PohnOld - Ephesians

Chapter 1

1:1  PAULUS wanporon en Iesus Kristus amen pan kupur en Kot ong me saraui o lelapok kan ren Kristus Iesus me mi Episus.

1:2  Mak o popol sang ren Kot Sam atail o atail Kaun Iesus Kristus en mi re omail!

1:3  Meid iasanai Kot o Sam en atail Kaun Iesus Kristus, me kapaia kin kitail lar song en pai ngenin karos sang nanlang ren Kristus.

1:4  A kotin pil kitail dar re a, mon sappa saikenta pasondier, pwe kitail en saraui o minla mo a ni limpok.

1:5  Me pil kileledier, me kitail, en wiala sapwilim a seri ki Iesus Kristus, duen a kotin kupura mauki.

1:6  Pwen kalinganada a mak lapalap, me a kotin make kin kitail ren Kompoke pa a,

1:7  Me kotin dore kin kitail la nta o lapwadan dip akan ki a mak lapalap.

1:8  Me a kotiki ong kitail ni song en lolekong o koiok karos,

1:9  Ni a kotin diarok ong kitail er me rir en kupur a duen a kotin kupuramauki o duen a kileledier ren pein i.

1:10  Pwen pwaida ansau lao leler en wisik penang tapwi ta ieu meakaros, ren Kristus, men nanlang kan o men sappa kan ong pein i.

1:11  Me pil kare ong kitail soso eu, kitail me kileledier duen kupur en i, me kin wiada meakan karos, duen a kotin kupura,

1:12  Pwe kitail en wiala men kalinganada i, kitail, me kaporoporeki Kristus,

1:13  Me komail pil kaporoporeki murin omail ronger masan en melel o rongamau en kamaur; me pil kilele komail kidier Ngen saraui en inau, ni omail posonlar.

1:14  Iei men kamelele en atail soso, lao lel ansau en atail konodi maur soutuk, pwen wiala sapwilim en Kot o men kapinga a lingan.

1:15  Ari, i lao rongadar duen omail poson Kaun Iesus o duen omail limpok ong saraui kan karos,

1:16  I sota kin dukedi sang ai danke pweki komail, o i kin tamatamanda komail ni ai kapakap akan;

1:17  Pwe Kot en atail Kaun Iesus Kristus, Sam en lingan, en kotiki ong komail ngen en erpit o kaudial, pwen asada i,

1:18  O kotin kamaraini mas en mongiong omail, pwe komail en kak dedeki kaporopor en omail paeker, o lingan laud en soso, me onoper ong saraui kan,

1:19  O a manaman kaualap ong kitail, me posonlar, duen a dodok manaman,

1:20  Me a kotin kasansaledar ren Kristus ni a kotin kaiasada i sang ren me melar akan, ap kasapwiladang pali maun nanlang,

1:21  Ilela sang meakan karos, o manaman karos, o kelail o men poa kan o mar karos, kaidin ni muei wet eta, pwe pil ni muei kokodo.

1:22  O a kotiki ong meakaros pan aluwilu a kan, o kotin kasapwiladang tapwin meakaros ren momodisou,

1:23  Iei war a, iei kadir pan me kadirela meakaros.

Chapter 2

2:1  PIL dueta komail ni omail melaki sapung o dip akan,

2:2  Me komail dadaureki mas duen tiak en sappa et, o duen wiawia en saupeidi o, me manaman pan lang, iei ngen o, me kin dodok ren seri sopeik kan ansau wet.

2:3  A kitail karos pil weweid nan pung arail mas o ni inong en uduk atail, o kapwaiada inong en uduk o lamelam, o kitail me udan seri en ongiong akan dueta me tei kan.

2:4  A Kot, me dir en kalangan, pweki a limpok me a kotin pok ong kitail lar,

2:5  Nin dokan atail melaki sapung kan, nan a kamauri kitail dar ki Kristus, pwe mak o, me komail dore kila,

2:6  O pil kotin kamaur kitail dar o kotin kasapwil kitail dang nanlang ren Kristus Iesus,

2:7  Pwe a en kotin kasansaleda a mak o kalangan lapalap ni muei kokodo ong kitail ren Kristus Iesus.

2:8  Pwe ni poson komail kamaur kilar mak; a kaidin pweki pein komail, a pai eu ren Kot,

2:9  Kaidin ki wiawia kan, pwe sota amen en aksuaiki.

2:10  Pwe sapwilim a dodok kitail, me wiauier ren Kristus Iesus ong wiawia mau kan, me Kot kotin kaonopadang kitail er, pwe kitail en dadaurata.

2:11  Komail ari tamatamanda, me komail men liki mas o, me aluki uduk pwel, men kaindinda sosirkomsais ren me sirkomsais, me kin wiaui ni uduk mangin pa.

2:12  Pwe ni ansau o komail likin Kristus, o likin pai en Israel, o likin inau en soso kan; i me sota omail kaporopor o sota omail Kot ni sappa wet.

2:13  A komail me doo wei sang mepukat mas o, a ansau wet komail me korendor o mi ren Kristus Iesus pweki ntan Kristus.

2:14  Pwe i atail popol, me wia kin ira eu, o me kotin kawela kel o, me mi nan pung ara,

2:15  Ni a kotiki sang imwintiti re ’ra ki pali uduk a. Iei kapung o me audekier kusoned akan, pwe en kotin wia kin ir ala aramas kap ta men ong pein i.

2:16  Pwen kalolamaui ong Kot ira ni war ta ieu pan lopu murin a kotin tiakedi imwintiti ki lopu.

2:17  O a kotidoer padaki popol ong komail, me doo wei sang, o popol ong me koren akan.

2:18  Nan pweki i kita karos kak tu ong Sam ki Ngen ta ieu.

2:19  Komail ari solar men liki o men wai, a me pweledan akan iangaki saraui kan o kisan penainai en Kot.

2:20  Me kakauda pon pason en wanporon o saukop akan, a pein Iesus Kristus me takain pukakaim.

2:21  I wasa kasukasuk kin koda sang ia, wiala tanpas saraui en Kaun o,

2:22  Me komail pil iang kokon penang mol en Kot ren Ngen.

Chapter 3

3:1  I me ngai Paulus en Iesus Kristus a salidi men pweki komail men liki kan,

3:2  Due me komail rongadar iran ai koa dodok en mak en Kot, me i aleer pweki komail.

3:3  A kaudial eu, me kasansale ong ia, me rir akan, duen ai inting motomot ong komail er nin tapi o

3:4  Ari, ma komail pan wadok, komail ap pan diar, duen ai lolekong ni me rir akan ren Kristus.

3:5  Me sota kadiarok ong aramas akan ni muein mas o, ap kadiarok ong sapwilim a wanporon o saukop saraui kan ren Ngen:

3:6  Pwe men liki kan en iang soso o iang kisan war a, o iang a inau ren Kristus Iesus ki rongamau,

3:7  Me ngai wiala papa men duen ai pai en mak en Kot, me i aleer ki a manaman lapalap.

3:8  Ngai, me tikitik sang saraui kan karos, aleer mak wet, en padaki ong men liki kan duen kapwapwa lapalapia en Kristus.

3:9  O pwen kamaraini amen amen duen koa dodok en rir akan, me nekinek sang nin tapin kaua ren Kot, me kotin kapikadar meakan karos,

3:10  Pwe ansau wet men poa kan o me manaman akan, me kotikot nanlang, en ereki momodisou song en erpit en Kot karos.

3:11  Duen kupur a, me a kotin kileledier ni tapin kaua ren Kristus Iesus atail Kaun.

3:12  Pweki i me kitail pil kak aimaki tu ong Kot ni atail kaporopor o poson i.

3:13  Nan i me i men poeki, komail ender motot ki ai kamekam kin komail, pwe men kalinganada komail.

3:14  I me i kin kelepuki ong Sam en atail Kaun Iesus Kristus,

3:15  Me mar en penainai pokon nanlang o sappa tapi sang ia.

3:16  Pwen kotiki ong komail manaman, duen a kapwapwa en a lingan, en kelaileki Ngen i nan pali lol en aramas,

3:17  Pwe Kristus en kotikot nan mongiong omail pweki omail poson, pwe komail en tengedi o sondi ni limpok,

3:18  Ap kak ong iang saraui kan karos dedekida tälap, o anged, o lol, o ile;

3:19  O en pil asada limpok en Kristus, me sikida sang erpit karos, pwe komail en direki kupur en Kot karos.

3:20  A i, me manaman ong wiada, me lapa sang atail poeki o lamelame duen o manaman o, me kin dodok lol atail.

3:21  Lingan en ko ong i ni momodisou pan Kristus Iesus kokolata soutuk. Amen.

Chapter 4

4:1  NGAI en Kaun a salidi men, kin panaui komail, pwe komail en kekeid inenweita ni koa eu, me komail paeker ong,

4:2  Ni karakarak melel, o opampap, o kanongama, o limpok pena nan pung omail.

4:3  Angkelail ong wia minimin eu ni Ngen saupena ki sal en popol.

4:4  War ta ieu, o Ngen ta ieu, duen me komail paeker ong ni kaporopor ta ieu, en omail paeker ong.

4:5  Kaun ta men, poson ta ieu, paptais ta ieu,

4:6  Kot o Sam en karos me ta men me kotin poedi meakaros o daudaulole, o me kotikot lol atail karos.

4:7  A kitail karos aleer atail pai en mak duen song en kupur en Kristus.

4:8  I me a kotin masani: Ni a kotidalang poa, a kotin saliedi me salidi kan, o a kotiki ong aramas pai kan.

4:9  A iaduen, ma a kotidalang poa, kaidin a pil so kotidilar pa sed, wasa lolia mas o?

4:10  Me kotidila, i ota, me kotida wei ileila sang nanlang kan karos, pwen kadirela wasa karos.

4:11  O a kotin kasapwilada akai, en wanporon akan o akai en saukop akan, o akai en warongamau kan, o akai en silepa o saunpadak kan.

4:12  Pwen kapungala saraui kan ong wiawia dodok eu, me pan kauada war en Kristus.

4:13  Kitail karos lao lel ong poson ta ieu, o lolekong ki Sapwilim en Kot, o wiala ol melel, me paroki ong Kristus ni a unsokela,

4:14  Pwe kitail en solar tau en seri pwelel, me mokimokideki sili padak likam, me kin pwai kida kotaue en aramas akan o ar likam, o widiwiding me re kin wiada, pwen kaweid sapung.

4:15  A kitail en melel ni limpok, ap kakairida ni song karos ong Kristus, me tapwi o.

4:16  Me war pon kakauda sang o kokon akan karos katengeteng pena ia; a kokon pukat papa pena, duen dodok en kokon akan eu eu, duen ar itar ong, iduen war o kin kakairida o maular ni limpok.

4:17  I me i indai ong komail o kadede kila Kaun o, me komail ender weweid dueta men liki kan kin wia ni aklapalap en ngen ir.

4:18  Me ngen arail rotorotalar, o re sang maur en Kot, pweki ar sololekong me mi lol arail o pweki mongiong arail kapitakailar.

4:19  Me solar pam wasa, ap mueid ong pein irail, en dender o inong iong kapwaiada song en saut akan karos.

4:20  A kaidin iduen, me komail asadar ren Kristus.

4:21  Ma komail ronger duen i o padakki i, me tiak melel mi ren Iesus.

4:22  Komail ari muei sang tiak en mas o aramas maring, me kin kawe kila pein i inong sued.

4:23  A komail en kawilikapada ngen omail!

4:24  O danwar anekila aramas kap, me wiauier duen kupur en Kot, ni melel o pung o saraui.

4:25  I me komail en kasela likam amen amen ap lokaia melel ong men impa, pwe kitail sau ta ieu.

4:26  Ni makar komail der wia dip, o katipin der kirila mon omail insenemaula.

4:27  Ender duki ong tewil o!

4:28  Me pirap, ender pur ong pirap, a mak eta, en dodok, kadokeki pa kan dipisou mau, pwen kaonop da kisakis ong me samama kan.

4:29  Kasoi saut ender ko wei sang nan au omail, a men kamau, pwen papaki ong me karong akan me mau.

4:30  Komail der kamauke Ngen saraui en Kot, me komail kilelekier ong ran en kasapaledo!

4:31  A limelimek sued, o lingarangar, o makar, o men pei, o lalaue en doo wei sang komail, o pil song en sued karos.

4:32  A komail en kadek pena, o poka pena, o mak pena amen amen, dueta Kot kotin maki ong komail ren Kristus.

Chapter 5

5:1  KOMAIL kaalemongi Kot dueta seri kompok kan.

5:2  O kekeid ni limpok dueta Kristus, me kotin, pok ong kitail, ap kotin sokonpaude kin kitail, pwen wiala kisakis o mairong eu, me kin pomau ong Kot.

5:3  A nenek, o song en saut karos, o norok kapwa ender man pwaida re omail, duen me kon ong saraui kan.

5:4  Pil der lokaia sued, o kaman, o lokaia mal, me sota kon ong, a iet: Komail en danke.

5:5  Mepukat komail en asa o dedeki, me sota me nenek, de samin, de me norok kapwa, me pongi ani tikitik, pan kak sosoki wein Kristus o Kot.

5:6  Sota amen en kotau ki komail lokaia mal, pwe mepukat kin kareda ongiong en Kot ong seri sopeik kan.

5:7  Komail ender kis arail.

5:8  Pwe mas o komail me rotorot, a met komail marainlar ren Kaun o; weweid wei duen seri en marain akan.

5:9  Pwe wan marain mepukat: Kamau, o pung o melel.

5:10  O kasauiada, me kin kaperenda kupur en Kaun o.

5:11  O der waroki ong wiawia sued en me rotorot akan, a mak eta, en kapung ong irail.

5:12  Pwe me re kin wiada wasa rir, me sued o sota mau ong, en inda.

5:13  A karos me pan kasansaleda, pan kadiarok kida marain, pwe marain kin kasansaleda meakaros.

5:14  I me a kotin masani: Pirida koe me mamair, o paurida sang ren me melar akan, a Kristus pan kamarain uk ada.

5:15  Kalaka, pwe komail en keid ineneweita, kaidin duen me lolepon a duen me lolekong kan.

5:16  Audaud ansau mau, pweki ran akan me sued.

5:17  Komail ari ender lamponla, a en lolekong, pwe i duen kupur en Kaun.

5:18  Ender kamom wain, pwe a kin kareda tiak sued, a komail en direki Ngen.

5:19  O sauas pena ki psalm, o kaul en kaping, o kaul ngenin; komail kaul o kasang ong Kaun o nan mongiong omail.

5:20  Danke kaukaule Kot o Sam ni mar en atail Kaun Iesus Kristus.

5:21  O papa komail pena amen amen ni masak dol en Kristus.

5:22  Komail li akan, udi ong pein omail warok kan dueta ong Kaun.

5:23  Pwe ol o me tapwin a paud, dueta Kristus me tapwin momodisou, o i me Saunkamaur pan war a.

5:24  A duen momodisou kin udi ong Kristus, iduen li akan en udi ong ar warok kan ni meakaros.

5:25  Komail ol akan pok ong pein omail warok kan, dueta Kristus kotin pok ong momodisou o kotiki dong i pein i.

5:26  Pwen kasarauiala i, o kamakelekeleda i ki pil o, iei a masan.

5:27  Pwen kasansale dong pein i momodisou lingan, me sota topala o omrok ape, a me saraui o so kaopa kot.

5:28  Nan iduen ol akan en pok ong ar warok kan dueta pein war arail akan. Me kin pok ong a warok, kin pok ong pein i.

5:29  Sota amen kin suedeki pein uduk a; pwe a kin kamanga o kanainai eta, dueta Kristus kin kotin apwali momodisou.

5:30  Pwe kitail me kasang en war a, o uduk a, o a kokon akan.

5:31  I me aramas o pan muei sang sam a o in a, ap muei ong a paud, ira ari pan uduk ta ieu la.

5:32  Meid kaponepon lapalap eu; a ngai kaparokki duen Kristus a warokeki ong momodisou.

5:33  Pil dueta komail, amen amen komail en pok ong a warok dueta pein i, a li o en kakaki a warok.

Chapter 6

6:1  KOMAIL seri kan peiki ong me wia komail ada pan Kaun o, pwe i me pung.

6:2  Kakaki sam om o in om, iei tapin kusoned, me inaupa mia,

6:3  Pwe koe en insenemau o pil maur warai nin sappa.

6:4  Komail sam akan der kamakar mal noumail seri kan, kakair irail ada ni kaian mau o panau ong Kaun o.

6:5  Komail ladu kan en oke omail saumas akan ni pali uduk ni masak o rerer o pil ni tiak en karakarak en mongiong omail dueta ong Kristus.

6:6  Kaidin sansal mon aramas eta, pwen konekon re ’rail, a en dueta ladu en Kristus, me kin pereperen wiawia kupur en Kot sang mongiong omail.

6:7  O komail en papa mau, pwe ong Kaun o, a kaidin ong aramas akan.

6:8  Pwe komail asa, me mau kot, me amen pan wiada, Kaun pan katingi ong i sota lipilipil is i, ma ladu de me maioda amen.

6:9  O komail saumas akan en wia dueta ong irail, o der sakone irail, pwe komail asa, me arail o pil omail Saumas kotikot nanlang, o a sota kotin lipilipil aramas amen.

6:10  Ikmuri ri ai kan komail kelaileki Kaun o ni a manaman.

6:11  Puriong tatan mauin karos en Kot, pwe komail en kak kelail palian tewil a widiwiding kan.

6:12  Pwe kaidin uduk o nta, me kitail en pei ong, a ong saupeidi o manaman akan, o ong saumas en sappa kan, me kin kakaunda nan rotorot wet, o ong kaun ngenin en lang akan.

6:13  Ari, pweki mepukat komail en ale tatan mauin karos en Kot, pwe komail en kak kelail ni ran sued, o kasinenda murin omail kapwaiadar meakaros.

6:14  Komail ari kasinenda, luke pamail en katengetengki melel o pereki pere pan maramara me pung.

6:15  O nä omail en kitekit pena, pwen onop ong wa sili rongamau en popol.

6:16  A pil eu pan ko ong mepukat: Komail ale perepa en poson, pwen kakun kila katieu kisiniai en me sued o.

6:17  Komail pil ale lisorop en kamaur o kodlas en Ngen, me masan en Kot.

6:18  O podidi ong kapakap o wia poekipoeki. Ngidingidiki Ngen ni meakaros. O masamasan, o poden kapakapaki saraui kan karos.

6:19  O kapakapa kin ia, pwe i en ngil meledok o au ai en sara pasang ai aingar en kaweweda me rir en rongamau.

6:20  Me ngai saunpadakepa, me salidier, pwe i en kelail ong padapadaki, duen me kon ong.

6:21  A pwe komail en asa ir ai kan, o me i kin wiada, ri atail kompok Tikikus o papa lelapok en Kaun o, pan padaki ong komail meakaros.

6:22  I me i kadarala, pwe komail en asadar ir at akan, o pwe i en kamait mongiong omail.

6:23  Popol ong ri atail, o limpok iangaki poson sang ren Kot Sam o Kaun Iesus Kristus!

6:24  Mak en mimi ren karos, me kin pok ong atail Kaun Iesus Kristus kokolata!