UrduGeoRoman - Hosea

Chapter 1

1:1  Zail meṅ Rab kā wuh kalām darj hai jo un dinoṅ meṅ Hosea bin Bairī par nāzil huā jab Uzziyāh, Yūtām, Āḳhaz aur Hizqiyāh Yahūdāh ke bādshāh aur Yarubiyām bin Yuās Isrāīl kā bādshāh thā.

1:2  Jab Rab pahlī bār Hosea se hamkalām huā to us ne hukm diyā, “Jā, zinākār aurat se shādī kar aur zinākār bachche paidā kar, kyoṅki mulk Rab kī pairawī chhoṛ kar musalsal zinā kartā rahtā hai.”

1:3  Chunāṅche Hosea kī Jumar bint Diblāym se shādī huī. Us kā pāṅw bhārī huā, aur beṭā paidā huā.

1:4  Tab Rab ne Hosea se kahā, “Us kā nām Yazrael rakhnā. Kyoṅki jald hī maiṅ Yāhū ke ḳhāndān ko Yazrael meṅ us qatl-o-ġhārat kī sazā dūṅgā jo us se sarzad huī. Sāth sāth maiṅ Isrāīlī bādshāhī ko bhī ḳhatm karūṅga.

1:5  Us din maiṅ Maidān-e-Yazrael meṅ Isrāīl kī kamān ko toṛ ḍālūṅgā.”

1:6  Is ke bād Jumar dubārā ummīd se huī. Is bār beṭī paidā huī. Rab ne Hosea se kahā, “Is kā nām Loruhāmā yānī ‘Jis par Rahm na Huā Ho’ rakhnā, kyoṅki āindā maiṅ Isrāīliyoṅ par rahm nahīṅ karūṅga balki wuh mere rahm se sarāsar mahrūm raheṅge.

1:7  Lekin Yahūdāh ke bāshindoṅ par maiṅ rahm karke unheṅ chhuṭkārā dūṅgā. Maiṅ unheṅ kamān, talwār, jang ke hathiyāroṅ, ghoṛoṅ yā ghuṛsawāroṅ kī mārifat chhuṭkārā nahīṅ dūṅgā balki maiṅ jo Rab un kā Ḳhudā hūṅ ḳhud hī unheṅ najāt dūṅgā.”

1:8  Loruhāmā kā dūdh chhuṛāne par Jumar phir hāmilā huī. Is martabā beṭā paidā huā.

1:9  Tab Rab ne farmāyā, “Is kā nām Loammī yānī ‘Merī Qaum Nahīṅ’ rakhnā. Kyoṅki tum merī qaum nahīṅ, aur maiṅ tumhārā Ḳhudā nahīṅ hūṅgā.

1:10  Lekin wuh waqt āegā jab Isrāīlī samundar kī ret jaise beshumār hoṅge. Na un kī paimāish kī jā sakegī, na unheṅ ginā jā sakegā. Tab jahāṅ un se kahā gayā ki ‘Tum merī qaum nahīṅ’ wahāṅ wuh ‘Zindā Ḳhudā ke Farzand’ kahlāeṅge.

1:11  Tab Yahūdāh aur Isrāīl ke log muttahid ho jāeṅge aur mil kar ek rāhnumā muqarrar kareṅge. Phir wuh mulk meṅ se nikal āeṅge, kyoṅki Yazrael kā din azīm hogā!

Chapter 2

2:1  Us waqt apne bhāiyoṅ kā nām Ammī yānī ‘Merī Qaum’ aur apnī bahnoṅ kā nām Ruhāmā yānī ‘Jis par Rahm Kiyā Gayā Ho’ rakho.

2:2  Apnī māṅ Isrāīl par ilzām lagāo, hāṅ us par ilzām lagāo! Kyoṅki na wuh merī bīwī hai, na maiṅ us kā shauhar hūṅ. Wuh apne chehre se aur apnī chhātiyoṅ ke darmiyān se zinākārī ke nishān dūr kare,

2:3  warnā maiṅ us ke kapṛe utār kar use us nangī hālat meṅ chhoṛūṅgā jis meṅ wuh paidā huī. Maiṅ hone dūṅgā ki wuh registān aur jhulastī zamīn meṅ tabdīl ho jāe, ki wuh pyās ke māre mar jāe.

2:4  Maiṅ us ke bachchoṅ par bhī rahm nahīṅ karūṅga, kyoṅki wuh zinākār bachche haiṅ.

2:5  Un kī māṅ ne zinā kiyā, unheṅ janm dene wālī ne sharmnāk harkateṅ kī haiṅ. Wuh bolī, ‘Maiṅ apne āshiqoṅ ke pīchhe bhāg jāūṅgī. Āḳhir merī roṭī, pānī, ūn, katān, tel aur pīne kī chīzeṅ wuhī muhaiyā karte haiṅ.’

2:6  Is lie jahāṅ bhī wuh chalnā chāhe wahāṅ maiṅ use kāṅṭedār jhāṛiyoṅ se rok dūṅgā, maiṅ aisī dīwār khaṛī karūṅga ki use rāste kā patā na chale.

2:7  Wuh apne āshiqoṅ kā pīchhā karte karte thak jāegī aur kabhī un tak pahuṅchegī nahīṅ, wuh un kā khoj lagātī rahegī lekin unheṅ pāegī nahīṅ. Phir wuh bolegī, ‘Maiṅ apne pahle shauhar ke pās wāpas jāūṅ, kyoṅki us waqt merā hāl āj kī nisbat kahīṅ behtar thā.’

2:8  Lekin wuh yih bāt jānane ke lie taiyār nahīṅ ki use Allāh hī kī taraf se sab kuchh muhaiyā huā hai. Maiṅ hī ne use wuh anāj, mai, tel aur kasrat kī sonā-chāṅdī de dī jo logoṅ ne Bāl Dewatā ko pesh kī.

2:9  Is lie maiṅ apne anāj aur apne angūr ko fasal kī kaṭāī se pahle pahle wāpas lūṅgā. Jo ūn aur katān maiṅ use detā rahā tāki us kī barahnagī nazar na āe use maiṅ us se chhīn lūṅgā.

2:10  Us ke āshiqoṅ ke deḳhte deḳhte maiṅ us ke sāre kapṛe utārūṅga, aur koī use mere hāth se nahīṅ bachāegā.

2:11  Maiṅ us kī tamām ḳhushiyāṅ band kar dūṅgā. Na koī īd, na Nae Chāṅd kā Tahwār, na Sabat kā din yā bāqī koī muqarrarā jashn manāyā jāegā.

2:12  Maiṅ us ke angūr aur anjīr ke bāġhoṅ ko tabāh karūṅga, un chīzoṅ ko jin ke bāre meṅ us ne kahā, ‘Yih mujhe āshiqoṅ kī ḳhidmat karne ke ewaz mil gaī haiṅ.’ Maiṅ yih bāġh jangal banane dūṅgā, aur janglī jānwar un kā phal khāeṅge.

2:13  Rab farmātā hai ki maiṅ use un dinoṅ kī sazā dūṅgā jab us ne Bāl ke butoṅ ko baḳhūr kī qurbāniyāṅ pesh kīṅ. Us waqt wuh apne āp ko bāliyoṅ aur zewarāt se sajā kar apne āshiqoṅ ke pīchhe bhāg gaī. Mujhe wuh bhūl gaī.

2:14  Chunāṅche ab maiṅ use manāne kī koshish karūṅga, use registān meṅ le jā kar us se narmī se bāt karūṅga.

2:15  Phir maiṅ use wahāṅ se ho kar us ke angūr ke bāġh wāpas karūṅga aur Wādī-e-Akūr ko ummīd ke darwāze meṅ badal dūṅgā. Us waqt wuh ḳhushī se mere pīchhe ho kar wahāṅ chalegī, bilkul usī tarah jis tarah jawānī meṅ kartī thī jab mere pīchhe ho kar Misr se nikal āī.”

2:16  Rab farmātā hai, “Us din tū mujhe pukārte waqt ‘Ai mere Bāl’ nahīṅ kahegī balki ‘Ai mere Ḳhāwind.’

2:17  Maiṅ Bāl dewatāoṅ ke nām tere muṅh se nikāl dūṅgā, aur tū āindā un ke nāmoṅ kā zikr tak nahīṅ karegī.

2:18  Us din maiṅ janglī jānwaroṅ, parindoṅ aur reṅgne wāle jāndāroṅ ke sāth ahd bāndhūṅgā tāki wuh Isrāīl ko nuqsān na pahuṅchāeṅ. Kamān aur talwār ko toṛ kar maiṅ jang kā ḳhatrā mulk se dūr kar dūṅgā. Sab ārām-o-sukūn se zindagī guzāreṅge.

2:19  Maiṅ tere sāth abadī rishtā bāndhūṅgā, aisā rishtā jo rāstī, insāf, fazl aur rahm par mabnī hogā.

2:20  Hāṅ, jo rishtā maiṅ tere sāth bāndhūṅgā us kī buniyād wafādārī hogī. Tab tū Rab ko jān legī.”

2:21  Rab farmātā hai, “Us din maiṅ sunūṅgā. Maiṅ āsmān kī sun kar bādal paidā karūṅga, āsmān zamīn kī sun kar bārish barsāegā,

2:22  zamīn anāj, angūr aur zaitūn kī sun kar unheṅ taqwiyat degī, aur yih chīzeṅ Maidān-e-Yazrael kī sun kar kasrat se paidā ho jāeṅgī.

2:23  Us waqt maiṅ apnī ḳhātir Isrāīl kā bīj mulk meṅ bo dūṅgā. ‘Loruhāmā’ par maiṅ rahm karūṅga, aur ‘Loammī’ se maiṅ kahūṅgā, ‘Tū merī qaum hai.’ Jawāb meṅ wuh bolegī, ‘Tū merā Ḳhudā hai.’”

Chapter 3

3:1  Rab mujh se hamkalām huā, “Jā, apnī bīwī ko dubārā pyār kar, hālāṅki us kā āshiq hai jis se us ne zinā kiyā hai. Use yoṅ pyār kar jis tarah Rab Isrāīliyoṅ ko pyār kartā hai, hālāṅki un kā ruḳh dīgar mābūdoṅ kī taraf hai aur unheṅ unhīṅ kī angūr kī ṭikkiyāṅ pasand haiṅ.”

3:2  Tab maiṅ ne chāṅdī ke 15 sikke aur jau ke 195 kilogrām de kar use wāpas ḳharīd liyā.

3:3  Maiṅ ne us se kahā, “Ab tujhe baṛe arse tak mere sāth rahnā hai. Itne meṅ na zinā kar, na kisī ādmī se sohbat rakh. Maiṅ bhī baṛī der tak tujh se hambistar nahīṅ hūṅgā.”

3:4  Isrāīl kā yihī hāl hogā. Baṛī der tak na un kā bādshāh hogā, na rāhnumā, na qurbānī kā intazām, na yādgār patthar, na imām kā bālāposh. Un ke pās but tak bhī nahīṅ hoṅge.

3:5  Is ke bād Isrāīlī wāpas ā kar Rab apne Ḳhudā aur Dāūd apne bādshāh ko talāsh kareṅge. Āḳhirī dinoṅ meṅ wuh larazte hue Rab aur us kī bhalāī kī taraf rujū kareṅge.

Chapter 4

4:1  Ai Isrāīliyo, Rab kā kalām suno! Kyoṅki Rab kā mulk ke bāshindoṅ se muqaddamā hai. “Ilzām yih hai ki mulk meṅ na wafādārī, na mehrbānī aur na Allāh kā irfān hai.

4:2  Kosnā, jhūṭ bolnā, chorī aur zinā karnā ām ho gayā hai. Roz baroz qatl-o-ġhārat kī naī ḳhabreṅ miltī rahtī haiṅ.

4:3  Isī lie mulk meṅ kāl hai aur us ke tamām bāshinde pazhmurdā ho gae haiṅ. Janglī jānwar, parinde aur machhliyāṅ bhī fanā ho rahī haiṅ.

4:4  Lekin bilāwajah kisī par ilzām mat lagānā, na ḳhāhmaḳhāh kisī kī tambīh karo! Ai imāmo, maiṅ tumhīṅ par ilzām lagātā hūṅ.

4:5  Ai imām, din ke waqt tū ṭhokar khā kar giregā, aur rāt ke waqt nabī gir kar tere sāth paṛā rahegā. Maiṅ terī māṅ ko bhī tabāh karūṅga.

4:6  Afsos, merī qaum is lie tabāh ho rahī hai ki wuh sahīh ilm nahīṅ rakhtī. Aur kyā ajab jab tum imāmoṅ ne yih ilm radd kar diyā hai. Ab maiṅ tumheṅ bhī radd kartā hūṅ. Āindā tum imām kī ḳhidmat adā nahīṅ karoge. Chūṅki tum apne Ḳhudā kī sharīat bhūl gae ho is lie maiṅ tumhārī aulād ko bhī bhūl jāūṅgā.

4:7  Imāmoṅ kī tādād jitnī baṛhtī gaī utnā hī wuh merā gunāh karte gae. Unhoṅ ne apnī izzat aisī chīz ke ewaz chhoṛ dī jo ruswāī kā bāis hai.

4:8  Merī qaum ke gunāh un kī ḳhurāk haiṅ, aur wuh is lālach meṅ rahte haiṅ ki logoṅ kā qusūr mazīd baṛh jāe.

4:9  Chunāṅche imāmoṅ aur qaum ke sāth ek jaisā sulūk kiyā jāegā. Donoṅ ko maiṅ un ke chāl-chalan kī sazā dūṅgā, donoṅ ko un kī harkatoṅ kā ajr dūṅgā.

4:10  Khānā to wuh khāeṅge lekin ser nahīṅ hoṅge. Zinā bhī karte raheṅge, lekin befāydā. Is se un kī tādād nahīṅ baṛhegī. Kyoṅki unhoṅ ne Rab kā ḳhayāl karnā chhoṛ diyā hai.

4:11  Zinā karne aur naī aur purānī mai pīne se logoṅ kī aql jātī rahtī hai.

4:12  Merī qaum lakaṛī se dariyāft kartī hai ki kyā karnā hai, aur us kī lāṭhī use hidāyat detī hai. Kyoṅki zinākārī kī rūh ne unheṅ bhaṭkā diyā hai, zinā karte karte wuh apne Ḳhudā se kahīṅ dūr ho gae haiṅ.

4:13  Wuh pahāṛoṅ kī choṭiyoṅ par apne jānwaroṅ ko qurbān karte haiṅ aur pahāṛiyoṅ par chaṛh kar balūt, safedā yā kisī aur daraḳht ke ḳhushgawār sāy meṅ baḳhūr kī qurbāniyāṅ pesh karte haiṅ. Isī lie tumhārī beṭiyāṅ ismatfarosh ban gaī haiṅ, aur tumhārī bahueṅ zinā kartī haiṅ.

4:14  Lekin maiṅ unheṅ un kī ismatfaroshī aur zinākārī kī sazā kyoṅ dūṅ jabki tum mard kasbiyoṅ se sohbat rakhte aur dewatāoṅ kī ḳhidmat meṅ ismatfaroshī karne wālī auratoṅ ke sāth qurbāniyāṅ chaṛhāte ho? Aisī harkatoṅ se nāsamajh qaum tabāh ho rahī hai.

4:15  Ai Isrāīl, tū ismatfarosh hai, lekin Yahūdāh ḳhabardār rahe ki wuh is jurm meṅ mulawwas na ho jāe. Isrāīl ke shahroṅ Jiljāl aur Bait-āwan kī qurbāngāhoṅ ke pās mat jānā. Aisī jaghoṅ par Rab kā nām le kar us kī hayāt kī qasam khānā manā hai.

4:16  Isrāīl to ziddī gāy kī tarah aṛ gayā hai. To phir Rab unheṅ kis tarah sabzāzār meṅ bheṛ ke bachchoṅ kī tarah charā saktā hai?

4:17  Isrāīl to butoṅ kā ittahādī hai, use chhoṛ de!

4:18  Yih log sharāb kī mahfil se fāriġh ho kar zinākārī meṅ lag jāte haiṅ. Wuh nājāyz muhabbat karte karte kabhī nahīṅ thakte. Lekin is kā ajr un kī apnī be'izzatī hai.

4:19  Āṅdhī unheṅ apnī lapeṭ meṅ le kar uṛā le jāegī, aur wuh apnī qurbāniyoṅ ke bāis sharmindā ho jāeṅge.

Chapter 5

5:1  Ai imāmo, suno merī bāt! Ai Isrāīl ke gharāne, tawajjuh de! Ai shāhī ḳhāndān, mere paiġhām par ġhaur kar! Tum par faislā hai, kyoṅki apnī butparastī se tum ne Misfāh meṅ phandā lagā diyā, Tabūr Pahāṛ par jāl bichhā diyā

5:2  aur Shittīm meṅ gaṛhā khudwā liyā hai. Ḳhabardār! Maiṅ tum sab ko sazā dūṅgā.

5:3  Maiṅ to Isrāīl ko ḳhūb jāntā hūṅ, wuh mujh se chhupā nahīṅ rah saktā. Isrāīl ab ismatfarosh ban gayā hai, wuh nāpāk hai.

5:4  Un kī burī harkateṅ unheṅ un ke Ḳhudā ke pās wāpas āne nahīṅ detīṅ. Kyoṅki un ke andar zinākārī kī rūh hai, aur wuh Rab ko nahīṅ jānte.

5:5  Isrāīl kā takabbur us ke ḳhilāf gawāhī detā hai, aur wuh apne qusūr ke bāis gir jāegā. Yahūdāh bhī us ke sāth gir jāegā.

5:6  Tab wuh apnī bheṛ-bakriyoṅ aur gāy-bailoṅ ko le kar Rab ko talāsh kareṅge, lekin befāydā. Wuh use pā nahīṅ sakeṅge, kyoṅki wuh unheṅ chhoṛ kar chalā gayā hai.

5:7  Unhoṅ ne Rab se bewafā ho kar nājāyz aulād paidā kī hai. Ab nayā chāṅd unheṅ un kī maurūsī zamīnoṅ samet haṛap kar legā.

5:8  Jibiyā meṅ narsingā phūṅko, Rāmā meṅ turam bajāo! Bait-āwan meṅ jang ke nāre buland karo. Ai Binyamīn, dushman tere pīchhe paṛ gayā hai!

5:9  Jis din maiṅ sazā dūṅgā us din Isrāīl wīrān-o-sunsān ho jāegā. Dhyān do ki maiṅ ne Isrāīlī qabīloṅ ke bāre meṅ qābil-e-etamād bāteṅ batāī haiṅ.

5:10  Yahūdāh ke rāhnumā un jaise ban gae haiṅ jo nājāyz taur par apnī zamīn kī hudūd baṛhā dete haiṅ. Jawāb meṅ maiṅ apnā ġhazab mūslādhār bārish kī tarah un par nāzil karūṅga.

5:11  Isrāīl par is lie zulm ho rahā hai aur us kā haq mārā jā rahā hai ki wuh bemānī butoṅ ke pīchhe bhāgne par tulā huā hai.

5:12  Maiṅ Isrāīl ke lie pīp aur Yahūdāh ke lie saṛāhaṭ kā bāis banūṅgā.

5:13  Isrāīl ne apnī bīmārī dekhī aur Yahūdāh ne apne nāsūr par ġhaur kiyā. Tab Isrāīl ne Asūr kī taraf rujū kiyā aur Asūr ke azīm bādshāh ko paiġhām bhej kar us se madad māṅgī. Lekin wuh tumheṅ shifā nahīṅ de saktā, wuh tumhāre nāsūr kā ilāj nahīṅ kar saktā.

5:14  Kyoṅki maiṅ sherbabar kī tarah Isrāīl par ṭūṭ paṛūṅgā aur jawān sherbabar kī tarah Yahūdāh par jhapaṭ paṛūṅgā. Maiṅ unheṅ phāṛ kar apne sāth ghasīṭ le jāūṅgā, aur koī unheṅ nahīṅ bachāegā.

5:15  Phir maiṅ apne ghar wāpas jā kar us waqt tak un se dūr rahūṅgā jab tak wuh apnā qusūr taslīm karke mere chehre ko talāsh na kareṅ. Kyoṅki jab wuh musībat meṅ phaṅs jāeṅge tab hī mujhe talāsh kareṅge.”

Chapter 6

6:1  Us waqt wuh kaheṅge, “Āo, ham Rab ke pās wāpas chaleṅ. Kyoṅki usī ne hameṅ phāṛā, aur wuhī hameṅ shifā bhī degā. Usī ne hamārī piṭāī kī, aur wuhī hamārī marham-paṭṭī bhī karegā.

6:2  Do din ke bād wuh hameṅ nae sire se zindā karegā aur tīsre din hameṅ dubārā uṭhā khaṛā karegā tāki ham us ke huzūr zindagī guzāreṅ.

6:3  Āo, ham use jān leṅ, ham pūrī jidd-o-jahd ke sāth Rab ko jānane ke lie koshāṅ raheṅ. Wuh zarūr ham par zāhir hogā. Yih utnā yaqīnī hai jitnā sūraj kā rozānā tulū honā yaqīnī hai. Jis tarah mausam-e-bahār kī tez bārish zamīn ko serāb kartī hai usī tarah Allāh bhī hamāre pās āegā.”

6:4  “Ai Isrāīl, maiṅ tere sāth kyā karūṅ? Ai Yahūdāh, maiṅ tere sāth kyā karūṅ? Tumhārī muhabbat subah kī dhund jaisī ārizī hai. Dhūp meṅ os kī tarah wuh jald hī kāfūr ho jātī hai.

6:5  Isī lie maiṅ ne apne nabiyoṅ kī mārifat tumheṅ paṭaḳh diyā, apne muṅh ke alfāz se tumheṅ mār ḍālā hai. Mere insāf kā nūr sūraj kī tarah hī tulū hotā hai.

6:6  Kyoṅki maiṅ qurbānī nahīṅ balki rahm pasand kartā hūṅ, bhasm hone wālī qurbāniyoṅ kī nisbat mujhe yih pasand hai ki tum Allāh ko jān lo.

6:7  Wuh Ādam Shahr meṅ ahd toṛ kar mujh se bewafā ho gae.

6:8  Jiliyād Shahr mujrimoṅ se bhar gayā hai, har taraf ḳhūn ke dāġh haiṅ.

6:9  Imāmoṅ ke jatthe ḍākuoṅ kī mānind ban gae haiṅ. Kyoṅki wuh Sikam ko pahuṅchāne wāle rāste par musāfiroṅ kī tāk lagā kar unheṅ qatl karte haiṅ. Hāṅ, wuh sharmnāk harkatoṅ se gurez nahīṅ karte.

6:10  Maiṅ ne Isrāīl meṅ aisī bāteṅ dekhī haiṅ jin se roṅgṭe khaṛe ho jāte haiṅ. Kyoṅki Isrāīl zinā kartā hai, wuh apne āp ko nāpāk kartā hai.

6:11  Lekin Yahūdāh par bhī adālat kī fasal pakne wālī hai. Jab kabhī maiṅ apnī qaum ko bahāl karke

Chapter 7

7:1  Isrāīl ko shifā denā chāhtā hūṅ to Isrāīl kā qusūr aur Sāmariya kī burāī sāf zāhir ho jātī hai. Kyoṅki fareb denā un kā peshā hī ban gayā hai. Chor gharoṅ meṅ naqb lagāte jabki bāhar galī meṅ ḍākuoṅ ke jatthe logoṅ ko lūṭ lete haiṅ.

7:2  Lekin wuh ḳhayāl nahīṅ karte ki mujhe un kī tamām burī harkatoṅ kī yād rahtī hai. Wuh nahīṅ samajhte ki ab wuh apne ġhalat kāmoṅ se ghire rahte haiṅ, ki yih gunāh har waqt mujhe nazar āte haiṅ.

7:3  Apnī burāī se wuh bādshāh ko ḳhush rakhte haiṅ, un ke jhūṭ se buzurg lutfandoz hote haiṅ.

7:4  Sab ke sab zinākār haiṅ. Wuh us tapte tanūr kī mānind haiṅ jo itnā garm hai ki nānbāī ko use mazīd chheṛne kī zarūrat nahīṅ. Agar wuh āṭā gūṅdh kar us ke ḳhamīr hone tak intazār bhī kare to bhī tanūr itnā garm rahtā hai ki roṭī pak jāegī.

7:5  Hamāre bādshāh ke jashn par rāhnumā mai pī pī kar mast ho jāte haiṅ, aur wuh kufr bakne wāloṅ se hāth milātā hai.

7:6  Yih log qarīb ā kar tāk meṅ baiṭh jāte haiṅ jabki un ke dil tanūr kī tarah tapte haiṅ. Pūrī rāt ko un kā ġhussā soyā rahtā hai, lekin subah ke waqt wuh bedār ho kar sholāzan āg kī tarah dahakne lagtā hai.

7:7  Sab tanūr kī tarah tapte tapte apne rāhnumāoṅ ko haṛap kar lete haiṅ. Un ke tamām bādshāh gir jāte haiṅ, aur ek bhī mujhe nahīṅ pukārtā.

7:8  Isrāīl dīgar aqwām ke sāth mil kar ek ho gayā hai. Ab wuh us roṭī kī mānind hai jo tawe par sirf ek taraf se pak gaī hai, dūsrī taraf se kachchī hī hai.

7:9  Ġhairmulkī us kī tāqat khā khā kar use kamzor kar rahe haiṅ, lekin abhī tak use patā nahīṅ chalā. Us ke bāl safed ho gae haiṅ, lekin abhī tak use mālūm nahīṅ huā.

7:10  Isrāīl kā takabbur us ke ḳhilāf gawāhī detā hai. To bhī na wuh Rab apne Ḳhudā ke pās wāpas ā jātā, na use talāsh kartā hai.

7:11  Isrāīl nāsamajh kabūtar kī mānind hai jise āsānī se warġhalāyā jā saktā hai. Pahle wuh Misr ko madad ke lie bulātā, phir Asūr ke pās bhāg jātā hai.

7:12  Lekin jyoṅ hī wuh kabhī idhar kabhī idhar dauṛeṅge to maiṅ un par apnā jāl ḍālūṅgā, unheṅ uṛte hue parindoṅ kī tarah nīche utārūṅga. Maiṅ un kī yoṅ tādīb karūṅga jis tarah un kī jamāt ko āgāh kiyā gayā hai.

7:13  Un par afsos, kyoṅki wuh mujh se bhāg gae haiṅ. Un par tabāhī āe, kyoṅki wuh mujh se sarkash ho gae haiṅ. Maiṅ fidyā de kar unheṅ chhuṛānā chāhtā thā, lekin jawāb meṅ wuh mere bāre meṅ jhūṭ bolte haiṅ.

7:14  Wuh ḳhulūsdilī se mujh se iltijā nahīṅ karte. Wuh bistar par leṭe leṭe ‘Hāy hāy’ karte aur ġhallā aur angūr ko hāsil karne ke lie apne āp ko zaḳhmī karte haiṅ. Lekin mujh se wuh dūr rahte haiṅ.

7:15  Maiṅ hī ne unheṅ tarbiyat dī, maiṅ hī ne unheṅ taqwiyat dī, lekin wuh mere ḳhilāf bure mansūbe bāndhte haiṅ.

7:16  Wuh taubā karke wāpas ā jāte haiṅ, lekin mere pās nahīṅ, lihāzā wuh ḍhīlī kamān jaise bekār ho gae haiṅ. Chunāṅche un ke rāhnumā kufr bakne ke sabab se talwār kī zad meṅ ā kar halāk ho jāeṅge. Is bāt ke bāis wuh Misr meṅ mazāq kā nishānā ban jāeṅge.

Chapter 8

8:1  Narsingā bajāo! Dushman uqāb kī tarah Rab ke ghar par jhapaṭṭā mārne ko hai. Kyoṅki logoṅ ne mere ahd ko toṛ kar merī sharīat kī ḳhilāfwarzī kī hai.

8:2  Beshak wuh madad ke lie chīḳhte-chillāte haiṅ, ‘Ai hamāre Ḳhudā, ham to tujhe jānte haiṅ, ham to Isrāīl haiṅ.’

8:3  Lekin haqīqat meṅ Isrāīl ne wuh kuchh mustarad kar diyā hai jo achchhā hai. Chunāṅche dushman us kā tāqqub kare!

8:4  Unhoṅ ne merī marzī pūchhe baġhair apne bādshāh muqarrar kie, merī manzūrī ke baġhair apne rāhnumāoṅ ko chun liyā hai. Apne sone-chāṅdī se apne lie but banā kar wuh apnī tabāhī apne sar par lāe haiṅ.

8:5  Ai Sāmariya, maiṅ ne tere bachhṛe ko radd kar diyā hai! Merā ġhazab tere bāshindoṅ par nāzil hone wālā hai, kyoṅki wuh pāk-sāf ho jāne ke qābil hī nahīṅ! Yih hālat kab tak jārī rahegī?

8:6  Ai Isrāīl, jis bachhṛe kī pūjā tū kartā hai use dastkār hī ne banāyā hai. Sāmariya kā bachhṛā Ḳhudā nahīṅ hai balki pāsh pāsh ho jāegā.

8:7  Wuh hawā kā bīj bo rahe haiṅ aur āṅdhī kī fasal kāṭeṅge. Anāj kī fasal taiyār hai, lekin bāliyāṅ kahīṅ nazar nahīṅ ātīṅ. Is se āṭā milne kā imkān hī nahīṅ. Aur agar thoṛā-bahut gandum mile bhī to ġhairmulkī use haṛap kar leṅge.

8:8  Hāṅ, tamām Isrāīl ko haṛap kar liyā gayā hai. Ab wuh qaumoṅ meṅ aisā bartan ban gayā hai jo koī pasand nahīṅ kartā.

8:9  Kyoṅki us ke log Asūr ke pās chale gae haiṅ. Janglī gadhā to akelā rahtā hai, lekin Isrāīl apne āshiq ko tohfe de kar ḳhush rakhne par tulā rahtā hai.

8:10  Lekin ḳhāh wuh dīgar qaumoṅ meṅ kitne tohfe kyoṅ na taqsīm kareṅ ab maiṅ unheṅ sazā dene ke lie jamā karūṅga. Jald hī wuh shahanshāh ke bojh tale pech-o-tāb khāne lageṅge.

8:11  Go Isrāīl ne gunāhoṅ ko dūr karne ke lie muta'addid qurbāngāheṅ tāmīr kīṅ, lekin wuh us ke lie gunāh kā bāis ban gaī haiṅ.

8:12  Ḳhāh maiṅ apne ahkām ko Isrāīliyoṅ ke lie hazāroṅ dafā kyoṅ na qalamband kartā, to bhī farq na paṛtā, wuh samajhte ki yih ahkām ajnabī haiṅ, yih ham par lāgū nahīṅ hote.

8:13  Go wuh mujhe qurbāniyāṅ pesh karke un kā gosht khāte haiṅ, lekin maiṅ, Rab in se ḳhush nahīṅ hotā balki un ke gunāhoṅ ko yād karke unheṅ sazā dūṅgā. Tab unheṅ dubārā Misr jānā paṛegā.

8:14  Isrāīl ne apne Ḳhāliq ko bhūl kar baṛe mahal banā lie haiṅ, aur Yahūdāh ne muta'addid shahroṅ ko qilāband banā liyā hai. Lekin maiṅ un ke shahroṅ par āg nāzil karke un ke mahaloṅ ko bhasm kar dūṅgā.”

Chapter 9

9:1  Ai Isrāīl, ḳhushī na manā, dīgar aqwām kī tarah shādiyānā mat bajā. Kyoṅki tū zinā karte karte apne Ḳhudā se dūr hotā jā rahā hai. Jahāṅ bhī log gandum gāhte haiṅ wahāṅ tū jā kar apnī ismatfaroshī ke paise jamā kartā hai, yihī kuchh tujhe pyārā hai.

9:2  Is lie āindā gandum gāhne aur angūr kā ras nikālne kī jagheṅ unheṅ ḳhurāk muhaiyā nahīṅ kareṅgī, aur angūr kī fasal unheṅ ras muhaiyā nahīṅ karegī.

9:3  Isrāīlī Rab ke mulk meṅ nahīṅ raheṅge balki unheṅ Misr wāpas jānā paṛegā, unheṅ Asūr meṅ nāpāk chīzeṅ khānī paṛeṅgī.

9:4  Wahāṅ wuh Rab ko na mai kī aur na zabah kī qurbāniyāṅ pesh kar sakeṅge. Un kī roṭī mātam karne wāloṅ kī roṭī jaisī hogī yānī jo bhī use khāe wuh nāpāk ho jāegā. Hāṅ, un kā khānā sirf un kī apnī bhūk miṭāne ke lie hogā, aur wuh Rab ke ghar meṅ nahīṅ āegā.

9:5  Us waqt tum īdoṅ par kyā karoge? Rab ke tahwāroṅ ko tum kaise manāoge?

9:6  Jo tabāhshudā mulk se nikleṅge unheṅ Misr ikaṭṭhā karegā, unheṅ Memfis dafnāegā. Ḳhudrau paude un kī qīmtī chāṅdī par qabzā kareṅge, kāṅṭedār jhāṛiyāṅ un ke gharoṅ par chhā jāeṅgī.

9:7  Sazā ke din ā gae haiṅ, hisāb-kitāb ke din pahuṅch gae haiṅ. Isrāīl yih bāt jān le. Tum kahte ho, “Yih nabī ahmaq hai, rūh kā yih bandā pāgal hai.” Kyoṅki jitnā sangīn tumhārā gunāh hai utne hī zor se tum merī muḳhālafat karte ho.

9:8  Nabī mere Ḳhudā kī taraf se Isrāīl kā pahredār banāyā gayā hai. Lekin jahāṅ bhī wuh jāe wahāṅ use phaṅsāne ke phande lagāe gae haiṅ, balki use us ke Ḳhudā ke ghar meṅ bhī satāyā jātā hai.

9:9  Un se nihāyat hī ḳharāb kām sarzad huā hai, aisā sharīr kām jaisā Jibiyā ke bāshindoṅ se huā thā. Allāh un kā qusūr yād karke un ke gunāhoṅ kī munāsib sazā degā.

9:10  Rab farmātā hai, “Jab merā Isrāīl se pahlā wāstā paṛā to registān meṅ angūr jaisā lag rahā thā. Tumhāre bāpdādā anjīr ke daraḳht par lage pahle pakne wāle phal jaise nazar āe. Lekin Bāl-faġhūr ke pās pahuṅchte hī unhoṅ ne apne āp ko us sharmnāk but ke lie maḳhsūs kar liyā. Tab wuh apne āshiq jaise makrūh ho gae.

9:11  Ab Isrāīl kī shān-o-shaukat parinde kī tarah uṛ kar ġhāyb ho jāegī. Āindā na koī ummīd se hogī, na bachchā janegī.

9:12  Agar wuh apne bachchoṅ ko parwān chaṛhnī tak pāleṅ bhī to bhī maiṅ unheṅ beaulād kar dūṅgā. Ek bhī nahīṅ rahegā. Un par afsos jab maiṅ un se dūr ho jāūṅgā.

9:13  Pahle jab maiṅ ne Isrāīl par nazar ḍālī to wuh Sūr kī mānind shāndār thā, use shādāb jagah par paude kī tarah lagāyā gayā thā. Lekin ab use apnī aulād ko bāhar lā kar qātil ke hawāle karnā paṛegā.”

9:14  Ai Rab, unheṅ de! Kyā de? Hone de ki un ke bachche peṭ meṅ zāe ho jāeṅ, ki aurateṅ dūdh na pilā sakeṅ.

9:15  Rab farmātā hai, “Jab un kī tamām bedīnī Jiljāl meṅ zāhir huī to maiṅ ne un se nafrat kī. Un kī burī harkatoṅ kī wajah se maiṅ unheṅ apne ghar se nikāl dūṅgā. Āindā maiṅ unheṅ pyār nahīṅ karūṅga. Un ke tamām rāhnumā sarkash haiṅ.

9:16  Isrāīl ko mārā gayā, logoṅ kī jaṛ sūkh gaī hai, aur wuh phal nahīṅ lā sakte. Un ke bachche paidā ho bhī jāeṅ to maiṅ un kī qīmtī aulād ko mār ḍālūṅgā.”

9:17  Merā Ḳhudā unheṅ radd karegā, is lie ki unhoṅ ne us kī nahīṅ sunī. Chunāṅche unheṅ dīgar aqwām meṅ māre māre phirnā paṛegā.

Chapter 10

10:1  Isrāīl angūr kī phaltī-phūltī bel thā jo kāfī phal lātī rahī. Lekin jitnā us kā phal baṛhtā gayā utnā hī wuh butoṅ ke lie qurbāngāheṅ banātā gayā. Jitnā us kā mulk taraqqī kartā gayā utnā hī wuh dewatāoṅ ke maḳhsūs satūnoṅ ko sajātā gayā.

10:2  Log dodile haiṅ, aur ab unheṅ un ke qusūr kā ajr bhugatnā paṛegā. Rab un kī qurbāngāhoṅ ko girā degā, un ke satūnoṅ ko mismār karegā.

10:3  Jald hī wuh kaheṅge, “Ham is lie bādshāh se mahrūm haiṅ ki ham ne Rab kā ḳhauf na mānā. Lekin agar bādshāh hotā bhī to wuh hamāre lie kyā kar saktā?”

10:4  Wuh baṛī bāteṅ karte, jhūṭī qasmeṅ khāte aur ḳhālī ahd bāndhte haiṅ. Un kā insāf un zahrīle ḳhudrau paudoṅ kī mānind hai jo bīj ke lie taiyārshudā zamīn se phūṭ nikalte haiṅ.

10:5  Sāmariya ke bāshinde pareshān haiṅ ki Bait-āwan meṅ bachhṛe ke but ke sāth kyā kiyā jāegā. Us ke parastār us par mātam kareṅge, us ke pujārī us kī shān-o-shaukat yād karke wāwailā kareṅge, kyoṅki wuh un se chhin kar pardes meṅ le jāyā jāegā.

10:6  Hāṅ, bachhṛe ko Mulk-e-Asūr meṅ le jā kar shahanshāh ko ḳharāj ke taur par pesh kiyā jāegā. Isrāīl kī ruswāī ho jāegī, wuh apne mansūbe ke bāis sharmindā ho jāegā.

10:7  Sāmariya nest-o-nābūd, us kā bādshāh pānī par tairtī huī ṭahnī kī tarah bebas hogā.

10:8  Bait-āwan kī wuh ūṅchī jagheṅ tabāh ho jāeṅgī jahāṅ Isrāīl gunāh kartā rahā hai. Un kī qurbāngāhoṅ par kāṅṭedār jhāṛiyāṅ aur ūṅṭkaṭāre chhā jāeṅge. Tab log pahāṛoṅ se kaheṅge, “Hameṅ chhupā lo!” Aur pahāṛiyoṅ ko “Ham par gir paṛo!”

10:9  Rab farmātā hai, “Ai Isrāīl, Jibiyā ke wāqiye se le kar āj tak tū gunāh kartā āyā hai, log wahīṅ ke wahīṅ rah gae haiṅ. Kyā munāsib nahīṅ ki Jibiyā meṅ jang un par ṭūṭ paṛe jo itne sharīr haiṅ?

10:10  Ab maiṅ apnī marzī se un kī tādīb karūṅga. Aqwām un ke ḳhilāf jamā ho jāeṅgī jab unheṅ un ke dugne qusūr ke lie zanjīroṅ meṅ jakaṛ liyā jāegā.

10:11  Isrāīl jawān gāy thā jise gandum gāhne kī tarbiyat dī gaī thī aur jo shauq se yih kām kartī thī. Tab maiṅ ne us ke ḳhūbsūrat gale par juā rakh kar use jot liyā. Yahūdāh ko hal khīṅchnā aur Yāqūb ko zamīn par suhāgā phernā thā.

10:12  Maiṅ ne farmāyā, ‘Insāf kā bīj bo kar shafqat kī fasal kāṭo. Jis zamīn par hal kabhī nahīṅ chalāyā gayā us par ṭhīk tarah hal chalāo! Jab tak Rab ko talāsh karne kā mauqā hai use talāsh karo, aur jab tak wuh ā kar tum par insāf kī bārish na barsāe use ḍhūnḍo.’

10:13  Lekin jawāb meṅ tum ne hal chalā kar bedīnī kā bīj boyā, tum ne burāī kī fasal kāṭ kar fareb kā phal khāyā hai. Chūṅki tū ne apnī rāh aur apne sūrmāoṅ kī baṛī tādād par bharosā rakhā hai

10:14  is lie terī qaum meṅ jang kā shor machegā, tere tamām qile ḳhāk meṅ milāe jāeṅge. Shalman ke Bait-arbel par hamle ke-se hālāt hoṅge jis ne us shahr ko zamīnbos karke māoṅ ko bachchoṅ samet zamīn par paṭaḳh diyā.

10:15  Ai Baitel ke bāshindo, tumhāre sāth bhī aisā hī kiyā jāegā, kyoṅki tumhārī badkārī had se zyādā hai. Pau phaṭte hī Isrāīl kā bādshāh nest ho jāegā.”

Chapter 11

11:1  Rab farmātā hai, “Isrāīl abhī laṛkā thā jab maiṅ ne use pyār kiyā, jab maiṅ ne apne beṭe ko Misr se bulāyā.

11:2  Lekin bād meṅ jitnā hī maiṅ unheṅ bulātā rahā utnā hī wuh mujh se dūr hote gae. Wuh Bāl dewatāoṅ ke lie jānwar chaṛhāne, butoṅ ke lie baḳhūr jalāne lage.

11:3  Maiṅ ne ḳhud Isrāīl ko chalne kī tarbiyat dī, bār bār unheṅ god meṅ uṭhā kar lie phirā. Lekin wuh na samjhe ki maiṅ hī unheṅ shifā dene wālā hūṅ.

11:4  Maiṅ unheṅ khīṅchtā rahā, lekin aise rassoṅ se nahīṅ jo insān bardāsht na kar sake balki shafqat bhare rassoṅ se. Maiṅ ne un ke gale par kā juā halkā kar diyā aur narmī se unheṅ ḳhurāk khilāī.

11:5  Kyā unheṅ Mulk-e-Misr wāpas nahīṅ jānā paṛegā? Balki Asūr hī un kā bādshāh banegā, is lie ki wuh mere pās wāpas āne ke lie taiyār nahīṅ.

11:6  Talwār un ke shahroṅ meṅ ghūm ghūm kar ġhaibdānoṅ ko halāk karegī aur logoṅ ko un ke ġhalat mashwaroṅ ke sabab se khātī jāegī.

11:7  Lekin merī qaum mujhe tark karne par tulī huī hai. Jab use ūpar Allāh kī taraf deḳhne ko kahā jāe to us meṅ se koī bhī us taraf rujū nahīṅ kartā.

11:8  Ai Isrāīl, maiṅ tujhe kis tarah chhoṛ saktā hūṅ? Maiṅ tujhe kis tarah dushman ke hawāle kar saktā, kis tarah Admā kī tarah dūsroṅ ke qabze meṅ chhoṛ saktā, kis tarah Zaboīm kī tarah tabāh kar saktā hūṅ? Merā irādā sarāsar badal gayā hai, maiṅ tujh par shafqat karne ke lie bechain hūṅ.

11:9  Na maiṅ apnā saḳht ġhazab nāzil karūṅga, na dubārā Isrāīl ko barbād karūṅga. Kyoṅki maiṅ insān nahīṅ balki Ḳhudā hūṅ, wuh Quddūs jo tere darmiyān sukūnat kartā hai. Maiṅ ġhazab meṅ nahīṅ āūṅgā.

11:10  Us waqt wuh Rab ke pīchhe hī chaleṅge. Tab wuh sherbabar kī tarah dahāṛegā. Aur jab dahāṛegā to us ke farzand maġhrib se larazte hue wāpas āeṅge.

11:11  Wuh parindoṅ kī tarah phaṛphaṛāte hue Misr se āeṅge, thartharāte kabūtaroṅ kī tarah Asūr se lauṭeṅge. Phir maiṅ unheṅ un ke gharoṅ meṅ basā dūṅgā. Yih merā, Rab kā farmān hai.

11:12  Isrāīl ne mujhe jhūṭ se gher liyā, fareb se merā muhāsarā kar liyā hai. Lekin Yahūdāh bhī mazbūtī se Allāh ke sāth nahīṅ hai balki āwārā phirtā hai, hālāṅki quddūs Ḳhudā wafādār hai.”

Chapter 12

12:1  Isrāīl hawā charne kī koshish kar rahā hai, pūrā din wuh mashriqī lū ke pīchhe bhāgtā rahtā hai. Us ke jhūṭ aur zulm meṅ izāfā hotā jā rahā hai. Asūr se ahd bāndhne ke sāth sāth wuh Misr ko bhī zaitūn kā tel bhej detā hai.

12:2  Rab adālat meṅ Yahūdāh se bhī laṛegā. Wuh Yāqūb ko us ke chāl-chalan kī sazā, us ke āmāl kā munāsib ajr degā.

12:3  Kyoṅki māṅ ke peṭ meṅ hī us ne apne bhāī kī eṛī pakaṛ kar use dhokā diyā. Jab bāliġh huā to Allāh se laṛā

12:4  balki farishte se laṛte laṛte us par ġhālib āyā. Phir us ne rote rote us se iltijā kī ki mujh par rahm kar. Bād meṅ Yāqūb ne Allāh ko Baitel meṅ pāyā, aur wahāṅ Ḳhudā us se hamkalām huā.

12:5  Rab jo lashkaroṅ kā Ḳhudā hai aur jis kā nām Rab hī hai, us ne farmāyā,

12:6  “Apne Ḳhudā ke pās wāpas ā kar rahm aur insāf qāym rakh! Kabhī apne Ḳhudā par ummīd rakhne se bāz na ā.”

12:7  Isrāīl tājir hai jis ke hāth meṅ ġhalat tarāzū hai aur jise logoṅ se nājāyz fāydā uṭhāne kā baṛā shauq hai.

12:8  Wuh kahtā hai, “Maiṅ amīr ho gayā hūṅ, maiṅ ne kasrat kī daulat pāī hai. Koī sābit nahīṅ kar sakegā ki mujh se yih tamām milkiyat hāsil karne meṅ koī qusūr yā gunāh sarzad huā hai.”

12:9  “Lekin maiṅ, Rab jo Misr se tujhe nikālte waqt āj tak terā Ḳhudā hūṅ maiṅ yih nazarandāz nahīṅ karūṅga. Maiṅ tujhe dubārā ḳhaimoṅ meṅ basne dūṅgā. Yoṅ hogā jis tarah un pahle dinoṅ meṅ huā jab Isrāīlī merī parastish karne ke lie registān meṅ jamā hote the.

12:10  Maiṅ bār bār nabiyoṅ kī mārifat tum se hamkalām huā, maiṅ ne unheṅ muta'addid royāeṅ dikhāīṅ aur un ke zariye tumheṅ tamsīleṅ sunāīṅ.”

12:11  Kyā Jiliyād bedīn hai? Us ke log nākārā hī haiṅ! Jiljāl meṅ logoṅ ne sānḍ qurbān kie haiṅ, is lie un kī qurbāngāheṅ malbe ke ḍher ban jāeṅgī. Wuh bīj bone ke lie taiyārshudā khet ke kināre par lage patthar ke ḍher jaisī baneṅgī.

12:12  Yāqūb ko bhāg kar Mulk-e-Arām meṅ panāh lenī paṛī. Wahāṅ wuh bīwī milne ke lie mulāzim ban gayā, aurat ke bāis us ne bheṛ-bakriyoṅ kī gallābānī kī.

12:13  Lekin bād meṅ Rab nabī kī mārifat Isrāīl ko Misr se nikāl lāyā aur nabī ke zariye us kī gallābānī kī.

12:14  To bhī Isrāīl ne use baṛā taish dilāyā. Ab unheṅ un kī qatl-o-ġhārat kā ajr bhugatnā paṛegā. Unhoṅ ne apne āqā kī tauhīn kī hai, aur ab wuh unheṅ munāsib sazā degā.

Chapter 13

13:1  Pahle jab Isrāīl ne bāt kī to log kāṅp uṭhe, kyoṅki Mulk-e-Isrāīl meṅ wuh sarfarāz thā. Lekin phir wuh Bāl kī butparastī meṅ mulawwas ho kar halāk huā.

13:2  Ab wuh apne gunāhoṅ meṅ bahut izāfā kar rahe haiṅ. Wuh apnī chāṅdī le kar mahārat se but ḍhāl lete haiṅ. Phir dastkāroṅ ke hāth se bane in butoṅ ke bāre meṅ kahā jātā hai, “Jo bachhṛe ke butoṅ ko chūmnā chāhe wuh kisī insān ko qurbān kare!”

13:3  Is lie wuh subah-sawere kī dhund jaise ārizī aur dhūp meṅ jald hī ḳhatm hone wālī os kī mānind hoṅge. Wuh gāhte waqt gandum se alag hone wāle bhūse kī mānind hawā meṅ uṛ jāeṅge, ghar meṅ se nikalne wāle dhueṅ kī tarah zāe ho jāeṅge.

13:4  “Lekin maiṅ, Rab tujhe Misr se nikālte waqt se le kar āj tak terā Ḳhudā hūṅ. Tujhe mere siwā kisī aur ko Ḳhudā nahīṅ jānanā hai. Mere siwā aur koī najātdahindā nahīṅ hai.

13:5  Registān meṅ maiṅ ne terī dekh-bhāl kī, wahāṅ jahāṅ taptī garmī thī.

13:6  Wahāṅ unheṅ achchhī ḳhurāk milī. Lekin jab wuh jī bhar kar khā sake aur ser hue to maġhrūr ho kar mujhe bhūl gae.

13:7  Yih dekh kar maiṅ un ke lie sherbabar ban gayā hūṅ. Ab maiṅ chīte kī tarah rāste ke kināre un kī tāk meṅ baiṭhūṅgā.

13:8  Us rīchhnī kī tarah jis ke bachchoṅ ko chhīn liyā gayā ho maiṅ un par jhapaṭṭā mār kar un kī antaṛiyoṅ ko phāṛ nikālūṅgā. Maiṅ unheṅ sherbabar kī tarah haṛap kar lūṅgā, aur janglī jānwar unheṅ ṭukṛe ṭukṛe kar deṅge.

13:9  Ai Isrāīl, tū is lie tabāh ho gayā hai ki tū mere ḳhilāf hai, us ke ḳhilāf jo terī madad kar saktā hai.

13:10  Ab terā bādshāh kahāṅ hai ki wuh tere tamām shahroṅ meṅ ā kar tujhe chhuṭkārā de? Ab tere rāhnumā kidhar haiṅ jin se tū ne kahā thā, ‘Mujhe bādshāh aur rāhnumā de de.’

13:11  Maiṅ ne ġhusse meṅ tujhe bādshāh de diyā aur ġhusse meṅ use tujh se chhīn bhī liyā.

13:12  Isrāīl kā qusūr lapeṭ kar godām meṅ rakhā gayā hai, us ke gunāh hisāb-kitāb ke lie mahfūz rakhe gae haiṅ.

13:13  Dard-e-zah shurū ho gayā hai, lekin wuh nāsamajh bachchā hai. Wuh māṅ ke peṭ se nikalnā nahīṅ chāhtā.

13:14  Maiṅ fidyā de kar unheṅ Pātāl se kyoṅ rihā karūṅ? Maiṅ unheṅ Maut kī girift se kyoṅ chhuṛāūṅ? Ai Maut, tere kāṅṭe kahāṅ rahe? Ai Pātāl, terā ḍanak kahāṅ rahā? Use kām meṅ lā, kyoṅki maiṅ tars nahīṅ khāūṅgā.

13:15  Ḳhāh wuh apne bhāiyoṅ ke darmiyān phaltā-phūltā kyoṅ na ho to bhī Rab kī taraf se mashriqī lū us par chalegī. Aur jab registān se āegī to Isrāīl ke kueṅ aur chashme ḳhushk ho jāeṅge. Har ḳhazānā, har qīmtī chīz lūṭ kā māl ban jāegī.

13:16  Sāmariya ke bāshindoṅ ko un ke qusūr kī sazā bhugatnī paṛegī, kyoṅki wuh apne Ḳhudā se sarkash ho gae haiṅ. Dushman unheṅ talwār se mār kar un ke bachchoṅ ko zamīn par paṭaḳh degā aur un kī hāmilā auratoṅ ke peṭ chīr ḍālegā.”

Chapter 14

14:1  Ai Isrāīl, taubā karke Rab apne Ḳhudā ke pās wāpas ā! Kyoṅki terā qusūr tere zawāl kā sabab ban gayā hai.

14:2  Apne gunāhoṅ kā iqrār karte hue Rab ke pās wāpas āo. Us se kaho, “Hamāre tamām gunāhoṅ ko muāf karke hameṅ mehrbānī se qabūl farmā tāki ham apne hoṅṭoṅ se terī tārīf karke tujhe munāsib qurbānī adā kar sakeṅ.

14:3  Asūr hameṅ na bachāe. Āindā na ham ghoṛoṅ par sawār ho jāeṅge, na kaheṅge ki hamāre hāthoṅ kī chīzeṅ hamārā Ḳhudā haiṅ. Kyoṅki tū hī yatīm par rahm kartā hai.”

14:4  Tab Rab farmāegā, “Maiṅ un kī bewafāī ke asarāt ḳhatm karke unheṅ shifā dūṅgā, hāṅ maiṅ unheṅ khule dil se pyār karūṅga, kyoṅki merā un par ġhazab ṭhanḍā ho gayā hai.

14:5  Isrāīl ke lie maiṅ shabnam kī mānind hūṅgā. Tab wuh sosan kī mānind phūl nikālegā, Lubnān ke deodār ke daraḳht kī tarah jaṛ pakaṛegā,

14:6  us kī koṅpleṅ phūṭ nikleṅgī, aur shāḳheṅ ban kar phailtī jāeṅgī. Us kī shān zaitūn ke daraḳht kī mānind hogī, us kī ḳhushbū Lubnān ke deodār ke daraḳht kī ḳhushbū kī tarah phail jāegī.

14:7  Log dubārā us ke sāy meṅ jā baseṅge. Wahāṅ wuh anāj kī tarah phaleṅ-phūleṅge, angūr ke-se phūl nikāleṅge. Dūsre un kī yoṅ tārīf kareṅge jis tarah Lubnān kī umdā mai kī.

14:8  Tab Isrāīl kahegā, ‘Merā butoṅ se kyā wāstā?’ Maiṅ hī terī sun kar terī dekh-bhāl karūṅga. Maiṅ jūnīpar kā sāyādār daraḳht hūṅ, aur tū mujh se hī phal pāegā.”

14:9  Kaun dānishmand hai? Wuh samajh le. Kaun sāhib-e-fahm hai? Wuh matlab jān le. Kyoṅki Rab kī rāheṅ durust haiṅ. Rāstbāz un par chalte raheṅge, lekin sarkash un par chalte waqt ṭhokar khā kar gir jāeṅge.