Azeri - Lamentations

Chapter 1

1:1  بئر زامان ائنسانلارلا دولو اولان اورشَلئم شهري، نجه ده تک-تنها اوتوروب. ائندي او دول بئر آرواد کئمي اولوب- وئلايتلر آراسيندا بئر زامان اوجا ساييلان، اِللر آراسيندا شاهزاده اولان، بو شهر، نؤکرچئلئک ادئر.

1:2  گجه‌لر آجي-آجي آغلار، گؤز ياشلاري ائله ياناغي ائسلانار، بوتون معشوقلارينين آراسيندان اونا تسلّی ورن يوخدور. بوتون دوستلاري اونا خيانت ادئب، دوشمن اولوب.

1:3  يهودا ذئلّت آلتيندا، قوللوق آلتيندا، اسئرلئيه آپاريليب؛ او، مئلّتلر آراسيندا ياشايير، آمّا اورادا راحاتليق تاپماييب، بو ائضطئراب آراسيندا، اونو تعقئب ادنلرئن هاميسي اونا چاتيبلار.

1:4  صحيونا گدن يوللار ياس توتور، چونکي بايراملارينا گلن يوخدور، بوتون دروازالاري کئمسه‌سئز قاليب؛ کاهئنلري آه چکئر، قيزلاري ذلئل اولوب، او اؤزو ده آجي‌دير،

1:5  دوشمنلري اونون اوستونه آغا اولوب، کامياب ياشاييرلار؛ تقصئرلرئنئن چوخلوغونا گؤره رب اونلاري بو ظولمه ساليب، دوشمنلرئنئن گؤزلري قاباغيندا اؤولادلاري اسئر آپاريليب.

1:6  صحيون قيزينين بوتون جاه-جلالي يوخ اولوب؛ اونلارين باشچيلاري اوتلاقسيز مارال کئمي اولوبلار، تعقئب ادنلرئن قاباغيندان طاقَتسئز قاچيبلار.

1:7  اورشَلئم سيخينتي ائچئنده آوارا گَزَرکَن، کچن گونلرده اولان بوتون ثروتئني خاطيرلايير، خالقي دوشمنلرئنئن اَلئنه دوشَن واخت، کؤمه‌يئنه چاتان اولمادي. دوشمنلري اونا باخديلار، ييخيلماغينا گولدولر.

1:8  اورشَلئم بؤيوک گوناه ائشلَتدي، اونا گؤره ده نجئس بئر شي اولوب. اونا حؤرمت ادنلرئن هر بئري ائندي اونا خور باخير، چونکي اونو چيلپاق گؤروبلر، او دا ائنله‌يئب، اوزونو يانا چِوئرئر.

1:9  نجئسلئيي اَته‌يئنده ائدي، گله‌جيئني دوشونمه‌دي، اونا گؤره ده قورخولو شکئلده ييخيليب، اونا تسلّی ورن يوخدور. يارب، گؤر بو ذئلّه‌تئمي، چونکي دوشمن اؤزونو بؤيودوب.

1:10  دوشمن اونون بوتون ثروتي اوستونه اَلئني اوزاديب، چونکي گؤروب کي، مئلّتلر اونون مَقدَسئنه سوخولوبلار؛ او مئلّتلر کي، اونلارين گئرمه‌سئني جاماعاتينين آراسينا قدغن اتمئشدئن.

1:11  بوتون خالقي زاري‌يير، چؤرک آختارير، جانلارينا قووّت آلماق اوچون ثروتلرئنئن عوضئنه آذوقه آليرلار. "يارب، ائندي باخ، حاليمي گؤر، نجه ذلئل اولموشام."

1:12  ای بوتون يولدان کچنلر، بو ائش سئزئن اوچون مگر هِچدئر؟ باخين دردئمه، بونون کئمئسي مگر وار؟ منئم باشيما گتئرئلَن درد باشقاسيندا مگر اولار؟ رب قضبدن آلوولاناندا بو دردي باشيما تؤکدو.

1:13  يوخاريدان اود گؤندردي، سوموکلرئمه‌جک بو اودو يِرئتدي. آياقلاريم اوچون تور قوروب، منی گری قايتاريب. منی تک-تنها بوراخيب، بوتون گون طاقتدن ساليب.

1:14  پروردئگار تقصئرلرئمي منه يوغ ادئب، اَلي ائله بئربئرئنه هؤروب، اونلاري بوينوما کچئرديب، طاقتئمي جانيمدان آليب. منی قاباغيندا دورا بئلمه‌دئيئم ائنسانلارا تسلئم ادئب.

1:15  پروردئگار ائچئمده اولان ائگئدلرئن هاميسيني هِچه ساييب. منئم ضئدّئمه بئر زامان تعيئن ادئب کي، سِچمه ائگئدلرئمي قيريب تاپدالاسين. باکئره يهودا قيزيني اوزوم‌سيخاندا اَزئب.

1:16  بونلار اوچون آغلاييرام، گؤزلرئمدن ياش آخير. تسلّی ورن مندن اوزاقدير، جا‌نيمي تزه‌له‌يَن مندن اوزاقدير. اؤولادلاريم يالقيز قاليب، چونکي دوشمن ظفر تاپيب.

1:17  صحيون اَللرئني اوزادير؛ آمّا اونا تسلّی ورن يوخدور. رب يعقوب نسلئنئن ضئدّئنه بو امرئني ورئب: "قوي اطرافيندا اولانلاري، اونون دوشمنی اولسونلار، چونکي اورشَلئم اونلارين آراسيندا نجئس اَسکئيه چِورئلئب."

1:18  رب حاقلي‌دير؛ چونکي من اونون امرئنه عوصيان اتمئشم، ای بوتون خالقلار، قولاق آسين! منئم چکدئيئم بو درده باخين، باکئره قيزلاريم، جاوان اوغلانلاريم اسئرلئيه گدئب.

1:19  سِوگئلی‌لرئمي چاغيرديم، لاکئن منی آلداتديلار؛ کاهئنلرئم، آغساقّال‌لاريم جانا گلمک اوچون يمک آختارارکَن، شهرئن ائچئنده هلاک اولدولار.

1:20  يارب، باخ، دارا دوشموشم، جانيم عذابدان يانير. چوخ عاصئلئک اتمئشم، بونا گؤره ده اوره‌يئم اوزولور. باييردا قيلينج اؤلدورور، اِو ائچئنده اؤلوم ياشايير.

1:21  نجه ناله چکدئيئمي اشئدئبلر، آمّا منه تسلّی ورن يوخدور، باشيما گلن بو بلادان بوتون دوشمنلرئمئن خبري وار، سنئن بونو اتدئيئنه سِوئنئرلر، کاشکي اعلان اتدئيئن گون گلسَيدي کي، اونلار دا منئم وضعئيّتئمه دوشه‌لر.

1:22  قوي اونلارين اتدئکلري بوتون پئسلئکلر سنئن حوضورونا قالخسين؛ تقصئرلرئمه گؤره منه اتدئيئني، اونلارا دا ات. چونکي ناله‌لرئم چوخدور، اوره‌يئم طاقتدن دوشوب.

Chapter 2

2:1  پروردئگار صحيون قيزينا قضبلَنَرکَن نجه اونو هر طرفدن قارا بولود آليب! ائسرايئلئن شؤوکتئني گؤيدن يِره چيرپيپ، قضبلَندئيي گون کَتئلئني يادا سالماييب.

2:2  پروردئگار آمان ورمه‌دن يعقوب نسلئنئن بوتون مسکنلرئني اودوب، قضبئنده يهودا قيزينين قالالاريني ييخيب، اونلاري يِرله بئر ادئب، مملکتي، باشچيلاريني آلچالديب.

2:3  حئدّتلي قضبئنده ائسرايئلئن بوتون قووّه‌سئني کؤکوندن کَسئب، دوشمن قاباغيندا اونون اوستوندن صاغ اَلئني گؤتوروب. اِله بئل کي، يعقوب نسلئنئن آراسيندا، اؤد کئمي هر ياني يانديريب ياخير.

2:4  دوشمن کئمي کامانينين ياييني چکئب، خصم کئمي صاغ اَلئني قالديريب، بوتون گؤزه خوش گؤرونَنلري اؤلدوروب؛ قضبئني صحيون قيزينين چاديرينا آلوو کئمي تؤکوب.

2:5  پروردئگار دوشمن کئمي اولوب. ائسرايئلي اودوب؛ بوتون سارايلاريني اودوب، قالالاريني وئران قويوب، يهودا قيزينين ماتمئني، فغانيني داها دا آرتيريب.

2:6  چارداغيني وئرانه باغلار کئمي قيريب تؤکوب، گؤروش يِرلرئني خاراباليغا چِوئرئب، رب صحيونا تعيئن اتدئيي بايرام و سَبّت گونلرئني يادلاردان چيخارتديريب، قضبئنئن آلوووندا پادشاه و کاهئني تحقئر ادئب.

2:7  پروردئگار قوربانگاهيني ردّ ادئب، موقدّس مکانيني ترک ادئب. سارايلارينين دووارلاريني دوشمن اَلئنه تسلئم ادئب، اونلار بايرام گونونده اولدوغو کئمي، ربّئن معبدئنده هاراي چکئبلر.

2:8  رب نئيّت اتدي کي، صحيون قيزينين دوواريني داغيتسين. اؤلچو ائپئني اوزاديب، داغيتماق اوچون اوندان اَل چکمه‌يئب. قالا دوواريني، سدّئني، ماتمه بورويوب، ائکئسي بئرلئکده سولورلار.

2:9  اونون دروازالاري يِره باتيب، چفته‌لرئني قيريب آتيب، پادشاهي، باشچيلاري ياد مئلّتلرئن آراسينداديرلار، شرئعته عمل ادئلمئر، پيغمبرلرئنه ربدن آرتيق رؤيا گلمئر.

2:10  صحيون قيزينين آغساقّاللاري يِره اوتوروبلار، دئنمئرلر، باشلارينا توز-تورپاق تؤکوبلر؛ اؤزلرئني چولا بورويوبلر، اورشَلئمئن باکئره قيزلاري باشلاريني يِره دئکئب.

2:11  آغلاماقدان گؤزلرئمئن نورو گِدئر، جانيم عذابدان يانير؛ عزئز خالقيمين قيريلديغينا گؤره اوره‌يئمدن قان آخير. او زامان کي، شهر ميدانلاريندا کؤرپه‌لرله اوشاقلار باييليرلار.

2:12  شهر ميدانلاريندا يارالي‌لار کئمي هوشدان گِدَرکَن، آنا قوجاغيندا جان وِرَرکَن، آنالاريندان سوروشورلار: "هاني چؤرک، هاني شراب؟"

2:13  ای اورشَلئم قيزي، سنه نه دِيئم؟ سني کئمئنله موقايئسه اِدئم؟ ای باکئره صحيون قيزي، سني کئمه بَنزه‌دئم کي، بونونلا من سنه تسلّی وره بئلئم؟ چونکي ياران دهنز قدر درئندئر، سنه کئم شفا وره بئلر؟

2:14  پيغمبرلرئن سنئن اوچون يالان و معناسيز رؤيالار گؤروبلر؛ خوشبختلئيئني سنه قايتارماق اوچون تقصئرلرئني اوزه چيخارتماييبلار، آمّا سني آزديرماق اوچون، سنه يالاندان رؤيالار گؤروبلر.

2:15  يولدان کِچَن بوتون ائنسانلار اَل چاليب سني مسخره ادئرلر، باشلاريني يِلله‌يئرلر. اورشَلئم قيزينا ديئرلر: "بوتون دونيانين گؤزل‌لئک و شادليق تمثئلي اولان شهر مگر بودور؟"

2:16  بوتون دوشمنلرئن سني مسخره ادئرلر؛ فئته باسيرلار، دئش قيجيرديرلار، ديئرلر "اونو اودموشوق، گؤزله‌دئيئمئز گون يقئن کي، بو گوندور؛ اونا چاتميشيق، اونو گؤرموشوک."

2:17  رب اؤز ائراده‌سئني يرئنه يتئرئب، قدئم زامانلاردا امر اتدئيي سؤزو حياتا کچئردئب. سني آمان ورمه‌دن وئران قويوب، دوشمنلرئني سنئن حالينا سِوئندئرئب، خصملرئنئن گوجونو آرتيريب.

2:18  خالقين اورَکلري پروردئگارا فرياد اتدي، ای صحيون قيزينين دوواري! قوي گجه-گوندوز سنئن گؤزلرئندن سل کئمي ياش آخسين، دئنجَلمه، آچ گؤزلرئني، يومولماسين.

2:19  قالخ، گجه‌نئن قارانليغيندا فرياد ات، گجه نؤوبه‌لري باشلايارکن پروردئگارين حوضوروندا قلبئني سولار کئمي آچيب تؤک. اَللرئني اونا آچ، اؤولادلارينين صاغ قالماسيني ائسته، اونلار هر تئنئن باشيندا آجيندان هوشدان گدئرلر.

2:20  يارب، ائندي باخ، خالقينين حاليني گؤر! کئمئنله بله رفتار ادئبسن؟ آنالار اوشاقلاريني، عزئز بالالاريني مگر يِسئنلر؟ کاهئنلر، پيغمبرلر پروردئگارين موقدّس مکانيندا مگر اؤلدورولسونلر؟

2:21  جاوانلار، قوجالار توز-تورپاقدا، کوچه‌لرده ياتيرلار. باکئره قيزلاريم، ائگئدلرئم قيلينجدان کچئرئلئبلر. قضبلَندئيئن گون اونلاري هلاک ادئبسن، آمان ورمه‌دن قيريبسان.

2:22  قورخدوقلاريمي هر ياندان چاغيريبسان، اِله بئل، بايراما دعوت ادئبسن. ربّئن قضب گونونده قاچيب-قورتولان اولمادي، اونلارين آراسيندان صاغ قالان اولمادي، اونلاري کي، دوغوب بؤيوتموشدوم، اونلاري دوشمنئم هلاک اتدي.

Chapter 3

3:1  من او آدامام کي، تارينين قضب دَيَنه‌يئندن عذاب چکئرم.

3:2  او منی چکئب آپاريب، ائشيقدا يوخ، قارانليقدا گَزدئرئب.

3:3  دوغرودان دا بوتون گون، دفه‌لرله اَلئني اوستومه قالديريب.

3:4  اَتئمي، دَرئمي چورودوب، سوموکلرئمي سينديريب.

3:5  منی عذابلا، ذئلّتله ساري‌ييب، موحاصئره‌يه ساليب.

3:6  چوخدان اؤلوب-گِدنلر کئمي، منی ظولمتده ساکئن ادئب.

3:7  اطرافيمي هر طرفدن حاصارا آليب، اِله کي، قاچا بئلمئرم؛ منی آغير زنجئرلرله زنجئرله‌يئب.

3:8  حتّا فرياد ادئب ائمدادا چاغيرديغيم زامان، او، دوعامين قاباغيني سدّ ادئر.

3:9  يوللاريمي يونما داشلارلا کَسئب، طرئقلرئمي دولاشديريب.

3:10  منه آيي کئمي کمئن دوزه‌لدئر، گئزله‌نمئش آصلان کئمي‌دئر.

3:11  يوللاريمي آزديريب، منی پارچالاييب؛ چاره‌سئز حالا ساليب.

3:12  کامانينين ياييني چکدي، منی اوخو اوچون بئر هدف اتدي.

3:13  اوخدانين اوخلاريني بؤيره‌يئمه ساپلادي.

3:14  خالقيمين گولوش هدفئنه دؤنموشم، مضحکه‌لي نغمه ائله گون بويو منی اَله ساليرلار.

3:15  او، منی آجي‌لارلا دويوردوب، منه دويونجاق يووشان سويونو ائچئرتدئرئب.

3:16  دئشلرئمي چينقيللا قيريب، منی کول ائچئنه باسيب.

3:17  جانيمي سالاماتليقدان اوزاق ادئب، ياخشيليغي ياددان چيخارتديم.

3:18  بونا گؤره ديئرم: "قووّتئم گدئب، ربدن اومئدئم کَسئلئب."

3:19  عذابيمي، سرگَردانليغيمي، يووشاني و آجي‌لاري يادا سال.

3:20  دوغرودان کي، جانيم اونلاري خاطيرلايير، جانيم ائچئمده سيخيلير.

3:21  آمّا بونو خاطيرلاديقجا اومئدله‌نئرم؛

3:22  ربّئن مهرئبانليغي دوغرودان اصلا تؤکَنمَز، چونکي اونون شَفقَتئنه نهايت يوخ.

3:23  بونلار هر سحر تزه‌له‌نئر، سنئن وفادارليغين بؤيوکدور.

3:24  جانيم ديئر: "رب منئم نصئبئمدئر"، بو اوزدن اونا اومئد باغلاييرام.

3:25  رب اونا بِل باغلايانلارا، اونو آختارانلارا خيئرخاه‌دير.

3:26  ربّئن نئجاتيني سَس‌سئزجه گؤزله‌مَک نه ياخشي‌دير!

3:27  ياخشي اولار کي، ائنسان يوغونو جاوانليغيندا داشيسين.

3:28  قوي ساکئت اولوب تک باشينا اوتورسون، چونکي رب اونا يوک قويوب.

3:29  قوي آغزيني تورپاغا قويسون، بلکه حله اومئد وار.

3:30  قوي ائجازه ورسئن کي، ياناغينا وورسونلار، قوي ذلئلّئک ائچئنده بوغولسون.

3:31  چونکي پروردئگار ابدئلئک ردّ اتمز.

3:32  قم-قوصّه ورسه بِله، مهرئبانليغينين بوللوغونا گؤره شَفقَت گؤرسه‌در.

3:33  چونکي اورَکدن ائستيه‌رک بشر اؤولادلارينا عذاب ورمز، هچ کئمي کَدَرلَندئرمَز.

3:34  دونياداکي بوتون اسئرلرئن آياق آلتيندا اَزئلمه‌سي،

3:35  حاق-تاعالانين حوضوروندا ائنسانين اؤز حاقلاريندان محروم اولماسيني،

3:36  ائنسانين عدالتدن محروم اولماسيني پروردئگار مگر گؤرمَز؟

3:37  پروردئگار فرمان ورمه‌سه، کئمئن ددئيي حياتا کچر؟

3:38  مگر هم خيئر، هم ده شر، حاق-تاعالانين آغزيندان چيخماز؟

3:39  ائنسان، ياشايان ائنسان، نه اوچون گوناهينين جزاسيندان شئکايتله‌نئر؟

3:40  قوي يوللاريميزا دئقّتله باخاق، اونلاري ائمتاحان اِدَک، قوي ربّه تزه‌دن اوز توتاق.

3:41  گؤيلرده‌کي تارييا اَللرئمئزي، هم ده اورَکلرئمئزي آچيريق.

3:42  ديئرئک: "بئز تقصئرکاريق، عاصئلئک اتمئشئک، بونو بئزه باغيشلاماييبسان."

3:43  قضبه بورونوبسن، بئزي تعقئب ادئبسن؛ آمان ورمه‌دن بئزي اؤلدوروبسن.

3:44  اؤزونو بولودلا اؤرتوبسن، اِله کي، اونلارين آراسيندان هچ دوعا کچمه‌سئن.

3:45  خالقلار آراسيندا بئزي زئبئله، فضله‌يه چِوئرئبسن.

3:46  بوتون دوشمنلرئمئز بئزئم ضئدّئمئزه آغيزلاريني آچيبلار.

3:47  دهشت و چوخور، هلاکت و قيرغين باشيميزا گلئب.

3:48  قيريلان خالقيمين قيزي اوچون، گؤزلرئمدن سل کئمي ياش آخير.

3:49  دئنمه‌دن، دايانمادان گؤزلرئمدن ياش آخير،

3:50  او زاماناجاق کي، رب گؤيلردن آشاغي‌ باخسين، و اونلاري گؤرسون.

3:51  شهرئمده‌کي قيزلارين حاليني گؤردوکجه، اوره‌يئم سيزلايير.

3:52  دوشمنلرئم سببسئز منی قوش کئمي شئکار اتدئلر.

3:53  قويويا ساليب منی اؤلدورميه چاليشديلار، باشيمين اوستونو بئر داشلا اؤرتوبلر.

3:54  سولار باشيمدان آشدي، ددئم: "عؤمروم آخيرا چاتيب."

3:55  يارب، آديني او قويونون دئبئندن سَسله‌دئم.

3:56  سَسئمي اشئتدئن کي، باغيريرديم: "قولاغيني منئم ائستئغاثمه، ائمدادا چاغيران باغيرتيما باغلاما."

3:57  سني چاغيراندا يانيما گلدئن، منه "قورخما" ددئن.

3:58  ای پروردئگار، جانيمين داعواسيني سن ادئبسن؛ حياتيمي سن قورتاريبسان.

3:59  يارب، باشيما گتئردئکلري سئتمي گؤروبسن؛ بو ائش باره‌ده حؤکمونو ور.

3:60  منه باغلاديقلاري بوتون کئني، منئم ضئدّئمه قورولان بوتون فَندلري گؤروبسن.

3:61  يارب، منه اتدئکلري حقارتي، ضئدّئمه قوردوقلاري بوتون فَندلري اشئدئبسن.

3:62  ضئدّئمه اولانلارين دوداقلاري، اونلارين پيچيلتيلاري، بوتون گون منئم ضئدّئمه‌دئر.

3:63  اونلارين اوتوروشونا-دوروشونا باخ، اونلارا مضحکه نغمه‌سي اولموشام.

3:64  يارب، اونلارين اَللرئنئن عمل‌لرئنه گؤره عوضئني وره‌جکسن.

3:65  اونلارين قلبئني عئنادکار ات، لعنتئن اونلارين اوستونه اولاجاق.

3:66  قضبئنده اونلاري قوواجاقسان، اونلاري ربّئن گؤيونون آلتيندان محو اده‌جکسن.

Chapter 4

4:1  قيزيل نجه ده توتقونلاشيب، صاف قيزيل نجه پاريلتيدان دوشوب. موقدّس داشلار هر کوچه‌نئن باشينا تؤکولوب.

4:2  صحيون اؤولادلاري تَره‌زئيه قويولاندا صاف قيزيلدان قئيمتلي ائدي. ائندي آمّا نجه ساخسي قابلار کئمي ساييليرلار، کوزه‌گرئن اَل ائشئنه برابردئرلر.

4:3  چاقّاللار بِله، بالالارينا اَمجک ورئرلر، اونلاري اَمئزدئرئرلر. آمّا خالقيمين قيزي رحمسئز اولوب، صحرانين دَوه‌قوشلارينا اوخشايير.

4:4  سود اَمن کؤرپه‌نئن دئلي، سوسوزلوقدان داماغينا ياپيشير. اوشاقلار يمک ائسته‌يئرلر، لاکئن ورن يوخدور.

4:5  اونلار کي، لذئذ يمکلري يِيئردئلر، ائندي کوچه‌لرده بوراخيليبلار. اونلار کي، قيرميزي رنگلي پالتار گِيئب بؤيويَردئلر، ائندي زئبئل‌لئيه بورونورلر.

4:6  چونکي خالقيمين قيزينين تقصئري سودومون گوناهيندان داها بؤيوکدور، بو شهر اَل توخونمادان، بئر آندا يِرله بئر اولدو.

4:7  نذئره‌لري قاردان دا تمئز ائدئلر، سوددن ده آغ ائدئلر، ووجودلاري ياقوتدان دا قيرميزي ائدي، ظاهئرن لاجورد داشينا بَنزه‌يئردئلر.

4:8  ائندي آمّا اوزلري کؤمور کئمي قاراليب، کوچه‌لرده هچ بئرئني تانيماق اولمور، دَرئلري سوموکلرئنه ياپيشيب، سولوب، آغاج کئمي قورويوب.

4:9  بَختَوَر او آداملار کي، آجليق قورباني يوخ، قيلينج قورباني اولدولار. چونکي بونلار زَمئنئن محصولوندان محروم اولوبلار، جانلاري اَرئيئب گدئب.

4:10  حتّا لاپ قَلبي‌يومشاق آروادلار اؤز اَللري ائله بالالاريني پئشئرئردئلر. خالقيمين قيزينين قيريلماسي اوچون بالالاري اونلارا يمک اولدولار.

4:11  رب حئدّتئني بوشالديب، شئدّتلي قضبئني ياغديريب، صَحيوندا بئر آلوو آليشديريب کي، اونو پاياسيناجاق يانديريب ياخيب.

4:12  يِر اوزونون هچ بئر پادشاهي ائنانمازدي، دونيانين ساکئنلري ائنانمازدي کي، خصم و دوشمن اورشَلئمئن دروازالاريندان ائچه‌ري گئره بئلسئن.

4:13  پيغمبرلرئنئن گوناهي اوزوندن، کاهئنلرئنئن تقصئري اوزوندن بو، باش وردی، چونکي اونلار شهرئن اورتاسيندا صالحلرئن قانيني تؤکدولر.

4:14  کور کئمي کوچه‌لرده دولانيرديلار، قانلا نجئس ائدئلر، اِله کي، هچ کس اونلارين پالتارلارينا دَيه بئلمئردي.

4:15  اونلارا قيشقيريرديلار: "ای نجئسلر، ردّ اولون! ائتئلئن بورادان، بئزه دَيمه‌يئن، ردّ اولون!" اونلار قاچقين، سرگردان دولانارکن آيري مئلّتلر ددئلر: "بونلار بورادا آرتيق بئزئمله قالماسينلار!"

4:16  ربّئن حوضوري اونلاري پَرَن-پَرَن ساليب، اونلارا تزه‌دن نظر سالماياجاق؛ اونلار کاهئنلره حؤرمت اتمه‌دئلر، آغساقّال‌لارا لوطف گؤرسدمه‌دئلر.

4:17  آمّا گئنه ده بوش يِره کؤمک گؤزله‌مَکدن گؤزلرئمئز طاقتدن دوشدو، بئزي قورتارا بئلمه‌ين مئلّتي هِي گؤزله‌دئک، گلمه‌دي.

4:18  قدم به قدم آرخاميزدان تعقئب اتدئلر، اِله کي، کوچه‌لرده گَزه بئلمئرئک. آخيريميز چاتدي، گونلرئمئز بئتدي، عاقئبتئمئز آخيرا يِتدي.

4:19  بئزي تعقئب ادنلر گؤيلرده‌کي قارتاللاردان سورعتلي‌ ائدئلر؛ داغلاردا بئزي تعقئب اتدئلر، کمئن قوروب صحرادا بئزي گؤزله‌دئلر.

4:20  حيات نفسئمئز، ربّئن مسح اتدئيي اونلارين خندقلرئنده ياخالاندي، حال بوکي ديئردئک: "اونون کؤلگه‌سئنده مئلّتلرئن ائچئنده ياشاياجاغيق."

4:21  ای عوص اؤلکه‌سئنده ياشايان اِدوم قيزي، سِوئن، فَرَحلَن! سن ده بو کاسادان ائچه‌جکسن، مست اولوب، اؤزونو چيلپاق اده‌جکسن.

4:22  ای صحيون قيزي، تقصئرئنئن جزاسي آخيرا چاتيب، رب سني بئر داها اسئرلئيه گؤندرميه‌جک، لاکئن ای اِدوم قيزي، او، سنئن تقصئرئني جزاسينا چاتديراجاق، گوناهلاريني اوزه چيخارداجاق.

Chapter 5

5:1  يارب، باشيميزا گلني يادا سال بو خجالتئمئزي گؤر، بونا نظر سال.

5:2  ائرث تورپاغيميز ياد اِللی‌لرئن اَلئنه کچئب، اِولرئمئز اجنبي‌لره ورئلئب.

5:3  يِتئم قالميشيق، آتاسيز قالميشيق. آنالاريميز دول آروادلارا دؤنوب.

5:4  سويوموزو پوللا آليب ائچئرئک، پوللا اودون آلماغا مجبوروق.

5:5  بئزي قووالايانلار باشيميزدان باسيرلار، يورولموشوق، بئزه راحاتليق يوخدور.

5:6  دويونجا چؤرک يمک اوچون مئصئره، آشورا اَل آچميشيق.

5:7  آتالاريميز گوناه اتدئلر، لاکئن آرتيق يوخدورلار، تقصئرلرئنئن جزاسي بئزه يوکلَندي.

5:8  قوللار بئزه حؤکمران اولوب؛ بئزي اونلارين اَلئندن قورتاران يوخدور.

5:9  چؤلده‌کي قيلينجا گؤره، جانيميزين باهاسينا چؤرک قازانيريق.

5:10  آجليق بئزي يانديريب-ياخديغينا گؤره دَرئمئز قاراليب، کوره‌يه بَنزه‌يئر.

5:11  صَحيوندا آروادلارين، يهودا شهرلرئنده‌ باکئره قيزلارين عئصمتئنه توخوندولار.

5:12  باشچي‌لار اَللرئندن آسيليب، آغساقّاللار حؤرمتدن دوشوب.

5:13  جاوانلار اَل دَيئرمانيني چکدئلر، اوغلانلار اودون يوکلري آلتيندا هِل‌لَندئلر.

5:14  شهر دروازاسيندا آغساقّاللار اوتورمور، جاوانلار ساز چالماز اولوب.

5:15  اوره‌يئمئزدن شادليق چکئلئب؛ رقصلرئمئز ياسا چِورئلئب.

5:16  باشيميزين تاجي دوشوب، واي حاليميزا! چونکي گوناه اتمئشئک.

5:17  بونا گؤره اورَکلرئمئز طاقتدن دوشوب، گؤزلرئمئز قاراليب،

5:18  صحيون داغي اوچون کي، وئران قاليب، اوستونده چاقّاللار گَزئب دولانيرلار.

5:19  سن آمّا، يارب، ابده‌جک حؤکم سوره‌جکسن، سلطنت تختئن نسئل‌لر بؤيو سوره‌جک.

5:20  نئيه بئزي ابدئلئک اونودورسان؟ نئيه بئزي بو قدر اوزون ترک ادئرسن؟

5:21  بئزي اؤزونه قايتار، يارب، قاييداريق گونلرئمئزي اوّلکي کئمي تزه‌له!

5:22  مگر ائنکي بئزي حوضوروندان کامئل آتيبسان، بئزه حدسئز قضبلئسن.