Kapingamarangi - Lamentations

Chapter 1

1:1  E-haga-manawa-gee idimaa gu-deai digau i Jerusalem ai, di waahale dela nogo dogologo ono daangada i-mua! Henuailala hagatau nogo hagalaamua a-mee i-mua, dolomeenei guu-hai gadoo be-di ahina guu-made dono lodo. Di waahale dela koia e-aamua guu-hai di hege dolomeenei.

1:2  Mee e-dangidangi i-di boo hagatau, ono golomada e-halidangi gi-lala i-dono gili. Deai dono ehoo mai mua i-dono baahi ai belee haga-manawa-lamalia a-mee. Ono ihoo hagaaloho guu-buhi gu-hai-baahi gi-mee.

1:3  Digau Judah guu-hula gi-daha mo nadau gowaa donu, guu-noho i-lodo di haingadaa mo-di mouli hege. Digaula guu-noho i nnuai gowaa, gu-deai di gowaa e-mee di-haga-ingoo bolo di gowaa donu ni digaula ai. Nadau hagadaumee gu-daabui digaula, gu-deai di gowaa e-mee di-lellele hagammuni ginai ai.

1:4  Digau e-hula gi-di Hale Daumaha ai belee hai nadau daumaha i-nia laangi dabu. Nia dama-ahina ala nogo dadaahili i-mua la-guu-noho i-lodo nadau hagaduadua, gei-ogo digau hai-mee-dabu gu-tangitangi mo-di manawa-gee. Nia ngudu nia bontai o-di waahale nadau daangada ai, gei Zion guu-noho i-lodo di manawa hagammaemmae.

1:5  Ono hagadaumee gu-aali, gei mee guu-noho i-lala nadau mogobuna. Dimaadua gu-hagaduadua a-mee, idimaa mee guu-hai ana hala e-logo. Nia dama a-maa guu-kumi guu-lahi gi-daha.

1:6  Di madamada o Jerusalem gu-hagalee. Nia dagi o-maa guu-hai be nia ee ma-ga-hiigai ga-paagege. Nia mahi digaula gu-hagalee i-di madagoaa digaula e-llele gi-daha mo digau puu-manu.

1:7  Jerusalem gu-ongeonge dolomeenei, gu-hagalee madamada be di-maa i-mua, gei mee gu-langahia dono madamada dela i-mua dono kumi go ono hagadaumee, deai tangada e-hagamaamaa a-mee ai, ono hagadaumee gu-gadagada gi dono doo.

1:8  Dono hagalaamua gu-hagalee, gu-ono goloo ai, gu-haga-huaidu. Mee gu-manawa-gee, guu-pono ono golomada idimaa mee gu-langaadia. Jerusalem guu-bida haga-gulugulua ia gi-nia huaidu.

1:9  Ono gulugulua gu-modongoohia hagammaa, gei mee e-dehei-eia nia mee ala gaa-tale ang-gi-deia. Dono doo gi-lala e-huaidu, idimaa tangada e-haga-manawa lamalia a-mee ai. Ono hagadaumee gu-aali, gei mee gu-dangidangi gi Dimaadua gi-dumaalia ang-gi deia.

1:10  Ono hagadaumee gu-gaiaa ono goloo hagalabagau huogodoo. Mee gu-gidee-ia di-nadau ulu gi-lodo di Hale Daumaha, di gowaa dela guu-bule go Dimaadua bolo digau tuadimee gi-dee ulu gi-lodo.

1:11  Ana daangada gu-tangitangi mo-di manawa-gee i nadau madagoaa e-halahala nadau mee e-gai. Digaula gu-koodai nadau goloo hagalabagau gi-nia meegai bolo gi-mouli-ai ginaadou. Di waahale e-dangidangi boloo, “Meenei Dimaadua, mmada-mai gi-di-au, gi-gidee-Goe dogu haingadaa.”

1:12  Mee e-dangidangi gi digau ala e-hula laalaa i dono baahi boloo, “Mmada-mai gi-di-au, deai tangada guu-mmae be-di mmae deenei i-di au ai, go di mmae a Dimaadua ne-gaamai gi ogu nua i-di madagoaa o dono hagawelewele.

1:13  “Mee ne-hagau-eia dana ahi i-di langi, di ahi dela ne-dudu ogu lodo. Mee ne-gaamai dana hele i ogu mua gi-hinga au gi-hongo di gelegele, gei Mee gaa-hudu au gi-daha gi-lodo di mmae dee-odi.

1:14  “Mee gu-hagailongo ogu huaidu huogodoo, guu-nnoo gi-di gowaa e-dahi, gu-daudau gi dogu uwa, gei au gu-daamaha gu-hagalongo-gee. Dimaadua guu-wanga au gi ogu hagadaumee, dela ga-deemee-iei au di-duu-aga e-hai-baahi gi digaula.

1:15  “Dimaadua gu-gadagada gi agu gau-dauwa ala koia e-maaloo, gu-hagau ana gau-dauwa belee hagahuaidu agu dama-daane, gu-dagadagahi agu daangada be nia ‘grape’ i-di gowaa dagadagahi-waini.

1:16  “Deenei tadinga ogu golomada ala e-halidangi. Tangada e-haga-manawa lamalia au ai, tangada e-hai au gii-mahi ogu lodo ai. Ogu hagadaumee gu-aali i-di-au, gei ogu daangada nadau mee e-dubu ai.

1:17  “Au guu-holo ogu lima gi-daha, gei tangada e-hagamaamaa au ai. Dimaadua gu-gahigahi ogu hagadaumee gi-hai-baahi mai gi-di-au mai i-nia gowaa huogodoo. Digaula guu-hai au be di-mee gulugulua.

1:18  “Gei Dimaadua le e-donu, gei di-maa ko-au dela gu-de-hagalongo gi-Mee. Hagalongo-mai gi-di-au, goodou go nia henua huogodoo, mmada-mai gi dogu hagaduadua-nei. Agu dama-daane mo agu dama-ahina huogodoo gu-lawalawa, guu-lahi gi-daha.

1:19  “Au gu-gahigahi ogu ihoo, gei digaula hagalee hiihai e-hagamaamaa au. Digau hai-mee-dabu, mo nia dagi guu-mmade i-hongo nia ala o-di waahale i-di nadau halahala nadau meegai belee hagamouli ginaadou.

1:20  “Meenei Dimaadua, mmada-mai gi dogu mmae huoloo, au gu-huaidu ogu lodo! Ogu lodo gu-daamaha huoloo gi ogu huaidu. Taaligi dangada guu-hai i-hongo nia ala, di made hogi gu-i-golo i-lodo nia hale.

1:21  “Hagalongo-mai gi dogu lee manawa-gee, tangada e-haga-manawa lamalia au ai. Ogu hagadaumee gu-tenetene gi do gaamai di haingadaa deenei. Gaamai gi-di-au di laangi dela gu-hagababa Kooe, hagaduadua-ina ogu hagadaumee be dau hai dela nogo hai mai gi-di-au.

1:22  “Haga-huaidu-ina digaula idimaa digaula ala nogo haihai nia mee huaidu. Hagaduadua-ina digaula be dau hai nogo hagaduadua au i-ogu huaidu. Au gu-manawa-gee huoloo i-lodo ogu haingadaa, gei au guu-magi i-lodo dogu manawa.”

Chapter 2

2:1  I-lodo di hagawelewele o Dimaadua, gei Mee guu-gahu Zion gi-bouli dongoeho, gu-oho gi-daha dono madamada hagatau. I-di laangi o dono hagawelewele, gei Mee guu-hudu gi-daha dono Hale Daumaha.

2:2  Dimaadua gu-oho gi-daha nia dama waahale hagalligi huogodoo o Judah, gei guu-wweu gi-daha di abaaba o digau-dauwa ala nogo hagaloohi nia guongo aalaa, gu-hagatee tenua deelaa mo nadau dagi.

2:3  I-lodo dono hagawelewele, gei Mee gu-oho nia mahi o Israel. Mee guu-huli gi-daha mo gidaadou, e-de-hiihai e-hagamaamaa gidaadou i-di madagoaa tadau hagadaumee ne-dau i tadau baahi. Mee gu-hagawelewele huoloo mai gi gidaadou gadoo be-di ahi ma-gaa-dudu nia mee huogodoo.

2:4  Mee guu-hai gadoo be tadau hagadaumee ma-ga-lui-mai ana amu mai gi gidaadou, gei Mee gu-daaligi digau huogodoo ala nogo haga-tenetene mo e-haga-manawa lamalia gidaadou. Gidaadou gu-longono dono hagawelewele damana i Jerusalem nei.

2:5  Dimaadua gu-haga-huaidu Israel gadoo be dahi hagadaumee, gu-oho gi-daha nia gowaa hai-dauwa mo nia waahale o-nia king, guu-wanga gi Judah di manawa-gee dela dono hagaodi ai.

2:6  Mee gu-oho haga-ligiligi di Hale Daumaha, di gowaa nogo daumaha-ai gidaadou gi Mee, gei Mee gu-haga-lawa nia laangi hagamadagu mono Laangi-Sabad. Nia king mo digau hai-mee-dabu gu-longono-e-ginaadou nia mahi o dono hagawelewele.

2:7  Di Tagi guu-huli gi-daha mo dono gowaa hai tigidaumaha, gu-diiagi dono Hale Daumaha, gu-dumaalia gi-nia hagadaumee gi-ohaa nia abaaba. Digaula guu-wwolo gi-nua i-tadau gowaa nogo tenetene-ai, nogo haihai tadau daumaha i-mua.

2:8  Dimaadua guu-hai bolo di abaaba o Zion la-gi-mooho gi-lala. Mee gu-haganoho gii-donu nia mee ala belee haga-mooho hagatau. Nia angulaa madaloohi mono abaaba ala i-golo guu-tinga gi-hongo di gelegele, gu-mooho.

2:9  Nia ngudu di abaaba la-gu-i-hongo di gelegele, nia bontai baalanga la-gu-mooho dagidahi. Nia king mono gau aamua guu-hula gi-daha gi nnenua o digau tuadimee, tangada e-kuulu gi taganoho ai, gei nia soukohp e-kae nadau moe mai baahi o Dimaadua ai.

2:10  Nia daane mmaadua o Jerusalem guu-noho deemuu i-hongo di gelegele. Nia dogolia pigi gu-i-hongo nadau libogo, digaula guu-gahu gi-nia gahu manawa-gee. Nia dama-ahina guu-pala nadau libogo gi-hongo di gelegele.

2:11  Nia ngogo ogu golomada guu-mmae i-dogu dangidangi. Dogu hagataalunga gu-huaidu, gu-ogu mahi ai i-lodo dogu manawa-gee gi agu daangada ala gu-hagamooho. Nia dama mono dama lligi gu-bobouli nadau golomada i-hongo nia ala o-di waahale deelaa.

2:12  Digaula gu-hiigai gei gu-hieinu, e-tangitangi gi nadau dinana. Digaula guu-tinga gi-hongo nia ala, gadoo be digau gu-moholehole, gei gu-mmade-mai-loo maalia i-hongo nia lima o nadau dinana.

2:13  Go Jerusalem, dogu ihoo hagaaloho Jerusalem, au e-mee di-helekai bolo-aha? Dehee dagu hai e-mee di-haga-manawa lamalia goe? Tangada ne-hagaduadua beenei ai. O haingadaa e-damanaiee be-di moana, deai dahi mee e-mee di-hagadagadagagee ginai ai.

2:14  Au soukohp nadau mee e-helekai-adu gi-di-goe ai, nia kai tilikai hua. Nadau agoago gu-halahalau goe, i ginaadou digi hagamodongoohia-adu o huaidu, bolo goe gi-hudee hai bolo goe e-lui do manawa e-huli hoou.

2:15  Nia daangada ala e-hula taalinga di waahale e-dadaumada hagahuaidu goe, gu-lialiagi nadau libogo mo-di gadagada gi-di mooho Jerusalem, e-helekai boloo, “Ma deenei di waahale humalia? Deenei di waahale e-haga-tenetene henuailala?”

2:16  O hagadaumee huogodoo e-gadagada adu gi-di-goe mo-di haihai goe haga-huaidu. Digaula ga-huli-adu ga-haganneennee boloo, “Gimaadou gu-haga-mooho di-maa! Deenei di laangi nogo talitali go gimaadou!”

2:17  Dimaadua gu-haga-gila-aga ana mee ala ne-hiihai bolo e-hai. Mee gu-hagahuaidu gidaadou i dono hagalee dumaalia, be dana hai dela gu-hagi-mai gi gidaadou i-mua, gu-dumaalia gi tadau hagadaumee gi-aali i gidaadou gei gi-tenetene gi tadau tingatinga.

2:18  Jerusalem, dumaalia gi au abaaba gi-tangi gi-nua gi Tagi, heia oo dangi gi-malingi gadoo be-di monowai i-di boo mo-di aa. Hudee dugua au dangidangi i-di manawa-gee!

2:19  Goe gii-ala haga-logo i-di boo, gii-hai au dangidangi ang-gi Dimaadua. Goe gi-dangidangi hagamahi i-lala dono manawa dumaalia ang-gi au dama, go nia dama ala e-mmade i-hongo nia ala huogodoo i nadau hiigai!

2:20  Meenei Dimaadua, Goe e-aha dela e-hagaduadua gimaadou beenei? Nia ahina guu-gai nia huaidina o nadau dama ala nogo aloho ai! Digau hai-mee-dabu mo nia soukohp gu-daaligi gii-mmade i-lodo di Hale Daumaha.

2:21  Digau mmaadua mono gau ala e-lligi e-mmoe-mmoe i-hongo nia ala. Nia hulumanu dauwa o-nia hagadaumee gu-dadaaligi nia dama-daane mono dama-ahina. Goe gu-dadaaligi digaula i-lodo do hagawelewele hagalee manawa dumaalia.

2:22  Goe gu-gahi-mai ogu hagadaumee bolo gi-madagu au i-nia baahi huogodoo, e-hai gadoo be dau hai ma-gaa-gahi digaula gi tagamiami, hagalee tangada e-lele gi-daha mo do hagawelewele ai. Digaula gu-daaligi agu dama, ala nogo tomo-aga ge aloho-iei au labelaa.

Chapter 3

3:1  Ma ko-au dela e-iloo di hai o-di hagaduadua mai baahi o God.

3:2  Mee guu-hono au gi-lodo di bouli dongoeho,

3:3  gu-hagamamaawa au hagalee manawa-dumaalia.

3:4  Mee guu-huge ogu goneiga, gu-oho ogu iwi.

3:5  Mee guu-nnoo au gi-lodo di haingadaa mo-di haga-mmaemmae.

3:6  Mee guu-hono au gii-noho i-lodo di gowaa bouli dongoeho o-di made.

3:7  Mee guu-nnoo au gi-nia daula baalanga. Au gu-deai dogu hagadagadagagee ai bolo au e-mee di-dagaloaha.

3:8  Au gu-dangidangi-loo gi-nua i-di hagamaamaa, gei God hagalee hiihai e-hagalongo-mai.

3:9  Au e-hagadubedube i-dogu heehee, gu-duuli go nia abaaba hadugalaa i-nia gowaa huogodoo ala e-heehee-iei au, be e-hana ginai au.

3:10  Mee gu-talitali au gadoo be-di ‘bear’, guu-hobo gi ogu nua gadoo be-di laion.

3:11  Mee gu-hagabagi au gi-daha mo hongo di ala, gu-hahaahi ogu goloo, gu-diiagi au i-golo.

3:12  Mee gu-taiaga dana maalei, guu-lui hagahuudonu dana amu-maalei mai gi-di-au.

3:13  Mee guu-puu dana amu gu-ulu gi-lodo dogu huaidina.

3:14  Nia daangada gu-gadagada-mai gi-di-au i-lodo di laangi hagatau. Au guu-hai di mee hai dadaagala ni digaula.

3:15  Di haangai huaidu, mo-di haga-inu di hagammaemmae guu-hai mai gi-di-au.

3:16  Mee guu-hono ogu golomada gi-hongo di gelegele, guu-tugi ogu niha gi-nia hadugalaa.

3:17  Au gu-de-langahia-eau di mahi o dogu huaidina, di noho i-di aumaalia mo-di manawa lamalia.

3:18  Dogu mouli gu-haga-bodobodo-mai, dogu hagadagadagagee gi Dimaadua gu-hagalee.

3:19  Di hagamamaanadu dogu mmae, dogu ongeonge guu-hai di-mee e-mmala.

3:20  Au e-hagamamaanadu beenei, gei e-daadaamee ginai dogu hagataalunga.

3:21  Gei dogu hagadagadagagee gu-gila-mai i-dogu langahia-eau di mee deenei:

3:22  Di aloho Dimaadua mo dono manawa dumaalia hagalee noho-loo.

3:23  E-haga-manawa lamalia au gadoo be-di haga-manawa lamalia o-di luada, ge dee-odi gadoo be-di hobo-aga o-di laa.

3:24  Dimaadua modogoia ni-aagu, deelaa-laa Mee go dogu hagadagadagagee.

3:25  Dimaadua e-humalia huoloo gi digau huogodoo ala e-hagadonu a-Mee.

3:26  Mai i Mee e-humalia, gidaadou huogodoo gi-talitali mo-di hagakono gi dono hagamouli gidaadou.

3:27  E-humalia maa gidaadou e-kabe tadau noho hagalongo i tadau lligi.

3:28  Maa gidaadou gu-manawa-gee, gei gidaadou gii-noho mada-gidaadou deemuu.

3:29  Gidaadou gii-pala gi-lala i-lodo tadau manawa hila gi-lala, holongo tadau hagadagadagagee la i-golo-hua.

3:30  Ma e-aha maa gidaadou gu-dadaaligi gu-lauwa, gei gidaadou gi-manawa balabala-hua.

3:31  Di Tagi e-manawa dumaalia, hagalee huli gi-daha mo gidaadou, gaa-hana-hua beelaa.

3:32  Maa Mee ga-gaamai di manawa-gee, gei dono aloho i gidaadou le e-donu, ge e-maaloo.

3:33  Mee hagalee tenetene gi dono gaamai gi gidaadou di manawa-gee mo-di mmae.

3:34  Di Tagi e-modongoohia-e-Ia di madagoaa tadau hagataalunga ala e-manawa-gee i-lodo di hale galabudi.

3:35  Mee e-iloo di madagoaa gidaadou hagalee hai-mee gi-di tonu o-Maa ne-gaamai gi gidaadou.

3:36  Gei Mee e-iloo-Ia di madagoaa di tonu gu-hai-gee i-lodo di gowaa hai-gabunga.

3:37  Di manawa o Tagi le e-gila i-nia madagoaa huogodoo.

3:38  Nia mee humalia mo huaidu e-gila-aga i-di gowaa a-Mee gu-haganoho.

3:39  Gidaadou e-leelee logo eiaha i-di madagoaa gidaadou ga-hagaduadua i tadau huaidu?

3:40  Gidaadou gii-mmada gi tadau huaidu, gaa-huli labelaa gi Dimaadua.

3:41  Gidaadou gii-huge tadau lodo ang-gi God i-di langi, ga-dalodalo gi-Mee boloo,

3:42  “Meenei Dimaadua, gimaadou gu-ihala, gu-de-hagalongo-adu gi-di-Goe, gei Goe gu-hagalee dumaalia-mai gi gimaadou.

3:43  “Goe gu-daudali-mai gimaadou mo-di dadaaligi gimaadou. Do manawa-dumaalia la-guu-ngala i-lodo do hagawelewele,

3:44  guu-ngala i-lala di gololangi maadolu, gaa-hidi-ai madau dangidangi e-deemee di-dau i-di Goe.

3:45  Goe guu-hai gimaadou be-di gowaa dugu geinga o henuailala.

3:46  “Gimaadou guu-hai haga-huaidu go madau hagadaumee.

3:47  Gimaadou guu-noho i-lodo di haingadaa mo-di hagaloale, guu-noho i-lodo di mouli hagalliga mo e-haga-madagudagu-dangada.

3:48  Nia dangi o ogu golomada guu-hali gi-lala, i-di gili di hagahuaidu o agu daangada.

3:49  “Nia wai o ogu golomada gaa-hali gi-lala, hagalee noho,

3:50  gaa-dae-loo gi Dimaadua ga-helekai mai i-di langi, ga-gidee-Ia gimaadou.

3:51  Nia mee ala e-mmada ginai au gu-haga-manawa-gee au, i-dogu gidee nia mee ala ne-hai gi-nia ahina o dogu guongo.

3:52  “Ogu hagadaumee e-helehele au gadoo be di manu, gei dono hadinga belee hudi-wou mai gi-di-au ai.

3:53  Digaula guu-hudu au mouli gi-lodo di luwa mo-di tai di ngudu di luwa deelaa gi-di hadu.

3:54  Nia wai gu-hoohoo-aga gi dogu libogo, gei au gu-hagamaanadu bolo au gu-hoohoo gaa-made.

3:55  “Au gu-gahigahi Goe, meenei Dimaadua, mai i-lodo di luwa deelaa iei au no-lodo.

3:56  Goe gu-hagalongo gi dagu dangidangi bolo gi-hudee taidia o dalinga i dagu dangidangi.

3:57  Goe gu-helekai-mai i-di madagoaa au nogo gahigahi Goe, gei Goe gu-hagi-mai boloo, ‘Hudee madagu.’

3:58  “Meenei dogu Dagi, Goe gu-haga-dagaloaha au, gu-hagamouli au.

3:59  Gabunga-ina gi-di tonu, idimaa Goe gu-gidee-Goe nia hai ala nogo hai-mai gi-di-au, meenei Dimaadua.

3:60  Goe gu-iloo-Goe di hai o ogu hagadaumee ala e-hudi-wou mai gi-di-au, e-hai-baahi mai gi-di-au.

3:61  “Meenei Dimaadua goe gu-longono-e-Goe di-nadau haganneennee au, gu-iloo nadau hai huaidu.

3:62  Di laangi hagatau, gei ogu hagadaumee e-haganohonoho-mai nadau huaidu.

3:63  Digaula e-gadagada-mai gi-di-au mai luada gaa-dae gi-di boo.

3:64  “Meenei Dimaadua, hagaduadua-ina digaula gi nadau haihai huaidu.

3:65  Haga-huaidu-ina digaula, mo-di haga-honu-ina digaula gi-nia hagabaubau e-logo!

3:66  Gumudia digaula, mo-di haga-mmaa-ina digaula gi-daha mo henuailala.”

Chapter 4

4:1  Tadau goolo madamada gu-bilau, nia hadu hagalabagau o-di Hale Daumaha gu-meheu gi-hongo nia ala.

4:2  Nia dama-daane o Zion nogo hagalabagau gadoo be nia goolo, gei dolomeenei gu-balumee gadoo be nia baalanga ne-hai gi-nia gelegele.

4:3  Nia paana lodo-geinga e-haga-uu nadau dama, gei agu daangada e-hai gadoo be nia manu-‘ostrich’ e-hagamuamua gi nadau dama.

4:4  Digaula e-dugu-hua nadau dama bolo gii-mmade i-di hiigai mo-di hieinu. Nia dama le e-tangi bolo gii-wanga nadau meegai, gei di-maa tangada e-haangai digaula ai.

4:5  Nia daangada nogo gai nadau meegai humalia i-mua, gei dolomeenei digaula gaa-mmade i nadau hiigai i-hongo nia ala. Digau ala nogo tomo-aga humalia i-mua, gei dolomeenei digaula e-heehee i-lodo nia hagabae geinga, e-hai di-nadau halahala meegai.

4:6  Agu daangada guu-kae di hagaduadua koia e-huaidu i-di hagaduadua digau Sodom, di hagaduadua ne-tale ang-gi ginaadou limalima mai i-nia lima o God.

4:7  Tadau gau aamua nogo madammaa ge kene be nia ‘snow’. Nnuaidina digaula nogo humalia ge maaloo, nogo dabadaba ge mahi.

4:8  Gei dolomeenei digaula e-mmoe-mmoe i-hongo nia ala, tangada e-iloo digaula ai, nadau hadumada gu-luuli i nadau mmade, nadau gili gu-maangoo be-di laagau, gu-haga-wini i-di gili nia iwi.

4:9  Digau ala ne-mmade i-lodo tauwa e-haadanga-lamalia i digau ala ne-mmade nomuli, ala gu-paagege gu-mmade-mai maalia i-di hiigai, idimaa nia meegai ai belee mouli-ai digaula.

4:10  Di haingadaa dela ne-tale ang-gi agu daangada e-haga-madagudagu-dangada huoloo, nia dinana ala e-aloho i nadau dama, guu-dunu nadau dama belee gai.

4:11  Dimaadua gu-taiaga dono hagawelewele, guu-dudu dana ahi i Zion, bolo gii-wele di waahale deelaa gii-odi.

4:12  Gu-deai tangada i-golo, ge gu-deai hogi nia dagi o nnenua tuadimee ne-hagadonu ai bolo nia hagadaumee e-mee di-ulu gi-lodo nia ngudu o-di abaaba Jerusalem.

4:13  Nia mee aanei guu-hai mai i ana soukohp mo ana gau hai-mee-dabu la-guu-hai di huaidu di-nadau haga-hali nia dodo o-nia daangada madammaa.

4:14  Nia dagi digaula gu-heehee i-hongo nia ala gadoo be digau deegida, digaula gu-gulugulua i-nia dodo, gei nia daangada gu-hagalee hiihai e-bili gi digaula.

4:15  Nia daangada gu-wwolowwolo boloo, “Goodou tuu i-daha, goodou e-gulugulua! Hudee bili-mai!” Malaa, digaula gu-hagadau-adu gi nnuai guongo, tangada ne-benebene digaula ai.

4:16  Dimaadua gu-hagalee hila gi digaula, Mee ne-bida hai digaula gi-heehee beelaa, gu-hagalee hila-anga gi digau hai-mee-dabu mo nia dagi.

4:17  Gidaadou gu-halahala di hagamaamaa dela digi hanimoi, dela gu-deemee di-gidee. Gidaadou gu-talitali di hagamaamaa mai i tenua dela e-deemee di-hagamouli gidaadou.

4:18  Nia hagadaumee nogo talitali gidaadou, gei gidaadou gu-deemee di-heehee i-hongo nia ala. Tadau madagoaa la-guu-lawa, di hagaodi la-gu-dae-mai.

4:19  Di hai o tadau hagadaumee la-guu-hai be-di ‘eagle’ e-mamaangi-ia i-lala di langi. Digaula gu-hagabagibagi gidaadou, gu-aali i gidaadou i-hongo nia dama gonduu, guu-kumi gidaadou haga-homouli i-lodo di anggowaa.

4:20  Digaula guu-kumi di hagamau o tadau mouli, go di king dela ne-hilihili go Dimaadua, dela nogo hagadagadagagee ginai gidaadou e-haga-dagaloaha gidaadou gi-daha mo tadau hagadaumee huogodoo.

4:21  Goodou go digau Edom mo Uz, goodou gadagada. Goodou tenetene i di-godou madagoaa ala e-mee. Di haingadaa gaa-dae-mai gi goodou labelaa, gei goodou ga-heehee godou goloo ai, e-haga-langaadia dangada.

4:22  Zion guu-kae di hui o nadau huaidu. Dimaadua ga-hagalee daahi gidaadou i-lodo di gowaa dela e-noho galabudi-ai gidaadou i-daha mo tadau gowaa donu. Malaa, goe go Edom, Dimaadua ga-hagaduadua goe, ga-hagi-aga au haihai hala huogodoo.

Chapter 5

5:1  Meenei Dimaadua, gi-langahia-mai mua nia mee ala gu-hai-mai gi gimaadou. Mmada-mai gi-gidee-Goe di-madau langaadia.

5:2  Madau goloo guu-dada go digau mai i-daha. Digaula guu-noho i-lodo madau hale.

5:3  Madau damana gu-daaligi go nia hagadaumee, gei dolomeenei madau dinana guu-hai nia ahina nadau lodo ai.

5:4  Gimaadou e-hai gii-hui madau wai e-inu, gei e-hai gii-hui labelaa madau laagau e-hai madau dohomu.

5:5  Gimaadou guu-dagi hagaduadua gadoo be nia ‘donkey’ be nia ‘camel’, gimaadou gu-duadua, gei di-maa deai tangada e-haga-molooloo gimaadou ai.

5:6  Gimaadou e-madamadau madau meegai gi digau Egypt mo Assyria bolo gii-mee-ai gimaadou di-mouli.

5:7  Madau damana-mmaadua gu-ihala, gei dolomeenei digaula gu-hagalee, gei gimaadou gu-hagaduadua mai i-nadau huaidu ne-hai.

5:8  Digau ala e-dagi gimaadou le e-hai gadoo be nia hege, tangada e-mee di-haga-dagaloaha gimaadou gi-daha mo nadau mogobuna ai.

5:9  Digau daaligi dangada gu-heehee i-lodo nia gowaa maalama, madau mouli gu-i-lodo di hagalliga di madagoaa e-halahala madau meegai.

5:10  Madau hiigai gu-hidi-ai madau magi welengina huoloo. Madau gili gu-welengina gadoo be-di gili o-di baalanga wele.

5:11  Madau lodo guu-kumi go digau hai huaidu i-hongo di Gonduu Zion. Madau dama-ahina guu-hono bolo gi-wanga-ina nadau huaidina i-lodo nia guongo o Judea hagatau.

5:12  Madau dagi guu-lahi gu-daudau i-tomo nia laagau. Madau daane mmaadua gu-hagalee e-hagalabagau.

5:13  Madau dama-daane guu-hai ginai bolo gi-holeholee nia gili meegai be digau hege, nia damagiigi lligi guu-wanga nadau laagau daamaha gi-aamo.

5:14  Digau mmaadua gu-hagalee noho hua igolo i-di ngudu di bontai o-di abaaba, gei digau lligi gu-hagalee dadaahili.

5:15  Di tenetene gu-hagalee, guu-maa gi-daha i-lodo madau mouli, di manawa-gee guu-pono nia gonigoni.

5:16  Nia mee ne-dubu i-lodo madau mee ala nogo hagapuu ginai ai. Gimaadou gu-ihala, gei dolomeenei gimaadou gaa-mmade.

5:17  Madau manawa guu-magi, gei gimaadou gu-deemee di-mmada i madau golomada guu-honu dangi.

5:18  Idimaa di Gonduu Sinai guu-duu modogoia, guu-hai di anggowaa, gei nia manu lodo-geinga ‘jackal’ gu-heehee i-baahi nia gowaa ala gu-mooho.

5:19  Gei Goe, meenei Dimaadua, Goe gaa-king gaa-hana-hua beelaa, gaa-dagi gaa-dae-loo gi-di hagaodi o-di madagoaa.

5:20  Goe e-aha dela ne-haga-de-langahia-e-Goe gimaadou di madagoaa looloo-ehaa? Goe ga-langahia-e-Goe gimaadou labelaa?

5:21  Dimaadua, daahia-adu gimaadou labelaa gi-di-Goe! Daahia adu gimaadou labelaa! Dugu-ina-mai labelaa madau madamada mai mua.

5:22  Be Goe ga-haga-de-langahia-e-Goe gimaadou gaa-hana-hua beelaa? Do hagawelewele laa dono hagageinga i-golo ai?