LinVB - Amos

Chapter 1

1:1  Maloba ma Amos, moko wa bakengeli ba mpata o Tekoa. Asakoli maloba ma bokaneli Israel o eleko ya Ozia, mokonzi wa Yuda, mpe o ntango ya mokonzi wa Israel Yeroboam, mwana wa Yoas. Eza­laki mibu mibale liboso lya mokolo mokili moninganaki makasi.

1:2  Amos alobi boye : Ut’o Sion Yawe agangi makasi, ut’o Yeruzalem atomboli mongo­ngo ; bisobe bya bakengeli ba mpata bikozala na lilaka mpe nsonge ya ngomba Karmel ekokauka.

1:3  Yawe alobi : Damasko asali mabe mbala na mbala : Nakokokisa maye nakani kosala : mpo batuboli Galaad na epasoli ya bibende ;

1:4  nakotinda móto o ndako ya Azael, mósilisa ndako ya mokonzi Ben-Adad.

1:5  Nakobuka ekangeli ya ezibeli ya Damasko, nakoboma bato bakofandaka o Bikeat-Aven, nakoboma mokonzi oyo asimbi montongo o Bet-Eden, mpe bato ba Aram bakokende o boombo o Kir. Maloba ma Yawe.

1:6  Yawe alobi : Gaza asali mabe mbala na mbala : Nakokokisa maye nakani kosala, mpo batindi bato banso o boo­mbo mpe bakabi bango o maboko ma Edom.

1:7  Nakotinda móto o lopango la Gaza mótumba ndako inene ya bakonzi.

1:8  Nakoboma bato bakofandaka o Asdod na moto oyo asimbi montongo o Askalon. Nakolakisa Ekron ebotu ya ngai, ba-Filisti baye batikali bakokufa. Maloba ma Mokonzi Yawe.

1:9  Yawe alobi : Tiro asali mabe mbala na mbala : Nakokokisa maye nakani kosala, mpo batekeli ba-Edom baombo ebele, babebisi bondeko bakataki na bato ba bango.

1:10  Nakotinda móto o lopango la Tiro mótumba ndako inene ya bakonzi.

1:11  Yawe alobi : Edom asali mabe mbala na mbala : Nakokokisa maye nakani kosala, zambi Edom abengani ndeko wa ye na mopanga, ayokeli moto moko mawa lisusu te, akobi koboma bato na nkanda mpe kobomba nkele o motema.

1:12  Nakobwaka móto o Teman mótumba ndako inene ya moko­nzi Bosra.

1:13  Yawe alobi : Amon asali mabe mbala na mbala : Nakokokisa maye nakani kosala : o Galaad apasoli mabumu ma basi bazalaki na zemi mpo akoma na mabelé ma sika.

1:14  Nakotia móto o lopango la Raba mótumba ndako inene ya bako­nzi. Mokolo makeléle na bitumba bikongala, mokolo mbula enene ekonoko na mompepe makasi,

1:15  mokonzi wa bango akokende o boombo elongo na bankumu ba ye.

Chapter 2

2:1  Yawe alobi : Moab asali mabe mbala na mbala : Nakokokisa maye nakani kosala, mpo atumbi minkuwa mya nko­ndo mokonzi wa Edom.

2:2  Nakotinda móto o Moab mótumba ndako inene ya Keriot. Moab akokufa o kati ya mobulu mwa bitumba, ntango bato bakolela makasi mpe bakobete mindule.

2:3  Nakolongola mokonzi o ntei ya bato ba ye, nakoboma bankumu banso elo­ngo na ye. Maloba ma Yawe.

2:4  Yawe alobi : Yuda asali mabe mbala na mbala : Nakokokisa maye nakani kosala, mpo baboyi kotosa mibeko mya Yawe, batosi mateya ma ye te. Bikeko bya banzambe ba lokuta bibungisi bango mayele, biye bankoko ba bango balandaki.

2:5  Nakotinda móto o ekolo ya Yuda mótumba ndako ya bakonzi ba Yeruzalem.

2:6  Yawe alobi : Israel asali mabe mbala na mbala : nakokokisa maye nakani kosala, mpo bateki moto wa bosembo mpo bazwa mosolo, bateki mobola mpo basomba sapato,

2:7  bakonyataka bato bake lokola mabelé, bakobebisaka makambo ma babola ; tata na mwana bakomi kolanda mwasi se moko, bakosantolaka bongo nkombo ya ngai esantu.

2:8  Bakolalaka na butu penepene na altare inso o bilamba bakamataki bo ndanga. Bakomeleke vino o ndako ya nza­mbe wa bango, eye bafutisaki bato na mayele mabe.

2:9  O miso ma bango nabomaki bato ba Amor, bato balai lokola sédere, na bokasi lokola nzete ya wenge ! Epai ya likolo nalongolaki mbuma inso, epai ya nse nakataki minsisa mi­nso.

2:10  Nabimisaki bino o Ezipeti mpe nakambaki bino o eliki mibu ntuku inei mpo ’te bozwa mabelé ma ba-Amor.

2:11  O ntei ya bino nabimisaki baprofeta mpe o ntei ya bilenge nabimisaki babonzami ! Bato ba Israel, ezali bongo te ? Maloba ma Yawe.

2:12  Bino bomelisi babonzami ba ngai vino, mpe bopekisi baprofeta basakola.

2:13  Yango wana ngai nakonyata bino sikawa, lokola likalo lya bilanga likonyataka mabelé.

2:14  Ata moto wa mbangu akokima te, elombe akokoka kolakisa bokasi bwa ye te, moto wa mpiko enene akokima liwa te.

2:15  Moto wa litimbo akolonga te, moto wa mbangu akokima te, ata motambwisi farasa akomibikisa te ;

2:16  ata moto oyo aleki baninga banso na mpiko akokima bolumbu mokolo mona. Maloba ma Yawe.

Chapter 3

3:1  Bana ba Israel, boyoka maloba ma Yawe oyo akaneli bino mpe libota mobimba nabimisaki o Ezipeti :

3:2  O ntei ya mabota manso ma mokili nayebaki bobele bino, yango wana nakotumbola bino mpo ya mabe manso bosalaki.

3:3  Bato babale bakokendeke nde mo­bembo nzela yoko soko liboso bayokani te ?

3:4  Nkosi ekolelaka nde o zamba soko ebomi naino nyama te ? Mwana wa nkosi ekolelaka nde o mobenga soko ezwi eloko ya kolia te ?

3:5  Ndeke ekokita mpe ekokangema o motambo soko bakosi yango na eloko ya kolia te ? Monyama mokotombwama soko nyama yoko ekoti naino te ?

3:6  Bato banso bakoyokaka nsomo te soko babeti mondule o engumba ? Malozi makokwelaka nde engu­mba liboso ’te Yawe atinda ma­ngo ?

3:7  Kasi Yawe Nzambe akosalaka elo­ko te liboso ’te ayebisa baprofeta, basaleli ba ye.

3:8  Nani akobanga te soko nkosi eleli ? Mokonzi Yawe ayebisi likambo, nani akosakola te ?

3:9  Sakola o ndako ya bakonzi ba Asur mpe ba Ezipeti : Loba : Banso bosangana o ngomba ya Samaria, botala mobulu mpe minyoko mizali kuna !

3:10  Bayebi makambo ma bosembo te, batondisi ndako inene ya bango na biloko babotoli na bitumba mpe na boyibi. Maloba ma Yawe.

3:11  Yango wana Yawe Nzambe alobi : Monguna akoya kozinga ekolo mobimba, akosilisa bokasi mpe lokumu la yo, akoyiba biloko binso bya ndako ya yo.

3:12  Yawe alobi boye : Lokola mokengeli akomeka kobikisa o monoko mwa nkosi makolo mabale, ata litoi, Nzambe akobikisa bato ba Israel, baye bafandi o Samaria, baye bafandi o nsuka ya mbeto to o kiti enene ya motuya ya Damasko.

3:13  Yoka mpe loba maloba ma bokaneli Yakob, mazali maloba ma Yawe Mokonzi wa bokasi bonso :

3:14  Mokolo nakotumbola Israel mpo ya masumu ma ye, nakoya kobuka bitumbelo binso bya Betel, nakobakola maseke o matumu ma etumbelo, makokweya o nse.

3:15  Nakobuka ndako bakofandaka o eleko ya molunge mpe o eleko ya mpio, nakobuka ndako bakembisi na mpembe ya nzoku, mpe nakokweisa ndako inene ya bango. Maloba ma Yawe.

Chapter 4

4:1  Boyoka liloba liye, bino ngombe basi ya Basan, bino baye bokoliaka biloko o ngomba ya Samaria, bokonyokoloko babola mpe bokonyataka bato bakeleli, bokolobaka na babali ba bino : « Pesa biso masanga tomele ! »

4:2  Yawe alayi na nkombo esantu ya ye, alobi : Mikolo mikoya bakokanga bino na bibende mpe na nkanya, tee moto wa nsuka ;

4:3  bokoluka kobima o bisika lopa­ngo ebukani, moto na moto nzela ya ye ; bakokimisa bino kin’o ngomba Ermon. Maloba ma Yawe.

4:4  Bokende o Betel mpe bosala masumu ! Bokende o Gilgal mpe bokoba kosala mabe ! Na ntongo bopesa mabonza ma bino, nsima ya mikolo misato bopesa ete­ni ya zomi ya biloko ;

4:5  bobonza mampa malambami na nkisi te bo libonza lya bokumisi ; bomikumisa na mabonza bobonzi na motema mwa bino moko ! Mpo yango nde ba-Israel bolingi ! Maloba ma Mokonzi Yawe.

4:6  Napimaki bino bilei o bingumba binso, napimaki bino mampa o ndako ya bino, ata bongo bozongeli ngai te ! Maloba ma Yawe.

4:7  Napimaki bino mpe mbula sanza isato liboso lya eleko ya bobuki mbuma, nanokisaki yango o engumba yoko, o engumba esusu te. Epai yoko bilanga bizwaki mai, epai esusu mbula enoki te, bilanga bikauki.

4:8  O bingumba bisusu bato balembi na mposa ya mai, bakei koluka mango o engumba ya penepene, kasi mposa ya mai esilaki te, ata bongo bozongeli ngai te !

4:9  Natindelaki milona mya bino bokono, napimaki ndunda ya bino na nzete ya vino mai, mapalela masilisaki nzete ya figi mpe ya oliva, ata bongo bozongeli ngai te ! Maloba ma Yawe.

4:10  Natindelaki bino bokono bobe lokola o Ezipeti, nabomaki bilenge ba bino na mopanga, mpe nabotoloki bino farasa ya etumba, nayokisaki bino nsolo ebe ya bato bawei o nganda, ata bongo bozongeli ngai te ! Maloba ma Yawe.

4:11  Nabulinginyi bino lokola Sodoma na Gomora, bokomaki lokola nkoni babikisi o móto, ata bongo bozongeli ngai te !

4:12  Yango wana, tala ndenge nini nakosala yo, Israel, mpe awa nalingi kosala yo bongo, omilengele mpo ’te okutana na Nza­mbe wa yo.

4:13  Mpamba te, oyo apiki ngomba mpe akeli mompepe, oyo akoyebisaka moto makanisi ma ye, oyo akobimisaka ntongo nsima ya butu, oyo akotambolaka o etando ya likolo, nkombo ya ye ‘Yawe Nzambe wa bokasi bonso’.

Chapter 5

5:1  Boyoka maloba maye ma bokaneli bino, maloba ma mawa, bato ba Israel.

5:2  Ngondo wa Israel akwei, akoteleme lisusu te, moto akoki kotelemisa ye azali te !

5:3  Yawe Nzambe alobi boye : Engumba ezalaki na babuni nkoto yoko ekotikala sikawa se na monkama, eye ezalaki na babuni monkama, ekotikala sikawa na zomi mpa­mba.

5:4  Yawe alobi na bato ba Israel : Boluka ngai mpe bokozala malamu !

5:5  Kasi boluka kokende o Betel te, boyingela o Gilgal te, boleka mpe o Berseba te, zambi bato ba Gilgal bakokende o boombo, mpe Betel ekokoma mopotu.

5:6  Boluka Yawe mpe bokozala malamu, soki te Yawe akongala lokola móto o libota lya Yozefu, mokotumba Betel mobimba, moto moko te akokoka kozimisa mwango !

5:7  Mawa na bato bakomisi bosembo bololo, mpe babwaki bwango o mabelé.

5:8  Oyo akeli Bangondo Nsambo na Motó mwa Ekange, oyo akobimisaka moi nsima ya butu, oyo akosangisaka mai ma mbu mpe akotangisaka mango o mokili bipai binso, nkombo ya ye, Yawe !

5:9  Ye akotindela moto wa nguya babebisi mpe ebombamelo ya ye ekobeba nye.

5:10  Bayini moto akosamba na bose­mbo, mpe bakinoli moto oyo akolobaka na bosolo.

5:11  Yango wana, awa bokonyataka moto motau mpe bokokamataka mbuma ya ma­mpa ya ye bo mpako ya lokuta, bokofanda o ndako inene ya bino te, iye botongaki na mabanga kitoko ; bilanga biye bino moko bolonaki, bokomele vino ya byango lisusu te.

5:12  Mpamba te, nayebi mabe ma bino manso, masumu ma bino mazali na nsuka te : bokonyokoloko basemba, bokofutisaka bango mpako, mpe bokokitisaka babola o esa­mbi.

5:13  Yango wana moto wa bokebi atiki koloba, zambi eleko eye ezali eleko ya mawa.

5:14  Boluka kosala malamu, bosala mabe te mpo ’te boumela mingi na bomoi, bongo Yawe Nzambe wa bokasi bonso azala na bino, lokola bokolobaka.

5:15  Boboya mabe, bolinga se kosala malamu, o esambi bolanda makambo na bosembo, mbele Yawe Nzambe wa bokasi bonso akoyokela bato batikali o ekolo ya Yozefu mawa.

5:16  Yango wana Nzambe wa bokasi bonso, Mokonzi, alobi boye : bipai binso bato bakolela, o balabala inso bato bakoloba : « Mawa e ! Mawa e ! » Bakobenga mosali wa bilanga o lilaka, mpe baye bakolelaka na nzembo balela wana ;

5:17  bakolela o bilanga binso bya nzete ya vino, zambi nakoleka o kati ya bino, maloba ma Yawe.

5:18  Mawa na baye bakolikya na mokolo mwa Yawe ! Mokolo mwa Yawe mokoyela bino nini ? Ekozala mokolo mwa molili, moi mokozanga.

5:19  Bokozala lokola moto akimi nkosi kasi akutani na mpakasa ! Ayingeli o ndako, asimbi efelo mpe nyoka eswi ye !

5:20  Mokolo mwa Yawe mokozala mo­kolo mwa molili, moi mokozanga, mokolo mwa molili mpenza, mwinda soki te !

5:21  Nayini mpe nakinoli biyenga bya bino, nayoki milulu mya bino mpi.

5:22  Soko botumbeli ngai mabonza, ata libonza lyoko likosepelisa ngai te, nyama ya mafuta bobonzeli ngai, naboyi kotala yango.

5:23  Bolongwa na makeléle ma nze­mbo ya bino, nayoka nzenze ya bino soki te !

5:24  Bosolo bwa bino bomonono lokola mai ma liziba, bosembo bwa bino bozala lokola mai o moluka makokaukaka te.

5:25  Bato ba Israel, mibu ntuku inei bozalaki o eliki, bobonzelaki ngai nde mabonza mpe miboma ?

5:26  Nzokande bokomeme Sakut, mokonzi wa bino, bokokumisaka monzoto Kevan bo elembo ya nzambe wa bino, bikeko biye bomisaleli.

5:27  Ngai nakokamba bino o mokili mosusu, leka Damasko ! Maloba ma Yawe, oyo azali na nko­mbo : Nzambe wa bokasi bonso.

Chapter 6

6:1  Mawa na baye bakofandaka nye o ngomba Sion, mawa na baye bakotiaka mitema na ngomba ya Samaria, mawa na bankumu ba ekolo eleki bikolo binso ; bato ba Israel bakolukaka mayele epai ya bango.

6:2  Bokende o Kalne mpe botala, bopusana kin’o engumba enene Amat, na nsima bokita o Gat epai ya ba-Filisti. Bikolo bina bileki nde bino na bolamu ? Mokili mwa bango moleki nde mokili mwa bino na bonene ?

6:3  Bolingi kozongisa mokolo mwa mpasi nsima, nzokande bobengi mikolo banyokoli bakoyangela bino !

6:4  Bakolalaka o mbeto bakembisi na mpembe ya nzoku mpe bakopemaka o kiti ya lokumu, bakoliaka bana ba mpata ya eto­nga ya bango, to bana ba ngombe bazwi o lopango.

6:5  Bakoyembaka nzembo ya bango moko na nzenze, bakobimisaka biyembeli bya sika bya miziki, lokola Davidi asalaki.

6:6  Bakomeleke vino o nkeni inene mpe bakomipakolaka mafuta ma motuya monene. Kasi awa ekolo ya Yozefu ezali kobeba nye, bazali koyoka motema mpasi te.

6:7  Yango wana bakozala bato ba liboso o molongo mwa baye bakokende o boombo. Lisanga lya bato ba goigoi likopa­nzana !

6:8  Mokonzi Yawe alayi na nkombo ya ye moko ; Elobi bongo Yawe Nzambe wa bokasi bonso : Nayoki lokumu la Yakob mpi, nayini ndako inene ya ye, nakokaba engumba na baye banso bafandi wana.

6:9  Mokolo mona, ata bato zomi batikali o ndako yoko, bakokufa.

6:10  Moko wa baye bakotikala akobimisa minkuwa o ndako, mpe soko atuni moto oyo azali o kati ya ndako : « Moto mosusu atikali wana epai ya yo ? » Oyo akozongisa : « Te, banso basili ! » Mpe akobakisa : « Zala nye ! Awa okoki kotanga nkombo ya Yawe te ! »

6:11  Yawe apesi etinda eye : bakobuka ndako enene, ndako eke ekokoma na mikaka.

6:12  Farasa imeseni nde kotambola o nzela ya mabanga, ngombe ya mosala ikosalaka nde o kati ya mbu ? Boniboni bino bokomisi mibeko lokola ngenge mpe misala mya bosembo lokola kongobololo ?

6:13  Bino bato bokosepelaka mpo ya Lo-Debar ntina te, bolobi : « Tobotoli Karnayim na makasi ma biso te ? »

6:14  Yawe wa bokasi bonso alobi : Nakotindela yo ekolo yoko, baya konyata bino, bato ba Israel, banda Amat kin’o bweta bakota­ngaka Araba.

Chapter 7

7:1  Boyoka makambo Mokonzi Yawe alakisi ngai : Namoni mapalela ebele o esobe ya matiti ma sika, nsima ya bobuki mbuma ya mokonzi.

7:2  Awa mapalela masilisi matiti bisika binso, nalobi : « Yawe Nzambe wa ngai, nabo­ndeli yo, limbisa ! Ndenge nini bato ba Yakob bakobika ? Batikali mingi te ! »

7:3  Mpe Yawe akitisi motema, atiki mokano moye, alobi : « Mabe mana makosalema te. »

7:4  Boyoka makambo Mokonzi Yawe alakisi ngai : Mokonzi Yawe apelisaki móto mwa etumbu, móto mosilisi Mai manene mpe mobandi kozikisa mokili.

7:5  Nalobi : « Mokonzi Yawe, nabo­ndeli yo, tika ! Ndenge nini bato ba Yakob bakobika ? Batikali mingi te ! »

7:6  Mpe Yawe atiki mokano moye, alobi : « Mabe mana makosalema te ! »

7:7  Boyoka makambo Yawe Nzambe alakisi ngai : Namoni Yawe atelemi o efelo, asimbi nsinga ya botongi o maboko.

7:8  Yawe atuni ngai : « Amos, omoni nini ? » Nalobi : « Namoni nsinga ya boto­ngi. » Mpe Mokonzi Yawe alobi na ngai : « Nayei na nsinga ya botongi komeka bato ba ekolo ya ngai Israel. Banda lelo nakolimbisa bango lisusu te.

7:9  Nakobuka bitumbelo binso bya Izaka. Nakobebisa ndako inso ya losa­mbo o Israel, mopanga o maboko, nakobebisa libota lya Yeroboam. »

7:10  Amazia, nganga Nzambe o Betel, atindeli Yeroboam, mokonzi wa Israel, maloba maye : « O Israelmei Amos azali koluka kobebisa bo­konzi bwa yo. Moto moko akoki kondima maloba ma ye lisusu te.

7:11  Mpamba te, Amos alobi boye : ‘Yeroboam akowa na mopanga, bato ba Israel bakokende o boombo mosika na mokili mwa bango’. »

7:12  Amazia alobi na Amos : « Momoni makambo, longwa, kima o mokili mwa Yuda, lia mampa ma yo kuna mpe zala profeta kuna.

7:13  Kasi tika kosakola awa o Betel, mpo ndako esantu ezali ya mokonzi, ezali te­mpelo ya ekolo. »

7:14  Amos azongiseli ye : « Nazalaki profeta te, nazalaki mpe mwana wa profeta te, kasi nazalaki mokengeli wa bibwele mpe mosali wa elanga wa figi.

7:15  Yawe akamati ngai ntango nazalaki kokengele mpata, alobi na ngai : ‘Ke­nde kosakola makambo na bato ba Israel.’

7:16  Bongo sikawa, yoka liloba lya Yawe. Yo oyebisi ngai : “Okoloba maloba ma bokaneli Israel lisusu te, okotika kofinga libota lya Izaka.”

7:17  Nzokande Yawe alobi boye : “Mwasi wa yo akokende kolanda babali basusu, bana babali na bana basi ba yo bakokufa na mopanga, bato bakokabolana mabelé ma yo, yo moko okowa o mokili mwa mbindo, mpe bato ba Israel bakokende o boombo mosika na mokili mwa bango”. »

Chapter 8

8:1  Boyoka makambo Yawe Nzambe alakisi ngai : Namoni ekoló etondi na mbuma isili iteli.

8:2  Yawe atuni ngai : « Amos, omoni nini ? » Nazongisi : « Namoni ekoló eto­ndi na mbuma iteli. » Yawe alobi na ngai : « Nsuka ya ekolo ya ngai Israel ekomi penepene, banda lelo nakolimbisa bango lisusu te.

8:3  Mokolo mona o ndako inene nze­mbo ya boleli ekoyembama, bibembe bikozala mingi, bikobwakema bipai binso : manso makokoma nye ! » Maloba ma Mokonzi Yawe.

8:4  Boyoka malamu, bino bato bokonyataka babola, mpe bokobomaka bato ba mawa o mokili.

8:5  Bokolobaka : « Eyenga ya Sanza ya sika ekozala mokolo nini mpo tokoka koteke mbuma ya ma­mpa ? Mokolo mwa Sabato mokosila nta­ngo nini mpo tokoka koteke masangu ma biso ? Tokokutola biloko mpe tokobutisa motuya, tokokamata bimekeli bya lokuta.

8:6  Tokosomba bato batau na mosolo mpe mobola na motuya mwa sapato ; tokoteke ata mintika mya mbuma ya mampa. »

8:7  Yawe alayi na nkombo ya ye, lokumu la Yakob : « Nakobosana mabe manso ma ba­ngo mokolo moko te. »

8:8  Mpo ya mabe mana mokili mokoningana te ? Bato banso ba mokili bakozala na lilaka te ? Bisika binso mai makotonda lokola o ebale Nil, makotonda mpe makokita lokola ebale ya Ezipeti.

8:9  Mokonzi Yawe alobi : Mokolo mona nakosala ’te mwese molimwa na midi, mpe nakokomisa moi molili o nse mobimba.

8:10  Nakokomisa biyenga bya bino mikolo mya mawa. Nzembo ya bino ikokoma nze­mbo ya lilaka. Nakolatisa bino banso ngoto o loketo, mpe nakokokola mitó mya bino. Bokolata mpili lokola moto akufeli mwana se moko wa ye. Nsuka ya ye ekozala mokolo mwa mawa manene solo.

8:11  Yawe alobi boye : Mokolo moko nakotinda nzala enene o ekolo eye ; nzala ya biloko te, mposa ya mai mpe te, kasi mposa ya koyoka liloba lya Yawe.

8:12  Bakotelengana ut’o mbu yoko kin’o mbu esusu, bakoyengayenga ut’o Nordi kin’o Esti mpo ’te baluka liloba lya Yawe, kasi bakoyoka lyango te.

8:13  Mokolo mona bonzenga bwa bilenge basi bokosila, bilenge babali bakosenzwa na mposa ya mai.

8:14  Baye bakolayaka ndai na nkombo ya lisumu lya Samaria, baye bakolobaka : « Dan, Nzambe mpenza ! » mpe : « Berseba e ! Epai ya yo tokokendeke kosambela », bango banso bakokweya mpe bakoteleme lisusu te.

Chapter 9

9:1  Namoni Yawe atelemi o altare, alobi na ngai : « Ningisa motondo mwa ndako, makonzi ma ndako maningana ; buka mango o mitó mya bango banso, ngai nakoboma na mopanga baye bakotikala ; moto moko te akokoka kokima, o kati ya bango moto moko akobika te.

9:2  Soko bameki kokoto na makasi o mboka ya bawa, nakokanga bango na loboko, ata babuti o likolo, nakokitisa bango o nse ;

9:3  ata bakei kobombama o nsonge ya Karmel, nakokende koluka mpe kokamata bango ; ata bakiti o mbu bozindo mpenza mpo ya kokima miso ma ngai, nakotinda nyoka ya mai eswa bango kuna ;

9:4  Ata bakangemi na banguna, nakotinda bato baboma bango na mopanga, nakobwaka miso epai ya bango mpo ’te bazwa bolamu te, bazwa se bobe. »

9:5  Awa Yawe Nzambe wa bokasi bo­nso asimbi mokili, mokili mokoningana mpe bato bakolela na mawa ; mokotombwama lokola mai ma Nil, mokokita lokola mai ma ebale ya Ezipeti.

9:6  Ye amitongeli ndako enene o likolo mpe apiki etando ya likolo awa o nse, akosangisaka mai ma mbula mpe akotangisaka mango o mokili mobimba ; nkombo ya ye Yawe !

9:7  Yawe alobi boye : Bato ba Israel, namoni ’te bokokani na bato ba Kus ! Nabimisaki bato ba Israel o Ezipeti te, ba-Filisti o Kaftor, mpe ba-Aram o Kir ?

9:8  Miso ma Mokonzi Yawe mazali se epai ya ekolo eye ya basumuki ; nakosilisa bango o nse mobimba, nzokande nakoboma bato banso ba Yakob te. Maloba ma Yawe.

9:9  Ya solo, nakotinda etinda mpe nakoningisa bato ba ekolo ya Israel o bikolo binso, lokola loso bakopupolaka na lu­ngu, lokopanzana.

9:10  Basumuki ba ekolo ya ngai banso bakokufa na mopanga, baye bakolobaka : « Akotindela biso mpasi te, mpasi ekokwela biso te ! »

9:11  Mokolo mona nakobongisa nda­ko ya Davidi eye ebebi, nakokanga malusu batuboli o lopango la ngomba, nakobongisa bifelo biye bibukani, nakotonga yango lokola ezalaka liboso ;

9:12  bongo bato ba ngai bazwa boko­nzi bwa Edom mpe bwa bikolo bisusu bizali na nkombo ya ngai. Maloba ma Yawe, akosala se bo­ngo.

9:13  Yawe alobi : O mikolo mikoya bato bakokataka bilanga bakobuka mbuma noki, baye bakolonaka nzete ya vino bakokamola vino noki. O ngomba inene nzete ikobota vino ya sika ebele, ngomba ike ikotonda na bilanga bya vino.

9:14  Nakobongisa ekolo ya ngai Israel, bakotonga lisusu mboka iye ibebi mpe bakofanda wana, bakolona lisusu nzete ya vino mpe bakomele vino, bakokata lisusu bilanga mpe bakolia mbuma ya byango.

9:15  Nakofandisa bango o mabelé ma bango moko, bakolongwa lisusu te o mokili moye ngai moko napesi bango. Yawe Nzambe wa bino alobi bo­ngo.