Azeri - Hosea

Chapter 1

1:1  بو ربّئن سؤزودور کي، يهودا پادشاهلاري عوزئيّا، يوتام، آحاز، خئزقئيا و ائسرايئل پادشاهي يِهوآش اوغلو يَروبعامين دؤورونده بِعِري اوغلو هوشه‌يه نازئل اولدو.

1:2  رب هوشه‌يئن واسئطه‌سئله دانيشماغا باشلايارکَن، اونا بله ددي: "گت فاحئشه بئر آرواد آل و اوندان زئنا اوشاقلارين اولسون، چونکي اؤلکه‌نئن خالقي ربدن اوز دؤنده‌رئب اونا حدسئز خيانت ادئر."

1:3  هوشَع گدئب دئبلايئمئن قيزي گومِري اؤزونه آرواد آلدي. گومِر بويلو اولوب اونا بئر اوغول دوغدو.

1:4  رب هوشَه‌يه ددي: "اونون آديني يئزرِعِل قوي، چونکي عنقرئب من يئزرِعِلده تؤکولَن قانين جزاسيني يِيهو نسلئنه چکدئره‌جيم و ائسرايئل نسلئنئن پادشاهليغينا آخير قوياجاغام.

1:5  همئن گون يئزرِعِل دره‌سئنده ائسرايئلئن کامانيني قيراجاغام."

1:6  گومِر گئنه بويلو اولوب بئر قيز دوغدو. رب هوشَه‌يه ددي: "اونون آديني لو-روخاما قوي، چونکي من داها ائسرايئل نسلئنه مرحمتلي اولماياجاغام کي، اونلاري باغيشلاييم.

1:7  آمّا يهودا نسلئنه من مرحمت گؤرسه‌ده‌جيم و اونلاري کامان، قيلينج، موحارئبه، آتلار و آتلي‌لار وسئله‌سئله يوخ، اونلارين رب تاريسي وسئله‌سئله خئلاص اده‌جيم."

1:8  گومِر لو-روخاما‌ني سوددن کَسن واخت، گئنه بويلو اولوب بئر اوغول دوغدو.

1:9  رب ددي: "اونون آديني لو-عَمّي قوي، چونکي سئز منئم خالقيم ديئلسئنئز، من ده سئزئن تارينيز ديئلم.

1:10  آنجاق ائسرايئل اؤولادلاري دهنز قومو کئمي سايسيز-حسابسيز اولاجاق. اونلارا «سئز منئم خالقيم ديئلسئنئز» ديئلَن يرده، «سئز وار اولان تارينين اؤولاديسينيز» ديئله‌جک.

1:11  يهودا و ائسرايئل اؤولادلاري بئر يِره ييغيليب اؤزلرئنه واحئد باشچي تعيئن اده‌جک. اونلار اؤلکه‌دن چيخاجاقلار، چونکي يئزرِعِل گونو مؤحتشم بئر گون اولاجاق.

Chapter 2

2:1  قارداشلارينيزي عَمّي، باجيلارينيزي دا روخاما ديئب چاغيرين.

2:2  باشلايين آنانيزين ضئدّئنه اولان داعواني، باشلايين، چونکي او، منئم آرواديم ديئل، من ده اونون اَري ديئلم. قوي اوزونده گؤرونَن فاحئشه‌لئيي، سئنه‌لرئنئن آراسيندا اولان فاحئشه‌لئيي آتسين.

2:3  يوخسا اونو چيل-چيلپاق سويوندوروب لوت، آنادان‌گلمه اده‌‌جيم. من اونو صحرا کئمي، قورو تورپاق کئمي اده‌جيم، سوسوزلوقدان اؤلدوره‌جيم.

2:4  اونون بالالارينا دا رحم اتميه‌جيم، چونکي اونلار زئنا اؤولادي‌ديرلار.

2:5  اونلارين آناسي فاحئشه‌لئک اتدي. اونلارا بويلو قالان آرواد رذئل‌لئک اتدي، چونکي ددي: «اويناشلاريمين دالينجا گده‌جيم، چؤره‌يئمي، سويومو، يونومو، کتانيمي، زيتون ياغيمي و ائچکئمي ورن اونلاردير.»

2:6  بونا گؤره ده، باخ، اونون يولونو تئکانلارلا کَسئب قاباغينا حاصار چکه‌جيم، اِله کي، اؤز يولونو تاپا بئلميه‌جک.

2:7  اويناشلارينين دالينجا گده‌جک، لاکئن اونلارا چاتماياجاق. اونلاري آختاراجاق، آمّا تاپماياجاق. او زامان دئيه‌جک: «قوي اؤز اوّلکي اَرئمئن يانينا قاييديم، چونکي او واخت حاليم ائندئکئندن ياخشي ائدي.»

2:8  آمّا او بئلمئردي کي، اونا تاخيلي، تزه شرابي، زيتون ياغيني ورن منم. بَعَل بوتو اوچون صرف اتدئکلري قيزيل-گوموشو چوخالدان منم.

2:9  بونا گؤره ده محصول واختيندا تاخيليمي، اؤز مؤوسومونده تزه شرابيمي گری آلاجاغام. چيلپاقليغيني اؤرتمک اوچون اونا وردئيئم يونو و کتاني اَلئندن آلاجاغام.

2:10  سونرا اويناشلارينين قاباغيندا اونون عاييبيني اوزه چيخارداجاغام. کئمسه اونو اَلئمدن قورتارا بئلميه‌جک.

2:11  اونون بوتون شادليقلارينا، بايراملارينا، تزه آي مراسئملرئنه، سَبّت گونلرئنه و بوتون طنطنه‌لي ييغيناقلارينا آخير قوياجاغام.

2:12  مِينه‌لرئني، اَنجئر آغاجلاريني محو اده‌جيم. او بونلار باره‌ده ديئردي: «بو، اويناشلاريمين منه وردئيي اوجرَتدئر.» باغلاريني تئکانليغا چِوئره‌جيم، وحشي حيوانلار اونلاري يئيه‌جکلر.

2:13  بَعَل بوتلرئنه بوخور يانديرديغي گونلر اوچون اونو جزالانديرجاغام. او واخت گوشوارالار و جواهئراتلا اؤزونو بَزه‌يه‌رک اويناشلارينين دالينجا گتدي، لاکئن منی ياددان چيخارتدي." رب بله بويورور.

2:14  "بونا گؤره ده، باخ، من اونو دئله توتوب صحرايا آپاراجاغام، اونونلا مهرئبان دانيشاجاغام.

2:15  اورادا اونا اوزوم باغلاريني وره‌جيم، آکور دره‌سئني اومئد قاپيسينا چِوئره‌جيم. جاوانليق گونلرئنده اولدوغو کئمي، مئصئر تورپاغيندان چيخديغي گون کئمي، اورادا نغمه اوخوياجاق."

2:16  رب بويورور: "همئن گون منه «منئم اَرئم» دئيه‌جکسن، آرتيق «منئم بَعه‌لئم» دِميه‌جکسن.

2:17  چونکي بَعَل بوتلرئنئن آدلاريني دئلئندن سئله‌جيم، اِله کي، اونلارين آدي بئر داها يادا سالينماياجاق.

2:18  او گون سنئن اوچون چؤل حيوانلاري، گؤي قوشلاري، و يرده سوروننلرله عهد کَسه‌جيم. اؤلکه‌دن کاماني، قيلينجي، موحارئبه‌ني گؤتوره‌جيم، سني اَمئن-آمانليقدا ياتيرداجاغام.

2:19  سني ابدی اولاراق اؤزومه نئشانلاياجاغام، صالحلئک، عدالت، مهرئبانليق و شَفقَتله سني اؤزومه نئشانلاياجاغام.

2:20  سني صداقتله اؤزومه نئشانلاياجاغام، و سن ربّی تانيياجاقسان."

2:21  رب بويورور: "او گون جاواب وره‌جيم، گؤيلره جاواب وره‌جيم، اونلار دا يِره جاواب وره‌جکلر.

2:22  يِر تاخيلا، تزه شرابا و زيتون ياغينا جاواب وره‌جک، اونلار دا يئزرِعِله جاواب وره‌جکلر.

2:23  خالقيمي اؤلکه‌ده اؤزوم اوچون اَکه‌جيم، مرحمت تاپماميش اولانا دا مرحمت گؤرسده‌جيم. «خالقيم ديئل» دِدئيئمه خالقيم اولمايانا «سئز خالقيمسينيز!» دئيه‌جيم. اونلار دا منه «تاريميزسان» دئيه‌جکلر."

Chapter 3

3:1  رب گئنه منه ددي: "گت گئنه ده باشقا بئرئنئن سِودئيي آروادي کي، فاحئشه‌دئر ده، سِو. نجه کي رب ائسرايئل اؤولادلاريني سِوئر، گرچي اونلار باشقا آللاهلارا اوز توتوب بونلارا تقدئم ادئلَن کئشمئش لاواشالاريني سِوئرلر."

3:2  من ده آروادي اؤزوم اوچون اون بش گوموش شِکِله و بئر ياريم خومِر آرپايا ساتين آلديم.

3:3  اونا ددئم: "اوزون مودّت منئم يانيمدا قالاجاقسان؛ زئنا اتميه‌جکسن، باشقا بئر کئشي ائله اولماياجاقسان، منئمله ده اولماياجاقسان.

3:4  اونا گؤره کي، ائسرايئل اؤولادلاري اوزون مودّت پادشاهسيز و باشچيسيز قالجاقلار و قوربان و موقدّس سوتون، اِفود و اِو بوتلري اولمادان ياشاياجاقلار.

3:5  سونرا ائسرايئل اؤولادلاري دؤنوب اؤزلرئنئن تاريسي ربّی و پادشاهلاري داوودو آختاراجاقلار. آخير گونلرده لرزه ائچئنده ربّه و اونون خيئرخاهليغينا طرف گله‌جکلر."

Chapter 4

4:1  "ای ائسرايئل اؤولادلاري، ربّئن سؤزونو اِشئدئن، چونکي بو اؤلکه‌ده ياشايانلارلا ربّئن داعواسي وار. بو يرده نه صداقت قاليب، نه محبّت، نه ده تاريني تانيماق.

4:2  لعنت، يالان، قتل، اوغورلوق و زئنا هر يِره ياييليب. قدّارليق ادئب، قان اوستونه قان تؤکورلر.

4:3  بوندان اؤتري اؤلکه ياس توتور، اورادا ياشايان هر کس سولوب. چؤل حيوانلاري دا، گؤي قوشلاري دا، حتّا دهنزده‌کي باليقلار دا محو اولور.

4:4  آنجاق هچ کس داعوا اتمه‌سئن، هچ کس باشقاسيني تقصئرلَندئرمه‌سئن، چونکي سنئن خالقين کاهئنله چکئشَنلره بَنزه‌يئر.

4:5  سن گوندوز هِللَنه‌جکسن، پيغمبر ده گجه سنئنله بئرلئکده. سنئن آناني محو اده‌جيم.

4:6  خالقيم بئلئکسئزلئکدن محو اولور. سن بئلئيي ردّ اتدئيئن اوچون، من ده سني ردّ اده‌جيم کي، بئر داها منه کاهئنلئک اتميه‌سن. ائندي کي اؤز تارينين قانونونو ياددان چيخارديبسان، من ده سنئن بالالاريني ياددان چيخارداجاغام.

4:7  نه قدر چوخالديلار، منئم ضئدّئمه او قدر ده چوخ گوناه اتدئلر. اونلارين عئزّتئني روسوايچيليغا چِوئره‌جيم.

4:8  خالقيمين گوناهي ائله بَسله‌نئرلر، اونلارين تقصئرئنه جان آتيرلار.

4:9  خالقين باشينا گلن کاهئنئن ده باشينا گله‌جک. توتدوقلاري يول اوچون اونلاري جزالانديرجاغام. عمل‌لرئنئن عوضئني اونلارا وره‌جيم.

4:10  يئيه‌جکلر، آمّا دويماياجاقلار؛ فاحئشه‌لئک اده‌جکلر، آمّا چوخالماياجاقلار، چونکي اونلار ربّی ترک ادئب اونا محل قويمورلار.

4:11  زئنا، کؤهنه و تزه شراب اونلارين فهملرئني باشلاريندان چيخارديب.

4:12  خالقيم آغاج تئکه‌سئندن مصلحت آختارير، عصالاري اونلارا مشورت ورئر، چونکي فاحئشه‌لئک روحو اونلاري آزديريب، فاحئشه‌لئک اتمکله اؤزلرئنئن تاريسيندان آيريليبلار.

4:13  داغلارين باشيندا قوربان کَسئرلر، تپه‌لرده، پاليد، سِپئدار و چؤل پوسته‌سي آلتيندا کؤلگه‌لري گؤزل اولدوغو اوچون بوخور يانديريرلار. بونا گؤره ده قيزلارينيز فاحئشه‌لئک ادئرلر، گلئنلرئنئز ده زئناکارديرلار.

4:14  فاحئشه‌لئک ادن قيزلارينيزي، زئنا ادن گلئنلرئنئزي جزالانديرماياجاغام؛ چونکي کئشئلر اؤزلري ده فاحئشه‌لرله اويناشيرلار، بوت معبدلرئنئن فاحئشه‌لري ائله بئرلئکده قوربان کَسئرلر. بونا گؤره ده، درّاکه‌سئز خالق محو اولاجاق.

4:15  ای ائسرايئل، گرچي سن فاحئشه‌لئک ادئرسن، هچ اولماسا قويما يهودا تقصئرکار اولسون. گئلگالا گئرمه‌يئن، بِيت‌آوِنه چيخمايين. «وار اولان ربّئن حاقّي اوچون» ديئب آند ائچمه‌يئن.

4:16  بلی، ائسرايئل عئنادکار بئر بوزوو کئمي عئناد ادئر. ائندي رب اونلاري اوتلاقدا قوزو اوتاران کئمي نجه اوتارسين؟

4:17  اِفرايئم بوتلرئندن ياپيشيب، بوراخ اونو!

4:18  اونلار ائچکئلري قورتاراندان سونرا اؤزلرئني فاحئشه‌لئيه ورئرلر. اونلارين باشچيلاري روسوايچيليغي چوخ سِوئرلر.

4:19  اونلاري بئر يِل قانادلارينا بورويوب، اونلار قوربانلاريندان اؤتري اوتاناجاقلار.

Chapter 5

5:1  ای کاهئنلر، بونو اِشئدئن! ای ائسرايئل نسلي، دئقّتله اِشئدئن! ای پادشاه ساراييندا اولانلار، قولاق ورئن! سئزئن باره‌نئزده حؤکم چيخاريلدي، چونکي سئز مئصپادا بئر تله، تابور داغينا سَرئلمئش بئر تور اولوبسونوز.

5:2  عاصئلر آدام اؤلدورمکله مشغولدورلار. آمّا من اونلارين هاميسيني تنبه اده‌جيم.

5:3  اِفرايئمي تاني‌ييرام، ائسرايئل مندن گئزلي ديئل، چونکي ائندي سن فاحئشه‌لئک ادئبسن، ای اِفرايئم، ائسرايئل ده نجئسله‌نئب.

5:4  عمل‌لري قويمور کي، اونلار اؤزلرئنئن تاريسينا طرف گری دؤنسونلر، چونکي ائچلرئنده فاحئشه‌لئک روحو وار، ربّی ده تانيميرلار.

5:5  ائسرايئلئن تکبّورو اؤزونون ضئدّئنه شهادت ورئر. ائسرايئلله اِفرايئم تقصئرلرئندن اؤتري هِل‌لَنئب. يهودا دا اونلارلا بئرلئکده هِلله‌نئر.

5:6  قويون-کِچئلري ائله، مال-حيوانلاري ائله ربّی آختارماغا گده‌جکلر، آمّا تاپماياجاقلار، چونکي رب اونلاري ترک ادئب.

5:7  اونلار ربّه خيانت ادئبلر، چونکي بئج اوشاقلار دوغوبلار. ائندي تزه آي مراسئمي اونلاري زَمئلري ائله بئرلئکده يِيئب اوداجاق.

5:8  گئبعادا کَره‌ناي چالين، رامه‌ده شيپور چالين. بِيت‌آوِنده جار چکئن؛ آرخانا باخ، ای بِنيامئن!

5:9  اِفرايئم جزا گونونده وئران اولاجاق، بو يقئن سؤزو ائسرايئل قبئله‌لري آراسيندا اعلان ادئرم.

5:10  يهودا باشچيلاري سرحد داشي دَيئشَنلر کئمي اولوبلار. قضبئمي سل کئمي اونلارين اوستونه تؤکه‌جيم.

5:11  اِفرايئم ظولم آلتينا گتدي، حؤکمله اَزئلدي، چونکي ائستيه‌رک بوش شيلرئن دالينا دوشدو.

5:12  من اِفرايئملی‌لره گووه کئمي‌يَم، يهودا نسلی اوچون کوف کئمي‌يَم.

5:13  اِفرايئم ناخوشلوغونو، يهودا ياراسيني گؤردوکده، اِفرايئم آشورا گتدي، بؤيوک پادشاهدان کؤمک ائسته‌دي، آمّا او سئزه شفا وره‌ بئلمز، يارانيزي صاغالتماز.

5:14  چونکي من اِفرايئملی‌لره بئر شئر کئمي، يهودا نسلی اوچون جاوان بئر آصلان کئمي اولاجاغام. من، بلی من اونو پارچالاييب گده‌جيم، سورويه‌جيم و کئمسه اَلئمدن قورتارماياجاق.

5:15  سونرا قاييديب اؤز مسکنئمه گده‌جيم، او واختاجاق کي، اؤزلرئني گوناهکار ساياراق منئم حوضورومو آختاراجاقلار. بلايا دوشَنده قيرتله منی آختاراجاقلار."

Chapter 6

6:1  "گلئن ربّه قاييداق. چونکي بئزي او پارچالاييب، لاکئن بئزه شفا وره‌جک. او بئزي يارالاييب، آمّا ياراميزي ساريياجاق.

6:2  ائکي گون سونرا بئزي ياشاداجاق، اوچونجو گون بئزي دئرئلده‌جک کي، اونون حوضوروندا ياشاياق.

6:3  گلئن ربّی تانيياق، اونو تانيماغا قيرت گؤرسه‌دَک. اونون چيخيشي گونشئن طولوعسو کئمي يقئن اولاجاق، ياغيش کئمي، تورپاغي سولايان ياز ياغيشي کئمي يانيميزا گله‌جک."

6:4  "ای اِفرايئم، سنه نه اِدئم؟ ای يهودا، بس سنه نه اِدئم؟ چونکي وفانيز سحر دوماني، اِرکَن اوچوب گدن شِح کئمي‌دئر.

6:5  بونا گؤره ده اونلاري پيغمبرلر واسئطه‌سئله پارچالاميشام، آغزيمدان چيخان سؤزلرله اؤلدورموشم. سئزئن اوستونوزده حؤکملرئم نور کئمي چاخير.

6:6  چونکي من قورباندان يوخ، وفادان خوشلانيرام. يانديرما قوربانلاريندان چوخ تاريني تانيماغينيزي ائسته‌يئرم.

6:7  آنجاق اونلار آدم کئمي عهدي پوزوبلار، اورادا اونلار منه خيانت ادئبلر.

6:8  گئلعاد شر آداملارين شهري‌دئر، قان ائزلري ائله دولودور.

6:9  حرامي دسته‌لري نجه ائنسان اوچون کمئنه ياتيرلار، کاهئن دسته‌لري ده شِکِمه گِدن يولدا آدام اؤلدورورلر؛ بلی، اونلار خبئثلئک ادئرلر.

6:10  ائسرايئل نسلئنده قورخولو بئر شي گؤرموشم، اِفرايئم فاحئشه‌لئيه باتيب، ائسرايئل اؤزونو نجئسله‌يئبدئر.

6:11  ای يهودا، سنئن اوچون ده بئر بئچئن گونو تعيئن ادئلدي، او زامان کي، من خالقيمي اسئرلئکدن قايتاريرام.

Chapter 7

7:1  ائسرايئله شفا ورمک ائسته‌د‌ئيئمده، اِفرايئمئن گوناهلاري، سامئره‌نئن پئسلئکلري اورتايا چيخير. چونکي حئيله ائله رفتار ادئرلر. اِولره اوغرو گئرئر، کوچه‌ده حرامي دسته‌سي سويغونچولوق ادئر.

7:2  اورَکلرئنده دوشونمورلر کي، من اونلارين بوتون پئسلئکلرئني يادا ساليرام. ائندي عمل‌لري اونلاري دؤوره‌له‌يئب؛ گؤزومون قاباغينداديرلار.

7:3  پادشاهي پئسلئکلري ائله، باشچيلاري يالانلاري ائله سِوئندئرئرلر.

7:4  هاميسي زئناکارديرلار، چؤرک پئشئره‌نئن يانان تندئري کئمي‌دئرلر؛ يوغرولان خمئر آجييانا قدر، تندئرچي اودونو قوردالاماغا احتئياج گؤرمور.

7:5  پادشاهيميزين آد گونونده باشچيلار شرابين ائستئسئندن ناخوشلاديلار، پادشاه دا ائستِهزاچيلارلا اَل-اَله وردی.

7:6  کمئنده ياتارکَن اورَکلري کوره کئمي قيزار؛ قضبلري بوتون گجه توستوله‌نَر، سحر ده آلوولو اود کئمي يانار.

7:7  اونلارين هاميسي کوره کئمي قيزميشدير. اؤز حاکئملرئني يانديريب ياخيرلار، بوتون پادشاهلاري ييخيليب. هچ بئري منی چاغيرمير.

7:8  اِفرايئم باشقا خالقلارا قاريشير، اِفرايئم بئر اوزو قيزارمايان فطئر کئمي‌دئر.

7:9  اونون گوجونو اؤزگه‌لر يِيئر، آمّا او بئلمئر، ساچينا آغ دوشوب، لاکئن او بئلمئر.

7:10  گرچي ائسرايئلئن تکبّورو اونون ضئدّئنه شهادت ورئر، حله ده اؤزلرئنئن تاريسي ربّه طرف دؤنمه‌يئبلر، بوتون بونلار اوچون اونو آختارماييبلار.

7:11  بلجه اِفرايئم سَفِه اولوب، درّاکه‌سئز بئر گؤيرچئن کئمي اولوب. گاه مئصئرلی‌لري چاغيريرلار، گاه آشورا گِدئرلر.

7:12  اونلار گِدن زامان، من اونلارين باشينا تورومو آتاجاغام. گؤيده‌کي قوشلار کئمي اونلاري ووروب يِره سالاجاغام. مجلئسلرئنده اعلان اولوندوغو کئمي اونلاري تنبه اده‌جيم.

7:13  واي اونلارين حالينا! چونکي مندن اوزاقلاشيبلار! باشلارينا هلاکت گلسئن! چونکي منئم ضئدّئمه عوصيان ادئبلر. من ائسته‌يئردئم کی، اونلاري قورتاريم، آمّا اونلار منئم حاقّيمدا يالان دانيشيرلار.

7:14  ياتاقلارينين ائچئنده اولايان واخت، اورَکدن منه باغيرميرلار. تاخيل و تزه شراب اوچون بئر يِره ييغيليرلار. مندن اوز دؤنده‌رئرلر.

7:15  گرچي اونلاري من يِتئشدئردئم، قوللارينا گوج وردئم، لاکئن حله ده منئم ضئدّئمه شر قورورلار.

7:16  دؤنورلر، لاکئن اوجالاردا اولانا طرف يوخ. هدفي اَيري ووران کامان کئمي‌دئرلر. دئل‌لرئنئن عارسيزليغي اوزوندن باشچيلاري قيلينج آغزينا دوشه‌جک. مئصئر اؤلکه‌سئنده کئنايه هدفي اولاجاقلار.

Chapter 8

8:1  کَره‌ناي چالماغا حاضيرلاش! ربّئن اِوئنئن اوستونه دوشمن حاضيردير کی، کرکس کئمي هوجوم چکسئن. چونکي ائسرايئللی‌لر منئم عهدئمي پوزوبلار، منئم قانونوما عاصي چيخيبلار.

8:2  اونلار منه باغيريرلار: «تاريم، بئز ائسرايئللی‌لر سني تاني‌ييريق.»

8:3  ائسرايئل ياخشيليغي ردّ ادئب، دوشمن اونو تعقئب اده‌جک.

8:4  اؤزلرئنه پادشاه قويدولار، آمّا منئم واسئطَمله يوخ. من بئلمه‌دن اؤزلرئنه باشچيلار سِچدئلر. اؤزلرئنه قيزيل و گوموشلرئندن، اؤلوملرئنه يول آچان بوتلر دوزلتدئلر.

8:5  ای سامئره، سنئن دانا بوتونو ردّ اتمئشم! منئم قضبئم اونلارين ضئدّئنه آلوو چکئر. نه واختا قدر معصوم اولماياجاقلار؟

8:6  چونکي بو بوت ائسرايئلئن ائشئدئر؛ اوستا بئري اونو دوزه‌لدئب، اونا گؤره ده تاري ديئل. سامئره‌ده‌کي دانا بوتو تئکه-تئکه اولاجاق.

8:7  اونلار يِل اَکئرلر، طوفان بئچه‌جکلر. سونبول بئتئرمه‌ين بوغدا اون ورمز، ورسه ده، يادلار اونو اودار.

8:8  ائسرايئل اودولموشدور، ائندي اونلار مئلّتلر آراسينداديرلار، هچ کَسئن بَيَنمه‌دئيي بئر قاب کئمي اولوبلار.

8:9  اونلار تک گزن وحشي اِششَک کئمي آشورون طرفئنه گدئبلر. اِفرايئم اوجرَتله اؤزونه اويناشلار توتوب.

8:10  حتّا اگر مئلّتلر آراسيندا اوجرَتله اويناش توتسالار دا، من ائندي اونلاري بئر يِره ييغاجاغام. اونلار پادشاهين و باشچيلارين ظولموندن آزالماغا باشلاياجاقلار.

8:11  اِفرايئم گوناه تقدئمي اوچون، چوخلو قوربانگاه تئکدئيئنه گؤره، بونلار اونون گوناها باتيران قوربانگاهلاري اولوب.

8:12  گرچي اونلار اوچون چوخلو قانون يازديم، آمّا اونلار بونلاري ياد بئر شي حساب اتدئلر.

8:13  منه کَسئلَن قوربانلارا گلئنجه، اَتي منه قوربان گتئرئب اؤزلري يِيئرلر. رب اونلاردان راضي ديئل. ائندي اونلارين تقصئرلرئني يادا سالاجاق، گوناهکارلاريني جزالانديراجاق. اونلار مئصئره قاييداجاقلار.

8:14  چونکي ائسرايئل يارادانيني ياددان چيخارديب، اؤزونه سارايلار تئکئب. يهودا دا چوخلو قالالي شهرلر بئنا ادئب، لاکئن من اونون شهرلرئنه اود ياغديراجاغام کي، سارايلاريني آلوو يِسئن.

Chapter 9

9:1  ای ائسرايئل، سِوئنمه! باشقا خالقلار کئمي شادليقدان آتيليب دوشمه، چونکي فاحئشه‌لئک ادئبسن، اؤز تاريني اونودوبسان. بوتون خرمنلرده فاحئشه‌لئک موزدونه کؤنول ورئبسن.

9:2  خرمن و اوزوم سيخان خالقي دويدورماياجاق، تزه شراب اونلارا قئسمت اولماياجاق.

9:3  ربّئن تورپاغيندا ياشاماياجاقلار، اِفرايئم مئصئره قاييداجاق، آشوردا نجئس يمک يئيه‌جک.

9:4  ربّه تقدئم اولاراق شراب تؤکميه‌جکلر، قوربانلاري اونا مقبول اولماياجاق. قوربانلار اونلارا ياس چؤره‌يي اولاجاق؛ اونو يئيَنلرئن هاميسي نجئس اولاجاقلار. چؤرکلري آنجاق اؤز قارينلاريني دويوراجاق، ربّئن اِوئنه گتئرئلميه‌جک.

9:5  طنطنه‌لي بايرامدا، ربّئن بايرام گونونده نه اده‌جکسئنئز؟

9:6  چونکي باخ، هلاکتدن قاچسالار دا، مئصئر اونلاري ييغاجاق؛ موف اونلاري قبئره باسديراجاق. اونلارين گوموش خزئنه‌لرئني گئجئتکَن توتاجاق، چاديرلاريندا تئکان بئته‌جک.

9:7  اونلارين جزا گونلري گلئب، حاق-حساب گونلري يِتئشئب. قوي ائسرايئل بونو بئلسئن! تقصئرلرئنئزئن چوخلوغوندان، دوشمنچئلئيئنئزئن بؤيوکلويوندن، پيغمبر اَبله اولوب، روحاني آدام دَلئيه دؤنوب.

9:8  پيغمبر منئم تاريملا اِفرايئم اوستونه کشئک چکر. آمّا اونون گتدئيي هر يرده تله قورولوب، تاريسينين اِوئنده دوشمنچئلئک وار.

9:9  گئبعا گونلرئنده اولدوغو کئمي اونلار اؤزلرئني اولدوقجا فَسادا چکئبلر. تاري اونلارين تقصئرلرئني يادا سالاجاق، گوناهلاري اوچون اونلاري جزالانديراجاق.

9:10  صحرادا اوزوم تاپان کئمي من ائسرايئلي تاپديم. ائلک دفه محصول ورن انجئر نوباري کئمي من آتالارينيزي گؤردوم. آمّا اونلار بَعَل-پِعورا چاتديقلاريندا اؤزلرئني روسوايچي بوتلره وقف اتدئلر. اؤزلري ده سِودئکلري شيلر کئمي ائيرنج اولدولار.

9:11  اِفرايئمئن جلالي بئر قوش کئمي اوچوب گده‌جک. نه دوغوم اولاجاق، نه بويلولوق. هچ کس ده حامئله اولماياجاق.

9:12  اوشاقلاريني بؤيوتسه‌لر ده، اؤلومله بالالاريني اَللرئندن آلاجاغام، اونلاري کئمسه‌سئز قوياجاغام. من اونلاري ترک اتدئکده واي اونلارين حاللارينا!

9:13  اِفرايئم، نجه کي، گؤرموشدوم، صور شهري کئمي گؤزل بئر يرده مسکن سالميشدي. آمّا اِفرايئم اؤز اؤولادلاريني جَلّادين قاباغينا چيخارداجاق."

9:14  اونلارا ور يارب! اونلارا نه وره‌جکسن؟ اونلارا اوشاق سالان بطن، سودسوز دؤشلر ور!

9:15  رب ديئر: "اونلار بوتون پئسلئيي گئلگالدا ادئرلر، دوغرودان دا اورادا اونلارا نئفرت اتدئم. اتدئکلري پئس عمل‌لردن اؤتري اونلاري اِوئمدن قوواجاغام. آرتيق اونلاري سِوميه‌جيم. بوتون باشچيلاري عاصئدئرلر.

9:16  اِفرايئم وورولوب، کؤکلري قورويوب. اونلار بار ورميه‌جکلر. اگر دوغسالار دا، بطنلرئنئن عزئز باريني من اؤلومه وره‌جيم."

9:17  تاريم اونلاري ردّ اده‌جک، چونکي اونا قولاق آسماييبلار. مئلّتلر آراسيندا سرگردان گزه‌جکلر.

Chapter 10

10:1  ائسرايئل بئر قوللو-بوداقلي مِينه‌دئر کي، اؤزونه بول-بول بار گتئرئر. باري آرتديقجا داها چوخ قوربانگاهلار تئکدي. تورپاغي برکتلي اولدوقجا داها گؤزل موقدّس سوتونلار قوردولار.

10:2  اونلارين اورَکلري يالانلا دولودور، ائندي گرک خاطالارينين جزاسيني داشيسينلار. رب اونلارين قوربانگاهلاريني داغيداجاق، موقدّس سوتونلاريني سينديراجاق.

10:3  او واخت اونلار دئيه‌جک: "بئزئم پادشاهيميز يوخدور، چونکي بئز ربدن قورخموروق. پادشاهيميز اولسا دا، بئزئم اوچون نه اده‌ بئله‌جک؟"

10:4  آنجاق بوش سؤزلر دانيشيرلار؛ بوش آندلارلا عهد باغلاييرلار، بونا گؤره ده محکمه ائشلري شوخوملانميش زَمئده‌کي زَهَرلي اوت کئمي بؤيويور.

10:5  سامئره ساکئنلري بِيت‌آوِنده‌کي دانا بوتونه گؤره تئتره‌يئرلر. اونون اوچون خالقي ياس توتور. اونون بوتپرست کاهئنلري ده شئون چکئر، چونکي جلالي اوندان آيريليب.

10:6  بوت اؤزو آشورا، بؤيوک پادشاها خراج آپاريلاجاق. اِفرايئم بي‌آبير اولاجاق، ائسرايئل آلديغي مصلحتدن اوتاناجاق.

10:7  سامئره و اونون پادشاهي سو اوستونده‌کي چوبوق کئمي آخيب گده‌جک.

10:8  آوِنده‌کي اوجا يِرلرده اولان پرستئشگاهلار کي، ائسرايئلئن گوناهي ائدئلر، يوخ اولاجاقلار. اونون قوربانگاهلاريندا تئکان و قانقال بئته‌جک. او زامان داغلارا "بئزي اؤرتون!"، تپه‌لره ده "اوستوموزه ييخيلين!" دئيه‌جکلر.

10:9  "گئبعادا کچئرتدئيئن گونلردن بَري، گوناه ادئبسن، ای ائسرايئل؛ اورادا اؤز ائشلرئني داوام اتدئرئبلر. مگر موحارئبه حاقسيزليق اؤولادلاريني گئبعادا ياخالاماز؟

10:10  من، ائسته‌دئيئم زامان، اونلاري تنبه اده‌جيم. خالقلار اونلارين ضئدّئنه بئرله‌شئب، ائکي‌قات تقصئرلرئندن اؤتري اونلاري اسئر اده‌جک.

10:11  اِفرايئم تربئيه ورئلمئش، تاخيل دؤيمه‌يي سِوَن دانا کئمي‌ ائدي. من اونون گؤزل بوينونو اسئرگه‌دئم. ائندي آمّا اِفرايئمي يوغ آلتينا وره‌جيم؛ يهودا گرک يِر شوخوملاسين، يعقوب گرک اؤزو اوچون ديرميق چکسئن.

10:12  اؤزونوز اوچون صالحلئک اَکئن، محبّت بَهَرئني بئچئن. دئنجه قويولموش تورپاغينيزي شوخوملايين، چونکي ربّی آختارماق واختيدير. اِله کي، گلسئن و اوستونوزه صالحلئک ياغديرسين.

10:13  سئز شرارت اَکئبسئنئز، ظولم بئچئبسئنئز. يالانين بَهَرئني يِيئبسئنئز. چونکي اؤز يوللارينيزا، چوخلو جنگاورلرئنئزه بِل باغلاييبسينيز.

10:14  بونا گؤره، خالقينيزين ائچئنده موحارئبه گورولتوسو قوپاجاق، بوتون قالالارينيز داغيلاجاق، نجه کي شَلمَن، موحارئبه گونونده بِيت‌اَربِلي داغيتدي؛ آنالار اوشاقلاري ائله بئرلئکده يِره چيرپيليب پارچالانديلار.

10:15  ای بِيت‌ائل، پئسلئيئنئن چوخلوغو اوزوندن سنئنله ده بله رفتار ادئله‌جک. سحر آچيلاندا ائسرايئل پادشاهي بوسبوتون هلاک اولاجاق.

Chapter 11

11:1  ائسرايئل اوشاق ائکَن، اونو سِودئم، اؤز اوغلومو مئصئردن چاغيرديم.

11:2  نه قدر چوخ چاغيريلديلار، او قدر چوخ اوزاقلاشديلار. بَعَل بوتلرئنه قوربان کَسدئلر، اويما بوتلره بوخور يانديرديلار.

11:3  آمّا حله ده اِفرايئمه يِرئمه‌يي من اؤيرَتدئم، اونلاري قول‌لاريم اوستونه آلديم. آنجاق بئلمه‌دئلر کي، اونلارا من شفا وردئم.

11:4  اونلاري مهرئبانليق ائپلري ائله، محبّت باغلاري ائله چکدئم. اونلار اوچون چَنه‌لرئندن يوغو قالديران بئر کس اولدوم، اَيئلئب اونلارا يمک وردئم.

11:5  مئصئره قاييتماياجاقلار، لاکئن آشور اونلارا پادشاه اولاجاق. چونکي اونلار منه دؤنمه‌يه ائمتئناع اتدئلر.

11:6  شهرلرئنئن ائچئنده قيلينج فيرلاناجاق، اونلارين دروازا چفته‌لرئني قيراجاق. فئتنه‌لري اوزوندن اونلاري يِيئب اوداجاق.

11:7  خالقيم مندن اوزاقلاشماق اوچون قرارلي‌دير. اوجالاردا ساکئن اولاني چاغيرسالار دا، اونلاري هچ واخت قالديرماياجاق.

11:8  ای اِفرايئم، سني نجه اَلدن وره‌بئله‌رم؟ ای ائسرايئل، سني نجه تسلئم اده‌بئله‌رم؟ اَدمايا اتدئيئمي سنه نجه اده‌بئله‌رم؟ سني نجه صِبويئم کئمي اده‌بئله‌رم؟ سئنَمده اوره‌يئم آلت-اوست اولور، شَفقَتئم آلوولانير.

11:9  من آلوولانان قضبئمي تؤکميه‌جيم، اِفرايئمي بئر داها محو اتميه‌جيم. چونکي من تارييام، ائنسان ديئلم، آرانيزدا موقدّس اولانام. قضبله اوستونوزه گلميه‌جيم.

11:10  اونلار آصلان کئمي نعره چکن ربّئن داليسيجا گده‌جک. او، نعره چکنده، اؤولادلاري قربدن تئتره‌يه‌رک گله‌جک.

11:11  مئصئردن قوشلار کئمي، آشور اؤلکه‌سئندن گؤيرچئنلر کئمي تئتره‌يه‌رک گله‌جکلر. اونلاري اِولرئنده ساکئن اده‌جيم." رب بويورور.

11:12  اِفرايئم يالانلا، ائسرايئل نسلی حئيله ائله اطرافيمي آليب، لاکئن يهودا حله ده تارييا باغلي‌دير، حله ده موقدّس اولانا وفالي‌دير.

Chapter 12

12:1  اِفرايئم يِل‌له بَسله‌نئر، بوتون گون شرق کوله‌يئنئن دالينجا گِدئر. يالاني، قدّارليغي آرتيرير. آشورلا عهد باغلايير، مئصئره زيتون ياغي گؤنده‌رئر.

12:2  ربّئن يهودا ائله داعواسي وار، يعقوبو گتدئيي يوللارا گؤره جزالانديراجاق، عمل‌لرئنه گؤره اونا عوض وره‌جک.

12:3  او حله آنا بطنئنده ائکن قارداشينين توپوغوندان توتدو، بؤيوکلوک چاغيندا تاري ائله گولَشدي.

12:4  مَلَکله گوله‌شئب اونا قالئب گلدي، آغلاياراق اوندان ائلتئفاط ائسته‌دي. او تاري ائله بِيت‌ائلده گؤروشدو، اورادا تاري اونونلا دانيشدي؛

12:5  رب، قوشونلار تاريسي، رب آديندا يادا ساليلير.

12:6  بونا گؤره ده سن تارينا دؤن، محبّت، و عدالتي يرئنه يتئر، همئشه تاريني گؤزله.

12:7  او، تاجئردئر، اَلئنده‌کي آلداديجي تَره‌زي ائله آلداتماغي سِوئر.

12:8  اِفرايئم ديئر: "دوغرودان دا، من وارلي‌يام، اؤزوم اوچون ثروت ييغميشام. چکدئيئم بوتون زحمتلرده، گوناه ساييلاجاق بئر تقصئر منده تاپا بئلميه‌جکلر."

12:9  "لاکئن سني مئصئردن چيخاردان تارين رب منم. بايرام گونلرئنده اولدوغو کئمي سني گئنه اؤز چاديرلاريندا ساکئن اده‌جيم.

12:10  من نبي‌لرله دانيشديم، چوخلو رؤيا گؤنده‌ردئم، پيغمبرلرئن دئلئندن مثللر ددئم."

12:11  گئلعاد خالقي تقصئرلئدئر، دوغرودان دا، يارامازدير. گئلگالدا گاميشلاري قوربان کَسئرلر. اونلارين قوربانگاهلاري شوخوملانميش زَمئده‌کي داش قالاقلاري کئمئدئر.

12:12  يعقوب اَرام تورپاغينا قاچدي، اورادا ائسرايئل آرواد اوچون قول اولدو، آروادا گؤره قويون قوروقچوسو اولدو.

12:13  رب ائسرايئلي بئر پيغمبر واسئطه‌سئله مئصئردن چيخارتدي، بئر پيغمبر واسئطه‌سئله اونو قورودو.

12:14  اِفرايئم تاريني بَرک قضبلَندئرئب، اونا گؤره ده تؤکدويو قانين تقصئري اؤز بوينوندا اولاجاق. اونون پروردئگاري، اونون روسوايچيليغيني اؤزونه قايتاراجاق.

Chapter 13

13:1  اِفرايئم دانيشاندا هامي تئتره‌يئردي. ائسرايئلده اوجالميشدي، آمّا بَعَله سيغينيب گوناها باتاندا، محو اولدو.

13:2  ائندي گوناه اوستونه گوناه ادئرلر، گوموشلرئندن اؤزلرئنه تؤکمه بوتلر، مهارتله دوزه‌لمئش بوتلر دوزه‌لدئرلر. هاميسي اوستا ائشئدئر. اونلار باره‌ده ديئلئر: "قوربان گتئرن آداملار، دانالاري اؤپسونلر!"

13:3  بونا گؤره ده سحر دوماني کئمي، اِرکَن اوچوب گدن شِح کئمي، خرمنده سوورولان سامان چؤپو کئمي، باجادان چيخان توستو کئمي اولاجاقلار.

13:4  "آنجاق سني مئصئردن چيخاردان تارين رب منم. سن مندن باشقا تاري تانيمامالي‌سان، و مندن باشقا خئلاصکار يوخدور.

13:5  من ائدئم کي، سنه چؤلده، قوراق تورپاقلاردا گؤز-قولاق اولموشدوم.

13:6  اونلاري کؤکَلتدئيئمه گؤره دويدولار، دوياندان سونرا اونلارين اوره‌يي کئبئرلَندي، بونا گؤره ده منی ياددان چيخارتديلار.

13:7  بونا گؤره من اونلارا بئر آصلان اولاجاغام، پلنگ کئمي يول کناريندا کمئنده دوراجاغام.

13:8  بالالاري اوغورلانميش آيي کئمي اونلارا هوجوم چکه‌جيم، اورَکلرئنئن پرده‌سئني ييرتاجاغام. دئشي آصلان کئمي اونلاري يِيئب قورتاراجاغام، وحشي بئر جاناوار اونلاري پارچالاياجاق.

13:9  ای ائسرايئل، منه، کؤمکچئنه ضئدّ چيخماغين سني اؤلومه آپارير.

13:10  ائندي پادشاهين هارادادير کي، بوتون شهرلرئنده سني خئلاص اتسئن؟ حاکئملرئن هارادادير؟ سن کي اونلار باره‌ده ديئردئن: «منه بئر پادشاه ور، باشچيلار ور.»

13:11  قضبئم ائچئنده سنه پادشاه وردئم، قِيضئم ائچئنده اونو گؤتوردوم.

13:12  اِفرايئمئن تقصئري بئربئرئنئن اوستونه قالانيب، گوناهي آنبارا قويولوب.

13:13  اِفرايئمئن آنادان دوغولما واختينين آغريلاري توتوب؛ لاکئن او، آغيلسيز اوغولدور. چونکي واختي چاتاندا بطندن چيخماغا لَنگئيئر.

13:14  آيا اونلاري اؤلولر دئيارينين اَلئندن قورتاريم؟ اونلاري اؤلومدن خئلاص اِدئم؟ ای اؤلوم، بلالارين هاني؟ ای اؤلولر دئياري، سانجماغين هاني؟ شَفقَت گؤزومدن گئزلي‌دئر.

13:15  اِفرايئم اؤز قارداشلاري آراسيندا بارلي-بَهَرلي اولسا دا، شرق يِلي، صحرادان قالخان ربّئن کوله‌يي گله‌جک، اونون بولاغي قوروياجاق، چِشمه‌سئنئن سويو کَسئله‌جک. بوتون قئيمتلي شيلر خزئنه‌سي قارت اولوناجاق.

13:16  سامئره خاطاسينين جزاسيني چکه‌جک، چونکي تاريسينا عاصي اولدو. اونلار قيلينج آغزينا دوشوب اؤله‌جکلر. بالالاري يِره چيرپيليب پارچالاناجاق، حامئله آروادلارينين قارني ياريلاجاق."

Chapter 14

14:1  تارين ربّه دؤن، ای ائسرايئل، چونکي تقصئرلرئندن اؤتري ييخيليبسان.

14:2  اؤزونوزله سؤزلر گؤتورون و ربّه طرف دؤنون. اونا بله ديئن: "بوتون تقصئرلرئمئزي بئزدن گؤتور، بئزي ياخشيليقلا قبول ات. گاميشلار يرئنه آغزيميزدان چيخان شوکورلري تقدئم ادئرئک.

14:3  آشور بئزي خئلاص اتميه‌جک، آتلارين بِلئنه مئنميه‌جيئک، آرتيق اَل ائشلرئمئزه «تاريميز» دِميه‌جيئک. چونکي يِتئم سندن مرحمت گؤره‌جک."

14:4  "اونلارين دؤنوکلويونه علاج وره‌‌جيم، اونلاري اورَکدن سِوه‌جيم، چونکي قضبئم اونلاردان واز کِچئب.

14:5  من ائسرايئله شِح کئمي اولاجاغام، او، زانباق کئمي چئچک آچاجاق، لوبنان سئدري کئمي کؤک آتاجاق.

14:6  قوللو-بوداقلي اولاجاق، زيتون آغاجي کئمي گؤزل اولاجاق، لوبنان سئدري کئمي عطئر ساچاجاق.

14:7  آداملار گئنه ده کؤلگه‌سي آلتيندا اوتوروب بوغدا کئمي جوجه‌ره‌جکلر، مِينه کئمي چئچکلَنه‌جکلر، شؤهرتلري لوبنان شرابي کئمي اولاجاق.

14:8  اِفرايئم دئيه‌جک: «آرتيق بوتلر نه‌يئمه گرکدئر؟» منم کي، سنئن سَسئني اشئدئب سني قورويورام. من همئشه ‌ياشيل شام آغاجي کئمي‌يَم، سنئن بار ورمه‌يئن مندن گلئر.

14:9  کئم حئکمتلي‌دئر، بو سؤزلري درک اتسئن، کئم درّاکه‌لي‌دئر، بونلاري باشا دوشسون. چونکي ربّئن يوللاري دوزدور. صالحلر او يوللارلا گدئرلر، لاکئن عاصئلر او يوللاردا بودره‌يئرلر."