumi digaula. Ma e-aha maa digaula gaa-pala hagammuni i-tua di moana, gei Au ga-helekai gi-di manu hagamadagudagu-dangada o lodo di moana gi-geina digaula.

9:4  Ma e-aha maa digaula gaa-lahi gi-daha mo nadau henua gaa-hege i-lala nadau hagadaumee, gei Au gaa-hai nadau hagadaumee gi-daaligidia digaula gii-mmade. Deenei dagu mee guu-lawa-ai di-haganoho bolo Au e-daaligi digaula, Au hagalee dumaalia gi digaula.”

9:5  Tagi go Yihowah Koia e-Aamua ma-gaa-bili gi henuailala, gei henuailala ga-ngalungalua. Digau huogodoo ala e-noho i-no-lodo le e-tangitangi. Henuailala hagatau e-nnoo-aga gi-nua, ga-nnoo-ia gi-lala, gadoo be-di monowai Nile.

9:6  Dimaadua guu-hai dono lohongo i-di langi, gaa-dugu-mai di aholi o-di langi gi-hongo henuailala. Mee e-gahigahi-mai nia wai o-di moana gi-lloomoi, ga-haga-doo-iha gi-hongo henuailala. Dono ingoo dela go Yihowah!

9:7  Dimaadua ga-helekai, “Nia daangada Israel, Au gu-hagalabagau huoloo digau Ethiopia gadoo be dagu hagalabagau goodou. Ko-Au dela ne-laha-mai digau Philistia i Crete, mo digau Syria i Kir, gadoo be dagu hai dela ne-laha-mai goodou i Egypt.

9:8  Au go Tagi go Yihowah dela e-madamada humalia i tenua Israel huaidu deenei, gei Au ga-haga-mmaa di-maa gi-daha mo henuailala. Gei Au ga-hagalee haga-mmaa gi-daha di madawaawa Jacob hagatau.

9:9  “Au ga-hagadaba, ga-haga-madammaa digau Israel gadoo be nia golee-laagau ala ma-gaa-lulu i-lodo di mee hili-mee. Au ga-haga-madammaa digaula i-lodo nia henua huogodoo, belee haga-madammaa gi-daha digau ala nadau hadinga ai.

9:10  Digau huaidu ala i-lodo agu daangada le e-daaligi gii-mmade i-lodo tauwa, go digau huogodoo ala e-helekai boloo, ‘Dimaadua hagalee dumaalia gi-nia mee huaidu gi-tale-mai gi gidaadou.’ ”

9:11  Dimaadua ga-helekai, “Di laangi ga-dau-mai, gei Au ga-haga-hoou-aga di lohongo-king o David, dela e-hai gadoo be-di hale ne-meheu gi-daha. Au ga-haga-duu-aga ono abaaba ga-haga-hoou nia mee huogodoo. Au ga-haga-duu-aga di-maa, ga-ngalua ginai gii-hai gadoo be di-maa i-mua.

9:12  Gei digau Israel ga-haga-magedaa nia henua ala e-dubu i tenua go Edom, mo nia henua huogodoo ala nogo hai-mee ginai Au i-mua.” Aanei nnelekai mai baahi Dimaadua dela ga-haga-gila-aga nia mee aanei.

9:13  Dimaadua ga-helekai, “Nia laangi ga-dau-mai, gei nia huwa-laagau ga-tomo-aga hagalimalima, koia e-limalima i di-maa dela ma-gaa-hadi. Nia ‘grape’ ga-tomo-aga koia e-tomo limalima i-nia waini ala ma-gaa-hai. Nia gonduu ga-haga-hali-iha nia waini kala, gei nia gowaa nnoonua ga-haga-hali-mai nia waini.

9:14  Au ga-laha-mai agu daangada gi di-nadau henua. Digaula ga-haga-hoou nadau hale ala ne-mooho, gaa-noho i-lodo nia maa. Digaula gaa-dogi nadau hadagee-waini, ga-inuinu nadau waini. Digaula gaa-dogi nadau huwa-laagau i-lodo nadau hadagee, ga-miami mai i-nia huwa o nadau gowaa.

9:15  Au gaa-dogi agu daangada gi lodo tenua dela ne-wanga gi digaula, gei digaula ga-hagalee-loo e-daa gi-daha labelaa mo di-nadau henua.” Dimaadua dela go di-godou God deenei e-helehelekai.