LinVB - Hosea

Chapter 1

1:1  Maloba Yawe alobaki na Ozea, mwana wa Beri, o eleko Ozia, Yotam, Akaz na Ezekia bazalaki bakonzi ba Yuda, mpe o eleko Yeroboam, mwana wa Yoas, azalaki mokonzi wa Israel.

1:2  Ntango Yawe abandi koloba na Ozea, alobi na ye boye : « Kende ko­kamata mwasi alingi kosala bo­ndumba, abotela yo bana na bo­ndumba, mpo bato banso ba ekolo bakomi kosala bondumba na bokimi Yawe. »

1:3  Ozea akei kobala Gomer, mwana wa Diblayim. Gomer azwi zemi mpe aboteli ye mwana mobali.

1:4  Yawe alobi na Ozea : « Pesa mwana nkombo Yizreel, mpo etikali moke ’te natumbola libota lya Yeku, mpo asopaki makila ma Yizreel, mpe nasukisa bokonzi bwa libota lya Israel.

1:5  Mokolo mona nakobuka litimbo lya Israel o lobwaku la Yizreel. »

1:6  Mwasi akweli zemi lisusu, aboti mwana mwasi. Yawe alobi na Ozea : « Pesa mwana nkombo ‘Mawa te’, mpo banda lelo nakolinga libota lya Israel lisusu te mpe nakolimbisa bango te.

1:7  Kasi nakoyokela libota lya Yuda mawa mpe nakobikisa lya­ngo na bokasi bwa ngai Yawe, Nzambe wa bango. Nakobikisa Yuda na litimbo te, na mopanga te, na bitumba te, na farasa to na bato ba farasa te. »

1:8  Ntango mwasi alongoli Lo-Rukama o mabéle, akweli zemi lisusu mpe aboti mwana mobali.

1:9  Yawe alobi : « Pesa ye nkombo ‘Bazali bato ba ekolo ya ngai te’ ; mpa­mba te, bozali ekolo ya ngai te, mpe ngai nazali Nzambe wa bino te. »

Chapter 2

2:1  Bana ba Israel bakozala ebele lokola zelo o libongo lya mbu ; moto moko ndakoki kotanga ba­ngo te. Bakotika koloba na bango : « Bozali ekolo ya ngai te. » Bakotanga bango ‘Bana ba Nza­mbe wa bomoi’.

2:2  Bato ba Yuda na bato ba Israel bakosangana lisusu, bakopono mokonzi se moko mpe bakoleka mingi o mokili, mpo mokolo mwa Yizreel mokozala mokolo monene.

2:3  Loba na bandeko babali ba yo : ‘Ekolo ya ngai’, mpe na bandeko basi ba yo : ‘Mwa­si wa bolingo’.

2:4  Bofunda mama wa bino, bosambisa ye, mpo azali mwasi wa ngai lisusu te, mpe ngai nazali mobali wa ye lisusu te. Alongola bilembo bya ekobo o elongi ya ye, mpe bilembo bya bokali o bontolo bwa ye.

2:5  Soki te, nakolongola ye bilamba binso o nzoto, atikala bolumbu lokola babotaki ye. Nakotika ye mpamba lokola eliki, nakokomisa ye lokola mabelé makauka, mpe nakotika ye akufa na mposa ya mai.

2:6  Nakoyokela bana ba ye mawa soki te, mpo bazali bana ba bondumba.

2:7  Ya solo, mama wa bango asali bo­ndumba, oyo aboti bango amisambwisi ; alobaki : « Nakolanda bamakango ba ngai, bakopesa ngai bilei na mai ma bomeli, bakokabela ngai bilamba, mafuta na masanga. »

2:8  Yango wana nakokangisa nzela ya ye na nzube, nakozinga ye na efelo mpo ’te ayeba nzela lisusu te.

2:9  Akoluka bamakango ba ye, akozwa bango te, akolanda bango, kasi akokutana na bango te. Bongo akoloba : « Nakozongela mobali wa ngai wa yambo, zambi kala nazalaki malamu, sikawa nakomi na mpasi. »

2:10  Ayebaki te ’te ngai moto nazalaki kopesa ye fufu ya mampa, vino na mafuta ma sika. Nazalaki kopesa ye palata na wolo, nzokande atuli na yango bikeko bya ba-Baal.

2:11  Yango wana soko eleko ekoki nakobotolo ye fufu ya mampa na mpe vino ya sika, nakobotolo ye bilamba napesaki ye, bizalaki kozipa bolumbu bwa ye.

2:12  Nakoyokisa ye nsoni o miso ma bamakango ba ye, moto moko te akobikisa ye o maboko ma ngai.

2:13  Nakosilisa bisengo bya ye binso, nakobebisa biyenga bya ye bya nsuka ya sanza, mikolo mya Sabato na mpe biye­nga binene binso.

2:14  Nakobebisa nzete ya ye ya vino mpe ya figi, iye afundaki na yango : « Nasombi yango na mosolo mwa bamakango ba ngai. » Nakobongola nzete ina nzete ya zamba, nyama ya zamba ikolia yango.

2:15  Nakosambisa ye mpo ya mikolo miye akumisaki ba-Baal, ntango azalaki kotumbela bango mpaka ya malasi. Azalaki kolata mpete o maboko mpe mayaka o nkingo mpo ya kolanda bamakango ba ye, mpe azalaki kobosana ngai ! Maloba ma Yawe.

2:16  Sikawa nakobembe ye, nakokamba ye o eliki, esika nakoloba na ye maloba ma bolingi.

2:17  Kuna nakozongisela ye bilanga bya vino, nakokomisa lobwaku la Akor nzela ya elikya ; kuna akondimela ngai lokola o ntango ya bolenge, ntango nabimisaki ye o Ezipeti.

2:18  Yawe alobi boye : Mokolo mona okobenga ngai ‘Mo­bali wa ngai’, okobenga ngai lisusu ‘Baal wa ngai’ te.

2:19  Nakolongola o monoko mwa ye nkombo ya ba-Baal, akotanga nkombo ya bango lisusu te.

2:20  Mpo ya bango, nakoyokana mokolo mona na nyama ya zamba, na ndeke ya likolo mpe na nyama ikolandaka o mabelé ; nakobuka matimbo mpe mimpa­nga mya bitumba, mpe nakosala ’te bafanda na boboto.

2:21  Okozala lisusu mwasi wa ngai seko, na bosembo mpe na bosolo, na bolingi mpe na boboto.

2:22  Okokoma mwasi wa ngai wa lobokó, bongo okoyeba Yawe malamu.

2:23  Yawe alobi boye : Mokolo mona nakondimela likolo, mpe likolo likondimela nse.

2:24  Mabelé makobota mbuma, mampa, vino na mafuta ma sika, biloko biye balingi o Yizreel.

2:25  Ngai moko nakolona mboto o mabelé, nakoyokela Lo-Rukama mawa, nakoloba na Lo-Ami : « Ozali ekolo ya ngai », mpe ye akotanga ngai ‘Nzambe wa ngai !’

Chapter 3

3:1  Yawe alobi na ngai : « Kende lisusu mpe lakisa bolingi na mwasi wa bokali, oyo akolingaka babali basusu, lokola Yawe akoli­ngaka bana ba Israel, ata balingi ba­nzambe basusu mpe bakobonzelaka bango minkate mya mbuma ya vino. »

3:2  Bongo nakei kokamata ye, nafuti mitako zomi na mitano mpe pipa isato ya loso.

3:3  Nalobi na ye : « Mikolo mingi okofanda penepene na ngai ; okosala bondumba te, okolinga mobali mosusu te, mpe ngai nakosala yo se bongo. »

3:4  Mikolo mingi bana ba Israel bakotikala bango moko : mokonzi te, moyangeli te, miboma te, etumbelo te, efod te, terafim mpe te.

3:5  Na nsima bana ba Israel bakozonga, bakoluka lisusu Yawe Nzambe wa bango, bakotosa Davidi mokonzi wa bango. Bakobondela Yawe mpe bakobanga ye. Mokolo mona bakolinga makabo ma ye.

Chapter 4

4:1  Bino bato ba Israel, boyoka liloba lya Yawe, mpo Yawe akosambisa bato ba ekolo ya ye. Bazali na bosolo te, na bolingi mpe te ; bato ba ekolo bayebi Nzambe lisusu te.

4:2  Bayebi se kolaya ndai ya lokuta mpe kokosa, koboma mpe koyiba, makambo ma bokali mpe bitu­mba ; mosala mwa bango se kosopa makila ma bato.

4:3  Yango wana ekolo ekomi na mawa, bato banso bazali kolela mpe balembi ; nyama ya mboka na ndeke izali na mpasi, ata mbisi ya mai izali kokufa.

4:4  Nzokande moto moko aluka komilongisa te, moto moko apalela moninga te ! Nakosambisa yo, nganga Nzambe.

4:5  Okotuta libaku na moi, elongo na yo profeta akokweya na butu ; nakosala ’te mama wa yo akufa.

4:6  Awa okoteyaka bato ba ngai te, makasi ma bango masili, mpo bayebi Mobeko lisusu te. Nakolongola yo o mosala mwa nganga Nzambe. Awa obosani mateya ma ngai, ngai mpe nakobosana bana ba yo.

4:7  Bango banso basali masumu, napesaki bango lokumu, sikawa nakosambwisa bango.

4:8  Bakomileisaka na masumu ma bato ba ngai mpe bakozwaka mosolo na mabe ma bango.

4:9  Banganga Nzambe bakozwa etu­mbu lokola bato basusu, nakosambisa bango mpo ya mabe basali, nakozongisela bango mabe ma bango.

4:10  Bakolia, kasi bakotonda te, bakosala bondumba kasi bakobota te, zambi batiki Yawe, bamipesi na bondumba.

4:11  Vino na lotoko ikobungisa bato mayele.

4:12  Bato ba ngai bakotunaka eteni ya nzete ya bango mpe bakolukaka kozwa eyano epai ya etapi ya nzete. Solo, bondumba bobungisi bango nzela, mpo ya bondumba babosani Nza­mbe wa bango.

4:13  Bakobonzelaka banzambe miboma o nsonge ya ngomba, bakotumbaka mpaka ya malasi o ngomba ike, o nse ya nzete ya wenge, ya kambala mpe ya sipresi, zambi bayoki elengi na mpio ya nzete yango. Yango wana bilenge basi ba bino bakosalaka bondumba mpe basi ba bana ba bino bokali.

4:14  Nakotumbola bana ba bino te mpo ya bondumba bwa bango, basi ba bana ba bino mpo ya bokali ya bango mpe te, mpo banganga Nzambe bakola­ndaka bandumba mpe bakobonzaka mabonza elo­ngo na bandumba ba tempelo ; bongo, awa bazangi mayele, bato banso bakomi kobunga ! Likebisi ona Yuda

4:15  Soko yo, Israel, olingi kosala bo­ndumba, Yuda asala bwango te ! Okende o Gilgal te, obuta ngomba Bet-Aven te, olaya ndai te ‘na nkombo ya Yawe wa bomoi’.

4:16  Solo, Israel azali lokola ngombe mwasi etomboki. Ndenge nini Yawe aleisa ye sikawa lokola akoleisaka mpata o esobe ?

4:17  Bato ba Efraim bamipesi na bikeko, tika bango basala.

4:18  Soko basilisi kolangwa babandi kosala bondumba, bayangeli bayebi bobele kosa­mbwisa ekolo.

4:19  Mokolo moko mompepe mokolimwisa bango, bakoyoka nsoni mpo ya miboma mya bango.

Chapter 5

5:1  Banganga Nzambe, boyoka, bato ba libota lya Israel, bokeba, bato ba ndako ya mokonzi, botia matoi ! Bosengelaki kosamba na bose­mbo, kasi o Mispa bokomi motambo mpe botandi monyama o Tabor.

5:2  Bato babe, botimolaki libulu linene o Sitim, nakopesa bino banso etumbu.

5:3  Nayebi Efraim malamu mpenza ; Israel abombami o miso ma ngai te. Ya solo, Efraim asali mpo bosoni, Israel akomi na mbindo.

5:4  Mpo ya mabe ma bango bakoki kozonga epai ya Nzambe wa bango te. Mposa ya bondumba ekoteli ba­ngo makasi, bayebi Yawe soki moke te.

5:5  Israel akosamba mpo ya lolendo la ye : bango na Efraim bakwei mpo ya masumu ma bango ; Yuda mpe atuti libaku.

5:6  Na mpata mpe na ngombe bakoya koluka Yawe, kasi bakozwa ye te : asili alongwi o ntei ya bango !

5:7  Bawangani Yawe, baboti bana na bondumba ; mokolo mwa sanza ya sika bakobebisa bilanga bya bango.

5:8  Bolelisa liseke o Gibea, mondule o Rama, boyokisa migango mya etumba o Bet-Aven, zambi etumba ebimeli yo, Benyamin.

5:9  O mokolo mwa etumbu bakobebisa Efraim. Nazali koyebisa mabota ma Israel bitumbu bikokwela ye.

5:10  Bakonzi ba Yuda batindisi ndelo ya mabelé ma bango, nakokitisela bango nkanda ya ngai lokola mai.

5:11  Efraim anyatemi, anyokwami mi­ngi, mpo asepelaki na bolandi maka­mbo ma lokuta.

5:12  Ngai moko nakopesa Efraim bokono bwa mapaka, libota lya Yuda mpasi ya mino.

5:13  Efraim asili amoni bokono bwa ye, Yuda amoni mpota o nzoto ya ye. Efraim akendeki epai ya Asur, Yuda atindaki bantoma epai ya mokonzi monene ; kasi ye akokoka kosilisa bokono bwa yo te, mpe kokanga mpota ya yo te.

5:14  Solo, nakosala lokola nkosi o Efraim, mpe lokola mwana wa nkosi o libota lya Yuda ; nakokatakata bango, mpe nakokende na biloko nazwaki ; moto moko te akobotolo ngai bya­ngo.

5:15  Solo, nakozonga o ndako ya ngai kin’o ntango bakondima bobe bwa bango mpe bakoluka elongi ya ngai ; o kati ya mpasi bakobanda koluka ngai.

Chapter 6

6:1  « Yakani, tozonga epai ya Yawe. Ye azokisi biso, sikawa akobikisa biso ; abeti biso, sikawa akokanga mpota ya biso.

6:2  Nsima ya mikolo mibale akozo­ngisela biso bomoi, mokolo mwa misato akotelemisa biso, mpe tokozala malamu o miso ma ye.

6:3  Tosala makasi mpo toyeba Yawe malamu. Akoya solo lokola botani bwa nto­ngo, boyei bwa ye bokozala lokola mbula, lokola mamio makokitela mabelé. »

6:4  Nzambe ayanoli : Nasala yo nini, Efraim ? Nasala yo nini, Yuda ? Bolingi bwa bino bozali lokola lo­ndende la ntongo, lokola mamio maye makolimwaka noki.

6:5  Nanyokoloki bango na maloba ma baprofeta, nabomaki bango na maloba ma monoko mwa ngai. Nasambisaki bango lokola mwi­nda mobimelaki bango.

6:6  Ngai nalingi bolingi, leka mabo­nza, nalingi ’te bondima Nzambe, leka miboma.

6:7  Kasi babebisi bondeko bwa ngai o Adam, bawangani ngai.

6:8  Galaad ezali engumba ya bato babe, etondi na makila masopani wana.

6:9  Lokola lingomba lya bayibi babo­mbami mpembeni ya nzela, banganga Nzambe bakobomaka ba­to o nzela ya Sikem. Tala makambo ma nsomo bakosalaka.

6:10  O Betel namoni makambo ma nsomo ; Efraim akosalaka bondumba, Israel akomikomisaka na mbindo.

6:11  Yuda, nakolengelele yo bilanga na mbuma ebele, mokolo nakobongisa makambo ma bato ba ngai.

Chapter 7

7:1  O ntango nakobikisa Israel, emononi ’te Efraim azangi bosembo mpe Samaria azali na motema mabe ; bazali bato ba lokuta : Bakokotelaka bato o ndako, o libanda bayibi bakongalaka.

7:2  Bakanisi o mitema ’te nabosani mabe ma bango. Misala mya bango mikangi bango sikawa, mimonisami o miso ma ngai te.

7:3  Bakosepelisaka mokonzi wa ekolo na mabe ma bango, bankumu bakondimaka bokosi bwa bango.

7:4  Bango banso bazali bato ba bokali, lokola etumbelo bapelisi, eye molambi wa mampa akole­ndisaka banda ntango aniki fufu tee nta­ngo mampa mavimbi.

7:5  Mokolo mwa eyenga ya mokonzi wa biso bakomelisaka bankumu masanga tee bakomi kobele ; ye moko akotandela baye baboyi Nzambe loboko.

7:6  Na mitema móto lokola etumbelo bakokanaka makambo ; na butu bakolalaka na nkanda, eye ekongala na ntongo lokola móto monene.

7:7  Banso motema móto lokola etu­mbelo bakosilisaka bazuzi ba bango. Bakonzi ba bango banso bakufi ; moko wa bango te abelelaki ngai !

7:8  Efraim akei kosangana na bikolo bisusu ; Efraim aulani na limpa lya sukali libeli se epai yoko.

7:9  Bauta basilisi bokasi bwa ye, kasi ye moko ayebi yango te. Nsuki mpembe ebimeli ye, kasi ayebi yango te.

7:10  Bakofunda Israel mpo ya lofundo la ye, alingi kozongela Yawe Nzambe wa ye te, ata na mana manso akoluka ye te.

7:11  Efraim azali lokola ebenga zoba ezangi mayele ; babyangaki ba-Ezipeti, bakendeki o Asur.

7:12  Kasi ata bapimbwi wapi, nakobwakela bango monyama mwa ngai, nakosukisa bango lokola ndeke ya likolo, nakokanga bango o esika bakosa­ngana.

7:13  Mawa na bango, mpo bakimi ngai mosika ! Banso bakokweya zambi bato­mbokeli ngai ! Nalingi kosikola bango, kasi bakobukelaka ngai lokuta !

7:14  Bakobelelaka ngai na motema mo­ko te, ntango bakomilelaka o matoko ma bango. Bakomizokisaka mpo ya kozwa mampa na vino, kasi bakotombokelaka ngai.

7:15  Ngai moto nateyaki mpe nalendisaki bango, kasi bazali se kokanela ngai.

7:16  Bakobondelaka Nzambe te, bazali lokola litimbo likobeteke malamu te. Bakonzi ba bango bakokufa na mopanga mpo ya maloba ma bango ma lofundo. Bakoseke bango mpenza o mokili mwa Ezipeti.

Chapter 8

8:1  Bobete mindule : Lokola engondo mabe makokwela ekolo ya Israel, mpo babuki bondeko nakataki na bango, mpe batosi mibeko mya ngai te.

8:2  Ata babeleli ngai : « Toyebi yo, Nzambe wa Israel »,

8:3  ba-Israel batiki nzela ya libiki, yango wana monguna akonyokolo bango.

8:4  Baponoki bakonzi, kasi batunaki ngai te, batiaki bayangeli, kasi bayebisaki ngai te. Basalaki bikeko na palata mpe na wolo ya bango, biye bisengeli kokufa.

8:5  E Samaria, naboyi ekeko ya yo ya ngombe, nayokeli yango nkanda ! Bakosengela na mikolo boni naino mpo ya kokoma peto ?

8:6  Moto wa Israel asalaki ekeko ena, esalemi se na moto, ezali nzambe te. Bakobuka ekeko ya ngombe ya Samaria.

8:7  Babengi mompepe, kasi bakozwa ekumbaki : matiti mazangi mbuma makobimisaka fufu te, mpe soko mabimisi ndambo ya mbuma bauta bato bakolia mampa mango.

8:8  Israel aliami solo, akomi lokola eloko eye bato ba bikolo bisusu baboyi.

8:9  Akendeki o Asur : mpunda ya zamba ekofandaka yango moko, kasi Efraim alukaki bamakango na mabonza.

8:10  Ata bakei kobondela bikolo bisusu na mabonza, ngai nakosangisa bango, kasi banso bakonyokwama na mokonzi wa bankumu.

8:11  Ba-Efraim batongi bitumbelo biike, bizalaki kobenda bango o nzela ya masumu.

8:12  Ata napesi bango mibeko nkoto mobimba, batali myango lokola miuti epai ya bampaya.

8:13  Bakobonzelaka ngai mabonza, bakoliaka nyama ya miboma mya bango, kasi Yawe asepeli na myango te. Akundoli mabe ma bango, mpe akopesa bango etumbu mpo ya masumu ma bango : bakozonga o Ezipeti !

8:14  Israel abosani Mozalisi wa ye mpe amitongeli ndako inene mpe kitoko ; Yuda atongi bibombamelo ebele. Kasi ngai nakotumba bingumba bya bango, móto mokosilisa ndako inene ya bango.

Chapter 9

9:1  Israel, osepela te, oyoka nsai te, lokola bikolo bisusu, mpo otiki Nzambe wa yo mpe okei kosala bondumba, olingi kolia mbuma ya mampa o bitutelo binso.

9:2  Mbuma ya etutelo mpe ya ekamelo ikoleisa yo te, mpe okosepela na vino ya sika te.

9:3  Okofanda o mokili mwa Yawe lisusu te. Efraim akozonga o Ezipeti, mpe o Asur akolia biloko mbi­ndo.

9:4  Kuna bakobonzela Yawe vino lisusu te, miboma mya bango mikosepelisa ye te, mikokomela bango lokola mampa ma lilaka, baye banso bakolia mango bakozala na mbindo. Bakolia mampa se mpo ya koleisa nzoto, kasi bakobonza mango o ndako ya Yawe te.

9:5  Bokosala nini o mokolo mwa eye­nga enene, o mokolo mwa eyenga ya Yawe ?

9:6  Awa bakimi o miso ma babebisi, Ezipeti akosangisa bango, bakokundama o Memfis. Matiti mabe makokola o esika babombaki palata ya motuya, nzube ikokola o esika bapikaki biema bya bango.

9:7  Israel ayeba ’te eleko ya etumbu eyei, mikolo mya kofuta mabe ma ba­ngo mikoki, Israel ayeba ! « Profeta abeli ligboma, moto wa bwanya akomi elema ! » Mpo ya mabe maike ma yo oto­mbokeli ngai makasi.

9:8  Profeta azali mokengeli wa Efraim, ekolo ya Nzambe ; bakotielaka ye mitambo o nzela inso, bakolandaka ye kin’o ndako ya Nzambe wa ye.

9:9  Babebi mpenza lokola o ntango ya Gibea : Yawe akobosana masumu ma ba­ngo te, akotumbola bango mpo ya mabe ma bango.

9:10  Nakutaki Israel lokola mbuma ya vino o eliki, bankoko bazalaki lokola mbuma ya liboso ya figi. Ut’o ntango bakomaki o Baal-Peor bamipesi na banzambe ba lokuta ; bamikomisi eloko ya nsomo lokola bikeko biye balingaki.

9:11  Nkembo ya Efraim ekokima lokola ndeke : bamama bakobota bana lisusu te, bakokwela mpe bakomeme zemi lisusu te.

9:12  Bana babali baye bakokola, nakobotolo bango naino bakole­nda te. Mawa na bango soko natiki ba­ngo !

9:13  Namoni ’te Efraim, lokola Tiro, elonami o mabelé malamu, kasi mokolo moko akosengela ko­tika bana mpo ’te babomama.

9:14  E Yawe, pesa bango… eloko nini okoki kopesa bango ? Sala ’te basi ba bango bakoka kobota te mpe konungisa mabéle te.

9:15  Mabe ma bango manso mamononoki o Gilgal, nabandi koyina bango bobele kuna. Awa basali mabe mingi, nakobengana bango o ndako ya ngai, nakolinga bango lisusu te, bakonzi ba bango banso bazali batomboki.

9:16  Efraim anyokwami, azwi etumbu, akomi lokola nzete minsisa mikauka, lokola nzete ekobota mbuma lisusu te. Ata baboti bana, nakosala ’te bakufa, baye bamemeki o mabumu ma ba­ngo.

9:17  Nzambe wa ngai akoboya bango, mpo batosaki ye te, bakokende koyengayenga o bikolo bisusu.

Chapter 10

10:1  Israel azalaki lokola elanga enene ya vino, ebotaki mbuma mingi mpenza. Awa mbuma ekomi mingi, bapusi kotonga bitumbelo bya sika. Ntango ekolo ekomi na biloko ebele, bazalaki mpe kotiela bikeko makembiseli maike.

10:2  Bazali na mitema mibale, sikawa bakofuta mabe ma bango ; Nzambemei akokweisa bitumbelo bya bango, akobuka bikeko bya bango.

10:3  Bakoloba : « Tozali na mokonzi te, zambi tokobangaka Yawe te. Mokonzi akoki nde kosalela biso ? »

10:4  Bakolobaka makambo kilikili, bakokataka bondeko mpe bakolayaka ndai ya lokuta ; kasi bakomisi bosembo lokola matiti ma ngenge, makokola o bisika basili kokata bilanga.

10:5  Ba-Samaria bakolenge o boso bwa ngombe ya Bet-Aven, bakosala lilaka mpo ya ngombe ; banganga Nzambe ba lokuta bakolela lokola, mpo bakambi nkembo ya yango mosika na bango !

10:6  Bakomeme ekeko ya ngombe o Asur, bakobonza yango na mokonzi monene. Yango ekoyokisa bato ba Efraim nsoni mpe ekosambwisa bato ba Israel.

10:7  Ekolo ya Samaria ebebi ! Mokonzi wa ye akomi lokola etapi ezali kotetwa o mai.

10:8  Bakoboma bikeko o ngomba ya Aven, biye bilakisi lisumu linene lya Israel. Nzube na matiti mabe ikokola o bitumbelo. Bitumbelo bikoloba na ngomba inene : « Bozipa biso ! », mpe na ngomba ike : « Bokwela biso ! »

10:9  Israel, ut’o Gibea obandaki kosala masumu, otiki makambo mana te, bongo etumba ekokwela bato babe o Gibea te ?

10:10  Nakoya kotumbola bango ! Bato ba bikolo bisusu bakoyokana ’te babundisa bango, mpo ya masumu mabale ma ba­ngo.

10:11  Efraim azali lokola ngombe emeseni na mosala mwa konika mbuma ya mampa ; nakotiela ye ekangiseli o nkingo kitoko ! Efraim abenda likalo, Yuda apasola mabelé, Yakob abongola mango na nka­nya.

10:12  Bolona mboto ya bosembo, bongo bokobuka mbuma ya bolingi ; bokata bilanga bya sika : ntango ya koluka Yawe ekoki kin’o mokolo akosopela bino mbu­la ya bosembo.

10:13  Mpo nini bolonaki mboto izangi bosembo, mpo nini bobukaki mbuma ya bokosi ? Mpo nini boliaki mbuma ya lokuta ? Mpo nini otiaki motema na bokasi bwa yo moko mpe na boike bwa basoda ba yo ?

10:14  Bakoyokisa bato ba yo migango mya etumba, banguna bakosilisa bibombamelo binso, lokola mokonzi Salman abebisaki Bet-Arbel, o mokolo mwa etumba, ntango banyataki bamama likolo lya bana ba bango.

10:15  Betel asali bino bongo mpo ya lisumu lya bino linene. Etani ntongo, mokonzi wa Israel akolimwa seko !

Chapter 11

11:1  Ntango Israel azalaki mwa­na, nalingaki ye, Ut’o Ezipeti nabengaki ye.

11:2  Ata nabengaki ye ndenge nini, akimaki ngai, abonzelaki ba-Baal mpe atumbelaki bikeko mpaka ya malasi.

11:3  Nzokande nalakisaki Efraim kotambola, nazalaki koyamba ye o maboko, kasi ayebaki te ’te nazalaki kobatela ye !

11:4  Nakambaki ye na boboto mpe na motema bolingi. Nazalaki lokola mobokoli wa ye mpenza, oyo amemi mwana mpe alalisi ye o lipeke ; nasunamaki epai ya ye mpo ya kopesa ye biloko bya kolia.

11:5  Sikawa akozonga o Ezipeti lisusu te, kasi Asur akozala mokonzi wa ye, mpo aboyaki kozongela ngai.

11:6  Na mimpanga bakobebisa bingu­mba bya ye. Bakobuka bikangeli bya bibo­mba­melo bya ye, bakoboma bato ba ye mpo bakanaki kosala mabe.

11:7  Bato ba ngai bakoboyaka ngai ; bakobengaka Baal, kasi akobikisa bango te !

11:8  Efraim, nakoki kotika yo te ; Israel, nakoki kobwaka yo te. Nasala yo lokola nasalaki na Adma, to lokola nasalaki na Seboyim ? Motema mwa ngai mokomi pete, mawa matondi o motema mwa ngai.

11:9  Nakosilisa nkanda ya ngai te, nakobebisa Efraim lisusu te, mpo nazali Nzambe, nazali lokola bato te. O ntei ya bino nazali Mosantu, nakoya epai ya bino na nkanda te.

11:10  Bakoya kolanda Yawe, ye akoganga makasi lokola nkosi, akoganga makasi mpenza, bato ba ye bakouta o Westi ba­kole­nge ;

11:11  bakolenge lokola ndeke mpe bakouta o Ezipeti, lokola bibenga bakouta o Asur, mpe nakofandisa bango o ndako ya bango. Maloba ma Yawe.

Chapter 12

12:1  Efraim alembisi ngai na makambo ma lokuta, bato ba Israel bazalaki kokosa ngai. Kasi Yuda alandi naino nzela ya Nzambe mpe atosi Mosantu wa ye.

12:2  Efraim akolukaka mompepe mi­ngi, akotikaka te kolanda mompepe mwa Esti ; mosala mwa ye, se kokosa mpe ko­nyokolo bato : akati bondeko na ba-Asur mpe akoyelaka ba-Ezipeti mafuta.

12:3  Yawe akokata likambo lya Yuda, akosambisa Yakob mpo ya ezalela ya ye, mpe akozongisela ye engebene na misala mya ye.

12:4  Ut’o libumu lya mama wa ye asilaki kokosa ndeko wa ye ; awa akomi mokolo, abundisaki Yawe.

12:5  Abundaki etumba na anzelu mpe alongaki ye ; alelaki mpe abondelaki ye. O Betel akutanaki na Nzambe, kuna Nzambe asololaki na ye.

12:6  Ye Yawe Nzambe wa bokasi bo­nso : nkombo ya ye, Yawe !

12:7  Yo okozonga mpo ya lisalisi lya Nzambe wa yo ; zala na bolingi mpe na bosolo, tia motema na Nzambe wa yo ntango inso.

12:8  Kanana asimbi emekeli ya bokosi o maboko, alingi kokosa bato.

12:9  Efraim alobi : « Nakomi moto wa nkita, nasangisi biloko ebele » ; o matomba ma ngai bazwi ngai na mabe moko te.

12:10  Ut’o Ezipeti nazali Yawe Nzambe wa yo, nakofandisa yo lisusu o biema, lokola o ntango tokutanaka.

12:11  Nakoloba na baprofeta, nakomonisa mamoni, nakoteyisa baprofeta na miulani.

12:12  Bato ba Galaad bazangi bosembo, maloba ma bango se ma lokuta. O Gilgal bakobonzaka miboma mya ngombe, yango wana bitumbelo bya bango bikokoma lokola mibondo mya mabanga o bilanga.

12:13  Yakob akimaki mosika o bisobe bya Aram ; Israel asalaki mosala mpo ’te aba­la mwasi, mpo azwa mwasi amikomisi mokengeli wa bibwele.

12:14  Yawe atindi profeta alongola Israel o Ezipeti, profeta moko azalaki kobatela ye.

12:15  Kasi Efraim atuki Nzambe mingi : Yawe akotuna ye mpo ya makila asopaki mpe akozongisela ye mabe manso asalaki.

Chapter 13

13:1  Ntango Efraim azalaki koloba, bato banso bayokaki nsomo. Azalaki moto monene o Israel, kasi abebaki mpo akumisi bikeko, mpe akufi.

13:2  Nzokande bakobi kosala masumu na bosali bikeko na bibende batuli o móto. Na mayele ma bango bakotulaka bikeko na mitako ; bizali se mosala mwa motuli. Bakolobaka : « Bobonzela banza­mbe mabonza ! » Bato bakokumbamelaka bana ba ngombe !

13:3  Yango wana bakozala lokola lo­ndende la ntongo, lokola mamio makolimwaka noki, lokola mpumbulu ya etutelo ekopimbwaka mosika, lokola molinga mokobimaka o mombonda.

13:4  Nzokande ut’o Ezipeti nazali Yawe Nzambe wa yo. Oyeba Nzambe mosusu te, bobele ngai, ozali na mobikisi mosusu te.

13:5  Ngai moto nayebaki yo o eliki, mokili moye mozanga mai.

13:6  Naleisaki bato ba yo mpe batondaki ; kasi awa balei malamu, bakomi na lolendo mpe babosani ngai.

13:7  Nakokoma na bango lokola nkosi, nakokenge bango lokola nkoi penepene na nzela.

13:8  Nakobimela bango lokola moko­mboso babotoli yango bana, nakokatakata ntolo ya bango ; nakolia bango mobesu lokola nko­si ekosalaka, nyama ya zamba ikosilisa bango.

13:9  Israel, tala obebi, okozwa lisalisi se epai ya ngai.

13:10  Wapi mokonzi oyo akobikisa yo ? Wapi bazuzi ba yo, baye olobaki : « Pesa ngai mokonzi na bayangeli » ?

13:11  Na nkanda napesi yo mokonzi, mpe nakolongola ye se na nkanda.

13:12  Nakokanisa mabe ma Efraim, nakobosana masumu ma ye te.

13:13  Mpasi ya kobota ekoyela ye sikawa, akobota mwana azangi mayele ; ekoki ntango ya kobota, mwana akobima te !

13:14  Nábikisa bango o mboka ya bawa ? Násikola bango mpo bakufa te ? E liwa, wapi malozi ma yo ? Mboka ya bawa, wapi bitumbu bya yo ? Miso ma ngai makolakisa ngolu lisusu te.

13:15  Ata azwi bomengo o kati ya ba­ndeko ba ye, mompepe mwa Esti mokoya, mpema ya Yawe ekouta o eliki, ekokaukisa maziba mpe bitima ; ekobebisa mokili mwa ye mpe biloko binso bya motuya.

Chapter 14

14:1  Samaria akofuta nyongo ya ye, mpo atombokeli Nzambe. Bakobomama na mopanga, bakonyata bana ba bango bake, bakopasola mabumu ma bamama bazali na zemi.

14:2  Israel, zongela Yawe, Nzambe wa yo, zambi mabe ma yo makweisi yo.

14:3  Kana mokano mwa kozongela Yawe, loba na ye : « Okolimbisaka masumu ma bato, mpe okondimaka makabo ma ba­ngo, tokobonzela yo ngombe mobali lisusu te, kasi makumisi ma biso.

14:4  Bato ba Asur bakobikisa biso te, tokobutela farasa ya etumba lisusu te ; eloko tosali na maboko ma biso tokotanga yango ‘Nzambe wa biso’ lisusu te. Yo moto okoyokelaka mwana etike mawa. »

14:5  Nakosala ’te aboya ngai lisusu te, nakolinga ye na motema moko ; nakoyokela ye nkanda lisusu te.

14:6  Nakosala na Israel lokola mamio ma ntongo ; Israel akokola lokola fulele kitoko, akozala na minsisa o mabelé, lokola nzete ya Libano,

14:7  akozwa bato ba sika baike, akozala na nkembo lokola nzete ya oliva, akobimisa nsolo mpimbo lokola nsolo ya malasi ma Libano.

14:8  Bakofanda lisusu o molili mwa ye, bakokata bilanga bya mbuma ya mampa lisusu ; bakokolisa nzete ya vino lisusu, ekoyebana lokola vino ya Libano.

14:9  Efraim, nasala nini na bikeko bya yo ? Nakondimela mpe nakobatela ye. Nazali lokola sipresi ekotikalaka na nkasa ibesu, mbuma ya yo iuti epai ya ngai.

14:10  Moto wa bwanya ayoka maloba maye ! Moto wa mayele atia matoi mpo ’te ayeba, zambi nzela inso ya Yawe izali se­mba, bato ba bosembo bakolandaka yango, kasi basumuki bakotuta libaku.