ABPGRK - Ephesians

Chapter 1

1:1  Παύλος απόστολος Ιησού χριστού διά θελήματος θεού τοις αγίοις τοις ούσιν εν Εφέσω και πιστοίς εν χριστώ Ιησού

1:2  χάρις υμίν και ειρήνη από θεού πατρός ημών και κυρίου Ιησού χριστού

1:3  ευλογητός ο θεός και πατήρ του κυρίου ημών Ιησού χριστού ο ευλογήσας ημάς εν πάση ευλογία πνευματική εν τοις επουρανίοις εν χριστώ

1:4  καθώς εξελέξατο ημάς εν αυτώ προ καταβολής κόσμου είναι ημάς αγίους και αμώμους κατενώπιον αυτού εν αγάπη

1:5  προορίσας ημάς εις υιοθεσίαν διά Ιησού χριστού εις αυτόν κατά την ευδοκίαν του θελήματος αυτού

1:6  εις έπαινον δόξης της χάριτος αυτού εν η εχαρίτωσεν ημάς εν τω ηγαπημένω

1:7  εν ω έχομεν την απολύτρωσιν διά του αίματος αυτού την άφεσιν των παραπτωμάτων κατά τον πλούτον της χάριτος αυτού

1:8  ης επερίσσευσεν εις ημάς εν πάση σοφία και φρονήσει

1:9  γνωρίσας ημίν το μυστήριον του θελήματος αυτού κατά την ευδοκίαν αυτού ην προέθετο εν αυτώ

1:10  εις οικονομίαν του πληρώματος των καιρών ανακεφαλαιώσασθαι τα πάντα εν τω χριστώ τα εν τοις ουρανοίς και τα εν της γης εν αυτώ

1:11  εν ω και εκληρώθημεν προορισθέντες κατά πρόθεσιν του τα πάντα ενεργούντος κατά την βουλήν του θελήματος αυτού

1:12  εις το είναι ημάς εις έπαινον της δόξης αυτού τους προηλπικότας εν τω χριστώ

1:13  εν ω και υμείς ακούσαντες τον λόγον της αληθείας το ευαγγέλιον της σωτηρίας υμών εν ω και πιστεύσαντες εσφραγίσθητε τω πνεύματι της επαγγελίας τω αγίω

1:14  ος εστιν αρραβών της κληρονομίας ημών εις απολύτρωσιν της περιποιήσεως εις έπαινον της δόξης αυτού

1:15  διά τούτο καγώ ακούσας την καθ΄ υμάς πίστιν εν τω κυρίω Ιησού και την αγάπην την εις πάντας τους αγίους

1:16  ου παύομαι ευχαριστών υπέρ υμών μνείαν υμών ποιούμενος επί των προσευχών μου

1:17  ίνα ο θεός του κυρίου ημών Ιησού χριστού ο πατήρ της δόξης δώη υμίν πνεύμα σοφίας και αποκαλύψεως εν επιγνώσει αυτού

1:18  πεφωτισμένους τους οφθαλμούς της διανοίας υμών εις το ειδέναι υμάς τις εστιν η ελπίς της κλήσεως αυτού και τις ο πλούτος της δόξης της κληρονομίας αυτού εν τοις αγίοις

1:19  και τι το υπερβάλλον μέγεθος της δυνάμεως αυτού εις ημάς τους πιστεύοντας κατά την ενέργειαν του κράτους της ισχύος αυτού

1:20  ην ενήργησεν εν τω χριστώ εγείρας αυτόν εκ των νεκρών και εκάθισεν εν δεξιά αυτού εν τοις επουρανίοις

1:21  υπεράνω πάσης αρχής και εξουσίας και δυνάμεως και κυριότητος και παντός ονόματος ονομαζομένου ου μόνον εν τω αιώνι τούτω αλλά και εν τω μέλλοντι

1:22  και πάντα υπέταξεν υπό τους πόδας αυτού και αυτόν έδωκε κεφαλήν υπέρ πάντα τη εκκλησία

1:23  ήτις εστί το σώμα αυτού το πλήρωμα του πάντα εν πάσι πληρουμένου

Chapter 2

2:1  και υμάς όντας νεκρούς τοις παραπτώμασι και ταις αμαρτίαις

2:2  εν αις ποτέ περιεπατήσατε κατά τον αιώνα του κόσμου τούτου κατά τον άρχοντα της εξουσίας του αέρος του πνεύματος του νυν ενεργούντος εν τοις υιοίς της απειθείας

2:3  εν οις και ημείς πάντες ανεστράφημέν ποτε εν ταις επιθυμίαις της σαρκός ημών ποιούντες τα θελήματα της σαρκός και των διανοιών και ήμεν τέκνα φύσει οργής ως και οι λοιποί

2:4  ο δε θεός πλούσιος ων εν ελέει διά την πολλήν αγάπην αυτού ην ηγάπησεν ημάς

2:5  και όντας ημάς νεκρούς τοις παραπτώμασι συνεζωοποίησε τω χριστώ χάριτί εστε σεσωσμένοι

2:6  και συνήγειρε και συνεκάθισεν εν τοις επουρανίοις εν χριστώ Ιησού

2:7  ίνα ενδείξηται εν τοις αιώσι τοις επερχομένοις τον υπερβάλλοντα πλούτον της χάριτος αυτού εν χρηστότητι εφ΄ ημάς εν χριστώ Ιησού

2:8  τη γαρ χάριτί εστε σεσωσμένοι διά της πίστεως και τούτο ουκ εξ υμών θεού το δώρον

2:9  ουκ εξ έργων ίνα μη τις καυχήσηται

2:10  αυτού γαρ εσμεν ποίημα κτισθέντες εν χριστώ Ιησού επί έργοις αγαθοίς οις προητοίμασεν ο θεός ίνα εν αυτοίς περιπατήσωμεν

2:11  διό μνημονεύετε ότι υμείς ποτέ τα έθνη εν σαρκί οι λεγόμενοι ακροβυστία υπό της λεγομένης περιτομής εν σαρκί χειροποιήτου

2:12  ότι ήτε εν τω καιρώ εκείνω χωρίς χριστού απηλλοτριωμένοι της πολιτείας του Ισραήλ και ξένοι των διαθηκών της επαγγελίας ελπίδα μη έχοντες και άθεοι εν τω κόσμω

2:13  νυνί δε εν χριστώ Ιησού υμείς οι ποτέ όντες μακράν εγγύς εγενήθητε εν τω αίματι του χριστού

2:14  αυτός γαρ εστιν η ειρήνη ημών ο ποιήσας τα αμφότερα εν και το μεσότοιχον του φραγμού λύσας

2:15  την έχθραν εν τη σαρκί αυτού τον νόμον των εντολών εν δόγμασι καταργήσας ίνα τους δύο κτίση εν εαυτώ εις ένα καινόν άνθρωπον ποιών ειρήνην

2:16  και αποκαταλλάξη τους αμφοτέρους εν ενί σώματι τω θεώ διά του σταυρού αποκτείνας την έχθραν εν αυτώ

2:17  και ελθών ευηγγελίσατο ειρήνην υμίν τοις μακράν και τοις εγγύς

2:18  ότι δι΄ αυτού έχομεν την προσαγωγήν οι αμφότεροι εν ενί πνεύματι προς τον πατέρα

2:19  άρα ούν ουκέτι εστέ ξένοι και πάροικοι αλλά συμπολίται των αγίων και οικείοι του θεού

2:20  εποικοδομηθέντες επί τω θεμελιώ των αποστόλων και προφητών όντος ακρογωνιαίου αυτού Ιησού χριστού

2:21  εν ω πάσα οικοδομή συναρμολογουμένη αύξει εις ναόν άγιον εν κυρίω

2:22  εν ω και υμείς συνοικοδομείσθε εις κατοικητήριον του θεού εν πνεύματι

Chapter 3

3:1  τούτου χάριν εγώ Παύλος ο δέσμιος του χριστού Ιησού υπέρ υμών των εθνων

3:2  είγε ηκούσατε την οικονομίαν της χάριτος του θεού της δοθείσης μοι εις υμάς

3:3  ότι κατά αποκάλυψιν εγνώρισέ μοι το μυστήριον καθώς προέγραψα εν ολίγω

3:4  προς ο δύνασθε αναγινώσκοντες νοήσαι την σύνεσίν μου εν τω μυστηρίω του χριστού

3:5  ο εν ετέραις γενεαίς ουκ εγνωρίσθη τοις υιοίς των ανθρώπων ως νυν απεκαλύφθη τοις αγίοις αποστόλοις αυτού και προφήταις εν πνεύματι

3:6  είναι τα έθνη συγκληρόνομα και σύσσωμα και συμμέτοχα της επαγγελίας αυτού εν τω χριστώ διά του ευαγγελίου

3:7  ου εγενόμην διάκονος κατά την δωρεάν της χάριτος του θεού την δοθείσάν μοι κατά την ενέργειαν της δυνάμεως αυτού

3:8  εμοί τω ελαχιστοτέρω πάντων των αγίων εδόθη η χάρις αύτη εν τοις έθνεσιν ευαγγελίσασθαι τον ανεξιχνίαστον πλούτον του χριστού

3:9  και φωτίσαι πάντας τις η κοινωνία του μυστηρίου του αποκεκρυμμένου από των αιώνων εν τω θεώ τω τα πάντα κτίσαντι διά Ιησού χριστού

3:10  ίνα γνωρισθή νυν ταις αρχαίς και ταις εξουσίαις εν τοις επουρανίοις διά της εκκλησίας η πολυποίκιλος σοφία του θεού

3:11  κατά πρόθεσιν των αιώνων ην εποίησεν εν χριστώ Ιησού τω κυρίω ημών

3:12  εν ω έχομεν την παρρησίαν και την προσαγωγήν εν πεποιθήσει διά της πίστεως αυτού

3:13  διό αιτούμαι μη εκκακείν εν ταις θλίψεσί μου υπέρ υμών ήτις εστί δόξα υμών

3:14  τούτου χάριν κάμπτω τα γόνατά μου προς τον πατέρα του κυρίου ημών Ιησού χριστού

3:15  εξ ου πάσα πατριά εν ουρανοίς και επί γης ονομάζεται

3:16  ίνα δώη υμίν κατά τον πλούτον της δόξης αυτού δυνάμει κραταιωθήναι διά του πνεύματος αυτού εις τον έσω άνθρωπον

3:17  κατοικήσαι τον χριστόν διά της πίστεως εν ταις καρδίαις υμών εν αγάπη ερριζωμένοι και τεθεμελιωμένοι

3:18  ίνα εξισχύσητε καταλαβέσθαι συν πάσι τοις αγίοις τι το πλάτος και μήκος και βάθος και ύψος

3:19  γνώναί τε την υπερβάλλουσαν της γνώσεως αγάπην του χριστού ίνα πληρωθήτε εις παν το πλήρωμα του θεού

3:20  τω δε δυναμένω υπέρ πάντα ποιήσαι υπερεκπερισσού ων αιτούμεθα η νοούμεν κατά την δύναμιν την ενεργουμένην εν ημίν

3:21  αυτώ η δόξα εν τη εκκλησία εν χριστώ Ιησού εις πάσας τας γενεάς του αιώνος των αιώνων αμήν

Chapter 4

4:1  παρακαλώ ούν υμάς εγώ ο δέσμιος εν κυρίω αξίως περιπατήσαι της κλήσεως ης εκλήθητε

4:2  μετά πάσης ταπεινοφροσύνης και πραότητος μετά μακροθυμίας ανεχόμενοι αλλήλων εν αγάπη

4:3  σπουδάζοντες τηρείν την ενότητα του πνεύματος εν τω συνδέσμω της ειρήνης

4:4  εν σώμα και εν πνεύμα καθώς και εκλήθητε εν μιά ελπίδι της κλήσεως υμών

4:5  εις κύριος μία πίστις εν βάπτισμα

4:6  εις θεός και πατήρ πάντων ο επί πάντων και διά πάντων και εν πάσιν υμίν

4:7  ενί δε εκάστω ημών εδόθη η χάρις κατά το μέτρον της δωρεάς του χριστού

4:8  διό λέγει αναβάς εις ύψος ηχμαλώτευσεν αιχμαλωσίαν και έδωκε δόματα τοις ανθρώποις

4:9  το δε ανέβη τι εστιν ει μη ότι και κατέβη πρώτον εις το κατώτερα μέρη της γης

4:10  ο καταβάς αυτός εστι και ο αναβάς υπεράνω πάντων των ουρανών ίνα πληρώση τα πάντα

4:11  και αυτός έδωκε τους μεν αποστόλους τους δε προφήτας τους δε ευαγγελιστάς τους δε ποιμένας και διδασκάλους

4:12  προς τον καταρτισμόν των αγίων εις έργον διακονίας εις οικοδομήν του σώματος του χριστού

4:13  μέχρι καταντήσωμεν οι πάντες εις την ενότητα της πίστεως και της επιγνώσεως του υιού του θεού εις άνδρα τέλειον εις μέτρον ηλικίας του πληρώματος του χριστού

4:14  ίνα μηκέτι ώμεν νήπιοι κλυδωνιζόμενοι και περιφερόμενοι παντί ανέμω της διδασκαλίας εν τη κυβεία των ανθρώπων εν πανουργία προς την μεθοδείαν της πλάνης

4:15  αληθεύοντες δε εν αγάπη αυξήσωμεν εις αυτόν τα πάντα ος εστιν η κεφαλή ο χριστός

4:16  εξ ου παν το σώμα συναρμολογούμενον και συμβιβαζόμενον διά πάσης αφής της επιχορηγίας κατ΄ ενέργειαν εν μέτρω ενός εκάστου μέρους την αύξησιν του σώματος ποιείται εις οικοδομήν εαυτού εν αγάπη

4:17  τούτο ούν λέγω και μαρτύρομαι εν κυρίω μηκέτι υμάς περιπατείν καθώς και τα λοιπά έθνη περιπατεί εν ματαιότητι του νοός αυτών

4:18  εσκοτισμένοι τη διανοία όντες απηλλοτριωμένοι της ζωής του θεού διά την άγνοιαν την όυσαν εν αυτοίς διά την πώρωσιν της καρδίας αυτών

4:19  οίτινες απηλγηκότες εαυτούς παρέδωκαν τη ασελγεία εις εργασίαν ακαθαρσίας πάσης εν πλεονεξία

4:20  υμείς δε ουχ ούτως εμάθετε τον χριστόν

4:21  είγε αυτόν ηκούσατε και εν αυτώ εδιδάχθητε καθώς εστιν αλήθεια εν τω Ιησού

4:22  αποθέσθαι υμάς κατά την προτέραν αναστροφήν τον παλαιόν άνθρωπον τον φθειρόμενον κατά τας επιθυμίας της απάτης

4:23  ανανεούσθαι δε τω πνεύματι του νοός υμών

4:24  και ενδύσασθαι τον καινόν άνθρωπον τον κατά θεόν κτισθέντα εν δικαιοσύνη και οσιότητι της αληθείας

4:25  διό αποθέμενοι το ψεύδος λαλείτε αλήθειαν έκαστος μετά του πλησίον αυτού ότι εσμέν αλλήλων μέλη

4:26  οργίζεσθε και μη αμαρτάνετε ο ήλιος μη επιδυέτω επί τω παροργισμώ υμών

4:27  μηδέ δίδοτε τόπον τω διαβόλω

4:28  ο κλέπτων μηκέτι κλεπτέτω μάλλον δε κοπιάτω εργαζόμενος το αγαθόν ταις χερσίν ίνα έχη μεταδιδόναι τω χρείαν έχοντι

4:29  πας λόγος σαπρός εκ του στόματος υμών μη εκπορευέσθω αλλ΄ ει τις αγαθός προς οικοδομήν της χρείας ίνα δω χάριν τοις ακούουσι

4:30  και μη λυπείτε το πνεύμα το άγιον του θεού εν ω εσφραγίσθητε εις ημέραν απολυτρώσεως

4:31  πάσα πικρία και θυμός και οργή και κραυγή και βλασφημία αρθήτω αφ΄ υμών συν πάση κακία

4:32  γίνεσθε δε εις αλλήλους χρηστοί εύσπλαγχνοι χαριζόμενοι εαυτοίς καθώς και ο θεός εχαρίσατο ημίν εν χριστω

Chapter 5

5:1  γίνεσθε ούν μιμηταί του θεού ως τέκνα αγαπητά

5:2  και περιπατείτε εν αγάπη καθώς και ο χριστός ηγάπησεν ημάς και παρέδωκεν εαυτόν υπέρ ημών προσφοράν και θυσίαν τω θεώ εις οσμήν ευωδίας

5:3  πορνεία δε και πάσα ακαθαρσία η πλεονεξία μηδέ ονομαζέσθω εν υμίν καθώς πρέπει αγίοις

5:4  και αισχρότης και μωρολογία η ευτραπελία τα ουκ ανήκοντα αλλά μάλλον ευχαριστία

5:5  τούτο γαρ εστε γινώσκοντες ότι πας πόρνος η ακάθαρτος η πλεονέκτης ος εστιν ειδωλολάτρης ουκ έχει κληρονομίαν εν τη βασιλεία του χριστού και θεού

5:6  μηδείς υμάς απατάτω κενοίς λόγοις διά ταύτα γαρ έρχεται η οργή του θεού επί τους υιούς της απειθείας

5:7  μη ούν γίνεσθε συμμέτοχοι αυτών

5:8  ήτε γαρ ποτε σκότος νυν δε φως εν κυρίω ως τέκνα φωτός περιπατείτε

5:9  ο γαρ καρπός του πνεύματος εν πάση αγαθωσύνη και δικαιοσύνη και αληθεία

5:10  δοκιμάζοντες τι εστιν ευάρεστον τω κυρίω

5:11  και μη συγκοινωνείτε τοις έργοις τοις ακάρποις του σκότους μάλλον δε και ελέγχετε

5:12  τα γαρ κρυφή γινόμενα υπ΄ αυτών αισχρόν εστι και λέγειν

5:13  τα δε πάντα ελεγχόμενα υπό του φωτός φανερούται παν γαρ το φανερούμενον φως εστι

5:14  διό λέγει έγειρε ο καθεύδων και ανάστα εκ των νεκρών και επιφαύσει σοι ο χριστός

5:15  βλέπετε ούν πως ακριβώς περιπατείτε μη ως άσοφοι αλλ΄ ως σοφοί

5:16  εξαγοραζόμενοι τον καιρόν ότι αι ημέραι πονηραί εισι

5:17  διά τούτο μη γίνεσθε άφρονες αλλά συνιέντες τι το θέλημα του κυρίου

5:18  και μη μεθύσκεσθε οίνω εν ω εστιν ασωτία αλλά πληρούσθε εν πνεύματι

5:19  λαλούντες εαυτοίς ψαλμοίς και ύμνοις και ωδαίς πνευματικαίς άδοντες και ψάλλοντες εν τη καρδία υμών τω κυρίω

5:20  ευχαριστούντες πάντοτε υπέρ πάντων εν ονόματι του κυρίου ημών Ιησού χριστού τω θεώ και πατρί

5:21  υποτασσόμενοι αλλήλοις εν φόβω θεού

5:22  αι γυναίκες τοις ιδίοις ανδράσιν υποτάσσεσθε ως τω κυρίω

5:23  ότι ο ανήρ εστι κεφαλή της γυναικός ως και ο χριστός κεφαλή της εκκλησίας και αυτός εστι σωτήρ του σώματος

5:24  αλλ΄ ώσπερ η εκκλησία υποτάσσεται τω χριστώ ούτω και αι γυναίκες τοις ιδίοις ανδράσιν εν παντί

5:25  οι άνδρες αγαπάτε τας γυναίκας εαυτών καθώς και ο χριστός ηάπησε την εκκλησίαν και εαυτόν παρέδωκεν υπέρ αυτής

5:26  ίνα αυτήν αγιάση καθαρίσας τω λουτρώ του ύδατος εν ρήματι

5:27  ίνα παραστήση αυτήν εαυτώ ένδοξον την εκκλησίαν μη έχουσαν σπίλον η ρυτίδα η τι των τοιούτων αλλ΄ ίνα η αγία και άμωμος

5:28  ούτως οφείλουσιν οι άνδρες αγαπάν τας εαυτών γυναίκας ως τα εαυτών σώματα ο αγαπών την εαυτού γυναίκα εαυτόν αγαπά

5:29  ουδείς γαρ ποτε την εαυτού σάρκα εμίσησεν αλλ΄ εκτρέφει και θάλπει αυτήν καθώς και ο κύριος την εκκλησίαν

5:30  ότι μέλη εσμέν του σώματος αυτού εκ της σαρκός αυτού και εκ των οστέων αυτού

5:31  αντί τούτου καταλείψει άνθρωπος τον πατέρα αυτού και την μητέρα και προσκολληθήσεται προς την γυναίκα αυτού και έσονται οι δύο εις σάρκα μίαν

5:32  το μυστήριον τούτο μέγα εστίν εγώ δε λέγω εις χριστόν και εις την εκκλησίαν

5:33  πλήν και υμείς οι καθ΄ ένα έκαστος την εαυτού γυναίκα ούτως αγαπάτω ως εαυτόν η δε γυνή ίνα φοβήται τον άνδρα

Chapter 6

6:1  τα τέκνα υπακούετε τοις γονεύσιν υμών εν κυρίω τούτο γαρ εστι δίκαιον

6:2  τίμα τον πατέρα σου και την μητέρα ήτις εστι πρωτή εντολή εν επαγγελία

6:3  ίνα ευ σοι γένηται και έση μακροχρόνιος επί της γης

6:4  και οι πατέρες μη παροργίζετε τα τέκνα υμών αλλ΄ εκτρέφετε αυτά εν παιδεία και νουθεσία κυρίου

6:5  οι δούλοι υπακούετε τοις κύριος κατά σάρκα μετά φόβου και τρόμου εν απλότητι της καρδίας υμών ως τω χριστώ

6:6  μη κατ΄ οφθαλμοδουλείαν ως ανθρωπάρεσκοι αλλ΄ ως δούλοι του χριστού ποιούντες το θέλημα του θεού εκ ψυχής

6:7  μετ΄ ευνοίας δουλεύοντες ως τω κυρίω και ουκ ανθρώποις

6:8  ειδότες ότι ο εάν τι έκαστος ποιήση αγαθόν τούτο κομιείται παρά του κυρίου είτε δούλος είτε ελεύθερος

6:9  και οι κύριοι τα αυτά ποιείτε προς αυτούς ανιέντες την απειλήν ειδότες ότι και υμών αυτών ο κύριός εστιν εν ουρανοίς και προσωποληψία ουκ έστι παρ΄ αυτώ

6:10  το λοιπόν αδελφοί μου ενδυναμούσθε εν κυρίω και εν τω κράτει της ισχύος αυτού

6:11  ενδύσασθε την πανοπλίαν του θεού προς το δύνασθαι υμάς στήναι προς τας μεθοδείας του διαβόλου

6:12  ότι ουκ έστιν ημίν η πάλη προς αίμα και σάρκα αλλά προς τας αρχάς προς τας εξουσίας προς τους κοσμοκράτορας του σκότους του αιώνος τούτου προς τα πνευματικά της πονηρίας εν τοις επουρανίοις

6:13  διά τούτο αναλάβετε την πανοπλίαν του θεού ίνα δυνηθήτε αντιστήναι εν τη ημέρα τη πονηρά και άπαντα κατεργασάμενοι στήναι

6:14  στήτε ούν περιζωσάμενοι την οσφύν υμών εν αληθεία και ενδυσάμενοι τον θώρακα της δικαιοσύνης

6:15  και υποδησάμενοι τους πόδας εν ετοιμασία του ευαγγελίου της ειρήνης

6:16  επί πάσιν αναλαβόντες τον θυρεόν της πίστεως εν ω δυνήσεσθε πάντα τα βέλη του πονηρού τα πεπυρωμένα σβέσαι

6:17  και την περικεφαλαίαν του σωτηρίου δέξασθε και την μάχαιραν του πνεύματος ο εστι ρήμα θεού

6:18  διά πάσης προσευχής και δεήσεως προσευχόμενοι εν παντί καιρώ εν πνεύματι και εις αυτό τούτο αγρυπνούντες εν πάση προσκαρτερήσει και δεήσει περί πάντων των αγίων

6:19  και υπέρ εμού ίνα μοι δοθή λόγος εν ανοίξει του στόματός μου εν παρρησία γνωρίσαι το μυστήριον του ευαγγελίου

6:20  υπέρ ου πρεσβεύω εν αλύσει ίνα εν αυτώ παρρησιάσωμαι ως δει με λαλήσαι

6:21  ίνα δε ειδήτε και υμείς τα κατ΄ εμέ τι πράσσω πάντα υμίν γνωρίσει Τυχικός ο αγαπητός αδελφός και πιστός διάκονος εν κυρίω

6:22  ον έπεμψα προς υμάς εις αυτό τούτο ίνα γνώτε τα περί ημών και παρακαλέση τας καρδίας υμών

6:23  ειρήνη τοις αδελφοίς και αγάπη μετά πίστεως από θεού πατρός και κυρίου Ιησού χριστού

6:24  η χάρις μετά πάντων των αγαπώντων τον κύριον ημών Ιησούν χριστόν εν αφθαρσία αμήν