Kekchi - Galatians

Chapter 1

1:1  La̱in laj Pablo. La̱in x-apóstol li Jesucristo. Moco taklanbilin ta xban cui̱nk, chi moco saˈ xcˈabaˈ junak cui̱nk. Taklanbilin ban xban li Jesucristo ut xban li Acuabej Dios, li quicuaclesin cuiˈchic re chi yoˈyo li Jesucristo saˈ xya̱nkeb li camenak.

1:2  La̱in yo̱quin chixtaklanquil li hu aˈin e̱riqˈuin che̱junilex la̱ex li cuanquex saˈ li junju̱nk chi iglesia aran Galacia. Ut eb li herma̱n li cuanqueb cuochben yo̱queb ajcuiˈ chixtaklanquil xsahil e̱chˈo̱l.

1:3  Chicua̱nk taxak e̱riqˈuin li usilal ut li tuktu̱quilal li naxqˈue li Dios li kaYucuaˈ ut li naxqˈue li Ka̱cuaˈ Jesucristo.

1:4  Li Jesucristo quixkˈaxtesi rib chi ca̱mc saˈ xcˈabaˈ li kama̱c xban nak joˈcan quiraj li Dios Acuabej. Quixba̱nu aˈan re kacolbal chiru li ma̱usilal saˈ li ruchichˈochˈ.

1:5  Lokˈoninbil taxak ru li Acuabej Dios chi junelic kˈe cutan. Joˈcan taxak.

1:6  Nasach inchˈo̱l e̱ban xban nak kˈaxal junpa̱t yo̱quex chixcanabanquil li tzˈakal Dios li quisicˈoc e̱ru xban li rusilal li Jesucristo. Ut yo̱quex chixpa̱banquil jalan tijleb chirix li evangelio li moco ya̱l ta.

1:7  Aˈin moco naraj ta naxye nak cuan jun chic li evangelio. Lix ya̱lal aˈan, aˈin: cuanqueb li nequeˈraj xpoˈbal ru li evangelio li naxqˈue li Ka̱cuaˈ Jesucristo.

1:8  Usta la̱o, usta junak ángel ta̱cha̱lk saˈ choxa chixyebal e̱re jalan tijleb chirix li evangelio chiru li ac xkachˈolob che̱ru, tzˈekta̱nanbilak taxak xban li Dios li ani ta̱ba̱nu̱nk re chi joˈcaˈin.

1:9  Ac xkaye aˈin e̱re ut nakaye cuiˈchic e̱re, cui junak tixye e̱re jalan tijleb chirix li evangelio chiru li ac xerabi, tzˈekta̱nanbilak taxak xban li Dios li ani ta̱ba̱nu̱nk re chi joˈcaˈin.

1:10  ¿Ma yal re ta biˈ nak teˈsahokˈ xchˈo̱l li cui̱nk cuiqˈuin nak yo̱quin chixyebal chi joˈcaˈin? ¿Ma incˈaˈ ta biˈ yo̱quin chixyebal chi joˈcaˈin re nak sahak xchˈo̱l li Dios cuiqˈuin? ¿Ma tincuaj ta biˈ tincˈojob xchˈo̱leb li cui̱nk? Ma̱ jokˈe xban nak cui ta toj nacuaj xcˈojobanquil xchˈo̱leb li cui̱nk ma̱cuaˈin raj aj cˈanjel chiru li Jesucristo.

1:11  Ex inherma̱n, nacuaj nak te̱nau nak li evangelio li xinchˈolob che̱ru, aˈan ma̱cuaˈ yal xcˈaˈux cui̱nk.

1:12  Ma̱cuaˈ yal riqˈuin junak cui̱nk quicuabi, chi moco riqˈuin ta junak cui̱nk quintzol cuib. Aˈ ban li Ka̱cuaˈ Jesucristo, aˈan li quicˈutbesin re chicuu.

1:13  Ac e̱rabiom ajcuiˈ resil chanru nak quincuan chak saˈ lix pa̱ba̱leb laj judío. La̱ex nequenau nak kˈaxal nabal li raylal quinba̱nu reheb li nequeˈpa̱ban re li Dios ut quinyal inkˈe chixsachbal ruheb laj pa̱banel.

1:14  La̱in li kˈaxal cuiˈchic quinqˈue inchˈo̱l chiruheb li cuech sa̱jilal chixba̱nunquil li cˈaˈru naxye lix pa̱ba̱leb laj judío. Ut kˈaxal cuiˈchic quinba̱nu li naˈleb canabanbil ke xbaneb li kaxeˈ kato̱n.

1:15  Nak toj ma̱jiˈ ninyoˈla, xban xnimal rusilal, li Dios ac xsicˈ chak cuu re tincˈanjelak chiru.

1:16  Ut nak li Dios quiraj xcˈutbesinquil li Ralal chicuu re nak tinchˈolob resil chiruheb li ma̱cuaˈeb aj judío, incˈaˈ xinpatzˈ innaˈleb re junak cui̱nk.

1:17  Chi moco co̱in ta Jerusalén chi a̱tinac riqˈuineb li apóstol li quisiqˈueˈ ruheb junxil chicuu. Ti̱c ban co̱in Arabia ut mokon quinsukˈi cuiˈchic Damasco.

1:18  Oxib chihab xpa̱banquil li Dios inban nak co̱in Jerusalén re nak tinnau ru laj Pedro. Oˈlaju cutan quincuan chak riqˈuin.

1:19  Ut quicuil ru laj Jacobo ri̱tzˈin li Ka̱cuaˈ Jesucristo. Ut chirix chic aˈan, ma̱ jun chic reheb li apóstol quicuileb ru.

1:20  Li Dios naxnau nak tzˈakal ya̱l li cˈaˈru yo̱quin chixtzˈi̱banquil saˈ li hu aˈin.

1:21  Chirix chic aˈan co̱in saˈ eb li naˈajej xcue̱nt Siria ut Cilicia.

1:22  Ut toj ma̱jiˈak nequeˈxnau cuu eb laj pa̱banel saˈ xcˈabaˈ li Cristo, li cuanqueb aran Judea.

1:23  Yal resil nequeˈrabi li nayeman chicuix: Li cui̱nk li quirahobtesin reheb laj pa̱banel junxil, anakcuan aˈan chic yo̱ chi yehoc resil li colba-ib li quiraj raj xsachbal junxil, chanqueb.

1:24  Ut eb aˈan queˈxlokˈoni ru li Dios nak queˈrabi resil nak quinpa̱b li Cristo.

Chapter 2

2:1  Mokon chic nak ac xnumeˈ ca̱laju chihab, co̱in cuiˈchic Jerusalén cuochben laj Bernabé. Ut kacˈam laj Tito chikix.

2:2  Co̱in xban nak li Dios quixcˈutbesi chicuu nak tento tinxic Jerusalén. Ut queˈxchˈutub rib li nequeˈcˈamoc be chiruheb laj pa̱banel. Ut quinserakˈi reheb li resilal li evangelio li yo̱quin chixjulticanquil reheb li ma̱cuaˈeb aj judío. Quinchˈolob xya̱lal chiruheb re nak incˈaˈ ta̱cana̱k chi ma̱cˈaˈ rajbal chiruheb li cˈaˈru yo̱quin chixba̱nunquil joˈ ajcuiˈ li ac xinba̱nu.

2:3  Laj Tito ma̱cuaˈ aj judío. Abanan eb laj cˈamol be incˈaˈ queˈxmin ru chixcˈulbal li circuncisión.

2:4  Abanan cuan ajcuiˈ junju̱nk queˈraj raj xminbal ru xcˈulbal li circuncisión. Eb aˈan nequeˈxye rib nak aj pa̱baneleb. Queˈoc saˈ kaya̱nk saˈ mukmu re xqˈuebal retal li usilal cuanco cuiˈ saˈ xcˈabaˈ li Jesucristo ma yo̱co chixpa̱banquil li najter chakˈrab malaj incˈaˈ. Eb aˈan queˈraj raj cuiˈchic kaqˈuebal rubel xcuanquil li najter chakˈrab.

2:5  Abanan la̱o ma̱ jokˈe kaba̱nu li cˈaˈru queˈxye ke xban nak la̱o incˈaˈ quikaj nak teˈxpoˈ ru li evangelio, li tzˈakal ya̱l li ac xerabi.

2:6  Ut eb li ni̱nkeb xcuanquil saˈ xya̱nkeb laj pa̱banel ma̱cˈaˈ queˈxye chirix li cˈaˈru yo̱quin chixba̱nunquil. Ma̱cˈaˈ nacuaj re usta ni̱nkeb xcuanquil. Chiru li Dios juntakˈe̱to.

2:7  Ma̱cˈaˈ queˈxye li ni̱nkeb xcuanquil. Queˈxqˈue ban retal nak tenebanbil saˈ inbe̱n xban li Dios xyebal resil li evangelio reheb li ma̱cuaˈeb aj judío joˈ nak quiteneba̱c saˈ xbe̱n laj Pedro xban li Dios xyebal resil li evangelio reheb laj judío.

2:8  Li Dios quixsicˈ cuu chokˈ apóstol re tincˈanjelak saˈ xya̱nkeb li ma̱cuaˈeb aj judío joˈ nak quixsicˈ ru laj Pedro re ta̱cˈanjelak saˈ xya̱nkeb laj judío.

2:9  Laj Jacobo, laj Pedro ut laj Juan, aˈaneb aj cˈamol be saˈ xya̱nkeb laj pa̱banel. Nak queˈxqˈue retal nak sicˈbil cuu xban li Dios, queˈxqˈue li rukˈeb cue ut re laj Bernabé. Aˈan retalil nak kacomon kib chi cˈanjelac chiru li Dios. Ut xkacˈu̱b ru nak la̱in ut laj Bernabé tocˈanjelak saˈ xya̱nkeb li ma̱cuaˈeb aj judío ut eb aˈan teˈcˈanjelak saˈ xya̱nkeb laj judío.

2:10  Caˈaj cuiˈ li queˈxtzˈa̱ma chiku nak cheˈjulticokˈ ke eb li nebaˈ li cuanqueb Jerusalén, ut aˈan li ninqˈue inchˈo̱l chixba̱nunquil.

2:11  Nak quicuulac laj Pedro Antioquía, la̱in quinkˈus xban nak incˈaˈ us li yo̱ chixba̱nunquil.

2:12  Nak toj ma̱jiˈ nequeˈcuulac li taklanbileb xban laj Jacobo, laj Pedro nacuaˈac riqˈuineb li ma̱cuaˈeb aj judío. Aban nak queˈcuulac eb aˈan, quirisi rib saˈ xya̱nkeb li ma̱cuaˈeb aj judío xban nak quixxucuaheb ru laj judío li nequeˈyehoc re nak tento xcˈulbal li circuncisión.

2:13  Eb laj pa̱banel aj judío queˈoc chixba̱nunquil li caˈ pacˈalil naˈleb li quixba̱nu laj Pedro toj retal nak qui-oc ajcuiˈ chixba̱nunquil laj Bernabé xban nak joˈcan quicˈameˈ cuiˈ xbe xbaneb.

2:14  Nak quinqˈue retal nak incˈaˈ yo̱queb chixba̱nunquil joˈ naraj li evangelio, chiruheb chixjunileb laj pa̱banel quinye re laj Pedro: Ya̱l nak la̱at aj judío chalen chak saˈ la̱ yoˈlajic, abanan ac junxil xacanab xba̱nunquil li cˈaynakeb chixba̱nunquil laj judío. ¿Cˈaˈut nak nacamineb ru li ma̱cuaˈeb laj judío chixba̱nunquil joˈ nequeˈxba̱nu laj judío? chanquin re.

2:15  La̱o aj judío chalen chak saˈ kayoˈlajic ut ma̱cuaˈo xcomoneb li ma̱cuaˈeb aj judío, li nequeˈxye “aj ma̱c” reheb.

2:16  Abanan nakanau nak ma̱ ani ta̱ti̱cobresi̱k xchˈo̱l chiru li Dios riqˈuin xba̱nunquil li cˈaˈru naxye li chakˈrab. Riqˈuin ban xpa̱banquil li Jesucristo. La̱o xkapa̱b li Ka̱cuaˈ Jesucristo re ta̱ti̱cobresi̱k kachˈo̱l chiru li Dios riqˈuin xpa̱banquil li Cristo ut ma̱cuaˈ riqˈuin xba̱nunquil li naxye li chakˈrab cocoleˈ. Riqˈuin xba̱nunquil li naxye li chakˈrab, ma̱ ani ta̱ti̱cobresi̱k xchˈo̱l chiru li Dios.

2:17  Cui yo̱co chixsicˈbal xti̱cobresinquil kachˈo̱l chiru li Dios saˈ xcˈabaˈ li Cristo, ut nak la̱o chic totaˈli̱k chi cuan kama̱c, ¿ma aˈan ta biˈ naraj naxye nak aˈ li Cristo yo̱ chi qˈuehoc ke chi ma̱cobc? Ma̱ jokˈe biˈan.

2:18  Cui la̱in tin-oc cuiˈchic xpa̱banquil nak ta̱ti̱cobresi̱k inchˈo̱l chiru li Dios riqˈuin xba̱nunquil li naxye li chakˈrab, aˈan naraj naxye nak chi ya̱l la̱in aj ma̱c xban nak ac junxil xincanab xpa̱banquil li naˈleb aˈan.

2:19  Chanchan nak li najter chakˈrab xqˈuehoc cue chi ca̱mc xban nak aˈan xcˈutuc re chicuu nak la̱in aj ma̱c. Anakcuan camenakin chic chiru lix cuanquil li chakˈrab re nak yoˈyo̱kin rubel xcuanquil li Dios.

2:20  Li Jesucristo quicam chiru li cruz ut chanchan nak quinqˈueheˈ ajcuiˈ la̱in cuochben. Ma̱cuaˈ chic la̱in li yoˈyo̱quin. Aˈ chic li Cristo cuan cuiqˈuin. Ut acˈ chic lin yuˈam xban nak xinpa̱b li Jesucristo li Ralal li Dios li quirahoc cue ut quixkˈaxtesi rib chi ca̱mc saˈ incˈabaˈ.

2:21  Joˈcan nak incˈaˈ nintzˈekta̱na xcuanquil li rusilal li Dios. Cui ta saˈ xcˈabaˈ li chakˈrab nati̱cobresi̱c kachˈo̱l, ma̱cˈaˈ raj rajbal nak quicam li Cristo.

Chapter 3

3:1  La̱ex aj Galacia, ma̱cˈaˈ e̱naˈleb. ¿Ani xbalakˈin e̱re nak incˈaˈ chic yo̱quex xpa̱banquil li xya̱lal? Nak xkachˈolob che̱ru chanru nak quiqˈueheˈ li Jesucristo chiru cruz, chanchan nak tzˈakal yo̱quex chirilbal.

3:2  Caˈaj cuiˈ aˈin nacuaj xpatzˈbal e̱re. ¿Ma riqˈuin ta biˈ xba̱nunquil li naxye saˈ li chakˈrab nak xecˈul li Santil Musikˈej? Ma̱ jokˈe. La̱ex xecˈul li Santil Musikˈej nak xepa̱b li Cristo.

3:3  ¿Ma kˈaxal cuiˈchic ma̱cˈaˈ e̱naˈleb? Cui riqˈuin li Santil Musikˈej xetiquib chak xpa̱banquil li Jesucristo, ¿ma nequecˈoxla anakcuan nak ta̱tzˈaklok ru le̱ pa̱ba̱l yal riqˈuin li cˈaˈak re ru nequeba̱nu e̱junes?

3:4  ¿Ma te̱canab chi ma̱cˈaˈ rajbal chixjunil li quecˈul chi joˈcanan? La̱in ninye nak incˈaˈ te̱ba̱nu chi joˈcan.

3:5  Li Dios naxqˈue li Santil Musikˈej ut naxba̱nu li milagros e̱riqˈuin. Nacuaj tinpatzˈ e̱re aˈin: ¿ma naxba̱nu aˈan xban nak nequepa̱b li chakˈrab malaj ut xban nak xepa̱b li Cristo li quiyeheˈ resil e̱re?

3:6  Cˈoxlankex caˈchˈinak chirix laj Abraham. Joˈ naxye saˈ li Santil Hu, laj Abraham quixpa̱b li Dios ut xban nak quipa̱ban, li Dios quixye nak ti̱c chic lix chˈo̱l.

3:7  Nacuaj nak te̱nau nak li tzˈakal ralal xcˈajol laj Abraham, aˈaneb li nequeˈpa̱ban re li Dios.

3:8  Najter kˈe cutan nak toj ma̱jiˈ nacˈulun resil li evangelio saˈ ruchichˈochˈ, ac cuan saˈ xchˈo̱l li Dios nak ta̱ti̱cobresi̱k xchˈo̱leb li ma̱cuaˈeb aj judío nak teˈpa̱ba̱nk. Joˈcan nak tzˈi̱banbil saˈ li Santil Hu li quixye li Dios re laj Abraham: Saˈ a̱cˈabaˈ la̱at osobtesinbilakeb chixjunileb li tenamit. (Gn. 12:3)

3:9  Joˈcan nak li ani nequeˈpa̱ban, osobtesinbileb joˈ nak qui-osobtesi̱c laj Abraham xban nak quixpa̱b li Dios.

3:10  Chixjunileb li nequeˈxsicˈ xti̱quilal xchˈo̱l riqˈuin xba̱nunquil li naxye saˈ li najter chakˈrab, tenebanbil li tojba ma̱c saˈ xbe̱neb xban nak joˈcaˈin tzˈi̱banbil saˈ li Santil Hu: Tenebanbil li tojba ma̱c saˈ xbe̱neb li ani incˈaˈ nequeˈxba̱nu chixjunil li tzˈi̱banbil retalil saˈ li chakˈrab. (Dt. 27:26)

3:11  Ac chˈolchˈo nak ma̱ ani ta̱ti̱cobresi̱k xchˈo̱l chiru li Dios yal riqˈuin xba̱nunquil li naxye saˈ li najter chakˈrab xban nak tzˈi̱banbil saˈ li Santil Hu nak ani naxpa̱b li Dios, ta̱ti̱cobresi̱k xchˈo̱l chiru li Dios ut ta̱cua̱nk xyuˈam chi junelic. (Hab. 2:4)

3:12  Li chakˈrab incˈaˈ naxye nak topa̱ba̱nk. Caˈaj cuiˈ naxye nak tento xba̱nunquil li naxye re nak ta̱cua̱nk li kayuˈam. Joˈcaˈin tzˈi̱banbil saˈ li chakˈrab: Li ani naxba̱nu chixjunil li naxye li chakˈrab, li jun aˈan ta̱cua̱nk xyuˈam. (Lv. 18:5)

3:13  Abanan li Jesucristo coxcol chiru li tojba ma̱c li tenebanbil saˈ kabe̱n xban li chakˈrab. Aˈan quicoloc ke nak quixqˈue rib chi ca̱mc re xtojbal rix li kama̱c. Joˈcaˈin tzˈi̱banbil saˈ li Santil Hu: Tzˈekta̱nanbileb chixjunileb li nequeˈcamsi̱c chi tˈuytˈu chiru li cheˈ. (Dt. 21:23)

3:14  Li Jesucristo quixtoj rix li kama̱c nak quicam chiru li cruz re nak saˈ xcˈabaˈ aˈan li ma̱cuaˈeb aj judío teˈxcˈul li rosobtesinquil riqˈuin li Dios joˈ li quixcˈul laj Abraham ut re ajcuiˈ nak riqˈuin xpa̱banquil li Jesucristo takacˈul li Santil Musikˈej li quiyechiˈi̱c ke xban li Dios.

3:15  Ex inherma̱n, nacuaj xchˈolobanquil lix ya̱lal aˈin che̱ru riqˈuin li cˈaˈru nacˈulman saˈ li kayuˈam arin saˈ ruchichˈochˈ. Junak cui̱nk nak tixba̱nu xcontrato, chi acak xakxo xcuanquil, ma̱ ani chic naru nasachoc re, chi moco tixtik ru.

3:16  Joˈ tzˈi̱banbil saˈ li Santil Hu, li cˈaˈru quiyechiˈi̱c re laj Abraham xban li Dios, quiyechiˈi̱c ajcuiˈ reheb li ralal xcˈajol. Moco yo̱ ta chi a̱tinac chirixeb chixjunileb li ralal xcˈajol. Yo̱ ban chi a̱tinac chirix jun ajcuiˈ. Ut li jun aˈan, aˈan li Cristo.

3:17  Aˈin ut tinye: Li Dios quixba̱nu jun li contrato najter riqˈuin laj Abraham ut quixxakab xcuanquil saˈ xcˈabaˈ li Cristo. Li chakˈrab li quiqˈueheˈ re laj Moisés ca̱hib ciento riqˈuin laje̱b xcaˈcˈa̱l (430) chihab mokon incˈaˈ naxsach xcuanquil li contrato li ac xakabanbil xcuanquil, chi moco tixcanab ta chi ma̱cˈaˈ rajbal li yechiˈinbil re laj Abraham xban li Dios.

3:18  Cui ta naru xcˈulbal li colba-ib riqˈuin xba̱nunquil li naxye li chakˈrab, ma̱cˈaˈ raj rajbal li quiyechiˈi̱c re laj Abraham xban li Dios. Abanan li cˈaˈru quixyechiˈi li Dios re laj Abraham, aˈan yal chi ma̱tan quixqˈue.

3:19  ¿Cˈaˈru aj e nak quiqˈueheˈ li chakˈrab? Aˈan quiqˈueheˈ re nak tixcˈut chiruheb li tenamit nak aˈaneb aj kˈetol chakˈrab. Ut li chakˈrab aˈan quicuan xcuanquil toj quicˈulun li Jesucristo li quiyoˈla saˈ xya̱nkeb li ralal xcˈajol laj Abraham, li yechiˈinbil xban li Dios. Eb li ángel queˈcˈanjelac chiru li Dios nak queˈxye li chakˈrab re laj Moisés; ut laj Moisés, aˈan li quiyehoc re chiruheb li tenamit.

3:20  Abanan ma̱ ani quijaloc a̱tin nak li Dios quixyechiˈi li ma̱tan re laj Abraham. Aˈ li Dios, aˈan li quiba̱nun re.

3:21  ¿Ma aˈin ta biˈ naraj naxye nak li chakˈrab naxsach xcuanquil li cˈaˈru quixyechiˈi li Dios? ¡Ma̱ jokˈe! Cui ta naru ta̱cua̱nk li kayuˈam chi junelic riqˈuin xba̱nunquil li naxye li chakˈrab, ta̱ti̱cokˈ aj raj cuiˈ li kachˈo̱l chiru li Dios xban li chakˈrab.

3:22  Li Santil Hu naxye nak chixjunil li ruchichˈochˈ cuan rubel xcuanquil li ma̱c re nak chixjunileb li teˈpa̱ba̱nk re li Ka̱cuaˈ Jesucristo teˈxcˈul ajcuiˈ li colba-ib li quiyechiˈi̱c xban li Dios.

3:23  Nak toj ma̱jiˈ nacˈulun li Jesucristo saˈ ruchichˈochˈ, toj cuanco rubel xcuanquil li chakˈrab. Chanchan cuanco chi pre̱xil. Yo̱co chiroybeninquil nak li Dios tixtakla chak li Jesucristo li yechiˈinbil xban, re nak riqˈuin xpa̱banquil aˈan tocolekˈ.

3:24  Joˈcan nak li chakˈrab, aˈan nacˈutuc xya̱lal chiku ut aˈan nacˈamoc ke riqˈuin li Cristo re nak ti̱cobresinbilak kachˈo̱l riqˈuin xpa̱banquil li Cristo.

3:25  Anakcuan ut ac xcuulac xkˈehil xpa̱banquil li Jesucristo. Joˈcan nak ma̱cˈaˈ chic xcuanquil li najter chakˈrab saˈ kabe̱n.

3:26  Anakcuan la̱ex chic ralal xcˈajol li Dios che̱junilex xban nak xepa̱b li Jesucristo.

3:27  La̱ex xecˈul li cubi haˈ ut rehex chic li Cristo. Jalbil chic le̱ yuˈam ut cha̱bil chic le̱ naˈleb saˈ xcˈabaˈ li Jesucristo.

3:28  Anakcuan ut moco jalan ta chic laj griego chiruheb laj judío, chi moco jalan ta li mo̱s chiru li patrón, chi moco jalan ta li cui̱nk, chi moco jalan ta li ixk. Junaj ban chic ku saˈ xcˈabaˈ li Jesucristo.

3:29  Cui la̱ex rehex chic li Cristo, la̱ex ajcuiˈ ralal xcˈajol laj Abraham ut la̱ex te̱re̱chani ajcuiˈ li cˈaˈru quiyechiˈi̱c re laj Abraham xban li Dios.

Chapter 4

4:1  Li nacuaj xyebal e̱re aˈan aˈin: nak toj caˈchˈin, li ta̱e̱chani̱nk re li jun cablal chanchan junak mo̱s. Ma̱cˈaˈ naru naxchˈeˈ xban nak ma̱jiˈ natzˈakloc xchihab usta aˈan laj e̱chal re chixjunil.

4:2  Toj cuan rubel xcuanquil li na-iloc re ut li nataklan re toj ta̱tzˈaklok ru lix chihab joˈ quixye lix yucuaˈ.

4:3  Joˈcan ajcuiˈ la̱o. Junxil chanchano cocˈal. Cocuan rubel xcuanquil li najter naˈleb nak toj ma̱jiˈ nakanau bar cuan li ya̱l.

4:4  Abanan nak quicuulac xkˈehil, li Dios quixtakla li Ralal chi yoˈla̱c saˈ ruchichˈochˈ riqˈuin jun li ixk. Ut quicuan ajcuiˈ rubel xcuanquil li najter chakˈrab.

4:5  Li Dios quixtakla li Ralal re nak aˈan ta̱colok reheb li cuanqueb rubel xcuanquil li chakˈrab. Quixba̱nu aˈin re nak la̱o naru to-oc chokˈ ralal xcˈajol.

4:6  Re xcˈutbal chiku nak la̱o chic ralal xcˈajol, li Dios quixtakla li Santil Musikˈej re nak ta̱cua̱nk kiqˈuin. Ut xban nak cuan li Santil Musikˈej kiqˈuin, joˈcan nak naru nakaye re li Dios, “at inYucuaˈ.”

4:7  Joˈcan ut anakcuan ma̱cuaˈex chic lokˈbil mo̱s. La̱ex ban chic ralal li Dios. Ut xban nak la̱ex chic ralal li Dios, te̱re̱chani ajcuiˈ li yechiˈinbil reheb li ralal xcˈajol xban nak joˈcan quiraj li Dios.

4:8  Nak toj ma̱jiˈ nequepa̱b chak li Dios, quelokˈoniheb li ma̱cuaˈeb tzˈakal dios ut quexcˈanjelac chak chiruheb.

4:9  Anakcuan ac xexpa̱ban ut rehex chic li Dios. ¿Cˈaˈut nak te̱raj cuiˈchic sukˈi̱c chi cˈanjelac saˈ le̱ najteril naˈleb li ma̱cˈaˈ na-oc cuiˈ? Ut ¿cˈaˈut nak te̱raj cuiˈchic xqˈuebal e̱rib rubel xcuanquil li najter chakˈrab?

4:10  La̱ex yo̱quex cuiˈchic chixba̱nunquil le̱ najteril naˈleb nak nequeninkˈei eb li cutan, li po ut li chihab ut li cˈaˈak chic re ru chi ninkˈehil.

4:11  Nachal incˈaˈux e̱ban. Ma̱re yal ma̱cˈaˈ rajbal nak xincˈanjelac saˈ e̱ya̱nk.

4:12  Ex inherma̱n, usta la̱in aj judío, xcuisi cuib rubel xcuanquil li chakˈrab. Nintzˈa̱ma che̱ru nak te̱ba̱nu joˈ xinba̱nu la̱in. Me̱qˈue chic e̱rib rubel xcuanquil li chakˈrab. La̱ex ma̱cˈaˈ junak raylal xeba̱nu cue.

4:13  La̱ex nequenau nak xban nak quinyajer, quincana Galacia. Joˈcan nak quiru quinye resil li evangelio e̱re xbe̱n cua.

4:14  La̱in ninnau nak chˈaˈaj raj chokˈ e̱re cuilbal saˈ lin yajel. Abanan incˈaˈ xine̱tzˈekta̱na ut incˈaˈ xicˈ quine̱ril. Xine̱ril ban joˈ junak x-ángel li Dios ut xine̱cˈul joˈ nak xecˈul raj li Jesucristo.

4:15  ¿Bar cuan lix sahil saˈ le̱ chˈo̱l querecˈa nak quincuan e̱riqˈuin junxil? Li Dios naxnau nak cui ta quiru xba̱nunquil, querisi raj xnakˈ le̱ ru ut queqˈue raj cue.

4:16  ¿Ma xicˈ chic niquine̱ril anakcuan yal xban nak xinye e̱re li xya̱lal chi joˈcanan?

4:17  Chanchan kˈaxal nequera eb laj balakˈ. Abanan ma̱cuaˈ usilal li teˈraj e̱riqˈuin. E̱balakˈinquil ban li teˈraj. Eb aˈan teˈraj nak te̱risi e̱rib cuiqˈuin re nak eb aˈan chic li te̱ta̱ke.

4:18  Us cui teˈraj e̱tenkˈanquil cui chi anchal xchˈo̱leb teˈxba̱nu. Abanan tento teˈxba̱nu chi junelic ut ma̱cuaˈ caˈaj cuiˈ nak cuanquin e̱riqˈuin.

4:19  Ex inherma̱n, chanchanex incocˈal nak nequexcuil. Cˈajoˈ nak nayotˈeˈ inchˈo̱l saˈ e̱cˈabaˈ la̱ex. Chanchan li raylal li naxcˈul li ixk li cua̱nc re xcˈulaˈal. Cˈajoˈ narahoˈ inchˈo̱l nak toj ma̱jiˈ nequekˈaxtesi e̱rib chi tzˈakal rubel rok rukˈ li Cristo.

4:20  Nacuaj ta ac cuanquin e̱riqˈuin anakcuan re nak tinnau chanru tina̱tinak e̱riqˈuin. Cˈajoˈ incˈaˈux che̱rix xban nak incˈaˈ ninnau chanru cuanquex.

4:21  La̱ex li toj te̱raj cua̱nc rubel xcuanquil li najter chakˈrab, ¿cˈaˈut nak incˈaˈ nequeqˈue retal li cˈaˈru naxye?

4:22  Tzˈi̱banbil retalil nak laj Abraham quicuan cuib li ralal, jun riqˈuin li lokˈbil mo̱s ut li jun chic riqˈuin li tzˈakal rixakil. (Gn. 21:2-9)

4:23  Ut li ralal laj Abraham li quicuan riqˈuin li lokˈbil mo̱s, aˈan moco yechiˈinbil ta xban li Dios. Quiyoˈla joˈ nequeˈyoˈla chixjunileb saˈ ruchichˈochˈ. Abanan li ralal li quiyoˈla riqˈuin li tzˈakal rixakil, aˈan quiyoˈla xban nak yechiˈinbil reheb xban li Dios.

4:24  Cuan xya̱lal nak quixcˈul chi joˈcaˈin laj Abraham. Aˈan aˈin lix ya̱lal: Li cuib chi ixk, aˈaneb retalil li cuib chi contrato li quixba̱nu li Dios riqˈuineb laj Abraham ut laj Moisés. Lix Agar, li lokˈbil mo̱s, aˈan retalil li contrato quixba̱nu li Dios saˈ li tzu̱l Sinaí. Ut li toj cuanqueb rubel xcuanquil li najter chakˈrab chanchaneb li lokˈbil mo̱s joˈ li ralal xcˈajol lix Agar.

4:25  Lix Agar, aˈan retalil li tzu̱l Sinaí li cuan Arabia. Aˈan ajcuiˈ retalil li tenamit Jerusalén. Ut eb laj Jerusalén chanchaneb li lokˈbil mo̱s nak cuanqueb, xban nak toj cuanqueb rubel xcuanquil li najter chakˈrab.

4:26  Abanan lix Sara, aˈan retalil li Jerusalén li cuan saˈ choxa. Ut la̱o ralal xcˈajol aˈan.

4:27  Joˈcaˈin tzˈi̱banbil saˈ li Santil Hu: Chisahokˈ taxak saˈ a̱chˈo̱l, at ixk, li incˈaˈ nacatqˈuiresin. Jap a̱cue xban xsahil a̱chˈo̱l la̱at li incˈaˈ a̱cuecˈahom xrahil li ala̱nc, la̱at li tzˈekta̱nanbilat xban la̱ be̱lom. Chisahokˈ taxak saˈ a̱chˈo̱l xban nak kˈaxal nabal cuiˈchic la̱ cualal a̱cˈajol ta̱cua̱nk chiruheb li ralal xcˈajol li lokˈbil mo̱s. (Is. 54:1)

4:28  Ex inherma̱n, la̱o joˈ laj Isaac. La̱o chic ralal xcˈajol li Dios xban li cˈaˈru quiyechiˈi̱c re laj Abraham xban li Dios.

4:29  Najter li alalbej li quiyoˈla riqˈuin li mo̱s, aˈan quirahobtesin re li alalbej li quiyoˈla xban xcuanquil li Santil Musikˈej. Ut chalen anakcuan joˈcan ajcuiˈ nacˈulman.

4:30  Aban, ¿cˈaˈru naxye saˈ li Santil Hu? Naxye chi joˈcaˈin: Isi li lokˈbil mo̱s rochben lix yum xban nak li alalbej aˈan incˈaˈ naru natzˈak lix jun cablal li yucuaˈbej. Aˈ ban li alalbej li quiyoˈla riqˈuin li tzˈakal ixakilbej, aˈan li ta̱e̱chani̱nk re. (Gn. 21:10)

4:31  Joˈcan ut, ex inherma̱n, la̱o ma̱cuaˈo ralal xcˈajol li lokˈbil mo̱s. La̱o ban ralal xcˈajol li tzˈakal ixakilbej.

Chapter 5

5:1  Ma̱cuaˈo chic joˈ li lokˈbil mo̱s xban nak moco cuanco ta chic rubel xcuanquil li najter chakˈrab. Libre ban chic cuanco xban nak li Cristo quicoloc ke chiru xcuanquil li najter chakˈrab. Chexcua̱nk ut chi cau e̱chˈo̱l saˈ le̱ pa̱ba̱l ut me̱qˈue chic e̱rib rubel xcuanquil li chakˈrab.

5:2  La̱in laj Pablo. Qˈuehomak retal li yo̱quin chixyebal e̱re. Cui toj nequecˈul li circuncisión re nak ta̱ti̱cobresi̱k e̱chˈo̱l, aˈan naraj naxye nak ma̱cˈaˈ na-oc cuiˈ che̱ru li Cristo.

5:3  Jun sut chic ninchˈolob li xya̱lal che̱ru. Li ani naxcˈul li circuncisión re nak ta̱ti̱cobresi̱k xchˈo̱l, tento nak tixba̱nu chixjunil li naxye saˈ li najter chakˈrab.

5:4  La̱ex li nequeraj xti̱cobresinquil e̱chˈo̱l chiru li Dios riqˈuin xba̱nunquil li naxye saˈ li chakˈrab, nequerisi e̱rib riqˈuin li Cristo ut nequerisi ajcuiˈ e̱rib riqˈuin li rusilal li Dios.

5:5  Abanan la̱o yo̱co chiroybeninquil lix ti̱cobresinquil kachˈo̱l chiru li Dios riqˈuin xpa̱banquil li Cristo xban nak joˈcan quicˈutbesi̱c chiku xban li Santil Musikˈej.

5:6  Cui la̱o reho chic li Jesucristo, ma̱cˈaˈ naxye cui takacˈul li circuncisión malaj ut incˈaˈ. Li kˈaxal tento xba̱nunquil, aˈan xpa̱banquil li Jesucristo. Ut cui ya̱l nak nakapa̱b li Cristo, ta̱cˈutu̱nk li kapa̱ba̱l xban nak nocorahoc.

5:7  Us nak quetiquib chak pa̱ba̱nc junxil. ¿Ani xtacchiˈin e̱re nak incˈaˈ chic yo̱quex chixpa̱banquil li ya̱l?

5:8  Li tacchiˈ aˈan incˈaˈ nachal riqˈuin li Dios li quisicˈoc e̱ru.

5:9  Usta yal caˈchˈin li levadura li nachˈamobresin naqˈueman, aˈan naxchˈamobresi chixjunil li kˈem.

5:10  La̱in cau inchˈo̱l saˈ xcˈabaˈ li Ka̱cuaˈ Jesucristo nak la̱ex moco jalan ta le̱ cˈaˈux chiru lin cˈaˈux la̱in. Li ani yo̱ chi poˈoc ru le̱ pa̱ba̱l tixcˈul xtojbal xma̱c aˈ yal ani.

5:11  Cui ta toj yo̱quin chixjulticanquil nak tento xcˈulbal li circuncisión incˈaˈ raj chic tineˈxrahobtesi. Cui ta toj yo̱quin chixba̱nunquil aˈan, yo̱quin raj risinquil xcuanquil xcamic li Cristo chiru li cruz ut incˈaˈ raj chic teˈjoskˈok saˈ inbe̱n.

5:12  Li ani yo̱queb chi poˈoc ru le̱ pa̱ba̱l ut yo̱queb chixyebal nak tento xcˈulbal li circuncisión, us raj cui teˈxcˈul eb aˈan ut teˈxset raj ribeb chi junaj cua re nak teˈxcanab chˈiˈchˈiˈi̱nc saˈ e̱ya̱nk.

5:13  Ex inherma̱n, la̱ex sicˈbil e̱ru re nak libre chic cua̱nkex. Abanan moco xban ta nak libre chic cuanquex nak tex-oc chixba̱nunquil li naxrahi ru le̱ chˈo̱l. Chera ban e̱rib ut chetenkˈa e̱rib chi ribil e̱rib.

5:14  Chixjunil li chakˈrab natauman ru riqˈuin xba̱nunquil li jun aˈin: Chara la̱ cuas a̱cui̱tzˈin joˈ nak nacara a̱cuib la̱at. (Lv. 19:18)

5:15  Ut cui yo̱quex chixjoskˈinquil e̱rib ut yo̱quex chixrahobtesinquil e̱rib, chexcˈoxlak caˈchˈinak. Ma̱re anchal te̱poˈ ru le̱ pa̱ba̱l chi ribil e̱rib.

5:16  Li nacuaj xyebal e̱re, aˈan aˈin: Checanabak e̱rib rubel xcuanquil li Santil Musikˈej re nak aˈan ta̱beresi̱nk e̱re. Cui te̱ba̱nu aˈan, incˈaˈ chic te̱ba̱nu li incˈaˈ us li nequerahi ru xba̱nunquil.

5:17  Li cˈaˈru incˈaˈ us li nakarahi ru xba̱nunquil kajunes, aˈan xicˈ na-ileˈ xban li Santil Musikˈej. Ut li cˈaˈru us li naxrahi chokˈ ke li Santil Musikˈej, aˈan incˈaˈ naxcˈam rib riqˈuin li nakaj xba̱nunquil kajunes. Xicˈ nequeˈril rib chi ribil rib ut xban aˈan incˈaˈ nakaba̱nu li us li nakaj raj xba̱nunquil.

5:18  Ut cui la̱ex beresinbilex xban li Santil Musikˈej, moco cuanquex ta chic rubel xcuanquil li najter chakˈrab.

5:19  Cutan saken cˈaˈru li incˈaˈ us li naka-rahi ru xba̱nunquil kajunes. Aˈan eb aˈin: muxuc caxa̱r, coˈbe̱tac yumbe̱tac, ut li xuta̱nalil naˈleb,

5:20  lokˈoni̱nc yi̱banbil dios, tu̱lac, xi̱qˈuil u̱chi̱nc, pletic, cakali̱nc, joskˈi̱nc, yoˈoba̱nc ra xi̱cˈ, cuechˈij ib, poˈoc ru pa̱ba̱l,

5:21  socue̱nc, camsi̱nc ras ri̱tzˈin, cala̱c, num cuaˈac num ucˈac, ut cˈaˈak chic re ru joˈ eb aˈin. Yo̱quin cuiˈchic xyebal e̱re aˈin, usta ac inyehom ajcuiˈ e̱re, nak li nequeˈba̱nun re li cˈaˈak re ru aˈin incˈaˈ teˈre̱chani lix nimajcual cuanquilal li Dios.

5:22  Abanan li cˈaˈru naxqˈue li Santil Musikˈej saˈ li kayuˈam, aˈan li rahoc, sahil chˈo̱lejil, tuktu̱quil usilal, cuyuc, cha̱bilal, usilal, ti̱quil chˈo̱lej,

5:23  tu̱lanil ut cuyuc ib. Ma̱cˈaˈ junak chakˈrab naxye nak incˈaˈ us xba̱nunquil aˈin.

5:24  Li ani re chic li Jesucristo, chanchan nak quiqˈueheˈ chiru cruz lix najter naˈleb xban nak ac xcanab xba̱nunquil chi junaj cua li najter naˈleb li quixrahi ru xba̱nunquil junxil.

5:25  Cui acˈ chic li kayuˈam qˈuebil ke xban li Santil Musikˈej, chikacanabak kib rubel xcuanquil re nak aˈan chic ta̱beresi̱nk ke.

5:26  Mikaba̱nu kib nak kˈaxal nim kacuanquil ut incˈaˈ chic chikajoskˈi kib ut incˈaˈ chic chikacakali kib.

Chapter 6

6:1  Ex inherma̱n, ma̱re cuan junak e̱rech aj pa̱banelil ta̱oc cuiˈchic chi ma̱cobc. La̱ex li cuanquex chic rubel xcuanquil li Santil Musikˈej te̱tenkˈa saˈ tu̱lanil re nak ta̱cacuu̱k xchˈo̱l saˈ xpa̱ba̱l. Ut cheqˈuehak retal chi us le̱ yuˈam re nak la̱ex incˈaˈ tex-a̱le̱k.

6:2  Chetenkˈahak e̱rib chi ribil e̱rib chixnumsinquil li chˈaˈajquilal nachal saˈ e̱be̱n. Chi joˈcan yo̱kex chixba̱nunquil li cˈaˈru taklanbilex cuiˈ xban li Jesucristo.

6:3  Li ani naxcˈoxla nak nim xcuanquil xjunes rib, li jun aˈan yo̱ chixbalakˈinquil rib xjunes.

6:4  Li junju̱nk chixqˈuehak retal li cˈaˈru naxba̱nu. Cui us li naxba̱nu, chisahokˈ xchˈo̱l riqˈuin li cˈaˈru naxba̱nu ut incˈaˈ ta̱cˈoxlak chirix li naxba̱nu li jun chic.

6:5  Tenebanbil saˈ xbe̱n li junju̱nk rilbal chanru lix yuˈam.

6:6  Li ani yo̱ chixtzolbal li ra̱tin li Dios, tento ajcuiˈ nak tixtenkˈa li ani yo̱ chi tzoloc re.

6:7  Me̱balakˈi e̱rib. Li Dios incˈaˈ naru xbalakˈinquil. Li cˈaˈru narau li junju̱nk, aˈan ajcuiˈ li tixkˈol.

6:8  Joˈcan ajcuiˈ saˈ li kayuˈam. Li ani naxba̱nu li incˈaˈ us li naxrahi ru xba̱nunquil xjunes rib, li jun aˈan ta̱sachk. Abanan li ani naxba̱nu li cˈaˈru naraj li Santil Musikˈej, li jun aˈan ta̱cua̱nk xyuˈam chi junelic.

6:9  Joˈcan nak mextitzˈ chixba̱nunquil li us. Cui incˈaˈ nachˈinan kachˈo̱l nak ta̱cuulak xkˈehil la̱o take̱chani li kakˈajca̱munquil.

6:10  Joˈcan ut chikaba̱nuhak usilal reheb chixjunileb li kas ki̱tzˈin nak toj naru xba̱nunquil, ut kˈaxal cuiˈchic takaba̱nu reheb li kech aj pa̱banelil.

6:11  Anakcuan riqˈuin cuukˈ yo̱quin chi tzˈi̱bac e̱riqˈuin. Ilomak xni̱nkal li letra li yo̱quin chixtzˈi̱banquil re nak te̱nau nak la̱in xintzˈi̱ban re.

6:12  Eb li nequeˈraj xminbal e̱ru xcˈulbal li circuncisión yo̱queb chixba̱nunquil aˈan re xnimobresinquil ribeb. Yo̱queb chixba̱nunquil aˈan xban nak incˈaˈ nequeˈraj teˈrahobtesi̱k saˈ xcˈabaˈ xcamic li Jesucristo chiru li cruz.

6:13  Ma̱ jun reheb li nequeˈcˈuluc re li circuncisión nequeˈxba̱nu ta chi tzˈakal li naxye saˈ li najter chakˈrab. Abanan eb aˈan teˈraj nak la̱ex te̱cˈul li circuncisión ut nequeˈxmin e̱ru chixcˈulbal. Cui te̱ba̱nu li cˈaˈru nequeˈxye, teˈxnimobresi ribeb xban nak teˈxcˈoxla nak cuan xcuanquileb saˈ e̱be̱n.

6:14  Aˈut la̱in ma̱ jokˈe tinnimobresi cuib injunes. Li cˈaˈru ninnimobresi xcuanquil la̱in, aˈan lix camic li Ka̱cuaˈ Jesucristo chiru li cruz. Saˈ xcˈabaˈ lix camic li Cristo, camenak chic lix naˈleb li ruchichˈochˈ chicuu, ut chanchan nak camenakin la̱in chiru li ruchichˈochˈ.

6:15  Usta takacˈul li circuncisión, usta incˈaˈ, ma̱cˈaˈ chic na-oc cuiˈ chiku xban nak reho chic li Jesucristo. Li kˈaxal lokˈ aˈan li acˈ yuˈam li naxqˈue ke li Dios.

6:16  Aˈ taxak li tuktu̱quilal ut li uxta̱na̱nc u chicua̱nk e̱riqˈuin la̱ex li nequexpa̱ban re li xya̱lal li yo̱quin chixyebal. La̱ex li tzˈakal ralal xcˈajol li Dios.

6:17  Ut chirix chixjunil aˈin ma̱ ani ta chic chichˈiˈchˈiˈi̱nk cue xban nak cuan retalil chicuix li rahobtesi̱c li quincˈul saˈ xcˈabaˈ li Ka̱cuaˈ Jesús.

6:18  Ex inherma̱n, aˈ taxak li rusilal li Ka̱cuaˈ Jesucristo chicua̱nk e̱riqˈuin che̱junilex. Joˈcan taxak.