LinVB - Ephesians

Chapter 1

1:1  Ngáí Pólo, apóstolo wa Yézu Krístu, lokóla Nzámbe alingí, natíndélí bandeko bayambí Krístu Yézu monkandá moye.

1:2  Nzámbe Tatá wa bísó mpé Mokonzi Yézu Krístu bákabela bínó ngrásya na bobóto.

1:3  Bákúmisa Nzámbe Tatá wa Mokonzi wa bísó Yézu Krístu ! Ut’o likoló abenísí mpé atóndísí bísó na malámu mánso ma Elímo mpô ya Krístu.

1:4  Na bolingi asílí aponí bísó, naíno mokili mokelámí té, tózala basántu o míso ma yě, tózala na lisúmu té.

1:5  Na bolingi akánáká bandá kala ’te tókóma bána ba yě mpô ya Yézu Krístu : yě mǒkó alingákí bôngó

1:6  mpô tókúmisa nkémbo ya ngrá­sya ya yě, eye akabélí bísó elongó na Mwána wa yě wa bolingo.

1:7  Yě asikólí bísó na makilá ma yě, azwě lí bísó bolímbisi masúmu ; ngrásya êná elekí bonéne sôló.

1:8  Nzámbe Tatá apésí bísó yangó na bwányá mpé na mayéle mánso.

1:9  Ayébísí bísó mobómbamo mwa motéma mwa yě, moye akánáká kokokisa na lisálisi lya Krístu.

1:10  Akokisa mwangó ntángo eleko ekokoka : ásangisa bikelámo bínso bya likoló mpé bya nsé o mabóko ma Mokonzi sé mǒkó, Krístu.

1:11  Sé mpô ya Krístu abéngí bísó ba-Yúda tózala bato ba yě ; aponókí bísó út’o kala lokóla akánáká, yě mǒkó akosálaka mánso sé lokóla alingí,

1:12  mpô ’te bísó, baye totíákí elíkyá na Krístu libosó, tókúmisa bonéne bwa nkémbo ya yě.

1:13  Sé mpô ya Krístu, bínó mpé bato ba bikólo bisúsu, áwa boyókí Liloba lya sôló, Nsango Elámu ya libíkí, mpé bokómí koyamba Krístu, Nzámbe akomí o mitéma mya bínó nkomá ya Elímo óyo alakélákí, yě ndé Elímo Sántu.

1:14  Na Elímo óyo alakélákí bísó, Nzámbe akobíkisa bísó bato ba yě ; ntángo mokolo mwangó mokokoka tokozwa malámu ma yě mánso, mpô tókúmisa nkémbo ya Nzámbe.

1:15  Mpô nayókí bóníbóní bozalí koyamba Mokonzi Yézu mpé kolinga bandeko bánso,

1:16  nazalí kotó­ndo Nzámbe ntángo ínso mpé kokanisa bínó o losámbo la ngáí.

1:17  Nzámbe wa Mokonzi wa bísó Yézu Krístu, Tatá ntá nkémbo, ákabela bínó Elímo óyo akopésa bínó bwányá na mayéle mpô ’te bóyéba yě sôlósôló !

1:18  Afungola míso mpé mitéma mya bínó mpô bómóno ’te bozalí na elíkyá enéne, áwa yě mǒ­kó abéngí bínó ; bóyéba mpé bonéne bwa nkémbo ya likabo bokozwa elongó na basántu.

1:19  Bóyéba ’te bonéne bwa ngúyá ya yě nsúka té bokosálaka mambí manéne o mitéma mya bísó baye toyambí yě. Ngúyá eye enéne,

1:20  asílí alakísí yangó o Krístu, áwa asékwísí yě o bawá mpé afándísí yě o lobóko la yě la mobáli o likoló.

1:21  Atómbólí yě likoló lya bilímo bínso bya Lokúmu, bya Ngúyá, bya Bokási mpé bya Bokonzi ; azwí mpé nkómbó elekí nkómbó ínso bakokí kotánga sikáwa mpé ikozala o bileko biye bikoyâ.

1:22  Atíí bínso o nsé ya makolo ma yě, mpé atómbólí yě, Motó mwa Eklézya, likoló lya bínso.

1:23  Eklézya ezalí Nzóto ya Krístu ; Krístu azalí mobimba o Eklézya, lokóla Nzámbe azalí mobimba o Krístu.

Chapter 2

2:1  Bínó (bozalákí libosó bapagáno, ba-Yúda té) bokúfákí mpô ya mabé mpé mpô ya masúmu

2:2  bosálákí ntángo bozalákí kolanda makambo ma nsé eye : bozalákí kotósa mokonzi wa ngúyá izalí káti ya likoló na nsé, óyo azalí kokóba mosálá mwa yě o mitéma mya bato babó­yí kotósa…

2:3  Bísó bánso (ba-Yúda) tozalákí kosála lokóla bangó : tozalákí kolanda mpósá ya nzóto, tozalákí baómbo ba bilúlélá bya nzóto mpé ba makanisi mabé, tobótámákí bána baye Nzámbe ayókélí nkándá, sé lokóla bato basúsu.

2:4  Kasi Nzámbe ntá ngolu akolingaka bísó bolingi bonéne :

2:5  atâ tokúfákí mpô ya masúmu, azóngísélí bísó (ba-Yúda mpé baye bazalí ba-Yúda té) bomoi elongó na Krístu ; sôló, bobíkí sé mpô ya ngrásya ya yě !

2:6  Nzámbe asékwísí bísó elongó na Yézu Krístu mpé afándísí bísó na Krístu lisangá o likoló.

2:7  Na bolámu asálákí bísó o Krístu Yézu, alingákí kolakisa o bileko bikoyâ nkita enéne ya ngrásya ya yě.

2:8  Sôló, áwa boyambí, bobíkí bobélé mpô ya ngrásya. Libíkí liútí epái ya bínó mǒkó té, lizalí likabo lya Nzá-mbe.

2:9  Bobíkí mpô ya misálá mya bínó té : moto mǒkó té akokí komíkúmisa na myangó.

2:10  Sôló, Nzámbe akelákí bísó o Krístu Yézu mpô tósála misálá milámu miye yě mǒkó alé­ngélélí bísó.

2:11  Bókundola o mitéma ’te bozalákí bapagáno libosó, baye bakátémí nzóto té ; baye bazalákí kobénga bínó na nkómbó êná ezalí baye bakomítángaka ‘bakátémá nzóto’, mpô ya elembo eye ezalí sé ya nzóto.

2:12  Bókundola ’te o ntángo êná bokabwánákí na Krístu, bozalákí bato ba ekólo ya Israél té. Boyébákí bondeko té, boye Nzámbe akátákí ntángo alakélákí elakó ya yě. Awa o nsé bozalákí na elíkyá té, na Nzámbe mpé té !

2:13  Nzókandé lisa­ngá na Krístu Yézu bínó bato bo­zalákí libosó mosíká na Nzámbe, bokómí sikáwa penepene mpô ya makilá ma Krístu.

2:14  Yě moto ayélí bísó bobóto mpé akómísí ba-Yúda ná bato ba bikólo bisúsu ekólo sé yǒ kó, abúkí lopá­ngo lozalákí kokabola bangó. Na liwá lya yě abomí bongúná,

2:15  Mobéko ná mitíndo mínso mya Mobéko. Ayélí ba-Yúda na bato basúsu bobóto, akómísí bangó moto wa sika na yě lisangá.

2:16  Na kurúse abomí bongúná, asangísí bato bánso o Nzóto sé yǒ kó, mpé azóngísélí bangó bondeko bwa Nzámbe.

2:17  Ayéí kosangela bobóto na bínó bato bozalákí mosíká mpé na baye bazalákí penepene.

2:18  Sôló, mpô ya yě bísó bábalé tozwí o Elímo sé yǒ kó nzelá ya kobeleme na Tatá.

2:19  Bôngó bozalí lisúsu bampaya tǒ baútá té, bokómí bána mbóka na bakrístu elongó, bato ba libótá lya Nzámbe.

2:20  Bozalí lokóla ndáko etó­ngámí o mabángá ; mabángá mâná ndé bapóstolo na baproféta ; Krístu Yézu yě méí azalí libángá lya litúmu lya ndáko mobimba.

2:21  Yě moto akoléndisa ndáko mobimba, mpé akokómisa yangó témpelo esántu enéne ya Mokonzi Nzámbe.

2:22  Bínó mpé botóngámí na Krístu lisangá, mpô ’te bókóma ndáko ya Nzámbe o Elímo Sántu.

Chapter 3

3:1  Yangó wâná ngáí Pólo nakangémí o bolóko mpô ya Krístu mpé mpô ya bínó bapagáno…

3:2  Nakanísí ’te boyókí ndéngé Nzámbe apésí ngáí ngrásya ya kosangela bínó Nsango Elámu.

3:3  Boyébí bóníbóní amónísí ngáí o limóní Mobómbamo mwa yě, lokóla nasílí nakomélákí bínó na bokúsé.

3:4  Sókó botángí monkandá mwa ngáí, bokomóno ’te nayébí ntína ya Mobómbamo mwa Krístu.

3:5  O bileko bya kala Nzámbe ayébísáká bato mobómbamo moye té, kasi sikáwa Elímo moto ayébísí bapóstolo na baproféta basántu ba yě :

3:6  sé lokóla ba-Yúda, bapagáno mpé bazwí bolámu bwa Nzámbe, bakómí binama bya Nzóto sé yǒ kó, mpé bazwí bolámu bwa Elakó sé yǒ kó ; Nzámbe alakélákí bwangó na bosangeli Nsa­ngo Elámu o Krístu Yézu.

3:7  Na ngúyá ya yě, Nzámbe akabélí ngáí ngrásya mpé akómísí ngáí mosa­ngeli wa Nsango Elámu eye.

3:8  Apésí ngáí, moto wa nsúka wa bato bayambí Nzámbe, ngrásya ya kosa­ngela bapagáno nkita nsúka té ya Krístu.

3:9  Nálimbola mpé malámu bóníbóní Nzámbe azalí kokokisa Mobómbamo moye : út’o libandela mobómbámákí o motéma mwa yě, Mozalisi wa bilóko bínso.

3:10  Bô-ngó sikáwa, na mosálá Eklézya akosálaka, bilímo bínso o likoló bizalí na bokonzi mpé na ngúyá bíyéba bwányá bwa Nzámbe nsúka té :

3:11  mokáno mwa yě mwa sékô, akokísí mwangó o Krístu Yézu, Mokonzi wa bísó.

3:12  Awa toyambí Krístu, tokokí kobánga lisúsu té : tozwí nzelá ya kobeleme na Nzámbe.

3:13  Bôngó, nabóndélí bínó, bózala sé na moléndé áwa nazalí konyókwama mpô ya bínó : minyóko mya­ngó, ndé lokúmu la bínó !

3:14  Yangó wâná nafukámí o míso ma Tatá.

3:15  O likoló mpé o nsé bakobéngaka moto ‘tatá’ sé mpô ya yě.

3:16  Akabela bínó ngúyá engébéné na nkémbo ya Yě nsúka té, mpé áléndisa mitéma mya bínó na Elímo wa Yě.

3:17  Krístu áfánda o mitéma mya bínó mpô ya boyambi. Bolingi bwa bínó bópikama makási o mitéma mya bínó.

3:18  Elongó na bandeko bánso, bókoka koyéba bonéne, bolaí, bosándá na bozindó bwa bolingi bwa Krístu.

3:19  Bókoka koyéba bolingi bwa Krístu boye bolekí mánso tokokí koyéba mpô ’te bótónda na bosántu bónso bwa Nzámbe.

3:20  Na ngúyá eye ekosálaka o mitéma mya bísó, akokí kosála mánso, leká mosíká maye tokokí kosénge tǒ kokanisa.

3:21  Nkémbo na yě o Eklézya mpé o Krístu Yézu, o bikólo bínso mpé o bileko bínso sékô ! Amen.

Chapter 4

4:1  Awa nakangémí o bolóko mpô ya Mokonzi, nabóndélí bínó : bózala na ezalela ebongí na bato babyángémí na Nzámbe.

4:2  Bózala na motéma bosáwa mpé na bobóto, bókanga mitéma, bóíkikizana na bolingi.

4:3  Bóluka sé kozala motéma mǒkó, bóbátela lisangá lya bobóto lya Elímo.

4:4  Nzóto ezalí sé yǒ kó, Elímo sé yǒ kó, lokóla elíkyá ezalí sé yǒ kó, mpô Nzámbe abyángí bínó.

4:5  Mokonzi azalí sé mǒkó, boyambi sé bǒ kó, batísimo sé yǒ kó ;

4:6  Nzámbe azalí sé mǒkó, Yě Tatá wa bato bánso, akoyángelaka bato bánso, azalí elongó na bato bánso mpé o mitéma mya bato bánso.

4:7  Nzókandé mǒkó mǒkó wa bísó azwí makabo ma ngrásya lokóla Krístu akabélí yě.

4:8  Yangó wâná ekomámí ’te : Ebutí yě o likoló, amemí bato bakangémí, akabélí bato makabo.

4:9  ‘Abutí o likoló’ lokóla níni ? Elakísí ’te libosó akitákí kín’o o bozindó bwa nsé.

4:10  Oyo akitákí, yě mpenzá abutí o ntá likoló mpô ’te ákóma Mokonzi wa molóngó mobimba.

4:11  Yě moto akabélí bato makabo. Aponí basúsu bázala bapóstolo, basúsu baproféta, basúsu basangeli ba Nsango Elámu, basúsu bakéngeli, basúsu batéyi.

4:12  Abongísí bôngó lisangá lya bakrístu mpô ’te moto na moto ásála mosálá mpô ya kotónga Nzóto ya Krístu.

4:13  Bôngó bísó bánso elongó tókóma sé moto mǒkó o boyambi mpé o boyébi Mwána wa Nzámbe, mpô tókóla téé ntángo tokokóma bakóló mpé balongobani na ndéngé ya Krístu.

4:14  Bôngó tokozala lisúsu bána baké té, mimpepe mikoningisa mpé mikomeme bísó lisúsu té, miye mya matéya ma bato ba mayéle mabé, baye bakokósaka bato mpô ’te bátámbwisa bangó o nzelá ya lokutá.

4:15  Tózala bato ba bosôló mpé tólingana, bôngó tokokóla o mambí mánso mpé tokokóma lokóla óyo azalí Motó, yě ndé Krístu.

4:16  Yě akoléndisaka nzóto mobimba, eye ekokangema na lisálisi lya minsisá mínso mpô ’te étóngama lokóla nzóto sé yǒ kó. Bôngó sókó eténi yǒ kó yǒ kó ekosála bǒ esengélí, nzóto mobimba ekolénda mpé ekokóla mpô ya bolingani.

4:17  Yangó wâná nayébísí mpé nabóndélí bínó o nkómbó ya Mokonzi : bótíka bizalela bya bapagáno ; bangó bakolandaka bobélé makanisi ma bangó mǒkó ma mpámba mpámba.

4:18  Makanisi ma bangó mazalí sé molílí, bazángí bomoi bwa Nzámbe mpô bayébí elóko té, mitéma mya bangó mikómí lokóla libángá.

4:19  Bakobángaka lisúmu lisúsu té : bakomíkabaka mobimba na makambo mabé, mpé na mpósá enéne bakolukaka kosála makambo ma bosóni ndéngé na ndéngé.

4:20  Kasi bínó bozwákí mayéle mâná té, ntángo boyókí matéya ma Krístu.

4:21  Nakolíkya ’te balakísákí bínó matéya ma Krístu malámu, matéya maye makolakisaka bosôló bwa Yézu.

4:22  Bôngó bótíka bizalela bya kala, bya ‘moto wa kala’, óyo asengélí kokúfa mpô akolukaka bise­ngo bya mpámba.

4:23  Bóbóngola makanisi ma bínó, mákóma ma sika.

4:24  Bózala na ezalela ya Moto wa Sika, óyo Nzámbe akelákí na loléngé la yě méí, na bosémbo mpé na bosántu bwa sôló.

4:25  Yangó wâná bótíka kobúka lokutá : moto na moto áloba na móníngá sé mambí ma sôló, mpô bísó bánso tozalí binama bya nzóto yǒ­kó.

4:26  Atâ bosilíkí, bókwéya o lisúmu té. Sókó boyókí nkándá, butú bóíndela nkándá ya bínó té.

4:27  Bópésa zábolo nzelá té.

4:28  Moto azalákí moyíbi libosó, áyíba lisúsu té, kasi ándima koyóka mpási na mosálá mwa bosémbo ; bôngó ákoka kokabela moto óyo akélélí mwâ elóko.

4:29  Maloba mabé mábima o monoko mwa bínó té, kasi bóloba, sókó esengélí, maloba malámu makokí koléndisa báníngá mpé kosálisa baye bakoyóka bínó.

4:30  Bóyókisa Elímo Sántu wa Nzámbe mawa té : yě azalí nkomá Nzámbe akomí o mitéma mya bínó mpô ’te báyéba bínó o mokolo mwa libíkí.

4:31  Bólongola o káti ya bínó makambo ma bololo, nkele, nkándá, makeléle, mafínga mpé mayéle mabé ndéngé na ndéngé.

4:32  Bólakisana bolingi mpé bósálisana ; bólímbisana lokóla Nzámbe alímbísí bínó mpô ya Krístu.

Chapter 5

5:1  Sôló, áwa bozalí bána ba bolingo ba Nzámbe, bóluka kosála lokóla yě.

5:2  Bólingana lokóla Krístu akolingaka bínó : amíkabí mpô ya bísó, amíbonzí na Nzámbe bǒ libonza lya nsolo mpímbó.

5:3  Sé lokóla elongóbání na basántu, mambí ma ekóbo, ma bosóni ndéngé na ndéngé mpé ma lokósó makokí kotá­ngema o káti ya bínó atâ na nkómbó té.

5:4  Sé bôngó masoló mabé, masoló ma bozóba mpé maye mazángí ntína : mâná mánso mabongí sókí té ; kasi bótóndo Nzámbe na losámbo.

5:5  Bóyéba malámu ’te moto akosálaka ekóbo, moto wa bosóni na moto wa lokósó, bakokí kokóma bato ba Bokonzi bwa Krístu mpé bwa Nzámbe té ; mpámba té, bazalí lokóla bato bakokúmisaka bikeko.

5:6  Moto mǒkó té ákósa bínó na maloba ma mpámba : mpô ya makambo mâná nkándá ya Nzámbe ekokwêlaka bato babóyí kotósa yě.

5:7  Bósangana na bangó atâ moké té.

5:8  Kala bozalákí o molílí, kasi sikáwa bosangání na Mokonzi, bokómí kongenge lokóla mwínda. Yangó wâná bózala na ezalela ya bána ba mwínda.

5:9  Bána ba mwínda bakosálaka mambí malámu, ma bosémbo mpé ma bosôló.

5:10  Bómeka koyéba níni ezalí kosepelisa Mokonzi.

5:11  Bósangana té na bato bakosálaka makambo ma mpámba mpé ma molílí, kasi bólakisa mabé ma bangó.

5:12  Sôló, atâ koloba maye bangó bakosálaka na bonkútú, ezalí nsóni.

5:13  Kasi mánso babimísí, mwínda mokolakisa mangó polélé,

5:14  zambí mánso mabimí o libándá, makómí mwínda lokóla. Yangó wâná bakolobaka : Lamúká, yǒ moto olálí mpongí, sékwá o káti ya bawá, mwínda mwa Krístu mokonge­ngele yǒ.

5:15  Bôngó, bókéba na bizalela bya bínó : bósála lokóla bato ba mayéle, lokóla bazóba té.

5:16  Bólekisa ntángo eye mpámba té, zambí mabé mazalí míngi o mikolo miye.

5:17  Yangó wâná bómílakisa té lokóla bato bazángí mayéle, kasi bómeka koyéba níni Mokonzi Nzámbe alingí.

5:18  Bólángwa víno té, zambí yangó ekobimisa sé mobúlú ; kasi bóluka kotónda na Elímo.

5:19  Bósangana mpô ya koyémba, bóyémba nzémbo ndéngé na ndéngé iye Elímo ayébísí bínó, bóyémba mpé bókúmisa Mokonzi na motéma mónso.

5:20  Ntá­ngo ínso mpé mpô ya mánso bótóndo Nzámbe Tatá, o nkómbó ya Mokonzi wa bísó Yézu Krístu.

5:21  Bólakisana botósi, mpô ya bobángi Krístu.

5:22  Básí bátósa babáli ba bangó lokóla bakotósaka Mokonzi,

5:23  zambí mobáli azalí motó mwa mwásí, lokóla Krístu azalí motó mwa Eklézya : yě moto abíkísí Eklézya, Nzóto ya yě.

5:24  Básí bátósa babáli ba bangó o makambo mánso, lokóla Eklézya ekotósaka Krístu.

5:25  Bínó babáli, bólinga básí ba bínó lokóla Krístu alingí Eklézya : amíkabí mpô ya yangó,

5:26  mpô ’te ásántisa yangó ; yangó wâná apétólí yangó na mái ma batísimo mpé na liloba lya bomoi.

5:27  Alingákí ’te o míso ma yě Eklezya éngenge na bonzéngá, lokó­la mwásí kitóko : na elongi matónó matónó té, na mbindo té, na mbéba esúsu mpé té ; kasi ézala esántu mpé péto.

5:28  Sé bôngó, babáli bálinga básí ba bangó lokóla nzóto ya bangó mǒkó : moto akolingaka mwásí wa yě, azalí komílinga.

5:29  Moto mǒkó té asílí ayiní nzóto ya yě mǒkó, kasi bánso bakoléisaka mpé bakobátelaka yangó. Krístu akosálaka Eklézya sé bôngó,

5:30  zambí tozalí binama bya Nzóto ya yě.

5:31  Lokóla ekomámí o Minkandá Misántu : Yangó wâná mobáli akotíka tatá na mamá, akofánda na mwásí wa yě, mpé bangó bábalé bakokóma moto sé mǒkó.

5:32  Mpô yangó ezalí mobómbamo moné­ne ; nalobí bôngó mpô ya Krístu, yě na Eklézya.

5:33  Bôngó o káti ya bínó mobáli mǒkó mǒkó álinga mwásí wa yě lokóla akomílingaka ; mwásí mpé ámemya mobáli wa yě.

Chapter 6

6:1  Bána, bótósa babóti ba bínó mpô ya Mokonzi ; yangó ebongí na bínó.

6:2  Memyá tatá na mamá, ezalí mobéko mwa yambo mopésámí esíká yǒ kó na elakó eye :

6:3  mpô ’te ózwa bolámu mpé óúmela míngi o mokili.

6:4  Bínó babóti, bólémwisa bána ba bínó té, kasi o bobókoli bólakisa bangó botósi, bópá­lela bangó lokóla Mokonzi alakísí.

6:5  Bínó baómbo, bótósa bankóló ba bínó áwa o nsé na bobángi mpé na limemyá, na motéma bosáwa, lokóla bakotósaka Krístu.

6:6  Bótósa bangó bobélé té ntángo bazalí komóno bínó, mpô ’te bákúmisa bínó ; kasi bótósa bangó lokóla basáli ba Krístu, baye bakosálaka na motéma mǒkó maye Nzámbe alingí.

6:7  Bósála mosálá na motéma molámu, mpô ya Mokonzi, mpô ya bato té.

6:8  Boyébí ’te moto na moto, ázala moómbo tǒ nsómí, sókó asálí malámu, Mokonzi yě mǒkó akofúta yě malámu mâná.

6:9  Bínó bankóló, bósála bato ba bínó sé bôngó ; bókánela bangó té. Bóyéba ’te Mokonzi óyo azalí o likoló, azalí Mokonzi wa bínó sé lokóla wa bangó : yě akotálaka bilongi bya bato té.

6:10  Bandeko, bómíléndisa na ngúyá ya Mokonzi, bózwa makási ma yě.

6:11  Bóláta moláto mwa etumba mwa Nzámbe mpô ’te masénginyá ma zábolo mákwêisa bínó té.

6:12  Zambí tozalí kobunda na bangúná ba nsuni na makilá té, kasi na bilímo bya bokonzi mpé bya ngúyá, na bakonzi ba nsé eye ya molílí, na bilímo bibé bizalí kolekaleka o likoló.

6:13  Yangó wâná bóláta moláto mwa etumba mwa Nzámbe mpô ’te bókwâ o mokolo mwa etumba té ; bóbunda téé nsúka mpé bópika mpéndé.

6:14  Bótéleme sikáwa ! Bókanga bo­sôló bǒ nkámba o lokéto, bóláta Bosémbo bǒ moláto mwa etumba ;

6:15  mpé bǒ sapáto bóláta Mpíla o bopalinginyi Nsango Elámu ya bobóto.

6:16  Nguba bokosímba ntángo ínso o mabóko, yangó ndé Boyambi ; na yangó bokozímisa makulá ma móto ma Mongúná.

6:17  Bóláta Libíkí bǒ enkoti ya etumba, mpé Elímo ázala lokóla mompánga mwa bínó, yě akoyébisa bínó Liloba lya Nzámbe.

6:18  Na lisálisi lya Elímo bósámbela mpé bóbóndela Nzámbe ntángo ínso. Bótíka kokéngele té mpé bósámbelela bandeko.

6:19  Bósámbelela ngáí mpé mpô ’te náyéba maloba níni nasengélí koloba ntángo nakosangela mobómbamo mwa Nsango Elámu na mpíkó.

6:20  Ngáí ntóma wa Nsango Elámu eye nakangémí na minyolólo. Bósámbela ’te nákoka koloba na mpíkó lokóla nasengélí kosála.

6:21  Tisíko, ndeko wa bísó wa bolingo mpé mosáleli wa sôló wa Mokonzi, akoyébisa bínó nsango ya ngáí ínso, mpô ’te bóyéba maye makokwêla ngáí.

6:22  Natíndí yě o mbóka bínó mpô ’te áyéla bínó nsango ya bísó mpé áléndisa bínó mitéma.

6:23  Nzámbe Tatá mpé Mokonzi Yézu Krístu bákabela bandeko bobóto, bolingi na boyambi.

6:24  Baye bánso balingí Mokonzi wa bísó Yézu Krístu na bolingi bwa sékô bázala na ngrásya !