CopSahBible2 - Baruch

Chapter 1

1:1  ⲁⲩⲱ ⲛⲁⲓ ⲛⲉ ⲛϣⲁϫⲉ ⲙⲡϫⲱⲱⲙⲉ ⲉⲛⲧⲁϥⲥⲁϩϥ ⲛϭⲓ ⲃⲁⲣⲟⲩⲭ ⲡϣⲏⲣⲉ ⲛⲛⲏⲣⲓⲁⲥ ⲡϣⲏⲣⲉ ⲛⲥⲉⲇⲉⲕⲓⲁⲥ ⲡϣⲏⲣⲉ ⲛⲁⲥⲁⲇⲓⲁⲥ ⲡϣⲏⲣⲉ ⲛⲭⲉⲗⲕⲓⲁⲥ ϩⲣⲁⲓ ϩⲛ ⲧⲃⲁⲃⲩⲗⲱⲛ

1:2  ϩⲛ ⲧⲙⲉϩϯ ⲛⲣⲟⲙⲡⲉ ⲛⲥⲟⲩ ⲥⲁϣϥ ⲙⲡⲉⲃⲟⲧ ⲙⲡⲉⲟⲩⲟⲉⲓϣ ⲉⲛⲧⲁⲛⲉⲭⲁⲗⲇⲁⲓⲟⲥ ϫⲓ ⲛⲑⲓⲏⲙ ⲁⲩⲱ ⲁⲩⲣⲟⲭϩⲥ ϩⲛ ⲟⲩⲕⲱϩⲧ

1:3  ⲁⲩⲱ ⲁⲃⲁⲣⲟⲩⲭ ⲱϣ ⲛⲛϣⲁϫⲉ ⲙⲡⲉⲓϫⲱⲱⲙⲉ ⲉⲙⲙⲁⲁϫⲉ ⲛⲓⲉⲭⲟⲛⲓⲁⲥ ⲡϣⲏⲣⲉ ⲛⲓⲱⲁⲕⲉⲓⲙ ⲡⲣⲣⲟ ⲡⲓⲟⲩⲇⲁ ⲁⲩⲱ ⲉⲙⲙⲁⲁϫⲉ ⲛⲟⲩⲟⲛ ⲛⲓⲙ ⲉⲃⲟⲗ ϩⲛ ⲛⲁ ⲡⲗⲁⲟⲥ ⲉⲧⲛⲏⲟⲩ ⲉϩⲟⲩⲛ ⲉⲣⲁⲧϥ ⲙⲡϫⲱⲱⲙⲉ

1:4  ⲁⲩⲱ ⲉⲛⲙⲁⲁϫⲉ ⲛⲛⲇⲩⲛⲁⲧⲟⲥ ⲙⲛ ⲛϣⲏⲣⲉ ⲛⲛⲉⲣⲱⲟⲩ ⲁⲩⲱ ⲉⲛⲙⲁⲁϫⲉ ⲛⲛⲉⲡⲣⲉⲥⲃⲩⲧⲉⲣⲟⲥ ⲁⲩⲱ ⲉⲛⲙⲁⲁϫⲉ ⲙⲡⲗⲁⲟⲥ ⲧⲏⲣϥ ϫⲓⲛ ⲡⲉⲩⲕⲟⲩⲓ ϣⲁ ⲡⲉⲩⲛⲟϭ ⲟⲩⲟⲛ ⲛⲓⲙ ⲉⲧϣⲟⲟⲡ ϩⲛ ⲧⲃⲁⲃⲩⲗⲱⲛ ϩⲣⲁⲓ ϩⲓϫⲙ ⲡⲓⲉⲣⲟ ⲛⲥⲟⲩⲇ

1:5  ⲁⲩⲣⲓⲙⲉ ⲁⲩⲛⲏⲥⲧⲉⲩⲉ ⲁⲩⲉⲓⲣⲉ ⲛⲟⲩϣⲗⲏⲗ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ

1:6  ⲁⲩⲱ ⲁⲩⲥⲱⲟⲩϩ ⲉϩⲟⲩⲛ ⲛⲟⲩϩⲁⲧ ⲕⲁⲧⲁ ⲧϭⲟⲙ ⲙⲡⲟⲩⲁ ⲡⲟⲩⲁ ϩⲛ ⲧⲉϥϭⲓϫ

1:7  ⲁⲩⲱ ⲁⲩϫⲟⲟⲩⲥⲉ ⲉⲑⲓⲏⲙ ϣⲁ ⲓⲱⲁⲕⲉⲓⲙ ⲡϣⲏⲣⲉ ⲛⲭⲉⲗⲕⲓⲁⲥ ⲡϣⲏⲣⲉ ⲛⲥⲉⲗⲱⲙ ⲡⲟⲩⲏⲏⲃ ⲁⲩⲱ ϣⲁ ⲛⲟⲩⲏⲏⲃ ⲁⲩⲱ ϣⲁ ⲡⲗⲁⲟⲥ ⲧⲏⲣϥ ⲡⲉⲛⲧⲁⲩϭⲛⲧϥ ⲛⲙⲙⲁⲩ ϩⲛ ⲑⲓⲏⲙ

1:8  ϩⲙ ⲡⲧⲣⲉϥϫⲓ ⲛⲛⲉⲥⲕⲉⲩⲏ ⲙⲡⲏⲓ ⲙⲡϫⲟⲉⲓⲥ ⲛⲉⲛⲧⲁⲩⲛⲧⲟⲩ ⲉⲃⲟⲗ ϩⲙ ⲡⲉⲣⲡⲉ ⲉⲕⲧⲟⲟⲩ ⲉⲡⲕⲁϩ ⲛⲓⲟⲩⲇⲁ ϩⲛ ⲥⲟⲩ ⲙⲏⲧ ⲛⲥⲟⲩⲁⲛ ⲁⲥⲉⲇⲉⲕⲓⲁⲥ ⲡϣⲏⲣⲉ ⲛⲛⲏⲣⲓⲁⲥ ⲡⲣⲣⲟ ⲛⲓⲟⲩⲇⲁ ⲧⲁⲙⲓⲟ ⲛϩⲉⲛⲥⲕⲉⲩⲏ ⲛϩⲁⲧ

1:9  ⲙⲛⲛⲥⲁ ⲧⲣⲉⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲡⲡⲱⲱⲛⲉ ⲉⲃⲟⲗ ⲛⲓⲉⲭⲟⲛⲓⲁⲥ ⲙⲛ ⲛⲁⲣⲭⲱⲛ ⲙⲛ ⲛⲉⲧⲙⲏⲣ ⲙⲛ ⲛⲇⲩⲛⲁⲧⲟⲥ ⲙⲛ ⲡⲗⲁⲟⲥ ⲧⲏⲣϥ ⲙⲡⲕⲁϩ ϫⲓⲛ ⲑⲓⲏⲙ ⲁⲩⲱ ⲁϥⲉⲓⲛⲉ ⲙⲙⲟϥ ⲉⲧⲃⲁⲃⲩⲗⲱⲛ

1:10  ⲁⲩⲱ ⲡⲉϫⲁⲩ ϫⲉ ⲉⲓⲥ ϩⲏⲏⲧⲉ ϭⲉ ⲁⲛⲧⲛⲛⲟⲟⲩ ⲛⲏⲧⲛ ⲛⲟⲩϩⲁⲧ ⲛⲧⲉⲧⲛϣⲱⲡ ⲉⲃⲟⲗ ϩⲙ ⲡⲉⲛϩⲁⲧ ⲛϩⲉⲛϭⲗⲓⲗ ϩⲁ ⲛⲟⲃⲉ ⲙⲛ ⲟⲩⲗⲓⲃⲁⲛⲟⲥ ⲁⲩⲱ ⲛⲧⲉⲧⲛⲧⲁⲙⲓⲟ ⲛⲟⲩⲙⲁⲛⲛⲁ ⲉϫⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲛⲛⲁϩⲣⲛ ⲡϫⲟⲉⲓⲥ ⲡⲉⲛⲛⲟⲩⲧⲉ

1:11  ⲛⲧⲉⲧⲛϣⲗⲏⲗ ⲉϫⲙ ⲡⲁϩⲉ ⲛⲛⲁⲃⲟⲩϫⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲁⲩⲱ ⲉϫⲙ ⲡⲁϩⲉ ⲛⲃⲁⲗⲧⲁⲥⲁⲣ ⲡⲉϥϣⲏⲣⲉ ϫⲉⲕⲁⲁⲥ ⲉⲣⲉⲛⲉⲩϩⲟⲟⲩ ⲁⲓⲁⲓ ϩⲓϫⲙ ⲡⲕⲁϩ ⲛⲑⲉ ⲛⲛⲉϩⲟⲟⲩ ⲛⲧⲡⲉ

1:12  ⲁⲩⲱ ϫⲉ ⲉⲣⲉⲡϫⲟⲉⲓⲥ ϯ ⲛⲁⲛ ⲛⲟⲩϭⲟⲙ ϩⲱⲱⲛ ⲁⲩⲱ ⲛϥⲣⲟⲩⲟⲉⲓⲛ ⲉⲛⲉⲛⲃⲁⲗ ⲛⲧⲛⲱⲛϩ ϩⲁ ⲑⲁⲓⲃⲉⲥ ⲛⲛⲁⲃⲟⲩⲭⲟⲇⲟⲛⲟⲥⲟⲣ ⲡⲣⲣⲟ ⲛⲧⲃⲁⲃⲩⲗⲱⲛ ⲁⲩⲱ ϩⲁ ⲑⲁⲓⲃⲉⲥ ⲛⲃⲁⲗⲧⲁⲥⲁⲣ ⲡⲉϥϣⲏⲣⲉ ϫⲉⲕⲁⲥ ⲉⲛⲉⲣϩⲙϩⲁⲗ ⲛⲁⲩ ⲛⲟⲩⲙⲏⲏϣⲉ ⲛϩⲟⲟⲩ ϫⲉ ⲉⲛⲉϭⲓⲛⲉ ⲛⲟⲩⲭⲁⲣⲓⲥ ⲙⲡⲉⲩⲙⲧⲟ ⲉⲃⲟⲗ

1:13  ⲛⲧⲉⲧⲛϣⲗⲏⲗ ϩⲱⲱⲛ ⲉϫⲱⲛ ⲛⲛⲁϩⲣⲛ ⲡϫⲟⲉⲓⲥ ⲡⲉⲛⲛⲟⲩⲧⲉ ϫⲉ ⲁⲛⲣⲛⲟⲃⲉ ⲉⲡϫⲟⲉⲓⲥ ⲡⲉⲛⲛⲟⲩⲧⲉ ⲁⲩⲱ ⲙⲡⲉⲡϭⲱⲛⲧ ⲛⲧⲉϥⲟⲣⲅⲏ ⲥⲁϩⲱϥ ⲉⲃⲟⲗ ⲙⲙⲟⲛ ϣⲁ ϩⲣⲁⲓ ⲉⲡⲟⲟⲩ ⲛϩⲟⲟⲩ

1:14  ⲛⲧⲉⲧⲛⲱϣ ⲙⲡⲉⲓϫⲱⲱⲙⲉ ⲡⲁⲓ ⲉⲛⲧⲁⲛⲧⲛⲛⲟⲟⲩϥ ϣⲁⲣⲱⲧⲛ ⲉⲟⲩⲟⲛϩϥ ⲉⲃⲟⲗ ϩⲙ ⲡⲏⲓ ⲙⲡϫⲟⲉⲓⲥ ϩⲛ ⲟⲩϩⲟⲟⲩ ⲙⲡϣⲁ ⲁⲩⲱ ϩⲣⲁⲓ ϩⲛ ⲛⲉϩⲟⲟⲩ ⲙⲡⲉⲩⲟⲉⲓϣ

1:15  ⲉⲧⲉⲧⲛⲉϫⲟⲟⲥ ϫⲉ ⲡϫⲟⲉⲓⲥ ⲡⲉⲛⲛⲟⲩⲧⲉ ⲧⲇⲓⲕⲁⲓⲟⲥⲩⲛⲏ ϣⲟⲟⲡ ⲛⲁⲕ ⲡϣⲓⲡⲉ ⲇⲉ ⲙⲫⲟ ⲉϥϣⲟⲟⲡ ⲛⲁⲛ ϣⲁ ϩⲣⲁⲓ ⲉⲡⲟⲟⲩ ⲛϩⲟⲟⲩ ⲛⲣⲱⲙⲉ ⲛⲓⲟⲩⲇⲁ ⲙⲛ ⲛⲉⲧⲟⲩⲏϩ ϩⲛ ⲑⲓⲏⲙ

1:16  ⲁⲩⲱ ⲛⲉⲛⲉⲣⲱⲟⲩ ⲙⲛ ⲛⲉⲛⲁⲣⲭⲱⲛ ⲙⲛ ⲛⲉⲛⲟⲩⲏⲏⲃ ⲙⲛ ⲛⲉⲛⲡⲣⲟⲫⲏⲧⲏⲥ ⲙⲛ ⲛⲉⲛⲉⲓⲟⲧⲉ

1:17  ⲛⲉⲛⲧⲁⲩⲣⲛⲟⲃⲉ ⲙⲡⲉⲕⲙⲧⲟ ⲉⲃⲟⲗ ⲡϫⲟⲉⲓⲥ

1:18  ⲁⲩⲱ ⲁⲛⲣⲁⲧⲥⲱⲧⲙ ⲙⲡⲛⲥⲱⲧⲙ ⲛⲥⲁ ⲧⲉⲥⲙⲏ ⲙⲡϫⲟⲓⲥ ⲡⲉⲛⲛⲟⲩⲧⲉ ⲉⲧⲣⲉⲛⲃⲱⲕ ϩⲣⲁⲓ ϩⲛ ⲛⲉⲡⲣⲟⲥⲧⲁⲅⲙⲁ ⲙⲡϫⲟⲉⲓⲥ ⲛⲁⲓ ⲉⲛⲧⲁϥⲧⲁⲁⲩ ⲙⲡⲉⲛⲙⲧⲟ ⲉⲃⲟⲗ ⲉⲧⲣⲉⲛⲃⲱⲕ ϩⲣⲁⲓ ⲛϩⲏⲧⲟⲩ

1:19  ϫⲓⲛ ⲡⲉϩⲟⲟⲩ ⲉⲛⲧⲁⲡϫⲟⲉⲓⲥ ⲉⲓⲛⲉ ⲉⲃⲟⲗ ⲛⲛⲉⲛⲉⲓⲟⲧⲉ ⲉⲃⲟⲗ ϩⲙ ⲡⲕⲁϩ ⲛⲕⲏⲙⲉ ϣⲁ ϩⲣⲁⲓ ⲉⲡⲟⲟⲩ ⲛϩⲟⲟⲩ ⲧⲛⲟ ⲛⲁⲧⲥⲱⲧⲙ ⲛⲛⲁϩⲣⲛ ⲡϫⲟⲉⲓⲥ ⲡⲉⲛⲛⲟⲩⲧⲉ ⲁⲩⲱ ⲁⲛⲧⲁⲛϩⲉⲧ ⲧⲉⲛⲙⲛⲧⲁⲧⲥⲱⲧⲙ ⲙⲡⲉⲛⲥⲱⲧⲙ ⲛⲥⲁ ⲧⲉϥⲥⲙⲏ

1:20  ϣⲁⲧⲉ ⲛⲉⲉⲓⲡⲉⲑⲟⲟⲩ ⲙⲛ ⲛⲉⲉⲓⲥⲁϩⲟⲩ ⲧⲟϭⲟⲩ ⲉⲣⲟⲛ ⲛⲁⲓ ⲉⲛⲧⲁⲡϫⲟⲉⲓⲥ ϫⲟⲟⲩ ⲉⲃⲟⲗ ϩⲓⲧⲟⲟⲧϥ ⲙⲙⲱⲩⲥⲏⲥ ⲡⲉϥϩⲙϩⲁⲗ ϩⲛ ⲛⲉϩⲟⲟⲩ ⲉⲛⲧⲁϥⲉⲓⲛⲉ ⲉⲃⲟⲗ ⲛⲛⲉⲛⲉⲓⲟⲧⲉ ϩⲙ ⲡⲕⲁϩ ⲛⲕⲏⲙⲉ ⲉϯ ⲛⲁⲛ ⲛⲟⲩⲕⲁϩ ⲉϥϣⲟⲩⲉ ⲉⲣⲱⲧⲉ ⲉⲃⲟⲗ ϩⲓ ⲉⲃⲓⲱ ⲛⲑⲉ ⲙⲡⲟⲟⲩ ⲛϩⲟⲟⲩ

1:21  ⲁⲩⲱ ⲙⲡⲛⲥⲱⲧⲙ ⲛⲥⲁ ⲧⲉⲥⲙⲏ ⲙⲡϫⲟⲓⲥ ⲡⲉⲛⲛⲟⲩⲧⲉ ⲕⲁⲧⲁ ⲛϣⲁϫⲉ ⲧⲏⲣⲟⲩ ⲛⲛⲉⲡⲣⲟⲫⲏⲧⲏⲥ ⲛⲁⲓ ⲉⲛⲧⲁϥⲧⲛⲛⲟⲟⲩⲥⲉ ϣⲁⲣⲟⲛ

1:22  ⲁⲩⲱ ⲁⲛⲃⲱⲕ ⲡⲟⲩⲁ ⲡⲟⲩⲁ ϩⲛ ⲛⲟⲩⲱϣ ⲙⲡⲉⲛϩⲏⲧ ⲉⲧϩⲟⲟⲩ ⲉⲧⲣⲉⲛⲉⲓⲣⲉ ⲛϩⲉⲛϩⲃⲏⲩⲉ ⲛϩⲉⲛⲛⲟⲩⲧⲉ ⲛϣⲙⲙⲟ ϫⲉ ⲉⲛⲉⲣⲡⲉⲑⲟⲟⲩ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲛⲛⲟⲩⲧⲉ

Chapter 2

2:1  ⲁⲩⲱ ⲁⲡϫⲟⲉⲓⲥ ⲧⲁϩⲟ ⲉⲣⲁⲧϥ ⲙⲡⲉϥϣⲁϫⲉ ⲡⲉⲛⲧⲁϥϫⲟⲟϥ ⲉϩⲣⲁⲓ ⲉϫⲱⲛ ⲁⲩⲱ ⲉϫⲛ ⲛⲉⲛⲣⲉϥϯϩⲁⲡ ⲉⲧϯϩⲁⲡ ⲉⲡ ⲁⲩⲱ ⲉϫⲛ ⲛⲉⲛⲣⲣⲱⲟⲩ ⲙⲛ ⲛⲉⲛⲁⲣⲭⲱⲛ ⲁⲩⲱ ⲉϫⲙ ⲡⲣⲱⲙⲉ ⲙⲡ ⲙⲛ ⲓⲟⲩⲇⲁ

2:2  ϫⲉ ⲉⲣⲉⲡϫⲟⲉⲓⲥ ⲉⲓⲛⲉ ⲛⲛⲉⲓⲛⲟϭ ⲙⲡⲉⲑⲟⲟⲩ ⲉϫⲱⲛ ⲛⲁⲓ ⲉⲙⲡⲟⲩϣⲱⲡⲉ ϩⲙ ⲡⲕⲁϩ ⲧⲏⲣϥ ⲕⲁⲧⲁ ⲛⲉⲛⲧⲁϥⲁⲁⲩ ϩⲛ ⲑⲓⲏⲙ ⲕⲁⲧⲁ ⲛⲉⲧⲥⲏϩ ⲧⲏⲣⲟⲩ ϩⲙ ⲡⲛⲟⲙⲟⲥ ⲙⲙⲱⲩⲥⲏⲥ

2:3  ⲉⲧⲣⲉⲡⲣⲱⲙⲉ ⲟⲩⲱⲙ ⲛⲛⲥⲁⲣⲝ ⲙⲡⲉϥϣⲏⲣⲉ ⲁⲩⲱ ⲛⲧⲉⲡⲣⲱⲙⲉ ⲟⲩⲱⲙ ⲛⲧⲥⲁⲣⲝ ⲛⲛⲉϥϣⲉⲉⲣⲉ

2:4  ⲁⲩⲱ ⲁⲕϯ ⲙⲙⲟⲛ ⲉⲧⲟⲟⲧⲟⲩ ⲛⲛⲉⲣⲱⲟⲩ ⲉⲧⲕⲱⲧⲉ ⲉⲣⲟⲛ ⲉⲩⲛⲟϭⲛⲉϭ ⲁⲩⲱ ⲉⲩⲙⲁ ⲉⲙⲉⲩⲙⲟⲟϣⲉ ⲛϩⲏⲧϥ ϩⲛ ⲛⲗⲁⲟⲥ ⲧⲏⲣⲟⲩ ⲉⲧⲕⲱⲧⲉ ⲉⲣⲟⲛ ⲛⲁⲓ ⲉⲛⲧⲁⲡϫⲟⲉⲓⲥ ϫⲟⲟⲣⲟⲩ ⲉⲃⲟⲗ ⲛϩⲏⲧⲟⲩ

2:5  ⲁⲩⲱ ⲁⲛϣⲱⲡⲉ ⲉⲛⲙⲡⲉⲥⲏⲧ ⲉⲛⲧⲛⲛⲧⲡⲉ ⲁⲛ ϫⲉ ⲁⲛⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ⲙⲡⲛⲥⲱⲧⲙ ⲛⲥⲁ ⲧⲉϥⲥⲙⲏ

2:6  ⲡϫⲟⲉⲓⲥ ⲡⲉⲛⲛⲟⲩⲧⲉ ⲧⲇⲓⲕⲁⲓⲟⲥⲩⲛⲏ ϣⲟⲟⲡ ⲛⲁⲕ ⲡϣⲓⲡⲉ ⲇⲉ ⲙⲫⲟ ⲉϥϣⲟⲟⲡ ⲛⲁⲛ ⲙⲛ ⲛⲉⲛⲉⲓⲟⲧⲉ ϣⲁ ϩⲣⲁⲓ ⲉⲡⲟⲟⲩ ⲛϩⲟⲟⲩ

2:7  ⲁⲩⲉⲓ ⲉϩⲣⲁⲓ ⲉϫⲱⲛ ⲛϭⲓ ⲛⲉⲓⲡⲉⲑⲟⲟⲩ ⲧⲭⲣⲟⲩ ϩⲛ ⲛⲉⲛⲧⲁϥϫⲟⲟⲩ ⲛϭⲓ ⲡϫⲟⲉⲓⲥ ⲉϩⲣⲁⲓ ⲉϫⲱⲛ

2:8  ⲁⲩⲱ ⲙⲡⲛⲥⲟⲡⲥⲡ ⲛⲛⲁϩⲣⲛ ⲫⲟ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ⲉⲧⲣⲉⲡⲟⲩⲁ ⲡⲟⲩⲁ ⲙⲙⲟⲛ ⲕⲧⲟϥ ⲉⲃⲟⲗ ϩⲛ ⲙⲙⲉⲉⲩⲉ ⲙⲡⲉϥϩⲏⲧ ⲉⲧϩⲟⲟⲩ

2:9  ⲁⲡϫⲟⲉⲓⲥ ⲣⲟⲉⲓⲥ ⲉⲣⲟⲛ ⲁϥⲉⲓⲛⲉ ⲉϫⲱⲛ ⲛⲛⲉⲓⲡⲉⲑⲟⲟⲩ ϫⲉ ⲟⲩⲇⲓⲕⲁⲓⲟⲥ ⲡⲉ ⲡϫⲟⲉⲓⲥ ⲉϫⲛ ⲛⲉϥϩⲃⲏⲩⲉ ⲧⲏⲣⲟⲩ ϫⲉ ϩⲛ ⲛⲉⲛⲧⲁϥϩⲱⲛ ⲙⲙⲟⲟⲩ ⲉⲧⲟⲟⲧⲛ

2:10  ⲙⲡⲛⲥⲱⲧⲙ ⲛⲥⲁ ⲧⲉϥⲥⲙⲏ ⲉⲧⲣⲉⲛⲃⲱⲕ ϩⲣⲁⲓ ϩⲛ ⲛⲉϥⲟⲩⲉϩ ⲥⲁϩⲛⲉ ⲛⲁⲓ ⲉⲛⲧⲁⲡϫⲟⲉⲓⲥ ⲧⲁⲁⲩ ⲙⲡⲉⲛⲙⲧⲟ ⲉⲃⲟⲗ

2:11  ⲧⲉⲛⲟⲩ ϭⲉ ⲡϫⲟⲉⲓⲥ ⲡⲛⲟⲩⲧⲉ ⲙⲡ ⲡⲉⲛⲧⲁϥⲉⲓⲛⲉ ⲙⲡⲉϥⲗⲁⲟⲥ ⲉⲃⲟⲗ ⲙⲡⲕⲁϩ ⲛⲕⲏⲙⲉ ϩⲛ ⲟⲩϭⲓϫ ⲉⲥϫⲟⲟⲣ ϩⲛ ϩⲉⲛⲙⲁⲉⲓⲛ ⲙⲛ ϩⲉⲛϣⲡⲏⲣⲉ ⲙⲛ ϩⲉⲛϭⲟⲙ ϩⲛ ⲟⲩϭⲃⲟⲓ ⲉϥϫⲟⲥⲉ ⲉⲧⲣⲉⲕⲧⲁⲙⲓⲟ ⲛⲁⲕ ⲙⲡⲉⲓⲛⲟϭ ⲛⲣⲁⲛ ϣⲁ ϩⲣⲁⲓ ⲉⲡⲟⲟⲩ ⲛϩⲟⲟⲩ

2:12  ⲁⲛⲣⲛⲟⲃⲉ ⲁⲛⲁⲥⲉⲃⲉⲓ ⲁⲛϫⲓ ⲛϭⲟⲛⲥ ⲛϩⲏⲧⲕ ⲡϫⲟⲉⲓⲥ ⲡⲉⲛⲛⲟⲩⲧⲉ ⲉϩⲣⲁⲓ ϭⲉ ⲉϫⲛ ⲛⲉⲕⲡⲉⲧⲛⲁⲛⲟⲩϥ ⲧⲏⲣⲟⲩ

2:13  ⲙⲁⲣⲉϥⲕⲧⲟϥ ⲛϭⲓ ⲡϭⲱⲛⲧ ⲛⲧⲉⲕⲟⲣⲅⲏ ⲉⲃⲟⲗ ⲙⲙⲟⲛ ϫⲉ ⲁⲛϣⲱⲡⲉ ⲉⲛⲥⲟⲃⲕ ϩⲛ ⲛϩⲉⲑⲛⲟⲥ ⲛⲁⲓ ⲉⲛⲧⲁⲕϫⲟⲟⲣⲛ ⲉⲃⲟⲗ ⲛϩⲏⲧⲟⲩ

2:14  ⲥⲱⲧⲙ ⲡϫⲟⲉⲓⲥ ⲉⲡⲉⲛϣⲗⲏⲗ ⲛⲅϯ ϩⲧⲏⲕ ⲉⲡⲉⲛϩⲣⲟⲟⲩ ⲙⲡⲉⲛⲥⲟⲡⲥ ⲛⲅⲛⲁϩⲙⲛ ⲉⲧⲃⲏⲧⲕ ⲛⲅϯ ⲛⲁⲛ ⲛⲟⲩⲭⲁⲣⲓⲥ ⲙⲡⲉⲙⲧⲟ ⲉⲃⲟⲗ ⲛⲛⲉⲛⲧⲁⲩⲡⲱⲱⲛⲉ ⲙⲙⲟⲛ ⲉⲃⲟⲗ

2:15  ϫⲉ ⲉⲣⲉⲡⲕⲁϩ ⲧⲏⲣϥ ⲉⲓⲙⲉ ϫⲉ ⲛⲧⲟⲕ ⲡⲉ ⲡϫⲟⲉⲓⲥ ⲡⲉⲛⲛⲟⲩⲧⲉ ϫⲉ ⲡⲉⲕⲣⲁⲛ ⲁⲕⲧⲁⲩⲟϥ ⲉϩⲣⲁⲓ ⲉϫⲙ ⲡ ⲁⲩⲱ ⲉϩⲣⲁⲓ ⲉϫⲛ ⲡⲉϥⲅⲉⲛⲟⲥ

2:16  ⲡϫⲟⲉⲓⲥ ϭⲱϣⲧ ⲉⲃⲟⲗ ϩⲙ ⲡⲉⲕⲙⲁ ⲛϣⲱⲡⲉ ⲉⲧⲟⲩⲁⲁⲃ ϯ ϩⲧⲏⲕ ⲉⲣⲟⲛ ⲁⲩⲱ ⲛⲅⲣⲓⲕⲉ ⲙⲡⲉⲕⲙⲁⲁϫⲉ ⲛⲅⲥⲱⲧⲙ ⲉⲣⲟⲛ

2:17  ⲁⲩⲱⲛ ⲛⲛⲉⲕⲃⲁⲗ ⲛⲅⲛⲁⲩ ϫⲉ ⲛⲉⲛⲧⲁⲩⲙⲟⲩ ⲁⲛ ⲛⲉⲧϩⲛⲁⲙⲛⲧⲉ ⲛⲉⲛⲧⲁⲩϫⲓ ⲙⲡⲉⲩ ⲉⲃⲟⲗ ϩⲛ ⲛⲉⲩⲥⲡⲗⲁⲅⲭⲛⲟⲛ ⲛⲉⲧⲛⲁϯⲉⲟⲟⲩ ⲛⲁⲕ ⲏ ⲥⲉϫⲱ ⲛⲛⲇⲓⲕⲁⲓⲱⲙⲁ ⲙⲡϫⲟⲉⲓⲥ

2:18  ⲁⲗⲗⲁ ⲟⲩⲩⲩⲭⲏ ⲛⲧⲟϥ ⲉⲥⲣⲗⲩⲡⲏ ⲉϩⲣⲁⲓ ⲉϫⲛ ⲧⲉⲕⲙⲛⲧⲛⲟϭ ⲧⲁⲓ ⲉⲧⲙⲟⲟϣⲉ ⲉⲣⲉϫⲱⲥ ⲃⲏϩ ⲉⲡⲉⲥⲏⲧ ⲉⲥⲑⲃⲃⲓⲏⲩ ⲙⲛ ϩⲉⲛⲃⲁⲗ ⲉⲁⲩⲱϫⲛ ⲙⲛ ⲟⲩⲯⲩⲭⲏ ⲉⲧϩⲕⲁⲉⲓⲧ ⲛⲧⲟⲟⲩ ⲛⲉⲧⲛⲁϯ ⲉⲟⲟⲩ ⲛⲁⲕ ⲙⲛ ⲟⲩⲇⲓⲕⲁⲓⲟⲥⲩⲛⲏ ⲡϫⲟⲉⲓⲥ

2:19  ϫⲉ ϩⲣⲁⲓ ⲁⲛ ⲉϫⲛ ⲛⲇⲓⲕⲁⲓⲱⲙⲁ ⲛⲛⲉⲛⲉⲓⲟⲧⲉ ⲙⲛ ⲛⲁⲛⲉⲛⲉⲣⲱⲟⲩ ⲁⲛⲟⲛ ⲉⲛⲡⲱϩⲧ ⲙⲡⲉⲛⲛⲁ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲛⲛⲟⲩⲧⲉ

2:20  ϫⲉ ⲁⲕⲁⲙⲁϩⲧⲉ ⲉϫⲱⲛ ⲙⲡⲉⲕϭⲱⲛⲧ ⲙⲛ ⲧⲉⲕⲟⲣⲅⲏ ⲕⲁⲧⲁ ⲑⲉ ⲉⲛⲧⲁⲕϣⲁϫⲉ ϩⲛ ⲧϭⲓϫ ⲛⲛⲉⲕϩⲙϩⲁⲗ ⲛⲉⲡⲣⲟⲫⲏⲧⲏⲥ ⲉⲩϫⲱ ⲙⲙⲟⲥ ϫⲉ

2:21  ⲧⲁⲓ ⲧⲉ ⲑⲉ ⲉⲛⲧⲁⲡϫⲟⲉⲓⲥ ϫⲟⲟⲥ ϫⲉ ⲕⲱⲗϫ ⲙⲡⲉⲧⲛⲙⲁⲭϩ ⲛⲧⲉⲧⲛⲣϩⲱⲃ ⲙⲡⲣⲣⲟ ⲛⲧⲃⲁⲃⲩⲗⲱⲛ ϫⲉ ⲉⲧⲉⲧⲛⲉϩⲙⲟⲟⲥ ϩⲙ ⲡⲉⲧⲛⲕⲁϩ ⲡⲁⲓ ⲉⲛⲧⲁⲓϯ ⲙⲙⲟϥ ⲛⲛⲉⲧⲛⲉⲓⲟⲧⲉ

2:22  ⲉϣⲱⲡⲉ ⲇⲉ ⲉⲧⲉⲧⲛⲧⲙⲥⲱⲧⲙ ⲉⲧⲉⲥⲙⲏ ⲙⲡϫⲟⲉⲓⲥ ⲉⲧⲉⲧⲛⲣϩⲱⲃ ⲙⲡⲣⲣⲟ ⲛⲧⲃⲁⲃⲩⲗⲱⲛ

2:23  ϯⲛⲁⲉⲓⲣⲉ ⲛϩⲉⲛⲱϫⲛ ϩⲛ ⲙⲡⲟⲗⲓⲥ ⲛⲓⲟⲩⲇⲁ ⲁⲩⲱ ϯⲛⲁϥⲓ ⲉⲃⲟⲗ ⲛⲑⲓⲏⲙ ⲛⲧⲉⲥⲙⲏ ⲙⲡⲟⲩⲛⲟϥ ⲙⲛ ⲧⲉⲥⲙⲏ ⲙⲡⲣⲁϣⲉ ⲧⲉⲥⲙⲏ ⲛⲟⲩⲡⲁ ⲧϣⲉⲗⲉⲉⲧ ⲙⲛ ⲧⲉⲥⲙⲏ ⲛⲟⲩϣⲉⲗⲉⲉⲧ ⲛⲧⲉⲡⲉⲧⲛⲕⲁϩ ⲧⲏⲣϥ ϣⲱⲡⲉ ⲛⲉⲣⲏⲙⲟⲥ ϫⲉ ⲙⲛ ⲛⲉⲧⲟⲩⲏϩ ϩⲣⲁⲓ ⲛϩⲏⲧϥ

2:24  ⲁⲩⲱ ⲙⲡⲛⲥⲱⲧⲙ ⲛⲥⲁ ⲧⲉⲕⲥⲙⲏ ⲉⲣϩⲱⲃ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲁⲩⲱ ⲁⲕⲧⲁϩⲟ ⲉⲣⲁⲧⲟⲩ ⲛⲛϣⲁϫⲉ ⲛⲁⲓ ⲉⲛⲧⲁⲕϫⲟⲟⲩ ϩⲛ ⲛϭⲓϫ ⲛⲛⲉⲕϩⲙϩⲁⲗ ⲛⲉⲡⲣⲟⲫⲏⲧⲏⲥ ⲉⲧⲣⲉⲩⲉⲓⲛⲉ ⲉⲃⲟⲗ ⲛⲛⲕⲉⲉⲥ ⲛⲛⲉⲛⲉⲣⲱⲟⲩ ⲙⲛ ⲛⲕⲉⲉⲥ ⲛⲛⲉⲛⲉⲓⲟⲧⲉ ⲉⲃⲟⲗ ϩⲙ ⲡⲉⲩⲙⲁ

2:25  ⲁⲩⲱ ⲉⲓⲥ ϩⲏⲏⲧⲉ ⲥⲉⲛⲏϫ ϩⲙ ⲡⲕⲁⲩⲙⲁ ⲙⲡⲉϩⲟⲟⲩ ⲁⲩⲱ ϩⲙ ⲡϫⲁϥ ⲛⲧⲉⲩϣⲏ ⲁⲩⲙⲟⲩ ϩⲛ ϩⲉⲛϩⲓⲥⲉ ⲙⲡⲟⲛⲏⲣⲟⲛ ϩⲙ ⲫⲉⲃⲱⲱⲛ ⲙⲛ ⲧⲥⲏϥⲉ ⲛⲑⲉ ⲉⲛⲧⲁⲕⲧⲛⲛⲟⲟⲩⲥⲉ ⲉϫⲱⲛ

2:26  ⲁⲩⲱ ⲁⲕⲕⲱ ⲙⲡⲉⲛⲏⲓ ⲉⲛⲧⲁⲩⲉⲡⲓⲕⲁⲗⲉⲓ ⲙⲡⲉⲕⲣⲁⲛ ⲉϩⲣⲁⲓ ⲉϫⲱϥ ⲛⲑⲉ ⲙⲡⲟⲟⲩ ⲛϩⲟⲟⲩ ⲉⲧⲃⲉ ⲙⲡⲟⲛⲏⲣⲓⲁ ⲙⲡⲏⲓ ⲙⲡ ⲙⲛ ⲡⲏⲓ ⲛⲓⲟⲩⲇⲁ

2:27  ⲁⲩⲱ ⲁⲕⲉⲓⲣⲉ ⲉϩⲟⲩⲛ ⲉⲣⲟⲛ ⲡϫⲟⲉⲓⲥ ⲡⲉⲛⲛⲟⲩⲧⲉ ⲕⲁⲧⲁ ⲧⲉⲕⲙⲛⲧϩⲁⲕ ϩⲛ ϩⲱⲃ ⲛⲓⲙ ⲕⲁⲧⲁ ⲧⲉⲕⲙⲛⲧϣⲁⲛϩⲧⲏϥ ⲉⲧⲛⲁϣⲱⲥ

2:28  ⲕⲁⲧⲁ ⲑⲉ ⲉⲛⲧⲁⲕϣⲁϫⲉ ϩⲛ ⲧϭⲓϫ ⲙⲙⲱⲩⲥⲏⲥ ⲡⲉⲕϩⲙϩⲁⲗ ϩⲙ ⲡⲉϩⲟⲟⲩ ⲉⲛⲧⲁⲕϩⲱⲛ ⲉⲧⲟⲟⲧϥ ⲉⲥϩⲁⲓ ⲙⲡⲉⲉⲓⲛⲟⲙⲟⲥ ⲙⲡⲉⲙⲧⲟ ⲉⲃⲟⲗ ⲛⲛϣⲏⲣⲉ ⲙⲡ ⲉⲕϫⲱ ⲙⲙⲟⲥ

2:29  ϫⲉ ⲉⲧⲉⲧⲛⲧⲙⲥⲱⲧⲙ ⲛⲥⲁ ⲧⲁⲥⲙⲏ ⲧⲉⲧⲛⲛⲟϭ ⲙⲙⲛⲧϩⲁϩ ⲛϣⲁϫⲉ ⲉⲧⲛⲁϣⲱⲥ ⲉⲛⲁⲕⲧⲟ ⲙⲙⲟⲥ ⲉⲡⲟⲩⲉ ϩⲛ ⲛϩⲉⲑⲛⲟⲥ ⲛⲁⲓ ⲉϯⲛⲁϫⲟⲟⲣⲟⲩ ⲉⲃⲟⲗ ⲉⲙⲁⲩ

2:30  ϫⲉ ⲁⲓⲉⲓⲙⲉ ⲁⲛⲟⲕ ϫⲉ ⲛⲥⲉⲛⲁⲥⲱⲧⲙ ⲁⲛ ⲛⲥⲱⲓ ϫⲉ ⲟⲩⲗⲁⲟⲥ ⲛⲛⲁϣⲧ ⲙⲁⲭϩ ⲛⲉ ⲛⲥⲉⲕⲧⲟⲟⲩ ϩⲙ ⲡⲉⲩϩⲏⲧ ⲉⲡⲕⲁϩ ⲉⲛⲧⲁⲩⲡⲟⲟⲛⲟⲩ ⲉⲃⲟⲗ ⲉⲣⲟϥ

2:31  ⲛⲥⲉⲉⲓⲙⲉ ϫⲉ ⲁⲛⲟⲕ ⲡⲉ ⲡϫⲟⲉⲓⲥ ⲡⲉⲩⲛⲟⲩⲧⲉ ⲁⲩⲱ ϯⲛⲁϯ ⲛⲁⲩ ⲛⲟⲩϩⲏⲧ ⲁⲩⲱ ϩⲉⲛⲙⲁⲁϫⲉ ⲉⲧⲣⲉⲩⲥⲱⲧⲙ

2:32  ⲛⲥⲉⲥⲙⲟⲩ ⲉⲣⲟⲓ ϩⲙ ⲡⲕⲁϩ ⲉⲛⲧⲁⲩⲡⲟⲟⲛⲟⲩ ⲉⲃⲟⲗ ⲉⲣⲟϥ ⲁⲩⲱ ⲛⲥⲉⲣⲡⲙⲉⲉⲩⲉ ⲙⲡⲁⲣⲁⲛ

2:33  ⲛⲥⲉⲕⲧⲟ ⲛⲧⲉⲩϫⲓⲥⲉ ⲉⲃⲟⲗ ϩⲙ ⲡⲉⲛϣⲟⲧ ⲁⲩⲱ ⲉⲃⲟⲗ ϩⲛ ⲛⲉⲩϩⲃⲏⲩⲉ ⲧⲏⲣⲟⲩ ⲙⲡⲟⲛⲏⲣⲟⲛ ϫⲉ ⲥⲉⲛⲁⲣⲡⲙⲉⲉⲩⲉ ⲛⲧⲉϩⲓⲏ ⲛⲛⲉⲩⲉⲓⲟⲧⲉ ⲛⲁⲓ ⲉⲛⲧⲁⲩⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ

2:34  ϫⲉ ϯⲛⲁⲕⲧⲟ ⲙⲙⲟⲟⲩ ⲉⲡⲕⲁϩ ⲡⲉⲛⲧⲁⲓⲱⲣⲕ ⲙⲙⲟϥ ⲛⲛⲉⲩⲉⲓⲟⲧⲉ ⲁⲃⲣⲁϩⲁⲙ ⲙⲛ ⲓⲥⲁⲕ ⲙⲛ ⲓⲁⲕⲱⲃ ⲛⲥⲉⲣϫⲟⲉⲓⲥ ⲉⲣⲟϥ ⲛⲧⲁⲧⲁϣⲟⲟⲩ ⲛⲥⲉⲧⲙϣⲱⲡⲉ ⲉⲩⲥⲟⲃⲕ

2:35  ⲛⲧⲁⲧⲁϩⲟ ⲛⲁⲩ ⲉⲣⲁⲧⲥ ⲛⲟⲩⲇⲓⲁⲑⲏⲕⲏ ϣⲁ ⲉⲛⲉϩ ⲛⲧⲁϣⲱⲡⲉ ⲛⲁⲩ ⲛⲛⲟⲩⲧⲉ ⲛⲧⲟⲟⲩ ϩⲱⲟⲩ ⲛⲥⲉϣⲱⲡⲉ ⲛⲁⲓ ⲉⲩⲗⲁⲟⲥ ⲁⲩⲱ ⲛϯⲛⲁⲟⲩⲱϩ ⲁⲛ ⲉⲧⲟⲟⲧ ⲉⲡⲱⲛⲉ ⲉⲃⲟⲗ ⲙⲡⲁⲗⲁⲟⲥ ⲡ ⲉⲃⲟⲗ ϩⲙ ⲡⲕⲁϩ ⲉⲛⲧⲁⲓϯ ⲙⲙⲟϥ ⲛⲛⲉⲩⲉⲓⲟⲧⲉ

Chapter 3

3:1  ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲡⲛⲟⲩⲧⲉ ⲙⲡ ⲟⲩⲩⲩⲭⲏ ⲉⲥϩⲉϫϩⲱϫ ⲙⲛ ⲟⲩ ⲉϥϩⲛ ⲟⲩⲙⲕⲁϩ ⲛϩⲏⲧ ⲁϥⲱϣ ⲉϩⲣⲁⲓ ⲉⲣⲟⲕ

3:2  ⲥⲱⲧⲙ ⲡϫⲟⲉⲓⲥ ⲁⲩⲱ ⲛⲅⲛⲁ ϫⲉ ⲛⲧⲕ ⲟⲩⲛⲟⲩⲧⲉ ⲛⲛⲁϩⲏⲧ ϫⲉ ⲁⲛⲣⲛⲟⲃⲉ ⲙⲡⲉⲕⲙⲧⲟ ⲉⲃⲟⲗ

3:3  ⲛⲧⲟⲕ ⲕϣⲟⲟⲡ ϣⲁ ⲉⲛⲉϩ ⲁⲩⲱ ⲁⲛⲟⲛ ⲧⲛⲛⲁⲧⲁⲕⲟ ⲛϣⲁ ⲉⲛⲉϩ

3:4  ⲡϫⲟⲉⲓⲥ ⲡⲡⲁⲛⲧⲟⲕⲣⲁⲧⲱⲣ ⲡⲛⲟⲩⲧⲉ ⲙⲡ ⲥⲱⲧⲙ ⲉⲧⲉⲡⲣⲟⲥⲉⲩⲭⲏ ⲛⲛϣⲏⲣⲉ ⲙⲡ ⲙⲛ ⲛϣⲏⲣⲉ ⲛⲛⲉⲛⲧⲁⲩⲣⲛⲟⲃⲉ ⲙⲡⲉⲕⲙⲧⲟ ⲉⲃⲟⲗ ⲛⲁⲓ ⲉⲧⲉⲙⲡⲟⲩⲥⲱⲧⲙ ⲛⲥⲁ ⲧⲉⲥⲙⲏ ⲙⲡⲉⲩⲛⲟⲩⲧⲉ ⲉⲧⲃⲉ ⲡⲁⲓ ⲁⲛⲉⲓⲡⲉⲑⲟⲟⲩ ⲧⲟϭⲟⲩ ⲉⲣⲟⲛ

3:5  ⲙⲡⲣⲣⲡⲙⲉⲉⲩⲉ ⲛⲛϫⲓⲛϭⲟⲛⲥ ⲛⲛⲉⲛⲉⲓⲟⲧⲉ ⲁⲗⲗⲁ ⲁⲣⲓⲡⲙⲉⲉⲩⲉ ⲛⲧⲉⲕϭⲓϫ ⲙⲛ ⲡⲉⲕⲣⲁⲛ ϩⲣⲁⲓ ϩⲙ ⲡⲉⲓⲟⲩⲟⲉⲓϣ

3:6  ϫⲉ ⲛⲧⲟⲕ ⲡⲉ ⲡϫⲟⲉⲓⲥ ⲡⲉⲛⲛⲟⲩⲧⲉ ⲁⲩⲱ ⲧⲛⲛⲁⲥⲙⲟⲩ ⲉⲣⲟⲕ ⲡϫⲟⲉⲓⲥ

3:7  ϫⲉ ⲉⲧⲃⲉ ⲡⲁⲓ ⲁⲕϯ ⲛⲧⲉⲕϩⲟⲧⲉ ⲉϩⲣⲁⲓ ⲉⲡⲉⲛϩⲏⲧ ⲉⲧⲣⲉⲛⲉⲡⲓⲕⲁⲗⲉⲓ ⲙⲡⲉⲕⲣⲁⲛ ⲛⲧⲛⲥⲙⲟⲩ ⲉⲣⲟⲕ ϩⲙ ⲡⲕⲁϩ ⲉⲛⲧⲁⲩⲡⲟⲟⲛⲉⲛ ⲉⲃⲟⲗ ⲉⲣⲟϥ ϫⲉ ϩⲣⲁⲓ ϩⲛ ⲛϭⲓϫ ⲛⲛⲉⲛⲉⲓⲟⲧⲉ ⲙⲛ ⲡⲕⲁϩ ⲉⲛⲧⲁⲛⲡⲟⲟⲛⲉ ⲉⲃⲟⲗ ⲉⲣⲟϥ ⲙⲛ ⲛⲛⲟⲃⲉ ⲉⲛⲧⲁⲩⲁⲁⲩ ⲙⲡⲉⲕⲙⲧⲟ ⲉⲃⲟⲗ

3:8  ϫⲉ ⲉⲓⲥ ϩⲏⲏⲧⲉ ⲙⲡⲟⲟⲩ ⲧⲛϩⲛ ⲧⲕⲁⲧⲟⲓⲕⲓⲁ ⲧⲁⲓ ⲉⲛⲧⲁⲕϫⲟⲟⲣⲛ ⲉⲃⲟⲗ ⲉⲣⲟⲥ ⲉⲩⲛⲟϭⲛⲉϭ ⲛⲁⲛ ⲙⲛ ⲟⲩⲥⲁϩⲟⲩ ⲉⲃⲟⲗ ϫⲉ ⲟⲩⲛⲟⲩⲟⲛ ⲉⲣⲟⲛ ⲕⲁⲧⲁ ⲛϫⲓⲛϭⲟⲛⲥ ⲛⲛⲉⲛⲉⲓⲟⲧⲉ ϫⲉ ⲁⲩⲥⲁϩⲱⲟⲩ ⲉⲃⲟⲗ ⲙⲡϫⲟⲉⲓⲥ ⲡⲉⲛⲛⲟⲩⲧⲉ

3:9  ⲥⲱⲧⲙ ⲡ ⲉⲛⲉⲛⲧⲟⲗⲏ ⲙⲡⲱⲛϩ ⲣⲓⲕⲉ ⲙⲡⲉⲕⲙⲁⲁϫⲉ ⲉⲩⲙⲛⲧⲥⲁⲃⲉ

3:10  ⲟⲩ ⲡⲉ ⲡ ⲉⲧⲃⲉ ⲟⲩ ⲣⲱ ⲕϩⲙ ⲡⲕⲁϩ ⲛⲛⲉⲕϫⲓϫⲉⲟⲩⲉ ⲁⲕⲣⲁⲥ ϩⲛ ⲟⲩⲕⲁϩ ⲛϣⲙⲙⲟ

3:11  ⲁⲕⲥⲟⲟϥ ⲙⲛ ⲛⲉⲧⲙⲟⲟⲩⲧ ⲁⲩⲟⲡⲕ ⲙⲛ ⲛⲉⲧⲃⲏⲕ ⲉⲡⲉⲥⲏⲧ ⲉⲁⲙⲛⲧⲉ

3:12  ⲁⲕⲕⲱ ⲛⲥⲱⲕ ⲛⲧⲡⲏⲅⲏ ⲛⲧⲥⲟⲫⲓⲁ

3:13  ⲉⲛⲉⲛⲧⲁⲕⲃⲱⲕ ⲅⲁⲣ ϩⲛ ⲧⲉϩⲓⲏ ⲙⲡⲛⲟⲩⲧⲉ ⲡⲉ ⲛⲉⲕⲛⲁⲟⲩⲱϩ ⲡⲉ ϩⲛ ϯⲣⲏⲛⲏ ϣⲁ ⲉⲛⲉϩ ⲛⲟⲩⲟⲉⲓϣ

3:14  ϣⲓⲛⲉ ϭⲉ ϫⲉ ⲉⲣⲉⲧⲙⲛⲧⲣⲙⲛϩⲏⲧ ⲧⲱⲛ ⲁⲩⲱ ϫⲉ ⲉⲣⲉⲧϭⲟⲙ ϩⲛ ⲁϣ ⲙⲙⲁ ⲁⲩⲱ ϫⲉ ⲉⲥⲧⲱⲛ ⲛϭⲓ ⲧⲙⲛⲧⲥⲁⲃⲉ ϫⲉ ⲉⲕⲉⲥⲟⲩⲱⲛⲟⲩ ϩⲓ ⲟⲩⲥⲟⲡ ⲉⲣⲉⲡⲁϩⲉ ⲉⲧⲛⲁϣⲱϥ ϩⲛ ⲁϣ ⲙⲙⲁ ⲙⲛ ⲡⲱⲛϩ ⲁⲩⲱ ⲉⲣⲉⲡⲟⲩⲟⲉⲓⲛ ⲛⲛⲃⲁⲗ ϩⲛ ⲁϣ ⲙⲙⲁ ⲙⲛ ϯⲣⲏⲛⲏ

3:15  ⲛⲓⲙ ⲡⲉⲛⲧⲁϥϩⲉ ⲉⲡⲉⲥⲙⲁ ⲛⲓⲙ ⲡⲉⲛⲧⲁϥⲃⲱⲕ ⲉϩⲟⲩⲛ ⲉⲛⲉⲥⲁϩⲱⲣ

3:16  ⲉⲩⲧⲱⲛ ϭⲉ ⲛⲁⲣⲭⲱⲛ ⲛⲛϩⲉⲑⲛⲟⲥ ⲙⲛ ⲛⲉⲧⲟ ⲛϫⲟⲉⲓⲥ ⲉϫⲛ ⲛⲉⲑⲏⲣⲓⲟⲛ ⲙⲡⲕⲁϩ

3:17  ⲛⲉⲧⲥⲱⲃⲉ ⲛⲛϩⲁⲗⲁⲧⲉ ⲛⲧⲡⲉ ⲁⲩⲱ ⲛⲣⲱⲙⲉ ⲉⲧⲕⲱ ⲛϩⲧⲏⲩ ⲉⲡⲛⲟⲩⲃ ⲁⲩⲱ ⲙⲛ ϩⲁⲏ ⲙⲡⲉⲩⲥⲱⲟⲩϩ ⲉϩⲟⲩⲛ

3:18  ⲛⲉⲧϫⲡⲟ ⲙⲫⲁⲧ ⲉⲧϥⲓⲣⲟⲟⲩϣ ϩⲁⲣⲟϥ ⲁⲩⲱ ⲙⲛ ϩⲁⲏ ⲛⲛⲉⲩϩⲃⲏⲟⲩⲉ

3:19  ϫⲉ ⲁⲩⲧⲁⲕⲟ ⲁⲩⲱ ⲥⲉⲛⲁⲃⲱⲕ ⲉⲡⲉⲥⲏⲧ ⲉⲁⲙⲛⲧⲉ ⲁⲩⲱ ⲛⲧⲉ ϩⲉⲛⲕⲟⲟⲩⲉ ⲧⲱⲟⲩⲛ ⲉⲡⲉⲩⲙⲁ

3:20  ⲁⲛϣⲏⲣⲉ ⲕⲟⲩⲓ ⲛⲁⲩ ⲉⲡⲟⲩⲟⲉⲓⲛ ⲁⲩⲱ ⲁⲩⲟⲩⲱϩ ϩⲓϫⲙ ⲡⲕⲁϩ ⲧⲉϩⲓⲏ ⲇⲉ ⲙⲙⲛⲧⲥⲁⲃⲉ ⲙⲡⲟⲩⲥⲟⲩⲱⲛⲥ

3:21  ⲟⲩⲇⲉ ⲙⲡⲟⲩϭⲛ ⲧⲉⲥϩⲓⲏ ⲙⲙⲟⲟϣⲉ ⲟⲩⲇⲉ ⲙⲡⲟⲩϭⲟⲗϫⲟⲩ ⲙⲙⲟⲥ ⲁⲛⲉⲩϣⲏⲣⲉ ϣⲱⲡⲉ ⲉⲩⲟⲩⲏⲟⲩ ⲉⲃⲟⲗ ϩⲛ ⲧⲉϩⲓⲏ

3:22  ⲟⲩⲇⲉ ⲙⲡⲟⲩⲥⲟⲧⲙⲟⲩ ϩⲛ ⲭⲁⲛⲁⲁⲛ ⲟⲩⲇⲉ ⲙⲡⲟⲩⲱⲛϩ ⲉⲃⲟⲗ ϩⲛ ⲑⲁⲓⲙⲁⲛ

3:23  ⲟⲩⲇⲉ ⲛϣⲏⲣⲉ ⲛⲁⲅⲁⲣ ⲛⲉⲧϣⲓⲛⲉ ⲛⲥⲁⲧⲙⲛⲧⲣⲙⲛϩⲏⲧ ⲛⲉⲧϩⲓϫⲙⲡⲕⲁϩ ⲛⲉϣⲟⲧⲉ ⲙⲙⲉⲣⲣⲁⲛ ⲙⲛⲑⲁⲓⲙⲁⲛ ⲁⲩⲱ ⲛⲣⲉϥϣⲁϫⲉ ⲙⲛ ⲛⲉⲧϯⲟⲩⲟⲓ ϩⲛ ⲧⲙⲛⲧⲣⲙⲛϩⲏⲧ ⲙⲡⲟⲩⲥⲟⲩⲱⲛ ⲧⲉϩⲓⲏ ⲛⲧⲥⲟⲫⲓⲁ ⲟⲩⲇⲉ ⲙⲡⲟⲩⲣⲡⲙⲉⲉⲩⲉ ⲛⲛⲉⲥϩⲓⲟⲟⲩⲉ ⲙⲙⲟⲟϣⲉ

3:24  ⲱ ⲡⲓⲏⲗ ϫⲉ ⲟⲩⲛⲟϭ ⲡⲉ ⲡⲏⲓ ⲙⲡⲛⲟⲩⲧⲉ ⲉϥⲉⲟⲩⲟϣⲥ ⲉⲃⲟⲗ ⲉⲡⲉϩⲟⲩⲟ ⲛϭⲓ ⲡⲙⲁ ⲙⲡⲉϥⲙⲁ ⲛϣⲱⲡⲉ

3:25  ⲟⲩⲛⲟϭ ⲡⲉ ⲉⲙⲛⲧⲉϥ ϩⲁⲏ ⲉⲙⲛⲧϥ ϣⲓ ⲙⲡⲉϥϫⲓⲥⲉ

3:26  ϫⲉ ⲙⲡⲙⲁ ⲉⲧⲙⲙⲁⲩ ⲛⲧⲁⲩϫⲡⲟ ⲛⲛⲅⲓⲅⲁⲥ ⲛⲉⲛⲧⲁⲩϣⲱⲡⲉ ⲛⲟⲛⲟⲙⲁⲥⲧⲟⲥ ϫⲓⲛ ⲛϣⲟⲣⲡ ⲉⲛⲁϣⲱⲟⲩ ϩⲛ ⲧⲉⲩϣⲓ ⲛⲉⲧⲥⲟⲟⲩⲛ ⲙⲙⲓϣⲉ

3:27  ⲛⲁⲓ ⲁⲛ ⲛⲉⲛⲧⲁⲡⲛⲟⲩⲧⲉ ⲥⲟⲧⲡⲟⲩ ⲟⲩⲇⲉ ⲙⲡϥϯϩⲓⲏ ⲛⲁⲩ ⲛⲧⲙⲛⲧⲥⲁⲃⲉ

3:28  ⲁⲩⲧⲁⲕⲟ ϫⲉ ⲙⲛⲧⲟⲩ ⲙⲙⲁⲩ ⲛⲧⲙⲛⲧⲣⲙⲛϩⲏⲧ ⲁⲩϩⲉ ⲉⲃⲟⲗ ⲉⲧⲃⲉ ⲧⲉⲩⲙⲛⲧⲁⲧϣⲟϫⲛⲉ

3:29  ⲛⲓⲙ ⲡⲉⲛⲧⲁϥⲃⲱⲕ ⲉϩⲣⲁⲓ ⲉⲧⲡⲉ ⲁϥϫⲓ ⲙⲙⲟⲥ ⲛⲁϥ ⲁⲩⲱ ⲁϥⲉⲓⲛⲉ ⲙⲙⲟⲥ ⲉⲡⲉⲥⲏⲧ ⲉⲃⲟⲗ ϩⲛ ⲛⲉⲕⲗⲟⲟⲗⲉ

3:30  ⲛⲓⲙ ⲡⲉⲛⲧⲁϥϫⲓⲟⲟⲣ ⲛⲑⲁⲗⲁⲥⲥⲁ ⲁϥϭⲓⲛⲉ ⲙⲙⲟⲥ ϫⲉ ⲉϥⲉⲛⲧⲥ ⲛⲁϥ ⲛⲑⲉ ⲛⲟⲩⲛⲟⲩⲃ ⲉϥⲥⲟⲧⲡ

3:31  ⲙⲛⲗⲁⲁⲩ ⲥⲟⲟⲩⲛ ⲛⲧⲉⲥϩⲓⲏ ⲟⲩⲧⲉ ⲉϥⲥⲟⲩⲧⲱⲛ ⲛⲉⲥϩⲓⲟⲟⲩⲉ

3:32  ⲁⲗⲗⲁ ⲡⲉⲧⲛⲟⲉⲓ ⲛϩⲱⲃ ⲛⲓⲙ ⲡⲉⲧⲥⲟⲟⲩⲛ ⲙⲙⲟⲥ ⲁϥϭⲓⲛⲉ ⲙⲙⲟⲥ ϩⲛ ⲧⲉϥⲙⲛⲧⲣⲙⲛϩⲏⲧ ⲡⲉⲛⲧⲁϥⲥⲟⲃⲧⲉ ⲡⲕⲁϩ ϣⲁ ⲉⲛⲉϩ ⲛⲟⲩⲟⲉⲓϣ ⲁϥⲙⲟⲩϩ ⲙⲙⲟϥ ⲛⲧⲃⲛⲏ ⲛⲛⲁ ⲧⲉϥⲧⲟ ⲛⲟⲩⲣⲏⲧⲉ

3:33  ⲡⲉⲛⲧⲁϥⲧⲛⲛⲟⲟⲩ ⲙⲡⲉϥⲟⲩⲟⲉⲓⲛ ⲁⲩⲱ ⲁϥⲙⲟⲟϣⲉ ⲁϥⲙⲟⲩⲧⲉ ⲉⲣⲟϥ ⲁϥⲥⲱⲧⲙ ⲛⲥⲱϥ ϩⲛ ⲟⲩⲥⲧⲱⲧ

3:34  ⲁⲛⲥⲓⲟⲩ ⲇⲉ ⲉⲩⲫⲣⲁⲛⲉ ⲉⲩⲣⲟⲩⲟⲉⲓⲛ ϩⲛ ⲛⲉⲩⲣϣⲉ

3:35  ⲁϥⲙⲟⲩⲧⲉ ⲉⲣⲟⲟⲩ ⲡⲉϫⲁⲩ ϫⲉ ⲉⲓⲥ ϩⲏⲏⲧⲉ ⲧⲛⲙⲡⲉⲓⲙⲁ ⲁⲩⲣⲟⲩⲟⲉⲓⲛ ϩⲛ ⲟⲩⲟⲩⲛⲟϥ ⲙⲡⲉⲛⲧⲁϥⲧⲁⲙⲓⲟⲟⲩ

3:36  ⲡⲁⲓ ⲡⲉ ⲡⲉⲛⲛⲟⲩⲧⲉ ⲙⲛ ϭⲉ ⲛⲁϣⲱⲡⲉ ⲉϥⲧⲛⲧⲱⲛ ⲉⲣⲟϥ

3:37  ⲁϥϭⲓⲛⲉ ⲛⲧⲉϩⲓⲏ ⲧⲏⲣⲥ ⲛⲧⲙⲛⲧⲥⲁⲃⲉ ⲁϥϯ ⲙⲙⲟⲥ ⲛⲓⲁⲕⲱⲃ ⲡⲉϥϩⲙϩⲁⲗ ⲙⲛ ⲡ ⲡⲉⲛⲧⲁϥⲙⲉⲣⲓⲧϥ

3:38  ⲙⲛⲛⲥⲁ ⲛⲁⲓ ⲁϥⲟⲩⲟⲛϩϥ ⲉⲃⲟⲗ ϩⲓϫⲛ ⲡⲕⲁϩ ⲁⲩⲱ ⲁϥⲥⲁⲛϣ ϩⲛ ⲛⲣⲱⲙⲉ

Chapter 4

4:1  ⲡⲁⲓ ⲡⲉ ⲡϫⲱⲱⲙⲉ ⲛⲛⲉⲡⲣⲟⲥⲧⲁⲅⲙⲁ ⲙⲡⲛⲟⲩⲧⲉ ⲁⲩⲱ ⲡⲛⲟⲙⲟⲥ ⲉⲧϣⲟⲟⲡ ϣⲁ ⲉⲛⲉϩ ⲟⲩⲟⲛ ⲛⲓⲙ ⲉⲧⲛⲁⲁⲙⲁϩⲧⲉ ⲙⲙⲟϥ ⲥⲉⲛⲁϣⲱⲡⲉ ϩⲙ ⲡⲱⲛϩ ⲁⲩⲱ ⲛⲉⲧⲛⲁⲕⲁⲁϥ ⲛⲥⲱⲟⲩ ⲥⲉⲛⲁⲙⲟⲩ

4:2  ⲕⲧⲟⲕ ⲓⲁⲕⲱⲃ ⲛⲅⲁⲙⲁϩⲧⲉ ⲙⲙⲟϥ ⲙⲟⲟϣⲉ ⲛⲥⲁ ⲡⲉϥⲥⲧⲟⲓ ⲙⲡⲉⲙⲧⲟ ⲉⲃⲟⲗ ⲙⲡⲉϥⲟⲩⲟⲉⲓⲛ

4:3  ⲙⲡⲣϯⲡⲉⲕⲉⲟⲟⲩ ⲛϩⲉⲛⲕⲟⲟⲩⲉ ⲁⲩⲱ ⲛⲉⲧⲣⲛⲟϥⲣⲉ ⲛⲁⲕ ⲛⲟⲩϩⲉⲑⲛⲟⲥ ⲛϣⲙⲙⲟ

4:4  ⲁⲛⲟⲛ ϩⲉⲛⲙⲁⲕⲁⲣⲓⲟⲥ ⲡ ϫⲉ ⲛⲉⲧⲣⲁⲛⲁϥ ⲙⲡⲛⲟⲩⲧⲉ ⲥⲉⲟⲩⲟⲛϩ ⲛⲁⲛ ⲉⲃⲟⲗ

4:5  ⲧⲱⲕ ϭⲉ ⲛϩⲏⲧ ⲡⲗⲁⲟⲥ ⲙⲡⲛⲟⲩⲧⲉ ϫⲉ ⲡⲣⲡⲙⲉⲉⲩⲉ ⲡⲉ ⲡ

4:6  ⲁⲩϯⲧⲏⲩⲧⲛ ⲉⲃⲟⲗ ⲛⲛϩⲉⲑⲛⲟⲥ ⲉⲡⲧⲁⲕⲉⲧⲏⲩⲧⲛ ⲁⲛ ⲁⲗⲗⲁ ϫⲉ ⲁⲧⲉⲧⲛϯ ⲛⲟⲩϭⲥ ⲙⲡⲛⲟⲩⲧⲉ ⲁⲩϯⲧⲏⲩⲧⲛ ⲉⲧⲟⲟⲧⲟⲩ ⲛⲛⲉⲧⲛϫⲓϫⲉⲟⲩⲉ

4:7  ⲉⲧⲃⲉ ϫⲉ ⲁⲧⲉⲧⲛϯ ⲛⲟⲩϭⲥ ⲙⲡⲉⲛⲧⲁϥⲧⲁⲙⲓⲉⲧⲏⲩⲧⲛ ⲁⲧⲉⲧⲛϣⲱⲱⲧ ⲛϩⲉⲛⲇⲁⲓⲙⲟⲛⲓⲟⲛ ⲁⲩⲱ ⲙⲡⲛⲟⲩⲧⲉ ⲁⲛ

4:8  ⲁⲧⲉⲧⲛⲣⲡⲱⲃϣ ⲙⲡⲉⲛⲧⲁϥⲥⲁⲛϣ ⲧⲏⲩⲧⲛ ⲡⲛⲟⲩⲧⲉ ϣⲁ ⲉⲛⲉϩ ⲁⲩⲱ ⲟⲛ ⲑⲓⲙ ⲧⲉⲛⲧⲁⲥⲥⲁⲛϣ ⲧⲏⲩⲧⲛ ⲁⲧⲉⲧⲛⲗⲩⲡⲓ ⲙⲙⲟⲥ

4:9  ⲁⲥⲛⲁⲩ ⲅⲁⲣ ⲉⲧⲟⲣⲅⲏ ⲉⲛⲧⲁⲥⲉⲓ ⲉϫⲛ ⲧⲏⲩⲧⲛ ⲉⲃⲟⲗ ϩⲓⲧⲟⲟⲧϥ ⲙⲡⲛⲟⲩⲧⲉ ⲁⲩⲱ ⲡⲉϫⲁⲥ ϫⲉ ⲥⲱⲧⲙ ⲉⲣⲟⲓ ⲛⲣⲙⲛϭⲟⲉⲓⲗⲉ ⲛⲥⲓⲱⲛ ⲁⲡⲛⲟⲩⲧⲉ ⲅⲁⲣ ⲉⲓⲛⲉ ⲉϫⲱⲓ ⲛⲟⲩⲛⲟϭ ⲛϩⲏⲃⲉ

4:10  ⲁⲓⲛⲁⲩ ⲅⲁⲣ ⲉⲧⲁⲓⲭⲙⲁⲗⲱⲥⲓⲁ ⲛⲛⲁϣⲏⲣⲉ ⲙⲛ ⲛⲁϣⲉⲉⲣⲉ ⲧⲉⲛⲧⲁϥⲛⲧⲥ ⲉϫⲱⲟⲩ ⲛϭⲓ ⲡϣⲁ ⲉⲛⲉϩ

4:11  ⲁⲓⲥⲁⲛⲟⲩϣⲟⲩ ⲅⲁⲣ ϩⲛ ⲟⲩⲟⲩⲛⲟϥ ⲁⲓϫⲟⲟⲩⲥⲉ ⲉⲃⲟⲗ ϩⲓⲧⲟⲟⲧ ϩⲛ ⲟⲩⲣⲓⲙⲉ ⲙⲛ ⲟⲩϩⲏⲃⲉ

4:12  ⲙⲡⲣⲧⲣⲉⲗⲁⲁⲩ ϭⲉ ⲣⲁϣⲉ ⲙⲙⲟⲓ ϩⲛ ⲟⲩⲣⲁϣⲉ ϫⲉ ⲛⲧⲁⲩⲕⲁⲁⲥ ⲛⲥⲱⲟⲩ ϩⲓⲧⲛ ⲟⲩⲙⲏⲏϣⲉ ⲁⲛⲟⲕ ⲅⲁⲣ ⲁⲓⲣϫⲁⲉⲓⲉ ⲉⲧⲃⲉ ⲛⲛⲟⲃⲉ ⲛⲛⲁϣⲏⲣⲉ ⲉⲧⲃⲉ ϫⲉ ⲁⲩⲣⲁⲕⲧⲟⲩ ⲉⲃⲟⲗ ⲙⲡⲛⲟⲙⲟⲥ ⲙⲡⲛⲟⲩⲧⲉ

4:13  ⲁⲩⲱ ⲙⲡⲟⲩⲥⲟⲩⲛⲛⲉϥⲇⲓⲕⲁⲓⲱⲙⲁ ⲟⲩⲇⲉ ⲙⲡⲟⲩⲃⲱⲕ ϩⲛ ⲧⲉϩⲓⲏ ⲛⲛⲉⲛⲧⲟⲗⲏ ⲙⲡⲛⲟⲩⲧⲉ ⲟⲩⲇⲉ ⲙⲡⲟⲩⲁⲗⲉ ⲉϩⲣⲁⲓ ⲉϫⲛ ⲧⲉϩⲓⲏ ⲛⲛⲉϥⲇⲓⲕⲁⲓⲟⲥⲩⲛⲏ

4:14  ⲙⲁⲣⲟⲩⲉⲓ ϭⲉ ⲛϭⲓ ⲛⲣⲙⲛϭⲟⲉⲓⲗⲉ ⲛⲥⲓⲱⲛ ⲁⲩⲱ ⲉⲩⲉⲣⲡⲙⲉⲉⲩⲉ ⲛⲧⲁⲓⲭⲙⲁⲗⲱⲥⲓⲁ ⲛⲛⲁϣⲏⲣⲉ ⲙⲛ ⲛⲁϣⲉⲉⲣⲉ ⲧⲉⲛⲧⲁϥⲛⲧⲥ ⲉϫⲱⲟⲩ ⲛϭⲓ ⲡϣⲁ ⲉⲛⲉϩ

4:15  ⲁϥⲉⲓⲛⲉ ⲅⲁⲣ ⲉϫⲱⲟⲩ ⲛⲟⲩϩⲉⲑⲛⲟⲥ ⲉⲃⲟⲗ ϩⲙ ⲡⲟⲩⲉ ⲉⲃⲟⲗ ⲟⲩϩⲉⲑⲛⲟⲥ ⲛⲁⲧⲃⲁⲗ ⲁⲩⲱ ⲉϥϣⲟⲃⲉ ϩⲛ ⲧⲉϥⲁⲥⲡⲉ ⲛⲁⲓ ⲉⲧⲉⲙⲉⲩϣⲓⲡⲉ ϩⲏⲧϥ ⲛⲟⲩϩⲗⲗⲟ ⲟⲩⲇⲉ ⲙⲉⲩⲛⲁ ⲛⲟⲩϣⲏⲣⲉ ⲕⲟⲩⲓ

4:16  ⲁⲩⲱ ⲁⲩⲉⲓ ⲁⲩϥⲓ ⲛⲙⲙⲉⲣⲁⲧⲉ ⲛⲧⲉⲭⲏⲣⲁ ⲙⲛ ⲛⲉⲥⲕⲉϣⲉⲉⲣⲉ ⲛⲧⲟⲥ ⲙⲁⲩⲁⲁⲥ ⲁⲩⲁⲁⲥ ⲛϫⲁⲉⲓⲉ

4:17  ⲁⲛⲟⲕ ⲇⲉ ⲁϣ ⲧⲉ ⲧⲁϭⲟⲙ ⲧⲁⲓ ⲉϯⲛⲁⲁⲁⲥ ϫⲉ ⲉⲓⲉⲃⲟⲏⲑⲓ ⲉⲣⲱⲧⲛ

4:18  ⲡⲉⲛⲧⲁϥⲉⲓⲛⲉ ⲅⲁⲣ ⲉϫⲱⲧⲛ ⲛⲙⲡⲉⲑⲟⲟⲩ ⲛⲧⲟϥ ⲡⲉⲧⲛⲁⲛⲁϩⲙⲧⲏⲩⲧⲛ ⲉⲃⲟⲗ ϩⲛ ⲛϭⲓϫ ⲛⲛⲉⲧⲛϫⲓϫⲉⲟⲩⲉ

4:19  ⲙⲟⲟϣⲉ ϭⲉ ⲛⲁϣⲏⲣⲉ ⲛⲧⲉⲧⲛⲃⲱⲕ ⲁⲛⲟⲕ ⲅⲁⲣ ⲙⲁⲩⲁⲁⲧ ⲁⲩⲕⲁⲁⲧ ⲉⲓⲟ ⲛⲉⲣⲏⲙⲟⲥ

4:20  ⲁⲩⲕⲁⲁⲧ ⲅⲁⲣ ⲕⲁϩⲏⲩ ⲛⲧⲁⲥⲧⲟⲗⲏ ⲛⲉⲓⲣⲏⲛⲏ ⲁϥϯ ϩⲓⲱⲱⲧ ⲛⲟⲩϭⲟⲟⲩⲛⲉ ϩⲣⲁⲓ ϩⲛ ⲛⲁϩⲟⲟⲩ ϯⲛⲁⲱϣ ⲉⲃⲟⲗ ϩⲛ ⲧⲁⲥⲙⲏ ⲉϩⲣⲁⲓ ⲉⲡϣⲁ ⲉⲛⲉϩ

4:21  ⲧⲱⲕ ϭⲉ ⲛϩⲏⲧ ⲛⲁϣⲏⲣⲉ ⲛⲧⲉⲧⲛⲁϣⲕⲁⲕ ⲉϩⲣⲁⲓ ⲉⲡⲛⲟⲩⲧⲉ ⲁⲩⲱ ϥⲛⲁⲛⲁϩⲙⲧⲏⲩⲧⲛ ⲉⲡϫⲓⲛϭⲟⲛⲥ ⲉⲧϩⲛⲧϭⲓϫ ⲛⲛϫⲁϫⲉ

4:22  ⲁⲛⲟⲕ ⲅⲁⲣ ϯϩⲉⲗⲡⲓⲍⲉ ⲉⲡϣⲁ ⲉⲛⲉϩ ⲉⲧⲃⲉ ⲡⲉⲧⲛⲟⲩϫⲁⲓ ⲁⲩⲱ ⲁⲩⲣⲁϣⲉ ⲉⲓ ⲛⲁⲓ ⲉⲃⲟⲗ ϩⲓⲧⲟⲟⲧϥ ⲙⲡⲉⲧⲟⲩⲁⲁⲃ ⲉϩⲣⲁⲓ ⲅⲁⲣ ⲉϫⲛ ⲧⲉϥⲙⲛⲧⲛⲁⲏⲧ ⲁϥⲉⲓ ⲛⲏⲧⲛ ϩⲛ ⲟⲩϭⲉⲡⲏ ⲉⲃⲟⲗ ϩⲓⲧⲛ ⲡϣⲁ ⲉⲛⲉϩ ⲡⲉⲧⲛⲥⲱⲧⲏⲣ

4:23  ⲁⲓϫⲟⲟⲩⲧⲏⲩⲧⲛ ⲅⲁⲣ ⲉⲃⲟⲗ ϩⲓⲧⲟⲟⲧ ϩⲛ ⲟⲩϩⲏⲃⲉ ⲙⲛ ⲟⲩⲣⲓⲙⲉ ⲡⲛⲟⲩⲧⲉ ⲇⲉ ⲛⲁϯⲧⲏⲩⲧⲛ ⲛⲁⲓ ϩⲛ ⲟⲩⲣⲁϣⲉ ⲙⲛ ⲟⲩⲟⲩⲛⲟϥ ϣⲁ ⲉⲛⲉϩ

4:24  ⲛⲑⲉ ⲅⲁⲣ ⲛⲧⲁⲩⲛⲁⲩ ⲧⲉⲛⲟⲩ ⲛϭⲓ ⲛⲣⲙⲛϭⲟⲉⲓⲗⲉ ⲛⲥⲓⲱⲛ ⲉⲧⲉⲧⲛⲁⲓⲭⲙⲁⲗⲱⲥⲓⲁ ⲧⲁⲓ ⲧⲉ ⲑⲉ ⲉⲧⲟⲩⲛⲁⲛⲁⲩ ϩⲛ ⲟⲩϭⲉⲡⲏ ⲉⲡⲉⲧⲛⲟⲩϫⲁⲓ ⲡⲉⲃⲟⲗ ϩⲓⲧⲟⲟⲧϥ ⲙⲡⲛⲟⲩⲧⲉ ⲡⲁⲓ ⲉⲧⲛⲏⲟⲩ ⲉϫⲛ ⲧⲏⲟⲩⲧⲛ ϩⲛ ⲟⲩⲛⲟϭ ⲛⲉⲟⲟⲩ ⲙⲛ ⲡⲟⲩⲟⲉⲓⲛ ϣⲁ ⲉⲛⲉϩ

4:25  ⲛⲁϣⲏⲣⲉ ϩⲣⲟϣ ϭⲉ ⲛϩⲏⲧ ⲉⲧⲟⲣⲅⲏ ⲉⲛⲧⲁⲥⲉⲓ ⲛⲏⲧⲛ ⲉⲃⲟⲗ ϩⲓⲧⲟⲟⲧϥ ⲙⲡⲛⲟⲩⲧⲉ ⲁⲡϫⲁϫⲉ ⲡⲱⲧ ⲛⲥⲱⲧⲛ ⲧⲉⲧⲛⲛⲁⲛⲁⲩ ⲉⲡⲉϥⲧⲁⲕⲟ ϩⲛ ⲟⲩϭⲉⲡⲏ ⲛⲧⲉⲧⲛⲧⲁⲗⲟ ⲉϫⲙ ⲡⲉⲩⲙⲁⲕϩ

4:26  ⲛⲉⲧϭⲏⲛ ϩⲓⲧⲟⲟⲧ ⲁⲩⲃⲱⲕ ϩⲛ ϩⲉⲛϩⲓⲟⲟⲩⲉ ⲉⲩⲛⲁϣⲧ ⲁⲩⲉⲓ ⲛⲑⲉ ⲛⲛⲓⲟϩⲉ ⲉⲛⲧⲁⲩϥⲓ ⲉⲃⲟⲗ ϩⲛ ⲛⲉⲩϫⲓϫⲉⲟⲩⲉ

4:27  ⲧⲱⲕ ϭⲉ ⲛϩⲏⲧ ⲛⲁϣⲏⲣⲉ ⲛⲧⲉⲧⲛⲁϣⲕⲁⲕ ⲉϩⲣⲁⲓ ⲉⲡⲛⲟⲩⲧⲉ ⲡⲉⲛⲧⲁϥⲛ ⲛⲁⲓ ⲉϫⲛ ⲧⲏⲩⲧⲛ ⲁⲩⲱ ⲟⲩⲛ ⲟⲩⲣⲡⲙⲉⲉⲩⲉ ⲛⲁϣⲱⲡⲉ ⲛⲏⲧⲛ ⲉⲃⲟⲗ ϩⲓⲧⲟⲟⲧϥ

4:28  ⲛⲑⲉ ⲅⲁⲣ ⲉⲛⲧⲁⲡⲉⲧⲛϩⲏⲧ ⲙⲉⲉⲩⲉ ⲉⲥⲓⲛⲉ ⲉⲃⲟⲗ ⲙⲡⲛⲟⲩⲧⲉ ⲧⲁϣⲉⲧⲏⲩⲧⲛ ⲙⲙⲏⲧ ⲛⲕⲱⲃ ⲉⲧⲣⲉⲧⲛⲕⲧⲉⲧⲏⲩⲧⲛ ⲉⲣⲟϥ ⲛⲧⲉⲧⲛϣⲓⲛⲉ ⲛⲥⲱϥ

4:29  ⲡⲉⲛⲧⲁϥⲉⲓⲛⲉ ⲅⲁⲣ ⲛⲙⲡⲉⲑⲟⲟⲩ ⲉϫⲛⲧⲏⲩⲧⲛ ϥⲛⲁⲉⲓⲛⲉ ⲟⲛ ⲛⲟⲩⲟⲩⲛⲟϥ ⲛϣⲁ ⲉⲛⲉϩ ⲙⲛ ⲡⲉⲧⲛⲟⲩϫⲁⲓ

4:30  ⲧⲱⲕ ϭⲉ ⲛϩⲏⲧ ⲑⲓⲏⲙ ϥⲛⲁⲥⲗⲥⲱⲗⲉ ⲛϭⲓ ⲡⲉⲛⲧⲁϥϯⲣⲁⲛ ⲉⲣⲟ

4:31  ⲥⲉⲛⲁⲟⲩⲱⲛϩ ⲉⲃⲟⲗ ⲛϭⲓ ⲛⲉⲛⲧⲁⲩⲉⲓⲣⲉ ⲛⲉ ⲛⲙⲡⲉⲑⲟⲟⲩ ⲁⲩⲱ ⲁⲩⲣⲁϣⲉ ⲉϫⲙ ⲡⲟⲩϩⲉ

4:32  ⲥⲉⲟⲩⲟⲛϩ ⲉⲃⲟⲗ ⲛϭⲓ ⲙⲡⲟⲗⲓⲥ ⲛⲁⲓ ⲉⲛⲧⲁⲩⲣϭⲁⲟⲩⲟⲛ ⲉⲣⲟⲟⲩ ⲛⲟⲩⲙⲛⲧϭⲁⲟⲩⲟⲛ ⲙⲛ ⲛⲉⲛⲧⲁⲩϣⲱⲡ ⲉⲣⲟⲟⲩ ⲛⲛⲟⲩϣⲏⲣⲉ

4:33  ⲛⲑⲉ ⲅⲁⲣ ⲉⲛⲧⲁⲩⲣⲁϣⲉ ⲉϫⲛ ⲡⲟⲩⲉ ⲁⲩⲟⲩⲛⲟϥ ⲙⲙⲟⲟⲩ ⲉϩⲣⲁⲓ ⲉϫⲙ ⲡⲟⲩⲛⲟⲃⲉ ⲧⲁⲓ ⲧⲉ ⲑⲉ ⲉⲧⲥⲛⲁⲗⲩⲡⲓ ⲉⲣⲁⲓ ⲉϫⲛ ⲑⲉ ⲉⲛⲧⲁⲥⲣϫⲁⲉⲓⲉ

4:34  ⲁⲩⲱ ϯⲛⲁϥⲓ ⲛⲧⲙⲛⲧⲥⲁⲓⲉ ⲙⲡⲉⲥⲙⲏⲏϣⲉ ⲁⲩⲱ ⲡⲉⲥϣⲟⲩϣⲟⲩ ⲉⲧⲛϩⲏⲧⲥ ⲥⲛⲁϣⲱⲡⲉ ⲛϩⲏⲃⲉ

4:35  ⲟⲩⲛⲟⲩⲕⲱϩⲧ ⲅⲁⲣ ⲛⲏⲩ ⲉϫⲱⲥ ⲉⲃⲟⲗ ϩⲓⲧⲛ ⲡϣⲁ ⲉⲛⲉϩ ⲉϩⲉⲛϩⲟⲟⲩ ⲉⲩⲟⲩⲏⲟⲩ ⲁⲩⲱ ⲥⲛⲁϣⲱⲡⲉ ⲙⲙⲁ ⲛⲟⲩⲱϩ ⲛⲛⲇⲁⲓⲙⲟⲛⲓⲟⲛ ϩⲛ ϩⲉⲛϩⲟⲟⲩ ⲉⲛⲁϣⲱⲟⲩ

4:36  ϭⲱϣⲧ ⲉϩⲣⲁⲓ ⲉⲡⲥⲁ ⲛⲙⲙⲁ ⲛϣⲁ ⲑⲓⲏⲙ ⲛⲧⲉⲛⲁⲩ ⲉⲡⲉⲟⲩⲛⲟϥ ⲡⲉⲃⲟⲗ ϩⲓⲧⲟⲟⲧϥ ⲙⲡⲛⲟⲩⲧⲉ ⲉϥⲛⲏⲟⲩ ⲛⲉ

4:37  ⲉⲓⲥ ϩⲏⲏⲧⲉ ⲉⲓⲥ ⲛⲟⲩϣⲏⲣⲉ ⲛⲏⲟⲩ ⲛⲁⲓ ⲉⲛⲧⲁⲣⲉϫⲟⲟⲩ ⲉⲃⲟⲗ ⲥⲉⲛⲏⲟⲩ ⲉⲩⲥⲟⲟⲩϩ ⲉⲃⲟⲗ ϩⲛ ⲙⲙⲁ ⲛϣⲁ ⲙⲛ ⲙⲙⲁ ⲛϩⲱⲧⲡ ϩⲙ ⲡϣⲁϫⲉ ⲙⲡⲉⲧⲟⲩⲁⲁⲃ ⲉⲩⲣⲁϣⲉ ϩⲙ ⲡⲉⲟⲟⲩ ⲙⲡⲛⲟⲩⲧⲉ

Chapter 5

5:1  ⲧⲱⲟⲩⲛ ⲑⲓⲏⲙ ⲛⲧⲉⲕⲟ ⲛⲧⲟ ⲕⲁϩⲏⲟⲩ ⲛⲧⲉⲥⲧⲟⲗⲏ ⲙⲡⲟⲩϩⲏⲃⲉ ⲙⲛ ⲡⲟⲩⲡⲉⲑⲟⲟⲩ ⲛⲧⲉϯϩⲓⲱⲱⲧⲉ ⲙⲡⲉⲟⲟⲩ ⲛⲧⲟⲩⲙⲛⲧⲥⲁⲓⲉ ⲧⲉⲃⲟⲗ ϩⲓⲧⲟⲟⲧϥ ⲙⲡⲛⲟⲩⲧⲉ ϣⲁ ⲉⲛⲉϩ

5:2  ϯϩⲓⲱⲱⲧⲉ ⲛⲧⲇⲓⲡⲗⲟⲉⲓⲥ ⲛⲧⲇⲓⲕⲁⲓⲟⲥⲩⲛⲏ ⲙⲡⲛⲟⲩⲧⲉ ϯ ⲛⲧⲙⲓⲧⲣⲁ ⲉϩⲣⲁⲓ ⲉϫⲱ ⲙⲡⲉⲟⲟⲩ ⲙⲡϣⲁ ⲉⲛⲉϩ

5:3  ⲡⲛⲟⲩⲧⲉ ⲅⲁⲣ ⲛⲁⲧⲥⲁⲃⲉ ⲡⲕⲁϩ ⲧⲏⲣϥ ⲉⲡⲟⲩⲟⲉⲓⲛ ⲙⲡⲟⲩⲟⲩⲃⲁϣ

5:4  ⲡⲟⲩⲣⲁⲛ ⲇⲉ ⲥⲉⲛⲁⲙⲟⲩⲧⲉ ⲉⲣⲟϥ ⲉⲃⲟⲗ ϩⲓⲧⲙ ⲡⲛⲟⲩⲧⲉ ϣⲁ ⲉⲛⲉϩ ϫⲉ ϯⲣⲏⲛⲏ ⲙⲛ ⲧⲇⲓⲕⲁⲓⲟⲥⲩⲛⲏ ⲙⲛ ⲡⲉⲟⲟⲩ ⲛⲧⲙⲛⲧⲣⲉϥϣⲙϣⲉⲛⲟⲩⲧⲉ

5:5  ⲧⲱⲟⲩⲛ ⲑⲓⲏⲙ ⲛⲧⲉⲁϩⲉⲣⲁⲧⲉ ⲉϫⲙ ⲡϫⲓⲥⲉ ⲛⲧⲉϭⲱϣⲧ ⲉⲡⲥⲁ ⲛⲙⲙⲁ ⲛϣⲁ ⲛⲧⲉⲛⲁⲩ ⲉⲛⲟⲩϣⲏⲣⲉ ⲧⲏⲣⲟⲩ ⲉⲩⲥⲟⲟⲩϩ