Kapingamarangi - Hosea

Chapter 1

1:1  Aanei nia helekai a Dimaadua ne-wanga gi Hosea go tama a Beeri, i-di madagoaa o Uzziah, Jotham, Ahaz, mo Hezekiah nogo hai nia king o Judah, gei-ogo Jeroboam, go tama a Jehoash nogo hai di king o Israel.

1:2  Di madagoaa Dimaadua ne-helekai matagidagi gi digau Israel mai i Hosea, Mee ne-helekai gi Hosea boloo, “Hana, heia doo lodo. Doo lodo la-ga-hagalee manawa-dahi adu gi-di-goe, gei au dama la-gaa-hai labelaa be mee. Nadau hangaahai gaa-hai gadoo be agu daangada ala gu-diiagi Au, guu-hai digau hagalee manawa-dahi mai gi-di-Au.”

1:3  Malaa, Hosea gaa-hai dono lodo gi-di ahina dono ingoo go Gomer, tama-ahina ni Diblaim. Di ahina deelaa ga-hai-dama, ga-haanau dana dama-daane,

1:4  gei Dimaadua ga-helekai gi Hosea, “Gahia di ingoo o-maa bolo ‘Jezreel’, idimaa, hagalee duai gei Au ga-hagahuaidu di king o Israel mai i-di huaidu o tamana-madua o-maa go Jehu dela ne-hai dana daaligi dangada i Jezreel. Au ga-haga-lawa di madawaawa Jehu gi-dee-king i-hongo Israel.

1:5  Gei di madagoaa hua deelaa, gei Au ga-hagahuaidu nia mahi o digau-dauwa o Israel i-di Gowaa Mehanga Gonduu o Jezreel.”

1:6  Gei Gomer ga-hai-dama labelaa, ga-haanau tama-ahina. Dimaadua ga-helekai gi Hosea, “Wanga-ina dono ingoo bolo ‘Lo=Ruchama’, i-di Au ga-hagalee aloho hua igolo i digau Israel, be e-dumaalia ang-gi digaula.

1:7  Malaa, Au ga-haga-modongoohia dogu aloho gi digau Judah. Au, go Dimaadua go di-nadau God, ga-benebene digaula. Dagu benebene digaula e-hagalee hai gi tauwa, nia hulumanu-dauwa, nia maalei, nia amu maalei, be nia hoodo mono daane hongo hoodo.”

1:8  Muli-hua dana dama-ahina ne-daa gi-daha mo-di uu, gei Gomer ga-hai-dama labelaa, ga-haanau tama-daane.

1:9  Dimaadua ga-helekai gi Hosea “Wanga-ina dono ingoo bolo ‘Lo=Ammi’, idimaa, nia daangada Israel gu-hagalee hai nia daangada ni-aagu, gei Au gu-hagalee hai di God ni digaula.”

1:10  Nia daangada Israel ga-dogologowaahee be nia gelegele o tongotai, gu-logowaahee e-deemee di-dau be e-hagatau. Malaa, dolomeenei gei God e-helekai gi digaula, “Goodou hagalee nia daangada ni-aagu,” gei di madagoaa ga-dau-mai i-golo, gei Mee ga-helekai gi digaula, “Goodou nia dama ni-di God mouli.

1:11  Nia daangada o Judah mo Israel ga-buni-mai labelaa gi-di gowaa e-dahi. Digaula ga-hilihili di-nadau dagi e-dahi, gei digaula ga-tomo-aga, ga-humalia ang-gi ginaadou i-lodo di-nadau henua. Uaa, di laangi o Jezreel la-gaa-hai di laangi aamua!

Chapter 2

2:1  “Gahia digau ala e-dau gi Israel boloo, ‘Nia daangada ni God’ mo ‘Nia daangada a God e-aloho-ai’.

2:2  “Agu dama-nei, dangidangi haga-mahi gi-di-godou dinana, ma e-aha maa mee gu-hagalee hai di lodo ni-oogu, gei Au gu-hagalee hai labelaa di lodo ni mee. Dangidangi gi mee bolo gi-dugua dono mouli hai be-di manu, mo dono mouli huihui dono huaidina.

2:3  Maa mee ga-hagalee lawa i dana hai, gei Au gaa-hai a-mee gii-noho beelaa ono goloo ai be dono laangi dela ne-haanau-mai-ai. Au gaa-hai a-mee gii-hai be-di anggowaa maangoo, gei mee gaa-made i dono hieinu.

2:4  Au ga-hagalee dumaalia-loo gi ana dama aanei, idimaa, digaula la nia dama ni-di ahina mouli hai be-di manu dono langaadia ai. Mee guu-bida helekai ang-gi deia boloo, ‘Au gaa-hana gi-baahi ogu ihoo-daane, gei digaula ga-gaamai agu meegai, mono wai, mono gahu gili siibi, mono gahu-lenge, mono lolo-olib, mono waini.’

2:5  Au ga-hagalee dumaalia-loo gi ana dama aanei, idimaa, digaula la nia dama ni-di ahina mouli hai be-di manu dono langaadia ai. Mee guu-bida helekai ang-gi deia boloo, ‘Au gaa-hana gi-baahi ogu ihoo-daane, gei digaula ga-gaamai agu meegai, mono wai, mono gahu gili siibi, mono gahu-lenge, mono lolo-olib, mono waini.’

2:6  Malaa, Au ga-duuli di ahina deelaa gi-nia laagau duduia, gaa-hau dagu abaaba e-pono di ala o-maa.

2:7  Mee gaa-lele i-muli ono ehoo-daane, ge e-deemee di-kumi digaula. Mee ga-halahala digaula ge hagalee gida. Gei mee ga-helekai, ‘Au gaa-hana gi-muli gi dogu lodo donu, idimaa dogu noho i-dono baahi la koia e-humalia hua e-tanga i dogu noho beenei.’

2:8  “Di ahina deelaa la de-iloo-ia bolo ma ko-Au dela ne-wanga ana meegai, mono waini, mono lolo-olib, mo nia silber mono goolo ala e-uluulu-ieia e-daumaha gi Baal.

2:9  I-di madagoaa o tau-gai, gei Au ga-daa gi-daha agu meegai mono waini mono gahu gili-siibi mono gahu-lenge ala ne-wanga ko-Au gi mee belee gahu-ai.

2:10  Gei Au gaa-hai a-mee gii-noho beelaa ono goloo ai i-mua ono ehoo-daane, deai tangada e-mee di-daa a-mee gi-daha mo ogu mogobuna aanei ai.

2:11  Gei Au gaa-dugu ono tene balumee, aalaa go ana hagamiami ngadau, mono laangi llauehe o-nia malama, mono tenetene e-logo ala nogo hai i-lodo nia Laangi-Sabad, aalaa go ana hagadilinga daumaha huogodoo.

2:12  Au ga-hunahuna ana laagau-‘grape’ mo ana laagau-‘fig’ ala nogo hai-ei mee bolo nia mee ni ono ehoo-daane ne-haga-ingoo ang-gi deia belee hui dono huaidina gi digaula. Au gaa-hai ana hadagee-waini mono gowaa laagau gii-hai be-di anggowaa, gei nia manu lodo-geinga ga-hunahuna nia maa.

2:13  Au ga-hagahuaidu a-mee gii-tau gi-di madagoaa o-mee dela ne-de-langahieia Au, dela nogo dudu ana ‘incense’ ang-gi Baal, ge nogo humu ia gi-nia hadu hagalabagau, ga-waluwalu ono ehoo-daane. Aanei la nnelekai mai baahi o Dimaadua.

2:14  “Malaa, Au gaa-lahi labelaa a-mee gi-lodo di anggowaa, gei Au ga-leelee gi mee i-golo gi-nia helekai hagaaloho.

2:15  Au gaa-wanga labelaa nia hadagee-waini a-maa mai i-mua, gaa-hai di Gowaa o-di Haingadaa gii-hai di Bontai o-di Hagadagadagagee. Mee ga-hagalongo-mai gi-di-Au gadoo be dono hagalongo i dono madagoaa nogo dama-ahina i-di madagoaa o mee ne-hanimoi-ai i Egypt.

2:16  Malaa, mee gaa-gahi labelaa Au bolo dono lodo, ga-hagalee gahi Au bolo dono Baal.

2:17  Au ga-hagalee dumaalia ang-gi mee gi-helekai di ingoo Baal labelaa.

2:18  “Deelaa dogu madagoaa ga-hagababa ang-gi nia manu lodo-henua mono manu mamaangi bolo ginaadou gi-hudee heia agu daangada gii-tale gi-di haingadaa. Gei Au ga-haga-mmaa gi-daha mo tenua nia goloo-dauwa, ala go nia hulumanu mono maalei huogodoo, gaa-hai agu daangada la-gi-mouli i-lodo di haingoohia mo-di noho i-di aumaalia.

2:19  “Israel, Au gaa-dugu goe bolo di lodo ni-oogu. Au ga-hai-hegau donu gei e-manawa-dahi. Au ga-haga-modongoohia-adu gi-di-goe di aloho mau-dangihi mo tumaalia, gaa-hai goe gii-hai di mee ni-aagu, gaa-hana hua dee-odi.

2:20  Au ga-daahi dagu hagababa la-gii-donu, dela bolo goe gaa-hai di mee ni-aagu, gei goe la-ga-modongoohia bolo Au la-go Dimaadua.

2:21  Di madagoaa hua deelaa, gei Au ga-hagagila nia dalodalo o agu daangada Israel. Au ga-haga-doo-iha dagu uwa gi-hongo henuailala, gei henuailala ga-huwa-aga nia meegai mo nia waini mono olib.

2:22  Di madagoaa hua deelaa, gei Au ga-hagagila nia dalodalo o agu daangada Israel. Au ga-haga-doo-iha dagu uwa gi-hongo henuailala, gei henuailala ga-huwa-aga nia meegai mo nia waini mono olib.

2:23  Au ga-haga-noho agu daangada donu i tenua deelaa, gaa-hai digaula gi-maluagina. Au ga-aloho i digau ala e-haga-ingoo bolo ‘Tee-aloho’, mo digau ala e-haga-ingoo bolo ‘Hagalee nia daangada ni-aagu,’ gei Au ga-helekai, ‘Goodou la nia daangada ni-aagu.’ Gei digaula ga-helekai, ‘Goe go di-madau God.’ ”

Chapter 3

3:1  Dimaadua ga-helekai-mai, “Hana labelaa, hagi-anga-ina do aloho gi-di ahina dela e-mouli huaidu be-di manu ang-gi ono ehoo-daane. Goe gi-aloho i mee, gadoo be dagu hai dela e-aloho hua igolo i digau Israel, ma e-aha maa digaula la-guu-huli gi-nia balu-ieidu mo-di hiihai e-tigidaumaha nia huwa-laagau haga-maangoo ‘raisin’ ang-gi nia ada-balu-ieidu.”

3:2  Malaa, au gaa-hui di ahina deelaa gi-nia bahihadu silber e-madangaholu maa-lima, ge e-hidu peege-‘barley’.

3:3  Au gu-helekai gi mee bolo mee gi-noho-hua talitali au di madagoaa looloowehaa gi-hudee huihuia dono huaidina, be hudee hai be-di manu, gei au ga-talitali a-mee i-lodo hua di madagoaa deelaa.

3:4  Malaa, i-di ala hua deenei, i-di madagoaa looloo, gei digau Israel ga-deai di-nadau king ai mo di-nadau dangada dagi ai, nadau tigidaumaha ai, ge nadau daumaha gi-nia duludulu hadu haga-madagu ai, ge nadau balu-ieidu mo nadau mee e-hai-hegau dabu ai.

3:5  Di madagoaa gaa-dae-mai i-golo, gei digau Israel gaa-huli labelaa gi Dimaadua, go di-nadau God, mo ang-gi tangada i-di hagadili o David gaa-hai di-nadau king. Digaula ga-hagalaamua Dimaadua, gaa-kumi hogi nia wanga-dehuia humalia mai baahi o-Mee.

Chapter 4

4:1  Dimaadua e-helekai hai-baahi ang-gi digau ala e-noho i tenua deenei. Hagalongo Israel, hagalongo gi ana helekai: “Di manawa-dahi mo-di aloho la hagalee i-lodo tenua deenei, digaula hagalee dugu Au bolo Au go God.

4:2  Nia daangada e-hai-hua nadau hagababa, gaa-lawa gaa-oho. Digaula e-hai nadau kai-tilikai gei e-daaligi tangada gii-mmade, gei e-gaiaa, gei e-hai di huaidu hai be-di manu. Nia huaidu ala e-hai go digaula le e-llauehe-aga, digaula koia e-daaligi nadau daangada gii-mmade.

4:3  Deenei gaa-hidi-ai tenua deenei ga-maangooakii, gei nia mee ala e-mouli la-gaa-mmade, nia manu huogodoo mo nia manu mamaangi mo nia iga gaa-mmade labelaa.”

4:4  Dimaadua ga-helekai, “Goodou hudee helekai hai-baahi gi-nia daangada, ge hudee wwou gi digaula, idimaa, ogu lodo-huaidu le e-hai-adu gi goodou, go digau hai-mee-dabu.

4:5  Godou hai-hegau i-di aa mo-di boo la ono hadinga ai, e-hai hogi be nia hegau nia soukohp, malaa, gei Au gaa-oho gi-daha di-godou dinana go Israel.

4:6  Agu daangada la-gaa-mmade i-di nadau haga-de-iloo-ginaadou Au. Goodou go digau hai-mee-dabu gu-hagalee haga-dahidamee Au, gei guu-kili gi-daha agu agoago, ga-hidi-mai-iei Au gaa-huli gi-daha mo goodou mo-di haga-de-iloo-e-Au godou dama-daane bolo gi-dee-hai-hua agu gau hai-mee-dabu.

4:7  “Di dogologo o digau hai-mee-dabu, dela hogi di logo o godou huaidu ala ne-hai-mai gi-di-Au. Au gaa-huli godou aamua gii-hai nia haga-langaadia ni goodou.

4:8  Goodou guu-hai digau maluagina i-nia huaidu o agu daangada, gei goodou e-hiihai labelaa bolo digaula gi-heia nadau huaidu gi-logowaahee gi-nonua.

4:9  Malaa, di hagaduadua dela e-tale gi digau aanei, le e-tale adu labelaa gi goodou. Au ga-haga-duadua goodou, e-hui godou huaidu ala e-hai.

4:10  Goodou ma-gaa-gai di-godou duhongo tigidaumaha, gei goodou e-hiigai hua igolo. Goodou ga-daumaha gi-nia god hagadili, gei goodou hagalee huwa, idimaa, goodou guu-huli gi-daha mo Au, gu-daudali-hua nia balu-ieidu.”

4:11  Dimaadua ga-helekai, “Nia waini hoou mono waini pobo e-haga-nngala nia mamaanadu humalia o agu daangada!

4:12  Digaula e-tangi ang-gi di bida-laagau gi-heia di haga-modongoohia ang-gi ginaadou. Di bida laagau e-hagi-anga gi digaula nadau mee ala e-hiihai gi-iloo! Digaula guu-hudu Au gi-daha. Digaula guu-wanga ginaadou gi-nia balu-ieidu, guu-hai gadoo be-di ahina huihui dono huaidina.

4:13  Digaula e-haihai nadau tigidaumaha i-nia gowaa dabu i tomo nia gonduu, ge e-dudu nadau ‘incense’ i-hongo nia dama gonduu, i-lala nia hagadilinga laagau tomo lloo mangamanga ge e-maluehe no-lala. “Nomuli-mai-hua, gei godou dama-ahina guu-hai nia ahina huihui nadau huaidina, gei nia lodo o godou dama-daane guu-hai di huaidu be-di manu.

4:14  Gei Au hagalee hagaduadua digaula i-nia mee aanei, idimaa, goodou hogi gu-madalia nia ahina huihui nadau huaidina i-lodo nia hale daumaha, ge e-madalia digaula e-hai nadau tigidaumaha o-di bouli. E-hai be-di haga-honu o-di agoago podo dela e-hai boloo, ‘Digau nadau mamaanadu ai, ga-hagahuaidu.’

4:15  “Ma e-aha maa goodou go digau Israel ma-ga-hagalee manawa-dahi mai gi-di-Au, gei Judah la-gi-hudee heia gii-hai di huaidu deenei. Hudee daumaha i-lodo o Gilgal be i-lodo o Beth=Aven, ge hudee hai hagababa i-lodo nia waahale aalaa i-di ingoo o Dimaadua dela e-mouli.

4:16  Digau Israel gu-hamaaloo nadau lodo gadoo be nia hoodo-‘donkey’. Ge dehee dagu hai ga-haangai digaula be nia dama-siibi lligi i-lodo di gowaa maalama?

4:17  Digau Israel e-noho-hua i-lala nia mogobuna o-nia balu-ieidu. Diagia-hua digaula gii-ala-hua i ginaadou!

4:18  Muli nadau inu nadau waini e-logo, gei digaula gu-libaliba gu-hiihai e-huihui nadau huaidina, digaula e-hiihai-hua e-kae di haga-langaadia, hagalee go di-nadau hagalabagau.

4:19  Digaula gaa-lahi gi-daha go di madangi, gei ga-langaadia i nadau hai tigidaumaha o-di bouli.

Chapter 5

5:1  “Digau hai-mee-dabu, goodou hagalongo! Nia daangada Israel, goodou hagalongo hagahumalia! Digau ala e-dau gi-di madawaawa king, goodou hagalongo labelaa! Go goodou ala bolo e-gabunga godou daangada gi-di tonu, goodou ga-hagi-aga. Goodou guu-hai di hele i-lodo o Mizpah, di gubenge e-holo gi-hongo di Gonduu Tabor,

5:2  mo-di bongoo llala i-lodo di waahale go Acacia, gei Au ga-hagaduadua goodou huogodoo.

5:3  Au gu-iloo-e-Au nnangaahai o Israel, mee e-deemee di bala hagammuni i-di-Au. Mee gu-hagalee manawa-dahi mai gi-di-Au, gei ana daangada la-gu-hagalee humalia di-nadau daumaha mai gi-di-Au.”

5:4  Nia huaidu o-nia daangada ala ne-hai, le e-hidi-ai ginaadou ga-hagalee loomoi labelaa gi di-nadau God. Di hai daumaha ang-gi nia balu-god gu-haga-mau-dangihi digaula, gu-haga-de-iloo-ginaadou a Dimaadua.

5:5  Di hagamuamua o-nia daangada Israel la-guu-hai di hagi-aga ang-gi ginaadou. Nadau huaidu gaa-hai ginaadou gi-dugidugi nadau wae, mo-di hingahinga, gei digau Judah ga-hingahinga dalia digaula.

5:6  Digaula e-kae nadau siibi mo nadau kau belee hai nadau tigidaumaha ang-gi Dimaadua, gei gu-deai dono dahidamee ai. Digaula gu-deemee di-gidee-ginaadou a-Mee, idimaa, Mee gu-hila-hua gi-daha mo digaula.

5:7  Digaula gu-hagalee manawa-dahi ang-gi Dimaadua, gei nadau dama gu-hagalee hai nia dama ni Mee. Deenei di mee ga-mooho-ai nia gowaa digaula hagalimalima.

5:8  Goodou ilihia godou buu hai-dauwa! Digau ala i-lodo Gibeah, Ramah mo Beth=Aven la-gi-longono-ginaadou nia maa! Goodou go nia daane o Benjamin, goodou gi-mua-hua i-lodo tauwa!

5:9  Di laangi hagaduadua gaa-dae-mai, gei Israel la-ga-mooho. Goodou go digau Israel, e-donu bolo di mee ga-gila-aga!

5:10  Dimaadua ga-helekai, “Au gu-hagawelewele, idimaa, nia dagi o Judah gu-heebagi gi Israel, guu-kae tenua o-maa. Malaa, gei Au ga-llingi-iha dagu hagaduadua gi-hongo digaula gadoo be toloo ne-hai.

5:11  Israel guu-noho i-lodo di haingadaa. Mee gu-hagalee hai-mee gi ana henua donu ala ne-ngalua ginai, idimaa, mee ne-halahala-hua ono hagamaamaa go digau ala e-deemee di hagamaamaa ia.

5:12  Au gaa-dugu-mai di mooho gi-hongo digau Israel mo digau Judah.

5:13  “Di madagoaa o Israel ne-gidee-ia bolo ia guu-magi huoloo, mo Judah guu-mmada ang-gi deia dela gu-moholehole, Israel gaa-hana gi Assyria, belee halahala dono hagamaamaa gi-di king aamua i-golo, gei mee gu-deemee di-hai digaula gi-humalia be gii-hili nadau moholehole.

5:14  Au ga-heebagi gi nia daangada Israel mo Judah gadoo be-di laion. Ko-Au hua deenei dela ga-duuduu digaula haga-lligi, gaa-kili gi-daha. Dogu madagoaa dela ma-gaa-dada digaula gi-daha, deai tangada e-mee di-daa digaula ai.

5:15  “Au ga-diiagi agu daangada, gaa-dae-loo gi nadau hagaduadua la-guu-dohu di hui nadau huaidu, ga-loomoi ga-halahala-mai Au. Idimaa go nadau hagaduadua, holongo gei digaula ga-hagamada ga-halahala-mai Au.”

Chapter 6

6:1  Nia daangada ga-helekai, “Gidaadou gaa-hula gi Dimaadua! Ma go Mee dela ne-haga-magibala gidaadou, gei go Mee dela belee haga-hili gidaadou. Mee gu-haga-moholehole gidaadou, gei go Mee dela belee haga-pikipiki tadau moholehole.

6:2  Muli nia laangi e-lua be e-dolu, gei Mee ga-haga-hili gidaadou, gei gidaadou ga-mouli i-ono mua.

6:3  Gidaadou ga-hagamahi gi-iloo Dimaadua. Mee ga-hanimoi-laa gi gidaadou, gadoo be-di heni o-nia laangi e-hagadau, ge e-hai gadoo be-di uwa dela e-doo gi-hongo tenua.”

6:4  Gei Dimaadua ga-helekai, “Israel mo Judah, ma di-aha dela belee hai ko-Au adu gi goolua? Di-gulu aloho i-di-Au gaa-maa-hua gi-daha hagalimalima, gadoo be-di magalillili o-di luada, e-hai labelaa be nia wai magalillili ala hua e-ngudu-ngoohia i-di luada.

6:5  Deelaa-laa Au gu-hagau-adu agu soukohp guu-hagi-adu agu helekai hagi-aga mono helekai ala e-oho. Dagu mee dela e-hiihai ginai Au i goodou le e-modongoohia-mai hua haga-madammaa.

6:6  Au e-hiihai gi godou aloho dee-ngudu, hagalee go godou manu ala e-tigidaumaha. Au e-hiihai bolo agu daangada la-gi-iloo-ginaadou Au, laa-hongo tigidaumaha dela e-dudu mai gi-di-Au.

6:7  “I-di nadau ulu-adu gi tenua i Adam, digaula gu-oho dagu hagababa gi digaula.

6:8  Gilead la di waahale e-honu digau huaidu mo daaligi dangada.

6:9  Digau hai-mee-dabu le e-hai be-di buini gau gaiaa dela e-bala hagammuni e-tali tangada. I-hongo hogi di ala dela e-hana gi-di gowaa dabu i Shechem, digaula e-daaligi dangada. Digaula e-haihai nia mee huaidu aanei e-daudali-hua nadau hiihai.

6:10  Au guu-mmada gi-di mee huaidu huoloo i Israel: Agu daangada guu-hai di huaidu e-dadaumaha gi-nia ada balu ieidu.

6:11  “Ge adu gi goodou, nia daangada o Judah, Au dagu madagoaa i-golo e-hagaduadua goodou labelaa i godou mee ala e-haihai.

Chapter 7

7:1  “Nia madagoaa huogodoo ala ma-ga-hiihai-iei Au bolo e-haga-humalia agu daangada Israel mo-di hai digaula gi-haadanga lamalia labelaa, gei agu mee e-gidee-Au la-go nadau hangahaihai huaidu ala e-hai. Digaula e-hagadau halahalau ginaadou, e-oho ga-ulu gi-lodo nia hale, e-gaiaa nia daangada i-hongo nia ala.

7:2  Ma hagalee modongoohia-ginaadou bolo Au ga-hagamamaanadu nia mee aanei huogodoo. Nia hala digaula e-haganiga digaula, gei Au e-deemee di-hagalee mmada gi-nia maa.”

7:3  Dimaadua ga-helekai, “Nia daangada e-halahalau di king mo ana gau aamua gi nadau haganoho hai-mee huaidu.

7:4  Nia daangada huogodoo e-hagi-aga dangada ge hagalee manawa-dahi. Nadau dee-hiihai e-ulaula be-di ahi i-lodo di mee-dunu-mee dela e-hai haga-humalia go tangada hai-palaawaa gi-togomaalia gi-di dunu nia palaawaa.

7:5  Di laangi di budu o-di king, digaula guu-hai di king mo ana gau aamua gi-libaliba huaidu i-nia waini.

7:6  Uaa, digaula e-ulaula be-di mee-dunu-mee i-nadau mamaanadu hai-huaidu. Di waalooloo di boo nadau hagawelewele e-buu, ge luada gu-ulaula damana.

7:7  “I-lodo hua di welengina o nadau hagawelewele, digaula gu-daaligi nadau dagi gii-mmade. Nadau king la-gu-hagadau dadaaligi ginaadou guu-mmade, gei tangada e-dahi ne-dalodalo-mai gi-di-Au i-di hagamaamaa ai.”

7:8  Dimaadua ga-helekai, “Nia daangada Israel e-hai be nia palaawaa ne-dunu di baahi hua e-dahi. Digaula e-gana gi nnenua llauehe ala i-nadau baahi,

7:9  ge de-iloo bolo nadau gana gi digau henua-gee guu-hai ginaadou gi-paagege. Nadau laangi la-gu-hoohoo ga-odi ge digaula e-de-iloo.

7:10  Di hagamuamua digau Israel e-hai baahi gi digaula. Ma e-aha maa nia mee huogodoo la-guu-hai, gei digaula digi loomoi gi-muli gi-di-Au, go Dimaadua go di-nadau God.

7:11  Israel e-heehee be-di mwuroi boiboi: matagidagi digaula ne-gahi Egypt bolo e-hagamaamaa ginaadou, nomuli gaa-llele gi Assyria!

7:12  Gei Au gaa-holo dagu hele e-kumi digaula be nia manu mamaangi. Au ga-hagaduadua digaula gi-nia hala ala ne-hai go digaula.

7:13  “Digaula gu-huaidu ang-gi ginaadou! Digaula gu-diiagi Au, gu-hai-baahi mai-gi-di-Au. Digaula ga-mooho gi-daha. Au ne-hiihai belee haga-mouli digaula, ge nadau daumaha mai gi-di-Au la-guu-hala.

7:14  Digaula hagalee dalodalo-aga i-lodo nadau manawa hagatau, gei digaula ne-haga-hinga-hinga ginaadou gi-lala ga-wwolowwolo gadoo be nia haihai digau bouli ala e-hai. Digaula ma-ga-dalodalo i-nia huwa-laagau mono waini, digaula e-duuduu nadau gili be digau bouli. Digaula la digau e-hai-baahi-mai!

7:15  Ma e-aha maa Au dela ne-madamada humalia i digaula gi-tomo-aga gaa-hai digaula gi-maaloo, digaula ne-hai-baahi-mai gi-di-Au.

7:16  Digaula e-hulihuli gi-daha mo Au gi-di god dela ono mogobuna ai. Digaula hagalee hagadagadagagee ginai be-di maalei biga. Idimaa nadau dagi e-hagamuamua, digaula gaa-mmade haga-huaidu, ge digau Egypt ga-gadagada gi digaula.”

Chapter 8

8:1  Dimaadua ga-helekai, “Goodou ili-hia di buu! Nia hagadaumee gu-mmaangi-mai gi dogu henua gadoo be nia manu-‘eagle’. Agu daangada gu-haga-hai-gee di hagababa dela ne-hai ko-Au gi digaula, ge gu-hai-baahi gi agu agoago.

8:2  Ma e-aha maa digaula e-gahi Au bolo di-nadau God, ge e-hai bolo ginaadou nia daangada ni-aagu, ge e-iloo-ginaadou Au,

8:3  digaula guu-kili gi-daha di mee dela e-humalia. Mai i-di-nadau hai di mee deenei, gei nadau hagadaumee ga-waluwalu digaula.

8:4  “Agu daangada gu-hilihili nadau king, gei ne-bida hai-hua di hai deenei. Digaula guu-dongo nadau dagi laa-daha mo dagu haga-mogobuna. Digaula ne-kae nia silber mo nia goolo, gaa-hai nia ada-balu-god e-hai ginaadou gi-mooho gi-daha.

8:5  Au e-de-hiihai huoloo gi-di kau-daane goolo dela e-daumaha ginai nia daangada di waahale Samaria. Au e-hagawelewele huoloo gi digaula. E-waalooloo behee go di-nadau dadaumaha gi nia ada-balu god?

8:6  Ma tangada Israel dela ne-hai di ada-god ge di-maa hagalee-loo di god donu! Di kau-daane goolo dela e-daumaha ginai i Samaria la-ga-haga-mooho hagaligiligi!

8:7  Digaula ma-gaa-dogi di madangi, digaula gaa-hadi di madangi gaudogi! Di gowaa dogi ‘wheat’ dela hagalee huwa, le e-deemee di hai ana palaawaa. Ge di-maa gaa-huwa, digau mai-daha gaa-gai nia maa.

8:8  Israel guu-hai be nnenua ala i-golo, gu-balumee be-di baalanga mooho.

8:9  Nia daangada Israel guu-bida haihai nadau hiihai, e-hai gadoo be nia manu-‘donkey’ mmaadagu lodo-geinga. Digaula e-halahala nadau hagamaamaa mai Assyria, ge hui nia henua ala i-golo belee abaaba ginaadou.

8:10  Dolomeenei gei Au ga-hagabudu digaula gi-di gowaa e-dahi ga-hagaduadua digaula. Hoohoo-hua gei digaula gaa-mmae ma-ga-hagahuaidu go di king o Assyria.

8:11  “Di logo-mai nia gowaa dudu-tigidaumaha e-hai go digau Israel belee daa gi-daha nia hala digaula, gei nia gowaa hai nia hala e-logo-mai labelaa!

8:12  Au e-hihi gi-lala nia agoago e-logo ne-hai gi-nia daangada, gei digaula e-de-hiihai gi-nia maa bolo ma e-hai-gee, bolo ma nia mee mai-daha.

8:13  Digaula e-hai-mai nadau tigidaumaha ge e-gai nia goneiga nia tigidaumaha. Gei Au go Dimaadua hagalee tenetene gi digaula, dolomeenei Au ga-maanadu nadau ihala, ga-hagaduadua digaula, ga-hagau digaula gi-muli gi Egypt!

8:14  “Digau Israel guu-hau nadau hale king, gei digaula gu-de-langahia tangada dela ne-hai ginaadou. Digau Judah guu-hau nadau waahale mau. Gei Au ga-hagau dagu ahi e-dudu nia hale king mo nadau waahale.”

Chapter 9

9:1  Nia daangada Israel, dugua godou haihai hagamiami budubudu-mee gadoo be digau bouli. Goodou guu-huli gi-daha mo di-godou God, gu-hagalee manawa-dahi gi Mee. Nia madagoaa huogodoo i-hongo tenua, goodou guu-hui goodou gi-di god Baal be nia ahina huihui nadau huaidina, ge gu-aloho nia huwa-laagau ala e-hagabau-gee-ai goodou bolo ne-hui goodou go mee.

9:2  Gei hoohoo-hua, gei goodou ga-hagalee dohu gi godou huwa-laagau mo nia lolo-olib, ge nia waini ga-hagalee.

9:3  Nia daangada o Israel ga-hagalee noho i-hongo tenua Dimaadua, gaa-hula gi-muli gi Egypt, gaa-gai nia meegai ala guu-bule go tadau haganoho i-lodo Assyria.

9:4  I-lodo nnenua o-nia daangada mai i-daha aalaa, digaula ga-deemee di-hai nadau tigidaumaha waini gi Dimaadua, be e-gaamai nadau tigidaumaha gi Mee. Nadau meegai ga-haga-gulugulua digau huogodoo ala e-gai nia maa, e-hai be nia meegai ala e-gai i-di madagoaa tangada made. Nia maa e-hai-hegau-hua e-haga-humalia nadau hiigai, hagalee kae be nia tigidaumaha gi-di Hale Daumaha Dimaadua.

9:5  Gei nia madagoaa ala guu-dugu bolo e-hai nia daumaha e-hagalaamua Dimaadua ma-ga-dau-mai, ma di-aha dela gaa-hai go digaula?

9:6  Di madagoaa haingadaa ma-ga-dau-mai, gei nia daangada gu-mamaawae gi-daha, digau Egypt ga-hagabudu-mai digaula, e-hagabudu digaula belee danu i Memphis. Nadau maluagina silber mo nia gowaa nogo tuu-ai nadau hale la-gaa-buni geinga mono laagau duduia.

9:7  Di madagoaa hagaduadua gu-dau-mai, go di madagoaa o-nia daangada gaa-kae nadau mee ala e-tau belee kae go digaula. Di hai deenei ma-gaa-hai, digau Israel ga-iloo di-maa. Goodou e-helekai boloo, “Soukohp deenei le e-boiboi. Taane deenei dela gu-haga-maaloo go God le e-dadaulia dono libogo.” Goodou e-de-hiihai huoloo mai gi-di-au, idimaa godou ihala la-gu-llauehe.

9:8  God ne-hagau-mai au be soukohp belee hagamodongoohia di haga-lliga gi ana daangada go digau Israel. Gei tei gowaa dela gaa-hana ginai au, goodou e-duuli au be-di manu mamaangi. I-lodo hogi di Hale Daumaha o God, nia daangada la nia hagadaumee ni soukohp.

9:9  Nadau mee ala e-hai e-huaidu huoloo, e-hai be nadau mee nogo hai i Gibeah. God ga-mamaanadu nadau ihala, ga-hagaduadua digaula.

9:10  Dimaadua ga-helekai, “Dogu daamada ne-gida Israel, e-hai be dagu gida nia golee-‘grape’ e-tomo i-hongo di anggowaa. Dogu daamada ne-mmada gi godou maadua-mmaadua, e-hai be dagu mmada gi-di laagau-‘fig’ ne-leu matagidagi. Di-nadau loomoi gi-di Gonduu Peor, digaula gu-daamada gu-daumaha gi-di god huaidu go Baal, gu-limalima-hua gu-gulugulua be nia god ala e-aloho-ai ginaadou.

9:11  Di aamua o Israel la-ga-maangi gi-daha be-di manu, gei digaula ga-hagalee haanau nadau dama, di ahina ga-hagalee hai dama labelaa.

9:12  Maa nei bolo digaula guu-hai nadau dama, Au gaa-lahi digaula gi-daha, hagalee dugu tangada e-dahi gi-mouli. Dogu madagoaa ma-ga-diiagi digau aanei, nia mee huaidu huoloo gaa-tale ang-gi digaula.”

9:13  Meenei Dimaadua, au e-mee di-mmada bolo nia dama digaula guu-kumi gu-daaligi gii-mmade.

9:14  Ma di-aha ga-dangidangi-adu ko-au gi-heia gi digau aanei? Heia nadau ahina gi-deemee di-hai nadau dama! Heia digaula gi-deemee di-haga-uu nadau dama!

9:15  Dimaadua ga-helekai, “Nadau haihai huaidu huogodoo ne-daamada i Gilgal. Au ne-daamada ne-de-hiihai gi digaula i-golo. Idimaa digaula guu-hai nia mee huaidu, Au ga-hagabagi digaula gi-daha mo dogu henua. Au ga-hagalee aloho i digaula, nadau gau aamua huogodoo gu-hai-baahi mai gi-di-Au.

9:16  Digau Israel e-hai be-di laagau gu-maangoo ono aga, ge hagalee huwa ono huwa-laagau. Digaula ga-hagalee hai nadau dama, gei maa nei bolo nia dama la-ga i-golo, gei Au ga-daaligi nia dama ala e-hiihai ginai digaula.”

9:17  Di God e-hai-hegau ginai au, la-gaa-kili gi-daha ana daangada, idimaa digaula digi hagalongo gi ana helekai. Digaula gaa-hai-hua digau e-heehee i-lodo nnenua.

Chapter 10

10:1  Digau Israel nogo hai be-di laagau-‘grape’ e-honu i-nia ‘grape’. Digaula ma-gaa-logo nadau maluagina, ge digaula ga-haga-tuu-aga gi-mada-logo nadau gowaa dudu-tigidaumaha. Nadau gowaa ma-gaa-logo ono meegai, ge digaula ga-haga-madamada gi-mada-humalia nia duludulu hagamadagu ala nogo daumaha ginai ginaadou.

10:2  Nia daangada ala nadau manawa huaidu e-hai gi-hagaduadua i nadau ihala dolomeenei. Dimaadua gaa-oho nadau gowaa dudu-tigidaumaha mo nadau duludulu haga-madagu.

10:3  Digau aanei ga-limalima-hua ga-helekai, “Gidaadou tadau king ai, idimaa gidaadou hagalee hagalaamua Dimaadua. Gei di king hogi e-hai dana aha mai gi gidaadou?”

10:4  Digaula e-haihai nadau balu helekai, e-haihai nadau hagababa hai-gee mo nia hagababa balumee gi nnenua ala i-golo. Nia hegau hai-donu guu-hai nnegau hai-gee, e-tomo-aga be nia geinga poisin i-lodo di hadagee gu-haga-maluu.

10:5  Nia daangada e-noho i-lodo Samaria la-ga-mmaadagu mo-di tangitangi gi-di ngala o di-nadau kau-daane goolo i Beth=Aven. Digaula mo digau hai-mee-dabu ala e-hai-hegau gi-di ada-mee deelaa la-ga-tangi i-di-maa. Digaula gaa-wwolo gi-nua i-di hagalee o-nia madamada o-di maa.

10:6  Di ada balu-god la-gaa-kae gi Assyria, e-hai di kisakis ang-gi di king aamua. Digau Israel la-ga-manawa paagege, ga-haga-langaadia i-di helekai hagamaamaa dela ne-daudali go digaula.

10:7  Di-nadau king gaa-lahi gi-daha be-di bida laagau i-hongo nia wai.

10:8  Nia gowaa daumaha i-hongo di gonduu Aven, di gowaa nogo daumaha digau Israel gi-nia balu-god, la-gaa-oho gi-daha. Nia laagau duduia mo nia geinga ga-tomo-aga laa-hongo nadau gowaa hai-tigidaumaha. Nia daangada gaa-wwolo gi-nia gonduu, “Hagammuni-ina gimaadou!” ge ang-gi nia gonduu lligi, “Uhia gimaadou!”

10:9  Dimaadua ga-helekai, “Nia daangada Israel digi dugua nadau hai hala mai gi-di-Au daamada mai di-nadau hai di hala i Gibeah, malaa, tauwa gaa-hai gi digaula i Gibeah.

10:10  Au ga-heebagi gi digau huaidu aanei ga-hagaduadua digaula. Nia henua llauehe gaa-buni e-hai-baahi gi digaula, gei digaula ga-hagaduadua i nadau ihala e-logo.

10:11  “Israel la-nogo hai be tamaa-kau dela gu-aago gi-humalia, gu-togomaalia ge hiihai e-hagadagadaga ana huwa-laagau palaawaa. Gei Au ne-hagamaanadu bolo e-wanga di mee aamo-mee gi-hongo di uwa madamada o-maa, gaa-hai a-mee gi-ngalua damana. Au guu-hai Judah gi-huudia di mee-geli gelegele, ge guu-hai Israel gi-huudia di mee haga-maluu gelegele.

10:12  Au gu-helekai gi digaula, ‘Goodou gii-bida hagamaluu-ina godou gowaa gelegele hoou, dogi-ina nia donu gaa-hadi nia huwa ala gaa-hai go di-godou aloho mai gi-di-Au. Deenei di madagoaa e-huli-mai-ai goodou gi-di-Au, go Dimaadua, gei Au ga-hanimoi ga-dui-adu nia hagahumalia.’

10:13  Gei goodou ne-dogi-hua godou mee huaidu, ga hadi ono huwa. Goodou guu-gai nia huwa ne-hai go godou kai dilikai. “Idimaa goodou gu-hagadagadagagee gi godou waga hongo-henua hai-dauwa mo godou gau-dauwa dogologo,

10:14  tauwa la-ga-hanimoi gi godou daangada, gei godou waahale abaaba mau-dangihi huogodoo ga-mooho. E-hai gadoo be-di laangi di king Shalman ne-oho di waahale Beth=Arbel, gei nia dinana mo nadau dama gu-mmade-mmade.

10:15  Deelaa di mee gaa-hai adu gi goodou, nia daangada o Bethel, idimaa goodou guu-hai nia mee huaidu giibeni. Tauwa ma-ga-daamada, gei di king o Israel gaa-made.”

Chapter 11

11:1  Dimaadua ga-helekai, “Di madagoaa o Israel nogo hai tamagiigi, gei Au nogo aloho i mee, ne-gahi-mai a-mee i Egypt be dagu dama-daane.

11:2  Di waalooloo o dogu gahigahi a-mee, le e-waalooloo gadoo be dana huli gi-daha mo Au. Agu daangada gu-tigidaumaha ang-gi Baal, ginaadou e-dudu nadau ‘incense’ gi-nia balu-god.

11:3  Ma ko-Au dela ne-hagawouwou digau Israel gi-di haele, ma ko-Au dela ne-haabai-aga digaula, gei digaula e-haga-de-iloo-ginaadou Au dela nogo benebene ginaadou.

11:4  Au ne-dagi-mai digaula gi-di-Au i-di manawa-dumaalia mo-di manawa-aloho. Au ne-dahi-aga digaula loo gi-nua, gi-tale-loo i ogu gauwae, ga-hagahaa-ia loo gi-lala, ga-haangai digaula.

11:5  “Gei digaula e-buhi hua igolo di-nadau huli-mai gi-di-Au, malaa, digaula e-hai gii-hula labelaa gi-muli gi Egypt, gei-ogo Assyria gaa-dagi ginaadou.

11:6  Tauwa damana gaa-dau i nadau waahale, gaa-oho nia bontai o nadau abaaba, ge e-daaligi agu daangada i-di nadau daudali-hua go nadau hiihai.

11:7  Digaula gu-mau-hua di-nadau huli gi-daha mo Au. Digaula gaa-hai-hua digau e-noho tangitangi i nadau mee ala e-aamo i nadau nua le e-daamaha, gei deai tangada e-daa di-maa gi-daha mo nadau nua ai.

11:8  “Israel, dehee dagu hai dela gaa-mee-ai Au di-kili goodou gi-daha? Dehee dagu hai dela gaa-mee-ai di-diiagi goodou? E-hai behee, Au e-mee di-daaligi goodou hagahuaidu, be dagu hai dela ne-hai gi Admah? Be e-hai-adu gi goodou be dagu hai dela ne-hai gi Zeboiim? Dogu manawa hagalee dugu Au gi-heia nia mee aanei, i dogu aloho i goodou le e-damanaiee huoloo.

11:9  Au hagalee hagaduadua goodou ma-ga-hagawelewele-iei Au, gei Au hagalee daaligi labelaa Israel, idimaa, Au go God, Au hagalee tangada dangada. Au go di God Hagamadagu dela e-noho i godou baahi. Au hagalee haneia gi goodou mo dogu hagawelewele.

11:10  “Agu daangada la-ga-daudali Au i dogu madagoaa ma-ga-ngoloolo be-di laion ang-gi nadau hagadaumee. Digaula ga-loomoi gi-di-Au hagalimalima mai baahi dai.

11:11  Digaula ga-loomoi i Egypt, hagalimalima gadoo be nia manu mammaangi, ge mai i Assyria gadoo be nia mwuroi. Au ga-laha-mai labelaa digaula gi nadau guongo. Au, go Dimaadua ne-helekai.”

11:12  Dimaadua ga-helekai, “Digau Israel gu-daabui Au gi nadau dilikai mo nadau halahalau-dangada, gei digau Judah e-hai-baahi hua igolo mai gi-di-Au, go di God manawa-dahi ge haga-madagu.

Chapter 12

12:1  “Nia mee huogodoo digau Israel e-hai mai luada gaa-dae gi-di boo e-balumee-hua ge haga-mooho mee. Di hai mee huaidu mo-di ngalungalua hagamuamua la-gu-llauehe-mai i nadau baahi. Digaula e-hai nadau hagababa gi Assyria mo-di huihui-mee gi Egypt.”

12:2  Dimaadua la dana hai e-hai-baahi gi Judah, Mee e-hagaduadua digau Israel gi nadau hai ala e-ngalungalua-ai. Mee gaa-tala di hui gi digaula i nadau mee ala ne-hai.

12:3  Jacob go di-nadau damana madua nogo ngalungalua haingadaa dalia dono duaahina go Esau nau madagoaa nogo i-lodo tinae di-nau dinana. Dono madagoaa ne-tomo-aga, gei mee gu-heebagi gi God.

12:4  Mee gu-heebagi gi tangada-di-langi gu-maaloo. Mee gaa-dangi ga-madau dono hagahumalia. God ne-hanimoi gi tadau damana go Jacob i Bethel, ga-helekai gi mee.

12:5  Deenei la-go Dimaadua, go God di Gowaa Aamua, go Yihowah go di ingoo dela belee daumaha ginai.

12:6  Dolomeenei, goodou go nia hagadili o Jacob, hagadonu-ina di-godou God, lloomoi gi-muli gi Mee. Goodou gi-manawa-dahi mo-di hai mee donu, mo-di tali maalia di-godou God.

12:7  Dimaadua ga-helekai, “Nia daangada Israel la-hagalee donu, e-hai be digau Canaan. Digaula e-aloho i-di-nadau halahalau nadau gau huihui-mee gi nadau pauna hai-gee.

12:8  Digaula e-helekai boloo, ‘Gidaadou gu-maluagina. Gidaadou guu-hai tadau maluagina damanaiee. Gei deai tangada e-hai bolo gidaadou ne-maluagina-hua hala.’

12:9  Gei Au, go Dimaadua di-godou God, dela ne-laha-mai goodou gi-daha mo Egypt, Au gaa-hai goodou gii-noho labelaa i-lodo nia hale-laa, gadoo be dogu hanimoi gi goodou i-lodo di anggowaa.

12:10  “Au gu-helekai gi agu soukohp, guu-wanga nia hagagida e-logo gi digaula; Au guu-wanga agu hagailoo gi agu soukohp bolo gi-haga-iloo nnelekai hagalliga.

12:11  Gei nia ada balu-god e-daumaha ginai digaula i Gilead, ge digau ala e-daumaha gi-nia maa la-gaa-mmade. Nia kau-daane e-tigidaumaha-ai i Gilgal, ge nia gowaa hai-tigidaumaha i-golo la-gaa-hai nia hagabae hadu i-hongo nia gowaa maalama.”

12:12  Tadau damana-madua go Jacob guu-lele gi Mesopotamia. Mee gu-ngalua gi tuai daane, gu-madamada humalia i-nia siibi a-maa bolo e-hai dono lodo.

12:13  Dimaadua gu-hagau dana soukohp belee laha-mai gi-daha digau Israel mo-di hai hege i Egypt, ge nogo madamada humalia i digaula.

12:14  Digau Israel guu-hai Dimaadua gi-hagawelewele gu-haga-manawa-gee a-Mee. Digaula e-humalia-hua e-mmade gii-tau gi nadau ihala. Dimaadua ga-hagaduadua digaula i-di-nadau haga-manawa-gee a Mee.

Chapter 13

13:1  I-lodo di madagoaa gu-doo gi-daha, di madagoaa di madawaawa Ephraim ma-ga-helekai, gei nia madawaawa Israel ala i-golo gu-mmaadagu. Digaula e-mmada gi Ephraim ga-hagadagadagagee gi mee. Gei nia daangada di madawaawa deelaa gu-ihala i-di nadau daumaha gi-di balu god go Baal, gei digaula gaa-mmade i-di nadau hai deenei.

13:2  Digaula ga-haihai-hua nadau ihala e-hai nadau ada-mee baalanga e-daumaha ginai, nia ada-mee silber ne-hai go nia daangada gi nadau hagamaanadu mo nadau lima. Gei digaula ga-helekai, “Heia nia tigidaumaha gi digaula!” Nia daangada e-mee di-hongi nia ada-mee aalaa behee, go nia ada damaa-kau!

13:3  Malaa, nia daangada aanei la-ga-nggala ga-hagalee be nia wai ala e-maa gi-daha i-di luada o-di laangi. Digaula gaa-nngala be nia geinga e-ili gi-daha go di madangi i-di gowaa hili-mee, e-hai be nia huiahi e-buu gi-daha mai di bongoo di hale.

13:4  Dimaadua ga-helekai, “Ma ko-Au go Yihowah go di-godou God, dela ne-laha-mai goodou gi-daha mo Egypt, deai di-godou God i-daha mo Au ai. Ko-Au modo-go-Au go di-godou Dangada Hagamouli.

13:5  Au nogo madamada humalia i goodou nogo i-lodo di anggowaa maangooakii.

13:6  Gei di-godou dau-hua i-lodo tenua humalia, goodou ga-miami ga-maaluu, gaa-lawa ga-hagamuamua, ga-de-langahia-e-goodou Au.

13:7  Malaa, gei Au ga-heebagi-adu gi goodou gadoo be-di laion. Au gaa-dogo hagammuni i taalinga o godou ala, e-talitali goodou gadoo be-di ‘leopard’.

13:8  Au ga-daaligi goodou gadoo be-di ‘bear’-ahina dela ne-nngala ana dama, ga-hahaahi goodou gi-mahaahaa. Au gaa-gai goodou i-di gowaa hua dela ne-kumi-ai goodou gadoo be-di laion, gaa-oho goodou haga-ligiligi gadoo be-di manu lodo-geinga.

13:9  “Digau Israel, Au gaa-hai-loo gi-daaligi goodou, malaa, koai dela gaa-mee di-hagamaamaa goodou?

13:10  Goodou gu-dangidangi e-hiihai di-godou king e-dagi goodou mo ono ehoo hagamaamaa, malaa, dehee di hai digaula gaa-mee di haga-mouli di-godou henua?

13:11  Au gu-gowadu godou king i-lodo dogu hagawelewele, gei Au gaa-daa digaula gi-daha mo goodou i-lodo dogu hagawelewele damanaiee.

13:12  “Di huaidu o Israel mo nadau mee hala ala nogo-hai la-guu-hihi gi-lala, ge di beebaa deelaa di mee e-benebene hagahumalia.

13:13  Digau Israel di-nadau madagoaa humalia i-golo belee haga-mouli ginaadou, gei digaula hagalee kae di-maa. Digaula e-boiboi gadoo be-di tama dela belee haanau-mai gei e-buhi di ulu-mai gi-daha mo tinae dono dinana.

13:14  Au hagalee daa-mai nia daangada aanei gi-daha mo-di gowaa o digau mmade, be e-duuli digaula gi-daha mo-di mogobuna o-di made. Di made, gaamai au magi huaidu! Tenua o digau mmade-nei, gaamai dau mee oho gowaa! Idimaa, Au gu-deai dogu aloho i digau aanei ai.

13:15  Au e-de-hei-e-Au ma Israel ma-ga-tomo-aga gadoo be nia geinga o lodo henua, gei Au ga-haga-mmaa goodou gi-daha, gadoo be-di madangi welengina e-gono-ia i dua i-di anggowaa, e-haga-maangoo nadau monowai uwa-aga mono monowai geli, gei e-haga-mmaa gi-daha nia mee huogodoo ala e-hagalabagau.

13:16  Samaria le e-hai-loo gii-kae di hagaduadua, i mee dela gu-hai-baahi mai gi-di-Au. Ana daangada le e-mmade-hua i-lodo tauwa, gei nadau dama ga-kilikili go nadau hagadaumee gi-hongo di gelegele, gei nia ahina hai-dama ga-hahaahi nadau dinae.”

Chapter 14

14:1  Goodou go digau Israel, huli gi-muli, lloomoi gi Dimaadua go di-godou God. Godou huaidu la-guu-hai goodou gi-dugidugi godou wae gi-hingahinga.

14:2  Lloomoi gi-muli gi Dimaadua, tigidaumaha gi Mee i talodalo deenei: “Meenei Dimaadua, dumaalia-mai gi gimaadou i madau huaidu, hagalongo gi-di-madau dalodalo, gei gimaadou ga-hagaamu do ingoo be di-madau hagababa dela guu-hai.

14:3  Assyria e-deemee-loo di-benebene gimaadou, gei nia hoodo o tauwa le e-deemee di duuli gimaadou. Gimaadou ga-hagalee helekai labelaa gi-nia balu-god bolo digaula la-go madau god. Meenei Dimaadua, haga-gila-ina-aga do manawa-aloho mai gi gimaadou, ala e-hai be nia dama nadau damana ai.”

14:4  Dimaadua ga-helekai, “Au ga-laha-mai labelaa agu dama. Au ga-aloho i digaula aga i-lodo dogu manawa hagatau, gei ga-hagalee hagawelewele gi digaula.

14:5  Au ga-hagahumalia digau Israel, gadoo be-di uwa dela ma-gaa-doo-iha gi-hongo tenua maangoo. Digaula ga-moholoholo be nia akai, nia aga digaula ga-mau-dangihi gadoo be nia aga o nia laagau-‘cedar’ o Lebanon.

14:6  Digaula ga-mouli i-di mouli hoou, ga-madamada gadoo be nia laagau-olib. Digaula gaa-kala hogi, gaa-hai hogi labelaa be nia laagau-‘cedar’ o Lebanon.

14:7  Gei digaula gaa-noho labelaa i-lala ogu madamada humalia. Digaula gaa-dogi nadau haga-dili, gaa-huwa-logo gadoo be-di gowaa dogi waini. Digaula gaa-tomo, gaa-dele ono longo gadoo be nia waini o Lebanon.

14:8  Digau Israel ga-hagalee hai-hegau labelaa gi-nia balu-god, gei Au ga-hagagila nadau dalodalo ga-benebene digaula. Au ga-haga-malu digaula, gadoo be-di laagau-‘pine’ tomo e-hai ono lau-laagau humalia. Ma ko-Au dela e-hidi-mai iei nadau maluagina huogodoo.”

14:9  Digau kabemee le e-hai gi-iloo-ginaadou nia mee aanei e-hihi i ginei, mo-di hagalabagau-ina nia maa. Nia ala o Dimaadua le e-donu, e-hula-ai digau ala e-hai di tonu, gei digau huaidu le e-hingahinga i-nia maa gaa-too gi-lala, idimaa, digaula hagalee e-daudali nia maa.