CSlElizabeth - Galatians

Chapter 1

1:1  Павел, Апостол ни от человек, ни человеком, но Иисус Христом и Богом Отцем воскресившим Его из мертвых,

1:2  и иже со мною вся братия, церквам Галатийским:

1:3  благодать вам и мир от Бога Отца и Господа нашего Иисуса Христа,

1:4  давшаго Себе по гресех наших, яко да избавит нас от настоящаго века лукаваго, по воли Бога и Отца нашего,

1:5  Емуже слава во веки веков. Аминь.

1:6  Чуждуся, яко тако скоро прелагаетеся от звавшаго вы благодатию Христовою, во ино благовествование:

1:7  еже несть ино, точию нецыи суть смущающии вы и хотящии превратити благовествование Христово.

1:8  Но и аще мы, или Ангел с небесе благовестит вам паче, еже благовестихом вам, анафема да будет.

1:9  Якоже предрекохом, и ныне паки глаголю: аще кто вам благовестит паче, еже приясте, анафема да будет.

1:10  Ныне бо человеки препираю, или Бога, или ищу человеком угождати? Аще бо бых еще человеком угождал, Христов раб не бых убо был.

1:11  Сказую же вам, братие, Благовествование благовещенное от мене, яко несть по человеку:

1:12  ни бо аз от человека приях е, ниже научихся, но явлением Иисус Христовым.

1:13  Слышасте бо мое житие иногда в Жидовстве, яко по премногу гоних Церковь Божию и разрушах ю,

1:14  и преспевах в Жидовстве паче многих сверстник моих в роде моем, излиха ревнитель сый отеческих моих преданий.

1:15  Егда же благоволи Бог, избравый мя от чрева матере моея и призвавый благодатию Своею,

1:16  явити Сына Своего во мне, да благовествую Его во языцех, абие не приложихся плоти и крови,

1:17  ни взыдох во Иерусалим к первейшым мене Апостолом, но идох во Аравию, и паки возвратихся в Дамаск.

1:18  Потом же по триех летех взыдох во Иерусалим соглядати Петра, и пребых у него дний пятьнадесять.

1:19  Иного же от Апостол не видех, токмо Иакова брата Господня.

1:20  А яже пишу вам, се пред Богом, яко не лгу.

1:21  Потом же приидох в страны Сирския и Киликийския.

1:22  Бех же не знаемь лицем церквам Иудейским, яже о Христе,

1:23  точию же слышаще бяху, яко гоняй нас иногда, ныне благовествует веру, юже иногда разрушаше:

1:24  и славляху о мне Бога.

Chapter 2

2:1  Потом же по четыренадесяти летех паки взыдох во Иерусалим с Варнавою, поем с собою и Тита.

2:2  Взыдох же по откровению, и предложих им благовествование, еже проповедую во языцех, наедине же мнимым, да не како вотще теку, или текох.

2:3  Но ни Тит, иже со мною, Еллин сый, нужден бысть обрезатися.

2:4  И за пришедшую лжебратию, иже привнидоша соглядати свободы нашея, юже имамы о Христе Иисусе, да нас поработят:

2:5  имже ни к часу повинухомся в покорение, да истина благовестия пребудет в вас.

2:6  От мнящихся же быти что, якови некогда беша, ничтоже ми разнствует: лица Бог человеча не приемлет. Мне бо мнимии ничтоже привозложиша:

2:7  но сопротивное, уразумевше, яко уверено ми бысть благовестие необрезания, якоже Петру обрезания:

2:8  ибо Споспешествовавый Петру в послание обрезания, споспешествова и мне во языки:

2:9  и познавше благодать данную ми, Иаков и Кифа и Иоанн, мнимии столпи быти, десницы даша мне и Варнаве общения, да мы во языки, они же во обрезание,

2:10  точию нищих да помнима: еже и потщахся сие истое сотворити.

2:11  Егда же прииде Петр во Антиохию, в лице ему противустах, яко зазорен бе.

2:12  Прежде бо даже не приити неким от Иакова, с языки ядяше: егда же приидоша, опряташеся и отлучашеся, бояся сущих от обрезания.

2:13  И лицемеришася с ним и прочии Иудеи, яко и Варнаве пристати лицемерству их.

2:14  Но егда видех, яко не право ходят ко истине Благовествования, рекох Петру пред всеми: аще ты, Иудей сый, язычески, а не иудейски живеши, почто языки нудиши иудейски жительствовати?

2:15  Мы естеством Иудее, а не от язык грешницы:

2:16  уведевше же, яко не оправдится человек от дел закона, но токмо верою Иисус Христовою, и мы во Христа Иисуса веровахом, да оправдимся от веры Христовы, а не от дел закона: зане не оправдится от дел закона всяка плоть.

2:17  Аще ли, ищуще оправдитися о Христе, обретохомся и сами грешницы, Христос убо греху ли служитель? Да не будет.

2:18  Аще бо, яже разорих, сия паки созидаю, преступника себе представляю.

2:19  Аз бо законом закону умрох, да Богови жив буду. Христови сраспяхся:

2:20  живу же не ктому аз, но живет во мне Христос. А еже ныне живу во плоти, верою живу Сына Божия, возлюбившаго мене и предавшаго Себе по мне.

2:21  Не отметаю благодати Божия. Аще бо законом правда, убо Христос туне умре.

Chapter 3

3:1  О, несмысленнии Галате, кто вы прельстил есть не покоритися истине, имже пред очима Иисус Христос преднаписан бысть, в вас распят?

3:2  Сие едино хощу уведети от вас: от дел ли закона Духа приясте, или от слуха веры?

3:3  Тако ли несмысленни есте? Наченше духом, ныне плотию скончаваете?

3:4  Толика пострадасте туне? Аще точию и туне.

3:5  Подаяй убо вам Духа и действуяй силы в вас, от дел ли закона, или от слуха веры?

3:6  Якоже Авраам верова Богу, и вменися ему в правду.

3:7  Разумейте убо, яко сущии от веры, сии суть сынове Авраамли.

3:8  Предувидевшее же Писание, яко от веры оправдает языки Бог, прежде благовествова Аврааму, яко благословятся о тебе вси языцы.

3:9  Темже сущии от веры, благословятся с верным Авраамом:

3:10  елицы бо от дел закона суть, под клятвою суть. Писано бо есть: проклят всяк, иже не пребудет во всех писанных в книзе законней, яко творити я.

3:11  А яко в законе никтоже оправдается от Бога, яве, яко праведный от веры жив будет.

3:12  Закон же несть от веры: но сотворивый та человек жив будет в них.

3:13  Христос ны искупил есть от клятвы законныя, быв по нас клятва: писано бо есть: проклят всяк висяй на древе:

3:14  да в языцех благословение Авраамле будет о Христе Иисусе, да обетование Духа приимем верою.

3:15  Братие, по человеку глаголю: обаче человеческаго предутвержденна завета никтоже отметает или приповелевает.

3:16  Аврааму же речени быша обеты, и семени его. Не глаголет же: и семенем, яко о мнозех, но яко о едином: и семени твоему, иже есть Христос.

3:17  Сие же глаголю, завета предутвержденнаго от Бога во Христа, бывый по летех четыриста и тридесятих закон не отметает, во еже разорити обетование.

3:18  Аще бо от закона наследие, не ктому уже от обетования: Аврааму же обетованием дарова Бог.

3:19  Что убо закон? Преступлений ради приложися, дондеже приидет семя, емуже обетовася, вчинен Ангелы, рукою ходатая.

3:20  Ходатай же единаго несть, Бог же един есть.

3:21  Закон ли убо противу обетованием Божиим? Да не будет. Аще бо дан бысть закон могий оживити, воистинну от закона бы была правда:

3:22  но затвори Писание всех под грехом, да обетование от веры Иисус Христовы дастся верующым.

3:23  Прежде же пришествия веры, под законом стрегоми бехом, затворени в хотящую веру открытися.

3:24  Темже закон пестун нам бысть во Христа, да от веры оправдимся:

3:25  пришедшей же вере, уже не под пестуном есмы.

3:26  Вси бо вы сынове Божии есте верою о Христе Иисусе:

3:27  елицы бо во Христа крестистеся, во Христа облекостеся.

3:28  Несть Иудей, ни Еллин: несть раб, ни свободь: несть мужеский пол, ни женский: вси бо вы едино есте о Христе Иисусе.

3:29  Аще ли вы Христовы, убо Авраамле семя есте, и по обетованию наследницы.

Chapter 4

4:1  Глаголю же: в елико время наследник млад есть, ничимже лучший есть раба, господь сый всех:

4:2  но под повелители и приставники есть даже до нарока отча.

4:3  Такожде и мы, егда бехом млади, под стихиами бехом мира порабощени:

4:4  егда же прииде кончина лета, посла Бог Сына Своего Единороднаго, Раждаемаго от жены, бываема под законом,

4:5  да подзаконныя искупит, да всыновление восприимем.

4:6  И понеже есте сынове, посла Бог Духа Сына Своего в сердца ваша, вопиюща: Авва Отче.

4:7  Темже уже неси раб, но сын: аще ли же сын, и наследник Божий Иисус Христом.

4:8  Но тогда убо, не ведуще Бога, служисте не по естеству сущым богом:

4:9  ныне же, познавше Бога, паче же познани бывше от Бога, како возвращаетеся паки на немощныя и худыя стихии, имже паки свыше служити хощете?

4:10  Дни смотряете, и месяцы, и времена, и лета.

4:11  Боюся о вас, еда како всуе трудихся в вас.

4:12  Будите якоже аз, зане и аз, якоже вы: братие, молю вы. Ничимже мене обидесте:

4:13  весте же, яко за немощь плоти благовестих вам первее.

4:14  И искушения моего, еже во плоти моей, не уничижисте, ни оплевасте, но якоже Ангела Божия приясте мя, яко Христа Иисуса.

4:15  Кое убо бяше блаженство ваше, свидетельствую бо вам, яко, аще бы было мощно, очеса ваша извертевше дали бысте ми.

4:16  Темже враг вам бых, истину вам глаголя?

4:17  Ревнуют по вас не добре, но отлучити вас хотят, да им ревнуете.

4:18  Добро же, еже ревновати всегда в добрем, и не точию внегда приходити ми к вам.

4:19  Чадца моя, имиже паки болезную, дондеже вообразится Христос в вас:

4:20  хотел же бых приити к вам ныне и изменити глас мой, яко не домышляюся о вас.

4:21  Глаголите ми, иже под законом хощете быти: закона ли не слушаете?

4:22  Писано бо есть, яко Авраам два сына име: единаго от рабы, а другаго от свободныя.

4:23  Но иже от рабы, по плоти родися: а иже от свободныя, по обетованию.

4:24  Иже суть иносказаема: сия бо еста два завета: един убо от горы Синайския, в работу раждаяй, иже есть Агарь:

4:25  Агарь бо, Сина гора есть во Аравии, прилагается же нынешнему Иерусалиму, работает же с чады своими:

4:26  а вышний Иерусалим свободь есть, иже есть мати всем нам.

4:27  Писано бо есть: возвеселися, неплоды, не раждающая: расторгни и возопи, неболящая: яко многа чада пустыя паче, нежели имущия мужа.

4:28  Мы же, братие, по Исааку обетования чада есмы.

4:29  Но якоже тогда по плоти родивыйся гоняше духовнаго, тако и ныне.

4:30  Но что глаголет Писание? Изжени рабу и сына ея, не имать бо наследовати сын рабынин с сыном свободныя.

4:31  Темже, братие, несмы рабынина чада, но свободныя.

Chapter 5

5:1  Свободою убо, еюже Христос нас свободи, стойте, и не паки под игом работы держитеся.

5:2  Се аз Павел глаголю вам, яко аще обрезаетеся, Христос вас ничтоже пользует.

5:3  Свидетельствую же паки всякому человеку обрезающемуся, яко должен есть весь закон творити.

5:4  Упразднистеся от Христа, иже законом оправдаетеся, от благодати отпадосте:

5:5  мы бо духом от веры упования правды ждем.

5:6  О Христе бо Иисусе ни обрезание что может, ни необрезание, но вера любовию поспешествуема.

5:7  Течасте добре: кто вам возбрани не покарятися истине?

5:8  Препрение не от Призвавшаго вы.

5:9  Мал квас все смешение квасит.

5:10  Аз надеюся о вас в Господе, яко ничтоже ино разумети будете: смущаяй же вас понесет грех, кто бы ни был.

5:11  Аз же, братие, аще обрезание еще проповедую, почто еще гонимь есмь? Убо упразднися соблазн креста.

5:12  О, дабы отсечени были развращающии вас.

5:13  Вы бо на свободу звани бысте, братие: точию да не свобода ваша в вину плоти, но любовию работайте друг другу.

5:14  Ибо весь закон в единем словеси исполняется, во еже: возлюбиши ближняго твоего якоже себе.

5:15  Аще же друг друга угрызаете и снедаете, блюдитеся, да не друг от друга истреблени будете.

5:16  Глаголю же: духом ходите, и похоти плотския не совершайте:

5:17  плоть бо похотствует на духа, дух же на плоть: сия же друг другу противятся, да не яже хощете, сия творите.

5:18  Аще ли духом водими есте, несте под законом.

5:19  Явлена же суть дела плотская, яже суть прелюбодеяние, блуд, нечистота, студодеяние,

5:20  идолослужение, чародеяния, вражды, рвения, завиды, ярости, разжжения, распри, соблазны, ереси,

5:21  зависти, убийства, пиянства, безчинни кличи и подобная сим: яже предглаголю вам, якоже и предрекох, яко таковая творящии Царствия Божия не наследят.

5:22  Плод же духовный есть любы, радость, мир, долготерпение, благость, милосердие, вера,

5:23  кротость, воздержание: на таковых несть закона.

5:24  А иже Христовы суть, плоть распяша со страстьми и похотьми.

5:25  Аще живем духом, духом и да ходим.

5:26  Не бываим тщеславни, друг друга раздражающе, друг другу завидяще.

Chapter 6

6:1  Братие, аще и впадет человек в некое прегрешение, вы духовнии исправляйте таковаго духом кротости: блюдый себе, да не и ты искушен будеши.

6:2  Друг друга тяготы носите, и тако исполните закон Христов.

6:3  Аще бо кто мнит себе быти что, ничтоже сый, умом льстит себе.

6:4  Дело же свое да искушает кийждо, и тогда в себе точию хваление да имать, а не во инем:

6:5  кийждо бо свое бремя понесет.

6:6  Да общается же учяйся словеси учащему во всех благих.

6:7  Не льститеся: Бог поругаемь не бывает. Еже бо аще сеет человек, тожде и пожнет:

6:8  яко сеяи в плоть свою, от плоти пожнет истление: а сеяи в дух, от духа пожнет живот вечный.

6:9  Доброе же творяще, да не стужаем си: во время бо свое пожнем, не ослабеюще.

6:10  Темже убо, дондеже время имамы, да делаим благое ко всем, паче же к присным в вере.

6:11  Видите, колицеми книгами писах вам моею рукою.

6:12  Елицы хотят хвалитися по плоти, сии нудят вы обрезатися, точию да не креста ради Христова гоними будут:

6:13  ни бо обрезающиися сами закон хранят, но хотят вам обрезоватися, да в вашей плоти похвалятся:

6:14  мне же да не будет хвалитися, токмо о кресте Господа нашего Иисуса Христа, имже мне мир распятся, и аз миру.

6:15  О Христе бо Иисусе ни обрезание что может, ни необрезание, но нова тварь.

6:16  И елицы правилом сим жительствуют, мир на них и милость, и на Израили Божии.

6:17  Прочее, труды да никтоже ми дает: аз бо язвы Господа Иисуса на теле моем ношу.

6:18  Благодать Господа нашего Иисуса Христа со духом вашим, братие. Аминь.