Azeri - Ephesians

Chapter 1

1:1  تارينين ائراده​‌سي ائله مسئح عئسانين حوارئسي پولوسدان، اِفِسوسدا اولان و مسئح عئسايا وفالي اولان موقدّسلره:

1:2  آتاميز تاريدان و رب عئسا مسئحدن سئزه فيض و باريش اولسون.

1:3  موتبارک اولسون تاري و ربّئمئز عئسا مسئحئن آتاسي کي، بئزي مسئحده هر جور روحاني برکتله سماوي يرلرده موبارک ادئب.

1:4  نجه کي، دونيانين بئناسيندان ائره​لي بئزي مسئحده سچدي کي، بئز اونون حوضوروندا موقدّس و لکه​سئز اولاق.

1:5  محبّتده او، اؤز ائراده​سئنئن خوشلوغونا گؤره، عئسا مسئحئن واسئطه​‌سئله، ائره​لئدن بئزي اؤز اوغوللوغونا موقدّر اتدي.

1:6  اِله کي، سوگئلي اوغلوندا بئزه باغيشلاديغي عئزّتلي فيضي مدح اولونسون.

1:7  مسئحده اونون قانينين واسئطه‌سئله خئلاصيميز وار، يعني اونون فيضئنئن دؤولتلئيئنه گؤره، خاطالارين باغيشلانماسي کي،

1:8  بئزئم اوستوموزه بول-بول تؤکدو. اِله کي، بوتون حئکمت و بصئرتده،

1:9  مسئحده نئيّت اتدئيي اؤز خوشلوغونا گؤره، ائراده​سئنئن سئرّئني بئزه بئلدئردي

1:10  کي، واختلارين کامئل​لئيئنئن ترتئبئنده گؤيلرده و يرده اولان شيلرئن هاميسيني مسئحئن باشچيليغي آلتيندا بئرلَشدئرسئن.

1:11  مسئحده بئز ده وارئث اولدوق، يعني اونون نئيّتئنه گؤره، اوّلدن بئزه موقدّر اولدو کي، بوتون شيلري اؤز ائراده​سئنئن مصلحتئنه گؤره يرئنه يتئرئر.

1:12  اِله کي، مسئحه ائلک اومئد باغلاميش اولان بئزلر، اونون جلالينين حمدي اوچون اولاق.

1:13  اوندا، سئز ده حقئقت کلاميني، نئجاتينيزين خوش خبرئني اشئدئب ائنانديقدا، وعده​نئن موقدّس روحو ائله مسئحده مؤهورلَندئنئز کي،

1:14  مئراثيميزين بِيئدئر؛ بله کي، تارييا عاييد اولانلار خئلاص اولونسونلار و بلجه اونون جلالي مدح اِدئلسئن.

1:15  بونا گؤره من ده، رب عئسايا اولان ائمانينيزي و بوتون موقدّسلره اولان محبّتئنئزي اشئدئب،

1:16  سئزئن اوچون شوکور اتمکدن و سئزي دوعالاريمدا يادا گتئرمکدن دايانميرام.

1:17  اِله کي، ربّئمئز عئسا مسئحئن تاريسي، عئزّتلي آتا، سئزه اؤز معرئفتئنده حئکمت و وحي روحونو ورسئن.

1:18  و اوره‌يئنئزئن گؤزلرئني ائشيقلانديرسين کي، بئله​سئنئز اونون دعوتئنئن اومئدي و اونون مئراثينين عئزّتلي دؤولتلئيي موقدّسلرده نه‌دئر.

1:19  و بئز ائمان گتئرنلر اوچون اونون قودرتئنئن حدسئز عظمتئني ده بئله​سئنئز. بونلار اونون قووّتلي قودرتئنئن ائشلمه‌يي‌دئر کي،

1:20  مسئحي اؤلولردن دئرئلدرکن و سماوي يرلرده اؤز صاغيندا اوتوردارکن، اوندا ظاهئر اتدي؛

1:21  هر ريئسلئکدن، ائقتئداردان، قودرتدن، حاکئمئيّتدن، و هر آددان اوستون، نه آنجاق بو عصرده، آمّا گله​جک عصرده ده.

1:22  هر شيي اونون آياقلاري آلتينا قويوب، اونو بوتون شيلرئن باشي اولاراق کئلئسايا وردي کي،

1:23  اونون بدني‌دئر: اونون دولولوغو کي، هاميني هاميدا دولدورور.

Chapter 2

2:1  و سئز خاطالار و گوناهلارينيز ائچنده اؤلموشدونوز.

2:2  بئر زامانلار اونلاردا بو دونيانين گدئشئنه گؤره رفتار اتدئنئز؛ هاوا ريئسئنئن قودرتئنه گؤره، يعني او روحا گؤره کي، ائندي ائطاعتسئزلئيئن اوغوللاريندا عمل ادئر.

2:3  اونلارين آراسيندا بئر زامانلار بئز هاميميز دا جئسمئن شهوتلرئنده ياشاياراق، جئسمئن و فئکرئن هاوا-هوسلرئني يرئنه يتئرئب، اؤزگه​لر کئمي بئز ده طبئعتن قضبئن اؤولادلاري ائدئک.

2:4  لاکئن مرحمتي بول اولان تاري، بئزي سودئيي بؤيوک محبّتئندن اؤتري،

2:5  حتّا خاطالاريميز اوزوندن اؤلو اولدوغوموز حالدا دا، بئزه مسئحله برابر حيات وردي. سئز فيضله نئجات تاپيبسينيز.

2:6  و اونونلا بئزي دئرئلدئب، مسئح عئسادا اونونلا بئزي سماوي يرلرده اوتورتدو.

2:7  اِله کي، گله​جک عصرلرده اؤز فيضئنئن حدسئز دؤولتلئيئني مسئح عئسادا بئزه شفقتله گؤرسدسئن.

2:8  چونکي سئز فيض واسئطه‌سئله ائمان يولو ائله نئجات تاپيبسينيز و بو سئزدن ديئل، تارينين عطاسي‌دير.

2:9  عمل‌لردن ديئل کي، هچ کئم فخر اتمه‌سئن.

2:10  چونکي بئز اونون صَنَتئيئک و مسئح عئسادا ياخشي عمل‌لر اوچون يارانديق. بو عمل‌لري تاري قاباقجادان حاضيرلادي کي، بئز اونلاردا رفتار ادک.

2:11  بونا گؤره سئز جئسمن قيري‌​يهودي اولانلار کي، ائنسان اَلي ائله "ختنه اولموشلار" طرفئندن، "ختنه​سئزلر" چاغيريليرسينيز، خاطيرلايين کي،

2:12  بئر زامانلار مسئحدن آيري، ائسرايئل هموطنلئيئندن اشئک و وعده​نئن عهدلرئنه قرئب ائدئنئز. هچ بئر اومئدئنئز يوخ ائدي و دونيادا تاريسيز ائدئنئز.

2:13  آمّا ائندي مسئح عئسادا، سئز کي، بئر زامانلار اوزاق ائدئنئز، مسئحئن قاني سببي ائله ياخين اولدونوز.

2:14  چونکي او اؤزو بئزئم باريشيميزدير کي، هر ائکئسئني بئر ادئب آيريليق دوواريني آراليقدان ييخدي.

2:15  يعني اؤز جئسمئنده عداوتي، قايدالاردا احکاملارين شرئعتئني باطئل اتدي کي، باريش قوروب اؤزونده او ائکئدن تزه بئر ائنسان ياراتسين.

2:16  و چارميخ واسئطه‌سئله هر ائکئسئني تک بئر بدنده تاري ائله باريشديرسين و اونونلا عداوتي اؤلدورسون.

2:17  او گلدي و هم اوزاقدا اولان سئزلره، هم ده ياخيندا اولانلارا باريشي وعظ اتدي.

2:18  چونکي اونون واسئطه‌سئله ائکئمئزين ده بئر روحدا آتانين حوضورونا يولوموز آچيقدير.

2:19  دمه‌لي بوندان بله، سئز، نه يادسينيز، نه ده اجنبي. لاکئن موقدّسلرله برابر هموطن و تارينين عايئله​سئندنسئنئز.

2:20  و حوارئلر و نبئلرئن بونؤوره​سي اوستونده بئنا اولوبسونوز کي، اونون بوجاق داشي مسئح عئسا اؤزودور.

2:21  اوندا بوتون عئمارت هماهنگ دوزولوب، ربّه عاييد موقدّس بئر معبد اولماق اوچون بئنا اولور.

2:22  و اوندا سئز ده بئرلئکده تئکئلئرسئنئز کي، تارينين روحن ساکئن اولدوغو بئر ير اولاسينيز.

Chapter 3

3:1  بو سببدن من پولوس، سئز قيري‌​يهودئلر اوچون مسئح عئسانين زئندانئسي،

3:2  اگر حقئقتن تارينين سئزئن اوچون منه امانت ورئلدئيي فيضئني اشئتمئش اولاسينيز.

3:3  کي، وحي واسئطه‌سئله سئرّ اولان منه بئلدئرئلدي، نجه کي، بوندان قاباق قيساجا يازديم.

3:4  اونا گؤره ده، بونو اوخوياندا منئم مسئحئن سئرّئنده اولان بصئرتئمي آنلايا بئلئرسئنئز.

3:5  بو سئرّ اؤزگه نسئل‌لرده ائنسان اوغوللاري اوچون آشکار اولماميشدي، نجه کي، ائندي موقدّس روحدا اؤز موقدّس حوارئلر و نبئلرئنه آشکار ادئب.

3:6  کي، قيري‌​يهودئلر ده ائنجئلئن واسئطه‌سئله مسئح عئسادا همن مئراثين وارئثي، همن بدنئن عوضوو، و همن وعده​نئن شرئکي‌دئرلر.

3:7  من ده تارينين قودرتئنئن ائشئنه گؤره، منه باغيشلانميش تارينين فيض عطاسينا اساسن اونون خئدمتچئسي اولدوم.

3:8  و منه، بوتون موقدّسلرئن لاپ کئچئيئنه، بو فيض عطا اولوندو کي، مسئحئن قئياسا گلمه‌ين دؤولتلرئني قيري‌​يهودئلره وعظ ادئم.

3:9  و آيدينلاشديريم کي، هر شيي يارادان تاريدا ازلدن گئزلنمئش سئرّئن ترتئبي نه‌دئر.

3:10  اِله کي، تارينين قات-قات حئکمتي کئلئسانين واسئطه​‌سئله سماوي يرلرده اولان ريئسلر و ائقتئدار صاحئبلرئنه بئلدئرئلسئن.

3:11  بو ابدي مقصده گؤره ائدي کي، تاري اونو ربّئمئز مسئح عئسادا انجامينا يتئردي.

3:12  مسئحده اونا اولان ائمان واسئطه​‌سئله ياخينلاشماغا جورعت و يقئنئمئز وار.

3:13  بونا گؤره سئزدن خاهئش ادئرم کي، سئزئن يولونوزدا چکدئيئم زحمتلره گؤره، اوره‌يئنئزي اوزولتميه​سئنئز. چونکي اونلار سئزئن عئزّتئنئزدئر.

3:14  بو سببدن آتانين حوضوروندا دئز چؤکورم کي،

3:15  گؤيده و يرده هر عايئله اوندان آدلانير.

3:16  اِله کي، اؤز عئزّتئنئن دؤولتئنه گؤره سئزه عطا اتسئن کي، باطئني ائنساندا اونون اؤز روحونون واسئطه​‌سئله قودرتله‌نئب، قووّت آلاسينيز.

3:17  و بلجه مسئح، ائمان واسئطه‌سئله، سئزئن اورکلرئنئزده ساکئن اولسون و سئز محبّتده کؤک آتيب، بونؤوره قويولاسينيز

3:18  بله کي، بوتون موقدّسلر​له بئرلئکده مسئحئن محبّتئنئن نه قدر گنئش، اوزون، اوجا و درئن اولدوغونو باشا دوشه بئله​سئنئز

3:19  و معرئفتدن چوخ اوستون اولان مسئحئن محبّتئني بئله​سئنئز کي، سئز تارينين بوتون دولولوغو ائله دولاسينيز.

3:20  ائندي اونا کي، بئزده، بئزئم ائچئمئزده ائشله‌ين قودرته گؤره، تؤکَنمَز بوللوقدا بوتون ائسته‌دئيئمئز و يا گومان اتدئيئمئزدن داها اوستون اتمه‌يه قادئردئر.

3:21  اونا کئلئسادا و مسئح عئسادا بوتون نسئل‌لر بويونجا شؤوکت اولسون. آمئن.

Chapter 4

4:1  بلجه ربّئن محبوسو اولان من، سئزه يالواريرام کي، آلديغينيز دعوته لايئق رفتار اده​سئنئز؛

4:2  بوتون باشي‌آشاغيليق و حلئملئکله، صبرله، محبّتده بئربئرئنئزه تحمّول اتمکله.

4:3  جهد ادئن کي، روحون بئرلئيئني باريش باغي ائله حئفظ اده​سئنئز.

4:4  بئر بدن و بئر روح وار، نجه کي، سئز ده دعوت اولان زامان بئر اومئده دعوت اولوندونوز.

4:5  بئر رب، بئر ائمان، بئر تعمئد،

4:6  بئر تاري و هامينين آتاسي کي، هامينين اوستونده، هامينين واسئطه​‌سئله و هاميدادير.

4:7  لاکئن فيض بئزئم هر بئرئمئزه مسئحئن عطاسينين اؤلچوسونه گؤره ورئلئب.

4:8  بونون اوچون بله ديئر: يوخارييا قالخديقدا، بئر قوشون اسئري، اسئرلئيه آپاردي، و ائنسانلارا عطالار وردي.

4:9  ائندي بو "قالخدي" سؤزو نه دمکدئر، مگر بو کي، او، اوّل يرئن اَسفلئنه اِندي.

4:10  اِنَن اله همن اودور کي، بوتون گؤيلرئن اوستونه ده قالخدي. اله کي، بوتون شيلري دولدورسون.

4:11  و او، بعضئلري حوارئلر، بعضئلري نبئلر، بعضئلري موبشّئرلر، بعضئلري ده شبانلار و موعلّئملر تعيئن اتدي کي،

4:12  موقدّسلر، خئدمت ائشئني يرئنه يتئرمک اوچون سئلاحلانيب، مسئحئن بدنئني بئنا اتسئنلر.

4:13  او قدر کي، هاميميز ائماندا، تاري اوغلونون معرئفتئنده بئرلئيه چاتيب، مسئحئن دولولوق قامتئنئن اؤلچوسونه قدر بؤيوموش بئر ائنسان اولاق.

4:14  بله کي، آرتيق اوشاق اولماييب، شپه​لر الئنده چالخالانماياق و هر تعلئمئن يلي ائله، ائنسانلارين کلکبازليغي​ ائله، آلداتان طرزلرئن حؤقّه​بازليغي ائله يولدان آزماياق.

4:15  آمّا حقئقتي محبّتده ديئب هر جهتدن اونون قدرئنجه بؤيويک کي، بدنئن باشي‌دير. يعني مسئح کي،

4:16  اونا اساسن بوتون بدن، هر بئر بندئن کؤمه‌‌يي ائله بئربئرئنئن يانينا قويولوب و هر عوضوون دوزگون ائشلمه‌سئنه گؤره، بدن بؤيويور کي، محبّتله بئنا اتسئن.

4:17  بلجه من بونو ديئب ربله بئرلئکده تصدئق ادئرم کي، سئز آرتيق قيري‌​يهودئلر کئمي ذهئنئن باطئللئيئنده رفتار اتمه‌يه​سئنئز؛

4:18  اونلارين دوشونجه​لرئني قارانليق باساراق، ائچلرئنده اولان جهالت اوزوندن و اورکلرئنئن برکلئيئندن تارينين حياتينا ياد اولوبلار.

4:19  اونلار هر جور حسّاسليغي ائتئرئب، اؤزلرئني سفالته تسلئم ادئرلر کي، هر جور نجئسلئيي طاماحلا يرئنه يتئرسئنلر.

4:20  آمّا سئز مسئحي بو يوللا اؤيرنمه‌يئبسئنئز،

4:21  اگر حقئقتن اونو اشئدئب و اوندا تعلئم ورئلئبسئنئز، نجه کي، حقئقت عئسادادير.

4:22  يعني سئزئن قاباق نجه ياشاديغينيزا باخاراق، کؤهنه منئيّتي کنارا آتين کي، حئيله​نئن شهوتلري ائله فسادا چکئلئب.

4:23  و ذهئنلرئنئزئن روحوندا تزه​له‌نئن

4:24  و تزه منئيّتي گيئن کي، صالحلئک، قودسئيّت و حقئقتده تارييا موطابئق يارانيب.

4:25  بونا گؤره، يالاني کنارا آتين؛ هر بئرئنئز اؤز قونشوسونا حقئقتي دسئن، چونکي بئز، بئربئرئمئزئن عوضولرئيئک.

4:26  قضبلننده گوناه اتمه‌يئن. قويمايين قضبئنئز ياتماميش، گون باتسين.

4:27  ائبلئسه هچ بئر فورصت ورمه‌يئن.

4:28  اوغورلوق اِدَن آرتيق اوغورلوق اتمه‌سئن؛ عکسئنه، زحمت چکئب اؤز اَللري ائله ياخشي ائشه مشغول اولسون کي، او اؤزو ده موحتاج اولان بئري ائله بئر شي پايلاشا بئلسئن.

4:29  آغزينيزدان هچ بئر ياوا سؤز چيخماسين، آنجاق احتئياجا گؤره، بئنا اتمک اوچون ياخشي سؤز ديئن کي، اشئدنلره فيض عطا اتسئن.

4:30  تارينين موقدّس روحونو قمگئن اتمه‌يئن. خئلاص گونو اوچون اونونلا مؤهورله‌نئبسئنئز.

4:31  قوي هر جور آجيليق، حئدّت، قضب، کوفر، و تؤهمت هر جور پئس نئيّتله برابر سئزدن اوزاق اولسون.

4:32  بئربئرئنئزه مهرئبان و شفقتلي اولون. بئربئرئنئزي باغيشلايين، نجه کي، تاري دا مسئح ده سئزي باغيشلاييب.

Chapter 5

5:1  بلجه، سوگئلي اوشاقلار کئمي تارييا اوخشار اولون

5:2  و محبّتده رفتار ادئن، نجه کي، مسئح ده بئزي سِودي و اؤزونو بئزئم اوچون تارييا خوش عطئرلي بئر هدئيه و قوربان تقدئم اتدي.

5:3  لاکئن سئزئن آرانيزدا عئفّتسئزلئيئن، هر جور ناپاکليق، يا دا طاماحين حتّا آدي بله ذئکر اولونماسين، نجه کي، موقدّسلره ياراشار.

5:4  بي‌ادبلئک و هرزه دانيشماق، يا دا ياوا ظارافاتلار دا اولماسين. بونلار ياراشماز. عکسئنه، شوکور ادئن.

5:5  چونکي بونو يقئنلئکله بئلئرسئنئز کي، مسئح و تارينين پادشاهليغيندا عئفّتسئز، يا دا ناپاک، يا دا بوتپرست اولان طاماحکار آدام مئراثا مالئک ديئل.

5:6  هچ کئم سئزي بوش سؤزلرله آلداتماسين، چونکي بو شيلر اوزوندن تارينين قضبي ائطاعتسئزلئيئن اوغوللاري اوستونه گلئر.

5:7  بونا گؤره اونلارين شرئکي اولمايين.

5:8  چونکي بئر زامانلار قارانليق ائدئنئز، لاکئن ائندي ربده ائشيقسينيز. ائشيق اؤولادلاري کئمي رفتار ادئن.

5:9  (چونکي ائشيغين ثمره​سي هر جور ياخشيليق، صالحلئک، و حقئقتده گؤرولور.)

5:10  چاليشين کي، ربّه نه‌يئن مقبول اولدوغونو اؤيرنه‌سئنئز.

5:11  قارانليغين ثمره​سئز عمللرئنده ائشتئراک اتمه‌يئن. عکسئنه، اونلاري ائفشا ادئن.

5:12  چونکي اونلارين گئزلئجه اتدئيي ائشلري باره​ده دانيشماق دا عاييبدير.

5:13  لاکئن ائشيغين واسئطه‌سئله اونلار ائفشا اولوناندا، هر شي گؤزه گؤرولن اولور. چونکي گؤزه گؤرولن هر شي ائشيقدير.

5:14  بونا گؤره ديئر کي، "اي ياتان، اويان، اؤلولردن دئرئل، مسئح سنه پارلاياجاقدير."

5:15  بلجه نه جور رفتار اتدئيئنئزه دئقّت ادئن، حئکمتسئز آداملار کئمي يوخ، حئکمتلئلر کئمي،

5:16  هر فورصتدن ائستئفاده ادئن، چونکي بو گونلر شرئردئر.

5:17  بونا گؤره ده عاغيلسيز اولمايين، آمّا آنلايين کي، ربّئن ائراده​سي نه‌دئر.

5:18  شرابلا کفلي اولمايين؛ سفاهته سبب اودور. لاکئن موقدّس روحلا دولون.

5:19  بئربئرئنئزه مزمورلار، ماهني‌لار و روحاني نغمه​لر اوخويون. اوره‌يئنئزده ربّه ترنّوم ادئب، اوخويون.

5:20  هر شي اوچون دائم ربّئمئز عئسا مسئحئن آديندا تارييا و آتايا شوکور ادئن.

5:21  مسئحه اتدئيئنئز حؤرمتدن اؤتري بئربئرئنئزه موطئع اولون.

5:22  اي آروادلار، ربّه موطئع اولور کئمي اؤز اَرلرئنئزه موطئع اولون.

5:23  چونکي اَر، آروادين باشي‌دير، نجه کي، مسئح کئلئسانين باشي‌دير و بدنئن قورتاريجيسي او، اؤزودور.

5:24  لاکئن نجه کي، کئلئسا مسئحه موطئعدئر، آروادلار دا گرک هر شيده اَرلرئنه موطئع اولسونلار.

5:25  اي اَرلر، آروادلارينيزي سوئن، نجه کي، مسئح ده کئلئساني سِودي و اؤزونو اونون اوچون فدا اتدي.

5:26  اله کي، اونو سو و کلام وسئله‌سئله يويوب تمئزله‌سئن و اونو تقدئس اتسئن.

5:27  و بو يوللا کئلئساني بوتون شؤوکتي ائچئنده اؤزونه تقدئم اتسئن کي، اوندا لکه، قيريشيق و يا بونلار کئمي شيلر اولماسين، آمّا موقدّس و مذمّتسئز اولسون.

5:28  بلجه اَرلر ده گرک آروادلاريني سِوسئنلر، نجه کي، اؤز بدنلرئني سوئرلر. آرواديني سِوَن، اؤزونو سِوئر.

5:29  چونکي هچ کئم هچ واخت اؤز بدنئندن نئفرت اتمه‌يئب، لاکئن اونو يدئردئر و اونا ياخشي يتئشئر. نجه کي، مسئح ده کئلئسايا بله ادئر.

5:30  چونکي بئز اونون بدنئنئن عوضولرئيئک.

5:31  بونا گؤره کئشي آتا-آناسيندان آيريلار، و اؤز آروادينا ياپيشار و او ائکي، بئر بدن اولارلار.

5:32  بو سئرّ بؤيوکدور. لاکئن من مسئح و کئلئساني گؤز قاباغينا آليب ديئرم.

5:33  هر حالدا، سئزئن آرانيزدا اولان هر کس ده اؤز آرواديني اؤزو کئمي سِوسئن و آرواد دا اَرئنه احتئرام اتسئن.

Chapter 6

6:1  اؤولادلار، ربده والئدِينلرئنئزدن ائطاعت ادئن، چونکي بو دوزدور.

6:2  آتا و آنانا حؤرمت ات (کي، وعده​لي اولان بئرئنجي حؤکمدور)

6:3  کي، سعادت سنه يار اولسون و ير اوزونده عؤمرون اوزون اولسون.

6:4  اي آتالار، سئز ده اؤولادلارينيزي قضبله‌ندئرمه‌يئن. لاکئن اونلاري ربّئن تربئيه و تعلئمئله بؤيودون.

6:5  اي قوللار، جئسمه گؤره آغالارينيز اولانلارا اوره‌يئنئزئن صافليغيندا قورخو و لرزه ائله موطئع اولون، نجه کي، مسئحه.

6:6  ائنسانلاري راضي اتمک ائسته‌ينلر کئمي گؤزه خوش گؤرونن خئدمتلر​له يوخ، مسئحئن قوللاري کئمي کي، اورکدن تارينين ائراده​سئني يرئنه يتئرئرلر.

6:7  خوش نئيّتله ائنسانلارا يوخ، ربّه قوللوق ادن کئمي خئدمت ادئن.

6:8  بئلئن ده کي، ياخشي ائش گؤرن هر کس ربدن عوضئني آلاجاق، ائستر قول اولسون، ائستر آزاد.

6:9  اي آغالار، سئز ده قوللارينيزلا همن جور رفتار ادئن. قورخوتماقدان اَل گؤتورون و بئلئن کي، هم اونلارين آغاسي هم ده سئزئن آغانيز گؤيده​دئر و او، هچ کسدن طرفدارليق اتمز.

6:10  نهايت، ربده قودرتلي، اونون دا قووّتئنده گوجلو اولون.

6:11  تارينين بوتون سئلاحلاريني گيئنئن کي، ائبلئسئن حئيله​لري قاباغيندا مؤحکم دايانا بئله​سئنئز.

6:12  چونکي بئزئم موبارئزه​مئز جئسم و قانين ضئدّئنه يوخ، رياستلرئن، قودرتلرئن، بو قارانليق دونيانين حؤکمدارلارينين و سماوي يرلرده اولان شرئر روحاني قووّه​لرئنئن ضئدّئنه‌دئر.

6:13  بونا گؤره تارينين بوتون سئلاحلاريني گؤتورون کي، شرئر گونده موقاوئمت اتمه‌يه قادئر اولاسينيز و هر شيي اِدَندن سونرا مؤحکم داياناسينيز.

6:14  بوندان اؤتري ده مؤحکم دايانين. بلئنئزه حقئقت قورشاغيني باغلايين. صالحلئک زئرهئني ده سئنه‌‌نئزه تاخين.

6:15  باريش ائنجئلئنئن حاضيرليغيني آياغينيزا گيئن.

6:16  و بونلارين هاميسيندان علاوه، ائمان قالخانيني اَله آلين کي، اونونلا او شرئر اولانين بوتون آلوولو اوخلاريني سؤندورمه‌يه قادئر اولارسينيز.

6:17  نئجات دَبئلقه‌سئني، و موقدّس روحون قيلينجيني دا کي، تارينين سؤزو اولسون، گؤتورون.

6:18  بوتون دوعا و يالواريشدا، همئشه موقدّس روحدا دوعا ادئن. و بونو گؤز قاباغيندا ساخلاييب، بوتون موقدّسلر اوچون بوتون ائستئقامت و يالواريشلا آييق اولون.

6:19  منئم اوچون ده دوعا ادئن کي، آغزيمي آچاندا آچيق دئل‌له دانيشماق عطا اولونسون. اِله کي، ائنجئلئن سئرّئني جسارتله بئلدئرئم کي،

6:20  بونون اوچون ده زنجئلرده باغلي اولان بئر اِلچي‌يَم؛ يعني، من اعلان اتدئکده اله جسارتله دانيشيم کي، اله دانيشماق منه گرکدئر.

6:21  آمّا منئم وضعئيّتئم باره​ده و بورادا نجه کچئرتدئيئم حاقدا، سوگئلي قارداش و ربّئن وفالي خئدمتچئسي تئخئکوسدان خبر آلا بئلرسئنئز. او هر شيي سئزه بئلدئره​جک.

6:22  و اونو محض بو نئيّت اوچون سئزئن يانينيزا گؤنده‌رمئشم کي، سئز بئزئم احوالاتيميزدان خبردار اولاسينيز و او، سئزئن اورکلرئنئزه تسلّي ورسئن.

6:23  آتا تاري و ربّ عئسا مسئحدن قارداشلارا ائمانلا بئرلئکده باريش و محبّت اولسون.

6:24  فيض بوتون او آداملارلا اولسون کي، ربّئمئز عئسا مسئحي اؤلمز محبّتله سوئرلر.