Ndebele - Lamentations

Chapter 1

1:1  Yeka ukuhlala kodwa komuzi owawugcwele abantu! Usunjengomfelokazi owawumkhulu phakathi kwezizwe, owawuyinkosikazi phakathi kwezabelo usuyisibhalwa!

1:2  Uyakhala lokukhala inyembezi ebusuku, lezinyembezi zawo zisezihlathini zawo. Kawulamduduzi phakathi kwazo zonke izithandwa zawo. Bonke abangane bawo bawuphethe ngenkohliso, sebeyizitha zawo.

1:3  UJuda useye ekuthunjweni ngenxa yokuhlupheka langenxa yobukhulu bobugqili; yena uhlala phakathi kwabezizwe, katholi ukuphumula; bonke abamzingelayo bamfica ephakathi kwezimbandezelo.

1:4  Indlela zeZiyoni ziyalila, ngoba kungekho ozayo emkhosini omisiweyo; wonke amasango ayo angamanxiwa; abapristi bayo bayabubula, izintombi zayo ezimsulwa zidabukile, layo isekubabeni.

1:5  Abamelani bayo sebeyinhloko, izitha zayo zonwabile; ngoba iNkosi iyidabulile ngenxa yobunengi beziphambeko zayo; abantwana bayo sebeye ekuthunjweni phambi kwesitha.

1:6  Labo bonke ubuhle bayo busukile kundodakazi yeZiyoni. Iziphathamandla zayo zinjengezindluzele ezingatholi idlelo, njalo ziyahamba zingelamandla phambi komzingeli.

1:7  Ezinsukwini zenhlupheko yayo lokuzulazula kwayo iJerusalema yakhumbula zonke izinto zayo eziloyisekayo okwakukhona kusukela ezinsukwini zasendulo, lapho abantu bayo bawela esandleni sesitha, njalo ingelamsizi; izitha zayibona, zahleka usulu amasabatha ayo.

1:8  IJerusalema yonile kakhulu, ngakho-ke isingcolile; bonke ababeyihlonipha bayidelela, ngoba sebebonile ubuze bayo; yona isibubula, ibuyele emuva.

1:9  Ukungcola kwayo kwakusemiphethweni yezigqoko zayo; kayikhumbulanga ukucina kwayo; ngakho yehla ngokumangalisayo, yayingelamduduzi. Nkosi, bona inhlupheko yami, ngoba isitha sizikhulisile.

1:10  Isitha selule isandla saso phezu kwazo zonke izinto zayo eziloyisekayo; ngoba ibonile izizwe zingena endaweni yayo engcwele, owazilaya ukuthi zingangeni phakathi kwebandla lakho.

1:11  Bonke abantu bayo bayabubula, bedinga isinkwa; banike izinto zabo eziloyisekayo ngokudla ukuthi bavuselele umphefumulo. Bona, Nkosi, ukhangele, ngoba ngiyadelelwa.

1:12  Kakusilutho kini yini lonke elidlulayo ngendlela? Khangelani libone uba kukhona yini usizi njengosizi lwami, olwenziwe kimi, iNkosi engidabule ngalo osukwini lokuvutha kolaka lwayo.

1:13  Iphezulu, ithumele umlilo emathanjeni ami, wawehlula; ithiyele unyawo lwami imbule, ingibuyisele emuva; ingenze ngaba lunxiwa, ngaphela amandla usuku lonke.

1:14  Ijokwe leziphambeko zami libotshwe ngesandla sayo; zelukiwe, zenyukele entanyeni yami, iwisile amandla ami; iNkosi inginikele ezandleni zabo, ngingelakho ukuvuka.

1:15  INkosi yeyisile wonke amaqhawe ami phakathi kwami; yabiza umhlangano omelene lami ukuchoboza amajaha ami; iNkosi inyathelele intombi emsulwa, indodakazi yakoJuda, isikhamelo sewayini.

1:16  Ngenxa yalezizinto ngiyakhala inyembezi; ilihlo lami, ilihlo lami lehlisa amanzi, ngoba umduduzi obengavuselela umphefumulo wami ukhatshana lami; abantwana bami bachithakele ngoba isitha sinqobile.

1:17  IZiyoni iyelula izandla zayo, kakho oyiduduzayo. INkosi ilayile ngoJakobe ukuthi abamzingelezeleyo babe yizitha zakhe. IJerusalema injengowesifazana ongcolileyo phakathi kwabo.

1:18  INkosi ilungile, ngoba ngivukele umlomo wayo. Ake lizwe, bantu lonke, libone usizi lwami. Intombi zami ezimsulwa lamajaha ami baye ekuthunjweni.

1:19  Ngabiza izithandwa zami, kodwa zona zangikhohlisa. Abapristi bami labadala bami baphefumula okokucina emzini, besazidingela ukudla ukuze bavuselele umphefumulo wabo.

1:20  Bona, Nkosi, ngoba ngilusizi; imibilini yami idungekile, inhliziyo yami iphendukile phakathi kwami, ngoba ngaba lenkani kakhulu. Ngaphandle inkemba iyemuka abantwana, endlini kunjengokufa.

1:21  Bezwile ukuthi mina ngiyabubula; kangilamduduzi; zonke izitha zami zizwile ngobubi bami; ziyathokoza ngoba wena ukwenzile. Uzalufikisa usuku osulumemezile, khona zizakuba njengami.

1:22  Kabufike bonke ububi bazo phambi kwakho, wenze kizo njengalokhu wenzile kimi ngenxa yazo zonke iziphambeko zami; ngoba ukububula kwami kunengi, lenhliziyo yami iphela amandla.

Chapter 2

2:1  INkosi iyigubuzele kangakanani indodakazi yeZiyoni ngeyezi entukuthelweni yayo, yaphosa ubuhle bukaIsrayeli busuka emazulwini busiya emhlabeni; njalo kayisikhumbulanga isenabelo senyawo zayo ngosuku lwentukuthelo yayo!

2:2  INkosi iginyile zonke indawo zokuhlala zikaJakobe, ingahawukeli; ekuthukutheleni kwayo idilizile izinqaba zendodakazi yakoJuda, yazisa emhlabathini; yangcolisa umbuso leziphathamandla zawo.

2:3  Iqumile ngokuvutha kolaka lwayo lonke uphondo lwakoIsrayeli; yabuyisela emuva isandla sayo sokunene phambi kwesitha; yatshisa imelene loJakobe njengomlilo welangabi oqothula inhlangothi zonke.

2:4  Igobisile idandili layo njengesitha; yema ngesandla sayo njengesitha; yabulala zonke izinto eziloyisekayo zamehlo ethenteni lendodakazi yeZiyoni; yathulula ulaka lwayo njengomlilo.

2:5  INkosi yaba njengesitha; yaginya uIsrayeli, yaginya zonke izigodlo zakhe, yachitha inqaba zakhe; yandisa ukulila lesililo kundodakazi yakoJuda.

2:6  Ithethe ngodlakela idumba layo njengesivande; yachitha indawo yakhe yokuhlanganyela; uJehova wenza ukuthi kukhohlakale eZiyoni umkhosi omisiweyo lesabatha; wadelela inkosi lompristi ngokuvutha kolaka lwakhe.

2:7  INkosi ilahlile ilathi layo; yadelela indawo yayo engcwele; yanikela esandleni sesitha imiduli yezigodlo zayo. Zakhupha umsindo endlini yeNkosi njengosukwini lomkhosi omisiweyo.

2:8  INkosi yacabanga ukuchitha umduli wendodakazi yeZiyoni; yelulile intambo yokulinganisa; kayibuyisanga isandla sayo ekuginyeni; ngakho yenza ukuthi kulile umthangala lomduli, kanyekanye kuphele amandla.

2:9  Amasango ayo atshonile emhlabathini; yabhubhisa yephula imigoqo yayo; inkosi yayo leziphathamandla zayo ziphakathi kwabezizwe; kakulamthetho; labaprofethi bayo kabatholi umbono uvela eNkosini.

2:10  Abadala bendodakazi yeZiyoni bahlezi emhlabathini, bathule, bathele uthuli ekhanda labo, babhince amasaka; izintombi zeJerusalema zikhothamisele emhlabathini amakhanda azo.

2:11  Amehlo ami ayaphela ngezinyembezi, imibilini yami idungekile, isibindi sami sithululelwe emhlabathini, ngenxa yokwephuka kwendodakazi yabantu bami; ngoba umntwana lomunyayo bayadangala ezitaladeni zomuzi.

2:12  Bathi kubonina: Angaphi amabele lewayini? lapho bedangala njengabagwaziweyo ezitaladeni zomuzi, lapho umphefumulo wabo uzithululela esifubeni sabonina.

2:13  Ngingakufakazelani? Kuyini engingakufananisa lawe, wena ndodakazi yeJerusalema? Kuyini engingakulinganisa lawe, ukuze ngikududuze, ntombi emsulwa ndodakazi yeZiyoni? Ngoba ukwephuka kwakho kukhulu njengolwandle; ngubani ongakwelapha?

2:14  Abaprofethi bakho bakubonele okuyize lokungafanelanga, kabakuvezanga ukona kwakho, ukuze babuyise ukuthunjwa kwakho, kodwa bakubonele imithwalo yamanga lezinkohliso.

2:15  Bonke abedlulayo ngendlela batshaya izandla ngawe, bancife, banikine ikhanda labo ngendodakazi yeJerusalema, besithi: Yiwo lo umuzi yini abathi ngawo uyikuphelela kobuhle, intokozo yomhlaba wonke?

2:16  Zonke izitha zakho zikukhamisele umlomo wazo, ziyancifa, zigedle amazinyo, zithi: Siwuginyile; isibili lolu lusuku ebesilulindele, sesilutholile, silubonile.

2:17  INkosi yenzile ebikucebile, igcwalisile ilizwi layo eyalilaya kusukela ensukwini zendulo; idilizile, kayihawukelanga; yenzile ukuthi isitha sithokoze phezu kwakho; yaphakamisa uphondo lwabamelene lawe.

2:18  Inhliziyo yabo yakhala eNkosini: Wena mthangala wendodakazi yeZiyoni, inyembezi kazehle njengomfula imini lobusuku; ungaziphi ukuphumula, inhlamvu yelihlo lakho ingapheli!

2:19  Sukuma, unqongoloze ebusuku ekuqaleni kwemilindo, uthulule inhliziyo yakho njengamanzi phambi kobuso beNkosi; uphakamise izandla zakho kuyo ngenxa yempilo yabantwana bakho abancinyane, abaphela amandla ngenxa yendlala ekuqaleni kwaso sonke isitalada.

2:20  Bona, Nkosi, ukhangele ukuthi wenze njalo kubani. Abesifazana bazakudla isithelo sabo yini, abantwana abancinyane ababasingathileyo? Umpristi lomprofethi bazabulawa endaweni engcwele yeNkosi yini?

2:21  Abatsha labadala balele emhlabathini ezitaladeni; intombi zami ezimsulwa lamajaha ami bawile ngenkemba; ubabulele osukwini lolaka lwakho, ujuqile kawuhawukelanga.

2:22  Wabiza njengosukwini olumisiweyo izesabiso zami inhlangothi zonke, ukuze ngosuku lolaka lweNkosi kakho ophunyukileyo loseleyo; labo engabasingathayo ngabakhulisa isitha sami sabaqeda.

Chapter 3

3:1  Ngiyindodaebone inhlupheko ngentonga yolaka lwayo.

3:2  Ingikhokhele yangihambisa emnyameni kodwa hatshi ekukhanyeni.

3:3  Isibili iphenduke yamelana lami; iphendule isandla sayo imelene lami usuku lonke.

3:4  Igugisile inyama yami lesikhumba sami; yephulile amathambo ami.

3:5  Yakhile imelene lami, yangihanqa ngenyongo lobunzima.

3:6  Ingihlalise endaweni ezimnyama, njengabafa endulo.

3:7  Ingibiyele ukuze ngingaphumi, yenza iketane lami lethusi laba nzima.

3:8  Njalo nxa ngikhala ngimemeza, ivalela phandle umkhuleko wami.

3:9  Ibiyele indlela yami ngamatshe abaziweyo, yenza izindlela zami zagoba.

3:10  Yaba kimi njengebhere elicathemeyo, isilwane ezindaweni zensitha.

3:11  Iphambule izindlela zami, yangidabudabula, yangenza unxiwa.

3:12  Igobisile idandili layo, yangimisa njengento yokunenjwa ngomtshoko.

3:13  Yenze amadodana esamba semitshoko yayo angena ezinsweni zami.

3:14  Ngaba yinhlekisa kibo bonke abantu bakithi, ingoma yabo usuku lonke.

3:15  Ingisuthise ngezinto ezibabayo, yanginathisa umhlonyane.

3:16  Njalo ichoboze amazinyo ami ngokhethe, yangigiga emlotheni.

3:17  Njalo wena walahla umphefumulo wami khatshana lokuthula; ngikhohlwe okuhle.

3:18  Ngakho ngithi: Kubhubhile amandla ami lethemba lami eNkosini.

3:19  Khumbula inhlupheko yami lokuzulazula kwami, umhlonyane lenyongo.

3:20  Umphefumulo wami uhlala ukukhumbula, njalo ukhotheme phakathi kwami.

3:21  Lokhu ngiyakubuyisela enhliziyweni yami, ngakho-ke ngiyathemba.

3:22  Kuyizihawu zeNkosi ukuthi kasiqedwanga, ngoba izisa zakhe kazipheli;

3:23  zintsha ikuseni yonke; lukhulu uthembeko lwayo.

3:24  INkosi iyisabelo sami, kutsho umphefumulo wami; ngakho-ke ngizathemba kiyo.

3:25  INkosi ilungile kwabayilindelayo, kumphefumulo oyidingayo.

3:26  Kuhle ukuthi umuntu athembe, njalo ngokuthula kusindiso lweNkosi.

3:27  Kuhle emuntwini ukuthi athwale ijogwe ebutsheni bakhe.

3:28  Kahlale yedwa, athule, ngoba isimethese lona.

3:29  Kabeke umlomo wakhe othulini; mhlawumbe kungaba khona ithemba.

3:30  Kanikele isihlathi sakhe komtshayayo; asuthe inhlamba.

3:31  Ngoba iNkosi kayiyikulahla kuze kube phakade.

3:32  Ngoba lanxa idabukisile, kanti izakuba lesihawu ngobunengi bezisa zayo.

3:33  Ngoba kayihluphi ngenhliziyo yayo idabukise abantwana babantu;

3:34  ukuchoboza ngaphansi kwenyawo zayo zonke izibotshwa zomhlaba;

3:35  ukuphambukisa ilungelo lomuntu phambi kobuso boPhezukonke;

3:36  ukuphambanisa umuntu kudaba lwakhe, iNkosi kayikuboni yini?

3:37  Ngubani ongakukhuluma, njalo kwenzeke, nxa iNkosi ingakulayanga?

3:38  Kakuphumi ububi lokuhle emlonyeni woPhezukonke yini?

3:39  Ngakho usolelani umuntu ophilayo, umuntu ngezono zakhe?

3:40  Asihlole silinge izindlela zethu, sibuyele eNkosini.

3:41  Asiphakamisele inhliziyo lezandla zethu kuNkulunkulu emazulwini.

3:42  Thina siphambukile, saba lenkani; wena kawuthethelelanga.

3:43  Wembese ngolaka, waxotshana lathi, wabulala, kawuhawukelanga.

3:44  Uzembese ngeyezi, ukuze kungedluli umkhuleko.

3:45  Usenze saba yimfucuza lezibi phakathi kwezizwe.

3:46  Zonke izitha zethu zivule umlomo wazo zimelene lathi.

3:47  Ukwesaba lomgodi kukhona phambi kwethu, incithakalo lokwephuka.

3:48  Ilihlo lami lehlisa imifula yamanzi ngokuchitheka kwendodakazi yabantu bami.

3:49  Ilihlo lami liyajuluka, kaliyekeli, kungelakuma,

3:50  ize ikhangele phansi ibone iNkosi isezulwini.

3:51  Ilihlo lami lenza umphefumulo wami ube buhlungu ngenxa yawo wonke amadodakazi omuzi wakithi.

3:52  Izitha zami zingizingele kabuhlungu njengenyoni, kungelasizatho.

3:53  Bayiqumile impilo yami emgodini, baphosa ilitshe phezu kwami.

3:54  Amanzi ageleza phezu kwekhanda lami; ngathi: Ngiqunyiwe.

3:55  Ngabiza ibizo lakho, Nkosi, ngisemgodini phansi;

3:56  wezwa ilizwi lami; ungafihli indlebe yakho ekuphefumuleni kwami, ekukhaleleni kwami usizo.

3:57  Wasondela ngosuku lapho ngikubiza, wathi: Ungesabi.

3:58  Nkosi, uzimele izindaba zomphefumulo wami, wahlenga impilo yami.

3:59  Nkosi, ubonile ukoniwa kwami; yahlulela udaba lwami.

3:60  Ubonile yonke impindiselo yabo, wonke amacebo abo amelene lami.

3:61  Uzwile inhlamba yabo, Nkosi, wonke amacebo abo amelene lami,

3:62  indebe zabangivukelayo, lokuzindla kwabo kumelene lami lonke usuku.

3:63  Khangela ukuhlala kwabo, lokusukuma kwabo; ngiyingoma yabo.

3:64  Buyisela kibo impindiselo, Nkosi, njengokomsebenzi wezandla zabo.

3:65  Banike ubulukhuni benhliziyo, isiqalekiso sakho kibo.

3:66  Xotshana labo ngolaka, ubabhubhise bangabi ngaphansi kwamazulu eNkosi.

Chapter 4

4:1  Yeka ukufiphala kwegolide, ukuphenduka kwegolide elihle kakhulu! Amatshe endawo engcwele achithiwe ekuqaleni kwazo zonke izitalada.

4:2  Amadodana aligugu eZiyoni, alinganiswa legolide elihle, yeka ukuthiwa kwawo ayizitsha zebumba, umsebenzi wezandla zombumbi!

4:3  Ngitsho amakhanka ehlisa ibele, amunyise imidlwane yawo; kodwa indodakazi yabantu bami isilesihluku, njengezintshe enkangala.

4:4  Ulimi lomunyayo lunamathela olwangeni lwakhe ngenxa yokoma; abantwanyana bacela isinkwa, kakho obahlephulelayo.

4:5  Ababesidla izibiliboco baphundlekile ezitaladeni; abondliwa ngeziyibubende bagona inqumbi zomquba.

4:6  Ngoba icala lendodakazi yabantu bami likhulu kulesono seSodoma, eyachithwa kwangathi ngomzuzwana, kungelazandla ezayonayo.

4:7  AmaNazari ayo ayehlambulukile kuleliqhwa elikhithikileyo, emhlophe kulochago, ebomvana ngomzimba kulamakorali*, isimo sawo sasingesesafire*.

4:8  Ukubonakala kwawo sekumnyama kulomsizi, kawaziwa ezitaladeni; isikhumba sawo sinamathele emathanjeni awo, somile, saba njengogodo.

4:9  Ababulawa ngenkemba bangcono kulababulawa yindlala; ngoba laba bayacikizeka behlatshwa yikuswela izithelo zensimu.

4:10  Izandla zabesifazana abalesihawu zapheka abantwana babo; baba yikudla kwabo ekwephukeni kwendodakazi yabantu bami.

4:11  INkosi iphelelisile intukuthelo yayo, ithululile ukuvutha kolaka lwayo, yaphemba umlilo eZiyoni oqothule izisekelo zayo.

4:12  Amakhosi omhlaba labo bonke abakhileyo bomhlaba babengayikukholwa ukuthi umcindezeli lesitha babengangena emasangweni eJerusalema.

4:13  Kwakungenxa yezono zabaprofethi bayo leziphambeko zabapristi bayo, abachitha igazi labalungileyo phakathi kwayo.

4:14  Bazula njengeziphofu ezitaladeni, bangcoliswa ngegazi, kangangokuthi abantu kabangelakuthinta izembatho zabo.

4:15  Bamemeza kubo bathi: Sukani, kungcolile, sukani, sukani, lingathinti! Lapho bebaleka njalo bezula, bathi phakathi kwabezizwe: Kabasayikuhlala njengabezizwe.

4:16  Ubuso beNkosi bubahlakazile, kayisayikubananza; kabahloniphanga ubuso babapristi, kababanga lomusa kubadala.

4:17  Thina, amehlo ethu asaphela kusizo lwethu oluyize; ekulindeleni kwethu salindela isizwe esingelakusisindisa.

4:18  Bazingela izinyathelo zethu ukuze singahambi ezitaladeni zethu; isiphetho sethu sisondele, insuku zethu zigcwalisekile, ngoba isiphetho sethu sesifikile.

4:19  Abasizingelayo balejubane kulamanqe amazulu; baxotshana lathi ngokutshiseka ezintabeni; basicathamela enkangala.

4:20  Umoya wamakhala ethu, ogcotshiweyo weNkosi, wabanjwa emigodini yabo, esathi ngaye: Ngaphansi komthunzi wakhe sizaphila phakathi kwezizwe.

4:21  Jabula uthokoze, ndodakazi yeEdoma, ohlala elizweni leUzi; inkezo izadlulela lakuwe, uzadakwa, uzinqunule.

4:22  Ububi bakho buphelile, ndodakazi yeZiyoni; kasayikukuthumba; uzahambela ububi bakho, ndodakazi yeEdoma; uzakwembula izono zakho.

Chapter 5

5:1  Khumbula, Nkosi, ukuthi kwenzakaleni kithi; khangela, ubone ihlazo lethu.

5:2  Ilifa lethu seliphendulelwe kwabezizwe, izindlu zethu kwabemzini.

5:3  Siyizintandane, kungelababa; omama banjengabafelokazi.

5:4  Amanzi ethu siwanathile ngemali; inkuni zethu ziza ngentengo.

5:5  Sizingelwa ezintanyeni zethu, sidiniwe, kasilakuphumula.

5:6  Sinike isandla sethu kwabeGibhithe, labeAsiriya, ukuze sisuthiswe ngesinkwa.

5:7  Obaba bona, kabasekho, njalo thina sithwele iziphambeko zabo.

5:8  Izigqili ziyasibusa, kakho ongasihluthuna esandleni sazo.

5:9  Sizuza isinkwa sethu ngengozi yempilo yethu, ngenxa yenkemba yenkangala.

5:10  Ijwabu lethu limnyama njengeziko ngenxa yokutshisa okukhulu kwendlala.

5:11  Badlova abesifazana eZiyoni, izintombi ezimsulwa emizini yakoJuda.

5:12  Iziphathamandla zaphanyekwa ngesandla sazo; ubuso babadala kabuhlonitshwanga.

5:13  Amajaha athwala amatshe okuchola, labafana bakhubeka ngaphansi kwenkuni.

5:14  Abadala baphelile esangweni, amajaha ekuhlabeleleni.

5:15  Intokozo yenhliziyo yethu iphelile, ukugida kwethu kwaphenduka ukulila.

5:16  Umqhele wekhanda lethu uwile; hawu, maye kithi, ngoba sonile!

5:17  Ngenxa yalokhu inhliziyo yethu iphela amandla; ngenxa yalezizinto amehlo ethu afiphele.

5:18  Ngenxa yentaba yeZiyoni elunxiwa, amakhanka ahamba phezu kwayo.

5:19  Wena, Nkosi, uhlezi kuze kube nininini, isihlalo sakho sobukhosi sisuka esizukulwaneni sisiya esizukulwaneni.

5:20  Usikhohlweleni njalonjalo, usidela okobude bezinsuku?

5:21  Siphendulele kuwe, Nkosi, sizaphenduka; yenza insuku zethu zibe zintsha njengasendulo.

5:22  Kodwa ususilahlile isibili; usithukuthelele kakhulukazi.