Azeri - Galatians

Chapter 1

1:1  ائنسانلار طرفئندن يوخ، ائنسانلارين واسئطه‌سئله ده يوخ، آنجاق عئسا مسئح و اونو اؤلولردن دئرئلدن آتا تاري واسئطه‌سئله حواري تعيئن اولونان پولوسدان

1:2  و منئمله اولان بوتون قارداشلاردان، قالاتئيانين کئلئسالارينا:

1:3  آتاميز تاريدان و ربّ عئسا مسئحدن سئزه فيض و باريش اولسون.

1:4  او کي، آتاميز تارينين ائراده​سئنه گؤره، اؤزونو بئزئم گوناهلاريميز اوچون فدا اتدي کي، بئزي ائندئکي شر دؤوردن قورتارسين.

1:5  اونا ابده کئمي عئزّت اولسون. آمئن.

1:6  تعجّوب اِدئرم کي، سئز بله تزلئکله مسئحئن فيضئنده سئزي چاغيراني ترک ادئب، آيري بئر ائنجئله دؤنورسونوز.

1:7  اصلئنده اؤزگه بئر ائنجئل يوخدور؛ آنجاق بعضي آداملار وار کي، سئزي چاشديريب مسئحئن ائنجئلئني تحرئف اتمک ائسته‌يئرلر.

1:8  لاکئن حتّا اگر بئز، و يا گؤيدن گلن بئر ملک، سئزه وعظ اتدئيئمئز ائنجئله ضئدّ بئر شي وعظ اتسه، اونا لعنت اولسون!

1:9  اوّلجه ددئيئمئز کئمي، ائندي ده ديئرم؛ کئم سئزه قبول اتدئيئنئز ائنجئلئن ضئدّئنه باشقا بئر ائنجئل وعظ اتسه، اونا لعنت اولسون!

1:10  ائندي من کئمي راضي اتمک ائسته‌يئرم، ائنسانلاري، يوخسا تاريني؟ يا دا مگر ائنسانلاري خوشلانديرماق ائسته‌يئرم؟ اگر من حله ده ائسته‌سيدئم کي، ائنسانلاري خوشلانديريم، مسئحئن قولو اولمازديم.

1:11  قارداشلار، ائسته‌يئرم بئله​سئنئز کي، سئزه وعظ اتدئيئم ائنجئل ائنسان قاييرديغي ديئل.

1:12  چونکي من اونو نه ائنساندان آلديم، نه ده اؤيره‌دئلدئم. آنجاق اونو عئسا مسئحئن بئر وحيي ائله آلديم.

1:13  چونکي سئز يهودئلئکده اولان قاباقکي احوالاتيمي اشئدئبسئنئز کي، نجه شئدّتلي بئر شکئلده تارينين کئلئساسينا عذاب ورئردئم و چاليشيرديم کي، اونو آرادان آپاريم.

1:14  و يهودئلئکده اؤز عئرقئمدن اولان ياشيدلاريمي نجه اؤتوب، اجدادلاريمين رسم-روسوملارينا حدّئندن آرتيق قيرتلي ائدئم.

1:15  آمّا او واخت کي، آنامين بطنئندن مني سچن و اؤز فيضي ائله دعوت اِدن تاري روا گؤردو کي،

1:16  اؤز اوغلونو منده ظاهئر اتسئن، اله کي، من اونو قيري​​يهودئلرئن آراسيندا وعظ ادئم، من درحال هچ کسله مصلحتلشمه‌دئم.

1:17  اورشلئمه، مندن قاباق حواري اولانلارين يانينا دا گتمه‌دئم. لاکئن عربئستانا گتدئم و گئنه دمشقه قاييتديم.

1:18  اوچ ائل کچندن سونرا، اورشلئمه گتدئم کي، کئفا ائله تانيش اولوم و اونونلا اون بش گون قالديم.

1:19  آمّا او بئري حوارئلردن هچ بئرئني گؤرمه‌دئم مگر ربّئن قارداشي يعقوبو.

1:20  (سئزه هر نه کي، يازيرام، تارينين حوضوروندا سئزه يقئن ورئرم کي، يالان دمئرم.)

1:21  سونرا، سورئيه و قئلئقئيه دئيارينا گتدئم.

1:22  و حله ده مسئحئن يهودئيه​ده اولان کئلئسالاري مني شخصن تانيميرديلار؛

1:23  آنجاق اونلار دائم اشئدئردئلر کي، "بئر زامان بئزه عذاب ورن شخص، ائندي اؤزو اله او ائماني وعظ ادئر کي، بئر زامانلار اونو محو اتمه‌يه چاليشيردي."

1:24  و مندن اؤتري تارييا حمد ادئردئلر.

Chapter 2

2:1  اون دؤرد ائل سونرا، بارنابا ائله بئرلئکده گئنه اورشلئمه گتدئم، تئطوسو دا اؤزومله آپارديم.

2:2  بئر وحيه گؤره ائدي کي، گتدئم. و اونلارا قيري​‌​يهودئلر آراسيندا وعظ اتدئيئم ائنجئلي تقدئم اتدئم. لاکئن بونو اعتئبارلي اولانلارا خوصوصي بئر شکئلده اتدئم کي، مبادا عبث قاچيب و يا قاچميش اولوم.

2:3  حتّا يانيمدا اولان تئطوس دا، يونانلي اولان حالدا، ختنه اولونماغا مجبور ادئلمه‌دي.

2:4  آمّا بو، گئزلئجه آراميزا سوخولان يالانچي قارداشلار اوزوندن اولدو کي، مسئح عئسادا اولان آزادليغيميزي گودوردولر، اله کي، بئزي قوللوغا چکسئنلر.

2:5  اونلارا بئر ساعات دا اولسا، باش اَيئب تسلئم اولماديق کي، ائنجئلئن حقئقتي سئزئنله ثابئت قالسين.

2:6  آمّا اعتئبارلي توتولانلار(منه فرق اِتمز کي، اونلار نه ائمئشلر. تاري طرفدارليق اتمز.) منه بئر شي آرتيرماديلار.

2:7  عکسئنه، او زامان کي، ختنه​سئزلر اوچون ائنجئلئن منه تاپشيريلماسيني گؤردولر، نجه کي، ختنه​لي​لر اوچون پطروسا تاپشيريلميشدي.

2:8  (چونکي ختنه​لي​لره حواري اولماسي اوچون پطروسدا ائشله‌ين، قيري‌يهودئلر اوچون منده ده ائشله‌دي.)

2:9  و منه عطا اِدئلن فيضي تشخئص وِرَنده، سوتونلار ساييلان يعقوب، کئفا، و يوحنّا صاغ اللرئني رفاقت اوچون منه و بارنابايا وردئلر کي، بئز قيري‌يهودئلرئن آراسينا گدک، اونلار دا ختنه​لي​لرئن.

2:10  آنجاق بئزدن ائسته‌دئلر کي، يوخسوللاري ياددان چيخارتماياق؛ اِله همن شيي کي، من ده اونو اتمه‌يه جان آتيرديم.

2:11  لاکئن پطروس انطاکئيه‌يه گلنده، اونون اوزونه ضئدّ دوردوم، چونکي تقصئرلي ائدي.

2:12  اونا گؤره کي، يعقوبون طرفئندن بعضي آداملار گلمه‌دن قاباق، قيري‌​يهودئلر​له يمک ييئردي. آمّا اونلار گلندن سونرا، ختنه حزبئنئن قورخوسوندان اونلاردان چکئنئب، اؤزونو آيري ساخلاييردي.

2:13  اؤزگه يهودئلر ده رئياکارليقدا اونا قوشولدولار، بله کي، حتّا بارنابا دا اونلارين رئياکارليغينا توتولدو.

2:14  لاکئن او زامان کي، اونلارين ائنجئلئن حقئقتئنه دوزگون رفتار اتمه‌دئکلرئني گؤردوم، هامينين حوضوروندا کئفايا ددئم: "اگر سن، يهودي اولان حالدا، يهودئلر کئمي يوخ، قيري​‌​يهودئلر کئمي ياشاييرسان، نجه قيري‌​يهودئلري مجبور ادئرسن کي، يهودئلر کئمي ياشاسينلار؟!"

2:15  بئز آنادان گلمه يهودئيئک و قيري‌​يهودئلر آراسيندان اولان گوناهکارلار ديئلئک؛

2:16  لاکئن بئلئرئک کي، ائنسان شرئعتئن عمل​لري ائله يوخ، مسئح عئسايا اولان ائمان واسئطه‌سئله صالح ساييلير. حتّا بئز ده مسئح عئسايا ائنانديق کي، شرئعتئن عمل‌لري ائله يوخ، مسئحه اولان ائمان واسئطه‌سئله صالح ساييلاق. چونکي شرئعتئن عمل​لري ائله هچ بئر ائنسان صالح ساييلماز.

2:17  اگر بئز، مسئحده صالح ساييلماغيميزي آختاران ائکن، گوناهکار دا چيخساق، اوندا آيا مسئح گوناهين خئدمتچئسي‌دئر؟ حاشا.

2:18  چونکي اگر من اوّلجه ييخديغيمي گئنه تئکئرم، اؤزومون تقصئرلي اولدوغومو ائثبات ادئرم.

2:19  چونکي من شرئعتئن واسئطه‌سئله شرئعته اؤلدوم کي، تاري اوچون ياشاييم.

2:20  من مسئحله چارميخا چکئلمئشم و ياشايان آرتيق من ديئلم، مسئحدئر کي، منده ياشايير. و بدنده ياشاديغيم بو حياتي، تارينين اوغلونا اولان ائمان واسئطه‌سئله ياشاييرام کي، مني سِودي و منئم اوچون اؤزونو تسلئم اتدي.

2:21  تارينين فيضئني باطئل اتمئرم. چونکي اگر صالحلئک شرئعتئن واسئطه‌سئله مومکون اولسايدي، دمه‌لي مسئح عبث يره اؤلدو.

Chapter 3

3:1  سئز عاغيلسيز قالاتئيالي​لار، کئم سئزي طئلسئمله‌دي، کئمئن گؤزلري قاباغيندا عئسا مسئح چارميخا چکئلمئش تصوئر اولوندو؟!

3:2  سئزدن بئلمک ائسته‌دئيئم آنجاق بو بئر مطلبدئر: سئز موقدّس روحو شرئعتئن عمل​لری ائله آلدينيز، يوخسا اشئتدئيئنئزه ائمان گتئرمکله؟

3:3  آيا بو قدر عاغيلسيزسينيز؟! روحلا باشلاييب، ائندي جئسمله کامئلله‌شئرسئنئز؟

3:4  بو قدر اذئيّتي مگر بوش يره چکدئنئز؛ دوغرودان دا مگر بوش يره ائدي؟

3:5  بس ائندي موقدّس روحو سئزه عطا ادن و آرانيزدا مؤجوزه​لر يارادان، بونلاري شرئعتئن عمل​لرئني اتدئيئنئز اوچون ادئر، يوخسا اشئتدئيئنئزه ائمان گتئردئيئنئز اوچون؟

3:6  اِله ائبراهئم ده "تارييا ائمان گتئردي و بو اونا صالحلئک ساييلدي."

3:7  بلجه آرخايين اولون کي، ائبراهئمئن اوغوللاري اونلارديرلار کي، ائمان گتئرئرلر.

3:8  موقدّس يازي دا قيري‌​يهودئلرئن ائمانلارينا​ گؤره صالح ساييلديغيني قاباقدان گؤروب، ائبراهئمه ائنجئلي موژده وردي کي، "بوتون مئلّتلر سنده برکتلنه​جکلر."

3:9  بلجه، ائمان گتئرنلر ائمان گتئرن ائبراهئمله برکتله‌نئرلر.

3:10  چونکي شرئعتئن عمللرئنه ائستئناد اِدَنلرئن هاميسي لعنت آلتينداديرلار. چونکي يازيليب: "ملعوندور هر کس کي، شرئعت کئتابيندا يازيلان بوتون شيلرده دورماييب، اونلاري عمله گتئرمه‌سئن."

3:11  آيديندير کي، هچ کس شرئعتئن واسئطه​‌سئله تارينين حوضوروندا صالح ساييلمير. چونکي "صالح آدام ائمانلا ياشاياجاق."

3:12  آمّا شرئعت ائماندان ديئل. عکسئنه، "اونلارا عمل اِدَن هر کس اونلارلا ياشاياجاق."

3:13  مسئح بئزئم يولوموزدا ملعون اولاراق، بئزي شرئعتئن لعنتئندن ساتين آليب، قورتاردي. چونکي يازيليب: "آغاجدان آسيلان هر کس ملعوندور."

3:14  اِله کي، ائبراهئمئن برکتي مسئح عئسادا قيري‌​يهودئلره گلسئن و بئز ده وعده​سي ورئلمئش موقدّس روحو ائمان واسئطه‌سئله آلاق.

3:15  قارداشلار، ائنسان ساياغي ديئرم: رسمئيّته کچمئش بئر وصئيّت، بئر ائنسانين اولسا دا، هچ کس اونو لغو اتمز، اونا علاوه ده اتمز.

3:16  وعده​لر ائبراهئمه و اونون نسلئنه ديئلدي. تاري بئر چوخ آداما ائشاره اتمئش کئمي "سنئن نسئلرئنه" دمئر. آنجاق بئرئنه ائشاره اتمئش کئمي "سنئن نسلئنه" ديئر کي، مسئح اولسون.

3:17  بونو دمک ائسته‌يئرم: شرئعت کي، بوندان دؤرد يوز اوتوز ائل سونرا گلدي، تارينين تصدئق اتدئيي قاباقکي وصئيّتي اعتئباردان سالا بئلمز، اِله کي، وعده​ني لغو اتسئن.

3:18  چونکي اگر مئراث شرئعته باغلي اولسا، آرتيق وعده​يه باغلي ديئل؛ لاکئن تاري اونو ائبراهئمه بئر وعده واسئطه‌سئله عطا ادئب.

3:19  بس شرئعت نه اوچوندور؟ ديئلن نسلئن گلمه‌يئنه قدر کي، وعده اونا ورئلئب، شرئعت خاطالارين سببئندن ملکلر واسئطه​‌سئله بئر واسئطه‌چي اَلي ائله علاوه اولونوب، ترتئب ورئلدي.

3:20  واسئطه​چي بئر طرف اوچون ديئلدئر؛ لاکئن تاري بئردئر.

3:21  بس آيا شرئعت تارينين وعده​لرئنه ضئدّدئر؟ حاشا! چونکي اگر حيات ورمه‌يه قادئر اولان بئر شرئعت ورئلسَيدي، اوندا صالحلئک حقئقتن شرئعته باغلي اولاردي.

3:22  آمّا موقدّس يازي بوتون هر نه‌يي گوناه آلتيندا باغلادي کي، عئسا مسئحه اولان ائمانا دايانان وعده، ائمان گتئرنلره ورئلسئن.

3:23  لاکئن ائمانين گلمه‌سئندن قاباق، بئز شرئعتئن موحافئظه​سي آلتيندا ساخلانيب، گله​جک ائمانين ظوهور اده​جه‌يئنه قدر توتولموشدوق.

3:24  بونا گؤره، شرئعت بئزئم موربّئمئز اولوب کي، بئزي مسئحه يتئرسئن، اِله کي، ائمان واسئطه‌سئله صالح ساييلاق.

3:25  آمّا ائندي او ائمان گلئب و بئز آرتيق بئر موربّئنئن الي آلتيندا ديئلئک.

3:26  چونکي سئز هامينيز مسئح عئسايا اولان ائمان واسئطه‌سئله تارينين اوغوللاريسينيز.

3:27  چونکي مسئحده تعمئد اولونان بوتون سئزلر، مسئحي گِيئنئبسئنئز.

3:28  نه يهودي وار نه يونانلي، نه قول وار نه آزاد، نه کئشي وار نه آرواد، چونکي سئز هامينيز مسئح عئسادا بئرسئنئز.

3:29  و اگر سئز مسئحئنکئسئنئز، او زامان سئز ائبراهئمئن نسلي و وعده​يه گؤره وارئثسئنئز.

Chapter 4

4:1  ائندي بونو ديئرم کي، مادام کي، وارئث اوشاقدير، هر شيئن صاحئبي اولسا دا، قوللا هچ فرقي يوخدور.

4:2  او، آتاسينين تعيئن اتدئيي واختا قدر، قيّوملارين و وکئللرئن اَلي آلتيندادير.

4:3  اِله‌جه ده بئز، اوشاقلار ائکن دونيانين ائبتئدائي شيلرئنئن آلتيندا اسئر ائدئک.

4:4  لاکئن زامان تامامينا چاتديقدا، تاري آرواددان دوغولموش و شرئعت آلتيندا دونيايا گلمئش اؤز اوغلونو گؤنده‌ردي کي،

4:5  شرئعت آلتيندا اولانلاري ساتين آليب قورتارسين و بئز اوغوللوغا نايئل اولاق.

4:6  و اوغوللار اولدوغونوز اوچون، تاري اؤز اوغلونون روحونو بئزئم اورکلرئمئزه گؤنده‌رئب کي، نئدا ادئر: "آبّا! آتا!"

4:7  بونا گؤره، سئز آرتيق قول يوخ، اوغولسونوز. و اگر اوغولسونوز، تارينين واسئطه‌سئله وارئثسئنئز ده.

4:8  لاکئن تاريني تانيماديغينيز زامان، اِله​لرئن قولو ائدئنئز کي، طبئعتن تاري ديئللر.

4:9  آمّا ائندي کي، تاريني تاني‌ييرسينيز، يا دا داها دوغروسو تاري سئزي تاني‌يير، نجه اولور کي، گئنه ضعئف و دَيَرسئز ائبتئدائي شيلره قاييديرسينيز و اونلارين قولو اولماغا جان آتيرسينيز؟!

4:10  گونلري، آيلاري، مؤوسوملري و ائللري رئعايت ادئرسئنئز.

4:11  سئزئن اوچون قورخورام کي، مبادا سئزه عبث زحمت چکمئش اولام.

4:12  سئزه يالواريرام، قارداشلار، منئم کئمي اولون. چونکي من ده سئزئن کئمي اولموشام. سئز منه هچ بئر حاقسيزليق اتمه‌يئبسئنئز.

4:13  لاکئن بئلئرسئنئز کي، بدنئن ضعئفلئيي اوزوندن ائنجئلي ائلک دفه سئزه وعظ اتدئم.

4:14  و بدنئمده اولان ائمتاحانا سئز حقارتله باخمادينيز، ردّ ده اتمه‌دئنئز. آمّا مني تارينين بئر مله‌يي کئمي قبول اتدئنئز، اله بئل کي، مسئح عئسانين اؤزونو قبول ادئرسئنئز.

4:15  ائندي او سعادتئنئزه نه اولدو؟ چونکي سئزئن حاقّينيزدا شهادت ورئرم کي، اگر مومکون اولسايدي، گؤزلرئنئزي چيخارديب منه وِرَردئنئز.

4:16  مگر حقئقتي سئزه ددئيئم اوچون دوشمنئنئز اولموشام؟

4:17  اونلار قيرتله سئزي آختاريرلار، لاکئن ياخشي نئيّتله يوخ. آنجاق سئزي آييرماق ائسته‌يئرلر کي، سئز اونلاري قيرتله آختاراسينيز.

4:18  آنجاق من يانينيزدا اولاندا يوخ، ياخشي نئيّتله هر زامان قيرتلي اولماق ياخشي‌دير.

4:19  اؤولادلاريم کي، مسئح سئزده شکئل تاپانا قدر تکرار دوغوم آغريسيني چکئرم،

4:20  آرزو ادئردئم کي، ائندي يانينيزدا اولوب سؤزومون سسئني ديئشدئره‌يدئم. چونکي سئزئن حاقّينيزدا چاشيب قالميشام.

4:21  منه ديئن، سئزلر کي، شرئعت آلتيندا اولماغي ائسته‌يئرسئنئز، مگر شرئعته قولاق آسميرسينيز؟

4:22  چونکي يازيليب، ائبراهئمئن ائکي اوغلو وار ائدي؛ بئري کنئز آرواددان و او بئرئسي آزاد آرواددان دوغولموشدو.

4:23  لاکئن کنئز آرواددان دوغولان اوغول، جئسمه گؤره دوغولدو و آزاد آرواددان دوغولان اوغول وعده​يه گؤره.

4:24  بو، تمثئلله دانيشماقدير، چونکي بو ائکي آرواد، ائکي عهددئرلر؛ بئري سئنا داغينداندير، قول اولاجاق اوشاقلار دوغور. او، هاجردئر.

4:25  ائندي بو هاجر عرب بؤلگه​سئنده اولان سئنا داغي‌دير و اورشلئمئن ائندئکي واختينا بنزه‌يئر، چونکي او، اؤولادلاري​ ائله اسئرلئکده​دئر.

4:26  آمّا يوخاريدا اولان اورشلئم آزاددير کي، بئزئم آناميزدير.

4:27  چونکي يازيليب: "اي سونسوز دوغمايان آرواد، سوئن! اي دوغوم آغريسيني چکمه‌ين، جار چک و نئدا ات! چونکي ترک ادئلمئش آروادين اؤولادلاري، اَري اولان آروادين اؤولادلاريندان چوخدور."

4:28  و سئز، قارداشلار، ائسحاق کئمي وعده​نئن اؤولادلاريسينيز.

4:29  آمّا نجه او زامان جئسمه گؤره دوغولان، موقدّس روحا گؤره دوغولانا عذاب ورئردي، ائندي ده بله​دئر.

4:30  لاکئن موقدّس يازي نه ديئر؟ "کنئز آرواد و اونون اوغلونو قوو، چونکي کنئز آروادين اوغلو، آزاد آروادين اوغلو ائله وارئث اولماياجاق."

4:31  بونا گؤره، قارداشلار، بئز کنئز بئر آروادين يوخ، آزاد آروادين اؤولادلارييق.

Chapter 5

5:1  مسئح بئزي آزادليق اوچون آزاد اتدي. بونون اوچون برک دايانين و گئنه قوللوغون يوغونا دوشمه‌يئن.

5:2  باخين، من پولوس، سئزه ديئرم کي، اگر ختنه اولوناسينيز، مسئح سئزه هچ فايدالي اولماز.

5:3  ختنه اولونان هر آداما گئنه شهادت ورئرم کي، شرئعتي کامئل بئر شکئلده يرئنه يتئرمه‌يه ائلزام آلتيندادير.

5:4  سئز کي، ائسته‌يئرسئنئز شرئعت وسئله‌سئله تبرعه اولوناسينيز، مسئحدن محروم اولوبسونوز؛ سئز فيضدن دوشوبسونوز.

5:5  چونکي بئز، صالحلئک اومئدئني، موقدّس روحا داياناراق ائمان واسئطه​‌سئله گؤزله​يئرئک.

5:6  چونکي مسئح عئسادا نه ختنه بئر شيدئر نه ده ختنه​سئزلئک. آنجاق ائمان کي، محبّت واسئطه‌سئله عمل ادئر.

5:7  ياخشي قاچيردينيز، کئم سئزه حقئقتدن ائطاعت اتمکده مانع اولدو؟

5:8  بو ائقناع سئزي دعوت اِدَندن ديئل.

5:9  بئر آز مايا بوتون خمئري تورشودور.

5:10  من ربده سئزه اعتئماد ادئرم کي، آيري بئر جور دوشونمه‌يه​جکسئنئز. لاکئن سئزي چاشديران، کئم اولور اولسون، اؤز جزاسيني چکه​جک.

5:11  آمّا، قارداشلار، اگر من حله ده ختنه​لئيي وعظ ادئرم، بس نه اوچون حله ده عذاب آلتيندايام؟ اِله اولسا ائدي، چارميخين بودره​مه​سي اورتادان قالديريلميشدي.

5:12  کاشکي سئزي تحرئک اِدَنلر اؤزلرئني اَخته اتسَيدئلر!

5:13  چونکي قارداشلار، سئز آزادليغا دعوت اولونوبسونوز؛ آنجاق آزادليغينيزي جئسم اوچون فورصت بئلمه‌يئن. آمّا بئر​بئرئنئزه محبّتله قوللوق ادئن.

5:14  چونکي بوتون شرئعت تک بئر کلمه​ده يرئنه يتئشئلئر، بوندا کي، "قونشونو اؤزون کئمي سِو."

5:15  آمّا اگر بئربئرئنئزي سانجيب اوداسينيز، احتئياطلي اولون کي، مبادا بئربئرئنئزدن تلف اولاسينيز.

5:16  لاکئن ديئرم: موقدّس روحون واسئطه‌سئله رفتار ادئن، او زامان جئسمئن هاوا-هوسلرئني يرئنه يتئرمزسئنئز.

5:17  چونکي جئسمئن هاوا-هوسلري موقدّس روحون ضئدّئنه​دئر، موقدّس روح دا جئسمئن ضئدّئنه. چونکي بونلار بئربئرئنئن ضئدّئنه​دئرلر. اِله کي، سئز، ائسته‌دئيئنئزي اده‌بئلمه‌يه​سئنئز.

5:18  آمّا اگر موقدّس روحدان هئدايت اولونورسونوز، شرئعت آلتيندا ديئلسئنئز.

5:19  جئسمئن عمل​لري بلّي‌دئر: بونلار جئنسي عئفّتسئزلئک، ناپاکليق، سفاهت،

5:20  بوتپرستلئک، جادوگرلئک، عداوت، داعوالار، حسد، قضب، موباحئثه، نئفاق، تفرئقه​لر،

5:21  پاخيلّيق، کفلئلئک، عيش-عئشرتلر و بونا بنزر شيلردئر. سئزه اوّللرده ائخطار وردئيئم کئمي، ائندي ده قاباقجادان ائخطار ورئرم کي، بونلاري اِدَنلر تارينين پادشاهليغيني مئراث آلماياجاقلار.

5:22  لاکئن روحون ثمره​سي محبّت، شادليق، باريش، صبر، مهرئبانليق، ياخشيليق، وفادارليق،

5:23  حلئملئک و اؤزونه حاکئم اولماقدير. بو کئمي شيلرئن ضئدّئنه هچ شرئعت يوخدور.

5:24  و اونلار کي، مسئح عئسايا عاييدديلار، جئسمي، شهوتلر و هاوا-هوسلری ائله چارميخا چکئبلر.

5:25  اگر موقدّس روحلا ياشاييريق، قوي موقدّس روحلا دا رفتار ادک.

5:26  بئربئرئمئزه ميدان اوخوماياق، بئربئرئمئزي موبارئزه​يه چاغيرماياق، بئربئرئمئزه پاخيلّيق اتمه‌يک.

Chapter 6

6:1  قارداشلار، اگر بئر آدام بئر خاطا اوسته توتولسا بله، سئز روحانئلر اونو حلئملئک روحو ائله ائصلاح ادئن. و اؤزونوزه دئقّت ادئن کي، مبادا سئز اؤزونوز ده وسوسه​يه دوشه‌سئنئز.

6:2  بئربئرئنئزئن يوکلرئني داشي‌يين و بو يوللا مسئحئن شرئعتئني يرئنه يتئرئن.

6:3  چونکي اگر کئمسه، بئر زاد ديئل ائکن، اؤزونو بئر زاد بئلسه، اؤزونو آلدادير.

6:4  قوي هر کس اؤز ائشئني ائمتاحانا چکسئن. او واخت فخر اتمه‌يي اؤزگه بئر آدامدا يوخ، آنجاق اؤزونده اولاجاق.

6:5  چونکي هر کس اؤز يوکونو داشيياجاق.

6:6  کلامي تعلئم آلان، بوتون ياخشي شيلرده، کلامي اونا تعلئم وره‌ني شرئک اتسئن.

6:7  آلدانمايين، تارييا ائستهزا ادئلمز. چونکي ائنسان نه‌يي اَکسه، اونو دا بئچه​جکدئر.

6:8  چونکي اؤز جئسمي اوچون اَکَن، جئسمدن فسادليق بئچه​جک. آمّا روح اوچون اَکَن، روحدان ابدي حيات بئچه​جکدئر.

6:9  ياخشيليق اتمکده يورولماياق. چونکي اگر سوستالماساق، واختيندا بئچه​رئک.

6:10  دمه‌لي، نه قدر فورصتئمئز وارسا، هامييا، خوصوصن ائمانلي‌لار عايئله​سئنه ياخشيليق ادک.

6:11  گؤرون اؤز اَلئمله نه بؤيوک حرفلرله سئزه يازيرام!

6:12  جئسمده ياخشي گؤرونمک ائسته‌ينلر چاليشيرلار کي، سئزي ختنه اتمه‌يه مجبور اتسئنلر. بو ائشي آنجاق اوندان اؤتري ادئرلر کي، مسئحئن چارميخي اوچون عذابا دوشمه‌سئنلر.

6:13  چونکي حتّا ختنه اولونانلارين اؤزلري ده شرئعتي رئعايت اتمئرلر. لاکئن سئزئن ختنه اولونماغينيزي ائسته‌يئرلر کي، سئزئن جئسمئنئزده فخر اتسئنلر.

6:14  آمّا مندن ائراق اولسون کي، ربّئمئز عئسا مسئحئن چارميخيندان باشقا اؤزگه بئر شيده فخر ادئم. او چارميخين واسئطه‌​سئله دونيا منئم اوچون چارميخا چکئلئب، من ده دونيا اوچون.

6:15  چونکي نه ختنه​لئک، نه ده ختنه​سئزلئک بئر شيدئر، لاکئن تزه خئلقت.

6:16  بو قايدا ائله رفتار اِدَنلره و تارينين ائسرايئلئنه باريش و رحمت اولسون.

6:17  بوندان سونرا، قوي هچ کئم منه اذئيّت ورمه‌سئن. چونکي من رب عئسانين يارا نئشانه​لرئني بدنئمده داشي‌ييرام.

6:18  قارداشلار، ربّئمئز عئسا مسئحئن فيضي سئزئن روحونوزلا اولسون. آمئن.