PohnOld - Galatians

Chapter 1

1:1  PAULUS wanporon amen kaidin sang ren aramas akan, pil kaidin pan aramas akan, a pan Iesus Kristus o Kot Sam, me kotin kaiasadar i sang ren me melar akan,

1:2  O ri atail akan karos, me mi re i, at ranamau ong momodisou en Kalesia kan:

1:3  Mak o popol sang ren Kot Sam o atail Kaun Iesus Kristus en mi re omail;

1:4  Me kotin sokonpaude ki pein i ki dip atail, pwen dore kitail sang ni me sued akan mi sappa, duen kupur en Kot o Sam atail.

1:5  Lingan en ko ong i kokolata! Amen.

1:6  I puriamuiki omail madang wuki sang i, me molipe komail pan mak en Kristus, ap wuki ong eu rongamau;

1:7  A sota eu mia. Ari so, akai mia, me kin kapingada komail, o irail men kalikame rongamau en Kristus.

1:8  A ma kit de tounlang amen sang nanlang pan padaki ong komail eu rongamau, me toror sang rongamau, me se padaki ong komail er, i en riala.

1:9  Duen me se indada mas o, iduen se pil purong inda: Ma amen pan padaki ong komail eu rongamau, me toror sang me komail aleer, i en riala.

1:10  Iaduen, i kin men kaperenda aramas akan de Kot? De i kin rapaki konekon ren aramas akan? Ma i men konekon ren aramas akan, i ap sota ladun Kristus.

1:11  I katitiki ong komail ri ai kan, rongamau me i padakier, a sota tapi sang ren aramas.

1:12  Pwe i sota ale sang ren aramas amen, o sota me padaki ong ia, a a koki dong ia kasale pan Iesus Kristus.

1:13  Pwe komail ronger duen ai wiawia en mas nan pung en men Sus akan, duen i kin morouo ong momodisou en Kot lapalapia o kawe ir ala.

1:14  O i kakairida nin lamalam en Sus akan madang sang me toto, me kit ti ta ieu o toun sap ta ieu, o i nantiong kapwaiada padok en sam at akan.

1:15  A Kot lao kupureda, me kotin kilele ia di sang ni kaped en in ai, o me kotin molipe ia ki a mak,

1:16  En kasale ong ia sapwilim a Ol, pwe i en padaki ong men liki kan duen i, i ap pitipit wiada o sota kalelapok ren uduk o nta.

1:17  O i pil so pwar lang Ierusalem ren irail, me wanporon akan mo i, a i kolang Arapien ap pil pure dong Damaskus.

1:18  Ari, murin par silu i ap kodalang Ierusalem, pwen kilang Kepas. I ap mimieta re a ran eisoklimau.

1:19  A sota amen ren wanporon akan, me i kilang, Iakopus ta, ri en Kaun o.

1:20  A me i inting wong komail, Kot me kotin mangi, me i sota likam.

1:21  Muri i ap kola nan wein Sirien o Silisia.

1:22  A momodisou en Iudäa kan me mi pan kupur en Kristus sasa ia.

1:23  A i eta, irail ronger, me i me kin morouo ong kit mas o, i me kin padaki poson ansau wet, me a kin kaokaoe mas o.

1:24  Irail ap kalinganda Kot pweki ngai.

Chapter 2

2:1  KADEKADEO murin par eisok paieu ngai pil kodalang Ierusalem iang Parnapas o Titus pil iang ia.

2:2  A i kokidala kasalepa eu; padaki ong irail duen rongamau, me i kin padaki ong men liki kan, ap katoror ong ir, me kalok mau, pwe i ender tang mal, ma met de mur.

2:3  A pil Titus, me iang ia, men Krik amen, re sota kakaliki ong i, en sirkomsaisela,

2:4  A pweki akai saulang likam, me wailong, pwen masamasan at saledokalar, me se aleer ren Kristus Iesus, pwen kalidui kit ala.

2:5  A se sota man peiki ong irail, pwe melel en rongamau en mimieta re omail.

2:6  A irail me kalok mau, i sota asa duen ar tiak en mas o, a pil menda re i, pwe Kot sota kin lipilipil aramas amen, irail me indand mau, sota ki ong ia eu padak toror.

2:7  A irail lao kilanger, me i aleer ai koa, en padaki ong me sosirkomsais rongamau, dueta Petrus ong me sirkomsais.

2:8  A me kamanada Petrus, pwen kapwaiada a koa en wanporon ren sirkomsais i me i pil keleki ni ai dodok ren men liki kan.

2:9  A Iakopus, o Kepas, o Ioanes, me re wiaki ur oko, re lao kilanger mak o me i aleer, rap itipa ki ong ngai o Parnapas pali maun en pa, o kit karos wiaki eu, me kit en kola ren men liki kan, a irail ren sirkomsais.

2:10  A re kakaliki ong kit, me sen apapwali me samama kan. Ngai ari nantiong kapwaiada.

2:11  A Kepas lao pwaralang Antiokien, i ap palian i pwe kalok sued mi re a.

2:12  Pwe mon akai pwarado sang ren Iakopus, a sakasak ren men liki kai, a ni ar pwarador, a puei sang katororela pein i, pwe a masak men sirkomsais.

2:13  O pil Sus tei ko iang i malamalaundar, o Parnapas lodi ong pil wia malaun.

2:14  A ni ai kilanger, me re sota inen weita, duen melel en rongamau, i ap indai ong Kepas mon irail karos; ma koe men Sus amen kin wia tiak en men liki kan, a so tiak en men Sus, menda koe kin kakaliki ong men liki kan, ren wiada tiak en men Sus?

2:15  Kita udan men Sus a sota dipan dueta men liki kan,

2:16  Ap asa, me aramas amen sota kak pung kila wiawia en kapung kan, pwe a poson Iesus Kristus eta i me kitail pil posoneki Kristus Iesus, pwe kitail en pung kila poson Kristus, a kaidin wiawia en kapung kan; pwe uduk sota kak pung kila wiawia en kapung kan.

2:17  A ma kitail men pung kila Kristus, ap diarokada, me kitail me dipan, daduen, Kristus me papan dip? O so!

2:18  Pwe ma i pan pur ong kauada, me i kawelar, nan i pan wia kin ia me dipan amen.

2:19  Pwe i mekilar kapung, ap solar memauri ong kapung, pwen mauri ong Kot; ngai lopular iang Kristus.

2:20  Kaidin ngai me memaur, pwe Kristus kotin ieiasata lolei. Pwe arain ai maur en pali uduk, i kin memaureki poson Sapwilim en Kot, me kotin pok ong ia o sokonpaudeki ong ia pein i.

2:21  I sota kasamal la mak en Kot; pwe ma aramas kak pung kila wiawia en kapung kan, Kristus ap matala mal.

Chapter 3

3:1  O komail men Kalesia pweipwei, is me kotaue komail? Pwe mom en Iesus Kristus a lopular wiauier mon mas omail.

3:2  Iet eta me i men kalelapok re omail: Komail aleer Ngen ni wiawia en kapung kan, de ni padak en poson?

3:3  Iduen omail lolepon? Komail tapia kidar Ngen, a komail men kaimwisok kilar uduk?

3:4  Komail kalokolok laud, ap sota pan katepa? Ma idue met a sota kak wiaui.

3:5  Me kotiki ong komail er Ngen, o wia manaman akan nan pung omail daduen, wiawian kapung kan me kareda, de padak en poson?

3:6  Dueta Apraam me poson Kot, ap wadok ong i kapunga pa.

3:7  Komail ap asa duen irail me kin poson, irail seri en Apraam.

3:8  A kisin likau o asaer mas o, me Kot, pan kotin kapungala men liki kan ki poson, i me a padaki ong Apraam rongamau mas o: Wein sappa karos pan paie kin uk!

3:9  Pwe karos me poson, pan iang Apraam poson kapaida.

3:10  Pwe me kin kaporoporeki wiawia en kapung kan, pan kariala. Pwe a intingidier: Karos me riala, me sota pan dadaurata meakaros, me intingidier nan puk en kapung, pwen kapwaiada.

3:11  A sansal, me sota amen kak pung kila kapung ren Kot; pwe me pung amen pan memaureki poson.

3:12  A kapung sota tapi sang ni poson, pwe meamen kapwaiada mepukat, pan memaur kida.

3:13  Kristus me kotin dore kitail sang ni karia pan kapung, ni a ria kin kitail lar; pwe a intingidier: Amen amen me langalong nin tuka o me riala.

3:14  Pwe pai en Apraam, me tapi sang ren Kristus Iesus, en lel penang men liki kan; pwe kitail en ale inau en Ngen ki poson.

3:15  Ri ai kan, i pan lokaia ni tiak en aramas akan. Iaduen inau en aramas eu me kileledier, sota amen me pan kawela de ekis, me a pan pouse ong.

3:16  Ari, inau o wiauier ong Apraam o kadaudok a. A sota masanier: Kadaudok a toto, pwe duen me ta men: Kadaudok om me ta men, iei Kristus.

3:17  Iet me i inda: Inau me Kot kotin kileledier, a sota kak okila kapung o, me wiauier saunpar papuki sileisok murin inau o, pwe inau ede pwaida.

3:18  Pwe ma soso tapi sang kapung, a sota kak tapi sang inau; a Kot kotiki ong Apraam ki inau.

3:19  A menda kapung? A wiauier pweki sapung kan, kadaudok o lao pwarado, me inau wiaui ong, me wiauier ren tounlang kan ki pa en saunkapung.

3:20  Ari, saunkapung sota kin kelep eta, a Kot me kelep eta.

3:21  A iaduen, kapung o kin palian inau en Kot akan? O so! A ma kapung eu pan wiaui, me pan kak kamaurela, nan melel, pung ap pan tapi sang nan kapung.

3:22  A kisin likau o me kol penang dip meakaros pwe inau en tapi sang ni poson Iesus Kristus, en pai ong irail, me poson.

3:23  Ni ansau poson saikenta pwarado, kitail nikinik o salidier pan kapung, lao poson pan kasansaleda.

3:24  Ari, kapung atail saunpadak, lao Kristus pwarado, pwe kitail en pung kila poson.

3:25  A poson lao pwarador, kitail solar mi pan saunpadak o.

3:26  Pwe komail karos seri en Kot, ki poson Kristus Iesus.

3:27  Pwe komail me paptaiser ong Kristus, komail likaui kidar Kristus.

3:28  Solar men Sus de Krik, solar ladu de me maioda, solar ol de li komail karos dupeneta ren Kristus Iesus.

3:29  A ma komail sapwilim en Kristus, nan komail pil kadaudok en Apraam, o seri soso duen inau o.

Chapter 4

4:1  A iet me i men inda: Soso men arain a seri, a so toror sang ladu men, ari so, a kaun en meakaros.

4:2  A kin upa ong saunpadak o saunkoa kan lao lel ansau me sam a kileledier.

4:3  Iduen kitail ni atail kisin seri, kitail kin upai ong padak en sappa kan.

4:4  A ansau lao leler, Kot ap kotin poronedo sapwilim a Ol, me ipwidi sang ren li amen, ap mi pan kapung o.

4:5  Pwen kasaledoka ir ala, me mi pan kapung, pwe kitail en wiala sapwilim a seri.

4:6  Komail ari seri kan, i me Kot ap kotin poronedo Ngen en sapwilim a Ol nan mongiong atail, me kin likelikwir: Apa Sam!

4:7  Ari, solar ladu men, pwe seri ta; a ma seri nan pil seri soso en Kot.

4:8  A ni ansau o me komail sasa Kot, komail papaer me kaidin udan kot akan.

4:9  A metet komail asalar Kot, o Kot me kotin mangi komail melel, menda komail pil sapal lang lamalam sued o sakanekan, me komail men pur ong papa?

4:10  Komail kin kasarauiela ran akai, o saunipong kai, o ansau kai, o saunpar kai.

4:11  I ngong kin komail, pwe ele ai dodok ong komail sota pan kadepa.

4:12  Ri ai kan, i ngidingidi kin komail, en dueta ngai, pwe ngai kin dueta komail, pwe sota me sued kot, me komail wiai ong ia er.

4:13  A komail asa due i mas o, me i padaki ong komail er rongamau ni ai luet en pali uduk.

4:14  O komail sota mamaleki ai songesong ni uduk ai o tata kin ia; a komail apwali ia la dueta ngai tounlang en Kot amen, de dueta Iesus Kristus.

4:15  Iaduen wan omail pai ni ansau o! Pwe i kadede duen komail, ma a kak pa omail, komail pan pwadika sang por en mas omail ap ki ong ia.

4:16  Iaduen, i wiala omail imwintiti, pweki ai lokaia melel ong komail.

4:17  Arail nanantiong rapaki komail me sota mau; irail men kamueit kitail pasang, pwe komail en id idauen irail.

4:18  Me mau ansau karos en nantiong me mau kan, a kaidin ta ni ai mi re omail.

4:19  Nai seri kan! I naitik sapal komail ki madak, lao Kristus kawuk komail la ong pein mom a.

4:20  I men mi re omail ansau wet o men kawukila ngil ai, pwe i sasalar ir omail.

4:21  Komail, me kin men mi pan kapung o, indang ia, ma komail sota kin rong kapung o?

4:22  Pwe a intingidier, me nain Apraam putak riamen mia, amen sang ren na lidu, a amen sang ren me maioda.

4:23  A me song ren lidu ipwiki uduk, a me sang ren me maioda, ipwiki inau en Kot.

4:24  Mepukat karasepa eu, pwe met inau riau, eu sang ni nana Sinai, me kin naitiki ong na kan papa, i me Akar.

4:25  Pwe Akar nana Sinai nan Arapien, me rasong Ierusalem en met, o kin lidilidui iang na seri kan.

4:26  A Ierusalem, me mi poa, me maioda iei in atail.

4:27  Pwe a intingidier: Pereperen koe me li dapwan, me sota kin naitik, kadailong o werida koe, me so kaipwi ong, pwe nain li dapwan seri kan me toto sang me a warok mia.

4:28  A komail ri ai ol akan, me rasong Isaak, me seri en inau kan.

4:29  A duen mas o, me ipwiki uduk, me kailongki me ipwiki Ngen o, iduen ansau wet.

4:30  A da me kisin likau o masani? Kasela li lidu o na putak! Pwe putak en lidu sota pan iang nain li me maioda sosoki.

4:31  Ari ri ai kan, kitail sota seri en lidu, pwe nain me maioda.

Chapter 5

5:1  KOMAIL ari dadaurata en Kristus a kotin kamaioda kitail, komail ari kalaka pein komail, pwe komail der pur ong ni omail kanaudok.

5:2  Kilang, ngai Paulus indai ong komail, ma komail pan iang sirkomsais, nan Kristus sota pan katepai ong komail.

5:3  I pil kadede ong aramas karos, me pan sirkomsaisela, i en kapwaiada kapung pokon.

5:4  Komail, me men pung kila kapung o, muei sanger Kristus o pup wei sanger mak.

5:5  A kit kin auiaui ren Ngen ki poson kaporopor en pung.

5:6  Pwe ren Kristus Iesus sirkomsais de sosirkomsais sota meakot, pwe poson ta, me kin sansaleki dodok en limpok.

5:7  Komail tanger mau, is me karompwa komail, pwe ender peiki ong melel?

5:8  I song en kaweid sota kin tapi sang me molipe komail er.

5:9  Kalap kis kin kamutala dolepa karos;

5:10  I kaporoporeki ren Kaun o me komail sota pan wia eu lamalam toror. A me kin kaping komail da, pan lodi ong kapung o, sota lipilipil is i.

5:11  A ngai, ri ai kan, ma i poden padaki duen sirkomsais, menda i kankangerangirla? Pwe ma iduen, a solar men kamakar pan lopu.

5:12  I men irail me kin kawe komail la, ren pil kawela pein irail.

5:13  A ri ai kan, komail paeker ong maio, komail der men maio, pwe tiak en pali uduk en pwaida, a komail papa amen amen ni limpok.

5:14  Pwe kapung pon kapwai pan masan ta ieu: Koe en pok ong men imp om due pein uk.

5:15  A ma komail pakolok kaokaoe amen o amen, kalaka, pwe komail de momela.

5:16  A ngai inda: Aluki Ngen komail ap sota pan kapwaiada inong sued en uduk.

5:17  Pwe uduk kin inong iong me toror sang Ngen, a Ngen kin kotin inong iong me toror sang uduk, a ira parongarong pena, iei me komail sota wia kida, me komail kin men wia.

5:18  A ma Ngen pan kotin kalua komail, komail sota mimi pan kapung.

5:19  Wiawia kan en uduk me sansal. Iet akan: Nenek, samin, monepil,

5:20  Pongi ong ani mal, wun ani, kailuk, akatat, luak, makar, akamai, kamauouo, padak likam.

5:21  Peirin, kamom soko, kaped en manga ape. Iran mepukat i padaki ong komail er mas o, me irail, me kin kapwaiada mepukat, sota pan sosoki wein Kot.

5:22  A iet akan wa en Ngen: Limpok, peren, popol, kanongama, kadek, kamau, poson, opampap liki sang me sued.

5:23  Sota kapung pan mepukat.

5:24  A me sapwilim en Kristus, kalopuelar uduk iangaki tiak sued o inong sued akan.

5:25  Ma kitail memaureki Ngen, kitail en pil alualuki Ngen o.

5:26  Kitail der inong iong wau ren aramas, o der kamorongada ong amen amen, o der peipeirin amen amen.

Chapter 6

6:1  RI ai kan ma aramas amen pan lodi ong me sued kot, komail, me ngenin kasapaledo i ni ngen en opampap, ap masamasan pein uk, pwe koe ender pil lodi ong songesong.

6:2  Pelikitki pena nan pung omail katoutou pamail, pwe iduen komail pan kapwaiada kapung en Kristus.

6:3  Pwe ma amen lamelame, me i meakot, nan a kin kotaue pein i, pwe sota i meakot.

6:4  A amen amen en kasasong ong pein a wiawia, ap pan suaiki pein i, a kaidin amen aramas.

6:5  Pwe amen amen en pein wa audepa.

6:6  A me kin padakki masan o, en kida song en mau karos ong i, me kin padaki i.

6:7  Komail der kiki ong, me komail pan kak piti Kot, pwe meakot aramas kin kamoredi ong, i me a pan dolung sang.

6:8  Pwe me kin kamoredi ong ni uduk a, a pan dolung sang ni uduk a men soredi; a me kin kamoredi ong Ngen, a pan tungole sang ren Ngen maur soutuk.

6:9  Kitail der pangaki atail wiawia mau kan, pwe ni ansau me kon ong, kitail pan dolung, ma kitail sota pan pangadar.

6:10  Ma a kak pa atail, kitail en wia mau ong karos, a mas ong kisan me poson akan.

6:11  Kilang duen kisin likau laud, me i inting wong komail er ki pein pa i.

6:12  Ir me kin men lolok mau ni uduk, kin inong iong komail en sirkomsaiselar; pwe irail ender kamekame ki lopu en Kristus.

6:13  Pwe pein irail me sirkomsaisela, sota kin kapwaiada kapung, a irail kin men, komail en sirkomsaisela, pwen suaiki uduk omail.

6:14  A duen ngai, i sota man mauki suaiki, a iet eta iran lopu en atail Kaun Iesus Kristus, pweki i sappa katia sang ia o ngai katia sang sappa.

6:15  Pwe sirkomsais de sosirkomsais sota meakot, a me kawilikapadar.

6:16  Irail karos me inen ki wei ta padak pot et, en popol o kalangan, o ong Israel en Kot.

6:17  Sang met kokolata sota amen en morouo ong ia, pwe i wa sili ta nan war ai lip en Iesus akan.

6:18  Mak en atail Kaun Iesus Kristus en kotikot ren ngen omail ri ai kan! Amen.