Kapingamarangi - Zechariah

Chapter 1

1:1  I-lodo di walu malama o-di lua ngadau Darius nogo hai di tagi damana o Persia, Dimaadua guu-wanga ana helekai gi soukohp Zechariah, tama daane a Berechiah, dono damana-madua go Iddo.

1:2  Dimaadua di Gowaa Aamua gu-hagi-anga gi Zechariah bolo gi-helekai gi-nia daangada, “Au go Dimaadua gu-hagawelewele huoloo gi godou maadua-mmaadua,

1:3  malaa dolomeenei Au e-helekai-adu gi goodou ‘Lloomoi gi-muli gi-di-Au, gei Au ga-hanadu labelaa gi goodou.

1:4  Hudee hai be godou maadua-mmaadua. I-mua-loo, nia soukohp guu-wanga agu helekai gi digaula bolo gi-hudee mouli huaidu, gi-dugua di-nadau mouli huaidu. Gei digaula digi hagalongo be digi daudali agu helekai.

1:5  Godou maadua-mmaadua mo nia soukohp aalaa la-guu-mmade gu-hagalee.

1:6  Agu daangada hai-hegau go nia soukohp guu-wanga gi digaula agu helekai mo nia hagailoo hagalliga, gei digaula digi hagalongo, guu-kae di hagaduadua o nadau de-hagalongo. Nomuli gei digaula guu-huli nadau mouli gu-iloo-ginaadou bolo Au go Dimaadua di Gowaa Aamua ne-hagaduadua ginaadou gii-tau gi nadau de-hagalongo, mo dagu hai ne-haganoho bolo e-hai ang-gi digaula.’ ”

1:7  Di madagoaa Darius nogo hai di tagi damana o Persia, i-lodo di lua ngadau i-di madalua maa-haa laangi o-di madangaholu maa-dahi malama (di malama go Shebat), Dimaadua gu-hagadae-mai ana helekai i-lodo di midi i-di boo.

1:8  Au guu-mmada gi tangada di-langi e-lele i-hongo di hoodo mmee. Mee mo dana hoodo gaa-togo i-lodo nia laagau ‘myrtle’ i-lodo di gowaa bapaba, nia hoodo labelaa i-muli o-mee, nia hoodo mmee, habuihabula, mo nia hoodo kene e-tuu i-golo.

1:9  Au ga-heeu gi taane deelaa, “Meenei, tadinga o-nia hoodo aanei le e-hai bolo-aha?” Mee ga-helekai, “Au ga-hagi-adu gi-di-goe tadinga o-nia hoodo aanei.

1:10  Dimaadua gu-hagau digaula belee hagadina henuailala.”

1:11  Digaula ga-hagamodongoohia gi tangada di-langi nadau mee ne-gidee, “Gimaadou guu-hula laa-lodo henuailala, gu-gidee bolo henuailala hagatau gu-deai dono hagamaamaa ai gu-bagege.”

1:12  Tangada di-langi ga-helekai, “Dimaadua di Gowaa Aamua, Goe gu-hagawelewele gi Jerusalem mo nia waahale o Judah i-lodo nia ngadau e-madahidu dolomeenei. E-waalooloo behee i-mua dau hagamodongoohia do dumaalia dehuia?”

1:13  Dimaadua ga-helekai gi-di heeu tangada di-langi i-nia helekai hagamanawa lamalia,

1:14  gei tangada di-langi ga-hai-mai gi-di-au bolo gi-haga-gila-ina nia helekai Dimaadua ne-helekai-ai boloo, “Au e-aloho huoloo, ge e-haamanawa i dogu waahale dabuaahia go Jerusalem.

1:15  Au e-hagawelewele huoloo gi-nia henua ala e-noho i-di aumaalia. Idimaa dogu madagoaa nogo hagakono dogu hagawelewele nogo hai-baahi gi agu daangada, gei nia henua aalaa gu-hagaduadua kono huoloo agu daangada.

1:16  Malaa, Au gu-hanimoi labelaa gi Jerusalem e-hagamodongoohia dogu dumaalia dehuia gi-di waahale. Dogu Hale Daumaha ga-haga-hoou, gei di waahale gaa-hau labelaa.”

1:17  Tangada di-langi gu-hai-mai labelaa bolo gi-hagamodongoohia-aga-ina boloo, “Dimaadua di Gowaa Aamua e-helekai bolo ono waahale ga-humalia labelaa, gei Mee ga-hagamaamaa labelaa Jerusalem ga-hagaingoo di waahale bolo ni-aana.”

1:18  I-lodo tuai midi au guu-mmada gi-nia madaagoo kau e-haa.

1:19  Au ga-heeu gi tangada di-langi dela nogo leelee-mai gi-di-au, “Tadinga o-nia madaagoo aanei le e-hai bolo-aha?” Mee ga-helekai gi dagu heeu, “Nia maa le e-hai di hagamodongoohia bolo nia mogobuna o henuailala ala ne-hai nia daangada o Judah, Israel, mo Jerusalem gi-modoho.”

1:20  Dimaadua ga-hagagidee au nia daane ngalua dogohaa mo nadau haamaa.

1:21  Au ga-heeu, “Nia daane aanei ne-lloomoi belee hai nadau aha?” Mee ga-helekai, “Digaula ne-lloomoi belee hagamadagudagu ge daa gi-daha nia henua ala ne-hagahuaidu di guongo go Judah hagatau guu-hai nia daangada gi-modoho gi-daha.”

Chapter 2

2:1  I-lodo tuai midi au guu-mmada gi taane e-daahi dana uga hagatau-mee i-lodo dono lima.

2:2  Au ga-heeu, “Goe hana gi-hee?” Mee ga-helekai gi dagu heeu, “E-hagatau Jerusalem, gi-iloo di palaha mo-di looloo di-maa.”

2:3  Nomuli gei au gaa-mmada gi tangada di-langi dela nogo leelee-mai gi-di-au nomua, gaa-duu gi-mua, ge tuai dangada di-langi ga-hanimoi gi baahi o-mee.

2:4  Tangada di-langi matagidagi ga-helekai gi tangada di-langi dela i-golo, “Lele hagi-anga-ina gi tama daane dela e-daahi dana uga hagatau-mee bolo nia daangada mono manu ga-dogologowaahee i-lodo Jerusalem ga-deloaa di duuli go nia abaaba.

2:5  Dimaadua gu-hagababa bolo Ia go di abaaba ahi e-haganiga di waahale e-duuli di-maa, Mee gaa-noho i-golo mo ono madamada huogodoo.”

2:6  Dimaadua gu-helekai gi ana daangada, “Au gu-haga-modoho goodou gii-noho dagidahi i-lodo nia gowaa huogodoo. Malaa, dolomeenei goodou ala e-noho i nnenua mai i-daha, goodou llele gi-daha mo Babylonia, hula gi-muli gi Jerusalem.

2:7  Dimaadua gu-helekai gi ana daangada, “Au gu-haga-modoho goodou gii-noho dagidahi i-lodo nia gowaa huogodoo. Malaa, dolomeenei goodou ala e-noho i nnenua mai i-daha, goodou llele gi-daha mo Babylonia, hula gi-muli gi Jerusalem.

2:8  Tangada dela ma-ga-daaligi goodou, mee e-daaligi-hua di mee dela e-kaedahi e-hagalabagau mai gi-di-Au.” Dimaadua di Gowaa Aamua ne-hagau mai au mo ana helekai ang-gi nia henua ala ne-kae nia goloo o ana daangada,

2:9  “Ma go Dimaadua modo-go-Ia dela ga-heebagi hai-baahi adu gi goodou, gei digau ala nogo hai-hege adu gi goodou i-mua, gaa-kae godou goloo.” Di madagoaa di mee deenei ma-ga-gila-aga, nia daangada huogodoo ga-iloo bolo ma go Dimaadua di Gowaa Aamua ne-hagau-mai au.

2:10  Dimaadua ga-helekai, “Nia daangada Jerusalem, daahili tenetene! Au gaa-noho i godou baahi!”

2:11  I-di madagoaa deelaa, nia henua e-logo ga-lloomoi gi Dimaadua gaa-hai nia daangada ni Mee. Mee gaa-noho i godou baahi, gei goodou ga-iloo bolo Mee ne-hagau-mai au gi goodou.

2:12  Judah gaa-hai tenua hagalabagau labelaa ni Dimaadua i-lodo dono henua dabu, gei Jerusalem gaa-hai di waahale dela e-kaedahi e-aloho-iei Mee.

2:13  Noho deemuu huogodoo i-mua o Dimaadua, idimaa Mee e-haneia i dono Gowaa Dabuaahia.

Chapter 3

3:1  I-lodo tuai midi, Dimaadua e-haga-gidee-mai tagi hai-mee-dabu go Joshua e-duu i-mua tangada di-langi o Dimaadua. I-baahi Joshua, Setan e-duu i-golo gu-togomaalia e-hagahuaidu a-mee.

3:2  Tangada di-langi o Dimaadua ga-helekai gi Setan, “Dimaadua gi-hagahuaidu-ina goe, Setan! Dimaadua dela e-aloho i Jerusalem gi-hagahuaidu-ina goe. Taane deenei le e-hai gadoo be di laagau dela ne-daa gi-daha mo-di ahi.”

3:3  Joshua nogo duu i-golo, e-ulu ono gahu dogolia.

3:4  Tangada di-langi ga-helekai gi ana gau hai-hegau di-langi, “Daawa-ina gi-daha nia gahu dogolia ala e-ulu taane deenei.” Nomuli ga-helekai gi Joshua, “Au gu-daa gi-daha oo hala, ga-gowadu nia gahu hoou e-ulu-iei goe.”

3:5  Mee ga-helekai gi digau hai-hegau gi-gahu-dia di libogo Joshua gi-di gahu libogo madammaa. Digaula guu-gahu di libogo o-maa ga-haga-ulu a-mee gi-nia gahu hoou, ge tangada di-langi e-duu i-golo.

3:6  Tangada di-langi ga-hagi-anga gi Joshua bolo

3:7  Dimaadua di Gowaa Aamua gu-helekai, “Maa goe ga-daudali agu haganoho gaa-hai agu hegau ne-gowadu, gei goe gaa-dagi hua igolo gi-muli dagu Hale Daumaha mo nia gowaa di Hale Daumaha, Au ga-longono au dalodalo be dagu longono nia dalodalo o digau di-langi ala i ogu mua.

3:8  Joshua, hagalongo, ma kooe di tagi aamua hai-mee dabu. Goodou go nia hoo gau hai-mee dabu a-maa, hagalongo, goodou la go di hagamodongoohia o tenua humalia maalia: Au gaa-hai goodou gi-gidee dagu dangada hai-hegau dela e-haga-ingoo bolo Di Manga!

3:9  Au e-dugu dagu hadu e-dahi e-hidu ono madaaduge gi-mua Joshua. Au ga-maaga nia helekai gi-hongo di-maa, malaa, i-lodo di laangi e-dahi Au ga-daa gi-daha di hala o tenua deenei.

3:10  Di madagoaa di laangi deelaa ma-ga-dau-mai, dahi mo dahi i goodou ga-hagagahi dono dangada mai i-daha gi-hanimoi gi-di gowaa dela e-noho baba mo-di aumaalia, e-daabui go godou hadagee waini mono laagau-‘fig’.”

Chapter 4

4:1  Tangada di-langi dela nogo leelee-mai gi-di-au gu-hanimoi labelaa gu-hangahanga au be tangada nogo kii.

4:2  Mee ga-heeu, “Ma di-aha dela e-mmada ginai goe?” Au ga-helekai gi-di heeu a-maa, “Di lohongo malama ne-hai gi-nia goolo. I-di ulu gi-nua, iai di boolo i-golo, di maa e-dugu nia lolo. I-hongo di lohongo malama deelaa, iai nia malama e-hidu, di malama e-dahi iai nia gowaa e-hidu e-dugu-ai nia uga malama.

4:3  Nia laagau-olib e-lua i-baahi di lohongo malama deelaa, e-dahi i-di baahi e-dahi.”

4:4  Au ga-heeu gi tangada di-langi, “Meenei, nia mee aanei le e-hagamodongoohia nadau aha?”

4:5  Mee ga-heeu-mai, “Goe e-deiloo?” Au ga-helekai, “Meenei au e-deiloo.”

4:6  Tangada di-langi ga-hai-mai bolo gi-wanga-ina gi Zerubbabel nia helekai a Dimaadua aanei: “Goe gaa-gila, hagalee mai baahi o maaloo dauwa, be mai oo mahi donu, gei mai hua i-baahi dogu hagataalunga.

4:7  Nia hagadeaadee llauehe gadoo be nia gonduu ga-hagalee i oo mua. Goe gaa-hau labelaa di Hale Daumaha, i-do madagoaa ma-ga-haganoho di hadu muliagi-loo gi dono lohongo, gei nia daangada gaa-wwolo, ‘E-madamada, e-madamada!’ ”

4:8  Nia helekai labelaa gu-lloomoi gi-di-au mai i-baahi Dimaadua.

4:9  Mee ne-helekai, “Zerubbabel gu-haganoho di hagamau di Hale Daumaha, gei mee ga-hagalawa di hale. Di madagoaa di mee deenei ga-gila-aga, gei agu daangada ga-iloo bolo ma ko-Au dela ne-hagau goe gi digaula.

4:10  Digaula e-lodo huaidu idimaa di Hale Daumaha le e-duainau. Malaa, digaula ga-gidee Zerubbabel e-hauhau di Hale Daumaha e-hagalee noho, gei digaula ga-tenetene.” Tangada di-langi ga-helekai-mai gi-di-au, “Nia malama e-hidu la-go nia golomada e-hidu o Dimaadua, e-gidee henuailala hagatau.”

4:11  Gei au ga-heeu gi mee, “Nia laagau olib e-lua ala i-nia baahi dagidahi o-di lohongo malama le e-hai dono hadinga bolo-aha?

4:12  Tadinga o-nia manga laagau-olib e-lua ala i-baahi nia paip goolo e-lua ala e-halihali-ai nia lolo-olib le e-hai bolo-aha?”

4:13  Mee ga-heeu-mai gi-di-au, “Goe e-deiloo?” Au ga-helekai gi mee, “Meenei, au e-deiloo.”

4:14  Mee ga-helekai, “Aanei la-go nia daane dogolua ala ne-hilihili, ge gu-hagatulu go Dimaadua belee hege ang-gi de-Ia, go di Tagi o henuailala hagatau.”

Chapter 5

5:1  Au gaa-mmada labelaa, tolongo deenei gei au ne-mmada gi-di beebaa wini e-maangi i-lodo di ahiaalangi.

5:2  Tangada di-langi ga-heeu-mai be di-maa di-aha ne-mmada ginai au. Au ga-helekai gi mee, “Di beebaa wini e-maangi i-lodo di ahiaalangi; di-maa e-looloo nia piidi motolu ge palaha nia piidi madangaholu maa-lima.”

5:3  Gei mee ga-helekai-mai, “I-hongo di-maa le e-hihi nia helekai haga-halauwa ala belee hagau gi-hongo tenua hagatau. I-hongo di baahi e-dahi o-di beebaa wini e-helekai bolo digau gaiaa huogodoo ga-daa gi-daha mo tenua; ge i-hongo di baahi dela i-golo e-helekai bolo nia daangada huogodoo ala e-helekai tilikai i-lodo di hagamodu le e-lahi labelaa gi-daha.

5:4  Dimaadua di Gowaa Aamua e-helekai bolo Ia ga-hagau di haga-halauwa deenei gi-daha, ge di-maa ga-ulu gi-lodo nia hale o digau gaiaa huogodoo mo nia hale digau huogodoo ala e-helekai tilikai i-lodo di hagamodu. Di-maa gaa-noho i-lodo nadau hale gaa-oho nia hale digaula.”

5:5  Tangada di-langi ga-gila-mai labelaa ga-helekai, “Mmada! Di mee labelaa i-golo e-hanimoi!”

5:6  Au ga-heeu, “Ma di-aha?” Mee ga-helekai gi dagu heeu, “Ma di gada, di hagamodongoohia o-nia hala o tenua hagatau.”

5:7  Di uhi di gada la-ne-hai gi-nia leed. Au gaa-mmada-hua gei di uhi guu-tanga gi-nua, gei di ahina e-noho i-lodo di gada deelaa!

5:8  Tangada di-langi ga-helekai, “Di ahina deenei la-di hagamodongoohia o-di mouli huaidu.” Mee gaa-hono a-mee gi-lodo di gada, gaa-pono di gada gi dono uhi.

5:9  Au gaa-mmada gi-nua ga-gidee nia ahina dogolua e-mmaangi-mai gi-di-au, nia bakau meemaa e-maaloo dangihi gadoo be nia bakau o-nia ‘stork’. Meemaa ga-dahi-aga di gada deelaa, ga-mmaangi gi-daha mo di-nau gada.

5:10  Au ga-heeu gi tangada di-langi, “Meemaa e-kae di-maa gi-hee?”

5:11  Mee ga-helekai, “Gi Babylonia, di gowaa dela e-hau-ai meemaa di hale daumaha gi di-maa. Di madagoaa di hale daumaha deelaa la-gaa-lawa, gei di gada deelaa gaa-dugu i-golo e-daumaha ginai.”

Chapter 6

6:1  Au guu-mmada gi-di moe labelaa. Tolongo deenei au ne-mmada gi-nia waga dauwa hongo-henua e-haa e-ulu-mai gi-daha mo mehanga nia gonduu baalanga-mmee e-lua.

6:2  Di waga dauwa matagidagi e-hudi go nia hoodo mmee, di lua waga dauwa e-hudi go nia hoodo luuli,

6:3  togodolu waga dauwa e-hudi go nia hoodo kene, di haa waga dauwa e-hudi go nia hoodo habuihabula.

6:4  Au ga-heeu gi tangada di-langi, “Meenei, nia waga dauwa aanei la ono hadinga bolo-aha?”

6:5  Mee ga-helekai gi dagu heeu, “Aanei la-nia madangi e-haa nogo lloomoi-hua i-baahi o-di Tagi o henuailala hagatau.”

6:6  Di waga dauwa dela e-hudi go nia hoodo luuli le e-hana gi-ngeia gi Babylonia, nia hoodo kene e-hula gi dai, gei nia hoodo habuihabula e-hula gi-lodo henua gi-baahi ngaaga.

6:7  Di madagoaa nia hoodo habuihabula ne-lloomoi gi-daha, digaula nogo dee-baba di-hula e-hagadina henuailala. Tangada di-langi ga-helekai, “Hula hagadinaina henuailala!” gei digaula gaa-hula.

6:8  Gei tangada di-langi gaa-wolo-mai gi-di-au, “Nia hoodo ala ne-hula gi-ngeia gi Babylonia guu-dugu di hagawelewele o Dimaadua.”

6:9  Dimaadua gu-gaamai nia helekai aanei.

6:10  Mee ne-helekai, “Kaina nia kisakis ala ne-gaamai go Heldai, Tobijah, mo Jedaiah, hula hagalimalima gi-di hale o Josiah tama daane a Zephaniah. Nia daane huogodoo aanei la-ne-lloomoi gi-daha mo-di nadau noho i-lodo tenua go Babylonia.

6:11  Heia di hau-king gi-nia silber mono goolo ala ne-wanga gi digaula, wanga-ina gi-hongo di libogo o tagi hai-mee-dabu go Joshua, tama-daane a Jehozadak.

6:12  Hagi-anga-ina gi mee bolo Dimaadua di Gowaa Aamua e-helekai, ‘Taane dela e-hagaingoo bolo “Di Manga” ga-humalia ang-gi deia i-di gowaa dela iei mee, ga-haga-hoou di Hale Daumaha Dimaadua.

6:13  Go mee dela gaa-hau di-maa gaa-kae di hagalaamua o-di king, gaa-dagi ana daangada. Tangada hai-mee-dabu ga-i-golo i-baahi dono lohongo king, gei meemaa ga-ngalua ngaadahi i-di aumaalia mo-di buni.’

6:14  Di hau-king gaa-hai di hagalangahia i-lodo di Hale Daumaha Dimaadua e-hagalaamua Heldai, Tobijah, Jedaiah, mo Josiah.”

6:15  Nia daane ala e-noho hagamogowaa ga-lloomoi ga-hagamaamaa e-hau di Hale Daumaha a Dimaadua. Di madagoaa di-maa ma-gaa-lawa di-haga-hoou, goodou ga-iloo bolo Dimaadua di Gowaa Aamua ne-hagau-mai au gi goodou. Di mee deenei gaa-gila hagatau maa goodou ga-daudali gii-tugi nia helekai a Dimaadua di-godou God.

Chapter 7

7:1  I-di haa laangi o-di hiwa malama (di malama go Kislev), i-lodo di haa ngadau Darius nogo hai di tagi o Persia, Dimaadua gu-gaamai ana helekai.

7:2  Nia daangada o Bethel gu-hagau a Sharezer mo Regemmelech mo nadau daane gi-di Hale Daumaha a Dimaadua di Gowaa Aamua belee dalodalo i-di hagahumalia Dimaadua

7:3  mo e-heeu gi digau hai-mee-dabu mo nia soukohp di heeu deenei: “Gimaadou ne-belee hagaonge i-lodo di lima malama e-duudagi di-madau manawa-gee idimaa go di mooho o-di Hale Daumaha, gii-hai be di-madau hai nogo hai i-lodo nia ngadau e-logo gaa-dae-mai-loo gi dolomeenei?”

7:4  Aanei nnelekai Dimaadua ala ne-lloomoi gi-di-au.

7:5  Mee ne-helekai, “Hagi-anga-ina gi-nia daangada o tenua deenei mo digau hai-mee-dabu bolo i-di-nadau madagoaa nogo hagaonge mo-di haga-manawa-gee i-lodo di lima malama mo-di hidu malama i-lodo nia ngadau e-madahidu aanei, la-hagalee di mee ne-hagalaamua Au.

7:6  Di madagoaa digaula ne-miami mo-di inuinu, di mee deenei ne-hai belee hagamanawa lamalia hua ginaadou.”

7:7  Aanei nia helekai Dimaadua ne-helekai-ai mai baahi nia soukohp adu gi mua i-di madagoaa Jerusalem nogo mouli humalia nogo honu nia daangada, i-di madagoaa nia daangada dogologo nogo noho i-lodo nia guongo i-di gili di waahale mo e-noho labelaa i-lodo tenua baahi ngaaga mo tono nia dama gonduu i-baahi dai.

7:8  Dimaadua guu-wanga nia helekai aanei gi Zechariah,

7:9  “I-mua-loo Au guu-wanga nia helekai aanei gi agu daangada gi-daudalia, ‘Goodou e-hai-loo gi-gidee bolo di hagamodongoohia di mee dela e-donu la-guu-lawa di-hai, gei goodou e-hai-loo gi-hagadau manawa dumaalia, ge manawa humalia.

7:10  Hudee hagahuaidu-ina nia ahina guu-mmade nadau lodo, nia dama guu-mmade nadau maadua, digau mai i-daha ala e-noho i godou baahi, be tei dangada dela e-hiihai gi-di hagamaamaa. Hudee hai hagamaanadu bolo e-hagahuaidu dahi mo dahi i goodou.’

7:11  “Gei agu daangada gu-de-hiihai di-hagalongo-mai. Digaula guu-tai nadau maanadu,

7:12  gu-haga-hamaaloo nadau manawa be-di hadugalaa. Idimaa digaula digi hagalongo gi agu helekai agoago ala ne-hagadae go agu soukohp nogo mouli i-mua-loo gi digaula, gei au gu-hagawelewele.

7:13  Idimaa digaula digi hagalongo i-di madagoaa Au ne-helekai, gei Au digi helekai gi-nia dangidangi digaula.

7:14  Gadoo be di madangi maaloo, Au gu-duidui gi-daha digaula gi noho i-lodo nia henua i-daha. Tenua humalia deenei guu-hai di anga-henua, digau e-noho i-hongo di-maa ai.”

Chapter 8

8:1  Dimaadua di Gowaa Aamua guu-wanga nia helekai aanei gi Zechariah,

8:2  “Au nogo hiihai huoloo di hagamaamaa Jerusalem idimaa i dogu aloho damanaiee i ana daangada, di aloho dela ne-hai Au gi-hagawelewele gi ono hagadaumee.

8:3  Au ga-hanimoi labelaa gi dogu waahale dabuaahia go Jerusalem, gaa-noho i-golo. Di waahale la-ga-modongoohia bolo di waahale manawa-dahi, gei di gowaa nnoonua a Dimaadua di Gowaa Aamua ga-hagaingoo bolo di gowaa nnoonua hagamadagu.

8:4  Nia daane mo nia ahina mmaadua ala e-heehee gi-nia dogodogo, digaula gaa-noho labelaa i-hongo nia gowaa nohonoho i-lodo di waahale.

8:5  Nia ala laa-lodo di guongo ga-deeoo nia dama-daane mo nia dama-ahina e-dadaagala.

8:6  “Di mee deenei e-hai be di mee e-deemee di-hai i-baahi digau o tenua ala e-dubu dolomeenei, gei di-maa di mee e-mee i dogu baahi.

8:7  Au ga-laha-mai agu daangada i-nia henua ala ne-lahi ginai agu daangada,

8:8  ga-laha-mai digaula mai dua mo dai, gaa-noho i Jerusalem. Digaula gaa-hai agu daangada, gei Au gaa-hai di God ni digaula, gaa-dagi digaula i-di manawa-dahi mo-di tonu.

8:9  “Goodou gi-maaloo! Dolomeenei gei goodou e-hagalongo gi-nia helekai la-hua ala nogo helehelekai-ai nia soukohp i-di madagoaa di baba hagamau ne-haganoho belee haga-hoou labelaa dogu Hale Daumaha.

8:10  I-mua di madagoaa deelaa, e-deai dahi dangada e-mee di-hui dana dangada, be di manu e-ngalua, e-deai tangada e-mee di-moholo i ono hagadaumee. Au guu-hai nia daangada gii-bida hai-baahi i nadau mehanga.

8:11  Malaa, dolomeenei, gei dagu hai ang-gi digau ala ne-dubu i-lodo tenua deenei le e-hagalee hai be dagu hai i-mua.

8:12  Digaula gaa-dogi nadau laagau meegai i-lodo di aumaalia. Nadau laagau-waini gaa-huwa nia golee, nia gelegele gaa-huwa ono laagau, tenua ga-uwauwa, nia wai ga-logowaahee. Au ga-hagahumalia nia daangada o dogu henua ala ne-dubu gi-nia maluagina aanei.

8:13  Nia daangada o Judah mo Israel! Digau mai i-daha i-mua nogo hagadau haga-halauwa ginaadou, boloo, ‘Di lauwa dela ne-tale gi Judah mo Israel, gi hagalauwa-ina goe!’ Malaa, Au ga-benebene goodou, gei digau mai i-daha ga-hagadau helekai i nadau mehanga, ‘Nia hagahumalia ala ne-wanga gi Judah mo Israel gi-hai-mee ginai goe!’ Malaa, goodou gi-maaloo, hudee mmaadagu.”

8:14  Dimaadua di Gowaa Aamua e-helekai, “Di madagoaa godou maadua-mmaadua ne-hai Au gi-hagawelewele, Au gu-hagamamaanadu belee hagahuaidu digaula, gei Au hagalee huli dagu hagamaanadu, gaa-hai gii-gila.

8:15  Malaa, dolomeenei gei Au e-hagamamaanadu belee hagahumalia nia daangada o Jerusalem mo Judah. Malaa, goodou hudee mmaadagu.

8:16  Aanei nia mee belee hai go goodou: Hagadau helekai di tonu i godou mehanga. I-lodo nia gowaa hai-gabunga, hagamodongoohia-aga di tonu, go di tonu dela e-gaamai di noho di aumaalia.

8:17  Hudee hai bilaan e-bida hagahuaidu goodou. Hudee hagi-aga tilikai i-lala di hagamodu. Au e-hagadugina gi-nia helekai tilikai, hai-baahi gi-di tonu, mo taaligi dangada.”

8:18  Dimaadua di Gowaa Aamua guu-wanga nnelekai aanei gi Zechariah,

8:19  “Nia hagaonge ala ne-hai i-lodo di haa, di lima, di hidu mo di madangaholu malama gaa-huli gaa-hai nia laangi budu hagatenetene mo manawa lamalia ang-gi nia daangada o Judah. Goodou e-hai-loo gi-aloho di tonu mo-di aumaalia.”

8:20  Dimaadua di Gowaa Aamua e-helekai, “Di madagoaa i-golo e-dau-mai gei nia daangada mai nia waahale e-logo ga-lloomoi gi Jerusalem.

8:21  Nia daangada mai di waahale e-dahi ga-helekai gi-nia daangada mai di waahale dela i-golo, ‘Gimaadou ga-daumaha gi Dimaadua di Gowaa Aamua, ga-dalodalo gi ono hagahumalia. Lloomoi madalia gimaadou!’

8:22  Nia daangada dogologo mo nia henua maaloo ga-lloomoi gi Jerusalem e-daumaha gi Dimaadua di Gowaa Aamua mo-di dalodalo gi Mee gi-hagahumalia-ina ginaadou.

8:23  I-lodo nia laangi aalaa, digau dogo madangaholu mai nia henua i-daha ga-lloomoi gi dahi dangada o Jew, ga-helekai, ‘Gimaadou e-hiihai e-buni-adu gi-lodo di-godou gowaa dela e-hula ginai, idimaa gimaadou gu-hagalongo bolo God e-madalia goodou.’ ”

Chapter 9

9:1  Aanei nnelekai Dimaadua: Mee guu-hai ana haganoho hagaduadua ang-gi tenua o Hadrach mo-di waahale Damascus. Hagalee go nia madawaawa la-hua o Israel, gei di waahale dagi o Syria labelaa di mee ni Dimaadua.

9:2  Hamath dela e-tale gi Hadrach, tenua labelaa ni Mee, mo nia waahale o Tyre mo Sidon, dalia nadau iloo hai-mee.

9:3  Tyre gu-duuli abaaba eia gu-hagabae gi-nua nia silber mono goolo gu-logowaahee-hua be nia gelegele!

9:4  Malaa, Dimaadua ga-daa gi-daha mo mee nia mee huogodoo ala e-hai-mee ginai. Mee gaa-kili nia maluagina o-maa gi-lodo tai, gei di waahale gaa-wele gaa-tugi di gelegele.

9:5  Di waahale o Ashkelon ga-gidee di mee deenei ga-madagu. Di waahale o Gaza gaa-mmada gi-di-maa ga-duadua mmaemmae huoloo. Ekron dela gadoo, ono hagadagadagagee ga-hagalee. Gaza ga-deai dono king ai, ge Ashkelon ga-diiagi gaa-hai di anga gowaa.

9:6  Nia daangada unugi baahi-lua gaa-noho i-lodo Ashdod. Dimaadua e-helekai, “Au ga-hagamanawa hila gi-lala digau Philistia hagapuu huogodoo aanei.

9:7  Digaula ga-hagalee e-gai nia goneiga mono dodo i-nolodo, be nia meegai ala i-golo ala guu-bule. Huogodoo ala ne-mouli ga-buni-anga gi agu daangada gaa-hai be di madahaanau i-lodo di madawaawa Judah. Ekron ga-buni-anga gi agu daangada, gadoo be digau Jebusite.

9:8  Au ga-hagaloohi dogu henua ga-duuli digau dauwa gi-dee hula laalaa. Au ga-hagalee dumaalia gi-nia dagi hagamuamua gi-hagahuaidu-ina agu daangada labelaa. Au gu-gidee di hagaduadua balua o agu daangada.”

9:9  Goodou go digau Zion, goodou gi-wwolowwolo gi-nua mo-di tenetene! Goodou go digau Jerusalem, goodou momoogo tenetene. Mmada, di-godou king ga-hanimoi gi goodou! Mee e-hanimoi i-di mahi aamua mo-di mogobuna o-di aali, gei mee e-hila-gi-lala, e-hanimoi i-hongo di ‘donkey’-ahina, go tama-‘donkey’.

9:10  Dimaadua ga-helekai, “Au ga-daa gi-daha mo Israel nia waga-dauwa, gaa-kae nia hoodo ala i Jerusalem, gei nia maalei-dauwa ala nogo hai-hegau i-lodo nia dauwa la-gaa-oho gi-daha. Di-godou king gaa-hai di aumaalia i-mehanga nia henua llauehe, Mee gaa-dagi di tai-nei gaa-dau-loo gi-di tai dela i-golo, mai i-di monowai Euphrates gaa-hana gi-nia mada o henuailala.”

9:11  Dimaadua ga-helekai, “Au ga-hagamehede godou gau galabudi gi-daha mo-di luwa dela ono wai ai, idimaa i dagu hagababa dela ne-hai-adu gi goodou, dela ne-maaga gi-nia dodo tigidaumaha.

9:12  Hula gi-muli, goodou go digau ala ne-lahi gi-daha, aalaa godou hagadagadagagee i-golo dolomeenei. Hula gi-muli gi-di guongo dela e-noho humalia goodou. Dolomeenei gei Au e-hagi-adu gi goodou bolo Au gaa-hui goodou dualua gi-nonua mo e-haga-maluagina goodou i godou hagaduadua huogodoo ala ne-kae.

9:13  Au ga-hai-hegau gi Judah gadoo be-di maalei, gei ga-hai-hegau gi Israel be nia amu maalei. Au ga-hai-hegau gi-nia daane o Zion be tulumanu-dauwa, e-heebagi gi-nia daane o Greece.”

9:14  Dimaadua ga-hagagida Ia gi ana daangada, Mee gaa-puu dana amu maalei gadoo be-di ila. Di Tagi go Yihowah ga-ili dana buu, Mee ga-hanaga i-lodo di madangi maaloo mai ngaaga.

9:15  Yihowah di Gowaa Aamua ga-abaaba ana daangada, gei digaula ga-daaligi nadau hagadaumee gi-hagalee. Digaula ga-hagalongoaa i-lodo tauwa be digau libaliba, ga-hagahali nia dodo o nadau hagadaumee. Nia dodo digaula gaa-hali gadoo be nia dodo tigidaumaha i-lodo di boolo ala ma-gaa-llingi gi-hongo di gowaa dudu tigidaumaha.

9:16  Di laangi deelaa ma-ga-dau-mai, gei Dimaadua ga-benebene ana daangada gadoo be tangada hagaloohi-siibi dela e-benebene ana siibi gi-daha mo nia haingadaa. Digaula ga-maahina i lodo dono henua, gadoo be nia hadu hagalabagau o-di hau-king.

9:17  E-humalia ge madamada hualaa behee go tenua deelaa! Digau ala lligi ga-tomo-aga ga-maaloo i-nia huwa-‘wheat’ mono waini o tenua.

Chapter 10

10:1  Dalodalo gi Dimaadua gi-hagadoo-ina di uwa i-lodo di madagoaa e-tomo nia laagau hoou. Ma go Dimaadua dela e-hagau ana gololangi uwa mono uwa, e-hagatomo-aga nia hadagee o-nia daangada huogodoo.

10:2  Nia daangada e-halahala di longo mai baahi nia ada-god mo digau hagailoo maluagina, gei nadau mee ala e-kae i-baahi digaula la-nia tilikai mono balumee. Hunu ginaadou e-hagamodongoohia nia moe, malaa e-halahalau-hua goodou; di-nadau haga-manawa tenetene goodou le e-balumee-hua. Malaa, nia daangada e-heehee gadoo be nia siibi ne-nngala. Digaula gu-huaidu ang-gi ginaadou idimaa digaula nadau dagi ai.

10:3  Dimaadua e-helekai, “Au e-hagawelewele gi digau mai i-daha ala e-dagi agu daangada, gei Au ga-hagaduadua digaula. Nia daangada o Judah la digau ni-aagu. Au, go Dimaadua di Gowaa Aamua, ga-benebene digaula. Digaula gaa-hai be nia hoodo dauwa maaloo ni-aagu.

10:4  Mai i-lodo digaula e-lloomoi digau hau haganoho, digau e-dagi, mo nia dagi dauwa e-dagi agu daangada.

10:5  Nia daangada o Judah ga-maaloo be digau dauwa ala e-dagadagahi nadau hagadaumee gi-lodo nia gowaa gulugulua i-hongo nia ala hagalligi. Digaula ga-heebagi idimaa Dimaadua e-madalia ginaadou, digaula ga-hagamagedaa hogi nadau hagadaumee ala e-llele hoodo.

10:6  “Au gaa-hai nia daangada o Judah gi-maaloo; Au ga-haga-dagaloaha nia daangada Israel. Au ga-aloho i digaula, ga-laha-mai labelaa digaula gi nadau henua. Digaula gaa-hai be nia daangada digi diiagi ko-Au. Au go Dimaadua go di nadau God. Au ga-hagagila nadau dalodalo.

10:7  Nia daangada Israel ga-maaloo be digau dauwa, ga-tenetene be nia daane ala ne-inuinu nadau waini. Nadau hagadili ga-langahia di maaloo deenei, ga-manawa lamalia idimaa di mee ni Dimaadua ne-hai.

10:8  “Au ga-gahigahi agu daangada, ga-haga-dagabuli digaula. Au ga-haga-dagaloaha digaula, gaa-hai digaula gi-logowaahee be-di hai digaula nogo dogologo.

10:9  Ma e-aha maa Au gu-duwweduwwe digaula laa-lodo nia henua mogowaa, digaula ga-langahia Au. Digaula mo nadau dama ga-mouli ga-lloomoi ngaadahi gi-muli gi nadau henua donu.

10:10  Au ga-laha-mai digaula gi-daha mo Egypt mo Assyria gi nadau henua ga-haganoho digaula gi-lodo nadau henua donu. Au ga-haganoho digaula gi-lodo Gilead mo Lebanon labelaa; tenua hagatau gaa-honu dangada.

10:11  Di madagoaa digaula gaa-hula laa-lodo di tai o nadau haingadaa, Au, go Dimaadua, ga-hagamaawa nia beau, gei nia llala o-di Nile ga-maangoo. Assyria tenua hagapuu gaa-hila gi-lala, Egypt tenua maaloo gaa-hai gi-bagege.

10:12  Au gaa-hai agu daangada gi-maaloo. Digaula ga-daumaha ga-hagalongo-mai.” Dimaadua ne-helekai.

Chapter 11

11:1  Hugee o bontai Lebanon, gii-mee di ahi di-dudu gi-lala au laagau-‘cedar’!

11:2  Goodou go nia laagau-‘cypress’, manawa-gee mo-di dangidangi, nia laagau-‘cedar’ gu-hingahinga; nia laagau madamada aalaa la-gu-oho gi-daha! Nia laagau-‘oak’ o Bashan, manawa-gee mo-di dangidangi, di waa-laagau lodo henua maadolu guu-hele gi-lala!

11:3  Nia dagi e-dangidangi manawa-gee, nadau madamada gu-hagalee! Hagalongo gi-di lee ngoloolo o-nia laion, nadau gowaa lodo-henua i taalinga Jordan gu-mooho!

11:4  Dimaadua go dogu God ne-helekai-mai gi-di-au, “Heia tegau tangada hagaloohi siibi o-nia siibi ala ga-daaligi gii-mmade.

11:5  Digau ala e-hai-mee gi-nia siibi la-gu-daaligi nadau siibi gii-mmade gei digi hagaduadua-ina. Digaula guu-hui gi-daha nia goneiga nia maa ga-helekai, ‘Hagaamu-ina a Dimaadua! Gidaadou gu-maluagina!’ Nia hagaloohi donu o-nia siibi hogi deai nadau aloho i-nia siibi aalaa ai.”

11:6  (Dimaadua ga-helekai, “Au ga-hagalee aloho dahi dangada i henuailala. Ko-Au hua gaa-wanga nia daangada huogodoo gi-lodo nia mogobuna o nadau dagi. Nia dagi aanei gaa-oho henuailala, gei Au hagalee duuli di-maa gi-dee-oho go digaula.”)

11:7  Digau ala ne-hui mo-di huihui gi-daha nia siibi gu-hagangalua au, gei au guu-hai tangada hagaloohi siibi o-nia siibi ala ne-belee daaligi. Au gaa-kae agu bida laagau e-lua: E-dahi e-hagaingoo koau bolo “Hiihai” gei di hoo di-maa e-hagaingoo bolo “Buni-dahi”. Gei au gu-benebene nia siibi aalaa.

11:8  Au gu-hagawelewele gi digau hagaloohi siibi dogodolu ala i-golo nogo hai-baahi mai, gei au gu-daaligi digaula huogodoo gii-mmade i-lodo di malama hua e-dahi.

11:9  Gei au ga-helekai gi-nia siibi, “Au ga-hagalee hai di-godou dangada hagaloohi. Dugu-ang-gi digau ala belee mmade gii-mmade. Dugu-ang-gi digau ala belee oho gi-daha gi-mooho. Digau ala ma-gaa-dubu ga-hagadau daaligi ginaadou.”

11:10  Gei au ga-dahi-aga di bida laagau dela e-hagaingoo bolo “Hiihai” gaa-hadi di-maa, e-oho di hagababa Dimaadua ne-hai gi-nia henua huogodoo.

11:11  Malaa, di hagababa gu-hagalee mogobuna i-di laangi deelaa. Digau ala ne-hui ga-huihui gi-daha nia siibi, nogo daumada au, gei digaula gu-iloo bolo Dimaadua ne-leelee mai i-lodo agu mee ala ne-hai.

11:12  Au ga-helekai gi digaula, “Maa goodou e-hiihai, huina au. Maa goodou e-hagalee hiihai, duguina hua.” Digaula gaa-hui au gi-nia silber motolu bolo dela dogu hui.

11:13  Dimaadua ga-helekai-mai gi-di-au, “Duguina nia maa gi-lodo di gowaa dugu bahihadu di Hale Daumaha.” Au gaa-kae nia silber monnono motolu ala ne-hagamaanadu go digaula bolo di hui damanaiee ne-hui au, gaa-wanga nia maa gi-lodo di gowaa dugu bahihadu di Hale Daumaha.

11:14  Gei au gaa-hadi di lua laagau dela e-hagaingoo bolo “Buni-dahi”, gei di buni-dahi o Judah mo Israel gu-mooho.

11:15  Gei Dimaadua ga-helekai-mai gi-di-au, “Heia labelaa tegau o tangada hagaloohi siibi, tolongo deenei heia be di balu dangada hagaloohi siibi.

11:16  Au guu-dugu dagu dangada e-hagaloohi agu siibi, gei mee e-hagalee hagamaamaa nia siibi ala e-mmaadagu bolo ginaadou gaa-mmade, gei mee hogi e-hagalee halahala nia siibi ala ma-gaa-nngala, hagalee hagahili nia siibi ala ma-gaa-mmae, be e-haangai nia siibi ala e-maaloo. Malaa, di mee a-maa ne-hai, mee ne-gai nia goneiga o-nia siibi ala e-kaedahi e-pedi mo-di hagihagi gi-daha nia madaawae digaula.

11:17  Di balu dangada hagaloohi siibi deelaa la-gu-lauwa! Mee gu-diiagi ana siibi. Tauwa gaa-oho ono mahi hagatau. Dono lima ga ono mahi ai, dono golomada gau-donu ga-dee-gida.”

Chapter 12

12:1  Aanei nnelekai i-di gili o Israel mai baahi Dimaadua, go Yihowah dela ne-hagamoholo di-langi, gaa-hai henuailala, gaa-wanga di mouli gi tangada. Mee e-helekai,

12:2  “Au gaa-hai Jerusalem gii-hai be-di ibu waini; nia henua ala i dono baahi ga-inu ga-hingahinga be digau libaliba. Di madagoaa digaula ga-duuli Jerusalem, nia waahale i-golo ala i-lodo Judah ga-duuli labelaa.

12:3  Di madagoaa deelaa ma-ga-dau-mai, gei Au gaa-hai Jerusalem gii-hai be-di hadu daamaha; tei henua dela e-hagamada bolo e-dahi-aga di-maa la-gaa-mmae. Nia henua huogodoo o henuailala gaa-buni i-lodo tauwa ga-heebagi gi mee.

12:4  I-di madagoaa deelaa, gei Au ga-hagamadagudagu nadau hoodo huogodoo ga-hagaboiboi digau ala e-llele nia maa. Au ga-loohi nia daangada o Judah, gei Au ga-haga-deegida nia hoodo o nadau hagadaumee.

12:5  Gei nia madahaanau o Judah gaa-bida helekai anga-hua gi ginaadou, ‘Dimaadua go di-madau God di Gowaa Aamua gu-hagamaaloo ana daangada ala e-noho i-lodo Jerusalem.’

12:6  “I-di madagoaa deelaa, gei Au gaa-hai nia madahaanau o Judah gii-hai be-di ahi i-lodo henua be i-lodo tadagee guu-leu ono huwa, digaula gaa-oho gi-daha nia henua ala e-haganiga mai i-daha. Nia daangada o Jerusalem gaa-noho i-di aumaalia i-lodo di waahale.

12:7  “Ko-Au go Dimaadua ga-hagamaaloo di buini-dauwa Judah matagidagi, bolo di-hagalaamua o-nia hagadili o David mo nia daangada o Jerusalem ala gaa-kae la hagalee damana i-di hagalaamua o digau o Judah hagatau.

12:8  I-di madagoaa deelaa, Au go Dimaadua ga-hagaloohi digau ala e-noho i Jerusalem, gei digau ala e-kaedahi e-paagege i-lodo digaula ga-maaloo be David. Nia hagadili o David gaa-dagi digaula gadoo be tangada di-langi o Dimaadua, e-hai be koia go God.

12:9  I-di madagoaa deelaa, gei Au gaa-oho nia henua huogodoo ala e-hagamada bolo ginaadou e-heebagi gi Jerusalem.

12:10  “Au ga-hagahonu nia hagadili o David mo nia daangada i-golo i Jerusalem gi-di hagataalunga o tumaalia mo-di hagataalunga o talodalo. Digaula gaa-mmada gi Tangada ne-daaligi go ginaadou gii-made, gaa-hai tangihangi gi Mee be tangada ma-ga-dangidangi gi dana dama hua e-dahi. Digaula ga-dangidangihia, gadoo be tangada ne-made dana dama madua.

12:11  I-di madagoaa deelaa, tangihangi i-lodo Jerusalem ga-damana be tangihangi gi Hadad Rimmon i-lodo di gowaa baba o Megiddo.

12:12  Nia madahaanau huogodoo i-lodo tenua gaa-bida hai hangihangi ginaadou: di madahaanau o-nia hagadili o David, di madahaanau o-nia hagadili o Nathan, di madahaanau o-nia hagadili o Levi, di madahaanau o-nia hagadili o Shimei; mo nia madahaanau huogodoo ala i-golo. Di madahaanau e-dahi gaa-bida dangidangi hua i ginaadou, gei nia daane o-nia madahaanau dagidahi ga-dangidangi mada-ginaadou i-daha mo nia ahina.”

12:13  Nia madahaanau huogodoo i-lodo tenua gaa-bida hai hangihangi ginaadou: di madahaanau o-nia hagadili o David, di madahaanau o-nia hagadili o Nathan, di madahaanau o-nia hagadili o Levi, di madahaanau o-nia hagadili o Shimei; mo nia madahaanau huogodoo ala i-golo. Di madahaanau e-dahi gaa-bida dangidangi hua i ginaadou, gei nia daane o-nia madahaanau dagidahi ga-dangidangi mada-ginaadou i-daha mo nia ahina.”

12:14  Nia madahaanau huogodoo i-lodo tenua gaa-bida hai hangihangi ginaadou: di madahaanau o-nia hagadili o David, di madahaanau o-nia hagadili o Nathan, di madahaanau o-nia hagadili o Levi, di madahaanau o-nia hagadili o Shimei; mo nia madahaanau huogodoo ala i-golo. Di madahaanau e-dahi gaa-bida dangidangi hua i ginaadou, gei nia daane o-nia madahaanau dagidahi ga-dangidangi mada-ginaadou i-daha mo nia ahina.”

Chapter 13

13:1  Dimaadua di Gowaa Aamua e-helekai, “I-di madagoaa deelaa ma-ga-dau-mai, di monowai ga-mahuge e-hagamadammaa nia hala mo nia balu daumaha o-nia hagadili o David mo nia daangada o Jerusalem.

13:2  I-di madagoaa deelaa, gei Au ga-daa gi-daha mo tenua nia ingoo o-nia ada god, gei deai tangada ga-langahia nia maa ai. Au ga-hagabagi digau ala e-helekai bolo ginaadou la-nia soukohp, gaa-hai digaula gi-de-hiihai di-daumaha gi-nia ada god.

13:3  Maa dahi dangada gaa-hai hua igolo bolo ia e-helekai hua kokohp, dono damana mo dono dinana donu ga-hagi-anga gi mee bolo mee e-hai-loo gi-daaligi gii-made, idimaa mee guu-hai bolo ia e-helekai nia helekai Dimaadua, gei mee ne-helekai tilikai. Di madagoaa a mee ma-ga-helekai kokohp, dono damana mo dono dinana donu ga-daalo a mee gii-made.

13:4  I-di madagoaa deelaa ma-ga-dau-mai, deai dahi soukohp e-hagapuu gi ana moe, be e-hai ana hangaahai be soukohp be e-gahu eia gi-di gahu soukohp e-halahalau nia daangada ai.

13:5  Malaa, mee ga-helekai, ‘Au hagalee soukohp. Au tangada dogi-mee, nogo dogidogi agu mee i-lodo tenua i-lodo dogu mouli hagatau.’

13:6  Maa dahi dangada ga-heeu gi mee, ‘Do hadahada la ne-lauwa di-aha?’ gei mee ga-helekai, ‘Au ne-lauwa i-di hale dogu ihoo hagaaloho.’ ”

13:7  Dimaadua di Gowaa Aamua e-helekai, “Tulumanu dauwa, duu gi-nua, heebagi gi tangada hagaloohi siibi dela e-ngalua-mai gi-di-Au! Daaligidia a-mee, gei nia siibi ga-lellele dagidahi. Au ga-heebagi gi agu daangada.

13:8  Laa-lodo tenua, lua baahi e-dolu o-nia daangada gaa-mmade.

13:9  Au ga-haahaa di mouli o dahi baahi e-dolu daangada ala e-mouli, ga-haga-madammaa digaula gadoo be di silber dela e-haga-madammaa go-di ahi. Au ga-halahala di mouli digaula be-di hai e-haahaa nia goolo gi-di ahi. Gei digaula ga-dalodalo-mai gi-di-Au, gei Au ga-helekai gi-nia dangidangi digaula. Au ga-hagamodongoohia gi digaula bolo ginaadou la-nia daangada ni-aagu, ge digaula ga-hagamodongoohia-aga bolo Au go di-nadau God.”

Chapter 14

14:1  Di laangi dela ma-gaa-noho-ai Dimaadua i-hongo dono lohongo gabunga gu-hoohoo-mai. Gei Jerusalem ga-gaiaa ono goloo, gei nia maa ga-waewae i-mua godou golomada.

14:2  Dimaadua ga-haga-dagabuli-mai nia henua huogodoo ga-heebagi gi Jerusalem. Di waahale gaa-kae, nia hale ga-gaiaa ono goloo, nia ahina gaa-hai ginai di hai be-di manu. Dahi baahi e-lua o-nia daangada gaa-hula gi-daha mo nadau henua, malaa, digau ala e-dubu i-golo ga-hagalee lahi gi-daha mo-di waahale.

14:3  Gei Dimaadua gaa-hana ga-heebagi gi-nia henua aalaa, be dana hai nogo heebagi i-mua.

14:4  I-di madagoaa deelaa, gei Mee gaa-duu i-hongo di Gonduu Olib, gi-baahi dua o Jerusalem. Gei di Gonduu Olib ga-haahi-lua go-di gowaa baba damana e-mahaa mai dua gaa-tugi i dai. Dahi baahi e-lua o-di gonduu ga-menege gi-ngeia, gei di baahi dela i-golo ga-menege gi-ngaaga.

14:5  Goodou gaa-llele gi-daha laa-lodo di gowaa baba deenei dela e-wwae-lua di gonduu. Goodou gaa-llele gi-daha gadoo be godou maadua-mmaadua ne-llele gi-daha mo-di ngalungalua tenua i-lodo di madagoaa di King Uzziah o Judah. Dimaadua go dogu God ga-hanimoi ga-laha-mai digau di-langi huogodoo dalia Ia.

14:6  Di madagoaa deelaa ma-ga-dau-mai, gei di magalillili ga-hagalee,

14:7  di bouli ai labelaa. Di laangi ga-i-golo i-nia madagoaa huogodoo, ma e-aha di madagoaa belee bouli ai. Dimaadua hua e-iloo-Ia di madagoaa behee gei di mee deenei ga-gila-aga.

14:8  I-di laangi deelaa ma-ga-dau-mai, nia wai haga-mouli gaa-hali-mai i Jerusalem, di baahi nia wai e-hali gi Tai Mmade, di baahi dela i-golo e-hali gi Mediterranean, gaa-hali i-lodo di ngadau hagatau, i-lodo di madagoaa maangoo mo i-lodo di madagoaa tiutiu.

14:9  Gei Dimaadua gaa-king henuailala hagatau; nia daangada huogodoo ga-daumaha gi Mee be di-nadau God, ga-iloo a-Mee i dono ingoo la-hua.

14:10  Di gowaa hagatau, mai Geba i-baahi ngeia gaa-tugi i Rimmon i-baahi ngaaga, gaa-hai gi-malallali. Jerusalem ga-duuduu i-nua i-hongo tenua dela i-di gili di-maa; di waahale ga-daamada i-di Bontai Benjamin gaa-tugi i-di Bontai Madaaduge, di gowaa nogo iai di bontai mai i-mua, mo mai di Angulaa o Hananel gaa-tugi i-di gowaa e-dagadagahi waini di king.

14:11  Nia daangada gaa-noho i-golo i-di aumaalia, ga-hagalee mmaadagu di mooho.

14:12  Dimaadua ga-hagau-mai dana magi huaidu huoloo gi-hongo nia henua huogodoo ala e-dauwa gi Jerusalem. Nadau huaidina gaa-pala gi-daha gei digaula e-mouli hua igolo; nadau golomada mo nadau holole gaa-pala.

14:13  I-di madagoaa deelaa, Dimaadua ga-hagahinihini digaula, gaa-hai digaula gi-mmaadagu huogodoo, tei gii-kumi tangada dela i dono baahi ga-heebagi gi mee.

14:14  Nia daane o Judah ga-heebagi e-duuli Jerusalem. Digaula gaa-kae nia goloo maluagina o-nia henua huogodoo, nia goolo, silber, mono gahu e-logowaahee giibeni.

14:15  Di magi pale gaa-tale gi-nia hoodo, nia dama hoodo, nia ‘camel’ mono hoodo ‘donkey’, gaa-tale gi-nia manu huogodoo i-lodo nia gowaa nohonoho-ai nia hagadaumee.

14:16  Gei digau huogodoo ala e-mouli hua igolo mai nia henua ala nogo heebagi gi Jerusalem, gaa-hula gi-golo i-nia ngadau huogodoo e-daumaha gi Dimaadua di Gowaa Aamua be-di-nadau hai ma-ga-daumaha gi-di king ge e-budu Tagamiami o-nia Damaa-hale Hagaabili.

14:17  Maa dahi henua ga-hagalee hana e-daumaha gi Dimaadua di Gowaa Aamua be-di nadau king, gei di uwa ga-hagalee doo gi-hongo nadau henua.

14:18  Maa digau Egypt ga-hagalee budu Tagamiami o-nia Damaa-hale Hagaabili, gei digaula gaa-tale gi-di magi dela e-hagau-mai go God gi-hongo nia henua huogodoo ala e-hagalee hiihai di-hula.

14:19  Deenei di hagaduadua dela gaa-tale ang-gi digau Egypt mo nia henua huogodoo ala i-golo, maa ginaadou e-hagalee budu Tagamiami o-nia Damaa-hale Hagaabili.

14:20  I-di madagoaa deelaa, nia beele o-nia uga dagi-hoodo gaa-hihi nia helekai i nadau gili boloo, “Hagadabu ang-gi Dimaadua.” Nia baalanga dunu meegai i-lodo di Hale Daumaha ga-dabuaahia be nia boolo ala i-mua di gowaa dudu tigidaumaha.

14:21  Nia baalanga dunu meegai huogodoo i-lodo Jerusalem mo i-lodo Judah ga-hagadabu e-hai-hegau i-lodo di hai-daumaha o Dimaadua di Gowaa Aamua. Nia daangada ala e-hai nadau tigidaumaha ga-hai-hegau nia maa e-dunu nia goneiga o-nia tigidaumaha. Di madagoaa deelaa ma-ga-dau-mai, gei deai tangada huihui mee ga-i-lodo di Hale Daumaha o Dimaadua di Gowaa Aamua ai.