Kapingamarangi - Ephesians

Chapter 1

1:1  Mai baahi o Paul, tangada agoago-hagau a Jesus Christ mai di hiihai o God, ang-gi nia daangada a God ala i Ephesus, ala e-buni manawa-dahi ang-gi Jesus Christ.

1:2  God tadau Damana, mo tadau Dagi go Jesus Christ gi-gowadu gi goodou tumaalia mo-di noho i-di aumaalia.

1:3  Gidaadou gi-danggee ang-gi God Tamana o tadau Dagi go Jesus Christ! I tadau buni-anga gi Christ, gei Mee gu-haga-maluagina gidaadou i dana gaamai nia maluagina o-di Hagataalunga mai i-di langi.

1:4  I-mua di hai o henuailala, gei God guu-lawa dana hili gidaadou belee hai nia dama ni-aana i tadau buni-anga gi Christ, bolo gidaadou gii-dabu gi-madammaa i ono mua. Idimaa go dono aloho,

1:5  God guu-lawa di-hagamaanadu bolo gidaadou gaa-hai nia dama ni-aana, mai i Christ. Di mee deenei la-di tene-hua ni Mee mo dono hiihai.

1:6  Gidaadou gi-hagaamuina a God i dono dumaalia madamada, i dana gaamai gi gidaadou dana wanga-dehuia, go dana Dama-daane dela e-aloho-ai.

1:7  Idimaa, nia dodo o Christ la-ne-haga-dagaloaha gidaadou, gei tadau huaidu la-gu-dumaalia ginai. Tumaalia o God le e-damanaiee huoloo,

1:8  dela ne-gaamai dehuia gi gidaadou haga-damana! Mai ono kabemee mo iloo-mee huogodoo,

1:9  God ne-hai-hua dana mee dela ne-hagababa i ono lodo, gaa-hai gidaadou gi-iloo dana hagamaanadu hagammuni, dela gu-maanadu go Mee bolo e-hai go Christ.

1:10  Di hagamaanadu deenei ga-haga-lawa go God i-di madagoaa e-donu ma-ga-dau-mai, dela bolo e-hagabudu-mai ana mee huogodoo ala ne-hai gi-di gowaa e-dahi, go nia mee huogodoo ala i-di langi mo i henuailala, belee dagi go Christ.

1:11  Nia mee huogodoo le e-hai gii-hai be-di hagamaanadu a God mo dono hiihai, gei God guu-hili gidaadou belee hai ana dama i tadau buni-anga gi Christ, gii-hai be dana hagamaanadu dela gu-dugu-mai-loo i-taamada.

1:12  Deelaa-laa, gidaadou ala ne-hagadagadagagee gi Christ matagidagi, gi-hagaamuina di madamada o God!

1:13  Gei goodou guu-hai labelaa nia daangada ni God i-di godou longono nnelekai e-donu, go di Longo-Humalia ne-gowadu gi goodou di haga-mouli. Goodou ne-hagadonu a Christ, gei God gaa-dugu dono maaga gi godou nua e-hagamodongoohia bolo goodou la nia dama ni-aana, i dana gowadu gi goodou di Hagataalunga-Dabu dela ne-hagababa-adu.

1:14  Di Hagataalunga la-di hagadootonu bolo gidaadou e-hai-mee gi-nia mee a God ala ne-hagababa ang-gi ana daangada, gei e-hai gidaadou gii-donu bolo God gaa-wanga di mehede hagatau gi digau ala guu-hai nia dama ni-aana. Gidaadou gi-hagaamuina dono madamada!

1:15  Mai i-di hadinga deenei, i-muli dogu madagoaa ne-longono di-godou hagadonu Tagi go Jesus, mo di-godou aaloho i-nia daangada a God huogodoo,

1:16  au digi dugua dagu danggee gi God i-lodo agu dalodalo,

1:17  gei au e-dangi ang-gi di God o tadau Dagi go Jesus Christ, dela go Tamana madamada bolo gi-gowadu di Hagataalunga dela e-hai goodou gi-maalama, gei e-hagi-adu a God bolo gi-iloo-goodou hagahumalia a-Mee.

1:18  Au e-dangi gi Mee bolo gi-hugee godou maanadu, gi-gidee-goodou dono maalama, gei goodou ga-iloo di hagadagadagagee dela ne-gahi-mai ginai goodou. E-maluagina behee go nia maluagina humalia ala ne-hagababa go Mee gi ana daangada.

1:19  Gei e-aali huoloo go dono mogobuna dela e-ngalua i-tadau lodo ala e-hagadonu. Di mogobuna dela e-ngalua i tadau lodo, la-di mogobuna maaloo

1:20  dela nogo hai-hegau-iei Mee i dono madagoaa ne-haga-mouli-aga a Christ gi-daha mo-di made, ga-haga-noho a-Mee i dono baahi gau-donu i tenua dela i-di langi.

1:21  Christ guu-dagi i-hongo nia dagi o digau di-langi huogodoo, digau aamua, digau mogobuna, mo nia dagi aamua. Mee dono ingoo damana i-hongo nia ingoo huogodoo ala llauehe i henuailala dolomeenei, mo-di madagoaa nomuli.

1:22  God guu-dugu nia mee huogodoo gi-lala nia babaawae o Christ, gei guu-dugu a-Mee gi dagia nia mee huogodoo o-di nohongo-dabu, bolo go Mee dela go Tagi damana.

1:23  Di nohongo-dabu la-go tuaidina o Christ, go Mee dela di haga-honu o-nia mee huogodoo i-nia madagoaa huogodoo.

Chapter 2

2:1  Lodo di madagoaa gu-doo gi-daha, gei goodou digau guu-mmade i-di hagataalunga, i-di godou de-hagalongo mo godou ihala.

2:2  I-di madagoaa deelaa, gei goodou nogo daudali nia hai huaidu o henuailala. Goodou nogo hagalongo gi-di tagi mogobuna huaidu dela i-lodo di ahiaalangi, di hagataalunga dela e-huwahuwa digau ala hagalee hagalongo gi God.

2:3  Gidaadou huogodoo nogo hai labelaa be digaula, nogo dagi go tadau hiihai, nogo hai-hua nia hiihai o tadau huaidina mo tadau maanadu huaidu. Lodo tadau mouli beelaa, gidaadou nogo hai-hua be digau dogologo ala guu-noho i-lodo di hagawelewele a God.

2:4  Gei tumaalia o-God gu i-lodo nia gowaa huogodoo, gei dono aloho i gidaadou le e-damanaiee,

2:5  Mee gu-dahi-aga gidaadou gi-mouli dalia a Christ i-di madagoaa gidaadou nogo mmade i-baahi tadau hagataalunga i tadau de-hagalongo. Ma go tumaalia dehuia o God dela ne-haga-mouli goodou.

2:6  Tadau buni-anga gi Jesus Christ, God gu-haga-mouli-aga gidaadou madalia a-Mee, e-dagi madalia a-Mee i tenua dela i-di langi.

2:7  God ne-hai di mee deenei belee haga-modongoohia i-nia madagoaa huogodoo ala ga-dau-mai, tamanaiee o dono dumaalia, i-lodo di aloho ne-hagamodongoohia mai i Jesus Christ.

2:8  Idimaa, ma go tumaalia dehuia o God dela ne-haga-mouli goodou mai di hagadonu. Hagalee mai godou hegau, gei mai tumaalia o-di wanga-dehuia a God. Deelaa-laa, tangada e-mee di bida hagaamu eia ai.

2:9  Idimaa, ma go tumaalia dehuia o God dela ne-haga-mouli goodou mai di hagadonu. Hagalee mai godou hegau, gei mai tumaalia o-di wanga-dehuia a God. Deelaa-laa, tangada e-mee di bida hagaamu eia ai.

2:10  God ne-hai gidaadou gii-hai beenei, gei i-lodo tadau buni-anga gi Jesus Christ, Mee ne-hai gidaadou gi-hai-mee gi-di mouli e-hai nnegau humalia ala guu-lawa dana hagatogomaalia mai gi gidaadou gi-heia.

2:11  Goodou ala ne-haanau digau tuadimee, ala e-haga-ingoo go digau o Jew bolo “Digau-Digi-Sirkumsais”, gei ginaadou e-haga-ingoo ginaadou bolo “Digau-Gu-Sirkumsais”, (di-mee e-hai go nia daane gi nadau huaidina), gi-langahia-goodou bolo goodou nogo hai behee i-lodo di madagoaa dela gu-doo gi-daha.

2:12  Di madagoaa deelaa, goodou nogo i-daha mo Christ, hagalee nia dama ni God ne-hilihili. Goodou hagalee nogo dau gi-nia hagababa a God ala ne-hai ang-gi ana daangada, gei goodou nogo mouli henuailala, di-godou hagadagadagagee gi di-godou God ai.

2:13  Gei dolomeenei, i-di godou buni-anga gi Jesus Christ, goodou ala nogo mogowaa i-daha, gu-haga-hoohoo-mai go nia dodo o Christ.

2:14  Ma go Christ hua dela ne-gaamai gi gidaadou di aumaalia, i dana hagabuni digau o Jew mo digau tuadimee gii-dahi-hua. Ma go dono huaidina dela ne-oho di tuuli dela nogo hai digaula nia hagadaumee.

2:15  Mee gu-hagalawa gi-daha nia haganoho digau o Jew ngaadahi mo nia manga haganoho hagalligi, belee hai nia hagadili henua e-lua aanei gii-dahi i-di nadau buni-anga gi-de-Ia, gii-mee di-noho i-di aumaalia.

2:16  Christ gu-oho gi-daha te-noho-baba i nau mehanga i dono made i-hongo di loobuu; i-di hai o-di loobuu, Mee gu-haga-puni-mai nia hagadili henua e-lua aanei, gii-hai tuaidina e-dahi ga-laha-mai labelaa gi God.

2:17  Malaa, Christ gu-hanimoi, gu-agoago di Longo-Humalia o-di aumaalia ang-gi digau huogodoo: gi digau tuadimee ala nogo mogowaa i God, ngaadahi mo digau o Jew ala nogo hoohoo gi Mee.

2:18  Ma go Christ hua dela ne-haga-puni gidaadou huogodoo, digau o Jew mo digau tuadimee, gaa-mee di-lloomoi gi-mua Tamana i-di Hagataalunga e-dahi.

2:19  Malaa, goodou digau tuadimee gu-hagalee hai digau mai i-daha be digau hua-gee dolomeenei, gei guu-hai digau-donu ngaadahi dalia nia daangada a God, guu-hai di beneinei God.

2:20  Goodou guu-hau gi-hongo di hagamau dela ne-dugu go digau agoago-hagau mo nia soukohp, gei di hadu di madaaduge la-go Christ hua modogoia.

2:21  Ma go Mee hua dela e-daahi di hale hagatau gi-di gowaa e-dahi, gei e-hai di-maa gii-tomo, gii-hai di hale-daumaha e-dabu ang-gi Dimaadua.

2:22  Di-godou buni-anga gi Mee, goodou ngaadahi mo digau huogodoo ala i-golo gu-buni-mai gi-di gowaa e-dahi, di gowaa dela e-noho-ai a God mai i dono Hagataalunga.

Chapter 3

3:1  Deenei tadinga, au go Paul tangada galabudi a Jesus Christ idimaa go goodou digau tuadimee, e-dalodalo gi God.

3:2  Goodou gu-longono bolo God i dono dumaalia ne-dugu-mai tegau deenei bolo gi-heia e-hagahumalia goodou.

3:3  God gu-haga-gila-aga dana hagamaanadu hagammuni gi-di-au. (Gei-au ne-hihi-hua haga-bodobodo di mee deenei,

3:4  gei maa goodou gaa-dau agu mee ala ne-hihi, goodou ga-iloo laa dogu modongoohia di hagamaanadu hagammuni o Christ.)

3:5  I-lodo di madagoaa gu-doo gi-daha, gei nia daangada digi iloo di hagamaanadu hagammuni deenei, gei God gu-haga-gida di-maa dolomeenei, mai i-di Hagataalunga ang-gi ana gau agoago-hagau haga-madagu mo ana soukohp.

3:6  Malaa, deenei di hagamaanadu hagammuni a God: mai di Longo-Humalia, digau tuadimee mo digau o Jew gu-hai-mee ngaadahi gi-nia maluagina o God, guu-hai nia manga o tuaidina hua-e-dahi, gu-hai-mee ngaadahi gi-di hagababa a God ne-hai mai i Jesus Christ.

3:7  Au ne-hai tangada hai-hegau ni-di Longo-Humalia mai di wanga-dehuia a God dela ne-gaamai i ono mogobuna.

3:8  Au tangada i-bahi-i-lala tangada dela mugi-lala-loo nia daangada a God, malaa, God gu-gaamai gi-di-au di madagoaa humalia, e-kae di Longo-Humalia o-di maluagina dee-odi o Christ ang-gi digau tuadimee,

3:9  gei e-hai digau huogodoo gi-gidee-ginaadou di hagamaanadu hagammuni a God dela gu-haga-hai-hegau. God dela ne-hai nia mee huogodoo, nogo benebene dana hagamaanadu hagammuni mai-loo i-mua,

3:10  bolo i-di madagoaa dolomeenei, mai di nohongo-dabu, nia dagi o digau di-langi mo nia mogobuna tenua o-di langi gi-kabee dono iloo i-nia hagadilinga ala.

3:11  God ne-hai di mee deenei bolo gii-tau gi dana hadinga dee-odi dela ne-hagahonu koia mai Jesus Christ go tadau Dagi.

3:12  I tadau buni-anga gi Christ mo tadau hagadonu a-Mee, gidaadou gu-maaloo di hula laa-mua o God i-di hagadagadagagee.

3:13  Au e-dangi-adu gi goodou, bolo goodou hudee madugia i-di-au dela e-hagaduadua i godou gili. Nia mee huogodoo aanei la nia hagahumalia ni goodou.

3:14  I tadinga deenei, au e-dogoduli i-mua Tamana,

3:15  go Mee dela ne-wanga nia ingoo donu o-nia madahaanau huogodoo ala i-di langi mo henuailala.

3:16  Au e-dangi ang-gi God mai di maluagina o-ono madamada gi-gowadu nia mahi, mai i dono Hagataalunga, e-hagamaaloo-aga godou lodo.

3:17  Au e-dalodalo bolo Christ gii-noho i godou lodo mai godou hagadonu. Au e-dalodalo bolo goodou gi-hagamau mai di aloho.

3:18  Gei goodou ngaadahi mo nia daangada a God huogodoo gi-kae-ina di mogobuna maaloo di-iloo di-palaha, looloo, tuuduu, mo-di llala o-di aloho o Christ.

3:19  Uaa, goodou gi-iloo di aloho o-Christ, ma e-aha maa gidaadou e-deemee di-iloo di-maa hagatau. Gei goodou gaa-honu laa i-di hagahonu o God.

3:20  Hagaamuina a God i ono mogobuna e-ngalua i tadau lodo, e-mee di-hagagila nia mee laa-hongo tadau mee ala e-mee di-tangi ge hagamaanadu-ai.

3:21  Di madamada dela i-lodo di nohongo-dabu mo lodo Jesus Christ gi-heia ang-gi God i-nia madagoaa huogodoo, gaa-hana-hua beelaa! Amen.

Chapter 4

4:1  Au tangada galabudi idimaa au e-hai-hegau gi Tagi, au e-hagamahimahi goodou gi-mouli i-di mouli dela ne-dugu-adu go God i dono madagoaa ne-gahi-mai goodou.

4:2  Nia madagoaa huogodoo goodou gi-manawa balabala, hila-gi-lala, mo-di hagakono di manawa. Haga-modongoohia-ina godou aloho i-di godou hagadau-buni.

4:3  Hagamahi daahia-hua beelaa di hagadaubuni dela e-gowadu go di Hagataalunga mai i-di aumaalia dela e-hagabuni goodou gi-di gowaa e-dahi.

4:4  Ma tuaidina hua-e-dahi, di Hagataalunga hua-e-dahi, gadoo be-di hagadagadagagee hua-e-dahi dela ne-gahi ginai goodou go God.

4:5  Tagi hua-e-dahi, di hagadonu hua-e-dahi, mo-di babdais hua-e-dahi,

4:6  di God hua-e-dahi, Tamana o-nia daangada huogodoo, Tagi o nia daangada huogodoo, e-hagangalua i-lodo nia daangada huogodoo, gei e-noho i-lodo nia daangada huogodoo.

4:7  Tangada-nei mo tangada-nei la-guu-kae di wanga-dehuia gii-tau ang-gi di mee a Christ ne-dugu-anga,

4:8  gii-hai be nia helekai di Beebaa-Dabu dela e-helekai, “Di madagoaa o Mee ne-hana gi-di gowaa dela i-nua-loo, Mee ne-lahi ana gau galabudi dogologo madalia Ia, gaa-wanga nia wanga-dehuia gi nia daangada.”

4:9  “Mee ne-hana gi-nua” e-hai dono hadinga bolo-aha? E-hai dono hadinga boloo: matagidagi Mee ne-haneia gi-di gowaa koia mugi-lala-loo i henuailala.

4:10  Deelaa-laa, Tangada dela ne-haneia gi-lala, la-go Mee-hua dela ne-hana gi-baahi nua nia langi, belee haga-honu di langi hagatau.

4:11  Ma go Mee dela “ne-wanga ana wanga-dehuia gi-nia daangada,” gaa-dongo hunu gau belee hai digau agoago-hagau, nia soukohp, digau kae di Longo-Humalia, digau agoago, mo nia tintei.

4:12  Mee ne-hai di mee deenei belee hagatogomaalia nia daangada a God huogodoo gi-nia hegau daumaha, gii-mee di-haga-duu-aga tuaidina o Christ.

4:13  Gei gidaadou huogodoo ga-buni-mai gi-lodo di hagadonu e-dahi, mo-di iloo di Tama a God. Gidaadou gaa-hai digau e-mmaadua i-lodo tadau hagadonu, gaa-dohu be Christ.

4:14  Gei gidaadou ga-hagalee hai be nia damagiigi lligi, ma-ga-daahee i-nia beau, ge iliili go-di madangi hulihuli o nadau agoago halahalau-dangada, ala e-dagi digau ala i-golo gi nadau haihai gee mo nadau halahalau dangada ala e-hai.

4:15  Malaa, gidaadou gi-tomo-aga i-nia ala huogodoo gii-hai be Christ, dela go di libogo, mai i tadau helehelekai i-di tonu mo-di aloho.

4:16  I-lala ono mogobuna dagi, nia dudaginga huogodoo o tuaidina guu-tau gi-di gowaa dahi, gei tuaidina hagatau le e-daahi go nia dudaginga huogodoo o tuaidina. Maa tudaginga-nei mo tudaginga-nei gaa-hai dana hegau, gei tuaidina hagatau ga-tomo-aga, gaa-bida haga-duu-aga-ia mai i-di aloho.

4:17  Au e-bule goodou i-di ingoo o Tagi, gi-hudee mouli i-di bouli, gadoo be digau ala e-balumee nadau maanadu, ono hadinga ai,

4:18  nadau hagabaubau la-i-lodo di bouli. Digaula hagalee dau gi-di mouli o God, i nadau noho-hua i-di haga-longoduli mo-di hiinoho.

4:19  Digaula gu-de-longono nia manuu o-di langaadia, guu-bida wanga nadau huaidina gi-heia nia huaidu, gei e-hai nadau hangaahai huaidu huogodoo.

4:20  Hagalee deelaa di-godou mee ne-kabe i Christ!

4:21  E-donu goodou gu-longono a-Mee, gu-daudali a Mee, gu-aago ginai di tonu dela i-baahi o Jesus.

4:22  Kilia gi-daha godou mouli namua. Di mouli namua la-gu-hagahuaidu go nia hiihai haga-boiboi-dangada.

4:23  Godou manawa, mo godou hagabaubau gi-haga-hoou-ina hagatau.

4:24  Goodou e-hai-loo gi-huli hoou gii-hai be-di ada o God, dela gu-haga-modongoohia-aga bolo di mouli e-donu, hai-donu ge e-dabuaahia.

4:25  Deelaa-laa, hudee helekai kai-tilikai. Huogodoo gi-helekai donu i godou mehanga, idimaa, gidaadou huogodoo guu-dahi i tuaidina o Christ.

4:26  Maa goodou ga-hagawelewele, hudee heia di hagawelewele gi-dagi-ina goodou gi-lodo di huaidu, ge hudee noho hagawelewele i-di laangi dogomaalia.

4:27  Hudee dugu-anga gi Setan dono madagoaa humalia e-hai ana hai-adu gi goodou.

4:28  Maa goodou e-gaiaa, gii-lawa gi-daha, daamada ngalua e-hagahumalia goodou, gii-mee goodou di-hagamaamaa digau hagaloale.

4:29  Hudee helehelekai i-nia helekai haga-huaidu daangada, gei helehelekai-hua nia helekai hagamaamaa humalia, nia helekai haga-tomo-aga, ge haga-haingoohia nadau mee ala e-hiihai bolo gi-i-golo. Gei godou helekai ga-hagahumalia digau ala e-longono godou helekai.

4:30  Goodou hudee heia di Hagataalunga-Dabu a God gi-manawa-gee, idimaa, di Hagataalunga la-di maaga ni God i godou nua, dono hadinga bolo goodou ni-aana, gei e-haga-modongoohia bolo di laangi gaa-dae-mai, ge-Ia ga-haga-mehede goodou.

4:31  Kilia gi-daha nia hagadugina, hiihai-huaidu ge hagawelewele. Gii-lawa gi-daha mo nia haga-hooho, mo-di helekai hai-baahi i godou mehanga, nia hagadugina lodo-huaidu hagadilinga e-logo.

4:32  Gei gi-dumaalia, manawa balabala, ge hagadau-wwede i godou mehanga, gadoo be God dela ne-dumaalia adu gi goodou mai i Christ.

Chapter 5

5:1  Idimaa goodou guu-hai nia dama hagalabagau ni God, goodou hagamahi gii-hai be Mee.

5:2  Godou mouli gi-dagia go di aloho, gii-hai be Christ dela ne-aloho i gidaadou, ga-gaamai dono mouli be tigidaumaha kala mo-di wanga-dehuia dela e-haga-tenetene a God.

5:3  Nia haihai huaidu be-di manu, mouli milimilia, mo-di mouli hagagailaa la-hagalee humalia ma-ga-helehelekai-ai i godou mehanga, idimaa, goodou la nia daangada ni God.

5:4  Gei e-dee-duudanga bolo goodou e-hai-hegau gi-nia helekai huaidu, helekai dadaagala huaidu, be nia helekai dadaulia. Goodou belee danggee ang-gi God.

5:5  Goodou gi-iloo bolo tangada dela e-mouli be-di manu, mouli milimilia, be e-hagagailaa la-hagalee kae dono duhongo i Teenua King o Christ mo God, idimaa, di hagagailaa la tagadilinga hai-daumaha ang-gi nia balu-god.

5:6  Goodou gi-de-halahalau-hua go dahi dangada gi-nia balu-helekai, idimaa, nia mee aanei le e-hai a God gi-hagawelewele ang-gi digau ala e-de-hagalongo ang-gi de-Ia.

5:7  Malaa, goodou hudee buni-anga gi digau beelaa.

5:8  Goodou digau nogo noho i-lodo di bouli i-mua, malaa, goodou guu-hai nia daangada ni-Tagi, gei goodou gu-i-lodo di maalama. Malaa, goodou gi-mouli be digau ni-di maalama.

5:9  Idimaa, di maalama dela e-hidi-mai-ai nia humalia, nia mee hai-donu mo nia donu huogodoo.

5:10  Goodou hagamahi gi-kaabee nia mee ala e-haga-tene di manawa o Tagi.

5:11  Hudee heia nia balumee o-di bouli ala e-hai go nia daangada. Gaamai nia maa gi-lodo di maalama.

5:12  (Gei di-maa e-haga-langaadia huoloo ma-ga-helehelekai nia mee ala e-hai hagammuni go digaula.)

5:13  Di madagoaa nia mee huogodoo ga-haga-modongoohia go-di maalama, gei nadau hangaahai donu la-ga-kila-mai.

5:14  Di maalama dela e-hai nia mee huogodoo gi-kila-mai, dela gu-helekai-ai boloo, “Aala-aga go tangada dela e-kii, duu-i-nua gi-daha mo-di made, gei Christ ga-haga-maalama goe.”

5:15  Deelaa-laa, goodou gii-pula i godou mouli. Hudee mouli be digau de-kabemee, gei gi-mouli be digau kabemee.

5:16  Heia gi-dahidamee nia madagoaa huogodoo ala gu-dugu-adu gi goodou, idimaa, aanei la nia laangi huaidu.

5:17  Goodou hudee dadaulia, hagamahi halahala-ina nia mee a Tagi ala e-hiihai ginai bolo gi-heia.

5:18  Hudee heia goodou gi-libaliba i-nia waini ala e-hagahuaidu goodou, haga-honu-ina goodou gi-di Hagataalunga.

5:19  Helehelekai i godou mehanga i-nia helekai o-nia daahili Pisalem, nia daahili hagaamu, mo nia daahili ang-gi God. Daahili i-nia daahili hagaamu mono Pisalem ang-gi Tagi mo-di hagaamu i-lodo godou manawa.

5:20  Danggee i-nia mee huogodoo gi God Tamana i-di ingoo tadau Dagi go Jesus Christ i-nia madagoaa huogodoo.

5:21  Goodou gi-hagadau dugu-anga i goodou, idimaa, goodou e-hagalaamua a Christ.

5:22  Nia ahina, dugu-anga goodou gi godou lodo, gii-hai be di-godou hai ang-gi Tagi.

5:23  Idimaa, go taane dela e-mogobuna di dagi dono lodo, gadoo be Christ dela e-mogobuna di dagi di nohongo-dabu. Mee Tangada Hagamouli ni-di nohongo-dabu dela go dono huaidina.

5:24  Malaa, nia ahina gi-dugu-anga ginaadou hagatau gi nadau lodo, be-di nohongo-dabu dela e-dugu-anga ia gi Christ.

5:25  Nia daane, aloho i godou lodo, gadoo be Christ dela ne-aloho i-di nohongo-dabu ge ne-dugu-anga dono mouli ginai.

5:26  Mee ne-hai di mee deenei belee hagadabu di nohongo-dabu ang-gi God gi ana helekai, i-muli dana haga-madammaa di-maa gi-nia wai,

5:27  bolo gi-dugu-anga gi-de-Ia dana nohongo-dabu madamada, gei e-madammaa, deai ono mee hala ai, ono gowaa dogolia ai, be ono gowaa huaidu ai.

5:28  Nia daane gi-aloho i nadau lodo be nadau aloho i nadau huaidina. Taane dela e-aloho i dono lodo, le e-aloho i dono huaidina.

5:29  (Gidaadou hagalee de-hiihai gi tadau huaidina. Gei gidaadou e-haangai di-maa ge e-benebene, gadoo be-di hai a Christ dela e-hai gi-di nohongo-dabu,

5:30  idimaa, gidaadou nia dudaginga ni tuaidina o-Maa.)

5:31  E-hai gadoo be nia helekai di Beebaa-Dabu e-helekai boloo, “Tadinga deenei dela taane gaa-tanga gi-daha mo dono damana mo dono dinana, ga-buni-anga gi dono lodo, gaa-hai tuaidina e-dahi.”

5:32  Tadinga hagalabagau hagammuni gei e-donu dela gu-haga-modongoohia-mai go nia helekai aanei, ala gu-iloo-eau bolo e-helekai i Christ mo-di nohongo-dabu.

5:33  Gei di-maa e-dau-adu labelaa gi goodou: nia daane huogodoo gi-aloho i godou lodo, be godou aloho i godou huaidina, gei nia ahina gi-hagalabagau-ina nadau lodo.

Chapter 6

6:1  Nia damagiigi, di-godou waawa-hegau dama Christ belee hagalongo gi godou maadua, idimaa, deenei di mee donu e-hai.

6:2  “Hagalaamua-ina do damana mo do dinana,” deenei taganoho matagidagi dela iai dono hagababa boloo,

6:3  “Nia mee huogodoo la-ga-humalia i godou baahi, gei goodou gaa-mee di-mouli waalooloo i-hongo henuailala.”

6:4  Nia maadua, hudee heia godou dama gi-hagawelewele balumee, aago-ina digaula gi-nia agoago dama a Christ mono agoago hagamaamaa.

6:5  Nia hege, hagalongo gi godou dagi henuailala i-di hagalaamua, gi-heia i-di manawa balabala, gii-hai be di-godou hai-hegau gi Christ.

6:6  Nia mee aanei hagalee ne-belee hai-hua i-di madagoaa digaula e-mmada adu gi goodou, bolo gi-humalia goodou i nadau baahi, gei gi-heia be nia hege a Christ ala e-hai di hiihai a God aga i-lodo nadau manawa hagatau.

6:7  Goodou go nia hege, heia godou hegau i-di tene, be nia hegau e-hai gi Tagi, hagalee gi-nia daangada.

6:8  Goodou gi-iloo bolo di Tagi e-hui tangada-nei mo tangada-nei i nadau hegau humalia, e-de-hilihili be digau moholo be nia hege.

6:9  Nia dagi, heia-hua go di hai deenei gi godou hege, hudee hagamadagudagu-ina digaula gi-nia helekai. Gi-iloo bolo goodou mo godou hege la nia daangada ni Tagi hua e-dahi dela i-di langi, e-hagi-aga digau huogodoo i-di ala hua-e-dahi.

6:10  Haga-muliagina, hagamaaloo-ina goodou i-di godou buni-anga gi Tagi i ono mahi maaloo.

6:11  Ulu i-nia goloo-heebagi huogodoo a God ala e-gowadu, gei goodou gaa-mee di-tuu gii-mau i-di heebagi gi Setan mo ana halahalau.

6:12  Idimaa, gidaadou hagalee heebagi gi-nia daangada-dangada, gei e-heebagi gi nia dagi, mogobuna dagi mo nia mahi bouli o henuailala mo e-heebagi gi-nia hagataalunga mahi huaidu o-di ahiaalangi.

6:13  Deelaa-laa, goodou ulu i-nia goloo-heebagi a God dolomeenei, gei goodou gaa-mee di-duuli gi-daha nia heebagi o-di hagadaumee i-di madagoaa huaidu ma-gaa-dae-mai, gei muli teebagi, goodou e-maaloo hua igolo.

6:14  Goodou tuu maaloo gi-di tuu o-di tonu dela e-nnoo tuaidina, tuu maaloo gi-di mee haaligi hadahada o-di mouli hai-donu dela guu-tai gi dono lohongo,

6:15  mo-di togomaalia di hagadele di Longo-Humalia o-di aumaalia, be goodou ma-ga-ulu godou suudi gii-mau.

6:16  Daahia di hagadonu i godou baahi i-nia madagoaa huogodoo, e-hai di duuli, gei goodou gaa-mee di-diinai nia amu-maalei ulaula ala e-puu-mai go tangada huaidu.

6:17  Goodou gii-gahu i-di goobai di hagamouli, mo-di kae Nnelekai a God ala go tulumanu-dauwa e-gowadu go di Hagataalunga-Dabu.

6:18  Heia nia mee huogodoo aanei i talodalo, dangidangi di hagamaamaa gi God. Hai dalodalo i-nia madagoaa huogodoo i-di Hagataalunga. Dono hadinga bolo goodou gi-noho kanakana, gi-hudee dugua di-godou hai dalodalo i-nia madagoaa huogodoo i-nia daangada a God huogodoo.

6:19  Dalodalo labelaa i-di-au gi God gi-gaamai nia helekai i dogu madagoaa ma-ga-helekai-ai, gii-mee au di-haga-modongoohia maaloo nia mee ala e-de modongoohia i-lodo di Longo-Humalia.

6:20  Au tangada hagau hagadele di Longo-Humalia, mae-aha maa au e-galabudi. Dalodalo gi-maaloo au di helehelekai i-di Longo-Humalia, be dagu hai dela belee hai.

6:21  Tychicus, go tadau duaahina-daane hagaaloho ge tangada hai-hegau manawa-dahi i-nia hegau o Tagi, ga-hagi-adu-laa ogu longo gi-iloo-goodou dogu mouli dolomeenei.

6:22  Deelaa di mee ne-hagau-ai-adu a-mee belee hagi-adu di-madau noho mo-di mouli dolomeenei, gei e-hai goodou gi-manawa maaloo.

6:23  God Tamana mo Tagi go Jesus Christ gi-dugu-anga di aumaalia mo-di aloho i-di hagadonu gi-nia duaahina dama a Christ huogodoo.

6:24  Tumaalia o God gi-madalia digau huogodoo ala e-aloho i Tagi go Jesus Christ i-di aloho e-dee-odi.