Kapingamarangi - Galatians

Chapter 1

1:1  Mai baahi o Paul dela ne-hagagahi belee hai tangada agoago-hagau, hagalee ne-gahi go tangada, gei ne-gahi go Jesus Christ mo God Tamana dela ne-haga-mouli-aga a Jesus mai i-di made.

1:2  Tadau duaahina huogodoo ala e-noho i-ginei e-hai labelaa di-nadau hagaaloho ang-gi nia nohongo-dabu ala i Galatia.

1:3  Tadau Damana go God mo Tagi go Jesus Christ gi-dugu-adu gi goodou tumaalia mo-di noho i-di aumaalia.

1:4  Christ ne-bida tigidaumaha Ia i tadau huaidu, bolo gi-maahede gidaadou gi-daha mo-di huaidu dolomeenei, mai i dono hagalongo ang-gi di manawa tadau God mo Tamana.

1:5  God gi-madamada, dolomeenei gaa-hana-hua beelaa! Amen.

1:6  Au gu-homouli huoloo i-di godou limalima di-diiagi Tamana dela ne-gahi goodou mai tumaalia o Christ, gaa-kae tuai longo-humalia.

1:7  Gei e-donu, ma dei di longo-humalia i-golo ai. Au e-helekai beenei, idimaa digau i-golo e-haga-hinihini goodou, e-hiihai bolo ginaadou e-huli di Longo-Humalia o Christ.

1:8  Ma e-aha maa gimaadou be tangada di-langi ga-haneia ga-agoago-adu gi goodou di longo-humalia i-daha mo-di Longo-Humalia dela guu-lawa di-madau hagi-adu gi goodou, tangada beelaa, le e-humalia-hua dono haga-halauwa ge e-hagaduadua i-di ahi dee-odi!

1:9  Nia mee aanei guu-lawa di-helehelekai-ai gimaadou i-mua, dolomeenei gei au e-helekai labelaa nia maa: Maa tangada ga-agoago-adu gi goodou di longo-humalia i-daha mo di-godou longono, tangada deelaa le e-humalia e-haga-halauwa ge e-hagaduadua i-di ahi dee-odi!

1:10  Agu helekai le e-hai be di-mee bolo au e-hai nia daangada gi-hiihai mai? Deeai! Di-mee dela e-hiihai ginai au la-go di hiihai o God! Au e-hai nia daangada dogologo gi-iloo humalia ginaadou au? Maa nei bolo au ne-hai beenei, gei au hagalee tangada hai-hegau ni Christ.

1:11  Ogu duaahina-nei, au e-hagi-adu bolo di Longo-Humalia dela e-agoago ko-au, la hagalee mai baahi nia daangada.

1:12  Hagalee ne-gaamai, be ne-hagi-mai go tangada. Go Jesus Christ hua ne-haga-modongoohia-mai gi-di-au dono Longo-Humalia.

1:13  Goodou gu-longono ogu longo i dogu madagoaa nogo hai-hegau hagamahi i-baahi digau o Jew, nogo dadaaligi ge e-hagahuaidu kono nia nohongo-dabu a God, nogo hagamahi belee oho gi-daha nia maa.

1:14  Gei au nogo kaedahi i-baahi ogu ihoo digau o Jew ala e-mmaadua be au, i-lodo nia hegau daumaha o digau o Jew, nogo hagalabagau labelaa di hangaahai mouli o madau maadua-mmaadua!

1:15  I dono dumaalia, God ne-hilihili-aga au i-mua dogu haanau, gaa-gahi au belee hai-hegau gi-de-Ia. Di madagoaa a Mee ne-maanadu bolo

1:16  e-haga-gida-mai dana Dama-daane bolo au gi-hagadele-ina ang-gi digau tuadimee di Longo-Humalia o-Maa, gei au hogi digi hana gi-baahi tei dangada e-halahala di hagamaamaa.

1:17  Di madagoaa hua deelaa, gei au digi hana labelaa gi Jerusalem bolo e-haga-heetugi gi digau agoago-hagau mai mua, gei au ne-hana-hua gi Arabia, nomuli gei au ga-hanimoi labelaa gi Damascus.

1:18  Gei i-muli nia ngadau e-dolu, gei au ga-hanaga gi Jerusalem bolo gi-heetugi au gi Peter, gaa-noho i-baahi o mee i-nia dabu e-lua.

1:19  Au digi heetugi gi-nia gau agoago-hagau ala i-golo, go James hua go tuaahina o Tagi.

1:20  Agu helekai ala e-hihi le e-donu. God e-iloo-Ia bolo au e-hagalee helekai-tilikai.

1:21  Nomuli gei au gaa-hana gi nnenua go Syria mo Cilicia.

1:22  Di madagoaa deelaa, nia daangada o-nia nohongo-dabu a Christ ala i Judea digi iloo-ginaadou au.

1:23  Di mee digaula e-iloo-ai, dela-hua go di-nadau-longono i digau ala i-golo, boloo, “Taane nogo dadaaligi gidaadou i-mua, la-go mee deenei dela e-agoago i-di hagadonu dela ne-hagamada go mee belee oho gi-daha i-mua!”

1:24  Gei digaula gu-haga-hagaamu a God i-di-au.

Chapter 2

2:1  Muli nia ngadau e-madangaholu maa-haa, gei gimaua mo Barnabas ne-hula labelaa gi Jerusalem, guu-lahi labelaa a Titus.

2:2  God ne-haga-modongoohia-mai gi-di-au bolo au gii-hana gi-golo. I-lodo tagabuli mada-gimaadou mo nia dagi, au gu-haga-modongoohia gi digaula di Longo-Humalia dela e-agoago ko-au gi digau tuadimee. Au e-hagalee hiihai bolo agu hegau i-mua be dolomeenei, gi-hagalee kila.

2:3  Dogu ihoo go Titus, ma e-aha maa mee tangada Greece digi hono gi mee gi-sirkumsais,

2:4  gei hunu gau i digaula e-hiihai bolo mee gi-sirkumsais. Nadau hangaahai bolo ginaadou nia hoo hagadonu ni gimaadou, gei ne-ulu-mai be digau gaiaa, bolo gi-iloo-ginaadou di-madau moholo i-di madau buni-anga gi Jesus Christ. Digaula e-hiihai bolo gimaadou e-hai nia hege,

2:5  gei gimaadou digi dumaalia gi digaula, bolo di tonu di Longo-Humalia la-gii-noho-hua i godou baahi.

2:6  Digaula e-hai be nia dagi. (Au e-helekai beenei, idimaa, au hagalee dugu geegee digaula. God e-hagalee mmada gi tuaidina tangada.) Au e-helekai bolo nia dagi aalaa digi gaamai nadau maanadu hagamaamaa hoou.

2:7  Gei deeai, digaula gu-gidee bolo God gu-gaamai dogu duhongo-hegau e-agoago gi digau tuadimee di Longo-Humalia, gadoo be di hai a-Mee dela ne-wanga gi Peter bolo mee gi-agoago-ina gi digau o Jew di Longo-Humalia.

2:8  God ne-hai au gii-hai tangada agoago-hagau ang-gi digau tuadimee, gadoo be Peter dela ne-hai tangada agoago-hagau ang-gi digau o Jew.

2:9  James, Peter mo John ala e-hai be nia dagi ni digaula, la-gu-modongoohia bolo God gu-dugu-mai dogu duhongo-hegau deenei. Digaula guu-lulu mau lima mo Barnabas belee haga-modongoohia bolo gimaadou huogodoo guu-buni ngaadahi. Gimaadou guu-baba bolo gimaua mo Barnabas e-ngalua i-baahi digau tuadimee, gei digaula ga-ngalua i-baahi digau o Jew.

2:10  Gei di mee hua e-dahi digaula e-hiihai gimaua gi-heia, bolo gi-langahia-laa digau hagaloale ala i nadau baahi, deenei hogi dagu mee e-ngalua damanaiee ginai belee haga-gila-aga.

2:11  Di madagoaa Peter ne-hanimoi gi Antioch, gei au gu-hai-baahi gi mee i-mua digau dogologowaahee, i-nia mee hai-gee a-maa ne-modongoohia.

2:12  I-mua di-dau-mai nia daane ala ne-hagau mai go James, gei Peter nogo miami i-baahi digau tuadimee ala guu-hai nia dama ni Christ. Muli-hua nia daane ne-dau-mai, gei mee gu-hagalee miami i-baahi digau tuadimee, idimaa, mee gu-madagu i digau ala e-hiihai bolo digau tuadimee le e-hai-loo gi-sirkumsais.

2:13  Nia duaahina gau o Jew labelaa gu-madalia a Peter gu-mmaadagu, gei Barnabas gu-madagu labelaa.

2:14  Dogu gidee bolo digaula hagalee taele i-di ala e-donu, be-di tonu o-di Longo-Humalia, gei au ga-helekai gi Peter i-mua digaula huogodoo, “Goe tangada-donu o Jew, gei goe e-mouli di mouli o tangada tuadimee, hagalee mouli i-di mouli tangada o Jew. Malaa, e-hai behee go dau hai dela e-mahimahi ang-gi digau tuadimee bolo gii-hai be digau o Jew?”

2:15  Gimaadou digau o Jew mai i madau haanau, la-hagalee “Digau tuadimee huaidu”.

2:16  Malaa, gidaadou gu-iloo bolo tangada le e-donu i-mua o God mai i dono hagadonu hua a Jesus Christ, hagalee mai i dono haga-gila-aga Nnaganoho. Gidaadou labelaa gu-hagadonu a Jesus Christ, guu-hai digau e-donu i-mua o God, mai i tadau hagadonu a Christ, hagalee mai i tadau haga-gila-aga Nnaganoho! Tangada e-mee di-donu i-mua o God ai mai i dana haga-gila-aga Nnaganoho.

2:17  Maa gidaadou ala guu-hai digau e-donu i-mua o God mai tadau hagadonu a Christ, gaa-gida bolo gidaadou digau e-huaidu be digau tuadimee, deenei la dono hadinga bolo Christ le e-hai-hegau gi-di huaidu? Deeai loo!

2:18  Maa au ga-haga-duu-aga labelaa Nnaganoho ala guu-lawa di oho gi-daha i-mua, deenei le e-haga-modongoohia bolo au tangada dagadagahi Nnaganoho.

2:19  I-baahi Nnaganoho au guu-made, ne-daaligi go Nnaganoho, bolo gi-mouli au ang-gi God. Au guu-dau madalia a Christ i-dono made i-hongo di loobuu,

2:20  deenei-laa, hagalee ko-au dela e-mouli, gei go Christ dela e-mouli i ogu lodo. Gei di mouli deenei e-mouli-iei au dolomeenei, di mouli mai i-lodo dogu hagadonu Tama a God dela ne-aloho i-di-au ga-tigidaumaha Ia gi God i-di-au.

2:21  Au hagalee bae gi-daha tumaalia dehuia o God, idimaa, maa nei bolo tangada le e-donu i-baahi o God mai Nnaganoho, gei di made o Christ la dono hadinga ai!

Chapter 3

3:1  Digau Galatia! Ma koai dela ne-haga-dadaulia goodou? Goodou gu-modongoohia humalia di made o Jesus Christ i-di loobuu!

3:2  Hagia-mai be goodou ne-kae di Hagataalunga o God mai di-godou haga-kila-aga Nnaganoho, be mai di-godou hagalongo gi-di Longo-Humalia, ga-hagadonu di-maa.

3:3  E-hai behee go di-godou dadaulia? Goodou ne-daamada mai i-di Hagataalunga o God, gei dolomeenei goodou e-hagalawa gi godou mahi?

3:4  Goodou e-hagamaanadu bolo nia mee ala ne-tale-adu gi goodou la ono hadinga ai? Deeai, ono hadinga i-golo!

3:5  God la-ne-gowadu gi goodou di Hagataalunga ge hai ana mogobuna i godou baahi, idimaa go di-godou haga-kila-aga Nnaganoho, be go di godou longono mo hagadonu di Longo-Humalia?

3:6  E-hai gadoo be-di Beebaa-Dabu dela e-helekai i Abraham, “Mee ne-hagadonu a God, gei God guu-hila gi mee, idimaa go dono hagadonu.”

3:7  Goodou gi-iloo humalia bolo digau ala gu-hagadonu, aanei go di hagadili donu o Abraham.

3:8  Di Beebaa-Dabu ne-helekai kokohp bolo God gaa-hai digau tuadimee gii-donu i dono baahi mai nadau hagadonu. Malaa di Beebaa-Dabu ne-hagi-anga di Longo-Humalia gi Abraham boloo, “Mai i-di-goe, God ga-haga-maluagina digau huogodoo i henuailala.”

3:9  Abraham gu-hagadonu, gei God gu-haga-maluagina a-mee, malaa digau huogodoo ala ma-ga-hagadonu, God e-haga-maluagina digaula be Abraham.

3:10  Digau huogodoo ala e-hagadagadagagee gi nadau haga-gila-aga Nnaganoho, le e-noho i-lodo di halauwa. Di Beebaa-Dabu e-helekai, “Tangada dela hagalee haga-gila-aga nia mee huogodoo ala guu-hihi gi-lodo di Beebaa-Haganoho le e-halauwa!”

3:11  Malaa, gu-modongoohia humalia bolo tangada e-dahi e-donu i-baahi o God mai Nnaganoho ai, idimaa, di Beebaa-Dabu e-helekai, “Tangada dela e-donu i-baahi o God la-ga-mouli mai i dono hagadonu!”

3:12  Malaa Nnaganoho la-hagalee hagamau mai di hagadonu. Gei di Beebaa-Dabu e-helekai, “Be goai hua e-daudali Nnaganoho la-ga-mouli.”

3:13  Malaa, Christ gu-haga-dagaloaha gidaadou gi-daha mo-di halauwa o Nnaganoho, guu-hai di halauwa ni gidaadou, idimaa, di Beebaa-Dabu e-helekai, “Tangada dela e-daudau i-tomo di laagau, la-gu-i-lala di halauwa a God.”

3:14  Christ ne-hai di mee deenei bolo di maluagina a God dela ne-hagababa ang-gi Abraham, e-kae labelaa go digau tuadimee mai Jesus Christ, bolo gidaadou e-mee di-kae mai tadau hagadonu di Hagataalunga-Dabu dela guu-lawa di hagababa go God.

3:15  Ogu duaahina-nei, au e-helekai i-di ala-haga-tautau: Maa nia daangada dogolua gaa-hai di-nau hagababa i dahi mee, ga-sain di hagababa deelaa, malaa, tei meemaa e-mee di-oho di hagababa deelaa ai, be e-haga-puni-anga dana mee gi-di maa ai.

3:16  Malaa, God ne-hai ana hagababa gi Abraham mo dono hagadili. Nnelekai dabu hagalee ne-helekai bolo “o” hagadili, dono hadinga bolo digau dogologo. Mee ne-helekai bolo “do” hagadili, dono hadinga bolo tangada hua-e-dahi dela go Christ.

3:17  Au e-helekai bolo God guu-hai dana hagababa gi Abraham, gu-hagababa bolo Ia ga-daahi di-maa. Malaa Nnaganoho ala ne-wanga i-muli nia ngadau e-haa-lau-motolu, e-deemee di-oho di hagababa aamua a God deelaa.

3:18  Maa nei bolo di wanga dehuia a God le e-huwahuwa go Nnaganoho, gei di-maa gu-hagalee huwahuwa go dana hagababa. Malaa, idimaa go dana hagababa, God ne-wanga di wanga dehuia deelaa gi Abraham.

3:19  Malaa, Nnaganoho la-ne-hai eimaha? Nnaganoho ne-haga-puni ang-gi di hagababa deelaa belee haga-modongoohia-aga di hala, gaa-dae-loo gi-di dau-mai di hagadili o Abraham dela ne-hai ginai di hagababa deenei. God ne-wanga gi digau di-langi Nnaganoho aanei bolo gi-wanga-ina gi Moses, tangada dela e-hagadae di hiihai a God gi-nia daangada.

3:20  Malaa, God le modogoia hua, hagalee hiihai gi tangada hagadae.

3:21  Deenei le e-hagamodongoohia bolo Nnaganoho le e-hai-baahi gi-nia hagababa a God? Deeai! Maa nei bolo taganoho i-golo e-mee di-haga-mouli tangada, nia daangada e-mee di donu i-baahi o God mai nadau haga-gila-aga taganoho deelaa.

3:22  Di Beebaa-Dabu e-helekai bolo henuailala hagatau la-gu i-lala di mogobuna o-di hala. Gei digau ala gu-hagadonu gaa-wanga ginai di maluagina dela ne-hagababa gi digaula mai i-di nadau hagadonu a Jesus Christ.

3:23  Malaa i-mua di hagadonu ne-dae-mai, Nnaganoho nogo lawalawa gidaadou huogodoo, be digau galabudi, gaa-dae-loo gi-di hagadonu deenei ne-modongoohia-aga.

3:24  Nnaganoho nogo dagi gidaadou gaa-dae-loo gi-di hanimoi o Christ, bolo gii-donu gidaadou i-baahi o God mai i-di hagadonu.

3:25  Dolomeenei di hagadonu guu-dae-mai, gei Nnaganoho gu-hagalee dagi gidaadou.

3:26  Goodou huogodoo guu-hai nia dama ni God mo-di hagadaubuni ang-gi Jesus Christ, mai i godou hagadonu.

3:27  Goodou ala gu-babdais gu-buni-anga gi Christ, guu-kae di mouli o Christ gi godou baahi.

3:28  Deelaa tadinga di hai-geegee-ai i-mehanga digau o Jew mo digau tuadimee, mehanga digau lawalawa mo digau moholo, mehanga nia daane mo nia ahina. Goodou huogodoo guu-dahi i-di godou buni-anga gi Jesus Christ.

3:29  Maa goodou nia dama ni Christ, goodou di hagadili ni Abraham, gaa-kae nia mee a God ala guu-lawa di hagababa.

Chapter 4

4:1  Gei-au ga-duudagi-adu-hua di mee deenei: Tama-daane dela gaa-kae di maluagina o dono damana, dono madagoaa nogo dulii, geia e-dugu be-di hege, ma e-aha maa ia ga-hai-mee gi-nia mee huogodoo.

4:2  Dono madagoaa nogo dulii, digau i-golo nogo benebene a-mee mo ono maluagina, gaa-dae-loo gi-di madagoaa o dono damana gaa-wanga gi mee ono maluagina gi-hai-mee ginai.

4:3  E-hai gadoo be gidaadou, tadau madagoaa digi mmaadua, gidaadou nogo hai nia hege ni-di hagataalunga o-di ahiaalangi dela e-dagi henuailala.

4:4  Di madagoaa donu ne-dau-mai, gei God ne-hagau-mai dana Dama-daane, ga-haanau mai i-baahi di ahina, gaa-noho i-lala Nnaganoho o digau o Jew,

4:5  belee haga-maahede digau ala e-noho i-lala Nnaganoho, gii-hai gidaadou nia dama ni God.

4:6  God ne-hagau-mai di Hagataalunga o dana Dama-daane gi-lodo tadau manawa, belee haga-modongoohia bolo goodou digau tuadimee guu-hai nia dama ni God. Di Hagataalunga deelaa e-dangi boloo, “Tamana, dogu Damana!”

4:7  Malaa, goe hagalee di hege, guu-hai di tama donu ni God. Gei idimaa goe dela guu-hai di tama donu ni Mee, God ga-dugu-adu gi-di-goe ana mee huogodoo ala ne-benebene go Mee ang-gi ana dama.

4:8  I-mua-loo gei goodou nogo de-iloo a God, goodou nogo hai-hua nia hege o-nia hagataalunga hagalee nia god donu.

4:9  Dolomeenei, gei goodou e-iloo a God, gei God e-iloo goodou, malaa, goodou le e-aha ala e-hiihai e-huli labelaa gi-muli gi-nia hagataalunga huaidu gei e-paagege? Goodou le e-aha ala e-hiihai e-hai hege labelaa gi digaula?

4:10  Goodou e-hagalaamua nia laangi, nia malama, nia madagoaa o-di ngadau, mono ngadau ala e-hagalabagau.

4:11  Au e-de-nnoomaalia i goodou, be di-maa go agu hegau huogodoo adu gi goodou le e-balumee.

4:12  Ogu duaahina-nei, au e-dangi hagamahi bolo goodou gii-hai be au, idimaa, au e-hai be goodou. Goodou digi hai di-godou mee hala mai gi-di-au.

4:13  Goodou e-langahia bolo au nogo magi i dogu madagoaa nogo hagadele-adu gi goodou di Longo-Humalia i-di matagidagi.

4:14  Gei goodou digi heia au hagahuaidu, be e-hudu au gi-daha, ma e-aha maa dogu huaidina la-guu-mmada ginai hagahuaidu. Gei deeai, goodou ne-benebene-hua au, gadoo be tangada di-langi, dela di-godou hai e-benebene a Jesus Christ.

4:15  Goodou i-mua nogo tenetene huoloo! Malaa di-aha guu-hai dolomeenei? Au e-mee di-hagi-adu bolo i-mua, goodou gu-hiihai di-kabe godou golomada, e-gaamai gi-di-au be di-maa e-mee.

4:16  Malaa, au guu-hai di hagadaumee ni goodou i dagu hagi-adu gi goodou di tonu?

4:17  Nia daangada ala i-golo e-hiihai adu gi goodou, gei nadau hiihai la-hagalee humalia. Digaula e-hiihai-hua belee wwae goodou gi-daha mo au, gi-hiihai goodou ang-gi ginaadou gadoo be nadau hiihai adu gi goodou.

4:18  Gei di-maa koia e-humalia huoloo maa goodou ga-haga-dahidamee di mee dela e-humalia i-nia madagoaa huogodoo, gei hagalee go di madagoaa hua dela e-noho-iei au i godou baahi.

4:19  Agu dama hagaaloho, au guu-mmae labelaa adu gi goodou i-nia mmae o di haanau, gaa-dae-loo gi-di mouli o Christ ga-mau dangihi i godou lodo.

4:20  Au e-hiihai huoloo bolo au gi godou baahi dolomeenei, e-dagi goodou gi-di hai dela e-humalia, idimaa, au gu-de-nnoomaalia huoloo i goodou.

4:21  Au e-heeu-adu gi goodou ala e-hiihai e-noho i-lala Nnaganoho: goodou e-de-longono Nnaganoho?

4:22  E-hai bolo Abraham ana dama dogolua, e-dahi mai baahi di hege-ahina, ge e-dahi mai baahi dono lodo-donu.

4:23  Dana dama mai baahi di hege-ahina ne-haanau-mai tangada, gei dana dama mai baahi dono lodo-donu ne-haanau-mai di hagababa a God.

4:24  Nia mee ala e-modongoohia i-di kai o-nia ahina dogolua aanei la-go nia hagababa e-lua. Di ahina dela ne-haanau ana dama gaa-hai nia hege la-go Hagar, mee go di haga-modongoohia o-di hagababa dela ne-hai i-di Gonduu Sinai.

4:25  Hagar la di haga-modongoohia ni-di Gonduu Sinai i-lodo Arabia, di ada o-di waahale Jerusalem dolomeenei, ono daangada huogodoo e-noho i-lodo di hai-hege.

4:26  Malaa, Jerusalem di langi le e-moholo, go mee go tadau dinana-donu.

4:27  Di Beebaa-Dabu e-helekai, “Tenetene, go di ahina dana dama ai. Wolowolo tenetene, goe dela digi longono di mmae o-di haanau, idimaa, di ahina dela ne-hudu gi-daha go dono lodo, gaa-hai ana dama dogologo i-nia dama di ahina dela digi diagia go dono lodo.”

4:28  Ogu duaahina-nei, goodou go nia dama a God i dana hagababa, gadoo be Isaac.

4:29  I-di madagoaa deelaa, di tama dela ne-haanau i-di haanau o tangada, gu-hagahuaidu di tama dela ne-haanau i-di Hagataalunga o God, e-hai gadoo beenei dolomeenei.

4:30  Di Beebaa-Dabu le e-helekai bolo-aha? E-helekai boloo, “Hagau-ina di hege-ahina mo dana dama gi-daha, idimaa, di tama o-di hege-ahina la-hagalee hai-mee gi-nia mee o dono damana dalia di tama o dono lodo-donu.”

4:31  Ogu duaahina-nei, gidaadou hagalee nia dama ni-di hege-ahina, gidaadou nia dama ni-di ahina moholo.

Chapter 5

5:1  Christ dela ne-haga-mehede gidaadou, malaa, goodou tuu gii-mau i-lodo godou dagaloaha, hudee dugu-anga gii-hai nia hege labelaa.

5:2  Ko-au go Paul, e-hagi-adu bolo maa goodou ga-sirkumsais, dono hadinga bolo Christ le e-balumee-hua adu gi goodou.

5:3  Au e-haga-iloo labelaa ang-gi tangada-nei mo tangada-nei, dela ga-sirkumsais, bolo ia e-hai-loo gi-haga-gila-aga Nnaganoho hagatau.

5:4  Digau ala e-hagamada bolo ginaadou e-hai gii-donu i-baahi o God mai i nadau haga-gila-aga Nnaganoho, digaula ne-daa ginaadou gi-daha mo Christ, guu-noho i-daha mo tumaalia dehuia o God.

5:5  Gei gidaadou e-hagadagadagagee gi God dela gaa-hai gidaadou gii-donu i dono baahi. Deenei tadau mee dela e-talitali, mai di mogobuna o-di Hagataalunga dela e-hai-hegau i tadau hagadonu.

5:6  Gei gidaadou ala gu-buni-anga gi Jesus Christ, tadau sirkumsais guu-dono hadinga ai. Gei di mee dela dono hadinga, la-go tadau hagadonu dela e-hai-hegau i-di aloho.

5:7  Goodou nogo mouli humalia! Ma koai ne-dugu goodou di daudali di tonu? Dehee dana hai ne-hai goodou gi-hagalee daudali di tonu?

5:8  Hagalee ne-hai mai baahi o God, dela ne-gahigahi goodou.

5:9  Nia ‘yeast’ hua dulii-loo e-mee di-hai di palaawaa hagatau gii-tanga.

5:10  Au e-hagadagadagagee adu gi goodou mai i tadau hagadaubuni ang-gi Tagi, bolo godou hagamamaanadu la hagalee hai-gee mo agu maanadu. Gei tangada, de-hilihili be koai, dela e-haga-hinihini godou mehanga, e-kae dono hagaduadua mai i-baahi o God.

5:11  Ogu duaahina-nei, maa nei bolo au ga-agoago hua igolo bolo sirkumsais le e-hagalabagau, malaa, nia daangada le e-hagahuaidu au eiaha? Maa di mee deenei le e-donu, malaa, dagu agoago i-di loobuu o Christ la-hagalee di mee e-hagawelewele ginai.

5:12  Au bolo digau ala e-haga-hinihini goodou la-gii-hula gii-tugi, heia digaula gii-hula gii-bida teletele-ina ginaadou!

5:13  Gei goodou, go ogu duaahina-nei, goodou ne-gahigahi bolo gi-maahede. Malaa, goodou ala gu-dagaloaha, hudee haga-haingoohia-ina goodou gi-nia hiihai o tuaidina gi-dagi-ina goodou. Gei goodou gi-hagadau-maamaa i godou mehanga i-di aloho.

5:14  Idimaa, Nnaganoho hagatau le e-daabui-mai go taganoho hua-e-dahi boloo, “Aloho i tangada dela i do baahi, gii-hai be do aloho i-di-goe.”

5:15  Maa goodou gaa-hai be nia manu lodo-geinga, ala e-haga-huaidu, ge haga-mmaemmae ginaadou, malaa, goodou gii-pula i goodou, gi-de-hagadau daaligi goodou gi-daha.

5:16  Deenei dagu mee ga-helekai-iei au: dugu ang-gi di Hagataalunga gi-dagia goodou, hudee haga-kila-aga-ina nia hiihai o tuaidina.

5:17  Idimaa, di hiihai o tuaidina le e-hai-baahi gi-di hiihai o-di Hagataalunga, gei di hiihai o-di Hagataalunga le e-hai-baahi gi-di hiihai o tuaidina. Nia hiihai e-lua aanei le e-hagadaumee i nau mehanga. Gei di mee deenei e-hai dono hadinga bolo goodou e-deemee di hai godou hiihai.

5:18  Maa di Hagataalunga e-dagi goodou, goodou la-hagalee noho i-lala Nnaganoho.

5:19  Nia hangahaihai o tuaidina la aanei: di hai be-di manu, di manawa-manu i-mehanga taane mo-di ahina, nnangaahai milimilia,

5:20  daumaha ang-gi nia balu-god, hai-buubuu, hagadugina, tee-donu, tubua, hagawelewele, lagamaaloo, tee-buni,

5:21  hagagailaa, libaliba, mono mee beenei ala i-golo. Au e-helekai adu gi goodou be agu helekai i-mua: Digau ala e-hai nia mee aanei, la-hagalee e-ulu i Teenua King o God.

5:22  Aanei-laa go nia huwa o-di Hagataalunga: aloho, manawa tenetene, noho i-di aumaalia, hagakono di manawa, dumaalia, humalia, manawa-dahi,

5:23  hila-gi-lala mo-di haga-ligaliga i-daha mo-di huaidu. Taganoho i-golo e-hai-baahi gi-nia mee aanei ai.

5:24  Nia dama a Jesus Christ gu-daaligi gi-daha nnagadilinga hiihai huaidu huogodoo o nadau huaidina.

5:25  Di Hagataalunga gu-dugu-mai gi gidaadou di mouli, malaa, e-hai gii-dagi tadau mouli labelaa.

5:26  Gidaadou hudee hagamuamua, hagawelewele, be hagadau dubua i tadau mehanga.

Chapter 6

6:1  Ogu duaahina-nei, maa tangada guu-doo gi-lodo di hala, gei goodou ala guu-honu di Hagataalunga, heia a-mee gii-donu, helekai-maamaa gi mee, gei gii-pula i goodou, gi-dee too gi-lodo nia hagamada labelaa.

6:2  Goodou gi-hagadau-maamaa i godou mee daamaha ala e-kae. Deenei di-godou hai e-haga-kila-aga taganoho a Christ.

6:3  Maa tangada ga-hagamaanadu bolo ia la di mee, gei mee la hagalee di mee, ia ne-bida halahalau-hua ia.

6:4  Tangada-nei mo tangada-nei gii-bida hagadina-ina ono hangaahai. Maa ono hangaahai le e-humalia, geia e-mee di-tenetene ginai. Hudee hagataulia gi-nia mee o tuai dangada ne-hai.

6:5  Idimaa tangada-nei mo tangada-nei le e-bida kae ono hagadaamaha.

6:6  Tangada dela ne-agoago ginai di Longo-Humalia, gi-hagadau-bale gi dana dangada agoago i ono maluagina.

6:7  Goodou hudee bida halahalau-ina goodou. Deai tangada e-halahalau a God ai. Tangada ma-gaa-dogi dana mee, deelaa hua dana mee e-hadi.

6:8  Maa ia gaa-dogi gi-lodo di hadagee dono hiihai, geia e-hadi di made. Maa ia gaa-dogi gi-lodo di gowaa dogi-mee di Hagataalunga, geia e-hadi di mouli dee-odi mai di Hagataalunga.

6:9  Gidaadou hudee buhi i tadau hai di humalia. Idimaa, maa gidaadou ga-hagalee buhi, di madagoaa e-dau-mai, gei gidaadou gaa-hadi nia huwa humalia.

6:10  Di madagoaa gidaadou ga-iai tadau madagoaa humalia, gidaadou gi-heia di humalia ang-gi nia daangada huogodoo, gei e-donu ang-gi digau ala go tadau ihoo hagadonu.

6:11  Goodou mmada gi agu helekai ala ne-hihi haga-llauehe adu gi goodou gi dogu lima donu.

6:12  Digau ala e-hiihai e-hono goodou gi-sirkumsais, aalaa go digau e-hagaamu ginaadou mo e-helehelekai llauehe i-nia mee i-tua. E-hai nadau mee beenei, bolo gi-dee dau ginaadou gi taaligi i-di gili di loobuu o Christ.

6:13  Gei digau ala gu-sirkumsais, hagalee haga-kila-aga Nnaganoho. Digaula e-hiihai huoloo bolo goodou gi-sirkumsais, bolo gi-iai di-nadau helekai hagaamu bolo goodou guu-hai di-mee deenei.

6:14  Gei-au, au e-hagaamu di loobuu o tadau Dagi go Jesus Christ, idimaa, di loobuu deenei la-dono hadinga bolo henuailala guu-made gi-di-au, gei au guu-made gi henuailala.

6:15  Di sirkumsais tangada la-dono hadinga ai. Go di huli-hoou hua, dela dono hadinga i-golo.

6:16  Di noho i-di aumaalia mo tumaalia gi-madalia digau ala e-daudali nia agoago aanei, mo nia dama a God huogodoo.

6:17  Di haga-lawa agu helekai: Tangada e-haga-haingadaa au ai, idimaa, nia lohongo magibala ala i dogu gili e-haga-modongoohia bolo au tangada hai-hegau ni Jesus.

6:18  Ogu duaahina-nei, tumaalia o tadau Dagi go Jesus Christ gi-madalia goodou. Amen.